الفقاقيع!

الماء الدافء يتدفق في انسياب...فقاقيع الصابون ترقص وتتمايل على سطح الماء... امرر اصابعي بينها واشعر بها تنزلق بين اصابعي بخفة ورشاقة. رائحة الصابون طاغية على اي رائحة اخرى.اقلب الماء بيدي يمينا وشمالا وتنجرف الفاقيع جنبا...ثم اخذ اللوفة واغمرها بالصابون وادعك وادعك وادعك...ومرة ورا التانية حتى احس بالرضا بمستوى النضافة...وامد يدي لالتقط ما وقع منى...وابحث...وابحث باصابعي...ويحدث ما كنت اخشاه....اجرح يدي!!

يخرب بيت المواعين والسكاكين اللى مستخبيه في الاحواض المسدودة!! يا رب المواعين تموت!!!

ريم اسامة
https://www.facebook.com/groups/329904227056535/

هابص بطرف عيني بس!

"ايه اللى جابه هنا ده؟" قلت في سري وكلي ندم انى حضرت الحفلة المهببة دي..."هوا كل مرة كده يا ربي! مفيش مرة اترحم فيها؟"

عملت نفسي مش شايفاه...وحتى لما اعدي قدامه اعمل نفسي مش واخدة بالي...وبعدين ببقى مش قادرة نفسي ابص عليه...طيب هابص بطرف عيني بس!!...فضميري الحقير يقولي "ما بلاش ضعف بقى" وعقلي يقولي "مفيش فايدة فيكي!! مش بتتعلمي ابدا"

واحاول اثبت لضميري وعقلي انى اقوى من اي اغراء وانى اقوى من اي حاجة ومن اي ذكريات اليمة عدت بيا.

والاقيه مع الكل...كل ما ابص في حتة الاقيه قدامى مفيش فايدة...انا بفكر فعلا امشي من الحفلة دي واللى يزعل يتفلق...انا تعبت!

كل ما اشوفه واحن له عقلي يفكرني باثاره على جسمي!! وضميري يفكرني بالاكتئاب الحاد اللى تسبب لي فيه..ومازلت لم اشفى منه بعد!!

وبعدين برضه مقدرش امسك نفسي واروح اعدي من قدامه وابص بطرف عيني ال يعنى مش واخدة بالي...وبعدين ابص الناحية التانية على اي حاجة علشان اشتت تركيزي...بس على مييين!!!

وبعد جدال بين رغبتي وبين عقلي وضميري قررت اديهم بالشلوت...ورحت له...ومديت ايدي...بس كبريائي وجعنى فرجعت بسرعة ولا اكنى مديت ايدي...لو اي حد خد باله كان هايقول عليا عبيطة اكيد!!

وخدت لفة كمان في الحفلة يمكن انساه...بس للاسف ابدا! 

وبكل ثقة...وبكل تصميم...وبكل شموخ رحت له...مديت ايدي تانى...بس المرة دي ايد قوية مش مرعوشة...وخدته...وكلته كله!!

تبا لك ايها الجاتوه الشيكولاته!!! منك لله انت والكرش اللى سببتهولي والاكتئاب بسبب الكرش اللى انت السبب فيه!! ليه في ايد كل الناس؟ ها؟ ايه اللى هايحصل لما اكرهك مش عارفة!! بالعكس...لو كرهتك هاحب نفسي اكتر...وكل ذكرياتي الاليمة المرتبطة بيك من ضعف اتجاهك هاتتقلب لقوة وصلابة!  هاحب ارادتي انى اكره اكتر حاجة بحبها!!!

جتك القرف وانت احلى طعم دقته في حياتي!!

ريم اسامة 

https://www.facebook.com/groups/329904227056535/

 

خلي التعليم لاصحابه

المدارس والتقديم والمقابلات والمصاريف ووو...حالة عامة من التوتر والجو المكهرب مالية بيوت اللى عندهم اطفال داخلين المدرسة السنة دي.

النظام اتغير اوي عن زمان...زمان كنا بنشوف المدرسة اول يوم دراسة! 

دلوقتي بقى في application يتملي ومعلومات كاملة عن الطفل والام والاب ويترسم خريطة لخط سير الباص ويتدفع المعلوم (طبعا امال هوا معمول ليه الابليكيشن ده) ويتحدد ميعاد مقابلة مع الطفل وبعد كده مقابلة مع الاب والام والطفل وفي الاخر حد يتصل بيهم في خلال اسبوع مثلا او اسبوعين يبلغهم ان الباشمهندس اتقفبل في المدرسة ... ولو مجاش التليفون الكريم يبقى الولد اترفض!

طبعا مش محتاجة اقول ان المدارس كلها بقت مشاريع تجارية....الاول ندفع علشان ناخد استمارة بيانات نملاها وبعد كده لو الطفل اتقبل الفلوس بتدفع بالكامل في خلال اسبوعين (الكلام ده بيكون في مارس ودخول المدارس في سبتمبر!!!) وكمان بفلوس الباص! ولو فكرت تسحب الفلوس بيتخصم منك نسبة! (مع انك مخدتش حاجة منهم علشان يتخصم) بس هوا كده!

ولو الطفل متقبلش ملكش الحق انك اصلا تاخد فلوس الاستمارة (والمبلغ بيتراوح بين 200 ال 700) وغير ان في مدارس بتشترط اول سنة ان كل طفل يتدفع له "donation" - تبرع (اصل كل حاجة لازم تتقال بالانجليزي!!! ما علينا) ومبلغ التبرع ده بيكون من غير وصل ولو فكرت تاخد فلوسك علشان ابنك اتقبل في مدرسة تانية عجباك اكتر...التبرع ده راح عليك....علما بان التبرع بيتدفع اول حاجة قبل مصاريف المدرسة وبيكون مبلغ ما بين 4الاف و7الاف!

المقابلة اللى بتتعمل مع الولد بتكون اختبار قدرات ذهنية ولغوية ودينية! (المفروض الطفل بيدخل المدرسة علشان يتعلم...بس هما بيشترطوا يكون عارف معلومات لا يستهان بها وانجليزي وقران واغاني ويلون ويرسم ويحل puzzles  وكده)...طيب معلش هوا جاي ليه؟ ما يدخل اولى ابتدائي على طول بلا وجع قلب!! 

الطفل مطلوب منه يعرف الاتي: الالوان الاساسية كلها بالانجليزي - اسم الفاكهة والخضار والحيوانات بالانجليزي - مع شوية اعضاء بسيطة كده زي ايد ورجل وكل محتويات الراس! ويعرف الارقام ويعد كويس...ويلون جوا الخط مش بره ومش شخبطة! ومفيش مانع انه يحل تمرين او اتنين توصيل واختلافات...وطبعا اجابات نموذجية لشوية اسئلة زي ازيك؟ اسمك ايه؟ عندك كام سنة؟ (انجليزي طبعا)

مش الحاجات دي كلها هاتتاخد برضه في KG؟ يعنى هايدخل المدرسة يراجع معلوماته بس؟ حاجة غريبة فعلا!!
وحاليا المدارس بتطلب ان يكون الاب والام كمان عارفين انجليزي كويس! وفي مقابلة للاب والام علشان المظهر واللغة!! (ده ولا اللى رايحين نخطب عروسة! المدارس بتعتبر انها علاقة نسب!)

وبما ان هوا ده المستوى حاليا في التعليم او هوا ده المطلوب من الطفل...الاهل بيدخلوا عيالهم حضانات Academic يعنى تعليمية مش مجرد مكان يروحه الطفل يلعب لحد ما امه ترجع من الشغل! الام حتى لو قاعدة في البيت لازم الطفل يروح حضانة وتدفع دم قلبها ومصاريف اكتر من المدرسة شخصيا علشان يتقبل في مدرسة. الا بقى لو كانت الام اصلا بتشتغل في مدرسة وكده كده هاتاخد عيالها معاها كوسة وكمان بتاخد تخفيض مصاريف اكتر من الربع (واحيانا التلت) ومش بتدفع مصاريف الباص ولو مفيش مكان مجانى للطفل في الاتوبيس هاتشيله على حجرها بما انها كده كده بتركب!!  كم انت محظوظة ايتها الميس!! (الحقد الدفين ستايل - لا بس برضه يغور التدريس) 

نيجي بقى لنقطة تانية خالص....المدارس دلوقتي بقت مصدر فخر وفشخرة!! بما ان المدارس بقت ناشيونال وانترناشيونال (امريكي وبريطانى والمانى)...المدارس دي السنة بحوالي تلاتين الف (وعشرة في المية زيادة كل سنة - بس العشرة في المية دي تنطبق على كل المدارس الخاصة في مصر)...تلاقي اللى بيسئل "ابنك في مدرسة ايه؟"..."ابن القرعة سكول"..."ناشيونال ولا انترناشيونال؟" فتردي انها ناشيونال...وهنا احيانا النظرة بتختلف تمامااا..."اصل ابني في مدرسة ابن العبيطة انترناشيونال!! بس شاطرة انتى...انا لو يرجع بيا الزمن مدخلش ابني بالفلوس دي كلها كي جي....حوشي فلوسك لحد ما يدخل ثانوي وحولي له!! بس انا كنت عايزة له احسن حاجة في الدنيا"

وبرضه اسم المدرسة بيحدد التعامل احيانا - او يحدد موقفك من الاعراب! مدرسة شيك وغالية ولا حاجة كده باتنين جنيه ونص وتحت السلم! 

المدارس مصاريفها كتير اوي...وطبعا احنا جيل زي الفل ومش بنعرف نحوش...فالحل بيكون جمعية او قرض او بيع دهب علشان نحل الازمة بسرعة...المشكلة كلها بتكون في اول سنة علشان الفلوس بتدفع لكشة على بعضها وقبل الدراسة بكتير وغير التبرع (لو في) وبعد كده مش مشكلة علشان المصاريف بتدفع على اقساط.

يا امهات لو ابنك او بنتك عمرهم 3 سنين...ارجوكي الحقي دخليهم حضانة علشان يلحقوا يتعلموا حاجة...مش خسارة ابدا الفلوس بتاعة الحضانة دي ومش فلوس في الارض ولا حاجة...انتى لما ينشف ريقك كده ولسانك يتدلل من التحفيظ فيهم مش هايحفظوا بسرعة الحضانة ابدا...الطفل بيتلقى من الغريب اسرع من الام...وغير انهم متخصصين ولهم اساليب يخلوا الطفل يفهم ويحفظ ... الام اهم حاجة انها تكون قدوة قدام اولادها في السلوك والاخلاق وتكون ضهر ليهم وتشجع وتسقف وتدفعهم للامام..بس التعليم ليه ناس محترفة...الحضانة بتوفر لك تعليم عربي وانجليزي ودين وكمان سلوكيات صعب تجبري ابنك عليها...ممكن تعملي كل حاجة في قدرتك وتكون برضه غير كافية انه يدخل مدرسة كويسة...ده غير انه في الحضانة بيكون اتعود خلاص على الالتزام والحصص (حتى لو على مستوى اقل من المدرسة) بس الطفل بالطريقة دي مش بيجيله صدمة من المدرسة ابدا...رأفة باطفالك دخليهم حضانة واهليهم نفسيا واكاديميا للمستوى الاعلى  وفري مجهودك للمتابعة والتشجيع وخلي التعليم لاصحابه...لا يكلف الله نفسا الا وسعها!!

ريم اسامة

https://www.facebook.com/groups/329904227056535/

يخرب بيت الدايت!

مين فينا محاولش يعمل دايت ولو في فترة من حياته؟ الاجابة: مفيش!

دايت او رجيم هو نظام غذائي مش ضروري يكون الهدف منه التخسيس...ممكن للتخن! ايوة النظام الغذائي الخاص بالنحافة هو دايت برضه...نظام الرياضيين...وهكذا...بس المعنى الدارج للدايت هو نظام غذائي للتخسيس! الله يخرب بيت الدايت على بيت التخن في يوم واحد حزين!

الانسان مش بيعجبه حاله لحد ما يسوء اكتر وبعد كده يتحسر على اللى كان فيه اصلا (اللى مكنش عاجبه) ويجي اللى مش عاجبه اكتر فيتحسر تانى...وهكذا! لحد ما يوصل القاع!!!

الستات غلابة جدا في موضوع التخن ده بجد...الرجالة بتلوم الست اللى شكلها بيتغير من بنت رشيقة كلها حيوية واشراق ولبس على الموضة وشعر بيتغير شكله اكتر ما بتغير الشراب...الى عبد الصمد بتاع الانابيب! بجد الرجالة مش مقدرين ولا فهمين العبئ النفسي اللى هما بيسلطوه علينا اكتر ما احنا اصلا متسلط علينا تحكمات المجتمع الذكوري السخيف! الست لازم تكون بشوشة علشان مايزهقش منها جوزها...ام ممتازة (ويفضل تكون ام واب معجونين سوا)...طباخة ماهرة واشكال وانواع كل يوم علشان بسلامته مايزهقش...الغسيل يطلع فله شمعة منورة ويفضل تكوي في البيت علشان المكوجي الجحش بيشيط الهدوم وبيخلي الياقات تجرب...وتكون هادية وصوتها واطي ويفضل خارسة...لازم الشقة كلها تبقى نضيفة ومتروقة وجاهزة لاستقبال اي ضيف مفاجئ (حوش الضيوف حوش)...الام لازم تعود العيال تلعب في الاوضة الخاصة بهم فقط لا غير...اللى يخرج بره الاوضة مايلعبش بحاجة (اللى مش عاجبه يلعب في مناخيره)...الست لازم تفضل مبتسمة طول الوقت بغض النظر عن العكننة اليومية والابدية مع الشغل العادي وشغل البيت والعيال والمذاكرة ومعاه هو شخصيا ومع حماتها (الحماة ده اوبشن - مش شرط)....وفوق كل ده لازم تحافظ على الشياكة والاناقة بره البيت وجوا...وتسيب شعرها وتسرحه وتعمله الوان وتلبس خلخال وحلقان اشكال funky وبرفان ومكياج ومانيكير واكسسوارات (الرجل اثبت ان خياله واسع...يوصل لمرحلة الخيال العلمي!!) هانسيب الشعر اللى هايتشد ويتمسح فيه الطبيخ (وحاجات تانية اقرف اكتبها) والحلق لو كبير هايتشد من ودنها لو في اطفال صغيرة..والخلخال كمان...الاكسسوارات هاتبقى لعبة ومش هاتلاقيها ده لو محدش خنقها من ضهرها بالسلسلة او العقد اللى هاتلبسه!!...البرفان والمواعين عامة don't mix!  والمانيكير هايتقشر من السبب نفسه! (هاخصص مقالة للمواعين مخصوص واكيد هايبقى عنوانها يا رب المواعين تموت)...انا كده بخرج بره الموضوع..نرجع للدايت!

طبيعي جدا الست بتتخن من الحمل والخلفة...وفعلا صعب صعب صعب الواحدة تخس بعد ما تولد...الراجل اسهل حاجة عنده "كلي سلاطة!"...كلمة كلي سلاطة دي مستفززززة اوي! او يقولها مشوي وسلاطة وهاتخسي! يا سلام؟ مكنش حد غلب..وعلى كده انت مخلي كرشك في مكانه ليه ومحاولتش تخس بدل الموضوع هايف للدرجة دي!! بعد الولادة عامة الست بيكون عندها احباط مر...وطبعا مش هاننكر دور المجتمع "اللطشيف" في تشكيكه لقدراتها كأم على طول الخط...واول عشر شهور (محدش يقولي تلاته علشان مانزعلش من بعض..انا مخلفة مرتين وعارفة انهم سنة اصلا مش عشر شهور بس مش عايزة احبط الستات!!) الطفل مش بيظبط نومه اطلاقا ولا حتى الست بتكون فاهمة الفسل ده عايز ايه!! زن خرافي ودكاترة كتير وعدم نوم مع الاشغال الشاقة...كل ده بيخليها كارهة نفسها!! وساعات بيكون الحاجة الوحيدة اللى بتخليها تفك شوية عن نفسها بتكون الاكل! بما انه احيانا بيكون المتعة الوحيدة المتوفرة! (طبعا نفس المجتمع الذكوري البايخ هايقول العيال نعمة - ربنا يخليهم...بس خيالكوا المريض على جنب دلوقتي مش وقت فلسفة!)..فالست تخرج من الولادة تخينة...تاكل من الاحباط فتتخن اكتر وطبعا مش بتتحرك كتير ولا في مجال تعمل رياضة...زود على ده الحالة العامة من الرهرطة والتهدل من اثر الحمل فبيعمل اكتئاب واحلى علاج للاكتئاب هو الشيكولاته والسكريات! الشيكولاته بترفع الحالة المعنوية الى حد كبير وهي اكسير السعادة!

سيبنا من الحمل والولادة...الدايت من اكتر الحاجات مملة اللى ممكن الانسان يعملها...تصحى تاكل بيضة مسلوقة!! مع شاي بلبن منزوع الدسم من غير سكر (ما تقول كوباية جاز احسن!)...والغدا سلاطة ولحوم مشوية...والعشا زبادي منزوع الدسم وخيار!! 

ما نروح ننتحر بقى! من وجهة نظري اللى يعمل رجيم ويخس بلا اي مناقشة هو انسان ذو ارادة قوية! مليش دعوة بالناس اللى مش بتحب اصلا الاكل ولا بتقدره (يا بختكوا طبعا) بس انا بتكلم عن الناس العادية...صعب! الرجيم صعب! ورزل اوي كمان...وفي شوية حيل نفسية تتبع من باب التشجيع ومنها صورة قديمة حلوة وانت رفيع...هدوم شيك وغالية بس ضيقة...فرح والصور بالعبيط طبعا! او ان جوزك هايتجوز عليكي يا فوزية!! الراجل مفيش عنده اي مشكلة انه في الرايحه والجاية يلئح كلام عن مراته والكرش المدلدل وضهرها اللى كله كتل ووسطها اللى مش باين له حدود واللغد المريح على صدرها لدرجة ان مبقاش لها رقبة! والرجلين اللى شكل اسياخ الشاورما قبل ما يتاخد منها حاجة...والدراع اللى شكل الفخدة البتلو و...و...و..ماشاء الله الراجل عنده ثراء في اللغة والتشبيهات...المتنبي في زمانه!! ولو هيا نطقت يقولها الراجل عيبه جيبه والست عيبها محيط وسطها الكبير!! (امك تخينة اوي يا ممتاز - مسرحية الدخول بالملابس الرسمية ستايل!) 

ومفيش اي مانع لما تروحي لاصحابك "انتى تخنتي اوي كده ليه؟؟؟ حرام عليكي ده انتى لسه صغيرة"..يعنى الست معندهاش مراية في البيت وشايفة؟ الاسانسير مفيهوش مراية هاتشوف نفسها ولو صدفة؟ ما تبطلوا رخامة!

ناس كتير اوي بتحكم على الست التخينة او المليانة انها ملطشة! وبلا شخصية وغير واثقة من نفسها...على فكرة هيا مش واثقة من نفسها علشان نظرتكم لها بتتغير على حسب شكلها الخارجي وده قمة السطحية! ما الملك فاروق كان ماشاء الله...حاجة كده محترمة ومعتبرة يعنى...حد قدر يقول عليه حاجة؟ لا طبعا.

لاحظت حاجة...الانسان اللى جسمه ضخم بيكون اكتر واحد بيضحك على نفسه ويتريق عليها (من باب بيدي لا بيد عمرو) ولو الانسان ده خس اوي السلوك ده بيتغير تماما للعكس! مايستحملش حد يفكره انه كان تخين وخس! ولا بيتقبل انتقاد لاي حاجة تخص مظهره ولبسه وشكل جسمه...مع ان شكله بقى حلو...بس حاجة نفسيه كده! حد لاحظ غيري؟ بالتأكيد هناك علاقة بين التغيير في الشكل والسلوك.

الاخصائيين اجمعوا ان التقليل من الوزن ببطئ افضل مائة مرة من السرعة والرجيم الكيميائي والعمليات الجراحية والتجميلية للوصول للقوام المنشود! وعلشان الجسم يفضل زي ماهو ضروري تغيير عادات الاكل بصفة دائمة...يعنى مفيش بقى نقنقة وخطف ولقمة من هنا على بؤ من هنا على معلقة من هنا...الوجبات تلاته اهمهم الافطار واقلهم اهمية العشا...وفاكهة بعد الغدا بساعتين!! ملل صح؟ 

انا معاكوا انه ملل!

التفاح والخيار والسلاطة والمشوي والزبادي والجبنة القريش والكمترى والجريب فروت وشوربة الكرنب والشاي الاخضر والسكر الدايت والمياه الدافيه بليمون...فلتذهبوا للجحيم!!!!

ريم اسامة

https://www.facebook.com/groups/329904227056535/

هابي فالانتاين!!

اول ما العيال يناموا ليلة 13 فبراير تروحي لجوزك وفاتحة بؤك بكل هبل:

- "كل سنة وانت طيب يا حبيبي"

- "وانت طيبة - بس ايه المناسبة؟"

-"بكرة الفالنتاين"

- "...."

-"...."

انتهى الحوار!! الفالنتاين زمان قبل الجواز كان ليه طعم مختلف طبعا - وقبل الخطوبة كان ليه طعم غير برضه بما ان العين بصيرة والايد قصيرة. ماما والله كانت بتجيبلي انا واختى هدايا في الفالنتاين لما كبرنا وقبل ما نتخطب علشان مانحقدش على حد ونرشقه عين ما يطلع منها!! ست حكيمة مفيش كلام!

اول ما بنتخطب بقى بنفرح اووووووي اننا مخطوبين - فقط لتعويض احساس قديم بالنقص بعيد عنكوا....بنكون مستنيين الورد والدبدوب او الاباجورة الحمرا او المخدة القطيفة الرخيصة اللى على شكل قلب وطبعا لونها احمر ومكتوب عليها عبارة لزجة اوالمج اللى عليهم his - her او المجات اللى بترشق في بعض كده ال يعنى بيكملوا بعض - او خناقة بلالين هيليام. بنكون مستنيين الهدية اللى متمرمطة جليتر مش بيطلع من الهدوم ولا الشعر ولا الضوافر غير بعد ايام! 

الرجالة على فكرة ملهاش في الحوار ده ... لو جبتي له كيس شرابات هايفرح بيه والله بس تبعدي خالص عن الجليتر اللى بيبهدل عربيته وهدومه وعلشان لما حد بيلاحظه بيستلمه الليلة بطولها تريقة (ولا استثناء للامهات). من قبل اليوم المنشود كنا بننزل نجيب "شيرز" احمر لزوم المناسبة مع بوت احمر وطارحة او توكا حمرا واكسسوارات لونها احمر وكلها قلوب ومانيكير احمر....كله احمر في احمر وغالبا بيكون شكلنا غبي ومراهق ومفقوس! التعويض بيكون شديد معلش!

وبنكون على استعداد لانطلاق ابتسامة عرض الشارع لدرجة تشقق الوجه اول ما نشوف خطيبنا او لما نشوف الهدية اللى لازم تكون ملفوفة لفة كيلو الكباب! ولو جاب ورد يبقى مش بخيل وبيحبك ولو مجبش يبقى مش بيفهم في الذوق بس ممكن يتنضف مش مشكلة بس برضه ميزة انه مجبش ورد علشان ده معناه انه ملوش تجارب قبل كده ومايعرفش ايه اللى بيتجاب في المنسابة دي (وطبعا ده غباء مطلق منك!)

 بعد الخروجة والعشوة (ما لازم تتعشي امال انتى خارجة ليه) وتتمشوا شوية مع رشق الصوابع اللى هوا بيكرهها بس بيوافق علشان ماتزعليش وبيحاول قدر الامكان ماينتبهش لصوابعه اللى نمَلت ولا ياخد باله من نظرات الرجالة التانية اللى كلها بتصرخ وبتقوله "انت سيس اوي ياض على فكرة" وبيعمل مش واخد باله برضه ان الخاتم بتاعك هايدمر له العقلة التانية من صباعه!!!

وبعد ما يوصلك البيت تمسكي انتى التليفون طبعا تقولي لانتيمتك اخر الاخبار وماتنسيش طبعا التفاصيل الغريبة دي - اللى لو الرجالة سمعونا بنقولها هايحدف الدبلة في وشنا....وبعد كده هايتف وراها!

- جاب لي برفان

- نوعه كذا 

-لالا كبير...100 مل

- ريحته حلوة الظاهر هوا بيحب الفل (اصلا هوا مشمش الريحة وجابه علشان سعره كان يناسب محفظته)

- ملفوف في ورق كوريشة لونين - ابيض واحمر وعليه شريطة لونها فضي - ومن جوا البرفان نفسه ملفوف في حاجة زي القطن كده وفيها جليتر - بصى انا صورت الهدية قبل ما افتحها هابعت لك الصورة

- جاب لي ورد - 12 وردة حمر في ورق كوريشة اصفر

- انا عارفة ان الاصفر يعني غيرة - تفتكري بيغير عليا بجد ولا بيضحك عليا ؟؟ (والله العظيم الراجل ساب لبتاع الورد فلوس وراح استلمه بعد ما قاله عايز بوكيه بكذا - الجنيه هوا اللى بيتكلم مش اللون يا حبايبي - بلاش تستنتجي اوي كده)

- رحنا كلنا في المكان الفلاني وهوا خد طبق كذا وانا خدت كذا وشربنا حاجة ساقعة مع الاكل - ده طلب طبقين سلاطة مش واحد بس...يابنتى بقولك كريم جدااااااا (!!! ما طبيعي يجيب طبقين...امال هاتخمسوا سوا في طبق واحد؟؟ ايه شغل ثانوي ده؟)

- انا كنت لابسة بنطلون سكيني اسود وعليه بلوفر كاشمير احمر (اغلى حاجة في المحل جابتها) وبوت احمر فيه فرو اسود وطارحتين احمر واسود معمولين سبانيش - كنت شيك موووووت - اتهبل! (هوا اتخض مش اتهبل!)

-هوا كان لابس جينز عادي وبلوفر بيج! عادي انتى عارفة الرجالة ملهمش في الdress code! (الحقيقة الرجالة غالبا ملهمش في الهيافة بتاعتنا دي!)

ونفضل طووول الليل نفتح البرفان نشم في الغطا ونحطه تانى وكل ما يجي يزور خطيبته او يخرج معاها لازم تحطه علشان يعرف انها معجبة ومقدرة الهدية بتاعته (مع انه بيتخنق من الريحة دي ونفسه انها تغيرها وزهق من نفس البرفان بتاع كل مررررة - هيا ايه مبتزهقش! ما طبعا لانه اصلا مايعرفش هوا كان جايب ايه!!!)

هوا بقى في اليوم ده بعد ما يوصلك البيت ويخلص المهمة والواجب بتاعه يروح على القهوة واصحابه يسئلوه برخامة "عملت ايه يا برنز؟" يقولهم "عادي يا عم - ماهو لازم كده علشان المركب تمشي! فين الشيشة يا عم ولا هانقضيها سجاير برضه؟" !!!

عزيزتي البنت او المخطوبة او المتزوجة - كل عيد فاشل حب وانتى طيبة يا اوحي! وبلاش كاشمير المرة اللى جاية ... كويس اوي لو جبتي جراب موبايل احمر احتفالا بالمناسبة!! علشان الرجالة بتحتفل بيه فقط علشان احنا مانزعلش


http://www.facebook.com/groups/329904227056535/
ريم اسامة

جمعية؟ اقبض الاول!

الجمعيات اختراع مصري عبقري...تكافل اجتماعي بلا اهانة او التقليل من شأن الواحد...وقابل للتطبيق في اي مجتمع او في اي مكان عمل او حتى بين الاصدقاء ايا كانت اعمارهم وايا كان المبلغ! 

كنت زمان برفض تماما ادخل الجمعيات من منطلق "عيب" (معرفش ليه)...وانى احسس حد انى هاحتاج مبلغ على بعضه ده يقلل منى وشوية كلام عبيط كده...لحد ما واحدة دخلتني جمعية غصب عنى وكنت ساعتها لسه صغيرة واتكسفت وقالت لي هاخليكي تحوشي وجربي وبتاع...فدخلت احراجا منها مش اكتر وهيا عملت فيا فصل بارد وبعد ما اتفقنا على دوري رميتني لاخر دور من غير حتى ما تستأذن او تبلغني!! ولما قلت لها احنا متفقين من الاول ردت "انتى مش متجوزة ومش محتاجاها...غيرك عنده عيال ومحتاجها اكتر منك!!"

كنت لسه بتكسف ارد على الناس!!! ومكنتش بعرف اخد حقي! 

كرهوني في الجمعيات وكنت على اقتناع ان كلها تلبيس في الحيط وبس! وبعد فترة قررت اجرب موضوع الجمعيات ده تانى بس انا اللى امسكها! بدأت بمبلغ صغير (خمسين جنيه) والموضوع عجبني....واصبح ادمان :D

حاليا انا ماسكة خمس جمعيات وبرتب للسادسه في وقت واحد!! الحمد لله الناس بتثق فيا وانا بحاول قدر المستطاع تفادي الاخطاء الدارجة في مجتمع الجمعيات. في شوية حاجات بايخة بتحصل من منظم الجمعية وهي:

- اللخبطة في الادوار ووعد اكتر من شخص بدور في الاول وفي الاخر بياخده لنفسه!!!

- تنقيط الفلوس! مش بيقبضوا المبلغ على بعضه وممكن ساعات تأجيل جزء من المبلغ للشهر اللى بعده !

- احراج المشترك في الجمعية قدام باقي الناس ويعرف الكل ان فلان هبر مبلغ محترم!

- نشر معلومات عن المشتركين بها وبيدفعوا كام وهايقبضوا كام وامتى!!!

- فضح المتأخر عن السداد قدام اصحابه!! (الحركة البيئة دي بتحصل كتير اوي)

- ترحيل الادوار بلا استأذان!

- اختيار الادوار طبقا للقرعة! (بتحصل في الجمعيات الكبيرة)

وبالتالي تفاديت كل المشاكل دي والحمد لله نجحت في ده الى الان...مش بوعد بحاجة مقدرش اوفي بيها....والوضوح اهم حاجة في الموضوع كله...بس طبعا منظم الجمعية برضه بيواجه شوية مشاكل:

- اقبض الاول!! الجملة دي بسمعها من معظم الناس! وبجد بيزعلوا لما مش بياخدوا اول دور او على الاقل تانى دور!! الجمعية فيها دور واحد بس "الاول" هاضاعفه ازاي بس؟!!...وبعدين يبدأ التفاوض "هادخل باكتر من دور بس شرط اخد الاولانى"...ولما الموضوع بيكون مستعصى لانى اكون فعلا وعدت حد باول دور "هاخد الاخير كمان او ارميني في اي دور صعب! بس الاول اخده انا!!" (اصحابي حبايبي هايفتكروا انى بتريق عليهم...بس والله ابدا انا ببقى عايزة ارضيكم!)

- "مين واخد الاول والتانى؟" بجد ابوخ سؤال بيقابلني لما يكونوا عارفين بعض بشكل شخصي!

- "اتصرفي! انا هاخد اول تلات ادوار!!" يا حبايبي الناس كلها محتاجة فلوس حالا اعمل ايه بس؟ في مرة كان في ناس فعلا محتاجين الفلوس بسرعة فعملت اكتر من جمعية في وقت واحد والتلاته خدوا اول قبض...كنت سعيدة جدا بنفسي :D

- من اكتر المواقف البايخة والمحرجة اللى ممكن اقابلها هي ان حد ينسحب من الجمعية في النص ويبقى عايز فلوسه اللى دفعها كمان! المفروض اتصرف بقى واعمل قرد علشان ارجع الفلوس دي! (الناس دي طبعا بلاك ليست ومش بيدخلوا تانى)

- عايز الفلوس اتنين في الشهر!! طيب هالحق اجمعها امتى والنبي والناس بتقبض يوم واحد!! 

- معلش مش هاينفع ادفع الشهر ده - هاديكي الدورين الشهر اللى جاي!! (نفس البلاك ليست!)

انا بكتب الموضوع ده علشان لو حد يحب ينظم جمعية او ننشر "ثقافة الجمعيات" لانها اكيد احسن من القروض والفيزا او الاقتراض فهاقولكم شوية افكار ليها

- المعتاد الجمعية بتكون عشرة اشهر..كل شهر دور...واحيانا الدور بيتقسم نصفين.

- في حالة الجمعيات الكبيرة (عشرين شهر او اكثر) المتعارف عليه ان اللى يقبض الاول بياخد نص الدور الاول مع نص الدور الاخير...والتانى بياخد نص التانى مع نص قبل الاخير...او يدخل بدورين الاول والاخير مثلا...الخ!

- من الافكار الكويسة مراعاة الظروف الاجتماعية يعنى مثلا المدارس...عمليات جراحية...فرح...شبكة...جهاز...مش هايحصل حاجة لما تقدر الشخص المزنوق ده و متستغلش احتياجه للفلوس (ومفيش مانع التغاضى عن شروط الجمعيات الكبيرة وتديله دور كبير على بعضه في الاول)...الناس لبعضها يا اخي!

- زميلتي قالت لي الجمعيات الكبيرة خطيرة ومش مضمونة لان الاعمار بيد الله ومحدش ضامن كل الناس اللى دخلوها يعيشوا سنتين يدفعوا!! و لو حد خد الفلوس ومدفعش تانى!! وانها مرة خدت اول دور في واحدة كبيرة ومضت على ورقة انها استلمتها!! (علشان لو فكرت تفلسع!)

- اهم حاجة محدش يعرف مين داخل معاك وداخل بنسبة قد ايه وهايقبض مبلغ كام وامتى! دي اسرار ناس عيب! هما عايزين يقولوا لبعض براحتهم...بلاش تيجي منك!

- بلاش توعدي حد بحاجة وتخلفي وعدك...لو وعدتي دور في الاول لازم تلتزمى به.

- مش اي حد معدى توافقي يدخل جمعية معاكي...دي فلوس ناس!! اللى هايجي عليه الدور ملوش دعوة بسوء اختياراتك! كده هاتتدبسي انتى في دفع المبلغ كاملا وفي ميعاده!

- اهم حاجة الالتزام واحترام الميعاد المحدد للقبض ومراعاة اكتمال المبلغ طبعا!

حد عايز يدخل جمعية؟ :)

ريم اسامة

https://www.facebook.com/groups/329904227056535/

الانشكاح هو

الانشكاح هو حالة بين الفرحة العارمة والانتخة والشبع والانتصار! لا يصنف انه مشاعر ولا عواطف ولكنه احساس عالي اووووي :)
الانشكاح هو: 
- الاستلقاء على شيزلونج على البحر تحت شمسية في هدووووء
- كوباية شاي بالنعناع المغربية 
- مج شوربة سخن على فطار رمضان في عز الشتا
- شيشة مظبوطة او سيجارة بعد ما تخلص التزاماتك مع مراتك وعيالك ومشاويرهم المملة
- تقلعي الجزمة ام كعب عالي اللى كسرت صوابعك بعد يوم طوييييل وتمشي حافية
- اكتشاف مية جنيه منسية في جيب جاكيت او شنطة
- فريق الكورة اللى بتشجعه ياخد الكاس او الدوري
- تفرسي حد بيغيظك ومايعرفش كمان يرد
- يجيلك هدية في عيد ميلادك وتكون مفيدة وكان نفسك فيها
- تدخل سينما وصدفة الكرسي اللى قدامك فاضي وتتفرج براحتك
- تكسب في اي سحب 
- تيجي اغنيتك المفضلة على الراديو وماتزهقش من الاشارة الواقفة
- مديرك يديك تقدير كويس 
- الانتخة في بيتك في مكانك المفضل على الكنبة
- الانشكاح هو حوض المطبخ من غير مواعين
- باسكيت الغسيل فااااضي (مش بتحصل طبعا بس خلينا نحلم)
- امتحانات اخر السنة تخلص وتطلع النتيجة وتكون مفرحة
- زيارة لدكتور الاسنان ويطلع التهاب بسيط ومفيش تعذيب بالة الحفر
- تصحى قبل المنبه وتكشتف ان لسه ناقص ساعتين على ميعاد الشغل وتنام في سعادة كاملة 
- اكلة دسمه في مكان شعبي (الناس اذواق)
- للبخيل هو عد الفلوس ويطبطب عليهم ويخزنهم!!
- تصلي العشا بدري وتحس انك مرتاح نفسيا 
- خروجة بعد فترة كبت نفسي شديد من العيال وابوهم والمذاكرة والبيت! اليوم ده نعيم الله في الارض!
- الحماة لما تنكد على مرات ابنها!! 
- مرات الابن لما ترد الخاذوق لحماتها! 
- الراجل لما يرد على الاتنين (امه ومراته) علشان قارفينه في عيشته!!)
- الحامل لما تولد ورجليها تفش وتلبس جزم طبيعية مش مراكب صيد!
- تدخل فيلم وتسرح معاه وتعيييش اللحظة وتخرج سعيد ومرتاح نفسيا 
- مصروف البيت يتبقى منه مبلغ اخر الشهر
- يجي لك مكافاه في الشغل مكنتش عامل حسابها 
- تخس كتير والناس تلاحظ الفرق!
- تروحي الكوافير وتغيري لون شعرك ويطلع حلو (مش اورانج لون اطباق الغسيل)
- تبيع اسهم في البورصة باضعاف ثمنها الاصلي!
- تلحقي تشيلي مشمش في الموسم بتاعه (صعب اوي على فكرة)

ربنا يزيدنا انشكاحا

ريم اسامة
https://www.facebook.com/groups/329904227056535/

العين بتاكل قبل المعدة

كابوس كل ست بيت: المواعين...هيا الكوابيس كتير الحقيقة بس المواعين دي كابوس متجدد..ليل نهار كل ايام الاسبوع في مواعين! فستات كتير بالتالي بتقنن استخدام الاطباق والمعالق والاكواب...يعنى اللى ياخد كوباية يشرب فيها يعرف مكانها علشان ماياخدش غيرها...اليوم كله بكوباية واحدة مش ناقصين قرف!...واللى يشرب شاي يغسل كوبايته مش بتاخد اي مجهود...والاطباق...ما تاكل في طبق واحد مش لازم طبق للخضار وطبق لباقي الاكل وطبق للسلاطة "انتوا كفرة؟" وفي خلال معركة الست للتحكم في سرطان الحوض (المواعين) بتقدم الاكل في الحلل! "ما الاكل هايتلخبط في البطن في الاخر..ولا هوا تعب وخلاص"

حبيبتي...مترجعيش تشتكي ان جوزك قرف منك ومن شكل الاكل معاكي!!! العين بتاكل قبل المعدة...افتحي نفسه...ماهو لما ياكل من الحلة مش هايحس ان الاكل اصلا شكله حلو (اهو بيحشي معدته ويسكت جوعه  وخلاص) وهايلاحظ كل العيوب...الملح الزايد وقعر الحلة المحروق واللحمة الملسوعة...الخ. تخيلي كده لما تقدمي الاكل زي المطاعم...هايعمل هوا ايه؟...هايشكرك! 

لو متعودين تغرفوا الاطباق في المطبخ وتاكلوها جاهزة على طول...برضه بلاش تقلبي له كله على بعض زي اكل العمًال! هاديكي شوية افكار ممكن تعجبك. لو عاملة رز يبقى هاتي سلطانية كبيرة شوية وامليها رز وحطيها فوقيها الطبق الاساسي واقلبي...هايبقى قالب ارز شكله حلو...وورقتين بقدونس فوق الوش يبقى شكلها جميل...على جنب "رصى" (رصى ها؟ مش ادلقي) صنف اللحوم وجنبهم السلاطة ومعلش تعالى على نفسك يا ستي وحطي الخضار في طبق صغير خارجي...معلش مش قضية كبيرة حتة طبق! والمعلقة والشوكة والسكينة جوا منديل سفرة (ورق)...ايه رايك؟ حلو صح؟...يا ريت تنفذي! الرجالة زهقوا مننا!

المكرونة...في طبق غويط شوية وبلاش ابوس ايدك جوانب الطبق تبقى ملحوسة صلصة...بجد شكلها وحش اوي! وفي طبق تانى حطي صنف اللحوم والسلاطة مثلا...او لو عاملة مكرونة بيضا ولحمة مفرومة حطيهم في طبق شكله حلو وحاولي قدر الامكان (لو مكرونة اسباجيتي) تلفيها وتبقى شكل الدوامة او لو مش عارفة بلاش لغوصة وخلاص! رصى الاكل بعناية علشان اللى بياكل ده انسان مش معزة! 

تانى حاجة...ارجووووكي بلاش الاطباق الميلامين والاستانليس!! انا عارفة ان الميلامين في طريقه للانقراض...طيب والاستانليس؟ مش كل حاجة في البيت لازم تكون ضد الكسر كده! اكلي العيال في اي حاجة انشالله على ضهر مجلة ولا نتيجة بس الراجل ملوش ذنب ياكل في قصعة المونة دي! وبرضه الاطفال مش هاينفع نهمل طريقة تقديم الاكل لهم علشان هايتعودوا على كده وبالاسلوب ده انتى بكل اهمال بتقتلي عندهم الذوق العام لتناول الطعام! وطبعا مع ضرورة مراعاة ان الشوكة والسكينة يكونوا من نفس الطقم! مش اي حاجة مغسولة يتاكل بيها وخلاص! بلاش ثقافة تربية المواشي! 

والكوبايات....ارمي البلاستيك اللى بتشربيه كل حاجة فيه ده! كل حاجة بلاستيك حرام عليكي يا شيخه...والنيش اللى حالفة ما تفتحيه غير لما بنتك يجيلها عريس ده! استعملي حاجاتك كلها...انبسطي بحاجاتك....وابسطي اللى معاكي...لو انتى كل يوم بتقدمي لجوزك الاكل في طبق شكله مختلف وحلو وحرفه مش مشطوف او مكسور منه فتفوتة وكوباية شيك ومنديل لون جديد...والاكل مرصوص بعناية المطاعم...تفتكري هايقولك الملح زيادة او البسلة مش مستوية كويس؟ هايقولك اه بس بطريقة مختلفة عن الاول...هاتسمعي نفس الانتقادات بس بطريقة لطيفة مش ضرب في الوش!

لما تعملي السلاطة قطعيها في اي حاجة بره وحطي عليها كل حاجة وخلاص جاهزة على الاكل...اغرفيها في سلطانية كبيرة شفافة - bowel (لا ياللى بتقولي بلاستيك...البلاستيك ده يترمي) وتحطي معلقة كبيرة لونها جديد وشكلها مختلف...هاتلاقي كل اللى على السفرة بلا تفكير بيغرفوا سلاطة وبياكلوا! انما لو حطيتيها في الطشط البلاستيك الصغير اللى اقرب لك من اصحابك ده..محدش هايقربله غير بالعافية.

حاولي تجيبي ادوات تقديم حلوة ومودرن وشكلها يفتح النفس...اه الادوات اللى بتغرفي بيها...لا يا ستي مش خسارة فيها الفلوس!

لو كل فترة جبتي لاولادك اطباق جديدة ملونة ولها اشكال مختلفة...وادوات جديدة هاياكلوا...بالعكس ممكن يكونوا مش جاعنين ومن شكل الطبق والشوكة ياكلوا...الاطفال بيحبوا يجربوا الحاجات الجديدة الملونة...تحايلي على الموقف...هاتي لهم كوبايات اشكال واحجام والوان وحاجات بشاليموه وحاجات بغطا يفتح ويقفل...هاتي لاولادك حاجات متجددة هاتلاقيهم بيشربوا العصير واللبن وبياكلوا...ومش محتاجة اقول بلاش استرخاص علشان صحتهم!

لو هاتقدمي لجوزك فاكهة...مفيش اي داعي تحطي له الثمرة وسكينة وهوا يتعامل! لو تفاحة مش هايقطعها...هاياكلها زي ما هيا كده ويرمي الحتة اللى في النص ومش بعيد يمسح ايده في الكنبة او بنطلونه! لو برتقالة مش هاياكلها اصلا! لو يوسفي ممكن يقشرها وياكلها...وبلاش تقدمي الفاكهة في اللون التانى من طشط السلاطة اياه ده وحياة عيالك يا شيخة! لو عايزة تبسطي جوزك وتخليه راضي عن الاكل وينشكح..قطعي له الفاكهة قطع صغيرة وشوكة...حتى لو مانجة...قشريها وقطعيها بدل ما ياكلها في البانيو! ولو فاكهة زي المشمش والبرقوق مش هايحصلك والله اي حاجة لو طلعتي النواة اللى جوا...لو عنب ياريت تشيليه من العنقود ويكون جاهز على التناول على طول. فكري في البني ادم الغلبان ده شوية...خلي شكل الاكل حلو علشان ينفسه تتفتح...هما اه صنف انانى ونمرود ولسانهم اطول منهم (احيانا)...بس ملهمش غيرنا وفي الاخر بيعملوا اللى احنا عايزينه برضه...فخلي لنفسك رصيد عنده يفتكرك بيه وقت الزنقة :)

افتحي نفس عائلتك بطريقة تقديم الاكل...لو عاملة فول وبيض ومقدماهم بطريقة حلوة محدش هايتضايق...ولو عاملة محشي ومقدماه في الحلة المعووجة صاحبتك ام ايد محروقة وسايحة (من زمان) وغطا مش بتاعها ومبقعة من بره من كتر الاستخدام مش هايتهافت عليه حد...حاجات بسيطة بتفرق كتير....التفاصيل مهمة احيانا!

ريم اسامة