طلع موضة كده من كام سنة...لكنها اشتعلت جدا السنة اللى فاتت...وهي اجندة العام!
طبعا مش الاجندة البني/اخضر/نبيتي الكئيبة بتاعة زمان دي...لا...بقت متدلعة جامد ومعاها هدايا وبتيجي في اشكال مختلفة وبقى في تنافس شديد بين الشركات لجذب عدد اكبر من المهتمين.
في البداية كانت تستهدف فئة السيدات...السنة دي نزل منها اشكال رجالي!
الاجندة بتكون مكونة من "اجندة طبعا"...فيها شوية افكار في الاول....يعنى اكتر اماكن عجبتك...سفريات طلعتها..اماكن نفسك تروحها...رايك في الاماكن اللى زرتها ايه...ايه احلى افلام...احسن كتب...افكار للتوفير...اهدافك للعام الجديد...ازاي هاتحققها...صفحة مقترحات لتمارين يومية...صفحة لمتابعة الوزن...الهوايات ...عادات سيئة تريد التخلص منها واخرى جديدة لتجربتها...وفي بداية كل شهر صفحة تلوين...وبييجي معاها ستيكرات...وممكن بلانر للسنة تتعلق على الحيطة...ونوته صغيرة لمشرياتك - مش عارفة اسمها بالعربي لكنها to do list..وعلامة للكتب book mark وقلم مثلا...بتيجي في علبة او شنطة...كل شركة مختلفة عن التانية ولكنهم في النهاية نفس الفكرة...الفرق في الشكل الخارجي وبعض التفصايل من جوا!
في ناس كتير في الاول اتريقت كتير على الفكرة...وازاي بندفع مبلغ مش هيَن في "اجندة"!
الحقيقة انا اشتريتها السنة اللى فاتت...بجد فرقت معايا جدااااااااااااااااااا جدا...وبانصح بيها اي حد اعرفه...والسنة دي شجعت اصحابي جدا لدرجة انى لميت منهم الفلوس بنفسي ورحت اشتريتها لهم علشان محدش يكسل ينزل...هاتيجي لهم ديليفري!
انا لونت كل الرسومات...جبت الوان مخصوصة لتلوين التفاصيل الدقيقة بالرسومات...واشتريت علبة الوان خشب نوع كويس اوي...الوان فلوماستر...ستيكرز زيادة...مجموعة اقلام جاف الوان..دباسة صغيرة.
بقى للمجموعة دي شنطة خاصة فيها كتاب تلوين (اشتريته بعد ما صفحات التلوين خلصت)...الاجندة...الاستيكرز...مقلمة كبيرة فيها كل ما لذ وطاب من الادوات المكتبية اللى بستخدمها.
الاجندة مساحة لمراقبة الاسبوع...او حتى مراقبة نفسك... بمعنى...شوفي خرجتي كام مرة...صرفتي فلوسك في ايه...انا باحب اكتب اي حاجة طلعتها للخير علشان لو قصرت في شهر...اقدر اعوض في شهر تانى...قراءة سورة الكهف كل جمعة...اعياد الميلاد...مواعيد دفع الفواتير والاشتراكات (خصوصوا اللى بتدفع مرة كل كام شهر زي اشتراك النت ربع سنوي مثلا)...ايام اجازاتي من الشغل.
اتعودت ادبس اي ورقة مهمة او لها معنى في الاجندة...تضاعف حجمها الحقيقة وبقت ملفتة للنظر...تذكرة سينما...تذكرة متحف...تذكرة دخول ملاهى...اي حاجة من هذا القبيل. دبست برضه فيها ورق اولادي كتبوه خلال السنة كرسائل لي...ابني بيحب يكتب رسالة اعتذار عامة...او كروت عيد الام اللى اتعملت في المدرسة او البيت...رحت طلعت شهادة الخدمة العامة من مجمع التحرير..دبست صورة منه...وصل دفع مصاريف المدرسة والباص...صورة من اي مقال نشرته...وصل دفع اشتراك النادي....ورقة ضمان اي حاجة علشان ماتروحش منى في حتة....كشف النضارة....الخ...بجد مفيدة اوي اوي.
في حاجة اسمها bulliten journal...دوروا عليها على النت...دي بتكون زي الاجندة لكن تعمليها بنفسك...بذوقك...الوانك...دماغك!!
لو مش عايزة حد يحدد لك شكل الاجندة او المفكرة اللى تكتبي فيها...اعمليها بنفسك....في كشاكيل او مذكرات نفس شكل الاجندات ولكن فاضية من جوا...ومعاها ستيكرز برضه...بنص سعر الاجندة اللى بتكلم عنها فوق دي. دوري على النت على افكار الbulliten journal وخرجي كل طاقتك في الترتيب والتنظيم فيها...لوني...اطبعي رسومات من النت والزقيها...اطبعي اسم الشهور باي خط يعجبك والزقيها في المذكرات دي ولونيها واستعمليها.
احنا حاليا في نهاية العام...لما باتصفحها بلاقي تفاصيل كل يوم من رمضان...كل يوم من المصيف...تفاصيل الخروجات...تفاصيل كل ويك اند...اعياد ميلادنا....واي مناسبة خاصة او عامة...او عيد...كل ما احس انى متضايقة اتصفحها...باحس انى احسن ومبسوطة!
بعد كام سنة لما تفتحي اجندة قديمة وتلاقي خط ابنك وهوا صغير لسه...هاتنبسطي!
نفسي السنة دي اقدر اطبع صورة من اي خروجة (حتى لو على طابعة عادية ابيض واسود) وادبسها في يوم الخروجة!
مش خسارة يا جماعة الفلوس في حاجة زي كده...لو حسبتيها هاتلاقي ان في الشهر نصيب المفكرة دي هايكون 11 جنيه مثلا بس!! مش بتجيبي لبان بيهم؟؟
لو مجربتيش الاجندات دي قبل كده...نصيحتي بجد هاتي السنة دي...هاتفرق معاكي نفسيا اوي...لما تلاقي حاجة في ايدك بخطك ولمستك والوانك....اهتمامتك انتى الشخصية بعيد عن الاولاد والبيت والشغل...هاتحسي بفرق.
ربنا يسعدنا جميعا...حتى لو بحاجة هايفة زي كده
ريم اسامة
