ثقافة النيش

النيش مش جزء من العفش...لا خالص...دي ثقافة! 

انك تصرف كتير اوي واحسن حاجة واغلى حاجة واشيك حاجة تخزنها على جنب يمكن حد ييجي وتقدم له فيها...ده الهدف الحقيقي من النيش!! ولما حد ييجي مش بنقدم فيها برضه خوفا انها تتكسر والطقم كله يبوظ...ويفضل النيش زي ما هو لحد ما يتورث للجيل اللى بعده! 
النيش اختراع فاشل...لو كل بيت استبدل النيش بمكتبة - المجتمع ده هايتبدل!!

طقم شاي وطقم قهوة وكاسات وكوبايات كريستال...وطقم صيني وطقم اركوبال وصينية فضة وسكارية فضة في كريستال! 

ليه؟
الناس بقت تقيًم بعض بالكاسات والكريستال؟؟ فعلا؟؟
تسيبي جوزك ياكل في طبق ميلامين او ستانليس او زجاج او صيني طرفه مشطوف وتسيبي اجمل اطقم واطباق للضيوف اللى مش بيعتبوا باب الشقة! انتى راضية تاكلي في حاجات مقرفة وشكلها غبي...براحتك! جوزك وعيالك ذنبهم ايه؟ وبعدين هما الضيوف اغلى من نفسك؟ 
طبعا الكلام ده لا ينطبق على كل الناس ولكن ستات كتير اوي اوي عندها ثقافة النيش!
سيبك من العيال...ياكلوا في غطا الحلة مش مهم....انتى ليه تقرفي نفسك في طبق يسد النفس؟ ايه الفكرة تتعبي وتدفعي دم قلبك وتختاري بعناية شديدة علشان ناس من بره؟
وبالتالي السلوك ده بينتقل لحياتنا العادية - حياتنا اليومية. احسن شنطة واحسن جزمة لما نخرج عند الضيوف اللى بنروح لهم كل سنة ضوئية مرة...ولما تروحي السوبر ماركت تلبسي جزمة جربانة....نجيب جراب معفن للموبايل علشان نحافظ عليه ولما نروح فرح نشيل الجراب...نضارة بلاستيك حقيرة للبيت ونضارة شيك للخروج والزيارات. 
مش اعتراضي ان يكون في حاجات للخروج وحاجات للبيت - لان ده طبيعي جدا - اعتراضي كله ان ارخص حاجة واوحش حاجة بتكون للبيت او "بعيد عن عين الناس"....مع انها الحاجة اللى بنستعملها اكتر وبنشوفها اكتر...واللى معاكى في البيت بيشوفوها على طول. ليه؟ هيا الناس اللى بره احسن من اللى جوا؟ انتى شخصيا ليه بتستخسري في نفسك؟  
يعنى احنا نحوش ونختار ونتعب علشان غيرنا يشوفها وخلاص كده؟ 
لما بيتكسر ايد مج ويبقى زي الكوز بتشربي فيه في البيت او بتحطي فيه المعالق الخشب او شوية نعناع في مياة...او حتى فرش الاسنان!!...وبتخلي المجات السليمة على جنب لحد ما الاكواز كلها تتكسر وماتنفعش في حاجة غير انك تخبطي بيها العيال...لو جه كوباية حقيرة هدية مع ازازة زيت بتخليها استعمال البيت وبتشيلي الجديد والسليم والشيك في النيش.
ليه؟
ايه الفكرة؟ 
مجاش في بالك ترمي المج المكسور ليه؟ مش حرام والله خالص...مين اقنعك انه حرام وخسارة وتبذير؟ الكوباية الهدية شيليها في اي حتة ولا اديها للبواب...تشربي في حاجة رخيصة ومقرفة ليه؟ 
وياريت السلوك ده بيقف عندك...لا ده عدوى...تلاقي اولادك كده برضه...ممكن يشيلوا الشرابات الضايع فردتها التانية مع بعض في كيس ويلبسوا فردة سودا مع فردة صفرا في الشتا في البيت...اي حاجة ماهو محدش شايف!!...القرف للبيت والجميل والحلو للناس اللى مش بنشوفها كتير!!
بصى بقى...من الدقيقة دي...روحي يا هانم على المطبخ...شيلي كل المجات المقرفة المبقعة والمكسور طرفها واللى ايدها طارت وارميها...يا ستي لو صعبان عليكي شيليها على جنب في اي حتة وهاتي حاجات جديدة وشكلها حلو وشيك...مش بقولك هاتي مج بستين جنيه بس هاتي حاجات شكلها يفتح النفس وجديدة....الكوبايات المخربشة والقديمة اللى قرفنا منها وزهقنا...اخفيها...هاتي غيرها...ابسطي نفسك وابسطي غيرك. الاطباق الغريبة اللى بتأكلي عيلتك فيها...في نفس الخرابة اللى هاترمي فيها اللى فات...هاتي بقى كام طبق مودرن كده دلعي نفسك بيهم...بلاش استخسار واسترخاص في نفسنا...احنا نستاهل احسن من كده.
مش عيب تجيبي حاجة عليها القيمة للبيت...بلاش منطق "محدش هايشوفها اصرف في حاجة تانية احسن"...انتى هاتشوفيها...وانتى اهم انسان في حياتك على فكرة...يبقى انتى تنبسطي مش مهم اي حد تانى!
التيشيرتات القديمة المبقعة البهتانة والبنطلونات المخرومة والشرابات اليتيمة...مكانهم الزبالة!!! مش حتة تانية واكيد مش الدولاب!! 


دعوة للثورة على ثقافة النيش!

ريم اسامة
https://www.facebook.com/groups/329904227056535/

هوايتك ايه؟

الهوايات من الحاجات المؤثرة جدا في شخصيات الناس...ولكن في عائلات معندهاش الثقافة دي...ثقافة تنمية الهواية عند اولادها او حتى عند نفسهم. في شريحة كبيرة من المجتمع مقتنعة ان اي حاجة مش بتجيب فلوس يبقى ملهاش لازمة! 
الهواية هي فعل بنحبه او بنستمتع به ومفيد ولا عائد لها! في ناس بتحترف الهواية وبتكون مهنة وبتجيب لهم دخل كويس...بس في الاساس يعنى الهواية لا عائد منها ومفيدة.
خدوا بالكوا بس من كلمة مفيدة دي 
يعنى يا بيه انت وهو القعدة على القهوة مش هواية - التتنيح في التليفون ليل نهار مش هواية...والرغي في التليفون يا هانم مش هواية...والسجاير و الشيشة ونميمة مش هوايات!المطب اللى ناس كتير بتقع فيه هي اعتبار العادات هوايات..يعنى التدخين والصرمحة واللف بالعربية في الشوارع تصنف عادات سيئة مش حاجة تانية ! 
انا شخصيا مش عارفة يعنى ايه حد معندوش هواية! ازاي طيب؟ مفيش اي حاجة بتحبوها؟ الفرجة على التليفزيون لا تصنف هواية برضه على فكرة...متابعة المسلسلات مستحيل تكون هواية! 
من اشهر الهوايات هي القراءة...ولكن عيب اوي تكون دي هواية...القراءة تعتبر من اساسيات الحياة...ازاي تصنف هواية؟ من غير قراءة مفيش حياة...مفيش ثقافة...مفيش حس فني ولا حس ادبي ولا حتى ذوق! اقرأ اي حاجة...روايات...تاريخ...ادب بانواعه... سياسة....علوم اجتماع...اي حاجة. يعنى ايه انسان لا يقرأ؟!! وبالتالي طبعا اللى مابيقراش ده مش هايعود اولاده عليها...ماهو شخصيا ملوش فيها!! 
الناس اللى مش بتقرا...راجعوا نفسكوا...فعلا بتخسروا كتير اوي وبتحرموا اولادكم من مصدر الثقافة والوعي. اللى يغيظ في موضوع القراءة ده حاجة...في بعض الناس واخدين وقت الانتهاء من القراءة مسألة شرف ولازم يخلص بسرعة جدا وفي وقت قياسي..كده هو انسان "دودة كتاب" وبيعشق القراءة ومستعد يوقف الحياة لحد ما الكتاب يخلص...وهنا تبدا البروبجندا الحقيقية...على الفيسبوك وعلى تويتر وعلى الانستجرام...صورة لغلاف الكتاب وعدد صفحاته وانه كتاب تحفة وانه خلصه في كذا يوم او كذا ساعة....كل ده علشان الناس تعلق وتقول "ياااااااااااه لحقت تخلصه؟" ويجي الرد "انا مكنتش بنام تقريبا لحد ما خلص...مقدرتش اسيبه!" لو الموضوع ده حصل مرة مثلا ماشي...ممكن فعلا يكون كتاب رائع جدا لدرجة قراءة 600 صفحة في يومين...ممكن "مرة" .... بس مش كل كتاب كده. احب اوجه لهم رسالة...الكتاب مش مهمة ولا واجب ولا مسابقة....المستفيد الاول والاخير والوحيد من القراءة هو انت شخصيا...انبسط بالكتاب...استمتع به....مش عيب ابدا تعيد قراءة بعض الجمل الجميلة...ايه سلق البيض ده!! حتى لو خلصته في شهر محدش هايحاسبك...لو مقرتش اصلا  محدش هايهتم...انت بتطور نفسك بالقراءة...بلاش تتفشخر بنفسك اوي كده ! في ناس بتقرا اكتر منك وكتب اعمق منك واذكى واكثر ثقافة.
معظم الستات بتتجه الى اشغال الابرة بانواعها (كروشيه - تريكو - لاسيه - كانافا - تطريز - خياطة...الخ) ودايما وراء كل ست منتجة...راجل يحبط فيها! يحسب الخيوط بكام والمنتج اللى طلع مش "قد كده" وكانت اشترته ارخص واحلى واشيك! ولو عملت بطانية يقولها "بطانية تريكو؟؟؟ احنا في سنة كام؟"....لو عملت كوفية حتى هايتقالها ان الجاهزة احلى والغرز اضيق واشيك وموضة اكتر...وارخص! قليل اوي بيقدروا شغل الايد! يا ست انتى وهيا...ولا يهمك....سيبك من تكسير المجاديف...استمري...لو شغل الابرة بيخليكي اكثر تركيزا واكثر تنظيما لافكارك استمري...عد الغرز والاستمرار بانتظام وبالترتيب الصحيح بينظم التفكير بشكل كبير وبيساعد على التركيز...سيبك من الناس المحبطة...اللى يمشي ورا الناس يبيع هدومه! 
دوروا على اهتمامات تانية - في مجالات كتير اوي زي النجارة والخياطة وشغل الابرة والرسم والموسيقى والكتابة والتدريس وصنع الاكسسوارات والرياضة والطبيخ...لو معندكش هواية متسيبش نفسك كده...لازم تهتم بنفسك وبتنمية عقلك وذاتك
ولوعندك فعلا هواية نميها واهتم بها....وحاول تقديم هوايات كتير لاولادك علشان لما يكبروا يشبطوا في حاجة تنفعهم.

انا عملت اللى عليا وقلت لكوا :)

ريم اسامة 
https://www.facebook.com/groups/329904227056535/

كسر المجاديف

كسر المجاديف ممكن نصنفه انه هدف لبعض الناس...في اشخاص كده بتكره تشوف حاجة حلوة قدامها...بتكره تقابل حد ناجح او متميز او حد عنده هدف (لسه متحققش)...في ستات بتكره جدا اي واحدة شيك او اجتماعية او جميلة او دمها خفيف. في رجالة بتتعككن لما يقابلوا رجالة محبوبين ولهم شعبية.

كلنا بلا استثناء اتعرضنا للمواقف دي...وفي مننا اللى بيتضايق لما يشوف نجاح في حياة اصحابنا...الفرق بين الاشخاص الطبيعية والمريضة هو كسر المجاديف.

يعنى واحدة صاحبتك خست جامد وشكلها اختلف وبقت انسانة تانية....اولا انتى اصلا مش هاتقولي لها انها خست...ولما هيا تسئلك تعملي عمياء وتقولي لها "خسيتي؟ ممم ممكن شوية....يمكن علشان بشوفك كتير مخدتش بالي....بس لسه المشوار طويل اوعي تيأسي بقى زي كل مرة"!! ليه؟ قصدك ايه؟؟ انتى مش بتكسري مجاديفها وبس...لا...انتى بتكسري صورتها الجديدة في عينها...الاحباط في اقذر اشكاله!!

او واحدة جايبة لبس جديد وفرحانة بالنيو لوك...تقولي لها "متخنك شوية؟"...بتسئليها؟؟؟ ده انتى ساقعة اوي!!! لو عندك كلمة حلوة قولي...مفيش يبقى تسكتي خالص او اكدبي!!!

لو واحدة صاحبتك اكتشفت هواية جديدة...شغل ابرة او اعمال فنية من اي نوع....وانتى متغاظة علشان اقصى حاجة بتعرفي تعمليها هي نسكافيه بوش! ولما تقولك وكلها حماس انها بدأت في حاجة جديدة ومبسوطة اوووي.....تردي عليها "اه اه...وانتى هاتسيبيها امتى؟ ما انتي كل شوية تبدأي في حاجة وتزهقي وهكذا" وهي تؤكد لك انها فعلا مبسوطة المرة دي بالهواية الجديدة...وانتى ابداااا...لازم تكسري مقادفها...."لما نشوف....قلتي لي الكلام ده مليون مرة قبل كده...عامة براحتك"!

واحد صاحبك يدفع اشتراك ست شهور لجيم مشهور وغالي...وانت تلقائيا تتغاظ علشان وراك مسئوليات كتير ومبلغ زي ده في الجيم يصنف "تأخر ذهني"..."بيتك اولى بالمبلغ ده حرام عليك"..."كرشك ده هاينزل لو بطلت طفح...هما في الجيم هايقفلوا بؤك؟"...."بتشيل كام دلوقتي؟" (كام كيلو حديد يعنى)....وانت مالك ؟ يدفع فلوسه في الجيم ولا حتى يدفع دروس رقص! يا تشجعه يا تخرس!

لو مامتك قررت تجرب اكلة جديدة "هاتبوظي ايه تانى؟"..."والنبي يا ماما بلاش افتكاسات بابا مش بيحب كده"...."فاكرة تورتة الكنافة؟ كنا هانتسمم كلنا"....يا حبيبتي مش عاجبك اكل ماما...روحي اعملي انتى اكل!! سيبيها تجرب...هيا مش بتعانى من عجز في التفكير او التخيل.... مطبخها وهيا حرة. مش ضروري كل يوم رز وخضار ولحمة! 

لو اختك قالت انها هاتجرب تعمل كريم كراميل بطريقة جديدة...تجيبي لها تجاربها الفاشلة كلها في الكريم بتاع ده وتحسبي لها كيلو اللبن بكام والبيض بكام وفي الاخر بيطلع طعمه بيض زفر! وتقترحي انها تشتريه جاهز احسن! ماهي لازم تجرب ويطلع غلط علشان في الاخر تعمله صح!! بتحبطيها ليه؟ بتحسبي لها تجاربها الفاشلة ليه؟؟ وتلاقيكي انتى مش بتعرفي تظبطي الجيلي حتى!

لو جبتي لعبة جديدة مختلفة وفكرتها مبتكرة لاولادك جوزك يفرسك بجمل زي "تاني؟؟؟ لعب تانى؟؟؟؟ احنا هانطفش من كتر اللعب ما كفاية اللى عندهم" تفهمي فيه ان اللعب دي مهمة اوي لتنمية ذكاء وادراك الطفل فيقولك "العيال دول عندهم ذكاء اصلا؟ لو كان عندهم مكانوش زهقوا من كل اللعب اللى عندهم بمجرد ما يمر يوم واحد عليها"...ابهات عسل!!

وطبعا الاكثر شيوعا لما تبقى ناوية تعملي دايت وتغلطي قدام حد وتقولي على نيتك المستقبلية...."دي المرة المليون باين اللى تبدأي فيها رجيم - لا بتخسي ولا بتيأسي!"..."انا مش عايز اسمع انك ناوية تعملي دايت....انا عايز اسمع انك عملتي دايت وخسيتي!!"...."موت يا حمار!"..."خليك ورا الكداب لباب الدار!!"...."هههههههههههههههههههههههههه"...الخ الخ الخ

لو نضفتي الشقة تنضيفة متينة وغسلتي السجاد والبوتجاز ورصيتي كل المواعين مكانها وحتى النيش فضيتيه ولمعتيه وغسلتي كل اللى فيه ورجعتي كل حاجة مكانها...هاتلاقي حد يقولك "مجهود بسيط متصل احسن من مجهود كبير متقطع"!! ربى...صبرا طويلا او مسدس!!

بصوا بقى....لو حد قرب حاول يحبط من معنوياتك ويكسر مجاديفك...خد مجداف منهم وعلى نافوخه عدل....ناس تجيب الضغط!!

ريم اسامة

جروب الفيسبوك: https://www.facebook.com/groups/329904227056535/

العيون السوداء انعكاس نفوس اكثر سوادا

فئة غير قليلة من الناس ماشاء الله عليهم - اللهم لا حسد - touch wood....عينهم سودا..مش بيشوفوا في اي انسان غير الوحش او العيب اللى فيه...مع انه ممكن مايكونش عيب ولا حاجة... بس من وجهة نظره الشخصيه "شخص معيوب". اللي عينه سودا بيتعامل مع اي شخص من خلال العيب ده.

مثلا لو واحدة لسة متجوزتش...كل ما يجي فردة شبشب يتقدم لها وهيا ترفض يقطعوا فيها...."بترفضي ليه؟ انتى عارفة عندك كام سنة؟؟"...."اخرة البطران قطران!"...."حرام عليكي يا شيخه فرحي امك بحتة عيل على الاقل"...."انتى يعنى مستنية توم كروز يجي يتجوزك؟؟ يبقى هاتفضلي في بيت ابوكي للابد"..."عيبه ايه؟؟ مؤهل عالي وعنده شقة وبيشتغل....عايزة ايه تانى؟؟؟ يطول لك شعره؟؟"...والوقح منهم يبدأ يشك في سلوك البنت وانها مش عايزة تتجوز لسبب مريض في عقله هوا بس! ومش بعيد يشارك الاخرين بالفكرة المعفنة بتاعته ويشهًر بيها ظلم!! 

ولو واحد مليان شوية... او تخين....الناس دي مش بتشوف فيه غير التخن فقط لا غير...كل شوية كلام عن اضرار الوزن الزائد...تلئيح كلام عن اللبس وطريقة المشي...وتلاقوا حتى في الشغل الناس بتتكلم بالغباء ده...لو الشخص الزائد في الوزن اكل اي حاجة بتتخن يتعمل عليه حفلة "ايه ده؟ امال فين الدايت؟؟"..."تانى؟ مش انت من شوية كلت بسكوت؟"..."بيبسي؟؟ طيب يا سيدي خليه دايت على الاقل!! صحتك مش كده"..."هوا ايه الدايت اللى كل يوم فيه free ده؟"

لو واحدة جوزها بيعاملها وحش....كل ما يشوفوا خلقتها يقولوا لها "ربنا يهديه يا حبيبتي...ربنا يخلي ليك اولادك!!"...ولو هيا قاعدة مش بتتكلم يتقالها "منكد عليكي برضه؟؟ معلش يا حبيبتي هما صنف ابن..." 

لو واحدة مخلفة طفل شقي محدش بيشوف في ابنها حاجة غير انه "حاجة" مزعجة في حياتها...ممكن اه تكون بتشتكي او بتفضفض او بتسئل عن حلول...ولكن ده مش معناه انها عايشة مع كرة من النار! مش هاينفع كل حياتها تنحصر في الطفل الشقي بس...مش كل ما حد يشوف وشها يسئلها عن اخر حوادث ابنها ! 

لو والدك او والدتك مريض...مرض مزمن لا علاج له...حاجة مؤلمة اوي كل كلام الناس يتحصر في مرض ابوك او امك! يعنى مش كفاية الالم النفسي اللى انت فيه...مش كفاية وجع القلب والتفكير والاكتئاب؟ مش كفاية الخوف اللا نهائي من بكرة؟ كل مناسبة "طمنى على صحة بابا! بقى احسن؟"....او البهايم اوي اللى بتقول "اتمنى له الرحمة علشان كده بيتعذب"....يا نهار اسود!!!! هانتمى لاهالينا الموت!!!! الطم؟؟؟

لو ساكن في شقة ايجار جديد..."مش هاتجيب شقة تمليك بقى؟ ده الايجار فلوس في الارض وكتير اوي..حط الفلوس اقساط شقة احسن بدل كده كده بتدفع"...."صاحب الشقة زود عليك الايجار السنة دي؟"..."سعر المتر في المنطقة كام؟"..."لو صاحب الشقة قالك مش هايجدد العقد هاتعمل ايه؟"
ولو انتى عايشة في بيت عيلة كل يووووم هاتتسئلي "عاملة ايه حماتك العقربة؟" محدش شايف حاجة في جوازها غير انها عايشة مع حماتها في نفس العمارة (على فكرة في كثير من الاحيان الموضوع ده بيكون ميزة مش عيب ولكن الناس بتحب تحط التاتش بتاعها)
ومثلا لو حد عرف انك عاملة فيزا وعليكي فلوس كتير للبنك لازم كل ما يشوفوا خلقتك تاخدي المحاضرة الحمضانة بتاعة الفوايد وحرام وربا وفلوس على الارض وهاتقفليها امتى وما كنتى تاخدي فلوس من مامتك او باباكي بدل بهدلة الفيزا ويا ترى بتسحبي بيها كاش ولا بتشتري بيها بس اصلها بتفرق في الفوايد!!!  وايه اللى خلاها مديونة بكل المبلغ ده وايه الضرورة القصوى اللى خلت المبلغ كبير كده؟
ولو انت مطلقة او منفصلة عن جوزك....يالهووووووووووووي....كل شوية "مفيش اخبار؟" ... "بيبعت فلوس للاطفال؟"...."هوا اتجوز؟"..."مفيش اي امل ترجعوا لبعض علشان الاولاد حتى؟"....وغير ان معظم اصحابك هايتجنبوكي علشان هما متجوزين وانتى لا (مع انهم بيحقدوا عليكي علشان قدرتي تتخلصي من القرف اللى انتى فيه)
وليلتك سودا لو ابنك او بنتك لسه بيلبسوا بامبرز (اي سن مش مهم - الناس مش بيفرق معاها حتى لو كان ست شهور)..."انتى قلعتيه البامبرز ولا لسه؟"..."انتى مستنية ايه علشان تدربيه على التواليت؟؟"..."يا رب بس تفتكري تدربيه على التواليت قبل الجامعة"...وبعد كل ويك اند الناس بتزود الجرعة متخيلن انك في جمعة وسبت تقدري تخليه يقلعه عادي. محدش بيشوف انك ام كويسة علشان ابنك لسه بيلبسه.
لو حصل واتسرقت كل ما يقابلوك "خد بالك من فلوس"..."خد بالك من عربيتك"...."خد بالك من عيالك"....وكل ما حد يتسرق يتضرب بيك المثل زي ما يكون انت اللى خليت الحرامي يسرقك بمزاجك وانك خيبة وعبيط!
الناس اللى عينها سودا...مش بتشوف الشخص الاخر غير من خلال عيب اقنعوا نفسهم بيه...وتكون حاجة مؤلمة للطرف الاخر علشان تبرد نارهم!!...يعنى اللى بيعذب بنت تخينة غالبا واحدة اقبيح من البنت التخينة! اللى بتشوي البنت اللى لسه متجوزتش بالضرورة تكون اتجوزت بدري وندمانة...واللى بتفكر صاحبتها كل شوية بمعاملة جوزها الوحشة اكيد جوزها فردة شراب ملوش لازمة لا بيهش ولا بينش! واللى بتتريق على الطفل الشقي اكيد ابنها كيس بطاطس يترزع قدام التليفزيون ياكل ويدخل الحمام ويرجع ياكل تانى لحد ما ينام! وهكذا.
اللى بيقطع فيك ناقصه حاجة كبيرة موجوده جواك ولكنه مش عايزك تاخد بالك! اللى بيحبسك في اطار ضيق من صنعه انسان مريض...مش شايف فيك اي موهبة او شخصية او نجاح او جمال...بيحط الاطار البايخ ويحبسك جواه ويعرفك انك محبوس وان نظرته ليك لا تتعدى عيبك!! العيون السوداء انكاس نفوس اكثر سوادا!
نصيحة...قلة الادب احيانا بتجيب نتيجة مع الناس دي!

ريم اسامة

جروب الفيسبوك: https://www.facebook.com/groups/329904227056535/