بيحبك بطريقته

كتير اوي من الستات والبنات بتشتكى من شريكهم...من ان اسلوبه وحش معاهم...وانه لازم يتغير او انها تنهى العلاقة دي!

المشكلة مش في الراجل المرة دي...الحقيقة المشكلة في الست.

الست كائن فياض بالمشاعر...رومانسية بطبعها...وبتحلم كتير....وللاسف معظم احلام اليقظة تتغذى على المسلسلات!!!

وعايزة - ال اييييه - جوزها يعمل زي المسلسلات!!

على فكرة كده هاتتعالجي نفسيا قريب!!

الستات بتتأُثر جدا بالمشاهد الرومانسية لان الراجل فيها بيتصرف اكنه ست!!! محدش يشتم..هاشرح لكم!

يعنى مثلا الست بتهتم بالتفاصيل...فيجيبوا راجل بيهتم بالتفاصيل...فالست اللى قدام الشاشة تتأثر وتزعل على حالها!!

حبيبتي....ده تمثيل!! الممثل شخصيا مش مقتنع بس ده اكل عيشه حضرتك!
مفيش راجل بيهتم بلون الروج..ولا طول كعب الجزمة (5سم ولا 7سم!)..ولا بيفرق معاه الشراب فوال كريستال ولا فيليه عادي!! ولا بيفهم الفرق بين درجات اللون الواحد...يعنى ايه كاشمير ده؟؟ ها؟ اوصفي لي اللون كده...هوا بينك ترابي قالب على بيج!!!!
حضرتك ده راجل!! يعنى الالوان عنده تقريبا 12بس! احمر اخضر ازرق بنى بنفسجي ابيض اسود اصفر اورانج (وهوا بيقولوه برتقانى) وبينك (بمبة بالنسبة له) وسن الفيل (اللى هوا غالبا اوف وايت بالنسبة لنا...واحياينا بيقول عليه سمنى!)..ورمادى!
احنا عندنا اللون الواحد ليه بتاع 10درجات! فى فرق خيال بينا وبينهم..وهما متعايشين مع ده عادي...احنا اللى زعلانين اوي!
حبيبتي ده مش طبعه...هوا مش عايز يدوخ ولا يحتار..خليكي واضحة كده وصريحة وبلاش مياعه!
الست بتحبط لانها بتكون مستنية رد فعل معين من جوزها...وطبعا هوا مش بيعمله...لانه مش بيفكر زيها...هيا عايزة يوم عيد ميلادها هوا ياخده اجازه ويجيب لها ورد وياخدها في تمشية طويلة على النيل او في رحلة نيلية...وياخدها مكان حلو (من ابو حجز من قبلها بفترة ده) ويبالغ في اهتمامه في انتقاء الهدية! 
وفي الفالانتاين يلبس لها احمر!!!!! ويجيب ورد وشيكولاته (مش من الكشك طبعا - شيكولاته غالية) وياخدها مكان رومانسي ويقول لها كلام ماسمعتوش قبل كده!!
انتى مجنونة؟؟ في راجل نازل معاه كل الاوبشنز دي؟؟ 
في عالم الراجل بقى...عيد ميلادك...مش هايطلب منك تطبخى...مش هايزعل لو القميص اللى كان عايزه لسه في الغسيل...هايستحمل (وهوا شايف انه كده مجاملك جامد يعنى)...يروح الشغل طبعا...ياخد اجازة ليه؟ هوا العيد الاضحى؟؟...فكرته عن الفسحة هي انكم تتغدوا بره في مكان بيقدم اكل بيشبع! بعيد عن رومانسية المكان او شياكته..هوا عايز اكل يشبع وتمنه فيه! مش هايدفع طبعا 400 جنيه في حتتين فراخ وطبق رز! ولو عمل كده علشان مايزعلكيش...هوا مضطر...وحاسس انه مقطف! 
حوار الورد ده...في رجالة لسه بتجيب ورد بصراحة...ربنا يكرمهم
وبالنسبة للكلام اللى ماسمعتيهوش قبل كده...لا احلمى عادي...الحلم مش عيب!
الرجالة مش بتتكلم كتير زينا...يعنى مشاعره مش هايعبر عنها بكلمات...هوا مش هايرضى انك تنزلي لوحدك الشارع...ده في نظره هوا حب...اهتمام...بيخاف عليكي....احنا شايفين ان ده تحكم وسخافة وحبس!
لما يمنعك تلبسي الوان فاقعة هوا مقتنع انه كده بيحافظ على مراته وبيته وعيب انها تلبس حاجات ملونة كده...بالنسبة لك هوا كئيب! 
لما يصمم تطبخي كل يوم...هوا شايف انه يصمم ياكل من ايدك ده حب...وتعلق بيكي وباللى بتعمليه بنفسك...انتى شايفه انه مش مقدر تعبك ولا بيحس! 
 هوا مش بيشكرك لما تعملي اكل حلو؟ مش بيعلق لما تنضفى الشقة ويقولك تسلم ايدك؟ مش بينطق لما كل هدومه تكون في الدولاب نضيفة ومكوية؟ هوا شايف طالما مش بيعاتب يبقى كله تمام! طالما مش بيعلق بالسلب على اي حاجة يبقى انتى تفهمى انه راضي عن البيت وعن اللى بتقدميه...لا انتى مش شايفة كده...انتى شايفه انها انانية وبرود! 
الرجالة بتحب باسلوبها...بتحب بصمت...كتير منهم بيتكسف يعبر عن مشاعره وعن العرفان والشكر!! 
لما تتعبي ويصمم تروحي الدكتور غصب عنك....ده حب
وتصحى تلاقيه شايل طبق الغسيل لمكان ما بتنشرى...ده اهتمام
يشيل الاطباق بعد الغدا...دي مشاركة
يجيب طلبات البيت بزيادة ومن غير ما يذلكم باللى بيشتريه...ده تحمل مسئولية
هوا شايف كده....وذاوية مختفة عن الست...اه فعلا ده حب واهتمام وتحمل مسئولية.

علشان ترتاحي....بلاش تتوقعي رد فعل محدد من جوزك...هوا بيحبك باسلوبه...هوا فاكر لما كنتى مخطوبة له وفرحتي بالشاورما لما جابها...فهوا لما يفضل يجيب لك شاورما فقط دون باقي الاصناف...هوا شايف انه بيجدد له فرحتك زمان! مش قصده يبقى ممل..ولا مكسل يجدد او يفكر...هوا بس متاكد انك بتحبي الشاورما! 
لو عايزة حاجة من الراجل اطلبيها بوضوح...بلاش تلمحى له علشان هايبهرك بعدم الاستيعاب! اطلبي منه صراحة "عايزة اروح المكان الفلانى"...هوا من نفسه هايوديكي في اقرب مناسبة او فرصة!
ونيجي للهدايا...بجد هما مش بيعرفوا يجيبوا هدية...هوا بيفكر هوا شخصيا هايفرح بايه ويجيب لك زيها! يعنى هوا ينبسط اوي بسماعة موبايل جديدة...انتى هاتزعلي! ومن كتر ما احنا بنصدمهم بالاحباط...بقوا يجيبوا برفان...ساعة...شنطة...جزمة! بس كده خلاص...هوا حصر  الهدايا في عدة نقاط وانتى حظك...وعلى حسب الميزانية ساعتها! 

شغل البلالين والورود الكتير واجازة مخصوص وتطلعوا day use او رحلة مفاجاة...مش كل الرجالة بيجي في بالها اساسا تعمله!! فماتزعليش...مش قصده فعلا :D

ابقى قولي له نفسك في ايه....سهلة اوي اهه! 

ريم اسامة 

الانتصارات الصغيرة

الانسان بطبيعته يتشوق للانتصارات...لو بيشجع فريق كرة معين...يشجعه بجد من كل قلبه...وينفعل فعلا ويزعق ويتعصب ويتنرفز ويشوَح بايده...نفسه يحس بنشوة الانتصار...لو بيلعب دورة رمضانية حتى...بيكون الشخص فعلا بيلعب بكل طاقته الجسدية والذهنية وكل تركيزه...نفسه يكسب...للانتصار سعادة.

مش دايما بنكون في موقف يحقق لنا الاستمتاع بالشعور ده...ولذا يتطلع الانسان للانتصارات الصغيرة...اللى بتشبع لديه بعض من فرحة الفوز!!

احنا الستات عندنا كتير بقى من الكلام ده...خد عندك:

يفاجأنا ابو العيال بالجملة الاجمل على الاطلاق "ماتعمليش اكل النهاردة...هانطلب اكل من بره"....يااااااه على السعادة...يعنى مفيش بصل النهاردة؟ مفيش تقليب رز ولا سلق مكرونة ولا تحمير ولا تسبيك خضار؟ مش هاحتار حيرة كل يوم هاناكل ايه ويتقالي اي حاجة؟ احمدك يا رب! 

برضه من الانتصارات التافهة اللى بتوفر لنا فرحة...حوض المطبخ الفاضي!! لما نخلص المواعين قبل ما ننام ونصحى نلاقي الحوض لسه  فاضي..ونزود في اختبار نفسنا وننزل ونرجع من الشغل...برضه فاضي!..ايه الجمال ده؟؟ لا بجد...ايه الحلاوة دي؟؟؟ يا رب ديمها نعمة!!

الرجالة بتنشكح اوي لما تلاقي مكان لركن العربية قرب العمارة...ويا سلام لو قدام باب العمارة مباشرة...غالبا بيقرر انه مش هاينزل تانى بالليل علشان المكان اللوز ده.

انا بانبسط اوي لما اطبخ لكام يوم وارجع من الشغل اسخن وبس! باحس انى "ابلة نظيرة"..منظمة كده ومرتبة ومدبرة! وانى انتصرت على نفسي ووقفت كذا ساعة في اخر الاسبوع علشان ارتاح باقي الايام.
لما يتبقى اكل من عزومة واسخنه لتانى يوم...مش هاطبخ...مش هاقف كتير...يادوب اسخن واعمل سلاطة وخلاص!

افتكر احط كل الاجهزة على الشواحن من بالليل ونصحى نلاقي كل حاجة مشحونة 100%

تدخل الشغل وتلاقي الاسانسير موجود في الارضي

لما الراجل يروح يحلق ويلاقي المكان فاضي ويحلق على طول بلا انتظار

نفس الكلام مع الدكتور...تلاقي العيادة فاضية والدور عليك على طول.

انك تلحق الاتوبيس او المواصلة اللى محتاجها في اخر لحظة...اندفاع الادرينالين في اللحظة دي لا يضاهى بجد :D

زمان بقى انك تشتري شريط عمرو دياب ليلة ما ينزل السوق...وتبقى برنس كده اول واحد في اصحابك يشتريه ويسمعه...انتصار انتصار مش تهريج!
زمااااااااااااااان جدا...في الازمنة السحيقة...ايام الكلية...كنت باشتري مجلات اجنبي وكانت الكمية قليلة اوي اللى بتنزل السوق...كنت انزل ادور في المكتبات واكشاك الجرايد عليها في نفس يوم طرحها في السوق من بدري جدا...واتوتر لو اول كشك خلصت من عنده! واحس بانتصار الفاتحين لما اجيبها وتبقى في حضني!! تفاهة والله!
لما تتعزمى في رمضان! حاجة جميلة جدا والله بجد...اعزمونى في رمضان يا جماعة انا بانبسط اوي...انشالله على كشري!
 تقعد على النت وتكون - سبحان الله - الشبكة سريعة جدا وكل حاجة بتفتح في كسر من الثانية.
لما تصحى الصبح ونفسك في كوباية قهوة وانت متاكد ان البن خلص...وتلاقي مراتك او والدتك اشترت وانت نايم...انا شخصيا انبسطت وانا بتخيل الموقف ده!
لما اولادك يقرروا انهم مش عايزين يتغدوا النهاردة...وهاياكلوا جبنة! يااااه...والله الاولاد دول متربيين حقيقي!
لما المانيكير يظبط معاكى ومفيش ولا ضفر يتعك في شعرك او في المخدة! 
حديثي الزواج لما تفتكر ان في حلة على النار قبل ما تشيط! 
الاولاد يناموا بدري!! باحس ان في حياة اخرى بعد ما الاطفال تنام...الست خصوصا بتشعر انها رجعت بني ادم طبيعي مش متكهرب! 
يصحوا الصبح للمدرسة من غير نفاذ صبر الاب والام!! من غير صريخ وفضايح! 
برضه لما الاولاد يعملوا الواجبات من غير وجع قلب ونكد!! (ايام الدراسة كلها نكد عامة) 
لما عيل من دول ينزل حمام السباحة ومايطلبش يدخل الحمام!!! احنا بس بنخاف يكونوا اتصرفوا في المياة!
تلحقي عروض كويسة في السوبر ماركت
الكبيرة والشديدة بقى: يكون معاكم فلوس ايام الاوكازيون والخصومات!! 
 الانتصارات الصغيرة كتيرة اوي ... نصيحتى حاول الحفاظ على قدر منها...بتقلل من حدَة الحياة :)

ريم اسامة

لينك المدونة على الفيسبوك

https://www.facebook.com/groups/329904227056535/