اربعين سنة!
انا بقيت اربعين! الرقم غريب على ودنى! شعوري الحقيقي انى لسه متخرجة من الكلية...يعنى 22 سنة بالكتير اوي!!
اربعين سنة....اتجوزت من اكتر من اتناشر سنة (ايه الارقام دي يا جماعة)...اطفالي قربوا يبقوا طولي ما شاء الله...انا بقى عندي اطفال طولي؟!!
الاربعين جاية معايا بأسئلة وجودية...من انتم؟ :)
عامة الست بتعيش اولى فترات شبابها خايفة من رقم 30 وبعد كده تعيش ذروة شبابها خايفة من 40...وانا اكيد منهم!
كنت دايما متخيلة اربعين يعنى شعر ابيض وتجاعيد...وراجل زهق من مراته!!!
بجد احنا عندنا معتقدات سلبية اتجاه الست بتفرم معنوياتها....اصل الست مالهاش تاريخ صلاحية...احنا بنتعامل مع نفسنا ومع فكرة الستات عموما ان لهم تاريخ وتبوظ!
في افكار قديمة كانت بتسيطر علينا...زي ان قبل اربعين لازم تكون الست اتجوزت وخلفت...لازم تكون استقرت في عمل...لازم يكون لها بيت مستقل وتديره بدقة...لازم تكون خلصت دراسة عليا كمان...اربعين يعنى خلصتى مجهود...خلصتي انجازات كبيرة...يكون عندك استقرار مادى ومعاكى مبلغ في البنك يسند ضهرك....
جت الاربعين واكتشفت ان معظم اصحابى فعلا اتجوزوا وخلفوا...واطلقوا!! وعندهم كامل الاستعداد الارتباط مرة تانية براجل يحتوى مشاعرها ويحسسها بالامان.
معظم اصحابي كانوا في شغل كويس جدا اول ما اتخرجنا...وحاليا في شغل مختلف تماما...ويمكن حتى في مجال مختلف عن بدايتهم وفئة منهم سابوا الشغل خالص علشان يهتموا بأسرتهم واطفالهم...او للسفر مع الزوج
تقريبا كل اصحابي مديونين للبنوك بقروض او فيزا او اقساط عربية
في منهم اللى لسه هاتتجوز واللى لسه هاتخلف
اربعين رقم كبير....مقارنة بعيال الجامعة!! اربعين هو سن الاتزان...مش هاقول وقار..الانسان الوقور بيكون كده طول عمره
لكن الاتزان....رؤية الامور بحجمها شبه الطبيعي (لسه في خمسين وستين سنة...الخبرة كلها دي بقى)
الست فعلا بتلف منعطف في طريقها عند السن ده...لكنه منعطف اهدأ...واضح المعالم...الطريق مستوى بشكل اكبر من قبل كده...استقرارها العاطفى والعقلى بينعكس على ثقتها في نفسها وفي تفكيرها وقراراتها وتصرفاتها بشكل عام. في السن ده الست مش مستنية اذن حد علشان تتصرف....قبل كده غالبا كانت بترجع لحد اكبر...حاليا بقى عندها الثقة في التصرف بتلقائية وبلا مرجعية...ممكن تلجأ لشخص اكبر في العمر فقط للتأكد انها على الطريق الصحيح....للتأكد مش اكتر.
كفاية تكسير في الست الاربعينية...وفكرة ان خلاص "اللى لحق لحق" دي غبية اوي وغير واقعية كمان...الست تقدر تعمل اي حاجة في اي سن....لاننا ببساطة نمتلك من المرونة وشغف الحياة ما يؤهلنا للتغيير والتجربة.
بنكتشف عند السن ده ان الاصدقاء مراحل في حياتنا...الا القليل جدا جدا...قليل اوي اللى ممكن يفضل مكمل معاكى...ومع فقد الاصحاب تتأكد فكرة ان الصداقات مش بعدد السنين...لكن هم الناس اللى شبهك...اللى عندهم على الاقل نفس القناعات والمبادئ...الصديقة هي اللى تشيل خاطرك...اللى تحب لك الخير...اللى تفرح لما تشوفك ناجحة (واعتقد ده قليل اوي)...اللى توجد لك اعذار...ولو ملقتش عذر تواجهك وترجع لك يمكن فهمتك غلط...اللى تفضل جنبك وقت الحزن قبل الفرح...اللى تؤكد لك مميزاتك وقت انهيارك النفسي ووقت عدم الثقة في النفس والشك في قدرتنا على المواصلة.
العلاقات العائلية بترجع تاخد جزء من اهتمامنا مرة تانية...لاننا بنكتشف ان علاقة الدم اقوى في النهاية.
اربعين يعنى تجارب جديدة....يعنى تصرف بلا خوف...ثقة في النفس وفي التفكير...علاقات اساسها حقيقي بلا مظاهر خادعة...اولويات واقعية...التمكن من استغلال قدراتنا...قرارات صائبة في معظم الاحيان...حكم اوقع على الامور والعلاقات...قدرة على ضبط النفس وضبط انفعالاتها.
اربعين باب...يفتح على جنينة....فيها مرجيحة في شجرة بضل كبير...وجنبها كتاب ممتع وفنجان قهوة...استمتعى
ريم اسامة
لينك المدونة على الفيسبوك
https://www.facebook.com/groups/329904227056535
