في مجتمعنا لازم تمسك نفسك عن الزعل...عن الانهيار...عن الحزن...عن المشاعر بشكل عام!!
طالما مشاعرك دي مش قدام حد يبقى تمام...طالما انت بتزعل لوحدك ومحدش بيتعرض للزعل ده...انت كده ناضج وكبير وصح!
ده اكبر غلط!!
ليه في الجنازات او العزاء دايما نسمع جملة "لا امسك نفسك كده"..."هوا العياط هايرجع اللى راح؟"..."تماسكى علشان مامتك/اولادك/اخواتك...الخ"
ده اكبر غلط...من حق الانسان يعبر عن مشاعره بالاسلوب اللى مناسب له في الوقت اللى يحبه....من حقه يزعل ويعيط وينهار وكل حاجة...مش علشان انت مش عايز تشوف معاناة غيرك يبقى الشخص اللى قدامك غلط...انت مش عايز تشوف معاناة حد يبقى ببساطة ماتظهرش في الصورة.
نفس الشئ على الفرح...من حق الانسان يفرح بالاسلوب اللى يرتاح له....يفرح باللى يعجبه...مش علشان الحاجة اللى فرحت صاحبك انت شايفها تافهة يبقى هوا انسان تافه مثلا...لا خالص....انت بس اللى مش مقدر...كل واحد بيفرح بحاجات مختلفة عن التانى وبيعبر عن مشاعره باسلوب فريد عن اي حد تانى.
انت دورك تسكت...بتعرف تسكت؟ ده دورك!
لو مش قادر تقدر مشاعر حد...التزم الصمت! حقه يزعل او يفرح وحقه محدش يقلل من شعوره...بكل بساطة!
احنا اتربينا كده...المشاعر دي حاجة شخصية غلط وعيب تظهر (خصوصا لو راجل)...وبالتالي احنا بنربى الاولاد (الذكور) من الصغر ان ماينفعش يعيط!! رغم ان العياط ده ابسط واول ترجمة للزعل والحزن! انت بقى بتمنع الطفل ده انه يعبر حتى عن حزنه (اللى هوا طبعا بسيط بالنسبة لنا لكن في نظره حاجة كبيرة)...لا وكمان يقتنع انه مايعيطش علشان عيب!!! يا سلام؟!
الراجل لو عيط يبقى ضعيف ومهزوز...مش حزين مثلا؟ لالا..هوا ضعيف!!
الطفل اللى بنجبره على عدم التعبير عن مشاعره...لما يكبر هايبقى راجل جاحد...مش مقدر دموع حد...لانها بالنسبة له ضعف...وماينفعش الانسان يضعف!!
وفكرة ان العياط مش هايرجع اللى فات...حقيقي فعلا ...لكن ايه الضرر من شوية دموع؟ شوية دموع تريح انسان من ضغوط داخلية...العياط رد فعل لحزن او فقد او ظلم...رد فعل...هانمنع رد الفعل علشان انت مش عايز تشوف حد بيضعف؟؟
عبروا عن نفسكم عادى يا جماعة...ده لصحتكم النفسية...ده لمنع الاحباطات والاكتئاب...من حقك تزعل...من حقك تعبر عن ده باسلوبك..ومش من حق حد يحكم عليك!!
لو اللى حواليك بيحكموا عليك وبيتحكموا في ردود افعالك...اعتقد ده الوقت اللى لازم تغير فيه الناس دي...تستبدلهم....ارحموا نفسكم قبل ما تتوقعوا رحمة من غيركم!
ريم اسامة
لينك المدونة على الفيسبوك
https://www.facebook.com/groups/329904227056535
