رائحة الوجدان

"ايه رائحة الوجدان دي؟"...معلش يا جماعة - افرضوا حد "عميق" حب يقرا لي من باب التغيير...اهو بحاول اخاطب مختلف فئات الشعب :D اصل في ناس كتير اوي اليومين دول بيحبوا يعيشوا دور المثقف العميق الداري ببواطن الامور (ال يعنى)...والناس دي بتحب تستخدم شوية الفاظ ومصطلحات هي في اغلبها مطاط ممكن استبداله بكلام خفيف ومفهوم وبلا "عمق"!

مش موضوعنا!

موضوعنا النهاردة الذكريات المقترنة بالرائحة...محدش يقفل استنوا هاشرح! يعنى مثلا تشم ريحة المياة المالحة في اي مدينة ساحلية...تفتكر ايامك زمان وانت صغير...لما كانت دي الريحة اللى تستقبلها اول ما تروح المصيف...الريحة المقترنة بالفرحة العارمة والسعادة المطلقة وانعدام المسئولية...طفولة وبراءة ولعب وانطلاق وسباحة وكل حاجة حلوة.

انا شخصيا اكتر ريحة بتخليني احس بالسعادة هي الفراولة...بافتكر العباسية لما كنا بنروح لجدتي الله يرحمها...بيتها كان جميل...مريح اوي ومش حر حتى في عز الصيف (معرفش ازاي)...دايما عندها كيك (صنع ايديها) وكانت بتعمل منه انواع مختلفة وكتير...ولازم تعملنا عصير وشاي كشري لبابا...كان عندها بلكونة مستحيل انساها...في البلكونة دي اتجمعنا مع اصدقاء الطفولة...اولاد وبنات عماتي واعمامى...السور كان تلات اربعه عواميد وبالتالي طووول عمرنا بنعرف نشوف الشارع من البلكونة :) وهرينا الناس بمب في العيد حتى لما كان طولنا نص متر بس :) وكان في عصافير كمان...تيته الله يرحمها كانت شيك ومهتمه بنفسها حتى في السن الكبير...وكانت منظمه اوي وبتعرف لو شلنا حاجة من مكانها...كانت بتحط برفان ريحته خفيفة وشيك...حتى لبس البيت بتاعها كان شكله حلو (الله يرحمها)...معرفش اشمعنى الفراولة اللى بتفكرني بالبيت ده...بس بحب ريحه الفراولة...وبحب افتكر البيت :) 

وفي نفس الوقت ريحة البرتقال بتفكرني ببيت جدتي التانية (الله يرحمها) والدة امى...كانت بتحب الفاكهة اوي ودايما عندها انواع كتير منها...ولما كنا بنروح لها كانت بتدينا فلوس :) لازم كل مرة تدينا فلوس...الله يرحمها كان شعرها جميل جدا...طويل وناعم واسود (بلا صبغة)...وكان في اوضتها كنبة كبيرة...كنا نلعب دايما في اوضتها ونبهدلها الدنيا وكانت بتسيبنا بصراحة...نترص على الكنبة نتفرج على اي فيلم في اوضتها مع بنات واولاد خالاتي...وكان دولابها فيه مراية طويلة وكنا بناخد الايشاربات بتاعتها ونلفها علينا ال يعنى فساتين سهرة وحاجات كده ونمثل عروض ازياء قدام مرايتها...والدولاب ده كان دايما فيه هدوم جديدة غير مستخدمة...وبرضه كانت البلكونة شيئ مميز في بيتها...بس بلكونة الجيران كانت قريبة من بيتها ولما كنا صغيرين كنا بنحدف على الجيران مشابك :))) كنا عيال مؤذية :) 

رائحة برفان بابا...بابا بيستخدم برفانات مختلفة بس لما تتحط عليه بتتحول لريحة واحدة...بابا حبيبي...ريحة مميزة وهادية ومريحة جدا نفسيا...اي حاجة خاصة بوالدي ليها نفس الريحة...مش قادرة احط لها اسم...حتى الساعة والمحفظة ليها نفس الرائحة المميزة :)

ورائحة القهوة التركي...ماما حبيبتي لازم كل يوم الصبح تشرب قهوة جنب البلكونة في اوضة بعيد عن هيصة باقي البيت...تشربها في هدوء وبعد كده تواجه اليوم والمطبخ :)

ريحة كريم الاطفال (اول تجربتي مع الامومة وقمة التوتر انى اموت ابني غصب عني!)

ريحة الشاي بنعناع (جوزي حبيبي :) بيحبه جدا)

ريحة الشيكولاته (اختى طبعا)

هاتلاقوا انتوا كمان كده بس ركزوا شوية في اللى حواليكم

الكتاب الجديد والحبر لسه مولود جواه...هدووووء نفسي وسعادة 

الكلور في حمام السباحة 

الجلد الجديد (جزم او شنط)

البطاطا في الفرن او المشوية في الشارع 

ريحة الفتة 

برفان معين 

الهدوم الجديدة (بالنسبة لي الريحة دي مربوطة بالعيد على طول)

الكوافير (ايوة الكوافير له ريحة اسئلوا اي ست )

صابون نوع محدد  او شامبو (غالبا هايكون مقترن بشخص محدد في حياتكم)

الشواء 

مياه الورد

الشاي والنسكافيه والقرفة

التوابل 

ريحة المانيكير 

الفنيك (محدش يضحك بس...ركزوا ممكن تفكركم بحاجة)

المعسل او السجاير

النجيلة اللي اتقصت جديد

الريحان (بيفكرني بماما برضه - كانت بتجيب منه عود وتحطه في المطبخ)

البخور (بيت بابا وماما يوم الجمعة)

السمك المشوي 

ريحة الاطفال اللى لسه مولوده

الديتول 

المغات (انا عارفة ان بابا هايقرف من الكلمة دي وممكن مايكملش .. علشان كده خليتها في الاخر يا بابا :) )

الجيم gym
العربية الجديدة
الفلوووووس الجديدة 
محلات الدهب (فيها ريحة مميزة رغم ان الدهب مالوش ريحة )
الصلصال
المراكب
معجون الحلاقة 
الكاري

الروائح لا نهاية لها...تفاصيل اليوم والذكريات هي اللى بتدي حياتنا طعم ومعنى و"عمق" :D

ريم اسامة

جروب المدونة على الفيسبوك:
https://www.facebook.com/groups/329904227056535/