تطور الانثى الى عبد المتجلي!

كتير اوي من الرجالة بيقولوا علينا "دكره" (جمع دكر)...بصراحة بقى عندهم حق!

اه..عندهم حق طبعا! بقى دي مناظر يتبص لها؟

فين ايام قبل الجواز؟ فين ايام الجامعة؟ فين ايام اوائل العشرينات؟

للاسف احنا في مجتمع مكبوت اوي...مع انه بيعمل كل حاجة في الباطن..ولكنه مقتنع انه مكبوت وبيتعامل على هذ الاساس!

وزي ماهو مجتمع مكبوت...هو برضه مجتمع ذكوري متعفن!

لو الراجل خان الست...يبقى اكيد مراته غلطانة

لو الراجل عامل الست وحش يبقى اكيد مراته نكدية بنت لذينة وهو عمل كل حاجة علشان يرضيها وهيا بنت تيييت مش بيعجبها حاجة

لو الراجل مفلس وضاربه السلك....مراته مبذرة ومش بتقدر ظروف جوزها وعايزة قطم رقبتها

لو الراجل عنده اكتئاب ...مراته مش بتفرفشه! ست جزمة صحيح!

لو الراجل بيروح القهوة كتير او البلاي ستيشن او بيتركن في اي حتة بره البيت...ماهو لو كان البيت جوه ظريف كان هايخرج منه ليه؟ ست كئيبة جتها القرف!

لو الراجل عمل اي حاجة فيها سفالة وقلة ادب وقلة اصل المجتمع بيلوم الست...منتظرين منها ايه؟؟؟ منتظرين شكلها يبقى عامل ازاي؟؟ نانسي عجرم؟ ولا انجلينا زفتة جولي؟؟!!

ما طبعا لازم تبقى عبد المتجلي! شايله الهم وشايله اللوم وشايله الطين ليل نهار! طبيعي يعنى!

تعالوا بقى العكس

لو الست متضايقة: هيا اصلا بوز نكد كده طول عمرها...خليها كده لحد ما جوزها يطهق منها

لو الست  مكتئبة: هيا لو ست ذكية كانت عرفت ازاي توظف كل حاجة في حياتها وتقلبها لشئ ايجابي..بس هيا بتحب تعيش دوزر الضحية دايما!

لو الست عصبية: بجد الله يكون في عون جوزها....مفيش راجل يستحمل الطبع الوحش ده! 

لو الست مهملة في نفسها: بكره يتجوز عليها....في ست تسيب نفسها كده؟ يعنى مطلوب منه مايبصش بره ومراته عاملة كده في نفسها جوا البيت؟ امال يبص فين؟ في المرايا؟

الست مطلوب منها الاتي:
طباخة ماهرة - تنضف اول باول - تغسل الاطباق والمعالق قبل ما تتكوم اول باول برضه - شاطرة ماتخليش الهدوم تبهت ولاتكش ولا تتكوم - منظمة - بنت نكته - جدعة وتستحمل جوزها في احلك الظروف - تحب اهله من كل قلبها - ماتطلبش - ماتشتكيش - ماتتكلمش كتير في البيت - ماتطلبش منه يحول قناة التليفزيون - تعمل قهوة بوش! - رشيقة - تربي العيال على كل المثل العليا والاخلاق- متدينة وعارفة حقوق جوزها - حضن دافئ يترمي فيه المضروب جوزها لما يتضايق - ودن كبيرة تسمع من غير ما تنطق لما يحب يشتكي - ابتسامة لا تفارقها - على طول عاملة شعرها ومظبطة لبسها علشان لما يبص لها يفرح انه متجوز مزه! ...الخ الخ الخ
انت بقى (ايها الزوج) بتعملها ايه؟
انت مش بتحلق دقنك لو قاعد معاها! مش بتعملها اعتبار وتلبس حاجة عليها القيمة بدل ترننج التوحيد والنور في الشتا والفانلة في الصيف! مش بتكلف خاطرك تحط ايدك على بؤك وانت بتتاوب!!! - مش بتتكلم معاها غير للشكوى او اللوم او العتاب! دايما بتفكر في حقوقك الزوجية بلا اي اعتبار لحقوقها هيا!!! متعرفش حاجة عن الدين غير انه مسموح لك تتجوز اربعة (بس ضيق ذات اليد الله يخرب بيتها)...بتعامل اهلها علشان مش ناقص نكد في البيت...مش موضوع بقى البر والتقوى واتقاء الله والكلام اللى مايجيبش همه ده! مش بتساعدها في اي حاجة خاااااااااااااااااااالص (ده يا اخى مش بتكور حتى الشراب جوا بعض بدل ما تفضل هيا تدور على فرد الشرابات) ومش بتساعد في مذاكرة الاولاد ولا في تنظيم البيت (لا قدر الله) ولا بتهون عليها المجهود الرهيب اللى هيا بتعمله ليل نهار...انت بس فالح تتأمر!
الست يا عيني بتدبل....مش بتقدر تلبي احتياجات كل الناس كل الوقت! هاتهتم بالمطبخ ولا بالعيال ولا بشغلها ولا بشغل البيت ولا بشعرها ونفسها؟
في اول الجواز بتلبس الوان واشكال ومهرجانات في البيت...تبقى حامل فتتعب ويقل كتير الاهتمام...تخلف تنسى حياتها كلها وتشوف ايه الكائن اللى جه واحتياجاته وتجربتها للامومة لاول مرة حاجة مبهرة فعلا...ويكبر وييجي اللى بعده وتكون اصلا لسه مش فايقة من العلقة الاولى..بتدبل واحدة واحدة....الهدوم بتتركن طقم ورا التانى...وتستبدله بملابس مريحة جدا علشان مش هايبقى قرف العيال والبيت وراجل مش بيساعد بالمرة وكمان هدوم مش عملية!!! الرحمة يعنى! وبالتالي بتتحول من مزة الى عبد المتجلي الدكر! 
لو لقيتوا ست مبهدلة في نفسها ودكر...اعرفوا على طول انها ام كويسة...ست بيت شاطرة..ومتجوزة راجل يسد النفس لا بيشجعها ولا بيشيل من عليها!!
بدل ما نحكم على الست انها سبب كل المشاكل...اعرفوا ان الراجل قمة في الانانية والتذمر! مفيش راجل بيعجبه حاجة...اه احنا ستات دكره...احنا امهات كويسين...احنا دبلنا ولكن قلبنا كله حب اتجاه بيوتنا لدرجة اننا اهملنا نفسنا علشانهم!
ومحدش يقولي الاهتمام بالنفس والاهتمام بالعيال و البيت ملهمش علاقة ببعض...اللى هايقول كده اعرفوا انه راجل!
اووووف!!! 

ريم اسامة
 https://www.facebook.com/groups/329904227056535/

طريقك اخضر!

المقال النهاردة شخصي...احتمال تلاقوا نفسكوا فيه...بس حبيت انوه الاول انه عني انا - اعتبروه نوع من الفضفضة!

بقالي فترة مكتبتش حاجة - وكنت قررت مكتبش تانى...زي ما الناس القريبة منى عارفين انا فعلا بحب اكتب ونفسي يكون لي كتاب...بلاقي نفسي في الكتابة وبعبر بيها اكتر من اي طريقة تانية...لدرجة ان بعض اصدقائي اتهمونى انى بستخبى ورا الكيبورد!...وكتير بيبعتوا لي مشكلة ويطلبوا منى مقالة تعبر عنهم وبحاول فعلا اعمل كده.

اصعب حاجة تكون مقتنع انك بتعمل حاجة بشكل محترم...ومتميزة ومختلفة ويجي اللى يقولك "عادي على فكرة وناس كتير بتعمل احسن منك كمان!!" او يعرض عليك شغل في المجال ده بمقابل "مهين"!! 

الناس دي مش فاهمة معنى "الاحباط"....وقد ايه ممكن يكونوا السبب في ازمة نفسية شديدة...محدش بيقدر المجهود او الوقت المبذولين في كتابة اي حاجة...واللى بيعرض شغل لحد مش مشهور بيكون متخيل انه بيرمي لهم طوق نجاة ينقذهم من بحر "الغمور"...او استغلال عدم الشهرة لعصر الكاتب لبذل اقصى مجهود ممكن وبلا مقابل في كثير من الاحيان!!!

وده حصل معايا...انا عارفة ان الموقف كله بسيط ومش محتاج كل التأثر النفسي اللى انا مريت بيه...ولكن حسيت انى فعلا بلا قيمة...بلا موهبة...بلا اي فكر او اسلوب مميز! بالرغم من اقتناعي انى عكس ذلك ولكنى تأثرت شديد التأثر!! وقلت هاقفل المدونة دي زي ما قفلت اللى قبلها وزي ما بطلت اكتب روايات...وكفاية كده...هواية وخدت وقتها وادور على غيرها (كعادتي).

النهاردة لقيت تعليقات على مقالات قديمة...شكرا لكل الناس اللى بتشجعنى...والمعارضين والمؤيدين والمساندين لي...شكرا لكل من يأخذ من وقته ليقرأ لي ولكل من يتكلف مجهود التعليق والمناقشة.

وارجو كل انسان محبط غير مقدر لمجهود غيره...مفيش داعي...مفيش داعي للمتاجرة باحلام الناس...ولا ببخس مجهودهم ولا انتاجهم...مفيش داعي تحسس المبدع انه بلا موهبة ولا قيمة....ولا اي داعي انك تعيشه "وهم" على انه حلم!

لكل انسان محبط: طريقك اخضر ...امشي من هنا!!!!

ريم اسامة

https://www.facebook.com/groups/329904227056535/

تجنبوا التعاسة!

قريت مقال عنوانه "عادات الاشخاص التعساء"...وكانت عن ان السعادة مش حاجة بتكتسب ولكنها قرار...او منهج حياة...ولو تجنبنا شوية عادات في حياتنا ممكن تخلينا سعداء واكثر بهجة...عجبني المقالة وقلت اقولكوا منه شوية حاجات لعل وعسى :) احنا شعب بيحب يضحك ولكن للاسف عندنا اكتئاب مزمن! يمكن الاحداث العامة والسياسية خلال السنوات القليلة الماضية لها يد في الحالة دي...زائد الماديات المتكحرتة...وقلة الشغل وقلة الفلوس وقلة الادب في الشوارع!! ضيف على كده طبعاا الاسعار النار لكل حاجة في حياتنا وبيشمل الصحة والتعليم والاكل والشقق والعربيات (انا شكلي هازود الاكتئاب كده)...ما علينا يعنى.

نرجع للمقال...هاحطه في نقط علشان يكون اسهل في المتابعة.

العادات السيئة التى يفضل تجنبها:

1- الشكوى المزمنة:

كلنا بنشتكي .. عادي جدا امال يعنى نطق نموت؟ ما لازم نفضفض...بالعكس بقى...الفضفضة دي عادة صحية جدا علشان الواحد مابيكونش عنده ضغوط فوق الضغوط العادية الحياتية...الشخص الشكَاي عامة لازم يكون عنده حاجة يشتكي منها...وشايفين ان مشاكلهم هي اهم حاجة في الكون...ولو حاولت انت تتكلم او تفضفض مع حد من النوع ده مش هايهتموا اصلا يسمعوك. النوع ده دايما عنده حاجة يشتكي منها: شغله الرخم...مديره الحمار...الفلوس القليلة...العيال الفاشلة اللى مش بتذاكر...حماتها/حماته...الطرف الاخر...الصحة العامة...الخ. لو انت من النوع ده...حاول تقلل الشكوى اللى ملهاش معنى...او على الاقل حاول قدر الاستطاع التركيز على النقاط الايجابية في حياتك...ولو عندك مشكلة حاول تحلها بدل ما تقرف غيرك بتفاصيلها المملة كل يوم كل يوم كل يوم...ضروري نشارك مشاكلنا (علشان هانفطس ونموت لو معملناش كده) بس مش كل يوم لازم نحكي نفس المشكلة بالتفاصيل..خلينا نركز في الحل احسن من الشكوى! الناس اللى من النوع ده بارعين في ايجاد علَة في كل حاجة...لو نقلت شقة جديدة جميلة هاتشتكي من قلة دخول الشمس فيها...او السباكة البايظة...او الحر...او الجيران المقرفين...ولو جابت عربية جديدة هاتشتكتي من استهلاك البنزين!! اي حاجة وخلاص...الناس دول مش بيعرفوا يعيشوا ولا يفرحوا ولا يستمتعوا ولا حتى يسمعوا غيرهم! مستحيل تلاقي شخص شكاى يسمع شكوى من حد تانى..لو قلتي لواحد فيهم ان مثلا ابنك عيان اول حاجة هايقولها الشخص الشكاي "اصلا انا شفت شهر بشع...ابني راح خمس مرات الدكتور..." وتبدا في سرد الامراض والادوية بالاسم وبكل التفاصيل المللة اللى محدش عايوز يعرفها! بس لازم الشكوى ولازم التضخيم والتهويل! لو انت من النوع ده....حاول تفكر في الجوانب الايجابية بدل من السلبية...كل حاجة في الدنيا ليها وجهين...اختار الوجه اللى تبص له!

2- السعادة "المادية":

الانسان عامة بيشعر بالسعادة لاسباب كتير منها الصحبة الطيبة او التجارب السعيدة...الخ...اسوأ حاجة اننا نشعر بالسعادة لامتلاكنا شئ مادي!! زي اللى بيفرح لما يعمل شوبنج (احنا الستات كده) او لما يتضايق يشتري حاجة فينبسط والموود يبقى كويس.  بس للاسف السعادة "المادية" بتستمر لفترة صغيرة وبيرجع الشعور بالتعاسة مرة تانية! في حاجات كتير جدا ممكن تخليك سعيد غير انك تشتري!! انزل اتمشى في جنينة...اعزم حد غلبان على في اي مطعم حتى لو كان رخيص...امشي في اماكن معتبتهاش  قبل كده في الحي بتاعك...او اضعف الايمان اقرا كتاب حلو او اتفرج على حاجة تضحك

3- انتظار المستقبل:
كتير جدا من الناس بتقلق المستقبل (وده طبيعي) ولكن في ناس بقى بتركز اوووي في الاحداث اللى ممكن تحصل في المستقبل بدلا من التركيز في الوقت الحالي والحاض والاستمتاع بهم. وعامة سلسلة الافكار دي تبدأ كالتالي: لما تكون في المدرسة تقول هابقى سعيد جدا لما ادخل الجامعة - لما تدخل الجامعة تقول هابقى سعيد لو اشتغلت - لما تشتغل تقول هابقى سعيد لما اتجوز ولما تتجوز تستنى السعادة لما تخلف ولما تخلف تنتظر السعادة لما عيالك يكبروا ولما يكبروا تستناها لحد ما يتجوزوا ولما ده يحصل تستنى السعادة لما يجي لك احفاد وهكذا لحد ما تكتشف ان الحياة خلصت ومعاها كل الفرص المتاحة للسعادة!!! 4- الخوف من المستقبل:
 مهما الانسان عمل لتامين المستقبل هايفضل برضه عنده الهاجس من اللى جاي...من المجهول! كتير جدا (معظم) الناس بتفكر في العجز اللى ممكن يصيبه ومايلاقيش حد جنبه ومن امثلة الهواجس دي: يا ترى ابني هايموت في حياتي ولا انا هاموت الاول واسيبه ضعيف ويتيم في الدنيا ويتاكل حقه؟...يا ترى بابا وماما هايموتوا وهاعيش وحيدة مكسورة الضهر؟ هاقدر اجهز اولادي للجواز لما يكبروا واجيب لهم شقق وشبكة وفرش بيت محترم؟ هاقدر اعلمهم لحد ما يخلصوا جامعة ومحسسهمش بحرمان من اي حاجة؟ يا ترى لو جالي مرض شديد جوزي هايتجوز عليا ولا هايراعيني علشان ربنا مش علشان بيحبني؟ يا ترى هايجلي كانسر او فشل كبدي؟ يا ترى ممكن اولادي يسخنوا وودانهم تروح وانا مش واخدة بالي؟ هوا ممكن حد يخطف اولادي؟؟ ممكن يجيلهم امراض مقدرش اعالجهم منها ويموتوا؟ لو الشغل استغنى عنى هاعيش منين؟؟....كل حاجة بأمر الله...مفيش اي حاجة بأيد الانسان خالص....الرزق مكتوب ومفيش حد ربنا بيحوش عنه رزقه ورزق اولادك ربنا هايديهولك علشان مكتوب لهم...الصحة والمرض والشغل وكل ده نصيب وكل اللى علينا هو المحافظة على اولادنا (نأكلهم كويس وعالجهم ونعلمهم بما يرضى الله وناخد بالنا مايغيبوش عن عنينا)...وماينفعش ندمر الحاضر ونموت فرحتنا باي حاجة معانا دلوقتي علشان خايفين لحس يحصل حاجة!! مفيش داعي نخلي الشيطان يلعب بعقلنا جولف...خلينا نثق في ربنا قدر المستطاع فهو ارحم الراحمين.
بابا دايما يقولي:
لا تشغل البال بماضي الزمان
ولا بآتي العيش قبل الأوان
واغنم من الحاضر لذاته
فليس في طبع الليالي الأمان (من رباعيات الخيام) والمعنى واضح طبعا.

5- انعدام الهوايات:
شغلك وشغل البيت والطبيخ والغسيل مش هوايات!! الهواية هي حاجة بتعملها وقت الفراغ ويصبح لديك شغف بها...الهوايات تعتبر مهارات من الممكن تطويرها لتجني من وراءها بعض المال. 

مين بقاااا؟

عيد الام على الابواب..كل سنة وانتوا طيبين...بس قبل ما تجيبوا هدايا وتكعوا دم قلبكوا احب بس افكركوا بشوية حاجات على السريع كده:

-  مين اللى كانت بتفتح النور في عينك علشان تصحى؟؟
- مين اللى كانت بتطفي الكارتون المفضل لحد ما تخلص السلاطة؟؟
- مين كانت بتقصلك ضوافرك ويجز عليهم اوي لحد ما اطراف صوابعك تحرقك؟
- مين كانت بتقابل المدرسين وتسخنهم عليك علشان تطلع "راجل محترم؟"
- اللى كانت بتحط لك القطرة في عينك وتفتح عينك على الاخر كده وتشوف النقطة وهي نازلة جوا حبابي عينيك؟؟ (ما كان سهل اوي تحط النقطة في ركن العين وانت مغمض وبعد كده تتزحلق جوا وخلاص!!)
- و اللى كانت بتفتن لابوك عليك؟؟
- بقت تطنشك وانت كبير وتهتم اكتر باحفادها!! 
- اللى كانت بترفع السماعة الناحية التانية لما ترغي كتير في التليفون وتقولك "مش تخلص بقى؟"
-وكانت بتسلك لك شعرك الطويل بالمشط الضيق؟
-  كانت بتفتح المياة السخنة في المطبخ وانت بتستحمى علشان تخلص المواعين؟!!
- كان بيعد عليك مرات دخول الحمام وانت في الثانوية العامة؟
- مين اللى كانت بتلبسك بلوفر هاي كوول تحت الهدوم وترفض انك تقلعها حتى لو هاتموت من الحر؟؟
-  كانت بتقولك "ماهو علشان انت عبيط" لما كنت بتضيع جاكيت المدرسة؟ (ما انت لابس هاي كوول هاتفطس لو لبست الجاكيت!!)
-  كانت بتعملك ساندوتشات بيض في المدرسة؟!! (ريحته تقرف في الشنطة)
- و كانت بتخليك تاكل في طبق بلاستيك علشان ماتكسرش الصيني؟
-  كانت بترفع البطانية من عليك في الشتا علشان تقوم للمدرسة؟
- واللى كانت بترفع السماعة وتعمل مكالمة ايام لما كنا بندخل على النت بالنظام القديم قبل الDSL وتقفل عليك النت؟
- اللى كسفتك قدام صاحبتها وبنتها وانت في الجامعة وقالت لك "ايه رايك بقى في العروسة دي؟"
- وكانت بتحدفك بالشبشب الطائر؟
- اللى كانت بتدخل الاوضة من غير ما تخبط؟
- بتصمم تخرج تسلم على اصحابها اللى انت متعرفش عنهم حاجة وتسمع نفس الكلام بتاع (خس اوي - شبه ابوه - شبه جدته - طلع له شنب - طول اوي - تخن - انت مكسوف ليه يا حبيبي؟"
- مين كان بياخد العيدية منك وتقولك "هاحوشهالك؟"
- مين اللى كانت بتسرح لك شعرك وتشده جامد اوي كده لورا لحد ما عينك تبقى في مستوى حواجبك؟
-كانت رافضة انك تروحي للكوافير في العيد (بالرغم من انك في اولى ثانوي) وبتقولك انتى لسه صغيرة؟
-اللى كسفتك قدام الناس وقالت لك "شيل ايدك من مناخيركّ!ّ"
-ورفضت تقلعي الحلق الدهب الحمصة علشان نفسك تلبس حلق على الموضة زي اصحابك في المدرسة؟
- اللى كان بيفرض عليكي مسلسل اوشين وthe bold؟
- كانت بتفرق لك شعرك من النص زي عماد حمدي؟
-  اللى كانت بتمسك الليفة وتهري جتتك بيها وانتى صغيرة؟
- مين اللى كانت بتشدك من الضفيرة لما تحميكي تحت الدش وانتى بتجري منها خايفة تغرقي؟ (احم...ما علينا)
- اللى فرضت علينا السبانخ والخبيزة والبصارة والقلقاس (يا اما مفيش حاجة حلوة بعد الغدا)؟
-ورفضت تطلع رحلة الاقصر واسوان مع المدرسة علشان خايفة عليك (مع ان شنبك بدا يطلع)
- اللى كانت بتخليك تشرب مياه من الحنفية في عز الحر علشان زورك مايوجعكش؟!
- مين اللى كانت بتجرجرك في الافراح تسلمي على ولاد خالة بنت عمة جدتك؟؟ 

مين اللى كان قلبه علينا ومش بتنام الليل من كتر القلق والتفكير في مستقبلنا؟ مين اللى مكانتش تبجيب لنفسها حاجة غير لما تطمن اننا مش عايزين حاجة تاني؟ مين اللى كانت بتاكل اي حد ينتقدك قدامها؟ مين اللى كانت بتحوش علشان تجيب لك هدية حلوة في عيد ميلادك؟ مين اللى بتدعي لك ليل نهار وبتنسى تدعي لنفسها؟ مين اللى شايل عيالك وانتى في الشغل او علشان تخرجي؟ مين اللى بتشيل لك توم مفروم وكفتة وسمبوسك محشية جاهزة على القلي...واللى بتشتغل بلوفرات تريكو لاولادك وتشتغل لك كوفيات صوف...وتصمم تاخدي معاكي اكل وانتى رايحة بيتك...اللى بتجيب حاجات حلوة كتير وحاجات ساقعة لما تعرف انك رايحة تزوريها...مين اللى عايشين لحد دلوقتي في خير بفضل دعواتها؟ :)
ربنا يخلي كل الامهات...ربنا يخليكي يا ماما :)

ريم اسامة
https://www.facebook.com/groups/329904227056535/

حبيبي...طال الانتظار

اخذت رانيا القلم وبضعه اوراق...كتابة خطاب لزوجها ليس بسهولة وتلقائيه التحدث معه وجها لوجه. بعد عدة محاولات وتقطيع للورق والاعادة مرة اخرى...اخذت نفس عميق...اغمضت عينيها...تنفست ببطئ...امسكت القلم بثقة وبدأت الكتابة:

"حبيبي...ام زوجي العزيز؟ ام ابو عيالي؟ ام شريك العمر؟

لا اعلم بما ابدا وكيف اكتب ولا حتى سبب الكتابة ولكنى اريد ذلك بشدة! ..هل اكتب بالعامية ام بالفصحى؟ 

دعني اكتب بقلبي! 

وحشتني اوي...فعلا وحشتني...اول مرة اكتب لك جواب...كان دايما التليفون بيقرب البعيد...صوتك بيصبرني على فراق صورتك! صوت ضحكتك يصبرني عن رؤيتها. لم اكتب لك من قبل...ربما كتبت لك رسائل على البريد الالكتروني...ولكنى ابدا لم اكتب لك خطابا بالرغم من كثرة اسفارك وترحالك بعيد عن بيتنا. كنت دائما تشبه البيت بالمرسى...تذهب بمركبك لاطراف الدنيا وترجع للمرسى مرى اخرى لتستقر بيننا...لتدفئ قلبي وتنير حياتي...عندما انظر لحياتي ارى انها كانت فترات طويلة رتيبة وهي فترات الاتنظار...ثم فترة صغيرة منيرة وملونة وشديدة البهجة وهي فترة وجودك بيننا...كنت دائمة الاتنظار...وابدا لم اتبرم او اشكو لاحد. كان اشتياقي اليك اكبر من اي الم مررت به. تمنيت كثيرا ان تصطحبني معك ولكنى كنت بالنسبة لك "علامة الطريق" ولم تود تغيير مكانها..فالوطن والبيت لا يمكن فصلهمها...هكذا كنت تفكر!...تذهب يمينا ويسارا ثم تستقر بعتبة بيتي...وتدور حول العالم وتسافر برا وبحرا وجوا ثم تستقر بجانبي. كنت انا البيت...والبيت بالنسبة لك كان الحياة! 

لا انكر انك تألمت ايضا...الترحال...الغربة...الوحدة...افتقادك لاولادك...حزنك وحيدا لفراق ابيك وامك للدنيا وعدم تمكنك من الوداع الاخير...تفويت كل المناسبات الخاصة مثل اعياد ميلاد الاولاد...تخرجهم من المدرسة...حفلة تخرج كل منهم من الجامعة...تجنيد الولد...مشاركة البنت في الاعمال الخيرية وانعكاسه على شخصيتها...كل نكات التوأم الصغار...عندما ترجع من السفر اول شئ تفعله هو قياس طولهم على مسطرة الحائط...وتحسب كم من السنتيمترات فاتتك...كنت تبتسم ولكنى اعلم ان بقلبك شرخ ودموع...كنت تفاجأ بكل شئ...بتعلمهم اللغات الاجنبية...الاعمال اليدوية...القيادة...الغطس...اصدقائهم...كنت تتألم وكان مستواهم الاجتماعي والمادي الذي توفره لهم يصبرك على الفراق.

لقد راعيت الله وربيت اربع افراد نافعين في المجتمع...لم افشل في تربيتهم رغم قسوة الوضع...ام وحيدة تربي ثلاثة اولاد وبنت...كم كانت الصعوبات وكم كانت التحديات...كنت اب وام في نفس الوقت...احاسب واعاقب واكافئ...كنت اراقب وابلغك بما اكتشفته وكنت انت تهدئ من روعي وتخفف عني وطأ المسئولية...كنت بجانبي رغم الغربة الدائمة. احمد الله على وجودك بحياتي...ابدا لم اكن اتمكن من اتمام رسالتي لولاك...مهندس ومحاسبة وطيار وموظف بالخارجية...كلهم يتكلمون اللغات ويؤدون فروض دينهم...لم يخب املي ولم يخذلني الله.

حبيبي...مازالت صورتك كما هي في ذهني منذ اخر لقاء قبل سفرك الاخير...مازال صوتك بأّذني توعدني بالاستقرار بعد طول سنوات المعاناة....مازال بقلبي رجفة من خوف فراقك!

حبيبي...طال السفر....وطال الاتنظار...واختفت فترات البهجة...لقد تزوجوا جميعا...ورزقوا بالاطفال...وبقيت انا "علامة طريق" لا اكثر ولا اقل....لقد انتهى دوري...لقد انتهت الرحلة!

حبيبي....انى قادمة...لنكون معا....لا اصبر على البعاد...لم اعد اطيق الفراق...انا اعلم ان قد حان الميعاد.

حبيبي قل لي....هل للقبر وحشة؟ ام انه روضة من رياض الجنة؟

ليتك تزورني في احلامى لتطمئن قلبي كما عهدت منك...انار الله قبرك...وليهون الله علي الحساب.

امين!

ريم اسامة

https://www.facebook.com/groups/329904227056535/

العكننة هى

العكننة جزء اصيل من حياتنا ولازم افرد له على الاقل صفحة (بما انه فارد جناحاته علينا - فده اقل واجب)

العكننة هي:

- قميصك يشبك في اوكرة الباب ويتقطع!

- كعب الجزمة يتكسر

- ضرسك ينئح عليك!!

- الاكل يتحرق!

- يتخصم من مرتبك وتفاجئ بكده وانت بتقبض!

- ابنك يغطس الموبايل في كوباية او التواليت!!

- ضفرك يتكسر!! (بجد بقى عكنننة جدا - الرجالة مش هايفهموا النقطة دي)

 - تربي العيال وجوزك يفسد فيهم!!!

- يجي لك الشيشة والفحم مطفي او المياة زيادة فتبقى تقيلة على الصدر (جوزي قالي كده لما سئلته عن تعريفه للعكننة!!)

- النت تفصل!

-  يقع منك ورقة ب200جنيه (فاكرة طبعا ياللي في بالي)

-  تبقى نازلة ومتاخرة وابنك او بنتك يعمل حاجة شنيعة في البامبرز - ولازم تغيري غصب عنك!!

- تغيير الكاوتش النايم!

- موابايل فاصل شحن!

- تكون بتشتغل في call centre وعندك زكام!!

- حد من عيالك يلقط قمل من المدرسة في شعرهم!!! 

- تنسي الفلوس في البيت!

- تعلمي حفلة ومحدش يحضر (جربتها - غبية جدا على فكرة)

- تجيبي لعبة لابنك وانتى متخيلة انه هايطير من الفرح ولما يشوفها يقولك "وحشة، رجعيها) - وكمان هايزن!!

- يتلغي المصيف

- تخرجي مع شلة اصحابك اللى بقالك كيتر جدا ماشفتيش حد فيهم...مايجيش غير واحدة بس او اتنين

- المياة تقطع

-  تعملي دايت وماينجحش (جعتي على الفاضي)

- تيجي تعملي نسكافيه اللى بتواجهي بعديه المجتمع وتلاقي اخر شوية جوزك شربهم خلاص!

- تعملي شعرك في الكوافير ويبوظ

- تحطي مانيكير ويتكعبل
- حد من عيالك يفضل صاحي للفجر وانتي عندك شغل تانى يوم

- تسافر وتنسى السجاير في البيت 

- يطلع لك دمل في وشك يوم فرحك!
- حد من عيالك يعمل على نفسه

- كمبيوتر تقييييل مش راضي يحمل ولا صفحة

- التليفون يعطل

- تتفرجي على فيلم ومشدودة جدا ويجي حد غتت يحرقك لك النهاية

-الغسيل منشور في يوم تراب!
- صباع رجلك الصغير يخبط في رجل كرسي! 
- تنفيض الشيش!
- الدنيا تمطر يوم ما توعدي عيالك توديهم النادي
- العكننة انى اتعب نفسي في مقال ومحدش يعبرني :)

ريم اسامة
https://www.facebook.com/groups/329904227056535/

ضمير ابنك

الضمير ده حاجة متعبة اوي - صعب اوي الواحد يكون عنده ضمير...بنتعب...بنتعذب...بنسهر ليالي طويلة من غير ثانية نوم...وبشع جدا عدم الضمير برضه. 

كنت كتبت رواية قصيرة زمان - بس هيا خيالية جدا تدور جزء من احداثها في عالم افتراضي - كان اسمها  the double faced mirror (المرآة ذات الوجهين) وبتدور الفكرة الرئيسية عن ان هناك كوكب زي كوكبنا بالظبط لكن اكثر تطور في مجرة تانية...بنفس عدد الاشخاص...علشان التوازن (معرفش اشمعنى بس اللى حصل :) ) وكان في الكوكب البعيد ده بنت من غير ضمير وعملت جرايم كتير وكان عقابها النفي في كوكب مهجور...بس نجحت في انها تيجي الارض وتروح لمثيلتها هنا علشان تاخد منها ضميرها! وبكده مش هاتنفذ الحكم اللى عليها او بمعنى تانى هاتبطل جرايم ومش هاتتنفي لو اثبتت انها ذات ضمير حيَ. وقلت ان الضمير ده زي الطاقة...لا تولد من عدم ولا تزول ولكنها تتحول من شكل لاخر. والبنت اللى من الكوكب التانى بتظهر على المرايات او الاسطح العاكسة فقط (محدش يسئل ليه يا جماعة متتعبونيش...انا كنت صغيرة اوي لما كتبتها :) ) وكانت مهمة البنت دي انها تقنع البنت (انعكاسها على الارض) انها تخالف ضميرها  وتعمل اي حاجة غلط حتى ولو صغيرة وبكده ضميرها (او رصيدها من الضمير) بيقل وبالتالي التانية هاتاخده بعد ما تحوله من شكل لاخر لحد ما ترجعه ضمير تانى بس لنفسها.

معرفش هاتقولوا ايه دلوقتي عني بس اكيد كله شتيمة :D

اللى عايزة اقوله هنا...الضمير عبئ ومسئولية...ولو خالفناه ومحسناش بالذنب يبقى عليه العوض ومنه العوض. الذنب من  الصفات الاساسية للانسان الطيب او الشخص الكويس.اكيد في عامل رئيسي في التربية...صعب اوي الام تنشئ اطفالها على اتقاء الله او على الضمير الصاحي...يا ترى ده هايبقى ازاي؟ عن طريق العقاب؟ الحرمان؟ الالم النفسي؟ الترهيب؟ التمثيل ان عملته السودا دي اذتها هي شخصيا (اهم شخص في حياته)؟

رأيي الشخصي ان الموضوع مش بيجي مرة واحدة...اول حاجة ضروري جدا جدا ان الطفل يفهم ويستوعب "الكدب"..الكدب هو اول غلطة اخلاقية يعملها الطفل ولو الام استهانت بها مش هاتقدر تدارك الموقف بعدين...وطبعا لازم تبدأ بنفسها..ماينفعش تكدب عليه حتى في ابسط الاشياء...ماينفعش تقوله اي حاجة علشان يبطل زن وخلاص...يعنى لو الصراحة هاتخليه يعيط لحد ما دماغها تتفلق نصين...مش مهم...برضه تقول الحقيقة اللى هاتضايقه! مفيش طفل بيزن للابد!! هايسكت في النهاية بس هايفهم كويس اوي معنى "الثقة"..ان امه مش بتقول حاجة غلط ولا حاجة خياليه ولا حاجة مش هاتحقق ولا بتوعد وبتخلف! وبالتالي بلا وعي هايتبع خطواتها! اوعى توعديه بلعبة وماتجيش...او بخروجه ومتنفذيش...او حتى بحاجة حلوة وتخلفي وعدك! الحرايق كلها بتبدا بشرارة صغيرة جدا!

عارفة الطفل بيكدب امتى؟ لما بيخاف!

بلاش دايما تخوفيه من العقاب لانه بفطرته البشرية هايتعلم الكدب....لو عمل غلطة وجه من نفسه قالك بلاش تعاقبيه...بدل جه واعترف وكان موقفه شجاع...شجعيه...وهونى عنه الخوف او الخضة! لو كسر كباية او دلق عصير او حتى عمل على نفسه...بلاش التهويل من الحدث...وبلاش تفضحيه. خليكي بينك وبينه اسرار...هيا مش اسرار ولا حاجة ولكن في نظره هوا كطفل هايشوفك مستودع اسراره وامانه واطمئنانه. بلاش تهدديه بابوه ارجوكي...بلاش يحس ان في حد اقوى منك...خليه يثق فيكي ويحس انك اقوى شخص في حياته وان مفيش حاجة اكبر منك او اقوى. لو في عقاب يكون مراحل ودرجات...يعنى مش ممكن العقاب يكون انك تعجنيه العلقة التمام علشان دلق العصير في شعر اخته. العقاب درجات...احرميه من لعبة بيحبها...اقفلي الكارتون اللى بيحبه...الغي خروجه كنتى وعدتيه بيها (ده مش خلف للوعد...ده عقاب - في فرق كبير)...او متكلميهوش...خلي العقاب نفسي ويكون بينك وبينه متدخليش ابوه في الموضوع ولا تخوفيه من حد. وطبعا مايكونش العقاب يوم بحاله! الاطفال مش بيميزوا الزمن...يعنى مثلا احرميه من الكارتون لمدة نص ساعة...دي كتير اوي في نظره...او متكلميهوش لمدة ربع ساعة....هوا هايحس انها كتير وطويلة وخصوصا لو حاول يصالحك....ومن فضلك لو حاول يصالحك ويراضيكي ، اتصالحي عادي! بلاش تحسسيه ان الاعتذار ملوش قيمة ولا ليه نتيجة لان دي مشكلة تانية ممكن تواجهك في المستقبل لما يكبر.

وبكده...مرة ورا التانية مع التشجيع اللازم في المواقف الشجاعة منه هايخلي عنده "ضمير"...مش هايكدب (لانه مش خايف - مفيش سبب للكدب!)...مش هايعمل مصيبة ويخبيها (هايقولك لانه مش خايف)...هايبقى شجاع...عنده شخصيه....عنده مبدأ وهو الاعتراف الخطا والاعتذار.

ثقافة الاعتذار دي مهمة جدا...ومش كل حاجة هايفة تجبريه على الاعتذار...لو عمل حاجة وانتى حاسه انه خايف قولي له "انا عارفة انها غصب عنك...بس خد بالك المرة اللى جاية)...لو عمل على نفسه التمس له العذر وقولي له بينك وبينه بلاش الله يكرمك الفضايح "معلش....مش هاقول لحد....وابقى ادخل الحمام بعد كده"...لو ضرب اخته اعرفي الاول سبب الضرب من غير ما تعاقبيه من غير ما تفهمي لانه هايحس انه مظلوم وان صوته ملوش قيمه ولا ليه رأي يحترم (يضم الياء) في البيت.

عوديه على الامانة...لو ادتيله فلوس يجيب حاجة خدي منه الباقي...حتى لو كان هايف....ضروري يتعود على كده بجد. لو فتح شنطتك وخد حاجة ضروري يرجعها...ولازم يستأذن قبل ما يفتحها...حاجات صغيرة بتكون شخصية طفلك.

مش محتاجة انوه انه مش هايسمع الكلام :) كل الاطفال عندهم كم وفير من العند والدماغ الناشفة...خليكي وراه...بلاش عقاب بدني مؤذي (كلنا بنمد ايدها على عيالنا احيانا من الشلل اللى بيعملوه بس اقصد هنا بلاش علقة!)...بلاش تخوفيه بابوه او بالاسد او بأبو رجل مسلوخه (بتخلقي شخص مشوه نفسيا كده)...ولا تخوفيه بعقاب شديد مؤلم...خليكي انتى مثل اعلى...مهما حصل اوعى تكذبي خالص.

لو ركزنا في تكوين شخصية سوية في المجتمع ده...احتمال ينصلح حاله في المستقبل....واهو كله عند الله :)

ربنا معانا

ريم اسامة

https://www.facebook.com/groups/329904227056535/

الملل هو...

استكمالا لمقالات "الاحساس والشعور" واللذى منه :)

الملل...من اكتر الاحاسيس الكريهة في حياتنا هو الشعور بالملل!! محدش يقدر يهرب منه!! 

الملل هو:

- تستنى البيض يتسلق! (مع انه بياخد دقايق بس ملل اوي)

- تصبر لحد ما ابنك يبطل زن!! (ده في حد ذاته كافي بدخول الامهات الجنة)

- زيارة لقرايبك اللى عندهم عيال رخمة ومن نوع "يا طنط - انتى تخينة كده ليه؟"

- مكالمة طويلة من حد زهقان وبيطلع زهقه عليك لدرجة ان في اوقات كتير انتوا الاتنين بتفضلوا ساكتين!!
- رحلة الى جنينة الحيوانات - الحيوانات بقت كلها شكل واحد: كائن بلا طموح!!

- تكرار الاعمال المنزلية كل يوووووووووووووم.

- تسمعى شكوى صاحبتك هيا هيا يوميا ولازم تسمعى من باب "الصداقة".

- تستنى اكل طلبتيه ديلفري وجوزك جعان "دلوقتي"!!

- الفاصل الاعلانى في فيلم متابعه بكل عقلك وتركيزك!!

- اغنية لجورج وسوف!! (اكيد جهنم فيها اغانى جورج وسوف!)

- اخر اسبوع في الشهر!! طوييييل وملل جدا!

- تليفون حد في الشغل بيرن وهوا مستمتع جدا بالرنة ومش ناوي يرد!! (لكم ركن مظلم في قلبي على فكرة!)

- الافلام الهندي!!
- الانتظار عامة ممل جدا: * عيادة دكتور بيتاخر
                                * عيادة دكتور اطفال (الابهات والامهات بياخدوا بباقي 
                                   فلوسهم كلها رغي جوا)
                                * الانتظار لما جوزك يخلص فرجة على الماتش (نفسي 
                                  اعرف الماتشات جميلة في ايه!!)
                                * قناة الكارتون تقفل علشان تتفرجي على حاجة ادمية غير 
                                   "دنيا البلالين والفقاقيع!"
                                * جوزك لما يخلص قهوة مع اصحابه!!! (مش بتخلص) 
                                * حد من عيالك يتكرم ويغسل اسنانة في خمس دقايق بدل 
                                   تلت ساعة محايلة!
                                * تستنى في طابور (واحنا في مصر بيصعب علينا اوي  
                                    نمشي من الطابور!! علشان من بنقف بنحس 
                                   بألفه بينا وانه بقى من العيلة!) 
                                * رحلة مع صحبة "لطشيفة" وماينفعش نفلفص! هانكمل    
                                   الوقت كله معاهم يعنى هانكمله!
- كوي الهدوم!
- يوم من الخماسين!
- السفر الى البيت من المصيف!
- اول يوم بعد المصيف ما يخلص (عن الغسيل وتفريغ الشنط اتكلم)
- تنضيف المكنسة!
- تنضيف البوتجاز (ايوة سمعتك ياللى بتنفخي !)
- تنفيض الشيش (كفاية نفخ - انا حاسة بيكي خلاص)
- تكلم حد كلامه من غير احساس ولا طعم...بمعنى: نفس النبرة...نفس tone الصوت...زي ما يكون بتقرا مش بتسمع حد!!
-  الملل الحقيقي هو الرجيم!!!
- تسريح شعر طفلة ويكون فيه لبانة!
-  تنقية الرز (مع ان محدش بينقي دلوقتي بس كان حاجة تزهق اوي)
- الفيزياء! 
- خروجة فيها بنت "حساسة" وبتزعل من اي حاجة حتى لو الكلام مش موجه ليها!
- تكتب شغل كتير على كمبيوتر عادي والنور يقطع من غير ما تعمل save!
- مدير غبي!
- المذاكرة لاخر امتحان.
- صبغ الشعر! (الحياة فيها كام تلات ساعات علشان اضيعها في صبغ الشعر!)
- المواعيييييييييييين حبيبتي!
- لما سئلت اسماء حسن صديقتي "ايه اكتر حاجة مملة يا سمسم؟" ردت بكل ثقة "انتى معرفش اعديlevel في كاندي كراش لمدة ست اسابيع!!"

اختلفت الاسباب...والملل واحد!

ريم اسامة
https://www.facebook.com/groups/329904227056535/

وليد وسماح

- "طيب انتى زعلانة ليه"؟ سأل وليد

- "ولا حاجة!" قالت سماح

- "انا زعلتك في حاجة؟"

- "لا خالص انا بس متضايقة علشان ماما عيانة"

- "ما الدكتور قال انها هاتبقى كويسة ودي حاجة بسيطة" حاول وليد مواساتها 

- "انا خايفة عليها اوي" كادت سماح البكاء مرة اخرى

- "خليكي قوية علشان هيا كمان تفضل قوية"

- "ما تيجي نتمشى شوية...انا محتاجة اشم هوا"

- "اللى تحبيه انا تحت امرك"

مسك ايدها...اتمشوا في جنينة واسعه وجميلة واشجارها عالية وصوت الطيور هو السائد...بعيد عن اي دوشة المدينة.

- "وليد، انت احلى حاجة في حياتي بجد...مش قادرة استنى لحد ما يجي يوم فرحنا...هايبقى احلى يوم في حياتي"

- "كل يوم معاكي احلى يوم في حياتي...وانتى اصلا حياتي كلها. معرفتش قيمة الدنيا غير لما قابلتك وحبيتك" قال وليد بصوت خافت ونابع من القلب.

.....

"اللى خلص الديالوج يجيب الورقة هنا!!" قالت مدرسة كورس الانجليزي!! 

عوجت منى بؤها على جنب وقالت في سرها "حتى الرومانسية في الامتحان؟!!! وانا حياتي هاتفضل ناشفة كده لحد امتى! خيال المدرسة مريض جدا انها تجيب سؤال الديالوج بالشكل ده...انا عارفة انى هافضل جنب امى كده زي كوز الدرة المحروق...لا حد طايق ياكله ولا حد راضي يرميه علشان حرام نرمي النعمة....انا قلت من الاول عايزة ادخلي الماني!!!"

سلمت منى الورقة وهيا مخها كله مشغول ب"يا ترى ماما خلصت المحشي ولا لسه هاستنى على ما يستوى؟"

ريم اسامة

 https://www.facebook.com/groups/329904227056535/

عشمني بالحلق - خرَمت انا وداني!

بحب الامثال الشعبية جدا وكتير منها واقعي وحقيقي وبيختصر مواقف واشخاص بعينهم بجملة بسيطة ومتركبة بذكاء. منها المثل اللى بيقول "عشمنى بالحلق...خرمت انا وداني"...تلاقي الواحد من دول بيسرح ببنت بريئة يا حرام ويضحك عليها انه بيحبها ومش هايقدر ابدا يعيش من غيرها وانه مستعد يعدي المانش عايم وايده ورجله متكتفين علشان خاطر عيونها الدبَلي! وهيا تصدق..هوا يغني وهيا تنسجم باللى بتسمعه...لحد ما يجيلها عريس حليوة وجاهز وابن ناس ومحترم وذات مركز وتعيط براميل دموع علشان ده جاهز والواد المسهوك مش جاهز...فترفضه او تتحجج باي حاجة علشان تطفشه وخلاص...حكاية مهروسة ومهرية كتير اوي في مجتمعنا..ولو البنت عبيطة شوية هاتبيع دهبها وتمثل انه اتسرق علشان تجيب بيه شبكة للافندي اللى بتحبه ويبقى كده بطلت له حجة الشبكة...وهوا يقولها مفيش شقة...استحملي معايا شوية...ان مع العسر يسر...وفي الاخر خالص خالص "بيبو طرق جيجي"...يسيبها ويقولها "العيب فيا انا...ضميري مش مستحمل اخليكي جنبي اكتر من كده...شوفي نصيبك وبتمنى لك من ككككل قلبي التوفيق" ويبربش مرتين ال يعنى بيبلع دموع التأُثر...فالبنت بقى تنهار وتعيط وتمرض وتسخن وتتشحتف وتخس وتسوق عليه امة لا اله الا الله وتوعده وتحلف وتقسم مية يمين انها مش هاتستغنى عنه وانه لو اخر واحد في الوجود برضه هاتفضل جنبه وهيا متاكدة ان ربنا هايوفقهم علشان هيا مخلصة له...الخ الخ الخ.
وعدها بالجواز....رهنت شبابها علشانها!! قصة قديمة اوي...وياريت حد بيتعلم!! 
يا جماعة....البنات اللى متجوزتش ومحبوسة في قصة حب من دول...افلتي بجلد وبشبابك وبلاش ترهني حياتك على شخص..الحب الافلاطوني والمشاعر الخارقة والحب الجبار كله بيهدى والطرفين بيعودوا على بعض وفي الاخر خالص: زواج "عادي"...مش بكرهكوا في الجواز والله خالص...بس ده الواقع....مفيش حب بيفضل مشعلل...مفيش مشاعر بتفضل ملتهبة...كله بيبرد وكله بيقلب عشرة حلوة وخوف على بعض وحاجات مشتركة اكتر من المشاعر بتخليكوا مرتبطين للابد...بالعكس بقى...الجواز المبنى على "حب العقل" بيعيش اقوى واكتر من "حب القلب"..الحب اعمى...بيخليكي مش شايفة عيوب اللى قدامك...وكتير جدا بيخليكي تحبي عيوبه (!) يعنى واحد عصبي..وشافك لابسة حاجة مش على كيف سيادته فيزعق فيكي ويديكي بالجزمة وانتى  بقى تنهاري قدام رجولته المتفجرة وتقنعي نفسك انه بيغير عليكي وانه "حمش"....كده غباوة! مفيش اي حاجة في الدنيا اطلاقا تخلي واحدة تقبل اهانة من راجل مهما كان! ضربة في قلبه اللى يدوس لك على طرف! ما انتى اهلك متعبوش فيكي وربوكي وصرفوا عليكي دم قلبهم وحرموا نفسهم من حاجات كتير علشان خاطرك وسهروا وكبروا علشان يجي واحد يهينك...وياريته بيهينك وبس...لا ده انتى كمان فرحانة بالاهانة!!! فوقي يا حبيبتي ده بيضحك عليكي وعامل فيها راجل عليكي انتى بس! لو خايف عليكي فعلا وبيغير والحركات القرعة دي...يخطبك رسمي...انما شغل "طمنيني عليكي اول ماتوصلي البيت..لا اله الا الله" ده كله ضحك على الدقون!
والحجج الفارغة بتاعة "انا هاظلمك معايا"..."انتى احسن منى"..."انتى خسارة في واحد زيي"..."بكره تنسيني"...هوا بيفلسع!
الانسان المحترم الجد المتحمل المسئولية مايربطش حد جنبه زي البيت الوقف...اللى بيحب حد يشتغل ليل نهار علشان يفوز بيها...يكون واضح...يدخل البيت من بابه...الفقر مش عيب....العيب هو فقر النفوس! 
مش هاقول خدي الغني الجاهز اللى مش ناقصه حاجة....بس على الاقل بلاش ترضى بحاجة فوق طاقتك في التحمل....على الاقل يكون في الحد الادنى من الحياة الكريمة. متفكريش انك هاتاخديه بطوله وانتى وهوا بس..."عش العصفورة يكفينا...انت جوا وانا هابات بره!"...اكيد ربنا هايرزقك باطفال...ذنبهم ايه يعيشوا حياة ناشفة من اختيارك؟ فكري في اطفال ملهمش اي ذنب في الحرمان...وضروري تفهمي كويس جدا ان الاطفال مصاريفهم كتير...لبس...اكل (اكل الاطفال مش رخيص)...بامبرز...دكاترة...ادوية..لعب (ودي ابسط حقوق اي طفل انه يلعب)..حضانة (ودي ضرورية لتأهيله لمدرسة محترمة) واخيرا مدرسة...غير انه لما يبدأ يعي هايحس بنقص لو لقى نفسه اقل بفجوة عن باقي الاطفال في العيلة (عيلتك)...بلاش...انتى اول واحدة هاتتعبي نفسيا لما تشوفي اطفالك اقل من غيرهم...وده هاينعكس على علاقتك بجوزك. الفلوس مش كل حاجة...لكن لو خدتي انسان طموح ولو انتى كمان طموحة هاتقدروا تكسروا جميع الحواجز! بس تاخدي واحد كل مؤهلاته انه بيحبك...مفيش داعي!
لما تختاري انسان بصى الاول على اخلاقه...على اصله...على مستواه الاجتماعي...على عائلته...على طموحه! لو انسان بسيط ماديا (بس عنده ما يبدأ به حياة كريمة) وطموح..مترفضيش. ومها كانت الظروف...ومهما كان الموقف...ومهما كانت العلاقة قوية بينكوا اوعي تحت اي ظرف توافقي او تسكتي على اهانة!! اللى بتتهان مرة بينتهى بيها الامر بالاهانة اليومية المتكررة ولا هاتقدري ترفعي لك راس تاني! 
الحب مش وسيلة....الحب غاية! لو بيحبك هايحافظ عليكي....مش هايوعدك ويركنك جنبه. 
خدي الحلق الاول...قبل ما تخرمي ودانك!

ريم اسامة 
https://www.facebook.com/groups/329904227056535/