راحة البال هي

اكتمالا لمجموعة مقالات المشاعر والاحاسيس :) ومن اهمهم طبعا الشعور براحة البال

راحة البال هي:

تكونى محوشة ورقة ب200 جنيه من مصروف الشهر من ورا جوزك للطوارئ!

تدخلي جمعية وتقبضيها الاول!

ابنك او بنتك يرضوا يدخلوا الحمام قبل ما يناموا!! 

تاخدي مخالصة من البنك بسداد الفيزا!

تغسلي اسنانك بانتظام!

اخر الشهر تلاقي كيس لحمة او فرخة مستخبية في اخر الفريزر!

الحفاظ على الذكاة والصدقات!

تلاقي هدوم مقاسك اي وقت في السنة! (كتير اوي بيحقدوا عليكي على فكرة)

تلحقي الاوكازيون من اول يوم!

اول يوم معرض الكتاب (لو كنتى عاشقة للكتب زي حالاتي)

تطبخي قبل العزومة بيوم.

تعملي حساب هدايا عيد الام من قبل بشهر او اكتر

تشيلي عيدية العيال في البوسطة او البنك في حسابات خاصة بيهم 

تشتري ادوات المطبخ والصيني لبنتك قبل الجواز بسنين!

تشيلي الثوم المفروم في الفريزر خزين للسنة كلها 

طبعا المواظبة على صلاة الفجر

تشيلي عبوة مسحوق للغسالة زيادة

تسمعي دعوة من والدك او والدتك

تفكري في الانتقام وتجاهدي نفسك وتقررى ان الطيب احسن!! في ساعتها هاتفرقعي من الغيظ بس لما الغضب يروح هاترتاحي اوي

تراقبي ابنك من بعيد وتتيقني انه محترم ومش بيلعب بديله 

تراقبي جوزك - انظر السطر السابق

تحللي وتطلع التحاليل كويسة 

تلاقي مفتاح الشقة او العربية الضايع 

تلغي خاصية الزيرو من التليفون الارضي (ما انتى عارفة بنتك رغاية!!)

تعملي جمعية وتقبضيها على ميعاد المصيف او دخول المدارس

لبس المدرسة يجي على مقاس الاولاد السنة اللى بعدها!!

تشتري كشاكيل وادوات مكتبية كل شهر ولما تيجي الدراسة تشتري تيكيت وجلاد بس!!

اولادك يحفظوا قران

تنضيف الشقة بالكامل قبل بدء اسبوع جديد من الشغل والدراسة

متسيبيش ولا معلقة في الحوض قبل ما تنامي!!

ابقى متأكدة انى مزعلش حد - ولو زعلت غصب عنى اعتذر

تحضري ساندوتشات المدرسة من بالليل

تحضري شنطة الحضانة او المدرسة برضه من بالليل

تكوى قمصان جوزك كلها وتغسلي جميع الشرابات!! 

تحضري هاتلبسي ايه في الشغل طول الاسبوع 

تخططي هاتطبخي ايه طول الاسبوع برضه!!

تنجحي بتقدير محترم

ترفضي سفرية بره البلد لشهور طويلة علشان خاطر بيتك (هاتكرهي نفسك وتكرهيهم فترة بس انتى عارفة ان ده القرار السليم)

راحة البال بقى الحقيقة انك تاخدي مج النسكافيه وتولع الدنيا باللي فيها!! سيبك انتى....خراب يا دنيا عمار يا دماغي :))

ريم اسامة
https://www.facebook.com/groups/329904227056535/

ضهر ايدها المقشفة!

ليلى ركنت العربية الجديدة هدية عيد ميلادها (من جوزها) بعد ما رجعت من الكوافير وكانت سعيدة جدا ان شعرها زي ما هوا...لا هاش ولا اتكعبل "تسلم ايدك يا عبده" (الكوافير)...وهيا بتدوس على زرار الاسانسير كانت معجبة اوي بلون المانيكير الاحمر الفاقع...وكان بصراحة لايق عليها اوي..خصوصا مع الخاتم الملعلط ده.

طلعت الشقة ودخلت وريحة المنظف استقبلتها بترحاب...دايما بتحس بالتفاؤل لما تدخل الشقة وتلاقيها نضيفة وريحتها حلوة...شكرت سيدة الشغالة على المجهود في التنضيف ودخلت تدور على جوزها...كان بيلعب بلايستيشن..نهت له ال Game وبدات واحد جديد معاه...من اكتر الحاجات اللى بتحبها هي هزيمه جوزها في البلايستشن! الذل  جميل مفيش كلام.

"هانعمل ايه في الويك اند؟"

"مش عارف - انتى تحبي نعمل ايه؟"

"تعالى نطلع السخنة!"

"تعالي :) ... حلو اوي اللون ده عليكي" كان يشير الى شعرها

"كنت خايفة مايعجبكش!"

"اي حاجة عليكي حلوة وتعجبني"

حضرت الشنطة وكان فيها المايو والبشكير قبل اي حاجة...وكريم الشمس والبرنيطة المنقطة اخت بتاعه سعاد حسني بالظبط! وطبعا عشر جزم والف بلوزة...وكالعادة جوزها قالها "احنا مش هانهاجر..ده ويك اند!" 

بس هيا مش بتعرف تسافر غير وهيا متطمنة ان كل حاجة موجودة علشان محدش يعرف الظروف برضه!

اول ما وصلت خدت البرنيطة العزيزة ولبست ونزل المياه...وجوزها حصلها وهوا اللى كسب في سباق حبس النفس :) "ابن اللذينة حريقة سجاير وبرضه نفسه طويل" قالت لنفسها - استرخت في المياه وفي الخلفية موسقى خفيفة.

كان ويك اند تحفة - كالعادة. سهر ومياه وخروج واتصوروا كتير لزوم الفيسبوك....يا سلام لو الويك اند تلات ايام مش اتنين بس!! الحياة كانت تبقى مثالية......

"مامااااا...خلصت...شطفيني!!" صحيت ليلى وايدها مبلولة بالمواعين من احلام اليقظة على صوت ابنها وريحة اللى هوا عمله!!! 

على ما نشفت ايدها كان ابنها بيكرر كلمة "شطفيني" بشكل هستيري جاب لها توتر شديد!! دخلت واستقبلتها الريحة بالاحضان !! الريحة بشعة وقالت في سرها "انتوا بتطفحوا ايه؟؟؟ جلة؟؟ (بكسر الجيم) "
رجعت للمواعين تانى وقبل ما تحط ايدها في الصابون لفت نظرها كمية القشف الخرافية...وضوافرها متقرقضة ومتعضعض الجلد اللى حواليها!! امتعضت وبصت في الحوض تانى...شكل الحوض الطف من شكل ضوافرها! 

كملت المطبخ والطبيخ وفي الخلفية عيالها بيعيطوا ويزنوا ويصرخوا...اقلمت نفسها على الجو ده! لما جوزها رجع استقبله العيال بالاحضان وهيا فضلت في المطبخ ولما دخل قالها "ايه ده؟ عاملة ملوخية؟" ردت "ايوة - انا عارفة انك بتحبها"..."مين قال انى بحبها؟!!! انا باكلها وخلاص! يعنى لقيت غيرها؟"

"كل سنة وانت طيب" قالتها وحاولت تبتسم - بس هيا عارفة انه اكيد هايكبسها...زي كل مرة

"اشمعنى؟؟"

"عيد جوازنا بكرة!!"

"انتى لسه فاكرة!!!!!"

برضه مخدش باله من شعرك!! خسارة الساعتين اللى صحتيهم بدري عن العيال علشان تعمليه بنفسك!! ويبدا المونولوج اللى بتكدري بيه نفسك!! "ياللا..اشمعنى يعنى ده اللى  هاياخد باله منه؟ ماهو مش بياخد باله بس غير من كوم الغسيل وتل المواعين والحلة المحروقة وفردة الشراب الضايعة وعيد ميلاد امه وابوه واخته... ومن الشيش المترب والترابيزة اللى مش متلمعة ومن العيال اللى محتاجة تستحمى!!...ومش بياخد باله انى انسانه عندي مشاعر وبتضايق وبأكتئب وبتخنق...وازاي مطلوب منى ابقى جميلة وحلوة ورشيقة وفي نفس الوقت اشيل كل المسئولية لوحدي؟ ليه بياخد باله من وزني ومش واخد باله من شعري المتوضب؟؟...ولا بياخد باله انى نفسي مرة اسافر من غير ما امه تكون معانا....او اتفسح من غير العيال مرة!!!" ونزلت الدمعة المعتادة ومسحتها بضهر ايدها المقشفة!!

حطت الاكل وبعد الغدا دخلت تغسل المواعين تانى و.....بعد ما رجعت من الجيم راحت تدور على جوزها وقالها "كفاية جيم بقى...انتى كده جميلة مش عايزك تخسي !!!"

احلام اليقظة....هي اللى بتخلينا نستحمل!!

ريم اسامة

https://www.facebook.com/groups/329904227056535/

اخطف واجري

للاسف عندنا حاليا (ومن سنين فاتت) سياسة "اخطف واجري"

اي توكيل محلي او عالمي...او اي محل او سوق...اي جهة بتبيع...مهما كانت السلعة....ماتعرفش الزبون لما يدي ضهره للمكان ويمشي في ايده البضاعة!!

لما تشتري اي حاجة لازم تعرفي انك لبستي فيها للابد! مفيش حاجة اسمها ترجعي او تستبدلي او تصلحي حاجة في الضمان! 

ومتهيألي كل واحد فيكوا عنده حكاية شكل.

التوكيلات ما بتصدق تبيع وخصوصا السلع الغالية...يعنى عربية...موتسيكل...تلاجة...غسالة....اي حاجة سعرها الاف من الجنيهات! ضروري تعرفي انك مش هاتغيريها ولا تبدليها ولو عملتي قرد برضه مش هاتشوفي منهم اي خدمة. 

صاحبتي اشترت تليفون ماركة مشهوووورة اوي بالتليفونات الاندرويد الحديثة...التليفون غالي...وجديد..وفي الضمان...اكتشفت مشكلة في شحن البطارية...مرة غيروا لها السوفت وير...والتانية باعوا لها شاحن جديد....ولما كل ده فشل خدوا منها التليفون اسبوعين واتصلوا بيها يبلغوها انها كده خرجت من الضمان علشان حد فتح الجهاز بره الشركة!!!! طيب سؤال بس معلش...هيا هاتوديه بره الضمان ليه؟ خلينا نفكر من منطلق عملي...هاتدفع فلوس بره ليه وهيا معاها الضمان من الشركة الاصلية وببلاش؟!! ولما سئلتهم وليه بتقولوا انه اتفتح قالوا لها "كان في ورقة محشورة جوا"!! - ورقة؟ ايه النظام القديم اوي ده؟ ورقة؟؟؟ ودلوقتي البنت خلاص اتدبست في موبايل غالي وجديد وخلاص! لا وكمان قالوا لها تلجأ لجمعية حماية المستهلك!! طيب ما كان قالها "اخبطي راسك في الحيطة" اوقع!!!

واللي يشتري عربية ويلاقيها بتحدف...واللى تجيب غسالة وتلاقيها بنزل مياة...وتلاجة بابها مش بيقفل كويس (حصلت لي)...وفي اللى يجيب من محل اي حاجة ويقوله ارجعها يلاقي الرد "دي اصلا مش من عندي!!"

وطبيعي لما تشتري هدوم يقولك "اسفين دي لونها ابيض وممنوع نرجع الابيض!!" او "احنا مش بنبدل حاجة في فترة الاوكازيون!!"

ومرة اختى اشترت تليفون من شركة مشهورة وفي نفس اليوم اكتشفت ان الكاميرا بايظة! راحت لهم طبعا وقالوا لها هانصلحه لحضرتك! "نصلحه؟"...ده لسه متعملش بيه ولا مكالمة! بس بصراحة اختى كشرت لهم عن انيابها واديتهم من المنقى خيار...وادالها فلوسها في الاخر!! طيب وكان لازمته ايه التهزئ ما كنت ترجع لها الفلوس على طول!! لازم يعنى بالدراع ناخد حقنا؟؟

مرة اشتريت فستان ولما روحت حسيت انه شبه حاجة عندي اوي...فرحت تانى يوم ابدله (ابدله بس مش عايزة الفلوس) بحاجة مختلفة....الراجل رفض وقالي بكل استهتار "هوا انتى اصلا بتشتغلي فين؟" - انا معرفش ايه علاقة الشغل بالبضاعة اللى في ايدي..."اسفين يا مدام البضاعة المباعة لا ترد ولا تستبدل!!!"

ليه؟ لا ترد ليه؟ ولا تستبدل ليه برضه؟؟ ما الفلوس في جيبك ومش هاخد منها حاجة!!!!

البلد كلها ماشية كده...تسمع كلام البياع وفلوسك لسه في جيبك...يا سلاااام على الكلام الجميل والذوق والاخلاق والتدين...لازم تسمع جملتين حمضانين من بتوع "في الاخرة محدش هاينفعني - انا بس اللى هاتحاسب!!" او "ربنا يعلم يا بيه النفس اللى داخل ده خارج تانى ولا لا!!" وشوية الاباندا من دي علشان يقنع الزبون ان شعار المحل هو الامانة والاخلاص والجنة ونعيمها ان شاء الله!!!

حاول ارجع له تانى يوم بالبضاعة المعيوبة...هايتحول سواق ميكروباس "احنا بضاعتنا دهب...وده عيب استخدام! انا مش ابن امبارح في السوق!! ما في مليون غيرك اشتروا اشمعنى انت يعنى اللى حاجتك بايظة؟" واخر الفيلم خناقة وقلة قيمة وخلاص!
البياع وصاحب المحل والبضاعة معاه بيكون حاجة ولما البضاعة معاك هوا بيكون حاجة تانية خاااالص..."حضرتك" بتبقى "انت"..."اتفضل" بتبقى "بالسلامة"!!...الابتسامة بتقلب عوجة بؤ غبية!! وهما محترفين خناقات وسفالة وقلة ادب...هاتخرج من المكان البضاعة البايظة معاك وكمان محروق دمك وشايط!
والورقة العبيطة اللى لازقينها بتاعة الاستبدال في خلال 14 يوم....ممكن تبلها هيا والفاتورة اللى معاك وتشرب عليهم شوربة جنان!!   

للاسف...التجارة مبقاش شعارها الشفافية....التجارة بقى شعارها "هات الجنيه اللى في جيبه باي طريقة"

وحتى لو اشتريتي حاجة من صاحبتك....هاتتخانق معاكي علشان ماترجعش الفلوس...وعادي تخسرك فيها على فكرة...عادي جدا ما في غيرك الف!

 ومن هنا كلنا لازم نتأكد اننا فعلا محتاجين اللى بنشتريه...قيسي الهدوم وفتشيها كويس...جربي اي جهاز تشتريه...خليكي تنحة ورخمة...واوعي تحطي لهم عربون او اي حاجة تحت الحساب...خالص!! دوري في اكتر من مكان على نفس السلعة علشان لو لقيتيها ارخص...فاصلي...قاوحي...خليكي كابوس وبلاش تتخدعي بكلامهم الحلو - دي مسرحية! لو معاكي فلوس اشتري...لو الفلوس هاتجهز قريب متحطيش حاجة عندهم...سيبك من الكلام المحفوظ بتاع "لو لحقتي بقى"...البضاعة ملئحة بالهبل عند كل المحلات والمخازن!!

ريم اسامة

https://www.facebook.com/groups/329904227056535/

تستاهل...علشان تحرم!

الحياة صعبة...وكل ما بتصعب اكتر....كل ما الناس بيشمتوا في مصايب غيرهم....احيانا مش شماتة صريحة ولكن بيبان اوي في كلامهم وردود افعالهم وتلاقيهم بيلوموا الضحية!!

مش هانتكلم في النقطة دي من الزاوية السياسية....علشان الموضوع شائك في الشارع المصري حاليا! واحيانا جملة "ايه وداهم هناك" بتكون على حق لان في ناس كتير بقت تعيط وتندب لما عيالها يحصلهم حاجة...لما كانوا رايحين يخربوا او يهاجموا اي مكان او منشأة او يهددوا مواطنين او يقطعوا الطريق!!!!

انا هاتكلم من الناحية الحياتية العادية.

يعنى مثلا...واحدة تتسرق شنتطها...تلاقي الكل بيتهمها هيا مش بيتهم الجاني! 

"وهيا تحط كل الفلوس دي معاها في الشارع ليه؟"...."وتمشي في شارع ضلمة ليه؟"...."قلنا مليون مرة الشنطة تتشال في الايد اللى ناحية الرصيف مش الشارع!!"..."حد يعمل كده برضه؟ تستاهل بصراحة علشان تحرم بعد كده!"

واحدة ابنها اتخطف منها...حتى يا ربي الخطف؟؟؟ يتقال من وراها "علشان ام مهملة!! خسارة فيها العيال اصلا"..."ما طبعا...الهانم مشغولة بالتليفون لحد ما ابنها اتشال منها ولا حست!!"..."في حد في الدنيا ينزل عيل يشتري حاجة لوحده؟؟؟؟ اهو اتخطف منها....خليها تشرب!"..."وتسيبه في العربية لوحده ليه؟ خلاص؟ بقى تقيل اوي على قلبها؟ اهو اتخطف منها خليها بقى تلطم العمر كله!!"

لو واحدة اتطلقت من جوزها...."تستاهل! علشان ياما امها قالت لها بلاش فلان وهيا اللى صممت عليه!"..."ادي اخرة اللى ما يسمعش كلام اهله!"..."قلنا لها مليووون مرة اتجوزي اللى يحبك مش اللى انتى بتحبيه...اديها رجعت بيت ابوها بتجرجر خيبيتها"

لو واحدة اتاخرت شوية وماتجوزتش.."ادي اخرة البطر!!"...."يا حبيبتي جالها اشاكل والوان بس هيا اللى كانت بتتأمر!!"..."من كتر عرسانها بارت!"...."علشان امها كانت فرحانة اووي ان بنتها بيضا وحلوة...خليها تشرب الحلاوة والبياض!"...."مش رفضوا ابن خالتها؟ كان ماله؟؟ زي الفل!! واهو اتجوز ست ستها ومعاه تلات عيال كمان! وهيا لسه قاعدة في حضن امها!!"...."على فكرة البنت ضحية امها....علشان الامارة والطلبات الكتير الفارغة...ما كانوا يلموا الدور ويقبلوا بفلان!! كان لازم يعنى الفشخرة؟"

لو واحدة اتأخرت في الخلفة.."مش دي اللى كانت بتقول زمان انها مش بتحب الاطفال الصغيرين؟"..."ماهي اجلت الخلفة في اول جوازها؟ اصل ربنا مش بيتعاند!!"

لو حد جاله مرض صعب...."ادي اخرة الاكل كتير بره! اصلا التيك اواي كله زفت وهباب ومحدش بيسمع الكلام!"..."ما طبعا لازم يحصله كده من شرب السجاير!!"..."ماهو بيشرب حاجات ساقعة كتير! عايز يعمل اللى على كيفه وكمان يفضل بصحته؟"..."لا معلش بقى! هوا اللى مهمل!"

لو واحدة ضاع منها اي حاجة دهب..."دي اخرة الاهمال!!!"..."ماهي لو كانت حاسة بقيمة الحاجة كانت حافظ عليها! بس هيا معندهاش حاجة غالية!"...."مش تاخد بالها؟ هيا فاكرة نفسها لابسة فالصو؟؟ تستاهل!"

لو واحد اتسرقت عربيته..."قلنا الف مرة لازم قفل الدريكسيون بس هوا فضل يتريق علينا!! اديها اتلطشت خالص منه!!"..."ماهو اللى راكنها في حتة مقطوعة!!"...."كان بيوفر تمن الانذار...خلي التوفير ينفعه"...."مش كان بيتريق على اللى بيأمنوا على عربياتهم ويقول فلوس في الارض وهبل؟ اهو ندم!"

لو واحدة فرقت معاها الكلية اللى بتحبها على نص في المية...."مش دي اللى كانت قاعدة على التليفزيون ليل نهار؟"...."ماهي على طول بره البيت عايزة تنجح وتدخل اللى على مزاجها كمان؟"....لما هيا تدخل اللى على كيفها امال اللى بيذاكر يروح فين؟ معهد الصرف الصحي؟؟

في ايه؟؟؟؟؟؟؟؟؟؟؟؟؟؟؟؟؟؟؟ ازاي نلوم ضحية؟؟ امال الجاني نعمل فيه ايه؟ نديله قلادة النيل؟ يعنى الجاني واد "برم" (بضم الميم) علشان نجح في تربية الضحية وادالها درس ناجح في الحياة العملية؟؟؟ اه فعلا الاحتياط واجب بس مش معنى كده نخيط الفلوس في هدومنا من جوا ولا نربط العيال بحبل في وسطهم!!! يا ربي حتى قضاء الله بيشمتوا فيه!!!

ايه كمية اللا انسانية دي؟ ايه كمية الحقد والغل والغباء ده؟ ليه بنشمت؟ ليه بنفرح في المصايب؟ ولما تيجي لنا احنا مصيبة نتحمق اوي لو محدش تعاطف معانا بضمير!!! 

ويستمر الهزل!!

ريم اسامة

https://www.facebook.com/groups/329904227056535/

يا مرات الابن مصيرك تبقى حماة!

كتير اوى من الستات بتنكر خير الراجل - او حتى معاملته الكويسة..لو عامل امه كويس!!!

بتنكر اي كلمة حلوة او اي لفتة لطيفة او اي حركة جنتلة (بتعطيش الجيم) عند اول خناقة او مناقشة حادة تكون امه طرف فيها!

متستغربيش يا اختى انتى وهيا - ايوة بتكلم عنك وعن اللى عاملة نفسها مش واخدة بالها هناك دي!!

احنا صنف نمرود بطبيعتنا...بننسى كل حاجة كويسة مع اول مناقشة حادة ولو اتقلبت خناقة بننسى احنا اتجوزنا ليه و"كنتى فين يا لا لما قلت انا اةةةةةةة" و"انا عملت ايه يا ربي علشان العيشة المقرفة دي" و "انت كنت تتمنى تتجوزني بس بعد ما ضمنتنى بقيت تعاملني ولا الشغالات!!!" - والحقيقة احنا مبدعين جدا في الخناقات والندب واللطم والنواح :)
ايوة اتكسفي كده على دمك انتى وهيا - شايفاكوا!!
صدقوني بجد لو جوزك بيسمع جمل الصرف الصحي اللى بتقوليها ومش بيرد عليكي بايدي او برجله او بلسانه بعدها - اتأكدي انك متجوزة راجل محترم ومتربي!
الست قبل ما تتجوز شايلة حماتها في قائمة الممنوعين من الفرحة! ولما امه تعمل اي حاجة كبيرة او صغيرة او حتى ماتعملش "شوفي الولية عملت ايه؟. سوووسة!!"
بمعنى....جوزك جاب عربية جديدة وامه عرفت وبتدعي له "ربنا يديك خيرها ويبعد عنك شرها" تقومى انتى بمخك المتعفن تتخيلي انها بتدعي عليكي من تحت لتحت! مع ان الست فرحانة لابنها! ولو قرر انه يفسحها بالعربية الجديدة تسممي له حياته وتنكدي عليه...طبعا مش هاتجيبي سيره امه بس هاتختاري اي حاجة عبيطة وهايفة وتتخانقي بسببها!
لو حماتك عزمتكوا على الغدا وعملت  مخصوص البصارة اللى جوزك بيحبها وانتى مش بتاكليها ولا بتعمليها....فانتى تقلبي خلقتك وماتاكليش (ال يعنى قرفانة من الصنف اليتيم اللى معمول مخصوص لجوزك - مع انك مش قرفانة ولا حاجة)...بس ازاي امه تعمل حاجة احسن منك؟ وازاي وازاااااي تتجرأ وتقول انها معمولة مخصوص للباشا علشان هوا نفسه فيها "يعنى انا حرماه ان شاء الله؟؟؟ تيجي تشوف الاصناف اللى مش بتعرف تنطق اسمها اساسا!!!"  وبتكون ليلة سودا على دماغه وتنكدي عليه...مع انه اعتذر لك ان امه عملت حاجة انتى مش بتاكليها!!- نصيحة: ادلقي كوز مياه على الفحم المولع جواكي ده....هيا مش حماتك...دي "والدته"...وهوا "ابنها"!! يعنى علاقة مستحيل مهما عملتي ومهما فكرتي ومهما خططتي يحصل لها اي خدش...بالعكس...كل ما توقعي بينه وبين امه...كل ما هايحبها اكتر ويعطف عليها اكتر وتصعب عليه....ويكرهك!
تخيلي معايا كده مستقبلك...ابنك اللى بتقضي كل وقتك معاه ولو مش معاه يبقى بتفكري فيه...تلبسيه احسن لبس وتأكليه احسن اكل وتدخليه احسن مدارس واحسن نوادي وتنمي قدراته وتعليمه واللغات وتشوفيه بيكبر ويتقدم في دراسته وشغله وفي حياته الشخصية...ويتجوز....وتبدأ مراته اللى خدته على الجاهز تضايق من وجودك وتحاول تفصلك عنه...تضايق لو اتصلتي تطمنى عليه....او اتصل هوا بيكي في وجودها...تتخانق معاه كل ما يزورك لوحده من غيرها....كل ما تعرضي على الاولاد ياكلوا عندك...تتخانق معاه لو جاب عربية وفسحك فيها....تسيب له البيت لو سافرتي معاهم مصيف او مشتى....هايكون شعورك ايه وابنك بيبعد عنك علشان الهانم بتنكد عليه؟ ولو عرفتي انك سبب تعاسة حياته هاتبعدي عنه ولا هاتقولي ده ابني وهيا لو مش عاجبها تغور؟؟
اتقى ربنا علشان هايجيلك يوم يا مرات الابن!!
فكارت حماتك ده كارت خسران....بلاش تقربي منه احسن لك! 

ريم اسامة
https://www.facebook.com/groups/329904227056535/

الاستفزاز هو...

بعد نجاح مقالة "السعادة هي..."  قررت اكتب مجموعة مقالات عن مشاعر اخرى....زي مثلا الاستفزاز!!

الاستفزاز هو:

واحد مناخيره مسدودة ومصمم برضه يتنفس منها - صوت الصفارة ده غبي اوي!!!

واحدة ممرمطة اللبانة في بؤها وبين الحين والاخر "تريك" تطرقع بيها!

شحاتة في اشارة مرور وتفضل تنقر بضفرها على الشباك!!!

عصفورة تعمل على راسك!

حد من عيالك يهطل على نفسه عصير او ملوخية!!

حد يسئلك قدام ابنك "ممكن اديله شيكولاته؟" - وهيا عارفة انك مش بتأكليه شيكولاته اصلا!! شيلي بقى ساعتين زن!

"انتى تخنتي كده ليه؟ انتى حامل؟"!! 

"ايه الريحة دي؟" ويبصوا ناحيتك!

تتعزمي على الغدا ويتقالك "انتى مبتاكليش ليه؟ انتى مكسوفة؟؟؟" ويحطوا اكل غصب عنك في الطبق!

تدخل بيت حد ويقولك "معلش اقلع الجزمة بره" ويهزر بقى علشان يضفي بعض المرح على السخافة اللى قالها "ولا مكسوف من شرابك المخروم وريحة رجليك؟"

تحكي اي حاجة عن اولادك وتسمعي "ابنك طالع متخلف لامه" - الناس دي محتاجة اعادة تأهيل نفسي والله العظيم!

تكونوا خارجين وتلبسي اللى على الحبل وتلاقي جوزك بيقولك "انا مش هانزل معاكي وانتى لابسة كده على فكرة!! ادخلي غيري!!"

يطلع عينك في تنضيف وتلميع الشقة - وتهب عاصفة ترابية!

كعب الصندل يتكسر وانتى بره ومفيش بديل

تشيلي ابن صاحبتك ويرجع عليكي!!

تركبي الاسانسير مع حد عرقان خل!

حد يكلمك ويلزق وشه في وشك!!

واحدة طول ماهي بتتكلم تلمس دراعك او تحط ايدها عليكي!!  

تتكلمي وتليفونك يقطع شحن واللى بتكلميه يبقى مقتنع انك قفلتي السكة في وشه - حتى لما تشرحي له الموقف!!

حد يسئلك عن العيال وتقولي ان حد منهم عيان "اوعى التانى بقى يلقط منه" - طيب المطلوب ايه؟؟ حجر صحي في الشقة؟؟؟ولو حصل ان التانى اتعدى لازم تسمعي "مش قلنا لك؟ انتى اللى مش بتحبي تسمعي الكلام!!" 

ناس يباركوا لك على المولود الجديد ويقولوا "بس هايطلع اسمر اوي وشعره خشن!" هايطلع اخضر!! انتوا مالكوا؟؟

لو ابنك عنده عادة سيئة انه بيقرقض ضوافره - هايقولوا لك وفي وجود ابنك "اصل معندوش ثقة في نفسه - دي حركة لا ارادية من التوتر!!" 

حد يدخل بيتك ويمشي بصباعه على التراب اللى على الترابيزه - وبعد كده يبص على صباعه بإمعان!!! حد يناولني الشبشب والنبي!

يبقى نفسك في تليفون جديد عاجبك وتقول لمراتك فتلاقيها بترد "والنبي اتوكس!! حوش الفلوس للعيال احسن! ولا غيرلي البوتاجاز اللى قرفت منه ده!!"

تطلب من مديرك يوم اجازة ويقولك "انت مابتشبعش اجازات؟؟"

لما تدخلي اي مكان ويصادف ان الكهربا تقطع - كلكوا فاهمين اللى هايتقال بس للاسف السمعة الحلوة دي هاتلزق لشهووور 

واحدة حلوة معدية "تلاقي جوزك بيضرب نفسه بالجزمه انه اتجوز بدري" - اللزاجة حيت تجتمع مع التباته!

تتصلي بحد من اصحابك وطول المكالمه يسئلك "مالك؟؟" 

تسئل مراتك عن قميص نضيف وتقولك "انت لحقت خلصتهم كلهم؟؟ ده انا لسه غسلاهم!!" يعنى هايمسح بيهم مناخيره!! ما اكيد لبسهم كلهم خلاص!

تعملي عزومة وتتعبي اوي فيها واخت جوزك تقولك "برضه زودتي الملح في الشوربة؟ انتى مفيش فايدة فيكي!!!" وتقلب خلقتها اوي  - قدام الناس! 

ابنك او بنتك يعملوا حركة تشل وتزعقي - تلاقي جوزك بكل برود "على فكرة صوتك بقى عالي اوي!!!! الناس تقول علينا ايه؟؟ جايين من حارة؟" - وهنا الشيطان يقولها "خلاص يا نوال بلاش السكينة!! فكري في مستقبل العيال"

تقول نكتة وحد يقولك "ايه الاومليت ده؟"

تروح فرح وعيل بارد يلزق طبق التورته في كوع البدلة!!

تقولي معلومة انتى شايفاها شيقة جدا وحد يقولك باستخفاف "يااه وانتى عرفتيها لوحدك ولا حد قالهالك؟؟"

جوزك ينام اربع ساعات الضهر ويصحى مكشر  من كتر النوم وانتى متضايقة انك قاعدة كل ده لوحدك ولما تعترضي يقولك "صباح الخير!!!!"

تدخل على مراتك باتنين كيلو يوسفي تقولك "ياما جاب الغراب لامه!!"

لما البابي بتاعك يعيط وطول الوقت حد بيوقلك "رضعيه!!" - يا جماعة الكلمة دي مستفزة جدااا فعلا

حد يطفي التكييف وانت نايم في الحر النار!!

كلمة "حصل خير" على اي مصيبة!!!

جوزك يدخل من بره ويمشي لحد اخر الشقة وجزمته كلها طين من الشارع!! ولما تبدي اعتراضك يقولك "مخدتش بالي!! يعنى هاعمل كده عن عمد؟؟؟"

لما الراجل يصلح لمراته معلومة وتقوله "يعنى غلطنا في البخاري؟"

تحطي مانيكير وتلاقي اللى يسئلك "انتى بتصلي ازاي بالبتاع ده؟ صلاتك باطل" 

زميلك في المكتب يشرب حاجة ساقعة ويتكرع بصوت عالي ويقول "لامؤاخذة"!! لامؤاخذتك معاك يا خويا بس انت مش قاعد في المراحيض العامة!!!

لما ابنك يعيط لاي سبب وتسمع من حد غريب "هوا على طول زنان كده؟؟"

عربية تمشي بسرعة على بركة مياه وانتى واقفة وتاخدي البركة بالحضن!!

يهدكوا ناس مملة!!

ريم اسامة

https://www.facebook.com/groups/329904227056535/

بوز الاخص

المقالة النهاردة طويلة حبتين - معلش ماتزهقوش منى :)
الجواز بيحسسنا في اوله اننا فعلا برنسيسات وهوانم...تعملي الاكل تلاقي اللى يشكرك...تجيبي كوباية مياة تلاقي اللى يقولك "كتير كده انا بعرف اشرب لوحدي"....تطبقي الغسيل وترصيه مكانه تلاقي اللى بيشيد بنظامك واهتمامك بالتفاصيل....قبل تخرجي بتقعدي ساعة تهندسي في المكياج والمانيكير والرموش وتختاري الكعب بعناية مع طول الفستان او الجوب (في اقوال اخرى اسمها جيبة او جونلة) ولما تعتذري عن التأخير يقولك "هوا احنا خارجين ليه؟ مش علشان تنبسطي؟ براحتك!!" ومع كل فرشاة مكياج تلاقي واحد بيتفرج على حلاوتك وحلاوة الى خلفوكي....لما تخرجى مع جوزك يمسك ايدك او يحط ايده على كتفك او وسطك...لو تعبتي وجالك برد ولا صباع رجلك الصغير اتخبط في اي حاجة او ضرسك مسوس وجايب لك صداع....او حتى رمش دخل جوا عينك تلاقي جوزك اتلهى على عينه وجاب دكتور ومايسبش الاوضة اللى انت فيها غير بس انه يجيب لك حاجة تشربيها او دوا...حتى لو نمتى هايفضل جنبك برضه يطمن كل شوية لسه تعبانة ولا كويسة!  ولو نزل لاصحابه على القهوة او البلايستيشن او يقابلهم في اي حتة بيستأذنك الاول ويطمن انك اتشغلتي في فيلم او هاتنامي او هاتتسلي باي طريقة علشان ماتزعليش - ولما يرجع يستستمحك انه اتاخر (مع انه متأخرش ولا حاجة)...لو عملتي طاجن بامية بالصراصير هايعجبه وتسلم ايدك وانه مكنش عايش من قبلك وان الاكل من ايدك حاجة تانية ومش بعيد يقولك اقعدي هوا اللى هايشيل مكان الاكل...ولما تدخلي المطبخ بعد ما يشيل هوا الاطباق تلاقيهم مرصوصين فوق بعض وهوا رمى البواقي في الزبالة خلاص! ومش بعيد تلاقيه من فترة للتانية عامل لك رحلة مفاجأة او حاجز يومين في اي فندق او يعزمك على مطعم تحفة...كده بدون مناسبة. ولما بيطلب حاجة بيطلبها بهدوء وبيكون طلب مش امر! و (اسغفر الله العظيم) بيبتسم في وش مراته!!!

بمرور الوقت والسنين بتتحولي من برنسيسة الى بوز الاخص!!

 مع اول حمل بتنزلي درجة بمعنى بعد ما كنتى زي ما قلنا فوق برنسيس هاتبقى بنت ناس فقط...بس بتصعبي عليه لسه...بعد ما كنتى متألقة وشيك وبرفاناتك بتتكلم عنك...وهوا مش عارف بالظبط طولك من كتر ما بتلبسي كعب بره وجوا البيت...بقيتي وارمة ومناخيرك بتاخد حمام شمس على وشك ومبرطشة...ورجلك مفيش اي حاجة بتدخل فيها غير الشباشب بتاعته! بتمشي زي العمدة الالي وعلى طول تعبانة او قرفانة او عايزة ترجعي او شامة ريحة وحشة او مرهقة ومفيش طاقة تعملي حاجة....هوا الى حد ما بيتفهم المرحلة دى وبيعيش على امل انك لما تولدي هاترجعي طبيعية تانى....وبتولدي...ومع اول عيل بتنزلي عشر درجات مرة واحدة...وصنف الرحمة ده بيتبخر زي السبرتو...تكونى لسه والدة او بطنك لسه مفتوحة وهوا قاعد مقريف ومتضايق ان البابي بيعيط!! وتبدأي فاصل طوووويل اووووي من "انتى مش مهتمة بيا" و "هوا كل حاجة ابنك ده؟ وانا فين ان شاء الله؟"...او يقولك بقرف وامتعاض"انتى اتغيرتي اوي عن زمان!!" و"فين فلانة بتاعة الاول؟؟" وتبدأي مرحلة جديدة من حياتك الزوجية واسمها "الوقت سرقني - راحت عليا نومة"!

يروح القهوة او البلايستيشن ويتأخر اوي اوي ولو اتصلتي بيه يقولك الوقت سرقني!! يخرج مع حد من اصحابه ويجي بعدها بخمس او ست ساعات...الوقت سرقه....تروحوا المصيف يصمم هوا اللى ينزل بنفسه يجيب الاكل او يشتري طلباتكوا ويتاخر طبعا....يقولك عديت على المحل الفلاني والفلاني ولفيت على المكان العلانى وكانت مياة العربية ناقصة ومكنش معايا مياة والعجلة اللى ورا كانت عايزة تتزود هوا...و"الوقت سرقني"....العيال لما يطلعوا من المياة ببردانين وبيعيطوا ومش عايزين يكملوا فيقولك خديهم وانا جاي وراكي...ومايجيش....الوقت بيسرقه في المياه.....لو نزل يزور مامته يقعد نص يوم هناك ويرجع متغدى ومحلي ومبسوط واتفرج كمان على فيلم معاها ويرجع ينام شوية! ماهو تعبان بقى طول اليوم بره من حقه ينام!!

ولما الراجل ينام....بيكون موت مؤقت مش نوم!! ولما يصحى عينه منفخة من كتر النوووووووم تلاقيه برضه مكشر...مكشر ليه يا ابن الناس؟ يقولك "بفوق من النوم!!!" يعنى صاحي مكشر...نايم مكشر....فايق مكشر...بيفوق برضه مكشر!!! ولما تقولي له انه نام كتير اوي وكده الخروجه اللى وعدتوا بيها حد من الاولاد باظت "راحت عليا نومه!!!!" 

يوم الاجازة الصبح المفروض ياخد العيال النادي يشوفوا الشمس بدل ما هايحمضوا من الرطوبة "راحت عليا نومه"

في المصيف العيال الحقيرة بتصحى بدري وانتى تصحي معاهم والبيه يصحى العصر "راحت عليا نومه"

طلبتي منه تروحي لاخوكي ومراته زيارة شوية يصحى من القيلولة الساعة تسعه ونص "راحت عليه نومه"

لوما تشتكي يقولك "شوفي انا نايم الساعة كام وانتى الساعة كاااااام"!!

طبيعي بتنامي مع العيال!! ما هم لما بيصحوا انتى اللى بتصحي برضه! هوا اللى بيحب يقعد من غيرك ويسهر لوحده!!!

ما انتى بقيتي بوز الاخص...وش الغراب اللى معشش في بيته وعلى اعصابه الضعيفة المرهفة!!

الراجل في بيوت كيتر بيهرب من مراته...من وجودها...وشها بقى يعصبه...صوتها بينرفزه....بعد ما كانت كروان ومرهم كيناكومب على جروحه المتقيحة....بقت التقيح ذات نفسه!

الراجل بيهرب من مراته باساليب كتير وبيقلل وقته معاها بفن وحرفية شديدة...بيروح الشغل ويتاخر فيه...يرجع يتخمد...يصحى يعمل مشاوير وبعد المشاوير يرجع حبة صغيرة ومش بعيد ينزل تانى يقعد مع اصحابه في اي مصيبة...ولما يرجع من الصيبة اللى كان فيها تكون مراته نامت...مشكلة الراجل في الويك اند علشان الاحتكاك حايبقى اكتر...فهوا بينام متاخر اوي علشان يصحى متاخر برضه...وهكذا...حياة مملة وكئيبة ومراته بتدبل يوم ورا التانى! وهوا مش فارق معاه...هوا بيعذبها يمكن ترجع زي الاول!!! 

بعد ما كان بيطلب بأدب بقى يأمر ويتأمر كمان...بعد ما كان مابيستحملش عليها الهوا...بقى على اقتناع كامل انها بتدلع كل ما تمرض....بعد ما كنتى في عينه شريكته اللى بيفتخر بيها قدام الناس...بقى ينتقد كل حاجة فيكي زي مظهرك وشعرك وحجمك وستايل لبسك...حتى ايدك مش هاتعجبه...ماهو مش مقدر ان في اطفال يعنى ممنوع ضوافر طويلة ولا كعب عالي....في اطفال يعنى مفيش وقت للمكياج والحسوكة...ماهو لو كان بيشيل معاكي العيال دي كنتى عرفتي تتزوقي براحتك...لو كان بيستحمل الزن شوية كنتى نزلتي للكوافير زي الاول....الراجل لو استغنى عن شوية من الغيبوبة وصحى مع الاولاد وسابك انتى نمتي زيادة كان هايبقى عندك اعصاب وصبر اكتر...او على الاقل هاتستحملي انه يهملك! لو قدر تعبك واهملك...هاترضى ومش هايبقى في مشكلة...بس الراجل شايف نفسه زوج مش اب! دي المشكلة ومربط الفرس....الست اتحولت من زوجة الى ام...والمفروض الراجل برضه...لا....هوا متمسك انه "راجل" بلا القاب...حتى لقب زوج عنده استعداد يتخلى عنه في مقابل سعادته الشخصية ومتعته هوا وبس!

احب بس اوجه كلمه للراجل ابو من غير القاب ده! ليك يوم! بكرة اللى انت بتهملهم علشان سلبوا منك الانطلاق والحيوية وحولوا مراتك من ست الى ام...هايكبروا...وهايشيلوها في عينيهم...وتقعد انت لوحدك...زي ما بتيجي عليها هايجيلك يوم وتمرض وتقعد في البيت "منبوذ" بما ان محدش متعود على وجودك اصلا...خليك زي ما انت...اوعى تهتم بيها ولا ترحمها...لحد ما تكبر....وتبقى زي الدمل اللى محدش طايقه!!

لوحدك عشت شبابك....لوحدك هاتعيش اخر ايامك!!

ريم اسامة

https://www.facebook.com/groups/329904227056535/

روح الفرحة

المقالة المرة دي فيها جانب شخصي شوية...بس متهيالي كتير منكم هاتلاقي نفسها فيها برضه

الاعياد والمناسبات طعمها بيختلف اوي بمرور الوقت.

لما كنا اطفال والله انا ماكنتش بنام من فرط السعادة والفرحة والاثارة ان تانى يوم عيد! كل شوية اصحى بس من غير ما بابا وماما يحسوا واتفرج على اللبس الجديد والجزمة الجديدة والشراب والشنطة والتوكة...وبكون لابسة بيجامة جديدة وشعري مغسول...وببقى في قمة السعادة ان بابا سمح لنا نحط مانيكير في العيد!! يالهوي!! هاحط مانيكير!! ايه البوظان ده :D

وييجي ميعاد الصلاة وننزل مع بنات عمتي ومع بابا وماما وبيكون معانا كيس فيه حلويات...بنبوني او شيكولاته او بسكوت ونوزع على الاطفال بعد الصلاة...واول ما ندخل الجامع الكبار يقولوا لنا "محدش يقعد...صلوا ركعتين تحية المسجد الاول" ومحدش فينا يسلق الصلاة...الكبار شايفينا بقى :) كل واحدة تطول في الركعتين علشان مايبقاش شكلها وحش. وبعد كده فاصل من الرغي المستمر والضحك المكتوم مع نظرات لوم وتوعًد من الامهات "هششش عيب كده - اسمعوا الخطبة!! حرام!" - في فترة الخطبة بنوزع الحلويات ولما تخلص نزور بيوت قرايبنا ونفضل لابسين الايشاربات برضه (ال يعنى مخدناش بالنا) وده طمعا في التعليقات الايجابية من الكبار وان "شكلك جميل في الحجاب"

وبعد كده نروح البيت ونلبس الجديد وماما تحط لنا مانيكير وتسرح لنا شعرنا  ويبدا فاصل من رن جرس الباب...الجيران يطلعوا لنا اطباق كحك وبسكوت وانا اختى ننزل باطباق للجيران وكل ست تحاول تسبق التانية وغالبا كل الاطباق بتكون صناعة منزلية. او نحضر الدبح تحت العمارة ونهري السلالم طالعين نازلين ننزل اكياس ونطلع اطباق بلاستيك ونقسم اكياس ونحشر في الفريزر.

في بعض الاعياد بابا كان بيخبي العيدية جوا كتاب في مكتبته الكبيرة جدا...ويدينا لغز في ورقة نحاول نحله لحد ما نوصل للكتاب اللى جوا الفلوس...كان للعيدية دي بالذات طعم تانى خالص :)

بعد كل ده ننزل ونبدا يوم طويل وجميل من لم العيديات والبمب من البلكونات واكل كل الممنوعات...ونفخ بلالين وحاجات كتير انا اكيد نسياها بس مستحيل انسى الشعور الغامر بالفرحة و"الزئططة"....لما بنروح طبعا بننام في العربية من طول اليوم واللعب والجري والرغي وتاني يوم نصحى نعد الفلوس اللى معانا في الشنط الصغيرة الجديدة...ولو اختى اكتر منى مثلا بابا بيديني الفرق وببقى زعلانة وافكر "مين اللى نسي يديني عيدية"...وعلى النادي نكمل اليوم مع مزيد من الحلوى والاكل بره والعصائر ولازم طبعا بابا يجيب لنا كورة جديدة نلعب بيها ولازم لعبة العيد تيجي برضه...وبابا كان بيقنعنا اننا لازم نحوش العيدية او الجزء الاكبر منها...وكنا فعلا بنعمل كده...وبالليل سهرة قدام فيلم العيد مع اطباق اللب والسودانى.

لما دخلنا مرحلة الثانوي والجامعة  كان البيت بيرن تليفونه كتير اوي ومع كل اتصال اسمع بابا يقول "اهلااااااااااا فلان...وانت طيب...دايما سبَاق بالخير" وماما تقول "اهلا يا حبيبتي وانتى طيبة وازي فلان وعلان وترتان"...وكان برضه في سباق مين يتصل الاول بمين :) قبل حقبة الsms!! في المرحلة دي العيد كان مباراه في اللبس الشيك (على ذوقنا مش ذوق امهاتنا) ومين لابسة اعلى كعب واحلى شعر واحلى مكياج واقوى برفان واظبط مانيكير واطول ضوافر وطبعا بنستنى برضه العيدية :) العيد بيكون لسه فرحة وتانى يوم برضه بنروح النادي ولكن تالت يوم بنخرج مع اصحابنا لوحدنا ونصرف العيدية كلها...مبقناش نحوش حاجة لان بقى لينا طلبات وتطلعات وبيعجبنا الفاترينات!

ولما كبرنا....خلاص...مفيش فرحة في قلبنا...العيد مجرد اجازة من الشغل...فرحتنا بقت في فرحة عيالنا...اللبس الجديد مش بيجي زي الاول...ولو جبناه بيكون من منطلق "عادة"...ساعات بنفكر في عيدية العيال علشان نفك زنقة الشهر ودخلة العيد...وبنجيب لهم برضه لعب وبمب علشان نحسسهم ببعض فرحتنا احنا زمان...بقينا نبص للفرحة من بعيد ومش قادرين نخليها تدخل قلوبنا....فرحانين باللمة مع العيلة اللى بنشوفهم في المناسبات بس برضه مش زي الاول...او ننبسط بأن ابو العيال في البيت اخيرا معانا مش في الشغل كالعادة...الجو العام مبقاش زي زمان....كنا بنتفرج على فيلم العيد ونستناه نتفرج كلنا...دلوقتي في تريليون فيلم وبنفضل نقلب في القنوات لحد ما ننام من الملل...زمان كان باب البيت مفتوح واحنا بنلعب على السلم مع الجيران وبنات عمتنا وضحكنا وصوت الجري مالي الدنيا بروح العيد...دلوقتي الباب مقفول محدش بيفكر يرن الجرس (غير لو البواب عايز كيس الزبالة!!) حاليا العيد احيانا بيكون سفر...او خروج...بس طعم كل دول باهت اوي عن زمان.

الى ابى وامى...شكرا لانجاحكم في زرع السعادة جوانا....شكرا لفهم طفولتنا ومجارتنا فيها...مكنتش ايامها متخيلة المجهود اللى بتعملوه علشان احنا ننبسط...انتوا برضه كنتوا كبار زينا دلوقتي واكيد مكنتوش حاسين بالعيد زينا حاليا وفرحتكوا كانت في فرحتنا...بس عمرنا ما حسينا بده...على طول حاسين ان في العيد كلنا فرحانين زي بعض بالظبط!! اكتشفت دلوقتي ان لو سعادتنا في لعب الكورة كنتوا بتلعبوا معانا واحنا متخيلين انكوا برضه بتحبوا اللعبة دي زينا...لو بنحب نحدف بمب كنتوا بتحدفوا معانا...وماما كانت بتسيب لنا جزء من العجين نعمله اشكال على مزاجنا وتخبزه وتاكله معانا وتأكد لنا ان طعمه احلى من باقي الصواني كلها!! لو انبساطنا في اغنية كنتوا بتغنوا معانا...ذكرياتنا في الفترة دي اقوى من اي ذكريات تانية بالرغم من مرور قرب تلاتين سنة عليها!! عمرنا ما حسينا او فهمنا يعنى ايه اول الشهر او معنى ان العيد يكون في اخر الشهر او اوله!! وما علاقة اول الشهر باللعب والحلويات واللبس الجديد! انا شخصيا مفهمتش موضوع اول الشهر غير لما اشتغلت! شكرا لحجب الهموم والتفكير الطويل عن مخنا الصغير! 

يا ريت نكون زيكم في فهم اطفالنا ...ويا ريت اولادنا يكونوا زينا ويستمتعوا بطفولة جميلة كلها فرحة وسعادة ورضا!

ربنا يسعدكوا زي ما اسعدتونا ...ربنا يديكم الصحة والسعادة ان شاء الله

ريم اسامة

https://www.facebook.com/groups/329904227056535/

موسم النكد

موسم الاعياد بالنسبة للست في معظم الاحيان وجع دماغ وتعب اعصاب

مبدئيا التنضيف...مش عارفة مين اللى افتى ان الشقة تتنضف كلها من اولها لاخرها بكل محتوياتها وده بيتمثل في الاتي:

الشبابيك (تنفيض الشيش وغسيله - تلميع الزجاج - تنضيف السلك من الاتربة) 

ننزل الستاير وتتغسل واحيانا بتتكوى (وده العذاب شخصيا) ونركب البتوع المعدن دول تانى وتتعلق (خدي بقى عندك شعبطة للصبح)

غسيل السجاجيد!! وكمان غسيل البوتجاز من بره ومن جوا والتلاجة من بره ومن جوا والغسيل كله لازم يكون نضيف ومتطبق مكانه. وغير النجف اللى تتشعلقي تنضفيه وتلمعيه وتغيري اللمبات المحروقة! وماننساش الزفت النيش اللى يتفضى احشائه ويتغسل الديشيليون كوباية وكاس ولمعي الارفف والمرايات وهاترجعي كل حاجة مكانها يا شبشب تانى!

وطبعا من غير ما اقول تشيلي العفش وتنضفي تحتيه وتغيري الملايات وتحمي القرود عيالك علشان العيد فرحة بقى ونضافة!! وده ملوش علاقة انك هاتطبخي برضه وتحضري التلات وجبات!!

ده التنضيف بس (وانا كده اختصرت علشان الملل من القراءة)

نيجي للاحباط المعنوي!! عيد عند العيال يعنى بمب وصواريخ وفسح...عند الست بتتمنى تخرج وتشم شوية هواء غير هواء البيت! بالنسبة للراجل هو الزيارات العائلية...والنوم!!!

وبما ان الراجل في اغلب العائلات هو اللى بيفسح اهل بيته فالاجازة بتتقضى قدام التليفزيون وعندك البلكونة شمي هوا فيها براحتك!!

وده سبب ان الست مش بتجيب هدوم للعيد خلاص...هاتجيبهم ليه؟ علشان تروح تزور مامتها وحماتها؟ هيا لو راحت بالجلبية مش هاتفرق كتير من السواريه!! ما الاتنين امتداد لبيتها! وفي الغالب الست بتجيب جلبية او بيجامة جديدة...اكثر واقعية!

والعيال بيلبسوا جديد علشان عادة! 

تيجي الست تطلب من جوزها يخرجها فتسمع "حد بيخرج في العيد؟؟؟ الصيع بس هما اللى في الشوارع؟ وانا مرضاش اخرجك مع الحوش دول" - لا حمش :) ودمك حامي!

تقوله ندخل سينما وماما معندهاش مانع تقعد بالعيال لحد ما نرجع "سينما في العيد؟؟ ايه القرف ده؟؟ وبعدين افلام العيد معروف انها اوحش افلام ومنزلينها علشان الايرادات! انا كمان مش بحب الزحمة" 

تقوله نروح النادي "انتى متخيلة انى هاعرف اركن العربية؟؟ وبعدين هانقعد في حضن الناس؟؟ الدنيا زحمة جدا مش هاينفع! شوفي لنا مكان تانى"

تقوله القناطر - تاخد بصة ملهاش لازمة!

تقوله جنينة الحيوانات - تسمع حاجات مش هاينفع تتكتب هنا!

تقوله نتغدى بره - يقولها نجيب الاكل في البيت ولما تشتكي انها زهقت من الشقة وانها بقت بمثابة جلدها التانى وتصمم على الاكل في المطعم فتسمع اغنية زحمة يا دنيا زحمة وانه مرهف الاحساس ومش بيحب الدوشة والناس الكتير وان الاكل في الاعياد بيكون اي كلام!

تقولي له نعزم حد عندنا طيب - نشوف ناس! يقولك انا في اجازة مش عايز التزام!!

تطلبي منه يصحى معاكي بدري مع العيال علشان يقعد معاكي ومعاهم وبدل ما انتى شايلة الزن لوحدك...."انا في اجازة!! مش كفاية طول السنة بشتغل زي بغل السرجة؟ هوا حرام استريح؟ هوا انتى بتجنني لما بتلاقيني مرتاح ليه؟؟" 

البلد كلها زحمة لكن القهوة لا! البلد كلها دوشة لكن القهوة هدوء! الدنيا كلها مش لاقية مكان تركن ولكن في القهوة حاجزين لعربيته مكان مخصوص!!!

في الاخر خااااااالص هايجيب لك بيتزا وازازة حاجة ساقعة وكيس لب تعيشي بيهم حياتك وتفرجي بيهم عن نفسك!

وفي اخر العيد بتفضلي تسئلي نفسك انتى نضفتي لمين وتعبتي نفسك ليه...وعلى وعد انك مش هاتمنى نفسك بحاجة تانى علشان مايجلكيش الاحباط ده مرة تانية!!

كل سنة وانتى محبوسة ومحبطة ومتنكد عليكي ومنضفة لنفسك وشفايفك ملتهبة من ملح اللب!!

ريم اسامة 

https://www.facebook.com/groups/329904227056535/

فن الفزلكة

"مين بقى اللى فهمك كده؟"

جملة مستفزة من شخص مستفز بنقابله كلنا في حياتنا وهو "المتفزلك المدرك ببواطن الامور!!" ايوة ...مكتوبة صح :)

تلاقي واحد او واحدة على يقين انها صح على طول وعارفة كل حاجة عن كل شئ في جميع المجالات في الحياة!!!

لو المتفزلك واحدة ست تلاقيها بتفهم في السياسة (ودي حاليا شغلانة اللى معندوش شغل)

تفهم في الموضة 

في الاتيكيت

المكياج (ودي بقى محاضرة كلها نصايح تقولك عيوب بشرتك ووشك ايه وتداريها ازاي - في الاخر هاتحسي انك غطا بلاعة محتاج ترميم)
في الديكور

واحسن طباخة في الدنيا وتعمل من الفسيخ شربات مانجة!

ومقتنعة انها اقتصادية وست بيت مفيش في نضافتها!

في المحلات وانهي محل بيبيع ارخص ولازم كل ما تفرجيها على حاجة تقولك "يا عبيطة في المكان الفلاني بربع التمن!!" 

وصفة للكعوب المشققة والشعر المقصف وحبوب الشباب والضوافر الضعيفة والرموش الخفيفة!!

ذوقها راقي مفيش احسن من كده - ومش بعيد تكون بتعرف تخيط (او بتحاول على الاقل وتحجج ان معندهاش وقت تنفذ حاجة كويسة فعلا)

تعرف جميع الاشغال الابرة واليدوية

الطرق الناجحة للتخلص من الحشرات في البيت 

الست المتفزلكة صعب تشتري حاجة جاهزة لانها على يقين انها تقدر تعمل اي حاجة ومش مقتنعة بالمثل اللى بيقول "ادي العيش لخبازة" - هيا مقتنعة ان بدل الخباز بيعرف يعمل عيش يبقى هيا كمان تقدر!! مش مقتنعة ان لكل واحد موهبة - لا - هيا كومبو مواهب!!!

ومش هاننسى "طريقة الكيكة الناجحة" !!

لو المتفزلك راجل اول حاجة بيكون غير مقتنع ان للست دور في الحياة بره بيتها ومطبخها!

مقتنع انه احسن واحد بيسوق عربيات 

احسن واحد يشتري جوافة!

مستحيل يتضحك عليه 

يشكك في رأي اي حد مخالف لرأيه ودايما بيكرر جملة"مين الحمار اللى قالك كده؟" 

المتفزلك بيفهم في ميكانيكا السيارات (وهو اصلا خريج زراعة! يعنى ملوش فيها)

مستحيل يعترف بالخطأ او عدم المعرفة 

لو حد قاله على حاجة جديدة يعمل نفسه عارفها الاول ومن زمان كمان

للاسف النموذج ده موجودة كتير اوي....يتميزوا بالكبر والتعالى على الاخرين ... بيحبوا نفسهم اوي...بيكدبوا ويصدقوا الكدبة!

لو عملتي لجوزك المتفزلك حلة محشي عظيمة الطعم ... رائعة... هايقولك وهوا مغمض نص عين مكوناتها!! "انتى حاطة كرفس وبقدونس ونعناع اخضر و....و...صلصة!!" يا سيييدي على التذوق!!!

لو قشرتي له برتقالة يديكي محاضرة في طرق تقشير البرتقال! "انا ممكن اقشرها من غير سكينة على فكرة! بالمعلقة!" ويتكبس اوي لو مسئلتيهوش ازاي! بس هوا هايتبرع ويقولك الطريقة المفتكسة! (مع انها طريقة قديمة ومفيهاش اي فن يعنى ولا صياعة! بس هوا شايف كده) 

نفس الموضوع ده ينطبق على ازاي تفتحي بالبيسي على حرف الترابيزة او في كالون الباب...طريقة ربط الجزمة في تلات خطواب بس مش اربعة...الطريقة السليمة لربط السبت علشان لما يدلدل من البلكونة يشيل ومايتقطعش...طريقة نفخ البلالين بسهولة!! 

حاولي كده تقولي قدام حد منهم ان ابنك شاطر في اي حاجة (انشالله حتى في اللعب في مناخيره) هاتلاقي المتفزلكين بسرررررعة قبل ما حد ينطق يتفاخر بعياله/اولاد اخته/ابن الجيران/ حد من الاحفاد ولازم يظهر كمية الذكاء الفطري والطعامة واللذاذة واللطف بتاعهم وقد ايييه هما فعلا مختلفين ومخهم نضيف!!!

او انك عملتي صينية رقاق جميلة...اوووووعى الفزلوك جاي! "بتعمليها ازاي؟" فانتى بهبلك تقولي الطريقة وفي النص قبل ما تخلصي (وبرهان انك مش هاتكملي كلامك) "لا بقى معلش!! مفيش حد بيعمل رقاق زي رقاقي!!" واستمتعي بذوبان ودانك من الرغي والفشخرة في نفسهم وطريقة الرقاق بالسمنة واللبن والفنكوش! 

مستحيل حد منهم يعترف او يقر ان اي شخص متميز في اي شئ...او موهوب...او متفرد في مجال ما.....ابدا!!!!

ربنا يعافينا من تسلط مخنا علينا!!!

ريم اسامة 

https://www.facebook.com/groups/329904227056535/

الكراكيب اسلوب حياة

الكراكيب!!!

مفيش بيت مصري مفيهوش كراكيب او على الاقل اشياء تحت بند "يمكن تنفع"

البرطمانات تأتى في المقدمة دائما

برطمانات المربى (المربعة والمدورة) - العسل الاسود والابيض - الصلصة - المايونيز - اكل الرضع - الشيكولاته اللى بتتفرد - النيسكافيه
ثانيا الازايز (الزجاجات بس باللغة العامية)
ازايز الشربات والعصير المصنوعة من الزجاج! ودول بلا تفكير يتغسلوا ويبقوا للمياه في التلاجة!
وفي ناس كتير اوي بتحتفظ بزجاجات الحاجة الساقعة (اللتر) او المياه المعدنية البلاستيك "اهو يمكن تنفع"!
والمج اللى يتكسر ايده برضه مايترميش - يتحط في الحمام  وفيه فرش الاسنان!! او في المطبخ ويتحول الى معيار ثابت للارز والسكر والدقيق...او مسحوق الغسيل!
الحلة المكسور ايدها لاي سبب - تشيل الايد التانية وتبقى صينية غويطة للفرن! 
ليفة المواعين القديمة بتتشال على جنب برضه علشان تدعك بيها البوتجاز !
هدوم العيال القديمة اللى صغرت عليهم في اكياس سودا
الهدوم اللى هيا شخصيا وجوزها مش بيفضلوا لبسها - في اكياس سودا برضه او في شنط سفر
لو فردة شبشب اتقطعت بتحتفظ بالفردة السليمة - حد سئل ليه؟ ايوة...هانقول مثلا اليمين سليمة ...افرض اليمين من شبشب تانى اتقطعت؟؟؟ يبقى تحط اليمين السليمة من الاولانى مع الشمال السليمة من التانى ويصبح عندنا "شبشب جدييييد!!" - ياللا...هما هايروحوا من ربنا فين الستات دول!!!
وتتقطع ايد الست ولا انها ترمي جرنال قديم!! "بينفع!!!" .... تلمع بيه الشبابيك او تحطه وترص فوقيه مناديل مطبخ لزوم التحمير!  او تواجهك بالسؤال اللى من الاخر "ولو زيت اتدلق...هاينضف ازاي؟!!" - الست الشاطرة عارفة ان الزيت لو اتدلق بنحط ورق جرايد علشان يشربه وبعدين نرميه ونحط تانى يشرب الباقي ونرميه وبعد كده ننضف بمياة سخنة وصابون!
اي تيشيرت - بنطلون - فانلة او حتى "اللامؤاخذة" بقى قديم والاستيك باظ وماينفعش للاستخدام يتحول فورا الى "حتة للمطبخ" والفوط القديمة اللى اتنسل اطرافها تتحول الى "فوطة للمطبخ"! مع ان يا اخى بيتباع فوط وحتت للمطبخ نضيفة في المحلات ورخيصة! لكن "ولازمته ايه التبذير؟" (حووووش التفكير الاقتصادي!)
اكياس السوبر ماركت تتحوش كلها في كيس كبير علشان هاتنفع
ازايز سائل المواعين كتير جدا بيشيلوه تحت الحوض علشان لو حصل وجابت العبوة العائلية تفضيها في الصغيرين (واحدة كفاية ليه تشيلي خمسة؟)
الشنط اللى ايدها اتقطعت - بتتشال برضه (خسارة كانت غالية والله اوي) - وبرضه لا بتصلحها ولا بترميها!
نفس الموضوع على الجزم اللى بوزها اتفتح! بتتشال على جنب علشان مريحة!! (محدش يشتم بس الله يخليكوا)
ولو بونبونيرة اتكسر الغطا بتاعها وشكلها باظ من غيره- بتشيلها برضه يمكن تنفع تنقع فيها رجليها ولا حاجة!!! 
لو اهل البيت بيشتروا قارورات مياه معدنية - الست هاتحوش فيهم مياه عادية يمكن المياه تقطع (مع ان المياه مقطعتش من سنتين ونص فاتوا) بس اهو يمكن تقتطع كمان تلات سنين!!
الكارتون المقوى اللى بيتلزق عليه النتيجة! الست بتحتفظ بيه  بعد ما السنة تخلص علشان لما يكون عندها عزومة ترصه في الارض وتحط عليه الحلل علشان مش هاتلاقي مكان فاضي في المطبخ كله غير الارض.
بطاريات لعب العيال وبطاريات الريموت واي بطاريات تانية تخلص - مش بتترمي  - الاول تتعضعض فتشتغل كمان تلات ايام ولا حاجة...وبعد كده تتشال للمنبه او ساعة الحائظ! ولما تخلص وتملَح تترمي!
التوك القديمة مش بتترمي برضه - يتجاب لها استيك وتبقى جديدة! (بيتحوشوا كلهم في كيس غبي في التسريحة وعمرها ما صلحت ولا توكة منهم - بس يمكن تنفع يوما ما!!)
الشرابات اللى استيكها بقى ممهمط او اتخرمت ...تتشال في كيس مع بعض - يمكن تنفع تتلبس في البيت ولا حاجة!
والرجالة مش بيرموا ولا مسمار!! "اكيد هاينفع طبعا!"
الرجالة برضه بيحتفظوا ببنطلوناتهم الجينز القديمة (جاري البحث عن السبب)!
ريموت مكسور - رباط جزمة - علبة السنون (بتاعة القلم الرصاص)
 جميع الكارينهات لجميع افراد الاسرة في جميع النوادي لجميع السنوات (مسيري اعمل حملة تطهير على درج كوميدينو جوزي قريب)
بما ان الكراكيب كتيرة والاماكن محدودة فالست الشاطرة هي اللى بتحتفظ بكراكيبها في اماكن "على جنب" زي تحت السرير - فوق الدولاب - تحت التسريحة - تحت البوفيه - تحت اي حاجة برجلين والسلام! وغالبا صنَاع الموبيليا كلهم رجالة وزهقوا من كركبة الستات فعملوا دلوقتي كل الدواليب عالية قرب السقف  و باقي الاثاث على الارض على طول مفيش تحتيه فراغ تستغله الست لتشويه المظهر الجمالي للبيت!
وطبعا مش هاننسى الكنز...وهو: البلكونة!!!!
طبيعي البلكونه دي ملجأ كراكيب البيت كله....سلم مكسور...كرسي مكسور...الحلة الكبيرة اوى دي اللى بتتسلق فيها راس العجل!! (محدش بيسلق راس عجل بس محدش يعرف الظروف برضه)...مروحة بايظة...سرير العيال لما كانوا لسه مولودين...زرع ميت...شيكارة رمل او شيكارة اسمنت (من سبع سنين لما كسروا الحمام)....سيراميك من بتاع الحمام والمطبخ....بوتاجاز تلاته عين (احتمال حد غلبان يحتاجه)....خراطيم كهربا....اسلاك محدش يعرف دي بتاعه ايه...علب دهانات...لعب قديمة بتاعة العيال وملهاش مكان في الشقة...ترابيزة...قطع خشب (عندي صندوق خشب كامل نفسي ارميه ومكسلة بقالي سنة ونص!!!)....طبق غسيل مشروخ...الخ الخ الخ
تعالوا نغير اسلوب الحياة ده
ادي الهدوم اللى مش عجباكي اوي دي لناس غلبانة او اي جامع 
وكذلك هدوم العيال اللى صغرت
والبوتجاز 
والكراسي المكسرة والترابيزة اللى ملهاش لازمة - اتبرعي بكل دول
ارمي الحاجات البلاستيك اللى هاتشقق من الشمس والازايز الزيادة 
والبرطمانات شوفي لو حد محتاجها في العيلة يتشال فيها مخلل او توابل او خلافه - او اديهم لبتوع الروبابيكيا او الزبالة لاعادة الدوير
ارمي ارمي ارمي - كل حاجة ملهاش لازمة ارميها او شحتيها او اتبرعي بيها
البلكونة اصلا معمولة علشان نقعد فيها في الهواء - مش علشان محدش يشوف الكراكيب مستخبية فين!!!
اسلوب الحياة لازم يتغير
الكراكيب مكانها بره الشقة خالص!!!
عقبالي انا كمان لما اقتنع بالكلام ده :)))

ريم اسامة
https://www.facebook.com/groups/329904227056535/

البيوت الهشة

كام بيت قائم فقط علشان الاطفال؟

وكام بيت قائم بسبب الخوف من المجتمع او الفشل او الاهل؟

وكام بيت قائم علشان خاطر كلمة "مطلقة" ؟
كام واحدة ملهاش مكان او شخص تلجأ له وقت الانفصال فبتفضَل عذاب تعرفه عن جحيم ماتعرفوش؟

وكام اسرة هشة تعرفوها؟ وياترى انتوا منهم .... ولا لا؟؟

ايه سبب ان واحدة تعيش تعيسة وغير مطمئنة؟ وليه تعيش مكتئبة وناكرة لذاتها؟ ولمين تشتكي وتحس براحة او بفرق حقيقي في حياتها؟

كتير اوي عايشين علشان اولادهم ماينفصلوش عن بيتهم اللى اتولدوا فيه وعلشان استقرارهم النفسي وبرضه علشان الام عارفة دوامة القضايا والمحاكم والمحاميين...لان مفيش رجالة عندها رحمة في موضوع الانفصال لما الست تكون هي الرافضة للحياة معه (مش العكس)! الراجل بينتقم اول ما الست تقرر انها مش عايزاه...بيعتبر ده رد لكرامته (انه يمرمطها في المحاكم ويطير من عينها النوم)...الراجل مش بيطلق بسهولة ومقتنع بجملة سمعها في فيلم قديم "خليها زي البيت الوقف - لا طايلة سما ولا ارض"
 والست مش بلجأ للطلاق بسهولة ليقينها ان معظم الرجالة بترفض الصرف على الاولاد بعد الانفصال - مش بيفرَق بين معاملته لهم ومعاملته لامهم! بيعتبر ان الاطفال دول بتوعها هيا لوحدها وانهم العقبة في حياتها والعبئ الاساسي - فيقرفها اكتر واكتر ومايصرفش عليهم ويخليها تعيش المأساه للاخر وتاخد كاس المرار لاخر بؤ! او لو حس ان مش فارق معاها اطفالها يكونوا معاه ولا معاها بيخليهم معاها ولو حس انها متعلقة بيهم جدا ياخدهم منها!! مفيش مبدأ غير "اقرفها وطلع عينها"
ولو زعلت وسابت البيت وراحت في اي حتة ورجعت بيت جوزها علشان بس تاخد شوية حاجات تلاقي كالون الشقة اتغير - ولو متغيرش تلاقي الاوض مقفولة بالمفتاح - او الدواليب مقفولة والمفاتيح معاه ولما تتصل تسئل حاجتها فين - تسمع "ملكيش حاجة عندي" - وبالتالي حاجة اولادها والدهب وخلافه تنساه خالص. هو عارف انها مش هاتقدر تجيب تانى ولكن اهو يسود عيشتها وخلاص بكل الطرق والوسائل.
ومش بعيد يتهمها اتهامات شنيعة ومشينة وينشر عنها الشائعات بين العيلة والاصدقاء...الراجل بيتفنن في ايذاء مراته معنويا وماديا ونفسيا وبيستمتع بكده!
وبرضه من الحركات الدنيئة انه يخرج اولاده من المدارس الخاصة ويدخلهم اي قرف والسلام! مش بيفرق معاه ساعتها اولاده يتنقلوا من مستوى معين لمستوى اقل بكتير!! اللى بيفرق معاه ساعتها انها "ضربة معلم" وفي مقتل! 
مش هانكر ان في ستات ولاد لذينة وفعلا سواد قلبهم غلب سواد الفحم...بس في مجتمعنا الراجل اقدر على بهدله مراته! والقانون مش في صف الست برضه الى الان.
والمحاميين فاتحين بيوتهم من خراب البيوت التانية...محامي الست يطول في القضية ويقنعتها ترفع عليه كذا قضية علشان تزهقه ومحامي الراجل يتفنن في ايذاء الست وبتتحول ساحات القضاء الى سباق في عدد القضايا! الست ترفع قضية طلاق ودي بتاخد  وقت كتير كتير كتير وفي الاخر لما يغلب عليها اليأس تخليها قضية خلع بس للاسف مش بتطول منه مليم احمر! وترفع عليه قضية نفقة وتبديد العفش وسرقة دهبها (مش دايما بيكون الاتهام ده حقيقي بس المحامي اقنعتها بكده).
جراب قضايا الراجل اوسع واعمق!! قضية طاعة...سرقة...ضم الاطفال لسوء سلوك الام...وحاجات كتير اوي تانية
المحاميين بيستعينوا بشهود زور....والراجل يجيب اصحابه يشهدوا معاه...وقرايبه...ومديره في الشغل...والبواب....كله مقتنع بقصة الزوج انها طلبت الطلاق علشان "شايفة لها شوفة"...فهما بقى رجالة دمها حامي ومايعجبهمش المشي العوج! وتستاهل ضرب الجزمة انها فكرت في راجل غير جوزها!! 
وكل القصة دي من تأليف المحامي ومن اخراج الزوج!!
فستات كتير بتستحمل الاهانة والضرب والبخل والخيانة علشان تتجنب جحيم الانفصال!!
بس يا ترى ده صح؟
الصح انها تستحمل علشان عيالها يعيشوا مع اتنين بيكرهوا بعض؟ صح ان الاطفال يسمعوا ابوهم بيشتم امهم - وامهم بتسب في ابوهم وعيلته لاي حد في التليفون؟ صح انهم يشوفوا دموع امهم بدل ابتسامتها؟
او انها تفضل مقتنعة انها غير قادرة على تحمل المسئولية لوحدها؟ استسلامها لفكرة الضياع لو مفيش في حياتها راجل يصرف؟ او ان كلمة "مطلقة" بقت عار لدرجة تخليها تبيع شبابها وحياتها؟ او تهديد اهلها ان ملهاش مكان عندهم لو فكرت في الطلاق "مفيش في عيلتنا طلاق!! انتى هاتضحكي الناس علينا على اخر الزمن؟؟؟ ما ياما بيحصل في البيوت!!"؟ 
مفيش ست المفروض تقبل خيانة او بخل او ضرب واهانة!
يا تغيري المعاملة الوحشة - يا تسيبيه يعيش مع عيوبه الشخصية يمكن يحبوا بعض!!!

ريم اسامة
https://www.facebook.com/groups/329904227056535/

حرقة الدم

حرقة الدم ليها اشكال والوان وفنون - وماشاء الله على طول يوجد "فنان" في حياة كل شخص.

معظم الستات بيتحرق دمها من حركات عيالها "الزبالة" - الزبالة هنا ممكن تعود على الحركات او على العيال...كل واحدة تختار اللى يناسبها.

تلاقي العيل من دول ماسك ازازة مياة ويشرب بؤ والباقي يسقى بيه السجادة!! "لييييييييه كده حرام عليك!" وتلاقي الاجابة الاكثر استفزازا في الكون "انا عايز كده" !!! الطم؟؟ اشق هدومى؟؟ اهرب؟؟

طبيعي تدخلي المطبخ تلاقي كل دواليب المطبخ في الارض ومفيش مانع ازازة زيت لطيفة كده متليطة على السيراميك - او زي ما حصل مع صاحبتي لما بنتها دلقت عبوة سائل مواعين من الحجم العائلي على نفسها والارض! عاااادي جدا!

ولا تلاقي طفل من دول شد فوطة ولا اي هدوم من الدولاب وسبحان الله لازم ودايما تكون اخر قطعة هدوم او اخر فوطة في الرصة كلها....فينهار الدولاب قدام عينك وتفضلي كده تهري في اعصابك وتصرخي زي اللى لسعها عقرب!

وطبيعي جدا انهم يلعبوا بالفيشة او في عين بعض او يهزروا بالشلوت!!  او يجروا بعشوائية وفي ايدهم قلم او شوكة! او مثلا تجيبي لحد منهم لعبة جديدة وانتى فرحانة بنفسك بقى وفرحانة بأمومتك الطاغية وتلاقيه مش عاجبه وبيعيط برضه ويحدفها وانه كان عايز حاجة مختلفة!!! تشتمى نفسك في سرك وانك جزمة انك عبرتيه...ياريتك جبتي بالفلوس كارت شحن كان اكرم لك!  تفضلي تقولي الحاجة مليون الف مرة وهما عاملين نفسهم ولاد ناس تانية مش ولادك! بس وكفاية وهس ووطي صوتك وبطل تنطيط وماتجريش في الشقة والكورة / سكوتر / عجلة بره البيت...كل ده ولا اكن حد بيتكلم اصلا! ولما تزعقي يصرخوا في وشك "بتزعقي ليييييييييييييييه"!! ولما تعملي فيها ام وتعاقبيهم يصرخوا ويعيطوا بكل ما اؤتوا من قوة وتسمعي من كل اللى حواليكي "حرام عليكي دول اطفال"!! عيال حقيرة!
كل ام عيالها عملوا مصايب فمش هاحصر المصايب حاليا - لينا قعدة على رواقة 
وطبيعي يكون لك جارة سخيفة يا بترمي الزبالة قريب اوي من شقتك او يسيب القطة بتاعتا الغبية اللى مش بتخاف من الناس على السلم (ايوة حصلت) او شخصيتها قوية وجوزها ممنوع يشرب سجاير في الشقة فبيشربها على السلم ويرمي اعقاب السجاير في الطرقة او جارتك اللى بتسيب غسيلها ينقط على غسيلك او الاكثر شيوعا وهي تنفيض السجاد من البلكونات وبالتالي التراب كله بقى في حضنك انت او بتشغل التليفزيون من صباحية ربنا لحد بالليل بصوت عالي جدا علشان تسمعه وهيا بتتجول في الشقة من جميع الاوض!! طيب والناس اللى جالها رعشة خفيفة في الايد من فرط العصبية؟؟
لا مش مهم طبعا! 
واللى كل ما تشوفك تقولك "ابنك  خاسس اوي ليه هوا مش بياكل؟" - لا حول ولا قوة الا بالله - يا رب الهمنى الصبرررر
واللي فعلا بيضايق ويمكن الرجالة بتعانى منها اكتر من الستات وهي المدير الغبي اداريا! اول سمات المدير الفاشل هي تمسكه الشديد جدااااااااااا بالحضور والانصراف (مش بالشغل نفسه) !! وكرهه الاعمى للاجازات والتأخير عن المواعيد الرسمية وايمانه العميق ان الاجازات المرضية هي "حجة البليد مسح التختة"! ولو اي غلطة حصلت في الشغل يبهدل الدنيا ويقوم عواصف وبراكين...مع ان الغلط وارد جدا وطبيعي انه يحصل احنا مش ماكينات...بس ازاي بقى؟ لازم يطلع ان ده اهمال واستهتار وعدم اعتناء وعدم اكتراث وعدم حاجات كتير تانية - وبين الغلطة والغلطة بيحصل مليون حاجة صح بس في الغلطة التانية لازم يفكره بالغلطة الاولى ويبدأ يرص له التاريخ الاسود للفشل!!! المدير ده نفسه كان بيتعامل كده وكان طفل جبان على فكرة!!
وبرضه الام اللى مفوضة نفسها خبير مالي ومحلل نفسي لابنها ومراته وبيته!! انتى مالك؟؟ ابنك كبر وبقى شحط وعنده بيت وعيال بتدخلي ليه وتصممى تعرفي كل حاجة ليه؟ وليه كل ما يجيب حاجة فيها شئ من الرفاهية تتهميه بالبذير والاستخفاف بالزمن و"القرش الابيض ينفع في اليوم الاسود" وملوش لازمة "البعزقة" !! ما انتى ياما جوزك جاب لك وفسحك جت على ابنك والدنيا اسودت خلاص؟؟ اخرجي منها يا رتيبة خليها تعمر ملكيش دعوة بالعيال!!!
واكتر حاجة بتضايق الناس كلها وبتحرق دمهم جميعا هي قلة الادب في الشارع - لو حد عايز يعدى الشارع وانت كملت وموقفتش هاتسمع شتيمتك بنفسك! لو زنَقت على حد في المرور هاتتشتم...لو عديت قبل الميكروباص هاتتشتم...لو الباشا الدكتور سائق الميكروباص جه وراك وضرب كلاكسه الكريم وانت ماوسعتش هاتتشتم بالكلاكس!! اللى بيضايق ان كثير من الاحيان الواحد بيخاف يرد لحسن يتضرب! 

مش هاتكلم عن الازواج والزوجات علشان الاتنين بيفرسوا في بعض عن عمد!
على العموم في خبر حلو: دوا الضغط مش غالي!

ريم اسامة
https://www.facebook.com/groups/329904227056535/