مراحل استهلاك الام

العيال مراحل...كل مرحلة تشل اكتر من اللى قبليها...بس عامة هو متفق ان الست بتبطل تنام اول ما تخلف...لحد النوم الكبير بقى...في القبر!

العيال اول ما بتتولد بتكون الام مش عارفة هما عايزين ايه...جعان؟ مغص؟ بردان؟ حران؟ عايز ينام؟ درعاه منمل؟ صباع رجله مزنوق في الشراب؟ زهقان؟! اهو زن وخلاص...ومتفهموش ليه كل العيال بتنام بالنهار وتصحى بالليل...ومهما الست المسكينة تحاول تظبط له اليوم لازم ينكد عليها برضه ويفضل صاحي!! بس في المصايف والرحلات يناموا بدري علشان الست متقدرش تسهر براحتها وتنام بدري علشان هاتصحى تانى يوم زي الشبشب معاهم (والله بجد معرفش ليه - انا شخصيا بيتعمل معايا كده)...ولما ربنا يكرم وينام الام بتبقى نايمة زي الذئب كده..عين مفتوحة وعين مقفولة...نوم على الحركرك لحسن يشرق ويفطس وهوا نايم ولا حاجة...انا شخصيا لما ابني كان لسه مولود كنت بصحى من النوم (لما بعد الشر بنام يعنى) ادور فوقي هوا فين وادور على الارض عليه لحسن يكون وقع! مع انه في سريره!!! والاطفال الصغيرة بالرغم من صغر حجمهم ولكن بيعملوا دربكة رهيبة في اي بيت...الام طول النهار في حلقة مفرغة وبتتكون من: رضاعة...تكريع...قشط...تغير الهدوم مطرح القشط...يهضم في نص ساعة ويغير البامبرز ومش بعيد يكون مسرب في الهدوم وتغير الهدوم كمان...وبعدين فاصل قصير من الزن علشان ينام...ومفيش مانع من شوية مغص مع حبة زن خفيف كده لزوم الفرفشة...ومراحل بقى التسنين والزحف وده ليه احتياطات خاصة...الارض بتتعمل بالمكنسة كل نص ساعة تقريبا مع جرعات مكثفة من الديتول علشان الافندي ايده في بؤه على طول...واللى نظره كويس يبص في الارض بامعان علشان لو في زرار واقع ولا غطا قلم او بلية او خرز اومكرونة ناشفة او اي حاجة ممكن الطفل ياخدها وتسد القصبة الهوائية ويروح فطيس! وبعد كده يمشي ويتشال في الفترة دي كل حاجة من على الترابيزات والتسريحة وكل الباسكيتات (جمع باسكيت) تتشال فوق حاجة عالية...طبعا الصالون بيكون اقرع مفيش حتى طفاية على اي ترابيزة ولا مفرش...التلاجة في المرحلة دي بتشتكي من كتر الحاجة اللى فوقيها!!! واول ما الطفل يمشي مش ممكن استحاله يرضى يقعد في كرسي اي كان نوعه..car seat بقى ولا البتاع المنفوخ ده ولا كرسي البيت ولا عربية الاطفال ام عجل ولا اي حاجة...الطفل يا يمشي ماسك في بنطلون امه او امه تشيله!! الفترة دي الطفل لازم يكون متراقب طوووول الوقت علشان بيحلى لهم يدلدلوا اي حاجة في التواليت (بما فيها دماغهم) او يلعبوا في حلة الغسالة وياسلام بقى على الهواية الاكثر انتشارا وهي مفاتيح النور...والفيش...وينشنوا صوابعهم النونو دي في خرم الكوبس! (بعد ما ابني فشل معاه سدادة الكوبس دهى كنت بحط بلاستر..كان بيشيله برضه!! كنت قربت اسد الفتحات اسمنت!) ولو عندك باب جرار او دولاب جرار...احسن لك تخلعى الضرف علشان ايدهم هايتتفرم! وطبعا لازم تعملي حسابك ان موبايلك هايتحرق من كتر الريالة...السماعة هاتتحرق والميكرفون هايزن ومش بعيد الشاشة تتقسم اتنين بالطول من الرزع...ده لو مخدش غطس في التواليت ويتحرق خالص! ماله التليفون ابو سلك؟ زي الفل بس هاتعلقيه في حاجة عالية علشان ممكن الطفل يخنق نفسه بالسلك (وهايتحرق برضه!) وطبعا كل الاكياس البلاستيك بتختفي من قدامهم.
وبعدين يبدا الكلام واول حاجة بيقولوها هي الشتيمة! ليه متفهموش...بس الشتيمة والتفافة هم اول ما ينطق به العيل! وتبدا الام تشتم بالانجليزي علشان مايلقطش منها....او تحبس الغيظ جواها من غير ما  تعبر عنه لفظيا! 
وبعد كده الطفل بيكبر ومايبطلش طلبات...ماما عطشان...ماما جعان...ماما حمام...ماما عملت على نفسي...ماما ايدي بتوجعني...ماما عندي واوا...ماما العبي معايا...ماما دلقت العصير على الكنبة...ماما عملت ستول ونزل حتة من الشورت على الارض - معلش حتة نونو عادي!(بتحصل والله انا مش بألف)...ماما دلقت الرز على الارض...ماما الترابيزة وقعت...ماما موبايلك وقع من البكلونة...ماما فين القلم البايظ (رميته حبيبي ماهو بايظ) ويبدا فاصل لا يستهان به من الجعير! 
ما في فترة زن وبعد كده فترة جعير!
مش هاتكلم عن البامبرز والتواليت علشان ده عايز خمستاشر مقالة لوحدهم!!
وبعدين في مرحلة "لا"...كل حاجة في الكون لا...وكل حاجة "انا زعلان" او "مش بحبك"....تاكل؟ لا...تشرب؟ لا..ممكن تدخل الحمام وتبطل تترقص هاتعمل على نفسك؟ لا....ممكن تجيب لي التليفون؟ لا....يالا علشان ننام! لا...ياللا علشان نعمل الhome work! لا...ياللا علشان ننزل كده هانتاخر! لا...كل حاجة ممكن تتخيلوها لا! ولو عملتي حاجة ضد رغبتهم "مش بحبك" "انا زعلان منك" او في اطفال امهاتهم متساهلين شوية والطفل بيمد ايده ويضرب امه!!! 
وبعد كده مرحلة المدرسة ودي مرحلة المراهقة المبكرة بقى!!! ودي مش هاتكلم عنها علشان اهوااال!!! 
وفي الاخر بعد ما الست اعصابها تشيط وضهرها يستقيل وتجيب ضهر استيراد استخدام طبيب..وكعوبها تتحلل من كتر الوقوف وخدمة العيال تلاقي ابنك شحط حجم ضرفة الشيش ويقولك "من فضلك يا ماما دي حياتي الشخصية ملكيش دعوة"!!!
ايام سودا!!

ريم اسامة (المفقوع مرارتها خمس مرات لحد دلوقتي)
https://www.facebook.com/groups/106180712853321/