بحب اتابع الناس المهتمين بالتنظيم والترتيب المنزلي...التنضيف والحاجات المشابهة
لاحظت ان في موضوع كده عندهم ظريف اوي...فحبيت اشاركه معاكم
في حاجة اسمها power hour...هيا ساعة...اظبطى المنبه على ساعة واحدة فقط...في خلال الساعة دى تعملي كل الاعمال الصغيرة...وفى الوقت ده سيبي الموبايل وبلاش تشتيت بمكالمات مثلا.
خلال الساعة دي تدخلي الاوضة مرة واحدة...يعنى مثلا نبدا بأوضة الاولاد...رتبي السراير...شيلي الهدوم اللى بره او لعب مش في مكانها..رتبي المخدات والشكل العام للاوضة وتخرجى وخلاص كده عليها! ماتدخليش الاوضة دي تانى...تدخلي اوضتك وضبي السرير وبرضه الهدوم اللى بره الدولاب...لو في كوبايات او زجاجات خديها بره...افتحي الشباك علشان تهوى الاوضة واخرجى منها. اوضة الليفينج هاتاخد مجهود اكبر اعتقد...لو في اطباق او كوبايات او لعب او كتب وكراسات...اي حاجة مش في مكانها حطيها مكانها وبس كده.
في المطبخ جمعى الاطباق والكوبايات (المواعين يعنى) في الحوض بلاش تفضل مفروشة في المطبخ كله...لو في مواعين نضيفة رصيها مكانها ولو في برطمانات بره رجعيها برضه مكانها...روقي المطبخ بسرعة وامسحى الرخامة هاتحسي بفرق واضح وسريع....وفي اخر عشر دقايق امشي بالمكنسة في الشقة كلها سريعا مش لازم بدقة متناهية يعنى.
لو كل يوم خدنا ساعة واحدة فقط ننجز فيها المهام الصغيرة المملة اللى بتعطلنا...اعتقد هانحس بفرق كبير...براحة نفسية ان المكان مرتب ومنظم الى حد ما وفى نفس الوقت الشغل مش هايتراكم علينا خصوصوا ان الشغل البيت مش بيخلص ابداااااا
فكرة ال power hour مش ضروري تكون بس في تنظيم البيت والتنضيف....ولكن في المذاكرة كمان....لو خصصت ساعة مفيش فيها ولا بريك ولا تليفون ولا مكالمات خالص....ساعة انجز فيها درس غلس شوية ومحتاج تركيز وتدريب...هانرتاح والله
نفس الفكرة برضة لو في مناسبة او عيد ومحتاج تنجز عدد كبير من المكالمات....هي ساعة...للمكالمات فقط..من غير اي اعمال في النص علشان لما تخلص تحس انك فعلا انجزت حاجة لاخرها
يا رب تكون الفكرة عجبتكم واحب اعرف رأيكم
ريم اسامة
لينك المدونة على الفيسبوك
https://www.facebook.com/groups/329904227056535
