السيدات العاملات كتير منهم بيحقد على الست اللى قاعدة في البيت - والعكس..
دايما تلاقي ربة البيت بتتمنى تشتغل...والست العاملة بتتمنى "الراحة" اللى فيها ست البيت
بصوا - اختصارا: محدش مرتاح!
لا في البيت مبسوطة ولا اللى في الشغل مرتاحة!
الصدف السعيدة خلتنى اقعد في البيت كام يوم كده...ابهار!!
بما انى سيدة عاملة ودايما بحقد على الستات اللى قاعدين في البيت...ومج النسكافيه عاملي مشكلة نفسية ودايما بقول "على الاقل اللى قاعدة في البيت دي بتشرب النسكافيه براحتها"...طلع المج ده عامل مشكلة لكل الستات لان اللى في البيت دايما بتقول "ماهي اللى في شغلها دي بتشرب النسكافيه بمزاج من غير عيل يزن ولا عيل يقولها تعالي شطفيني!"
احنا ندش المج ده - هانخسر بعض على نسكافيه ولا ايه؟!!
ودايما لما واحدة منهم تقول قدامى ان معندهاش وقت...كان لازم احرجها واقول "امال انا اقول ايييييه؟؟"
المهم
احب بس الاول اعتذر لكل ربات البيوت اللى كنت دايما باتهمهم بالرحرحه وروقان البال وبراح الوقت...الواحد طلع عنده كم لا بأس به من سوء الظن!
اولا اكتشفت ان السيدة العاملة محدش بيطلب منها كتير! ايوة فعلا والله....جوزها مثلا مش بيقدر يطلب منها تعمل كل حاجة...لازم هايشتغل معاها او يساعد...حتى لو بقدر ضئيل...بس كده كده هايساعد غصب عنه....اما ست البيت جوزها بيتأمر عليها براحته خااااالص بحجة "وانتى بتعملي ايه يعنى؟"...فاحنا واخدين حقنا شوية.
اللى بتشتغل مش بتقعد مع اولادها نص اليوم تقريبا...وده بيقلل من التصادم بينها وبين العيال...طبعا الرجالة الجميلة مفهمينا ان شغلنا ده هو تضحية بالصحة النفسية للاطفال...صدقوني ابدا...ده بيخلي الست تستحمل غباوتهم بعد الضهر (لان ودانها مرتاحة من الزن والطلبات طول النهار)...وبعد الضهر لو زودوا العيار تقولهم "كفاية بقى انا لسه جاية من الشغل"...فعندنا مخرج من الزن برضه...اللهم لا حسد!!
السيدة العاملة غالبا بتجيب اللى يساعدها في تنضيف البيت...الست اللى في البيت لما بتجيب حد يساعدها بتلاقي اللى بيذلها! "يعنى انتى قاعدة في البيت لا شغلة ولا مشغلة وكماااااان تجيبي اللى ينضف؟ ده انتى لو كل يوم نضفتي اوضة البيت هايبقى فلة"...بتحصل بتحصل...او لو مش قادرة تعمل اكل...ياسلااااااااااااااام...يتعلق فيها مشانق دي...امال بتعملي ايه طول النهار؟؟ امال انا اللى طفحان الدم طول اليوم اعمل ايه؟؟ يعنى يرضى ربنا ارجع ومفيش اكل عدل يتاكل؟؟؟؟ حرام عليكي يا شيخة....والى اخره من الاتهامات والحسبنة والنفخ والتقطيم! بس لو
السيدة العاملة لو قررت ان الغدا فول وطعمية وبطاطس او حتى مطبختش محدش يقدر يقولها حاجة!! (اللهم لا حسسسسد مرة تانية)
السيدة العاملة لو قررت ان الغدا فول وطعمية وبطاطس او حتى مطبختش محدش يقدر يقولها حاجة!! (اللهم لا حسسسسد مرة تانية)
والمشكلة الحقيقة ان ست البيت بتسمع كلام سخيف كتير جدا بلا اي ذنب...يعنى زي مثلا "ما انتى قاعدة في البيت وبتصحى الضهر"...يا سيدي ما تصحى....هيا حرة!! وكمان موضوع "لا شغلة ولا مشغله" ده رخم اوي...شغل البيت زي ما قلت مرة يتواجد من العدم ولا نهاية له وبالتالي بتشتغل ونص...."عايشة في مياة اللفت"..."مش حاسة بالقرش بيجي ازاي"..."ست فاضية كل اللى بيشغلها هاتبطخ ايه تانى يوم"..."عالم رايقة"...."طبعا طول النهار مأنتخة من الفيلم ده للمسلسل ده"
والمشكلة الاكبر ان الست مش عارفة تدافع عن نفسها...لان مهما قالت هاتلاقي اللى يتريق عليها...يعنى انها تقول كم المشاوير اللى مطلوب منها وانها بتوصل التمارين والدروس كل مرة...وكمان جوزها طبعا بيوفر فلوس باص المدرسة وهيا تودي وتجيب...وتعمل كل المشاوير المملة زي السوبر ماركت ودفع الفواتير لوحدها...حد يطلع زي الصاروخ يقولها "اه بس ده مش كل يوم...مش كل يوم هاتنزلي من بيتك في ميعاد معين بدري وتركبي مواصلات وتشوفي خلق تسد النفس!"
في نقطة احنا غافلين عنها وستات البيوت بيتكسفوا يتكلموا فيها..وهي "مصروفهم"..في رجالة كتير عندهم دم بصراحة...وفي منهم اللى بيدي مرتبه بالكامل لمراته وهي تتصرف في تقسيمه...وفي اللى بيخصص مبلغ للبيت ومصروف شخصي ليها...المفروض الست بتاخد مصروف من جوزها لمصاريفها الشخصية...واللى بعد كام يوم من الشهر بتحطه في مصروف البيت علشان يكفي...فهي بتواجه معاناه المصروف....لان لو كانت بتشتغل كان هايكون في ايدها فلوس اكتر (برضه كانت هاتحطهم في البيت) ولكن اكيد شعور المرتب افضل من المصروف ودى معاناه مش كتير من الستات بترضى تتكلم فيها حفظا لماء الوجه وماء وجه جوزها.
ست البيت بتتعب اوي...عصبيا ونفسيا...طول الاسبوع في البيت (الا لو نزلت توصل مشاوير)...وهي داخل البيت دايما بتشتغل (مواعين..غسيل...طبيخ...تنضيف...ترويق...دعك حمامات...تحمي العيال...تعمل حلو وحادق)...ومطلوب منها تحضر 3 وجبات يوميا وده ارهاق ذهني والله مش سهل لان العيال بتزهق وعايزين تجديد دايما...كم المواعين رهيب لان طول اليوم في ناس بتستخدمهم...وجود الاطفال معاها ليل نهار مؤلم...ربنا يخليهم...لكن الست بتكون محتاجة تفصل شوية عنهم وده بيكون صعب...فبتحضر كل خناقات العيال وزهقهم وطلباتهم المملة والخلافات اللانهائية بينهم وبتحاول تحل المشاكل دي طبعا علشان وجع الدماغ...غير الكارتون اللى في ودنها دايما...ومطلوب منها تستحمل وتربي وتنشئ جيل هادي و"كيوت"...لازم يكون البيت دايما في حال منظم ونضيف ورائحته مريحه...والهدوم في الدولاب ومكوية كويس....على كتفها مسئولية الدراسة كاملة (بما انها في البيت)...وفي نفس الوقت تجبر الطفل على تحسين خطه (فاضية بقى تقعد جنبه ساعتين يحسن خطه يوميا)...وتخترع لهم نشاطات في البيت تشغلهم بيها وتنمى ذكائهم...وفي الاخر يقولوا عليها "ماهي فاضية".
ست البيت مظلومة...دايما بيتم مقارنتها باللى بتشتغل...وللاسف محدش بيدافع عنها ظنا انها مرتاحة وفي نعمة.
رب ارحم ربات البيوت...فالمعاناة حقيقية!
ريم اسامة
