المجتمع الذكورى زرع فكرة ان الستات نكديين...واحنا بدانا نهزر على الفكرة لحد ما السمعة الجميلة لزقت فينا واللى كان كان!
خلاص موافقة...طيب بما انها اصبحت واقع وحقيقة واحد المسلمات...على الاقل نبحث عن السبب...ماهو النكد ده مش مولودين بيه...حضرتك ده شيئ مكتسب وله اسباب وله عوامل.
المصريات بطبيعتهم مش بيميلوا للكئابه...اه احنا حياتنا تجيب احباط ولكن دايما بنضحك على الهموم والمواقف الصعبة..بنهونها على نفسنا من غير ما نحس...طبيعة شعب!
احنا بنتكلم طبعا على السيدات المتزوجات...اي واحدة مش متجوزة او انفصلت بتحس ان الحياة دبت فيها وردت فيها الروح!! من غير اي ذكاء...يبقى مين السبب؟؟؟
برافو...انت :)
الحقيقة المؤلمة ان الراجل علشان يبعد الشبهات عنه...علشان عارف انه كئيب ونكدي ويجيب السكر والضغط...قرر يحدف التهمة على مراته...علشان يغطى على كوم الاحباط اللى بيحوشه جواها...واهو سبب مقنع انه ينكد عليها اكتر ويكمل مسيرة الاوليين!
الراجل بياخد مراته مفرفشة وعندها طاقة تهد جبال بنفس راضية...بتضحك على النكت السخيفة...بتتعامل مع قرايبه بكل تلقائيه (لحد ما واحدة عقربة تسمم الجو وتبدا المعاملة المتكلفة)...تتصل بامه كل كام يوم علشان هو يرضى عنها...ترفض الخروج المبالغ فيه علشان توفر له فلوسه (متخلفين احنا جدا لان فرق الفلوس بيصرفه على نفسه مع اصحابه)...وقت تجهيز البيت وتأسيسه بترضى باقل ما كانت تطمح اليه...علشان خاطره وعلشان مش عايزة مشاكل وعلشان الجوازة تعدي على خير...بتوافق على شروطه المجحفة الغير مقنعه واللى لو فكرنا فيها شوية هانكتشف انه انسان معقد...بيطلب منها تقاطع كل الذكور في حياتها الا ابوها واخوها (!!!) علاقتها في العمل تكون بلا ذكور خالص!!! يشترط عليها متركبش تاكسي اطلاقا (علشان السواق راجل)...على فكرة دي مش غيرة...ده تأخر ذهني وعقد نفسيه وعدم ثقة في النفس!!
في نوع لو هو مقتدر ماديا هايفرض على مراته تقعد من الشغل...ولو غير مقتدر بس عنده نزعه "مراتي متصرفش عليا مليم" برضه هايفرض عليها تقعد من الشغل...طيب ماهو ممكن تشتغل ومتصرفش عليك برضه..ايه علاقة رجولتك بانها تقعد في البيت؟؟؟؟ والنوع ده من الرجال لو مقدرش انه يقنعها تسيب شغلها بيتلكك لها عند اي موقف ان شغلها هو سبب القرف في حياتهم ولازم تشوف لها صرفة علشان دي مش عيشة وهوا مش هايستحمل كده كتير...ولما يفقد كل قدرته انه يجبرها تستقيل...يهددها..."يا انا يا الشغل...اختاري...ده قرارك"...الى اخره من الجمل المحفوظة بتاعه الرجالة "الغير كئيبة" اللى بيحبوا زوجاتهم ومش بيحبوا يقفوا في طريق طموحهم واللى شايفين ان الست جزء مهم من البيت ومن المجتمع (مصمصة شفايف هنا ارجوك..مش عارفة اكتبها!)
وفي نوع اسمه "مصدًر العبيطة"...اللي عامل نفسه مش واخد باله من اي حاجة في البيت وفي الحياة وفي الكون...كائن عايش يطفح وينام !! هوا عايش ويتكاثر علشان ربنا قدر له يعيش! هوا كده...هائم على وجهه...اتجوز علشان قالوا له لازم تتجوز..اشتغل علشان يلاقي يصرف على بطنه...بينام بشكل مبالغ فيه...هوا بيرفض دوره في البيت...يفَضل دور "قصيص الزرع"...يتحط زينه لا بناخد منه ضل ولا بناخد منه فاكهة...موجود منظر بس!
وعندنا برضه الراجل النمطى...كل حاجة عنده بقدر وميعاد...ممشي مراته على جدول...الفطار بميعاد وعناصر معينة تكون موجودة على الفطار ويشرب الشاي في كوباية معينة...الغدا بميعاد ولو مفيش شوربة كل يوم وسلاطة كل جمعة وسمك مرة في الاسبوع ويوم من غير لحوم..يسمعها قصيدة الاهمال والاستهتار والعشوائية والرخامة والسخافة وتقل الدم!!
ما كانت تتجوز روبوت بقى...التليفونات بميعاد...الزيارات بميعاد....الشوبينج بميعاد...الخروج...الدخول...الحموم...الرياضة...كل حاجة بميعاد ثابت في جدوله المقدس! ويستغرب بعد كده مراته مش بتضحك ليه!! هاتضحك على ايه حضرتك؟؟ على البمبة اللى خدتها فيك؟
واشهر نوع بتاع "عايزة حاجة من تحت؟؟"...هوا حياته تحت...الطبيعي بتاعه انه تحت في الشارع...يعنى لو مراته متجوزة محصل كهربا مش هايفضل بره كتير كده! بيروح الشغل ويرجع ياكل ويريح علشان ينزل ويكون بكامل طاقته...يصحى يتحجج ينزل يجيب اي حاجة (بقاله حداشر سنه بيتحجج يوميا) ويتاخر شوية علشان الشوارع زحمة...ويرجع يلف في الشقة زي اللى جاله خبر وفاة حد عزيز ومش عارف يعمل ايه...يكمل ساعة بالعاااافية على فص عينه...وينزل بقى...ينزل يتهوى...يروح القهوة....يتمشى للقهوة الابعد...يروح حي اخر غير الحي اللى بيسكنه علشان يجرب قهوة مختلفة...وعادى بقى تولع مراته بالعيال بالبيت بالمشاكل والمذاكرة والامتحانات....النوع ده ينقط والله...مايعرفش حتى عياله بياخدوا ايه في المدرسة (حتى كنوع من المعلومات العامة يرغي فيها على القهوة!) ولا يعرف جابوا كام في اعمال السنة ولا عملوا ايه في الامتحانات ولا اي حاجة...راجل عايش والهوا بيجري في دماغه...هوا ودخان واغانى...عيشة زي الفل..عايش في العربية في شوارع المحروسة....ويقولك الستات نكديين!!!
الرجالة مش مقدرة حجم مسئوليات الستات...يعنى انت عايز تفضل بره على طول وكمان هي تضحك في وشك وتشجعك علشان مودك يفضل خفيف خفيف كده؟ ماهيا شايلة جالوص الطين وانت كل مشكلتك ان العيال بتوع الشيشة بحطوا ولعة حجم كبير على الحجر رغم انك قلت لهم الف مرة انك عايز السماسم علشان الحجر بيشيط بدري كده!!!!!
وعندنا الراجل اللى بيحط امه في جملة مفيدة في كل موقف...ده مش تقدير...انت بتكره مراتك في امك باقصر الطرق...لما تاكل اي حاجة من ايد مراتك تقارنها باكل امك...لما مراتك تحتاج نصيحة في المطبخ تطلب منها تسئل امك...لما تخرجوا تصمم تعدوا على الست الوالدة تسلموا عليها...اول يوم رمضان والعيد والمناسبات الغير رسمية واخر الاسبوع طبعا عند ست الحبايب يا حبيبة! حرام عليك اعصاب مراتك! ممكن تكون والدتك ست ممتازة بس انت باسلوبك المستفز ده بتزرع البغضاء!
الست المستقيلة اللى بتشوف زمايلها الاقل منها في الشغل بيترقوا وبيكبروا في مراكزهم وهي كل همها يكون حوض المطبخ فاضي علشان جوزها مايرجعش يعايرها انها مهملة في البيت رغم ان ده شغلها الشاغل ودي وظيفتها الوحيدة في الحياة!
الزوجة اللى بتبات كل ليلة لوحدها متعرفش جوزها بيرجع امتى لانه بيتهوى على القهوة وبيوصل ارضي من ضغوط العمل! هو ميعرفش انها كل ليلة بتقاوم انها تحط مفتاح الشقة في القفل من جوا علشان يفضل بره لتانى يوم!
اللى بتتعب من زن العيال والطلبات اللانهائية والفرهدة والتربية بجانب شغل البيت غير الادمى ولما تشتكى جوزها يتهمها انها مش بتحب عيالها وكثيرة الشكوى منهم رغم انه مايعرفش حتى اكلوا ايه اليوم ده ولا رجعوا من المدرسة امتى ولا سبب الجرح في ايد ابنه ايه ولا بنته شكلها خاسس ليه ولا خد باله ان مراته غيرت لون شعرها ولا لاحظ ان ابنه حلق شعره ولا عدى على ذهنه ان بنته لابسه جديد ومستنية ابوها يقولها "حلو عليكي"
الست اللى بترفض تخرج تتفسح علشان اخر الخروجة هاتعدي تمضى حضور عند حماتها وطبعا لازم جوزها يتنح هناك لحد اخر الليل...مفيش جملة مفيدة ولا موقف غير لما سيرة حماتها تحضر....ما كنت تتجوز مامتك وخلاص...بتقرف بنات الناس معاك ليه؟
الراجل عايز ست تستحمله في كل ظروفه المادية...ماتطلبش منه اي حاجة نظرا لظروفه...ولا تطلب للعيال نظرا لظروفه برضه...وتتصرف بمصروف البيت مهما كانت الاسعار وظروف الشهر...تترفه عن الهيافات زي نضارات الشمس وهدايا اصحابها والخروج...تفضل مقدره ظروفه ليوم الدين!!! وفي نفس الوقت هو يحافظ على مظهره لانه واجهة البيت ولانه صاحب الفضل والجميل واللى بيجيب الفلوس!!!
اللى بيعيش على القهوة بيكره جدا يرجع البيت يلاقي مراته لاوية بوزها ويتهمها انها بتستخسر فيه "ساعة" يريح فيها دماغه من كتر التفكير (في ناس كتير هاتقرا المقال ده وعيب اشتم..بس اشتموا انتوا عادي)..لما يسمعها بتزعق في العيال بيتضايق اوي ويتهمها انها بتعمل كده علشان تنكد عليه قبل ما ينزل!!!! لما يلاقيها متعصبة يقولها يعنى هوا ده تمن انى هانزل؟؟؟؟ (مش بقولكم دماغه بيجري فيها الهوا)
ده لو الست خرسانه كان زمانها اتهدت!!!
الرجالة محتاجة صحوة ضمير...محتاج يغير فكرته عن "الرجولة" شوية...محتاجين يفهموا عواقب تصرفاتهم على المدى البعيد...محتاجين يخافوا من مستقبل كئيب وهم لوحدهم لا ست هاتفضل جنبك...ولا ابن هايستنى يخلص طلباتك...ولا بنت هاتقولك وحشتنى...زي ما انت كنت صورة صامته في طفولتهم....هاتكون كوم مهمل في شبابهم!!
براحتك!
حسبي الله
ريم اسامة
https://www.facebook.com/groups/329904227056535/
