قوقعة جوا دماغه...يدخل فيها ويفصل عن
الحياة...من غير الجزء ده الانسان ينهار
القوقعة دي بيكون لها اشكال مختلفة والوان
كتير....هي طريقة ان الواحد ينفصل عن حياته...عن مشاكله خصوصا...عن التوتر والارق
والزعل والاحباط....عن عدم الشعور بالامان والصدمات...بيقاوم بيها زعله وحزنه.
الستات اكثر استخداما لقوقعتهم
الخاصة...تلاقي الست فصلت مرة واحدة كده وشغلت اغنية مثلا...في حاجة في ذاكرتها
بتنشط بالاغنية دي....ذكريات حلوة بتحطها في موود معين بتخليها تتخطى زعل او ضيق
بتمر بيه
الرجالة غالبا بتفصل انها تخرج من المكان
وتقعد على القهوة مثلا او تقابل حد من اصحابهم ..يتكلموا في اي موضوع تانى غير
اللى مضايقهم...الموضوع بيتحط عندهم على رف جانبي كده...هوا بيفكر فيه بس مش بكامل
قوة عقله...هوا شايفه على الرف بس سايبه الى حين...شوية ويرجع يتعامل معاه
احنا بندفن مؤقتا!! الدفاس يشتغل على
طول...التجاهل المؤقت هو اسلوبنا في معظم الاحيان...لو خلاص المشكلة مش عايزة
تتحل...ارمي بقى خالص ياكش تولع الدنيا كلها...صحتى بالدنيا!! نغطس جوا
القوقعة...ايا كانت بقى القوقعة دي...موسقى...فيلم...مسرحية...اغنية ورقص...كتاب
يخفى ملامح المشاكل...فيديوهات على اليوتيوب...ممكن واحدة تطلع غلبها في
التنضيف...تمسك اوضة تدعكها وتطلع منها المستخبى...تلوين....شغل يدوى (كانافا او
كروشية او تريكو)...رسم...جلسة باديكير ومانيكير منزلية....مشوار قوي للكوافير قص
وعمايل شعر وصبغات وباديكير وحركات...ممكن تمشية طويلة شوية فرجة على المحلات بلا
هدف....تركيب بازل كبيرة...او تدخل المطبخ تعمل طبخه معقدة ولها خطوات كتير متداخله...او
تنزل الدولاب كله وتعيد ترتيبه...او قعدة طويلة على النت تدور على اي حاجة او
تتنقل من موقع لاخر....او لفة طويلة بالعربية في الشوارع بلا اي هدف مع موسيقى
حلوة...من غير تفكير ومن غير خطط.
ناس كتير لما تلاقي ست حاطة مكياج كامل وفي
قمة الاناقة والاهتمام من غير مناسبة....بيتقال عليها رايقة ومزاجها عالي....الست
اللى زيها بس هي اللى فاهمة انها في قاع اليأس والاحباط...وكل ده تهوين للنفس على
البلا اللى هي شايفاه!
انا شخصيا لما بوصل للقاع...بفتح كتاب كبير
ويكون قصته سريعه ومشوقة...او اشغل موسيقى واركب بازل...او اقلب اي دولاب في البيت
واعيد ترتيبه...او باخرج اتمشى في اي حتة ومش ضروري ابدا اشتري حاجة....مجرد فرجه
على الفاترينة.
القوقعة دي مهمة اوي...مهمة انها تلهيك عن
البؤس الواقع عليك...مهمة علشان تقدر تقوم وتكمل...مهمة لانها بتشتت تفكيرك عن
المشكلة وتخليك تبعد عنها...لانك لما تبعد شوية الرؤية هاتوضح اكتر...التفكير
الدائم والمستمر في المشكلة هايخليها تتعقد اكتر وتخليك مجهد ذهنيا وممكن توصل لقرار خاطئ!
لو في مشكلة صعبة....سيبها على الله...سيبها
على جنب....ابسط نفسك لان روحك ليها حق عليك...هون على نفسك محدش هايهون عليك حاجة
دور لك على قوقعة تستخبى جواها لحد ما ذهنك يصفى
ريم اسامة
