احنا احيانا بنكون ضحية لعبة نفسية شديدة الخطورة
وساعات بتكون لعبة منحطة!!
هاتكلم عنى انا شخصيا...في فترة حد بدأ يزرع جوايا فكرة انى مصابة بالاكتئاب!
الزن الكتير...التصميم على الفكرة وطبعا مع الالتزام بالاسلوب الهادئ الواعى والناصح والمحب....بدأت فكرة الاكتئاب تتسرب جوايا
"ده انا مكتئبة بقى ومش واخدة بالي!!"
كل ما اهزر زيادة او اضحك زيادة - يكون في مكالمة تبدو في مظهرها الحب والحنان والخوف عليا...ان الهزار والضحك العالى ده كان بيخبى وراه اكتئاب وحزن وانى محتاجة دعم نفسي...."لازم يا ريم تشوفي دكتور نفسي قبل ما الموضوع يكبر"
كل ما الكلام ده يتكرر....كل ما الفكرة تسيطرة عليا اكتر...وكل ما ادخل ادور على النت عن انواع الاكتئاب وعلاجه من غير ادوية....ما انا بقى غالبا مريضة ومش عارفة لان المريض النفسي مايعرفش انه مريض!! وانا لازم احس بالعرفان والشكر ان حد نبهنى لمرضى وبيدعمنى في اتخاذ قرار العلاج!!
طبعا...مكنتش بقول لاى حد الكلام ده...او اخد رأي اي حد في مرضى النفسي!! وده كان غباء طبعا!!
احنا كتير مننا بيتعرض لحملات غسيل المخ على مدار حياتنا...من غير ما ناخد بالنا...وغالبا هايكون ده نابع من شخص عنده نقص في شخصيته او حياته ولكن النقص ده مكتمل فيك....فيبدأ يكسر فيك...يهد فيك....علشان الناقص يكون عندكم انتوا الاتنين!!!
احيانا بيكون الشخص ده صديق مقرب وانت مش واخد بالك...من العيلة...من اخواتك حتى...
ممكن يكون غسيل المخ في اتجاه انك شخص ضعيف في اتخاذ قرار الطلاق! (ايوة ساعات بتوصل لهدم البيوت) وانك ازاي مستحملة راجل بشع زي جوزك ده؟؟؟ وانتى ليه تستحملى حياة اقل من اللى تستحقيها....ازاي تصرفى في بيتك وفيه راجل...هوا مش من الرجولة انه يرفض فلوسك؟؟؟ انتى سايباه يتحكم فيكي بالشكل ده علشان ليه؟؟ انتى تقدري تعيشي من غيره عادى على فكرة...ويبدأ الزن الناعم الهادى اللى بيشبع النفس!
او كلام في اتجاه انتى ليه بتخدمى عيلتك بالشكل المبالغ فيه ده؟ ده انتى بتطبخى وتغسلي وتنضفي وتذاكري للعيال وتشوفي طلباته وطلبات امه وامك...وفي الاخر يرفض انك تخرجى مع اصحابك!!!! انتى مش خدامة على فكرة...انتى متعلمة ولولا تحكماته كان زمانك مديرة قد الدنيا!! (ممكن جدا تكون اسباب رفضه مقنعه...انتى عيانة مثلا او قالك تستنى يومين يكون معاكم فلوس اول الشهر او انه هايكون في الشغل وبلاش تسيبوا الاولاد لوحدهم...مئات الاسباب المقنعة غير القهرية)
الكلام اللى بيدخل لنا زي الزيبق ده...مرعب...وخطر...مخيف ومنحط!
لازم كل واحد فينا يعرف حدوده كويس...مايتساهلش مع اي حد يحاول يغير فكرته عن نفسه....مش كل ما يتقالنا كلمتين نسمعهم ونمشي وراهم....زي ما انا عملت وكنت عرضه للمرض النفسي بجد...العلاقات الحقيقية هي العلاقة اللى تكبر من شأن الواحد...اللى تكون فيها على راحتك..في اوقات فرحك او ضيقك او حزنك....اللى قدامك يستوعب حالاتك المختلفة وردود افعالك من غير صدور احكام عليك.
العلاقة الحقيقية هي علاقة من غير خوف من الغدر بأشكاله...تكون كلها ثقة....تشعر فيها بالامان!
ريم اسامة
لينك المدونة على الفيسبوك:
https://www.facebook.com/groups/329904227056535
