لما حد بيزعل لدرجة الشعور بالالم البدنى...يبقى نسكت بقى ونبطل نزايد عليه وكفاية انه مظلوم (حتى لو من وجهة نظره الشخصية) ودماغه بتغلي من الغيظ!
لما حد يكون منفعل من فرط الاحباط والزعل والضيق...مفيش اي داعى للكلمة السخيفة بتاعة "الموضوع مش مستاهل كل الزعل ده!"
انت ايش عرفك اللى قدامك ده حاسس بايه!! ازاى تقدر تحكم الموضوع ده بالنسبة له قاسى قد ايه... من وجهة نظره ومن تجربته الفريدة يستاهل انه يتأثر ولا لا؟!
ليه بقينا بنزايد على بعض حتى في المعاناة؟ هيا مش مسابقة مين فينا يطلع عينه اكتر من التانى!!
اللى يزعلك ...ولا حاجة بالنسبة لي...يمكن يكون نكتة اصلا....والعكس صحيح
اللى يقهرنى ويسهرنى الليل ممكن مايلفتش انتباهك اساسا!
والاسوأ ان لما يتفتح مجال للبوح باللى مزعل الواحد...تلاقى صاحب المشكلة لازم يسمع كلام شبه "امال انا بقى اعمل ايه؟" ويبقى هو المستمع للمعاناة بتاعة كل الناس في عز ماهو في احتياج حقيقي انه يتسمع فقط!!...اللى بيشكتى ده لجأ لكم لان معندوش حد تانى ينفع يتكلم معاه!! اللى بيشتكى غالبا غالبا بيشعر بندم شديد بعد ما بيحكى...وللاسف مش بيحرم لانه في معاناة دائمة وعلى حافة النار طول الوقت!
اسمعوا يا جماعة ومش هاطلب منكم حتى تتعاطفوا...اسمعوا وخلاص...اعتبروا انها جزء من الصداقة...ما الصداقة دي مش كلمة تافهة... ومش معناها اننا نكون كويسين مع بعض وقت الهزار والضحك والفسح بس...لا خالص...انك تسمع اصلا من غير ما تزايد ولا تسفه من مشاعره ده جزء اصيل من العلاقة دي!
افتكر موقف شخصي ولحد دلوقتى مأثر فيا...لما بابا اتوفى...وهو اغلى شخص عندى في الدنيا كلها بكل ما فيها وعليها...لما مات...من كتر الزعل بقيت مش حاسة بحاجة! بس كنت عايزة اتكلم...انا فاكرة كويس انى جيت اتكلم مرة...اتكبست! اللى هوا انتى مش كل شوية هاتقرفينا بسيرة ابوكى! بطلت! ولما تجرأت ودمعت...اتقالي "اقري له الفاتحة احسن من العياط..اصل العياط مش هايعمل حاجة"...انا لم اتعافى من موت ابويا..لان مكنش في مجال انى اتكلم براحتى للاخر...هايفضل وفاته جرح لم يتم التعامل معه! (ربنا يرحمه ويغفر له)
سيبوا لاصحابكم المجال للشكوى حتى لو انتوا مش مقتنعين ان عنده مشكلة حقيقية تستاهل الانفعال! اصل الانفعال ده مش وليد موقف واحد! الانسان بيستحمل لحد ما يجيب اخره من الصبر والطناش واختلاق الاعذار الخايبة...بعد كده بيكون حقيقي مش طايق نفسه وبينفجر!
الفضفضة دي بتهون عليه...شارك طبعا بكلام ومش لازم تكون موافق على كل افكاره المتضاربة وقت الغضب اللى هو بيكون فيه...وحقيقي لازم برضه تفهم ان ده مش وقت نصايح!!!! مش وقت نصايح خالص!!! اسمع وقول كلام شبه "انا عارف انك مستحمل كتير"...او لو انت عندك وفاء للشخص ده افتح له مجال يتكلم اكتر لحد ما يتعب من الكلام ويهدى...زي انك مثلا تقول له "طيب هاتعمل ايه؟" جملة مطاطة ولا ليها اي معنى اساسا ولكن بتدي اللى قدامك راحة ومساحة انه يتكلم شوية اكتر.
اعتقد كلنا في ضغوط لا نهاية لها...كلنا مأذيين...محدش مرتاح...محدش باله رايق...ومحدش هايعرف برضه يعيش من غير اصحاب! حافظ على اصحابك واسمح لهم يغضبوا قدامكم...دي حاجة كبيرة على فكرة...
ريم اسامة
لينك المدونة على الفيسبوك:
https://www.facebook.com/groups/329904227056535
