my sexy phone

راجع من الشغل...كاسر عينه نص فاتحة كده...وسايب بؤه مفتوح حتة صغير في اهمال...ومش بيرفع رجلع من على الارض وهوا ماشي...بيجرجرها يعنى ...ويرمش ببطئ..."تعباااان مش قادر"....ده وهوا في الشغل قاعد على المكتب في التكييف وراجع في العربية المكيفة برضه...امال اللى بيشتغلوا في الزراعة بالفاس يعملوا ايه؟!

ما علينا

يدخل ياكل وعلى السرير على طول...يطفي النور...يشغل التكييف بعد ما ياخد دش لزوم الاسترخاء...وتسمعي وهوا بيحط نفسه على السرير "ااااةةةة" يا عيني جاية من جوا النخاع الشوكي! 

وانتى عادي جدا قاعدة من الصبح بالعيال لحد ما جالك كهربا زيادة في المخ...الله؟ مش هوا تعبان وانتى في البيت مستريحة؟ يبقى من حقة ينام! وبتسيبيه وانتى سامعة زن التكييف من بره! وتفتكري بعد نص ساعة كده او ساعة الا ربع انك سبتي موبايلك جوا وتروحي تتسحبي تاخديه لحسن يرن ويصحى الراجل التعبان...قوووم ايه؟ تلاقي الباشمهندس واخد الموبايل على صدره ومسترخي تماما و هوا على الفيس بوك (وطبعا عامل نفسه اوفلاين ومش بيعمل لا share ولا comment حقنا للدماء) واول ما تدخلي او هوا يحس ان في حركة يقلب الموبايل على وشه! بس انتى خلاص شفتي الضوء اللى في ايده! "بلاش شغل التلامذة ده انا عارفة انك صاحي"
خلاص بقى اتفقس انه صاحي فايقول "انا اصلي مش عارف انام من كتر التعب" ...يتمطع له شوية ويتدلع شوية ولو سمع زن حد من العيال يجري يدخل الحمام ....ومعاه الموبايل طبعا!!
الرجالة بتقضي ربع عمرها في الشغل...ربع في القهوة ....ربع في الحمام...وثمن مع اهله (لو حسبنا عمره كله يعنى التمن ده متقسم عليكي انتى واهله واهلك وعياله ومراتاتهم لما يكبروا او اجوازهم)...ثمن في السكة بين كل دول!!
لو بصينا على تقسيمة وقت الراجل هاتلاقي ان الرفيق الدائم له هو هدومه والموبايل!! 
مش ممكن الراجل يسيب الموبايل ابدا...ممكن ينسى النضارة ويمشي طشاش...ينسى نضارة الشمس ويستحمل ضوء النهار المبهر ...ممكن ينسى المفاتيح ويروح يخبط محدش يفتح له ...ممكن ينسى يجيب معاه عيش للعيال (عنهم ما طفحوا)...ينسى الجاكيت في الشغل او العربية...ينسى يتصل بامه لما تقوله انها عايزاه ضروري..ينسى اي حاجة...الا انه ينسى تليفونه الشخصي!!!
ونادرا لما تلاقي راجل مش حاطت باسورد على تليفونه طبعا !! ولو مراته مسكته يتكهرب في مكانه زي ما قلت في مقالة سابقة!
الموبايل عليه صور (طبعا) وعليه جيمز زي: ازاي يركن تريلات - ركن العربيات - ركن الاتوبيسات - ركن الطائرات - حرب العفاريت - حرف الحلاليف - لعب ستارتيجي (مع انى مش عارفة ازاي بيلعبوها على شاشة الموبايل )- word search - طرقع تلات كور او اكتر مع بعض - ابليكيشن بتتخن - بتكبر في العمر - مسح الوجه وتقولك انت انهى حيوان!!! - كشف صاحب الارقام المجهولة - فيسبوك طبعا قبل اي حاجة والماسنجر بتاعه وتويتر وفيبر وواتساب واي برامج اتصالات ببلاش هوا بيتكسف يستعملها علشان مايتقلش انه بيجيب تليفونات غالية ومش عايز يدفع الفواتير! - وغير الcalender اللى مسجل عليها كل حاجة ماعدا عيد جوازكوا!! وعليه طبعا الميل بتاعه الشخصي وميل الشغل والخ الخ الخ.
يقعد والموبايل في حضنه - يدخل الحمام بياخده معاه يتسلى - لو بيعمل (بعد الشر) شاي لنفسه ياخده المطبخ -  قبل ما ينام يفتحه يشوف الفيسبوك وتويتر حتى لو لسه قافل الكمبيوتر  - اول ما يصحى  ممكن مايصبحش على الفلبينية اللى متجوزها بس يفتح الموبايل! - ده لو عايز حاجة من مراته وهيا في اوضة تانية بيرن لها وهوا في نفس البيت!!! الراجل بيستخدم التكنولوجيا بشكل فيه الكثير من الهوس!
مراته لو قاعدة في نفس الشقة ولقى انها اونلاين - بيكلمها اونلاين مش بيكلمها ببؤه المبجل!! لحسن لسانه يتبرى ولا حاجة ويخلص!! او صوته الكروان يتجرح! 
الراجل بيضك لشاشة موبايله اكتر ما بيضك في وش مراته - اقسم بالله العظيم اللى بقوله ده حقيقي ولاحظوها بنفسكوا!!
بيعلق على اي حاجة هيا حاطاها اونلاين - مش وجها لوجه! لو عجبه حاجة هيا حاطاها يدوس لايك مش بيقولها كلام مسموع!! الراجل بؤه بقى في ايده - لا تخرج قبل ان تقول سبحان الله!!!
لو الست لبست حاجة شفتشي وهوا راشق مع خمسة اصحابه في حاجة وبيعلقوا مع فارق ربع ثانية بين التعليق والتانى - والمصحف ما هايبص لك اصلا !! هوا عايز يلحق يرد بحاجة أنئح من بتاعة صاحبه وفي نفس الوقت لازم يتابع كل التعليقات علشان يبقى على بيَنة وعلم من الحوار كامل متكامل!! ده بينسى يرمش علشان يفضل متابع!!!!! التليفون بقى اكثر اغرائا من الولية!!! 
لو هيا في المطبخ ...هوا على تليفونه - لو هيا جنبه هوا برضه على تليفونه - لو العيال نامت وجت لزق جنبه برررررضه مش هاسيب تليفونه!!! 
من سمات الراجل ابو تليفون متخيط في ايده ده ...انه ماشاء الله عليه...يتحسد....بقى اطرش!!! 
- "تشرب حاجة؟" - ده انتى!
- ........................ 
- "اجيب لك عصير طيب؟" 
- .................
- "عم السايبر..عايز حاجة؟"
وهنا يرفع عينه من على اكتر حاجة مغرية في حياته ويبص لها بقرف "انتى بتتريقي؟؟" - تسقيف حاد!! نطق - والله العظيم نطق ...ماشاء الله الحمد لله ماصنجَش!! الحمد لله !!
وهنا هو انسب وقت ترسمي الابتسامة الهبلة وتشوفي لك ركن تفتحي فيه موبايلك انتى كمان بما ان الحياة كلها بقت افتراضي في افتراضي!!


https://www.facebook.com/groups/329904227056535/

ريم اسامة

المرتب بالشوال

"جايبين كاجو وفسدق وبندق بس السنة دي...امال فين البرفانات والساعات والهدوم بتاعة قبل كده؟ ما طبعا...ما طول ما الهانم دي وراه مش هايلاقي يجيبلنا حتى كيس مناديل من بره معاه"

نموذج متكرر من اهل الراجل اللى مسافر بره مع مراته! اول ما سافر لما كان بطوله كان بيجيب لامه واخواته وخالاته وعماته وعم اسماعيل البواب هدايا وهدوم وقماش وبرفانات وساعات وكرافاتات وشرابات وجلود باشكالها ومش بعيد يجيب علب كومبوت (ايام ما كان موجود بس في بورسعيد) واجهزة كهربائية....وعم الفييس اتجوز بقى ...وخلف..وبرضه الخليج مبقاش ميغة زي الاول...والايجارات بره بقت غالية جدا....وغير كده في تعليم الاطفال...وفي تأمين مستقبلهم انه يجيب لهم مثلا شقة في مصر باسم الاولاد...او يجيب عربية. 

اللى ليهم حد مسافر بره متخيلين انه بيقبض اخر الشهر في شوال! يجيب الشوال كده و"افتح المحبس يا عم" لحد ما الشوال يتملي فلوس وده يبقى مرتبه الشهري. الناس هنا متخيلة ان اللى في الخليج دول عايشين احلى عيشة واغنى ناس واكتر ناس مرفهة....طيب لو هما مبسوطين اوي كده مرجعوش ليه بلدهم؟ يا ترى هما مبسوطين في الغربة؟ 

في ناس هاتقول طبعا مبسوطين وهما لو مش مبسوطين هايقعدوا ليه؟ وفي اللى هايقول ماهم مش عايزين يسيبوا الفتة ويجيوا هنا للعيشة الضنك! 

الناس اللى في الخليج حارمة نفسها من اهلها...من الاصدقاء...من دفئ الوطن ... من الاخوات...من القعدة الحلوة واللمة في رمضان...من طعم العيد المميز في بلدنا...من سهولة التعامل مع الناس هنا....من المناسبات زي الافراح والحفلات والتجمعات العائلية والعزومات علشان لقمة العيش ...علشان لو كان في خير في بلدهم مكانوش دوروا على الرزق برة...لو كان في مستقبل لاولادهم في بلدهم كانوا تمسكوا بالاستقرار ومسافروش غير مثلا للفسحة كل فترة.

اللى مسافر برة يا طفشان من قرف البلد...او من البطالة ...او من قلة المرتبات اللى بقت سمة لجميع الوظائف...او من المستقبل المظلم اللى مش باينله نور! اللى بيسافر برة بيتعب فعلا علشان يثبت نفسه في وسط ناس مستقرين بالفعل! بيحاول ويحارب علشان يفضل في وظيفته ويترقى فيها ويعلى....والناس في مصر بتحسب الناس عايشة ازاي بانها تشوف الدينار ولا الدرهم وصل كام مصري دلوقتي ويحسبوا فلوس الراجل بالمصري تطلع كام الف في الشهر ويقولوا "دي عيشة عنب"! 

لا عنب ولا خيار...هيا اه عيشة افضل من مصر اكيد طبعا...ولكنها مش الثراء الفاحش يعنى...وبعدين اسعار مصر غير اسعار برة...احتياجاته هنا غير هناك...مستوى المعيشة هنا غير هناك....اللى ربى عليه عياله هناك مش هايقدر يوفره هنا فهوا متمسك بهناك علشان الاطفال ... مسحول ومربوط في الساقية زيه زي غيره في اي بلد.

واللى مسافر بره - اهله جوا بقى مش عايزين يشتروا هدوم ولا جلود ولا حتى غيارات مصري...عايزين كله متسورد...ما ليهم رجل بره مصر يجيبوا من جوا ليه؟؟ واللى عيان يبعت للبني ادم ده يقوله عايز دوا كذا علشان المادة الفعالة برة غير هنا...وعايز كمان فيتامينات علشان اللى عندنا مضروب...والستات عايزين كريمات علشان اللى في مصر مش بتضيع القشف كويس...ولا بتحسن تقصيف الشعر!! والرجالة بيكون همهم الاكبر من اللى جاي بره "السجاير"...قاروصتين تلاته كده ويبقوا فل الفل...الستات بقى مستنيين:

الاقمشة

التوابل الغريبة (اللى بتسوس وتترمي بس لازم يجيب)

البرفانات

الكريمات

شنط حريمي

جزم 

كوتشيهات اصلي

شرابات مش بتتخرم بسهولة!!

مكياج

مكسرات طبعا 

هدوم للعيال !

ومش هايرفضوا موبايلات اخر اصدار!

ناقص يجيبلهم نجف من برة!! كان اول ما طلع البلد الاجنبي بيجيب من باب ان دول اهله برضه اللى استحملوه سنين البطالة ومحدش بخل عليه بحاجة وهوا برضه عارف هما نفسهم في ايه! ولكن الظروف بتتغير بعد ما يتجوز ويخلف! ومش بعيد ابدا لو حد من اخواته جه يتجوز الاهل يعتمدوا عليه في الجهاز! "ما احنا ساعدناك في جوازك انت المفروض تساعد اخوك بقى"

لما اللى مسافر بره ده يجي مصر...اهله بيكون عايزينه كل يوم ....مفيش مشاكل طبعا من حقهم يشبعوا من ابنهم ولكنهم عايزين مراته وعياله برضه كل يوم! طيب ما مراته دي ليها اهل برضه نفسهم يشبعوا منها ...ولو ده مصر وراح يزور اهل مراته بيقلقوا ويفضلوا يقولوا ويفكروا "يا ترى الهانم جايبة لهم ايه؟ طبعا شئ وشويات وكله من خير الواد الاهبل اللى مسلم لها دقنه!"

ولو حصل وجمع اهل الزوج والزوجه في اي مناسبة او عزومة تلاقي الاهلين بيبصوا لبعض ويخمنوا يا ترى الهدوم او الجزمة او الشنطة دي جاية لهم هدية ولا لا!! ويقارنوا الهدايا !!!

وطبيعي جدا يسئلوه مثلا "ها؟ عملت الخميرة ولا لسه هاترجع تكمل؟" او "حقك  تشتري حتة ارض تسقعها "...ولو قالهم ان معهوش فلوس للارض يتغامزوا عليه مش مصدقين ان فعلا معهوش فلوس! ومتخيلين ان مراته بتحوش من وراه...مفيش راجل مسافر بره غير لما الناس تكون على يقين ان مراته بتحوش من وراه او انها بتبعت فلوس لاهلها من وراه برضه!!

ولما يجي بتاع البلد الخليجي ده اخواته بيكونوا متوقعين انهم كل ما يخرجوا سوا يعزمهم! ماهو مقرش (بكسر الميم) ومعاه ويعنى ينوبهم من الحب جانب - ياما استلف من مصروفهم! ولا هاينسى الواطي ده؟!
في بقى صنف بيجند نفسه للمغترب...يفضى نفسه 24ساعة يودي مشاوير ويجيب وينزل شوبنج معاهم ويوصلهم كل حتة فيكي يا مصر...علشان ينوبه من الحب جانب في اخر الزيارة او يخليها عادة فالمغترب يعمل حسابه على هدية special كده ولا حاجة!
الشكوى من الفقر والضنك والغلاء والحاجة بتزيد اوي مع "موظفي الخليج"...متخيلين ان الراجل ده مأجر فانوس علاء الدين وهايسلفهم الفانوس يومين!
في شوية جمل مقترنة دائما بالمغتربين بالدول العربية:
- خدنا تحت جناك يا عم - هاديك الCV وشوفلي حاجة هناك بقى خلينا نقب على وش الدنيا!!
- تلاقيك مش مستحمل الجو هنا - ما هناك ناقص يكيفوا الشوارع (الحرارة بتوصل 50!! طبيعي جدا انهم يكيفوا كل المكاتب والبيوت والاماكن العامة...الناس هاتنصهر كده!)
- ما تمد ايدك ...ولا قرفان؟ (على اي اكل شعبي)
- فاكر لما كنت بتزرع فجل في جنينة العمارة وتبيعه على ناصية الشارع اللى ورانا؟ (طرائف ونوادر لزوم "اعرف مقامك يا معفن" )
- الا هو الدولار وصل كام؟ (بداية حديث العملات ده غير مطمئن)
- اصلهم هنا بيدفعونا تمن الحاجة مرتين بعد الضرايب واللذى منه (يعنى متفرحش اوي باللى معاك انت جايبه رخيص )
- روح سلم على اهل مراتك بكره - الدنيا مش هاتطير...ولا مستعجل اوي تديهم الهدايا!!
- هوا احنا مش واحشينك ولا ايه؟ (مع كل زيارة للحمام!!)
- لو نزل مع اصحابه شوية ورجع لاهله تانى (اااااة طبعا من لقى احبابه نسى اصحابه - يا بختهم يا سيدي بالاهتمام)
- لازم تنزل رمضان اللى جاي بقى (معتقدين تماما ان المغترب ده بيلاقي تذكرة السفر في الشيبسي! او ان تمنها لا يمثل له شئ جنب البلاوي الزرقا اللى محوشها)

ناس جعانة!


https://www.facebook.com/groups/329904227056535/
ريم اسامة

body language

"حبيبي هوا انت رحت عند حسن صاحبك امبارح؟؟" انتى بتسئلي جوزي - يحك انفه ويقولك "لا بقالي كتير ماشفتوش"

كداااااااااااااااااب

الجسم بيتكلم لوحده...في اشارات وحركات بتتكلم لوحدها عن الشخص! لغة الجسد فاضحة جدا واحيانا بيكون من الصعب التحكم فيها....ولكن ليس من السهل قرائتها ايضا.

قرائة الشخص بدون ان يتكلم هو من الذكاء...وفراسة...ولكن يوجد حاليا كورسات ودورات تدريبية وكتب وعلم مستقل عن قرائة لغة الجسد! ويوجد ايضا كورسات متخصصة في التحكم في الحركات والايمائات التى نصدرها بلا وعي...وفي برضه "اشارات كاذبة" وبتكون عادة عن الشخص انه يعمل حركة معينة!! 

يوجد ايضا اخطاء لغة الجسد!! ندي اشارات مش صح!!!

المهم نيجي للموضوع الاصلي وهو "قرائة لغة الجسد" او زي ماهو متعارف عليها باسم body language...هاتكلم عن الاشارات الاكثر انتشارا والسهلة الملاحظة ...عن الموضوع هنا بشكل عام لان الاستفاضة فيه هاتكون صعبة وطويلة للغاية.

لما تسئلي حد كبير حاجة ويجاوب وهوا بيمسك ارنبة مناخيره او بيحك بايده...ده كداب - غالبا ما بيكون كداب!! لو الطفل اتكلم وهوا حاطت ايديه الاتنين على بؤه...كداب برضه. وفي بحث سبب موضوع حكة الانف عند الكذب، اكتشفوا انه عند كذب الانسان تفرز مادة في الجسم تتسبب فى تضخم انسجة الانف..وزيادة ضغط الدم تجعل الانف يتضخم وتصيب نهاية الاعصاب بالتهيج الطفيف ولذلك الاحتاك باليد يؤدي للتخلص من هذا الشعور الغير مريح!

اشارات اليد تعتبر الاشهر والاسهل قرائة ومنها مثلا: لما حد يتكلم واصابعه الخمس تلامس اطراف اصابع اليد الاخر فتلك الحركة تدل على الثقة العالية في الموقف وفي الرأي الذى يناقشه....او تشابك جميع الاصابع عدا السبابة...يتلامس السبابة بمثلها في اليد الاخرى....يدل ذلك على الثقة في الموقف ايضا وفي الرأي. عندنا تهتز ثقتنا او يدخل الشك عقلنا تتشابك الايدي لاسفل في شكل "توسل"!

عند المصافحة...لو صافحنا الطرف الاخر باليد كلها وباطن اليد يلامس باطن يد الشخص الذى امامنا فذلك يدل على الود والدفء...والعكس تماما عند المصافحة باطراف الاصابع!

عند الشعور بالرضا والسعادة فان المسافة بين اصابعنا توسع وحين نشعر بالتوتر نضم اصابعنا وفي بعض الاحيان يختفي الابهام تحت اصابع اليد...وتكون ايضا اليد متصلبة! وعند التوتر الشديد من الممكن ملاحظة فرك اليدين ببعض!

عند الاشارة لشخص ما بالسبابة فهي تعتبر "امر" ...مثلا لو جائك زائر في مكتبك واشرت اليه بالسبابة للجلوس على كرسي امامك ...فتلك تعتبر اهانة او امر او انك تعتبر نفسك افضل منه! من الافضل الاشارة بالكف المفتوح كله.

اليد خلف الضهر تعنى الثقة بالنفس وانفتاحه على الاخرين. بينما اليد في الجيوب تنم على عدم الرغبة في الحديث او عدم الثقة في الطرف الاخر.

لو حد قرب منك وانت خدت خطوة للخلف...غالبا بيكون معناه رفض التقرب من هذا الشخص...ان لم تتحرك فيدل على عدم رفضك له...لو قرب منك هذا الشخص واخذت انت ايضا خطوة اتجاه فيدل ذلك على الاعجاب والموافقة في المزيد من التودد.

الاشخاص الذين ينظرون الى الجانب دائما هم عصبيون وعديمو الثقة في انفسهم....او كاذبون.

الاشخاص الذين ينظرون دائما للارض هم اشخاص خجولون او جبناء....او منزعجون من شئ ما.

يوجد ايضا علامات تسمى mirroring - اي تطابق الحركات....يعنى لو اتحركت يمين يتحركون هم ايضا...لو ضممت يدك الى صدرك ...يفعلون ذلك ايضا...وتعتبر ذلك التطباق اشارة انهم يوديون التقرب منك ....وكل ذلك يتم بلا اي وعي ! 

يوجد ايضا حركة كثيرة الحدوث وهي المسح على الرأس او ازاحة الشعر للخلف...من الممكن ان يكون تأنق....او انه يوافقك الرأي..ولكن ان صاحب ذلك ارتفاع الحاجب فيعنى اختلافه معك!

ان كان الشخص يستعمل النظارات...وان استمر في دفعها للخلف باسمترار مع بعض التكشير فيعنى ذلك الاختلاف في الرأي.

النقر المستمر بالقدم او الاهتزاز يمينا ويسارا او استمرار حركة القدم...فيعنى ذلك: عدم الصبر او الانفعال او التوتر او الخوف او العصبية.

من الاشارات الشهيرة لمس اليد للوجه...عند فرد الاصابع على الفم مع الابهام على الخد...او ضم الاصابع مع ابقاء الابهام في هذا المكان....فذلك غالبا يدل على ان الشخص صاحب تلك الاشارة يحاول الاقتناع بكلام غير مقنع بالمرة!

هرش الرقبة في شكل خربشة باصبع واحد...يوجد شئ مثير للاهتمام في هذه النقطة حيث انه غالبا يكون عدد الهرش "خمس مرات" باصبع السبابة...وهذا علامة للشك او غير التأكد.

جذب الاذن لاسفل....عدم الرغبة في الاستماع الى اي كلام يقال.

مش عارفة الموضوع ده ممكن يكون مفيد لكم ولا لا...هوا مكتوب بطريقة "المحاضرات" شوية....عامة راقبي الناس حواليكي هاتلاقي الموضوع مسلي جدا :)

https://www.facebook.com/groups/329904227056535/

ريم اسامة

فاهمنى؟

"مين قالك كده؟؟" سؤال رخم من حد سخيف للاستهزاء برأي شخص ما!

اختيار الكلمات وتوقيتها يدل على الشخصية....لما حد يتكلم وسط مجموعة ويقول عن مثلا حاجة حصلت في البلد او عن معلومة عامة غريبة وتلاقي واحد وسط المجموعة طلع زي الدمل يقول بملئ فمه "مين قالك كده؟" ...السؤال ده بينم على الرخامة طبعا (لانه ببساطة هايحرج حد وسط مجموعة)..ثانيا ليه يشكك في كلام اي حد ويضعه كمتهم مطلوب منه الدفاع عن نفسه وعن رأيه؟...لكنه هايبقى سؤال طبيعي جدا لو مكنش في مجموعة!

الكلام بيفضح صاحبه...اختيار الالفاظ بيظهر الشخصية اكتر من الملابس والمكياج والعربية ونوع الموبايل...الbody language واختيار الكلمات اتنين من اهم مفاتيح الشخصيات...يعنى مثلا:

- "ولد عندي في الادارة"...لما تلاقي حد بيقول جملة شبه كده تعرف على طول انه انسان متسلط...وشايف نفسه مركز الكون! ومش بعيد يكون مش لاقي له دور في الادارة دي ولكنه اعلى منصبا من "الولد" اللى بيتكلم عنه! وبعدين المفروض الشخص الطبيعي هايقول "ولد زميلي في الادارة" او "ولد معانا في الادارة"....مش "عندي!!"

زي بالظبط لما حد من اصحابك يسافر برة ويبعت يقولك "عندنا اوكازيون رهيب"....عندنا!! عندكوا فين؟؟ هيا فرنسا بقت بتاعتكوا خلاص؟! اللى يسافر ويقول على اي حاجة خاصة بالبلد انها "عنده" ...في اعتقادي الشخصي هوا انسان طموح ومتطلع... ولكنه بيعشق المنظرة! فشخار يعنى من الاخر! من الطبيعي مثلا انه يقول "في هنا اوكازيون"....او "عندهم هنا اوكازيون"...ولكن جملة "عندي" بتدل على انه ينتمى لمكان ما (ولكن الحقيقة غير ذلك)...هو يتمنى ان ينتمى ...والامنية دي بتنعكس على اختيار الكلمات.

وفي ناس بعد كل كام جملة تسئل "فاهم؟"....ايه فاهم دي؟؟؟؟ طيب ولما حد يسئلني كل شوية "فاهمة" المفروض ارد ولا اهز دماغي ؟ هوا انا طول الحديث هاقول "اه فاهمة؟"...ده لو درس احياء مش هاتسئل كتير كده عن فهمي للموضوع!!! وبعدين اللى بيسئل "فاهم؟" كتير كده مش عارفة ممكن نحلل اختيارهم للسؤال ده بايه!

وتلاقي برضه واحدة صاحبتك وهيا ماشية تقول لواحدة تانية "ظبَطي بقى!"....او "زي ما اتفقنا!"...اللى بتقول الكلام ده ...جمل مش مفهوم مغزاها لباقي الاشخاص...بتكون فعلا مفتقدة الاهتمام او مفتقدة الاصدقاء المقربين! عارفين هيا بتقول ظبطي او زي ما اتفقوا على ايه؟ هاتلاقوا على مثلا انها تحط التوم قبل الكسبرة على طشة الملوخية!! والله العظيم ما بهزر...هاتكون حاجة هايفة لدرجة لا تذكر ولكن هاتدي انطباع ان في سر شخصي بينها  وبين اي واحدة تانية لمجرد اضفاء الغموض والعمق لشخصيتها السطحية!! والله اللى بيقولوا الكلام ده بيكونوا غلابة جدا ومحتاجين اهتمام اكتر من اصحابهم! لو ليكوا حد بيعمل كده حاولوا تقربوا منهم شوية!

وفي اللى على طول تعيب في نفسها! ايوة ده حقيقي! مثلا...تكون بتحب تشرب الشاي وتاخد سكر على طرف المعلقة ...عادي...كل واحد حر....لا هيا عارفة انها بتحب حاجة مش طبيعية شوية وخايفة من الانتقاد ...فتبادر هي به! "انا عارفة انى رخمة وان طرف المعلقة دي حاجة غبية اساسا" وتضحك جامد...هيا مش عايزة تضحك...هيا محرجة وخايفة...خايفة من الانتقاد...خايفة حد يقولها "انتى هايفة" فتبادر بالضحك على نفسها قبل ما حد يعمل منها مسخرة القعدة!!! الناس دي عندها نقص رهيب في ثقتها في ثقتها. وحساسين لدرجة انهم بيتريقوا الاول قبل ما حد يتريق...بيسبقوا! لو ليكوا اصحاب كده اتكلموا معاهم على انفراد وانك ملاحظة انها بتعمل كذا...وانها شخصية جميلة جدا وانها بتغلط في حق نفسها بالاسلوب ده!

وفي الشخصيات النرجسية ...محبين لنفسهم لدرجة مقيئة...شايفين انهم الصح وانهم عباقرة المجتمع وانهم خسارة في البلد وانهم كتير على شريك حياتهم وان اولادهم محظوظين ويابختهم ان ليهم ام/اب زيهم! والنوع ده مش بيسمع بقى خالص!! بيتكلم عن انجازاتهم فقط لا غير! عن ذكائهم الفطري الغير مسبوق وانهم طفرة جينية في الخليقة! دول ملهمش لازمة في الكلام غير كلمة "انا عملت"! انا الوحيد في تاريخ الشركة اللى عمل كذا...انا الوحيدة في الوزارة اللى اقترحت كذا...انا جبت كذا بسعر خرافي مش ممكن حد يجيب زيه!...انا فكرت في حاجة مستحيل تخطر على بال حد...انا انا انا...هم مركز الارض والحياة والكون كله!! لا بيسمعوا ولا بيلاحظوا ولا بيفرق معاهم حاجة...دول عايزين جوز ودان تسمع وراس تتهز بالموافقة وخلاص!

وفي اللى بيخلي اللى قدامه يكرر الكلام! زي مثلا "انا قلت له مش هايحصله طيب...مش هايحصله اييه؟؟" فانت ترد بكل تلقائية "طيب"...وبعدين تكتشف ان دي طبيعة كلامه...يتكلم وبعدين يسئلك هوا قال ايه....بيؤكد على الكلام...انت بتزهق طبعا ومش بترد بقى ما اصلك مش قاعد بتتكلم مع فقي! حاجة مملة اوي...الشخصية دي من الاخر هايفة!! مش هاقول اكتر من كده لانها لا تستحق التعمق ولا الاستفاضة :)

وطبعااااااااا في اللى نص كلامهم انجليزي عمال على بطَال! في كلمات بتطلع من الواحد عادي فعلا في وسط الكلام...زي مثلا كلمة اوبشن او by the way...او ممكن كمان whatever! حاجات بسيطة...ولكن في ناس بيتخلل كلامهم بعض الكلمات العربية!! احنا نتكلم عربي وهما يردوا انجليزي! لا حول ولا قوة الا بالله....وهيا تتكلم الانجليزي بتاعها وارد انا بالعربي...خلاص بقى هيا عرفت انى عارفة انجليزي وانا تأكدت انها متمكنة من اللغة...كفاية! اكيد في ناس مش بتفهم الكلام ده! عيب! دي مش شياكة....دي منظرة فارغة وقلة ذوق في كثير من الاحيان!

وفي ناس بتستخدم الفاظ نابية لتعطي الانطباع انكوا اصحاب وعادي بقى يتكلم براحته...يعنى هوا لازم راحتك في الكلام تبقى سفالة؟؟ ما تخليك محترم!!

https://www.facebook.com/groups/329904227056535/

ريم اسامة 

التربية النفسية

"شيل ايدك من مناخيرك!!" ده انتى لابنك - وجوزك قاعد في اخر الاوضة بيدور على جنيه ضايع في مناخيره المقدسة!

ده مثال هايف من اللى احنا بنربي عليه عيالنا! بنربيهم "نظريا" وليس عمليا!

عمليا يعنى اقوله حاجة واكون انا شخصيا بطبقها....لكن نظريا احنا بنقول حاجة علشان ضميرنا بس ..ولكن اسلوب الحياة زي ما هوا مش بيختلف ولا الست بتحاول تكون مثل اعلى لابنها!

زي مثلا تمنعى ابنك من الشيبسي وتقنعي فيه انه وحش وبيعمل واوا في البطن وانه بيخليه عيان وياخد حقنة ... ويلاقي عندك شيبسي مستخبي في المطبخ! 

او تقولي له "مفيش حاجة اسمها ماباحبش على الاكل" وانتى مانعة البطيخ يدخل البيت علشان بتقرفي

او تغصبي عليه ياكل طبقه كله قبل ما ياخد العصير...وانتى بتبلعي المعلقة ببؤ حاجة ساقعة!

ايه كمية التناقض دي؟ احنا فعلا كده...عيالنا بيسمعوا حاجة ويشوفوا حاجة مختلفة تماما....نقولهم "وطي صوتك" واحنا صوتنا جايب الدلتا! 

نطلب منهم يناموا بدري واحنا لازم نسلم على الشمس الصبح قبل ما ننام! 

عايزين الاولاد مايقولوش "لا" وتقريبا دي الكلمة الوحيدة اللى بنقولها في وشهم!

عايزين منهم لما يطلبوا حاجة يطلبوها بهدوء واحنا "انت يا حيوااااااااااااان فين الموبايل؟؟؟؟"

عايزينهم يكونوا مبدعين وفضوليين لمعرفة المزيد ...بشرط محدش يلعب في اي درج من ادراجنا ولا يلعبوا في تليفوناتنا ولا كمبيوتراتنا
ونفسنا الاطفال يكون عندهم حس فني ولكن ممنوع يلعب بالالوان غير في الورق المقرف الغير مغري اللى بندي للاطفال! 
بنتمنى ان الولد يكون عنده ميول هندسية مثلا بس مانجيبلوش الميكانو الغالي!
يا سلام بقى لو البنت تطلع فنانة...ولكن الصلصال ممنوع يدخل البيت!
مطلوب من الاطفال يحبوا الصلاة وربنا....ولو فوتوا الصلاة نخوفهم من نار جهنم اللى هايتحرقوا فيها احياء!!!!

عايزين الاولاد يكون عندهم تخيل وخيال واسع...ولو الف قصة قدامك محصلتش تضربيه وتقولي له الكداب بيروح النار! يا ست هوا مش قصده يكدب...بس مخه بيشكل له عالم تانى مش موجود وانتى بمنتهى الذكاء بتكبتي دماغه! تعاملي مع الموضوع ده بالذات بشوية حكمة...قولي له يااااه فعلا كل ده حصل؟ طيب ايه اللى حصل بجد بقى؟ 

عايزين العيال تكون شخصيتها قوية لما تكبر وستات كتير عند اتفه غلط يلاقي قلم خماسي الاصابع نازل على خلقته! ماهو هايطلع جبان جدا...شخصية ايه بقى اللى بتتكلمي عنها؟

مش عايزين العيال تقرقض ضوافرها....واحنا قربنا ندخل على الكوع!

عايزين الاطفال ماتشتمش ولكنهم بيسمعوا امهم بتشتم هزار مع اصحابها في التليفون

ولما يسمعوا او يشوفوا حاجة في البيت مايطلعوش يحكوها بره ويلاقي مامته بتحكي لجدته حاجات حصلت في البيت 

ممنوع البيبسي - اشرب سيفن بس....وانتى مش بتشربي غيره!

بطل طلبات...وانتى كل ما تشوفيه "حبيبي هات لي الريموت - حبيبي هات لي الشنطة- حبيبي هات شرابك وتعالى البسهولك! بطلي تطلبي منه كتير كده!! هوا عبد عندك؟ عايزة حاجة قومي هاتيها ولما هوا يعوز حاجة خليه يجيبها لنفسه! هوا ده الاعتماد على النفس ...لو عايزاه يبقى متعاون يبقى مثلا لو انتى بتنشري الغسيل يناولك المشابك او لو انتى بتعملي مثلا كيك خليه يحط الدقيق والسكر...حاجة تعملوها مع بعض...مش انتى قاعدة مريحة وهوا شغال نحلة حواليكي!

"ماتتنحش اوي كده قدام التليفزيون"....وانتى لو عدى من جنبك اسد مش هاتاخدي بالك طول ما انتى فاتحة الفيسبوك وبترغي مع اصحابك
عايزاه يحترمك وهوا عند اي خناقة بينك وبين ابوه بيتصدم من كمية الغباء اللى بيحصل! شتيمة واتهامات وصوت عالي ولما جوزك يمشي بيسمع البرطمة اللى بتقوليها لوحدك...على فكرة مش بتكونى لوحدك!! اتخانقي بعيد عنه بلاش تدمري في مخه الصغير صورة ابوه وامه وبلاش تحسسيه بعدم الامان!

"زهقتونى وقرفت منكم!" وعايزاهم يحسوا انك بتحبيهم!!

"انت اللى كسرت دي؟؟؟؟؟؟؟؟؟" هايقولك لك لا "انت كمان بتكدب؟؟؟؟؟" وهات يا تنفيض في العيل! ما انتى خوفتيه منك! خليه يقول الحق...بلاش تخليه يكدب عليكي  من الخوف  يا اذكى اخواتك!!! 

"انت غبي!" ابسط كلمة ممكن تخلق انسان مشوه! عايزة ابنك متفوق مع انك تصفيه بالغباء! هايحاول ازاي انه ينجح؟ اكيد مش هايعمل اي مجهود اكتر من اللى بيعمله! اصله مهما عمل فهوا برضه "غبي" ومش فالح! يا ريت اللى بتقول لابنها الكلمة دي تبدلها وتقوله "انت شاطر" ولو فعلا مش عارف يفهم خليه يسيب المذاكرة شوية ويلعب اي حاجة وبعدين يرجع يحاول مرة تانية...شجعيه...جامليه...جمَلي صورته قدام نفسه...بلاش تكونى انت اول واحدة تكسر عزيمته ....ده طفل!!!

امهات عايزة تربية نفسية من الاول وجديد!

https://www.facebook.com/groups/329904227056535/
ريم اسامة 

الحرب الباردة

من العلاقات ذات شأن "حرقة الدم" عندنا هي: علاقة السلايف - اي زوجات الاخوات! احب بس انوه ان العلاقة دي مش دايما كده وكتير جدا اصحاب وسرهم مع بعض والاتنين غالبا بيتفقوا مع بعض ضد الحماة :) ولكن جزء لا يستهان به ضراير ويكرهوا بعض عما! ولو ست منهم معندهاش ثقة في نفسها - يا بوووووى على الغم!!

في شوية نقاط بيعملوا المشاكل ومنهم:

- فرق التعليم

- مستوى الجمال

- طبعا المستوى الاجتماعي والخلفية الاجتماعية

- المستوى المادي للزوج! هما اه الازواج اخوات بس كل واحد ورزقه!

- نوع العربية!!

- مستوى الرشاقة! (بجد والله ما بهزر)

- اللغات الاجنبية ومدى طلاقتها

- وظيفة كل منهن طبعا بتفرق! 

- شطارة العيال في المدرسة 

- النفس في الاكل (وده اللى بيحدده الناس مش هما)

- مستوى جمال الاطفال

- خفة الدم او عدمها 

- الكاريزما

- نظافة البيت

- الهوايات الهايفة او الهوايات المفيدة

- تأثيرها على زوجها

- تأثيرها على حماتها (الحماة طبعا مشتركة مش عايزين ننسى)

اي نقصان في اي مما سبق وزيادته عن الطرف الاخر هو اشارة الحرب الباردة! يعنى لو انتى اغنى من سلفتك ده معناه انها تتمنظر عليكي كل ما تقدر او انها تزحلق كلمة ملهاش معنى انها جابت كذا من الحتة الفلانية وده حتى بكذا - رخيص اوي!! لازم تقول كده علشان ماتبقيش احسن منها! ممكن مايكونش في بالك اصلا بس هيا مش هاتستحمل!

لو انتى اعلى منها تعليما - هاتحاول جاهدة تحسسك انها اشطر منك او ان جوزها بيحبها اكتر ما جوزك بيحبك مثلا!

لما يجي عيد ميلادك هاتتحفك بهدية غالية جدا...ولكن هاتديكي حاجة مش هاتستعمليها!! 
لو واحدة فيهم ساكنة مع سلفتها في نفس العمارة (زي الموضة اليومين دول ان الاب بيبنى عمارة يعيش فيها هوا وعياله) فبالتالي هاتبقى الحياة جحيم بقى - ومنافسة مستمرة. لو حد فيهم ساكن فوق التانى والغسيل نقط نقطة واحدة - اللى فوق دي هاتتفضح في العيلة كلها! "هوا لسه في غسيل بينقط اليومين دول؟ ليه بتغسل في الطشط؟؟ امال يعنى عاملة لنا بنت عريان باشا ملط وفي الاخر تنشر الغسيل ينقط على الجيران من غير مراعاة حقوق الجار؟ وعاملة بتصلي وبتعرف ربنا وفي الاخر تؤذي الجيران؟؟ صلاة وصوم وعلى الفاضي! دي من علامات يوم القيامة !!"
لو في نفس العمارة وواحدة فيهم اتخانقت مع جوزها التانية هاتسمع - وتفضحها
لو زعقت في العيال (وده شئ طبيعي جداااا) صوتها هايتسمع وهايقال عليها شلق وغجرية وجاية من حارة 
لو جت متأخر من الشغل هايتقال انها مش مهتمة ببيتها والعيال
لو ولاد واحدة فيهم راحوا عند اولاد عمهم في بيت الست التانية : نكد مزدوج (دوبل من غير تلج! نكد سك!" 
ولو حصل لا قدر الله والعيال اللى في بيت عمهم جاعنين - يا سااااااااااااااااتر!! دي عيال جعانة - دي عيال قليلة الادب - امهم مش مهتمة بيهم - العيال وشها مبقع من قلة الغذا - العيال بتتكلم بقلة ادب ومش متربيين - العيال خطفوا من عيالي اللعب ولا المحرومين!
وبعدين ماهو مستحيل نفصل البيتين! الابهات اخوات ومش في بالهم اللى بيحصل ده اطلاقا! 
في العيد او الافراح والمناسبات تنافس على اغلى لبس واشيك طقم واعلى كعب جزمة مع احلى ميك اب واغلى اكسسوار او دهب او الماظ حتى يتلبس!
نفس الروح هاتطبق على الاطفال...احسن بدلة (عيل عنده اربع سنين) ولا احلى فستان (مفعوصة عشر شهور!) للعيال! 
ولو واحدة فيهم ليها دلال على حماتها هاتقطع في التانية بسكينة تلمة ! 
المشكلة بقى لو واحدة فيهم لبط والتانية بنت ناس! بنت الناس دي بتتقرقش! هايبقى في تلئيح كلام (من غير ما حاجة تتمسك عليها) ومش بعيد لو شافتها بره صدفة تعمل نفسها مش شايفاها . ممكن حتى متخليش عيالها يبقوا اصحاب ولاد عمهم! ممكن لما تعمل اكلة حلوة تودي لحماتها اللى في العمارة ومتفكرش تدي بيت اخو جوزها! 

المشكلة كلها لما العيال تكبر وحد فيهم حب يتجوز بنت عمه..يا ترى الستات هاتفركش الجوازة؟ ولا هايعملوا ايه؟؟

https://www.facebook.com/groups/329904227056535/
ريم اسامة 

ليه؟

تفتحي اللاب توب تلاقي جوزك سايب الاكونت بتاعه مفتوح لسه مقفلوش...شوية فضول عادي يعنى بيحصل - تتفرجي على الnews عنده ووتجري الصفحة كده يمكن تلاقي حاجة لطيفة ولا تضحك ....وفجاة يظهر لك ان حد بيتكلم...Chatting يعنى...وكاتبة لجوزك اللي المفروض ان هوا اللى اونلاين مش جنابك: حبيبي وحشتني!!

(صمت مع ارتفاع ضربات القلب وزغللة مؤقتة)....انتى كده اتصعقتي بالكهربا مش عارفة تتصرفي ولا تقفلي...ما انك تقفلي ده مش اختيار اساسا...حبيبها مين؟ جوزك؟؟؟ عبد الكريم جوزك؟؟؟ عبده؟!!! ... تستني شوية لانك شايفاها typing حاجة...ويظهر لك "اخص عليك قلت لك تطمنى اول ما تروح...انا زعلانة منك"!!!

يروح فين؟ بيتي؟

 وبعدين يجيلها فجأة غيبوبة مؤقتة وتفكر هوا جوزها فين صحيح!! وبعد عشر ثواني كده تفتكر انه بيشخر جوا بعد ما جه من الشغل وطفح! 

تعملي ايه لو ده حصل؟ هاتقفلي الفيسبوك وتعملي عبيطة؟

هاتردي عليها وتقولي لها انك مراته و"انتى مين ؟؟"

هاتصحيه من النوم بطرقعه الشبشب على نافوخه و"اصحى لي هنا يا روح...."

هاتتصلي بامك او اختك او صاحبتك تقولي لهم انا مش عارفة اعمل ايه؟!

هاتتصلي بابوكي يروح لك البيت ويصحى جوزك على احلى فضيحة وطلب للطلاق؟

هاتتطلقي لو فعلا اتاكدتي ان في بينهم حاجة؟

بس قبل كده ده...مين دي؟! عرفها ازاي؟ طيب امتى؟ وليه؟؟؟ ده متجوز ومخلف!!!...واقرع!

سيبنا من ليه ساعات الرجالة بيكون عندهم حالات تشوه نفسي...مش مهم ليه خالص دلوقتي

بس امتى؟! هوا من الشغل للبيت....للقهوة...لبيت امه...للنادي مع العيال! عرفها امتى؟ ومالها بتتكلم كده؟ حبيبها ايه ده جوزي انا !!!!!

المهم الست بتعمل نفسها offline وتجيب القديم كله وتقرا كل الكلام اللى حصل بينهم! ازاي؟ امتى؟ ليه؟ انا اكيد بحلم!! 

تقاوم بشدة انها تصحي جوزها ... لازم يصحى...لازم يشرح لي...لازم يقولي!!!

لا مفر من المواجهة!! والمواجهة السريعة!!

يصحى البيه وتقوله "مين فلانة؟"

.................................................................... الصمت!!

صوتها يعلى...مع سرعة في الكلام....مع اهتزاز في الاطراف...الكثير والكثير من "التشويح" بالايدي...والاسئلة القصيرة زي "ليه؟؟؟ ليييييه؟ ازايييي؟ من امتى؟؟ بتستغفلني؟؟" وهكذا

طبعا هاينكر في الاول...وبعدين كعادة كل الرجالة هايقلب عليكي الترابيزة ويقولك انك بتجسسي عليه...وبعد كده يزعق هوا كمان "انت ازاي تتكلمي بالاسلوب ده؟ ازاي بتزعقي في وشي انتى اتجننتي ولا ايه؟" وبعدين يدخلك في حتة دين "ولا تجسسوا" (لا ياراجل؟) 

هايحاول يهبل اي حاجة ويغلطك...عارفة ماتش المصارعة؟ اللى فيه الاتين بيحاولوا يقلبوا بعض...هوا كده بالظبط!

المهم بعد ما يصرخ وياخدها بالصوت بيكون مخه اشتغل هايكدب يقولها ايه ! فيقولها ان اللى بيكلمها مش هوا ....وانها ظنانة وشكاكة...وان فلانة فعلا عنده على الفيس بوك بس مش هوا اللي بيكلمها...ده وليد!

- وليد مين؟

- وليد صاحبي اللى في المكتب! هوا اللى يعرفها 

- ووليد عامل انتداب عندك يعنى ولا ايه مش فاهمة!!!

-  مراته مزنقة عليه فبيكلما من عندي!

-  بص يا عبده..شايف ده؟

 (بتشاور على جنب عينها) - فبيبص هوا ويقولها "ايه؟؟ ابص على ايه؟"

- على برج الحمام اللى داقاه على راسي!!!! هبلة انا بقى علشان اصدق ان وليد ايده اتشلت ومش عارف يعمل اكونت جديد يكلم منه المحروقة صاحبته!"

..............................................................الصمت!

تصمم الست ان جوزها يكلم وليد صاحبه حالا قدامها دلوقتي ويفتح الspeaker وتكتشف ان وليد معندوش ادنى فكرة عن اي حاجة!!!

جوزها بيخونها وخلاص عرفت واتاكدت! 

بس يا ترى وصل فين مع المحروقة دي؟

كلام بس؟

حب في التليفون؟

بيتقابلوا؟

اتجوزها عرفي؟

اتجوزها رسمي؟

مأجر لها شقة؟

طيب كان ناوي يعمل ايه؟؟

وليه؟

هاتسئل مين؟ ومين هايقولها الحقيقة؟ هوا طبعا هايكدب وفقد اساسا مصداقيته عندها وكل ثقتها فيه انهارت....تسئل اصحابه؟ ولو يعنى اصحابه عارفين انه بيخونها حد هايقولها؟ تسئل الست نفسها؟ اكيد لا!

طيب تطلب الطلاق؟

ماهي لما تطلب الطلاق هاتشيل الخازوق لوحدها! هاتصرف على العيال ازاي والمسئولية هاتبقى لوحدها فعلا بقى تماما خالص! وكمان هاوسع للمحروقة مكان!

تيجي على كرامتها وتبلع اعتذارة؟ هاينفع؟ وياترى كرامتها دي تساوي انها تهدم بيت الاولاد وتهد نموذج الاب للابد؟

هاتقول لاهلها؟ طيب لو قالت ومحصلش طلاق - هاتعيش ازاي والعار بتاع جوزها لازق في عيالها؟

تقوله لو حصل تانى نطلق؟ طيب ده معناه انها سامحته؟ ولا هيا بتيجي على كرامتها وكبريائها علشان الاولاد؟

وخلينا واقعيين ... مش هاتعرف تصرف هيا عليهم برضه...هيا كده هاتقبل بالخيانة مقابل انه بيصرف عليهم؟!!!!

وبعد ما الموضوع يهدى شوية هاتبدا تفكر ليه عمل كده؟ وتبص لنفسها .... فعلا هيا اتغيرت اوي عن زمان... الاعمى فقط اللى ينكر هذه الحقيقة...بس ما كل الستات كده...يرجع عقلك يقولك انتى اللى مهملة ... انتى مش مهتمة بلبسك ولا شعرك ولا قوامك ولا ضوافرك ولا بشرتك ولا بتحطي بارفانات في البيت ولا مكياج ولا بتروحي الكوافير...وكرشك مدلدل واللغد بقى مريح على صدرك! ومبقاش عندك طولة بال تسمعى منه شكوى ولا حكاية وهوا بالتالي بطل يلجأ لك! وعرف واحدة عليكي بحجة "محتاج ست في حياتى...انتى ام للعيال مش ست ليا انا !!"

ترجعي تدافعي عن نفسك قدام نفسك..."ما انا خلفت كذا مرة وعلى طول مسحولة مع العيال وحقيقي مفيش وقت...انا بدخل الحمام لما اكون اوشكت على التسمم!! وبعدين ما انا شايلة البيت كله على راسي ومش بجيب حد يساعدنى وانا شايلة هم العيال لوحدي وكمان بشتغل وبذاكر لهم...اجيب طاقة منين؟ " وهاتسمعيه امتى وانتى اصلا ما بتصدقي العيال تنام علشان تطفي التليفزيون وتسمعى الصمت اللذيذ! 

فعلا صح...الست بتعمل كل ده...وفعلا مفيش طاقة ولا بال ولا نفس حد يعمل حاجة لنفسه ولا يتدلع على الراجل اللى في البيت!!

عارفين...لو الست من الاول خلت جوزها يدخل الدوامة معاها...عمره ما هايبقى عنده الفراغ اللى يخليه يهرش حتى! بمعنى: بلاش كل حاجة للاولاد تعمليها انتى شخصيا...انتى ممكن تشرفي! المجتمع ظالم للست في موضوع الاولاد...بيعتبر ان الاولاد هم عيال الست فقط لا غير والراجل حلو اوي انه سمح لأسمه الكريم انه يتحط بعد اسمهم! 

انما لو الست خلته يودي التدريبات كتير وخلته يذاكر لهم مواد معينة بحجة انها ضعيفة فيها (كدبة طبعا بس مش مهم)...لو صممت انه يدخل ينيمهم ولو مرتين في الاسبوع ...لو خلته هوا اللى يجيب طلبات البيت...لو اخترعت نشاط للعيال كل فترة قصيرة يعملوه مع ابوهم مش هايقدر يفلفص منهم (دول عياله ولو قالهم مرة مش هاينفع المرة اللى بعدها هاينفع غصب عنه) ...لو مسكتيه هوا مصاريف البيت وخلته يدوخ بالمصروف وازاي يكمل الشهر من غير ما يقصر في البيت..لو انتى لقيتي ان فلوس جوزك محيراه وباين عليه النعمة زيادة عن الطبيعي...خدي اجازة بدون مرتب مع الزامه بمصروف شهري "محترم"! انتى مراته!! غصب عنه لازم يديكي! يا اما انتى عارفة كويس اوي ازاي انكدي عليه حياته!

ولا ايه؟


https://www.facebook.com/groups/329904227056535/
ريم اسامة

هيافة ستات!!

في ناس كده مش بنطيقها لمجرد انهم "ذات صفة" معينة!

بمعنى: اخت الزوج - الحماة!

مجرد انها اخت جوزك او حماتك فانت بدون مقدمات شايلة منها! الحقيقة في ناس فعلا لازم يتشال منهم - ولازم اصلا يتشال راسهم من على جسمهم من اللى بيعملوه في مرات الابن! 

تعالوا نتناول الموضوع من جميع الاطراف:

اولا: ام الزوج واخته!

من غير ما مرات الابن تعمل حاجة هيا سايقة جوزها وممشياه على مزاجها وعلى عجين مايلخبطوش!  الست الكبيرة شايفة ان ابنها هفأ وبريالة وحمار انه بيسمع كلام مراته وهيا برضه شايفة انه بيسمع كلامها من غير تفكير! "تقوله شي بيشي على طول" (شي يا حمار يعنى) واخته شايفه ان مرات اخوها دي مسهوكة ومايصة وبتعمل حركات قرعة علشان تخليه تحت طوعها وخلاص و"انا مش بيدخل عليا حركات البنات دي - انا فاهماها كويس !" وطبعا بما انها هيا ومرات اخوها في نفس السن تقريبا بيخليها متخيلة انها فاقساها!! 

الام شايفة ان خير ابنها رايح على الهانم مراته اللى بتحب الفشخرة ومش عامل حساب للزمن ومش بيشيل قرش لبكره! اخته شايفه انه بطل يجيب هدايا عليها القيمة في عيد الام وفي الاعياد الميلاد من ساعة ما خد "اللى ما تتسمى".

الام شايفة ان ابنها وقع على بوزه واتخدع فيهم! اخته شايفهم انه ما صدق حد يقوله كلمة حلوة "ماهو اهبل طول عمره! يا ما نصحته مايتسرعش!"

الام: قلبي على ولدي انفطر وقلب ولدي عليا حجر! - لما تكون عايزاه في مشوار حتى لو هايف مثلا وقالها خليه بكره علشان مشغول شوية ومرتبط بمواعيد!

الاخت: انا مش فاهمة شبكة بعشرين الف جنيه ليه؟؟؟؟ حوش الجمال والحلاوة!! دي امها كانت مخطوبة بحزمة بصل!! انا مش فاهمة انتوا وافقتوا على المبلغ ده ليه! ويقولوا لك "احنا بنشتري راجل!!" - اسمها احنا بنبيع لمغفل!! لازمته ايه الفرح اللى باربعين الف وشبكة بعشرين الف وكمان ندفع مهر خمسين الف!!! فوق ال100 الف جنيه علشان ياخد "دي!!" - امال لو كانت حلوة شوية ولا شيك ولا حتى غنية كانوا عملوا فينا ايه؟؟؟ بيعونا هدومنا!!
والجوز دول مقتنعين ان مرات الابن بتبعد الاولاد عنهم علشان مايتعودوش عليهم ولو حصل مشكلة بتحرمهم من العيال! لو طفل منهم قال انه مش قادر ياكل مثلا عند جدته على طول يفسروا انها اكلتهم قبل ما ينزلوا علشان ماياكلوش عندنا حاجة!!
ولما العيال تقعد مكانها مايعملوش دوشة - مش بيقولوا انهم عيال متربية وان امهم تعبت معاهم - لا ...بيقولوا انها مفهماهم انهم يتعاملوا زي الاغراب بالظبط ... مش واخدين على المكان! ولو خدوا على المكان وبهدلوا الدنيا هايتقال انها مهملة فيهم!!

دي الاخت والام (مش كلهم علشان مظلمش حد بس في ناس كتير اوووي كده) - طبعا في ستات بتاخد مرات ابنها دي ابنة تانية ليها وتعتبر انها فرد جديد من العيلة - مش انها جاية تقسم العيلة لاسر صغيرة!!

المهم!

الزوجة!!!

الزوجة شايفة ان امه عايزاه ليها لحد دلوقتي حتى بعد ما عدى التلاتين!! مقتنعة انه لسه مش مفطوم! شايفة ان امه المفروض تقدر شوية خصوصيتهم ومش اي وقت تتصل ومش اي وقت تقوله تعالى عايزاك!! انه مش من الضروري ان جوزها يزور امه كتير كده في الاسبوع وملوش اي لازمة تليفون كل يوم بتاع اخته ده!!! عندها اقتناع كامل انهم عايزين يبوظوا حياتها وخلاص!! وانهم بيتعمدوا يحرقوا دمها بحركات قرعة! على يقين انهم بيعرفوا كويس اوي ازاي يضايقوها من غير ما يتمسك عليهم حاجة!! وشبه متاكدة انهم بيقصدوا ينكدوا عليها كل مناسبة سعيدة عندها زي مثلا عيد جوازها او عيد ميلاد حد من العيال او في المصيف او في الويك اند (وده بيحصل فعلا - سبحان الله)! بقت تتشائم من اي حاجة حلوة هاتحصل لانها عارفة انهم هاينكدوا عليها حياتها بانهم يفتعلوا مشكلة ويدخلوا جوزها طرف فيها وبكده الموود بتاعه هايبوظ وهيا مش هاتنبسط!

لو اخت جوزها دي مش متجوزة واكبر منها في السن مثلا كمان هايجيلها شعور غير مبرر انها عايزة تفسد بيتها وتطلقها من جوزها علشان هيا معقدة!!!!! بتحس ان اخت جوزها العن من حماتها لانها صغيرة في السن ولسه عندها طاقة وصبر تخطط وتقرف في الناس! مقتنعة ان اخت جوزها سوسة وبتصمم تدلع اخوها باسم سخيف زي "بسبوسة" علشان تضايقها مخصوص!! وان اخت جوزها بتفتعل المشاكل علشان تجذب اهتمام اخوها بعيد عن مراته! 

الزوجة شايفة انهم ضحكوا عليها في الجوازة! الفرح مكنش قد كده والشبكة تكسف والعفش كان ممكن يبقى اشيك بكتير من كده لو كانوا فكوا كيسهم شوية في عشرة خمستاشر الف كمان!! ما اللى دفع 100 مش هايحصله حاجة لو دفع عشرة كمان "بس نقول ايه بقى في النتانة!" 

نيجي لاخر طرف في العلاقة المريضة دي وهي: الزوج!!

الراجل بيحب امه واخته ومراته وماصدق بقى له بيت وعيال ومستقر مع الست اللى اختار انه يقضي باقي حياته معاها! شايف ان مراته مزوداها اوي وشايلة اهله فوق راسها وخلاص من غير سبب! شايف ان مراته سيئة النية اتجاه امه (بس مش متاكد اوي من موضوع اخته علشان هوا عارف انها ساعات بتضايق مراته عن عمد!)...وبرضه مقتنع ان لو كل واحدة ست من دول شالت التانية من نافوخها وركزت في حياتها ..الكل هايرتاح! وشايف ان كل ده في الاخر: هيافة ستات!!! فمش بيعلق على  اي موقف يحصل وعامل عبيط! عامل انه مش واخد باله اخته بتدلعه باسم بطلت تقوله من الابتدائيه...وعامل مش واخد باله ان مراته بتجز على اسنانها كل ما تشوف اهله...وعامل مغيب ان امه بتطلبه في اوقات غريبة وبتطلب حاجات اغرب!

الراجل مش فاضي...عنده مستقبل بيبنيه وشغل مركز فيه....دماغه مش فاضية للهيافة دي!!

https://www.facebook.com/groups/329904227056535/
ريم اسامة 

جتكم القرف

المقال النهاردة غير ساخر وغير مضحك ! 

اطلعني رجل مثقف مهموم بحال البلد على موضوع شيق وشائك وحزين ... وهو موضوع زواج اللاجئات السوريات في مصر!

في احصائية ان زواج السوريات من مصريين يتم بمقابل 500 جنيه!! وبلغ عدد الزيجات حتى الان 12 الف زيجة! وان في سماسرة زواج السوريات حاليا!! وفي السنة اللى فاتت بس في 500 قاصر تم زواجهن برجال اكبر منهن في السن بعقود!

وفي الموضوع مكتوب ان الزواج هو الوسيلة الوحيدة لحماية اللائجات السوريات! واتقال في الموضوع بالنص "لكن بعض الاوساط الاجتماعية ورجال الدين يرون ان زواج اللاجئة البالغة هو خير وسيلة لتوفير الحماية الاجتماعية لهن ووقاية لهن من الوقوع في براثن شبكات الاتجار بالنساء واستغلالهن"

ليه طيب؟؟

امال ده اسمه ايه؟ مش ده برضه شبكة الاتجار بالنساء؟ ويا ترى الزواج ده مكتمل الشروط اصلا؟؟ ولا ده استغلال ؟ 

طيب الراجل الكبير اللى بيتجوز واحدة في سن عياله او يمكن اصغر - يا ترى ده بتيجوز ليه؟ علشان يحميها؟ علشان يراعي ربنا في ست مسلمة لاجئة مش لاقية مكان ولا كل ولا شرب ولا سقف فوقها حتى ! 

الراجل الكبير ده - او حتى الشاب- اللى هايقدم على الزواج من سورية - مراته الاصلية بقى موقفها ايه من الموضوع؟؟

طبعا اول جملة هايقولها انه بيعمل كده لوجه الله تعالى! طيب يا "مؤمن" لو هوا لوجه الله تعالى اكتب عليها وسيبها في حالها متتجوزهاش - صح ولا ايه؟ العقد اللى بينهم يكون بس ان وجودها في حياته حلال مش حرام وهوا بقى يصرف عليها وعلى عيلتها لو عايز! 

بس طبعا لا! البهوات بيتجوزوا السوريات علشان ينبسطوا بواحدة ست جميلة بلا مقابل وشرعي! كله شرعي! 

مرات الراجل ده ماتقدرش تتكلم - وهوا مش هايسئل هيا موافقة ولا لا - الله؟ ده في سبيل الله احنا هانهرج؟ كمان هانقف قدام ربنا ونقوله لا!! هايقولها ده انت كده هاتاخدي ثواب - انت كده بتنقذي واحدة من الضياع - انت ربنا هايجازيكي خير على فكرة!

ما علينا من مراته! نيجي للست المغلوبة على امرها اللى بتتباع ب500جنيه - ارخص من الخروف!! اهو الخروف اخره يندبح ويتاكل بس دي هاتندبح كل يوم وتفضل عايشة برضه!!

لو الست دي طلبت الطلاق - هاتطلق عادي؟ 

لو مد ايده عليها ولا اهانها - هاتعمل ايه؟ تلجأ لمين؟

لما بلدها تتحرر ان شاء الله - هاترجع موطنها تانى؟

لما تخلف اولاد هايعاملهم معاملة اولاده من مراته الاصلية ولا دول يبقوا اولاد "من ملكت ايمانه؟"

لو المجتمع فعلا عايز يساعد اللاجئات هل بالضرورة يكون بالزواج؟؟ طيب ما نزوجهم لبعض! السوريين للسوريات ونعمل فيهم خير! لازم الرجالة هنا ينبسطوا في النص؟ وببلاش؟ وعلى حساب الست المسكينة اللى هاتضحي بنفسها علشان شوية ملاليم؟ طيب الست دي ممكن يكون جوزها وعيالها اتقتلوا متوقع منها تكون لك زوجة وتفرحك ازاي؟ 

فين الضمير انا عايزة افهم؟ الراجل اللى واخد واحدة وعارف كويس اووووى هوا واخدها ليه وعارف هيا وافقت ليه! ايه قمة استغلال الحاجة ده؟

في اراء بتقول ان العائلات المصرية هي السبب - بسبب المهور المبالغ فيها والطلبات الكثيرة الباهظة ...السورية دي مهرها كان اغلى من مهر اي بنت مصرية...وبعدين هوا المطلوب ان العائلة المصرية تتحمل ظروف الشاب السيئة وظروف البلد البشعة؟ الاسرة المصرية تفضل ان بنتهم تفضل جنبهم على انها تتجوز واحد "ضاربه السلك"! 

معظم العائلات في مصر توافق على فرش شقة الزوجية بالنصف وشبكة معقولة ودبلة! انما الرجالة اللى مش معاهم حتى حق الدبلة وزعلانين اوي انهم مش عارفين يتجوزوا ... دي مشكلتهم تحلها الحكومة مش العائلات المصرية...مفيش حد هايرمي بنته مع راجل مفلس يخليها تشتغل غصب عنها علشان يكملوا لاخر الشهر عيش وفول! 

ولو الشاب الحزين اوي على العمر اللى بيتسرسب منه وغاضب من المجتمع - هايرضى ان اخته تتجوز واحد في مثل امكانياته الضعيفة؟

ولما الشاب الحزين يلاقي حل لمشكلته وهي الزواج من شامية جميلة...تبهدلها معاك ليه ياض؟؟؟؟ محدش قال تترهبن بس برضه متمرمطش الناس معاك علشان محتاجين اوضة يعيشوا فيها!!!!

طبعا رجال الدين اللى واقفين يغنوا على المنابر ان الزواج بالسوريات ده جهاد ومش عارفة ايه...هايقولوا ايه غير كده؟ لانهم اول ناس اتجوزوهم فعلا!!! ازاي هايقول ان ده استغلال للحاجة وضد المبادئ العامة المتعارف عليها؟

جتكم القرف!!!

https://www.facebook.com/groups/329904227056535/
ريم اسامة 

مال الكنزي للنزهي!

قبل ما ابدا في الموضوع - يا جماعة انا بكتب انعكاسات المجتمع من حولي - مش بكتب عن حياتي انا الشخصية !! والموضوع اللى جاي فعلا ملوش علاقة بحياتى :) ارجوكوا كفاية رسايل مواساه :)))))

المرة دي الموضوع حساس شويتين - ولقيته عند كتير من الستات وهو : بخل اهل الزوج!!

ممكن مايكونوش بخلاء اصلا ولكن بيمسكوا ايدهم اووووي على ابنهم لما يتجوز. 

يعنى بيكونوا شايفين ان مراته دي "لاهفة" خيره كله ومش هايدوله زيادة يفكوا زنقته علشان مراته هيا السبب. او ممكن يكونوا شايفين ان ابنهم كان ممكن يتجوز واحدة احسن من (وش الفقر) اللى اختارها!

لو الست عندها ولد وبنت والاتنين متجوزين هاتلاقوا ايدها "فرطة" اوي مع بنتها وماتديش حاجة ابدا لابنها! مع انهم اولادها ولكنها مش بتحب ابدا تدي حاجة لمراته - وفي نقط تؤخذ في الاعتبار  :

- مراته خدت ابنها منها (ما علينا)

- مراته شافطة المرتب كله ليها (بتشيل من بالها طبعا ان مراته برضه بتشتغل وبتصرف معاه على البيت)

- ان مراته مشيلاه الهم والغم وعلى طول مخلياه حاسس بالزنقة والفقر (ماهو مرتبه مش كبير وحتى لو كبير ما كل حاجة بتغلى)

-  مش هاتدي ابنها حاجة علشان بكده مراته هاتتعود تاخد فلوسه وفلوسهم!!

- لو هيا ست شاطرة كانت تدبر حالها مهما كان حال جوزها (تعمل ايه تانى مرات الابن اكتر من انها ساعات بتعدي الشهور العصيبة من غير ما تشتري لحوم مثلا وبتعتمد ان اولادها بياكلوها في الحضانة؟)

- لما اهل الزوج يساعدوا ابنهم بيدولوا حاجات عينية - يعنى مثلا فرخة..كيس لحمة...كام كيس مكرونة على ازازة زيت. انما فلوس كاش في ايده neverrrrr

- الحما لو شافت مرات ابنها لابسة بلوزة جديدة ولا حد من العيال لابس جزمة جديدة على طول بيجي في بالها "ما انتوا بتصرفوا بالهبل على اللبس اهه - بتشتكوا ليه بقى؟"

اهل الزوج بيجوزوا ابنهم باقل التكاليف في معظم الاحيان. عادي يعنى لما يتجوز من غير شوية اجهزة من بتوع المطبخ...في اعتقادهم ان الاجهزة اللى على العريس هي: البوتاجاز والتلاجة والغسالة وسخان وتليفزيون! (اصغر بوتاجاز فيكي يا مصر مع تلاجة 14قدم وغسالة رخيصة مصري وسخان صغير وتليفزيون حجمه نص الاوضة وابو من غير ماركة!) انما بقى المكنسة والفلتر اللى فوق البوتاجاز والتكييف والمراوح والدفاية والمايكروويف والشواية والخلاط والكيتشن ماشين والتليفزيون الLCD ومضرب البيض الكهربا...كل ده رفاهية ولو الزوجة (روح مامي) نفسها فيها يبقى تشخشخ جيبها ولا جيب ابوها وتجيبها!!

كتير جداااا اهل الزوج بيطنشوا فستان الفرح! ايوة يا جماعة فستان الفرح على العريس! واهل العروسة مش بيتكلموا في الحاجات الصغيرة دي علشان مايتقلش عليهم جاعنين او معفنين واهل الزوج بيطنشوا يجيبوه لان "هيا اللى هاتلبسه مش ابننا!!" 

عادي برضه ان اهل الزوج يرفضوا يجيبوا شبكة فيها فصوص! ليه؟ علشان ابنهم مايخسرش فيها لو اتباعت (!!!!) - والله العظيم الكلام ده حقيقي مش من وحي خيالي!

في الجهاز اهل الزوج بيتعرفوا ب"اوضة نوم - اوضة سفرة - الصالون" فقط!! طبعا اللى قلته ده بيجي بالنص مش لوحدهم بيشيلوه! ملهمش دعوة بقى بحاجة اسمها living ولا حاجة اسمها اوضة الاطفال ولا حاجة اسمها مكتبة او دولاب زيادة - وبرضه ملهمش دعوة ان الست عايزة تعمل دولاب في الحمام او تقفل تحت الحوض في الحمام على النظام الاجنبي!!! اللى عايز حاجة يعملها بنفسه!! احنا بنعمل المتعارف عليه - احنا مش قاعدين على تل فلوس!!

برضه ملهمش دعوة لو الست عايزة تقفل البلكونة الوميتال مثلا!! 

اهل الزوج بيستخسروا اي حاجة في مرات ابنهم - وبعدين مش بيعملوا اي حاجة زيادة في بيت الولد علشان من المعروف "البيت  بيت الست مش بيت الراجل" - يعنى حلو اوي تكون الشقة باسمه والباقي تتصرف فيه هيا!!!

برضه ملهمش دعوة خااااالص هايتصرف ازاي في فلوس شهر العسل! (يروحوا يومين في اي حتة في اسكندرية وخلاص - لازم يعنى المنظرة؟)

في رمضان مش بيجيبوا حاجة لبيت ابنهم - اهل البنت بيجيبوا علشان مناسبة سعيدة ويساعدوا الشباب اللى مش عارف يمشي حاله في البلد الغالية دي!! وبيصعب عليهم بنتهم بعد ما كانت عايشة في النعيم انها تختصر حتى في الشهر ده

في العيد مش بيجيبوا حاجة للاطفال - بيدوا عيدية كفاية - اهل الزوجة بيدوا هدايا ويكونوا جايبين حاجات حلوة للاطفال ومش بعيد يكونوا جايبين لهم طقم زيادة لتانى يوم العيد هدية

اهل الزوج في العيد الكبير بيعزموا ابنهم ومراته على الغدا - لكن مايخدوش حاجة من الخروف البيت!

اهل الزوج لما ابنهم بيكون في مشكلة مادية حقيقية بيسلفوه الفلوس (ويردها في اول فرصة) - اهل الزوجة "بيمنحوها" الفلوس - كادوه يعنى - مساهمة منهم في حل المشكلة (وغاااالبا مش بتترد الفلوس تانى ابدا)

اهل الزوج شايفين ان مراته بتقبض على قلبها قد كده وبتحوش من وراه! مع انها غلبانة بتحط كل فلوسها في البيت وبتجيب الهدوم للعيال وبتصرف على الفسح بتاعة اسرتها الصغيرة - مرتب الست بيكون للمسة الرفاهية البسيطة في حياتهم وحياة اولادهم...ولو حوشت فلوس بيكون بعلم جوزها  علشان المدارس! مش علشان تجيب عربية 4*4

لو موبايل الراجل اتغير بيكون "يا حبيبي بقاله 4 سنين معاه نفس الموبايل - وبقى قديم وبيهنج كتير" - لو مراته غيرت موبايلها "كل سنة بتليفون جديد ولا ايه؟ ما احنا لو فضلنا ورا الموضة مش هانخلص!" - مع ان تليفونها اقدم من تليفون جوزها!!

اهل الزوج شايفين ان الاكل برة والسفر في نهاية الاسبوع او رحلات اليوم الواحد او السينما والمسرح - مضيعة فلوس "وترجعوا تعيطوا ان الفلوس مش بتكفي"

الحما شايفة ان شنطة سودا وشنطة بيضا وشنطة بنى كفاية اوي في دولاب مرات ابنها - مش لازم درجات الطيف كلها يعنى!!! هوا هايلاحق على ايه ولا ايه!

الحما برضه شايفة ان الهدوم الكتير للعيال مضيعة لفلوس ابنها علشان العيال بتكبر والهدوم بتترمى من غير ما تتلبس 

مفيش داعي لاكتر من لابتوب في البيت! كفاية واحد! مفيش داعي للحضانة الغالية ماهي في الاخر حضانة ومش محسوبة من سنين التعليم!! مفيش داعي للخروج الكتير ! مفيش داعي لكل اللعب دي (ما كل اللعب بتتكسر في الاخر او بتروح زهوتها)! مفيش داعي تخرجوا لهم اللعب دي كلها مرة واحدة - شيلوا شوية لحد ما يزهقوا من اللى عندهم وطلعوا من اللى مخبينهم!!

مفيش داعي للعصير الكتير للاطفال - اعملي في البيت ارخص

ولا داعي للبسكوت اللى في التلاجة كل ايام الاسبوع 

ولا داعي للكيك كل شوية (بياخد لبن وبيض كتير حرام)

مفيش داعي...نتنفس!!!

كلمة اخيرة: مال الكنزي للنزهي ... والحدق يفهم!

https://www.facebook.com/groups/329904227056535/

ريم اسامة 

الصيف جه!

الصيف جه - كل صيف وانتوا حرانين وملزقين وزهقانين - وطيبين طبعا 

والصيف يعنى سفر...السفر ده قصة تانية بقى 

وده نموذج مبسط من اللى بيحصل في السفر!

اريح لك تحضري شنطة لجوزك لوحده وشنطة ليكي وللعيال - او شنطة للعيال وشنطة ليكي وشنطة لجوزك! اكتبي ورقة قبل السفر بفترة علشان ماتنسيش حاجة علشان ماتتهزأيش ...بما انك اللى محضرة الشنط!!!

شنطة جوزك فيها المايوه طبعا - بشكير للمياه وفوط للوش وللحموم (ايوة هاتحطي الفوط بتاعته لوحدها علشان تخلصي من محاضرة "عايز فوطة" كل ما يجي ينزل) والشورتات بانواعها (اللى بيتلبس على البحر واللى بيتلبس بعد الضهر)  والتيشيرتات بانواعها برضه (البولو والعادية والكت وام كم وام جيب وام روحين)....والشباشب بانواعها (شبشب المياة وشبشب التمشية وشبشب البلاج) والجزم بانواعها (الكوتشي والكونفيرس)...والكاب...ونضارة المياة لو عنده واحدة...والشاحن..فرشاة الاسنان...وماكينة الحلاقة ومستلزماتها...غير هدوم النوم او البيت والهدوم اللى تحت الهدوم!...ونضارة الشمس كده كده الحمد لله هاتبقى معاه وهوا سايق! 

وللعيال هدومهم كلها بلا مبالغة!ّ!! علشان لو جبتي هدوم قليلة هاتغسلي كل يوم مرتين تلاته !! هاتي الدولاب وريحي نفسك! وخدي معاكي طقم تقيل لكل طفل علشان لو الدنيا برد بالليل وطبعا دولاب الفوط كله برضه! وشباشب وجزم وعوامات ومايهوات وكل ادوية البرد والسخونية والاسهال والامساك والكحة ومراهم لدغ الحشرات وكريم الشمس وزيت الشعر وشامبو وشاور خاص بالاطفال وغير مثير للدموع!! ولعب البحر والجرادل ولعب البر وكور ورشاشات المياة وبرانيط المياه وبره المياه....فرش الاسنان ومعجون بطعم الفراولة ولا الموز ولا حتى ورق العنب!...وبامبرز كتير لو عندك اطفال رضيعة وطبعا اللبن والميلوبا والسيريلاك وادوية المغص...وبافيتات للقشط! 

وخدي معاكي بقى شنطة لوحدها فيها ليفة وسلك للمواعين وتنضيف الحمامات وديتول وصابون وش وصابون سائل ومسحوق...وكيس مشابك علشان متعرفيش المكان اللى انتى رايحاه فيه مشابك ولا لا -- ولو فيه مش هاتسعملي حاجة مطرح ناس متعرفيهمش! وتاخدي جرايد (تفرشيها في الدواليب) وخدي معاكي طبعا ديتول وفنيك...وخدي برضه كام بكرة تواليت وعلبة مناديل وطبعا طبعا مناديل مبللة (wipes) كتييير!

وخدي اطباق وملاعق للاكل وملاعق للشاي وشوك واكواب وكام مج....ومعاكي علبة سكر وعلبة شاي وعلبة نسكافيه وعلبة قهوة ...علشان ماتفضليش تشتري من هناك! وكمان مبيد للحشرات الزاحفة والطائرة والنائمة...وكيتو! 

وتحضري شنطة للطريق بقى...شوية ساندوتشات مختلفة ومتنوعة حسب رغبة كل فرد من اسرتك "العسل"....مياة....عصير للعيال...بسكوت...بمبوني لجوزك ولما العيال تقولك عايزة واحدة تقوليلهم ده دوا!! (ما انتى مش هاتنضفي البيت والعربية!!)...حاجة ساقعة لجوزك ...فوطة للطريق ماتعرفيش ممكن يحصل ايه! واكيد وايبس...ولعب علشان العيال مايقطعوش بعض...ومناديل...وطقم كامل لكل طفل...وازازة فاضية !! (الامهات هايفهموا ليه من غير ما اشرح!)

مفيش داعي اقول اننا مهما بنحاول اننا فعلا نخلص موضوع تحضير الشنط بدري برضه لازم نفضل صاحيين لتانى يوم برضه! 

اول ما بتوصلي بتخرجي شنطة التنضيف وتنضفي التواليت والحمام كله - وبعدين المطبخ - وبعدين بتضفي كل الشاليه او الشقة! بيكون فات كام ساعة كده وغالبا هايكون جوزك نايم من تعب السواقة!!!!

وبعدين ترصي الهدوم في الدواليب بعد ما ترشيها وتسيبيها تتهوى وتفرشي جرايد نضيفة! - كل ده حضرتك لسه بهدومك!!!

يصحى جوزك وتاكلوا بره - يا سلاااااااااااااام...اول شعور حلو من ساعة ما قلتوا "يا سفر"....باقي السفرية بتكون جري ورا العيال علشان يلبسوا...وعلشان ياكلوا..وعلشان يوافقوا يحطوا كريم الشمس...وعلشان يطلعوا من المياه وعلشان يقتنعوا ان رش المياه على الناس التانية في حمام السباحة عيب وقلة ادب..وعلشان ينزلوا من على المرجيحة  وعلشان مايسيبوش ايدك وانتوا في الشارع وعلشان يصحوا من نوم الضهر علشان لو فضلوا نايمين هاتتروقي! وطبعا علشان يناموا بالليل علشان تلحقي لك ساعة ولا حاجة مع جوزك!!

طبعا كل يوم بتغسلي البشاكير وهدوم البحر وبتغسلي الجرادل من الرمل والشباشب من نفس الشئ ...والهدوم اللى بتتلزق وتتبقع من الاكل...وكله على ايدك في الطشت!! وهكذا....الام بتهلك في السفر الحقيقة...تنضيف كتير...غسيل كتير...محايلة اكتر...بتحاول فعلا ترضي جميع الاطراف علشان الاطفال مهم اوي ينبسطوا وعلشان جوزها مفحوت شغل طول السنة فهيا في الاخر بتخلي راحتها هيا اخر حاجة في بالها!

جوزها برضه مش بيخلي مراته تعمل اكل كتير في البيت علشان من حقها برضه ترتاح وتنبسط ....في اخر الرحلة رغم التعب ده كله والترتيبات الكتير دي كلها...بيكون عندها شعور بالرضا...انها ساعدت في سعادة بيتها واكتر ناس بتحبهم في الدنيا: جوزها وعيالها:)

فمتزعليش اوي من التحضيرات...في الاخر كله بينبسط وانتى السبب في ده:)

كل سفرية وانتوا طيبين :)


https://www.facebook.com/groups/329904227056535/
ريم اسامة 

طنط/ احبطهم ودمر معنوياتهم

 في كل عيلة او من ضمن المعارف المقربين هاتلاقي واحدة (وغالبا هاتكون ست اكبر سنا) لا بيعجبها العجب ولا بتسكت - وعلى طول تشتغل  محلل نفسي!

لو انت لابسة حلو - هاتتكلم عليكي

او لو لابسة واسع - هاتتكلم وراكي

ساكتة وفي حالك - هاتتكلم 

بترغي مع كل الناس - هاتتكلم

بتاكلي - هاتتكلم 

بتشربي بيبسي - هاتتكلم

والستات دول مابيهمهمش مين واقف ولا مين سامع ولا انتى موجودة ولا الكلام هايوصلك ولا لا - اللى في قلبها وضميرها وطرف لسانها هاتقوله فورا ! ومش مهم الكلام يوصلك ولا انتى حتى واقفة تسمعيه شخصيا ... الحاجات دي كلها "نثريات"...هيا هاترغي..عليكي وعلى غيرك على فكرة...هيا شخصيتها كده! 
مش محتاجة اقول ان السر معاها بيكون اعلانات out-door- وتقول لكل واحد"بس متقولش لحد"...وبعدين بتكتشفي انها بتقول "متقولش لحد" من حكم العادة يعنى مش قصدها :)
الشخصية دي بتكون حشرية بشكل عنيف...لا غضاضة انها لو دخلت بيت تعمل البيت بيتها ... مفيش اي مشكلة انها تدخل المطبخ وتفتح التلاجة تشرب!! مش في بالها بقى تلاجتك فاضية ولا مليانة ولا شايلة فيها هدوم حتى...عيب حد يفتح تلاجة الناس! بس هالتاقي "طنط" دي عادي! ممكن تدخل المطبخ وتبص على البوتاجاز تلاقيه نضيف وانتى حاطة فويل جديد وزي الفل..عااادي خالص تشيل طرف الفويل علشان تعرف انتى حتطيه على نتانة ولا نضفتي البوتاجاز نفسه!! والله يا جماعة ما بهرج لان فعلا ده حصل!
طبيعي خالص انها تقولك في مناسبة عزيزة عليكي وانتى لابسة طقم جديد وغالي "اللون ده مش لاقي عليكي" او تقولك "ايه اللى انتى لابساه ده؟ ده مش مناسب!" 
مفيش اي مشكلة انها تنتقد جوزك قدامك...وفي وشه! تقوله مثلا "ايه يا حمادة الكرش ده كله؟" مش ضروري تكون واخدة عليه! طبيعي برضه ومن البديهي انها تقولك "حماتك تخنت اوي - نبهيها كده خطر على صحتها في السن ده!"
وبرضه "بتاخدي كام دلوقتي؟" سؤال عادي خالص في مستوى "عاملة ايه" بالنسبة لها! ولو اتلجلجتي هاتقول انك بتخبي ومحوشة! انتى هاتتلجلجي علشان عيب! 
النموذج ده بقى معندوش عيب خالص
عادي تسئل اي حاجة بكام ومين اللى دفع انتى ولا جوزك ولا ابوكي ولا حماكي!!! ولو جوزك اللى دفع هاتسئل وحماكي مايدفعش ليه؟ ولو ابوكي اللى دفع هاتسئل وجوزك رضى على نفسه؟ 
النموذج ده مفيش اجابة بتعجبه خالص! ولا في اجابة بتشبع مرض الفضول ...برضه هاتستمر في الاسئلة 
هاتسئل وزنك كام - بتقبضي كام - بتجيبي طلبات البيت في الشهر بكام - بتدي ابنك مصروف كام - جوزك بيقبض كام - ولو جالك شغالة لازم تعرف بتجيلك امتى وبتاخد كام - وضروري تعرف مقاس هدومك (متفهميش ليه بس هاتسئلك) .
النوع ده بيحبط اكتر ما بيشجع...تقولك اللون ده مش لاقي عليكي - الهدوم دي محتاجة تضيق شوية - الروج ده مخلي اسنانك صفرا - المانيكير ده بيئة - لفة الطارحة دي مكبراكي - لونك اصفر ليه؟؟ - مش لابسة اكسسوارات ليه؟ لو من دلوقتي مش مهتمة بنفسك هاتهتمى امتى؟ - شعرك مقصف! - التسريحة دي مش لاقية عليكي - انتى رفضتي العريس الاخراني ليه؟ - فسختي الخطوبة ليه؟ - مامتك مالها ؟ هيا متخانقة مع ابوكي ولا ايه؟ - المفروض تعملي لابنك رجيم من دلوقتي - وعادي ممكن تقول لابنك "بلاش اكل شيكولاته تانى علشان تخس ويبقى شكلك حلو زي فلان" (كمان هاتعقد العيال) - تدخل بيتك تنتقد المفارش وطريقة رص النيش ومستوى نضافة الحمامات ولون الفوط...ومن غير استأذان ممكن تعيد ترتيب رف من النيش علشان هيا شايفة ان ذوقها احلى!
الشخصية دي عادي جدا تشد صورة من البوم فرحك ولا البوم خطوبتك وتاخدها ليها ... عادي برضه تصورك من غير ما تقول ولا تستأذن..ومن غير ما تنبهك انها اصلا هاتصور! تطلعى بقى فاتحة بؤك ولا مغمضة عينك ولا ايدك في مناخيرك!ّ مش مهم  بس هيا برضه مش هاتمسحها!
لو عندك بابي صغير ولقتك بتديله ببرونة هاتسئلك بلا اي حرج "انتى مش بترضعي طبيعي ليه؟" قدام جوزها وعيالها وابن خالة عيالها...عادي يعنى خليكي فريش!
لو معاكي موبايل جديد وحلو هاتسئلك "بكام ده؟" هاتقولي بكذا وانك مثلا جايباه تقسيط...فتقوم هيا عند اول ودن تقول "فلانة بتقول ان موبايلها تقسيط مع انى مسئلتش هوا تقسيط ولا كاش...خايفة احسدها يعنى ولا ايه؟ خايفة نفتكر ان معاها فلوس؟؟" مع انه فعلا بيكون تقسيط!!
لو جبتي مثلا شنطة حلوة في التخفيضات وهيا شافتها (وضروري طبعا لازم تعرف منين وبكام) في نفس الليلة هاتلاقيها جايبة اختها اربع الوان! النوع ده من الستات مايستحملش حد يكون عنده حاجة جديدة حلوة ورخيصة وهيا لا!
كل البنات اللى في سنك بناتها وكل الاولاد اللى في سنك اولادها  (بغض النظر ان كلكوا كبار)....وبالتالي كلكوا بالنسبة لها اخوات...فعادي اوي انها تفتح اي موضوع قدام اي حد منهم!!! ما انتوا كلكوا عيالها نظريا!
تحلل كل تصرفاتك وتتعامل ان تحليلاتها حقائق علمية وتناقشك مع الاخرين.
لو مامتك قررت انها تتحدى الاعاقة وتعمل رجيم جامد وفعلا تخس...هاتلاقي طنط/احبطهم ودمر معنوايتهم بتقولك "ياااه امك خست اوي...بس وشها كرمش!" وهاتجري تقول لكل الناس اللى في طريقها نفس الجملة لحد ما توصل لودن مامتك!
طنط/احبطهم دي مابتحبش حد يقولها على اي حاجة عندها وحشة..شايفة انها اكتر واحدة بتفهم في الذوق وفي الشياكة والواجبات الاجتماعية..متخيلة انها اكتر واحدة ليها اصحاب ومحبوبة...شايفة ان كل قراراتها صح وان كل هدومها اخر "الاجة"...متخيلة ان انتقادها السخيف لكل الناس هو "نقد بناء" ونصيحة من ام! 
احب بس اوجه كلمة لطنط/ احبطهم ودمر معنوياتهم: على فكرة الناس اللى حواليكي دول كلهم يعرفوكي علشان انتى اكتر واحدة بترغي على خلق الله....حواليكي علشان يتجنبوا لسانك اللى زي المبرد...حواليكي علشان يعرفوا اخر الاخبار! مفيش حد فيهم بيثق فيكي ولا بيحكي لك الحقيقة علشان مايتفضحش! ولو حكى لك حاجة اعرفي كويس اوي انها حاجة عادية والناس كلها عارفاها! 
ولو حد فيكوا عنده طنط من دول...اكتر حاجة بتغيظها هي الابتسامة ولا اجابة :) هاتتفرس...جربوا كده وابقوا قولوا لي
ملحوظة: والله العظيم كل اللى قلته فوق ده حصل مع ناس اعرفها شخصيا!

https://www.facebook.com/groups/329904227056535/
ريم اسامة 

خد من التل يختل

خد من التل يختل...مثل قديم وصحيح 

بس غالبا بيتقال على الفلوس....لو محوشة شوية فلوس وايدك جت عليهم حاجة صغيرة في حاجة صغيرة ....المبلغ هايتعفرت ويطير! وده حقيقي ...جربي كده اعملي جمعية مثلا وشيلي الفلوس فترة معاكي من غير ما تعملي بيهم حاجة كبيرة على بعض...هانقول هاتقبضي الف جنيه مثلا....خدي منهم خمسين تخرجي مع اصحابك...خمسين من الف جنيه حاجة صغيرة ....وبعدين وانتى في الطريق عجبك ايشارب ولا شنطة...هاتجيبيهم...وانتى في الكافيه مع اصحابك كنتى عاملة حسابك على قهوة وجاتوه...وريقك جري على الباستا اللى عندهم وطلبتيها (ما انتى معاكي الف جنيه بقى براحتك ولما تقبضي مرتبك هاتسدي اللى خدتيه من فلوس الجمعية)....هاتلاقي على اخر اليوم انك صرفتي ربع المبلغ مثلا! وعلى اخر الاسبوع هاتكونى طيرتي الالف جنيه كلها ومش عارفة الفلوس راحت فين!!

صح؟ 

المهم...انا كلامي النهاردة عن حاجة بعيد عن الفلوس والماديات....كلامى عن "تل" مختلف....شوفي لو انتى كل شوية حد بيقولك "شكلك اتغير اوي انتى مش مهتمة بنفسك ليه"....لو كل فترة جوزك قالك "انتى مش ناوية تخسي؟"...لو كل مناسبة حد قالك "ما انتى عارفة ان في فرح من شهرين ليه مخستيش شوية؟"....هايبقى شعورك ايه؟ اكيد هاتحبطي...ولما تعملي رجيم او حتى فعلا خسيتي شوية قليلين محدش هايحسسك بكده! في الاخر هاتستسلمي انك خلاص فعلا قبيحة وانك بجد فشلة وكرنبة ومعندكيش ارادة! هاتستلمي وترضي بامرك الاليم وخلاص! الناس هاتاخد من تل ثقتك بنفسك وهاتختل في الاخر....وبعد كده هاتخلص وتختفي!

تخيلي لو كل شوية حد قالك "حرام عليكي" ...لو حد قالك "انتى معندكيش قلب؟" لو عملتي اي حاجة مش عاجبة الناس مع عيالك....لو انتى بتروحي شغلك وتسيبي العيال مع دادة في البيت هايتقالك "حرام عليكي انتى معندكيش قلب؟ انتى مش خايفة عليهم؟"....لو اطفالك كبار شوية وبتسبيهم في النادي على ماتخلصي شغل "هايتقالك حرام عليكي انتى خايفة عليهم"...لو سبتيهم في البيت لوحدهم من غير دادة هاتسمعى "انتى مش بتخافي يموتوا بعض من غير ما ياخدوا بالهم؟" لو سبتيهم في البيت لوحدهم وسبتي المفتاح مع جارتك كل شوية تبص عليهم وتطمن هاتسمعي "انتى اعصابك هادية اوي على فكرة وقلبك قاعد مش بتخافي"....لو وديتي العيال الحضانة هاتسمعي "يابنتى حرام عليكي الفلوس الكتير دي ماهم في مدرسة لازمتها ايه الحضانة"...لو سبتيهم عند جدتهم هاتسمعي "حرام عليكي الست كبيرة ماتقدرش على بهدلة العيال دي وطلباتهم ودوشتهم والكركبة اللى بيسيبوها بعديهم"...مش هايتبقى لك حل غير انك تسيبي العيال في الفريزر لحد ما تيجي!!! كل ما حد ياخد من تل امومتك كل ما هايختل توازنك وشعورك نحوهم وفي الاخر خالص هاتلاقي نفسك بتعملي حاجات غريبة علشان ترضيهم وبرضه هايفضل عندك شعور بالذنب ملوش لازمة...في نهاية الامر هاتبقى ام حزينة وهما هايبقوا عيال "واطية" وهايفهموا انك بتعوضيهم حاجة هما مش فاهمينها بس هايعرفوا كويس اوي يستغلوكي!!
لو في كل خناقة او كل مناقشة حاجة مع جوزك سمعك الكلمتين بتوع "انتى اتغيرتي ....انتى مفيش في حياتك غير العيال والاكل...انتى نكدية ...اة اصل بقالك كتير متخانقتيش...عيشتك بقت تقرف....انتى مملة...الواحد المفروض يرتاح في بيته وانا باجي هنا اتنكد ليل نهار...افردي وشك...وطي صوتك شوية ,,,هوا انتى بتودي الفلوس فين؟...الخ" لما ياخد من تل طبيعتك كانثى في الاخر هاتبقى حاجة كده ملهاش شخصية وكائن غريب عليكي ...هاتحاولي ترضيه وهايكون على حسابك اعصابك وبالتأكيد هاتعانى من الاكتئاب في فترة من الفترات!
لما انتى تفضلي تقولي لعيالك "انت غبي....يا حيوان قلنا مليون مرة لا...انت مابتفهمش....انت قرفتني...حرام عليكوا انا طقهت....عيشتكوا سودا....ابو اليوم اللى شفتكوا فيه...اتخمدوا بقى انا تعبت....انت متخلف؟؟...هوا انت بتفهم من المرة الكام؟؟....ده لو كان جحش كان زمانه فهم!...الخ"...متخيلة الطفل اللى شايف امه هيا كل حاجة في حياته تعبانة منه...هايحصله ايه؟ مبدئيا طبعا هايحاول يرضيها لانها امه وبعدين هيا مش هايعجبها برضه لانها فعلا تعبانة ولكن بتطلع غلبها وتعبها في الطفل ومتخيلة انه مش فاهم...بعد كده هايبقى عنيد ويعمل الغلط بمزاجه بما ان الكويس مش عاجبها يبقى خلاص نقرفها بقى! وبعدين في النهاية هايبقى طفل متردد او عنيد مش بيسمع غير دماغه وبس! لما تاخدي من تل ثقته بنفسه هايختل توازنه النفسي! وانا هنا ماجبتش سيرة الضرب المبرح والشبشب اللى بيطير في كل مناسبة!
لما كل شوية تقولي لجوزك "هوا انت بتعملنا ايه؟ ... انت مش فارق معاك حد في الدنيا غير امك...انت مبتعرفش تضحك؟؟....وهيا الفلوس اللى بتديهالي دي فلوس؟!...اطبخي يا جارية كلف يا سيدي!!....الخ" هايحبك زيادة يعنى؟ هايحاول يشيل من عليكي؟ هايحاول يرضيكي؟ هايحاول يحسن من دخله علشانك؟ ولو حسن من دخله هايديكي الفرق ده؟ لو في باله يغير عربيته ومن غير مقدم هايديكي القديمة؟؟ اكيد لا! بالعكس هوا هايفضل قافل وشه ويتخانق معاكي في كل مناسبة وهايسمعك كلام يوجعك عن عمد!
احنا لو بنقدر بعض...لو بنراعي شعور بعض...التل هايبقى جبل...بس احنا ناس بتكره نفسها للاسف!


https://www.facebook.com/groups/329904227056535/
ريم اسامة