غموض ولا غباوة؟

كتير اوي بنسمع في الافلام او بين زمايلنا في الشغل او في العيلة او نقرأ ان الراجل بيقول عن الست انها كائن صعب انه يتفهم!

وهنا يجي السؤال الجوهري: يا ترى ده غموض من الست ولا غباوة من الراجل...من موقعي هذا احب اقولكوا ان الست دي اغلب كائن في الدنيا ... دي اغلب من السنجاب!

هوا الراجل عجبه فكرة ان الست مش بتتفهم فهو محاولش اصلا انه يفهمها...محاولش يعرف هيا ليه بتتعصب بسرعة وليه بتهدا بسرعة وليه اقل حاجة بتعفرت اللى جابوها وليه بتعيط من غير سبب وليه بتتنح ساعات كده ويركبها الغباء ولا سئل نفسه انه يسئلها بجد بتفكر في ايه !

الراجل اسهل حاجة يقولها "مالك؟" بكل قرف وزهق فهيا الغلبانة المسكينة بتقول مفيش علشان لو بدات تقول اللى فاقع مرارتها هاترص له اصناف واشكال...وغالبا بيكون مفيش وقت فبتسكت وتمنى نفسها انه هايجي يوم تربطه في كرسي قدامها وتلزق اي حاجة على بؤه وتكَيل له!
يعنى مثلا من الحاجات اللى الراجل (يا عين امه) بيعترض عليها مشاوير الست وانها بتاخد للابد علشان تخلص شراء الحاجة...يعنى هيا بتجيب الحاجة من على النت بmouse click ؟ ولا بتدخل وتلف في السوبر ماركت وتشوف الاصناف اللى جنابك بتحبها انت والمزاغيد عيالك وكمان تفتكر انت قلتها "متنسيش الحاجة اللى ماما عايزاها" فتلف وتدور في المحل الزحمة وتحاسب وتفصل حاجة مامتك عن حاجتكوا وتشيل الهم التقيل ده كله وتيجي لحضرتك في العربية ...وكل اللى انت بتعمله انك قارفها رن على الموبايل وكمان اول ما هيا تدخل العربية ودراعاتها مخدلة من الشيل تزعق فيها بعزم ما فيك "ايييييه؟ سنة؟؟؟ ما طبعا انت ولا على بالك وانا ملطوع هنا في الشارع" ...طيب يا قلب مامي ما تنزل تشيل منها ولا هيا جاية على بطاقة التموين؟؟؟
ومن اللى يحرق الدم ان لو في فرح ولا مناسبة ولا عيد ميلاد...اي تجمع ولازم (المفروض يعنى) تكونوا لابسين كويس فالراجل بكل برود ينزل يعمل اي حاجة بره البيت ويسيبها لايصة بالعيال ويقولها "ساعة كده ولما ارن لك على الموبايل انزلي انتى والعيال" ويا ريت على كده وبس يا جماعة...لا ده بيضيف بكل قرف وتناكة "وياريت متلطعش زي كل مرة تحت"!! هما دول مش عياله ولا واخدهم باقي فلوس؟!
وهيا تلبًس في العيال وهما يقلعوا واللى يحبك معاه ياكل ولازم طبعا يوقع على هدومه واللى يقرر انه عايز يدخل الحمام ومحاسن الصدف يكون عنده اسهال/امساك/ترجيع/ ولا حاجة بس كيفه يعذب امه...المهم تفضل تلف وتدور وتزعق على ما تلبس العيال ...وتيجي هيا بقى تلبس يكون الموبايل بيرن وهوا مستنى تحت شايط ! 
علشان كده طلع علينا سمعة اننا مش بنحترم المواعيد ولا بنقدر الوقت! ماهو لو اليوم كان خمسين ساعة كان هايكفي الهري ده كله.
وبعدين من اللى يطير النفوخ برضه تصميمه الابدي انه يأجل اي مشوار انتى شايفاه مهم...لانه ببساطة في نظره دلع ستات...او زي ما الرجالة بيقولوا "شغل حريم" !! سوري في الكلمة بس هما اللى بيقولوا كده مش انا والله!
يعنى انتى لازم تروحي تعملي بروفة عند الخياطة...يكرهك في عيشتك ويكفر سيئاتك علشان يروح البروفة...ويسمم يومك ويطير عقلك على ما تستلمي الفستان في اخر الفيلم...وعلى ما يجي اصلا ميعاد التسليم اللى هوا يوافق يروح فيه تكون موضة الفستان راحت!
وممكن من المشاوير اللى هوا شايفها مش مهم: فرح صاحبتك/ حنة بنت خالتك/ عيد ميلاد جدتك/ اول يوم العيد عند اهلك/ نزولك تشتري هدوم لنفسك / تنزلي الكوافير ويقعد هوا بالعيال/ تشتري لبس التمرين لعيالك/ تروحي تطبعي صور في الاستوديو/ تصوري عيالك قبل ما يكبروا في نفس الاستوديو / تنزلوا تتفرجوا على تابلوهات جديدة للبيت الممل/ تشتري طقم ملايات وفوط (ما القديمة بيتمص المياه لسه)/ تشتري مقشة غير اللى ايدها اتكسرت (يعنى امهاتنا كان عندهم مقشات بايد طويلة؟ ما كله كان بيوطي) / تشتري جردل جديد للمسح (يعنى انتى هاتتعايقي بيه؟ قضى نفسك باللى عندك)/ تشتري جراب موبايل/ تشتري (لا قدر الله) مكياج....بس خلي مامته تطلب منه يوصلها كوكب بلوتو في السريع كده صد رد...هواااا تلاقيه فاضي وعلى اتم استعداد والترحيب!! (لا تخرج قبل ان تقول سبحان الله!)
مش بخل من الراجل على فكرة ... اطلاقا...هوا معندوش مانع تعملي اي حاجة من اللى فوق دول واضعاف اضعافهم...بس بعيد عن نفوخه ويا ريت تاخدي العيال معاكي...ولو مخدتيهمش توديهم لامك! طلعيه هوا بره الحسبة خااااااااااالص...ماشي يا قطة؟
نهاية الحوار ... الراجل مش عايز يتعب نفسه ويفهم الست...الراجل مبسوط انه مصدًر دماغه للهوا يعدى فيها رايح جاي بحرية !

http://www.facebook.com/groups/329904227056535/

ريم اسامة

اللهم اجعله خير

اكتر حاجة بتضايق الواحد الكوابيس - خصوصا بقى لو كان ايمان الواحد على الحركرك :)

تحلمى بحاجة سودا معدية في الحلم (او الكابوس) تفضلي باقي اليوم متشائمة وتستغفري ربنا وتفتكري كل البلاوي "السودا" اللى عملتيها في الخباثة اللى ممكن تكون هاترجع لك وتتسلى عليكي 

اكتر حاجة بحلم بيها ان عندي امتحان ومش مذاكرة حرف ولا اعرف اي حاجة عن المادة غير اسمها فقط! او الحلم الشائع عند كل الناس اننا رايحين الامتحان حافيين او بهدوم النوم او من غير هدوم :D

حلمت من يومين ان عندي امتحان تاريخ (مع انى كنت علمي مش ادبي)  وانا مفتحتش الكتاب وجيت ادور على الكتاب لقيت المادة متكونة من خمس كتب! وبعدين اول فيمتو ثانية بعد ما صحيت انا لسه مقتنعة انى هامتحن ولازم اقوم من النوم اذاكر.

برضه من الاحلام اللى بتيجي لناس كتير ...وبتجيلي كتير زيادة عن اللزوم...انى بقع من فوق...فوق اي حاجة ...عمارة , كوبري,شجرة...ان شالله حتى من فوق السرير...بس لازم اصحى وانا في الحتة بتاعة "هييييييييييي" الشهقة اللى قبل  الارتطام...بصحى قبل ما الزق في الارض:) بس بصحى بنهج وعرقانة وبتنفض وحالتي كرب....كلنا كده متهيالي.

الكوابيس معناها ايه؟ خوف ولا قلق ولا توتر ولا انتظار مصيبة ولا حسد ولا عادي؟ 

انا بحلم بكوابيس عامة لما بكون متوترة ... يوم ما ولدت بنتى كنت رايحة جاية في البنج :) اصحى ابص في الموبايل واغمض عيني واروووح هناك :) وبعدين اصحى واسئل اي حاجة واروح هناك تانى...المهم وانا في طلعة من دول حلمت حلم غريب اوي...مش مقتنعة انى لما احلم حلم وحش مقلهوش...المهم حلمت انى في بيتي وابني جنبي وجوا الشقة في كائن (اللهم اجعله خير يعنى) وكنت عارفة انه حاجة شريرة متقمصة دور الكائن ده ومش عايزة تتحرك من بيتي...وانا ببص لها بتحدي واقولها امشي بره بيتي واحضن ابني اكتر جنبي وفضلت كده لغاية ما خرجت بره بيتي...وفضلت مركزة (معرفش ازاي) انى مصحاش من الحلم غير لما الحاجة دي تخرج بره بيتي واقفل الباب بعدها...وفعلا حصل وصحيت وفضلت خايفة اوي انام تانى او اروح في البنج تانى لحسن ترجع :)) هبل في الجبل :) البنج ده بيعمل احلى دماغ :)

حلمت برضه قبل كده انى ماشية فوق جثث!! 

من الاحلام اللى مش هاقولها بالتفصيل هنا...حلمت بيوم القيامة!!

وحاليا بحلم بالنوم لانى بقالي كتير اوي صاحية :)

http://www.facebook.com/groups/329904227056535/

ريم اسامة

XXXL

محدش فينا لغاية النهاردة مابيفرحش بالهدية زي العيال .... يا سلام بقى كمان لو الهدية ملفوفة بشياكة كده وتحسي انها متكلفة (من برة)...ومحدش فينا برضه مجالوش احباط لما فتحها :)

دي حقيقة:)

وانا صغيرة كنت بحبط ساعات من الهدايا اللى كانت بتجيلي خصوصا لو كانت براية بتتفتح او طقم اساتيك اشكال او مقلمة ...بس جالي برضه انا فاكرة مرة قلم ومتعلق فيه حبل رفيع كده ومتعلق من الحبل ده دبدوب ...كان اختراااع ساعتها بقى :)...في المدرسة كنا بناخد مصروف فكان بيجيلي دايما براويز في فترة اعدادي !! وبعدين طلعت موضة الاوتوجراف (ابو ريحة).,,,و طبعا لازم كارت حجم لوحة مفاتيح الكهربا ومكتوب عليها بخمس الوان وقلوب وبوس واحضان وكلام كتير كتير وفي الاخر لازم قلب وسهم واول حرف من اسمك مع حرف صاحبتك 

طيب والله كانت ايام جميلة اوي بس كنا برضه بنحبط الى حد ما يعنى ... من احلى الهدايا اللى جت لي وانا صغيرة كان بيت باربي...كان يوم السعد والهنا لما جالي البيت ده...كنت فرحانة جدااااااااااا ومعرفتش انام من السعادة...وخصوصا بقى لما طلبت من بابا يجيب لي لبس لباربي جديد (البيت لوحده من غير العروسة وكان لازم البسها لبس جديد علشان البيت الجديد) وفعلا نزلت جبت.

كنا في منتهى البراءة واي حاجة بتفرحنا ... بس واحنا كبار وصلنا لمرحلة ان اي حاجة بتفرحنا برضه علشان مفيش حد بيفكر يجيب لك حاجة خلاص ... انتى اللى بتجيبي .... فلما حد يدخل عليكي بهدية شيك اكيد هاتفرحي ...بس الطمع بقى :) يعنى كل ما بيجيلي هدية بلاقيها طقم كوبايات .... هيا الكوبايات مفيدة محدش قال حاجة !!

اسخف حاجة بقى لما يجيلك هدوم!

او انا شخصيا بتضايق لما حد يجيب لى هدوم لانها دايما بتكون صغيرة عليا!!

- "مرسي اوي...شيك خالص" 

- "طيب ما تقيسي كده وريني علشان لو كبيرة ممكن اجيب لك اصغر"...اول جملة محرجة في الليلة كلها لاني عارفة كويس اوي انها اصلا صغيرة!

- "لا تمام مرسي - هيا شكلها مظبوط"

- "لالا لازم اشوفها عليكي" يادي الكسووووف

ادخل واجرب مع انى عارفة انها صغيرة من الاول واخرج والهدوم في ايدي

- "ايه ده؟ عايزين نشوف"

- "....." ابتسامة غبية مش عارفة اقول ايه علشان لو كدبت انها كويسة واللى قدامي صممت انى لازم ولابد وضروري اوريهالها هايبقى شكلي عار

- "لالا ياللا وريني"

ادخل واحشر نفسي في الهدوم واخرج ميتة من الكسفة - ماهو مفيش حد بالحجم ده في العيلة غيري

- "ايه ده معقول؟ ده  اكبر مقاس في المحل كله" هي دي بالظبط الجملة اللى مكنتش عايزة اسمعها!!

- "مش مشكلة يا طنط - بس هيا جميلة...كام كيلو كده وتبقى تمام"

متجاهلة الجملة الاخيرة

- "دي البنت جابتهالي من قسم الspecial sizes"

مزيدا من الاحراج ...مزيدا من الاحمرار

- "يا حبيبتي مرسي كتر خيرك - بس ذوقها يجنن"

متجاهلة اخر جملة برضه 

- "طيب خلاص اقلعيها  واجيب لك بدلها شال!"

ببقى هاموت واقول "انا بقى مقاسي في الشيلان small"!!!!

انا شخصيا لما بجيب هدية لاصحابي بجيب هدية لعيالهم مش ليهم ...تجنبا المواقف البايخة 

http://www.facebook.com/groups/329904227056535/

ريم اسامة

ممنوع !

صاحبتي الانتيم عندها ولدين - الكبير اول سنة ليه السنة دي في المدرسة والصغير تسع شهور (ربنا يبارك لها فيهم)

المهم...الولد الكبير كان طبعا بيروح حضانة قبل كده وكان كويس اوي فيها وفي تفاعل كويس مع المدرسين فيها وبيعرف يكتب ويعرف انجليزي. حاليا لما دخل اولى حضانة مدرس الفصل بتاعه كل شوية يقول لصاحبتي "ابنك عنيف" !!

الشكوى دي مكانتش موجودة اصلا في الحضانة - ولما بتسئل عنيف ازاي يعنى يتقال لها انه عض فلان...وضرب علان...وزق الولد جامد. ولما استفسرت اكتر وركزت في الموضوع ده ومع الالحاح على المدرس انه يشرح لها بالظبط الموقف طلع ان الولد بيدافع عن نفسه مش بيبدا هو بالضرب او الزق او العض! الباشمهندس بقى متضايق اوي انه بيدافع عن نفسه وقرر ان ده عنف وعصبية في شخصية الولد وان لو حصل اي حاجة لازم يشتكى لحد اكبر منه وماياخدش حقه بايده!!

طيب سؤال يا سي المدرس : مش في اطفال تانية بدأت بالضرب؟ ليه معاقبتهمش؟ وليه متكلمتش مع اولياء امورهم زي ما اتكلمت مع ام الولد اللى بيدافع عن نفسه؟؟

علما بان الولد ليه اصحاب في المدرسة يعنى لو كان شخصية عنيفة فعلا او عدواني مكنش هايكون له اصحاب...ولا ايه؟؟

المهم صاحبتي خدت الموضوع على صدرها اوي وراحت لدكتور اخصائي نفسي اطفال ودخلت هيا الاول من غير ابنها تتكلم معاه وقالها لازم اشوف الطفل الاول علشان لو عنده مثلا فرط حركة او فرط نشاط...وشاف الولد والحمد لله طبيعي جدا مفيش اي حاجة. واداها نصايح وقالها عندنا الام مش بتربي صح والمفروض يحصل التالي :

- الام في مصر عايزة الطفل مثالي (من وجهة نظرها) يعنى طول النهار والليل تقوله لا ماينفعش - بلاش كذا واوعى تعمل كذا - مع ان ده غلط 

- مفيش ضرب ولا زعيق اطلاقاااااااااا - الطفل مش بيخاف من الحاجة اللى بتزعقي له عليها . هوا بيخاف من "العفريت" اللى ظهر له وبيزعق بدليل انه بيعمل نفس الحاجة الغلط تانى وتالت 

- مفيش حاجة اسمها "لا غلط كده" - لو انتى شايفة انه بيعمل حاجة غلط قولي له انت شاطر وحبيبي واحسن ولد في الدنيا علشان كده ماينفعش تعمل الحاجة الفلانية 

- الاب لازم يتواجد على الاقل تلات ساعات يوميا مع الطفل ومش معنى التواجد انه يكون موجود وخلاص ...لا ...يقعد تلات ساعات يتكلم ويلعب ويلون مع الولد (معرفش راجل مين ده اللى هايستحمل بس ما علينا يعنى )

- ممنوع كارتون ولا تليفزيون خالص غير مثلا عشر دقايق في اليوم - في اضيق الحدود وكارتون مفيهوش هيافة - يكون كارتون هادف (!!!)

-  لازم الام تاخد ابنها على رجلها وتاخده في حضنها لمدة عشر دقايق - سبع مرات في اليوم على الاقل (احنا لو حسبنا المدة دي تطلع اكتر من ساعة في اليوم - طفل مين ده اللى في سن خمس سنين هايقعد ساعة على رجل مامته في حضنها ساكتين كده وخلاص؟؟)

-  ممنوع خالص خالص تتشغلي بأي حاجة طول ما ابنك صاحي (محدش يشتم يا جماعة والنبي)

- لما قالت له صعب اوي الكلام ده لان في اولويات عندي تانى وفي بيت وفي طفل وفي جوزي ومش ممكن يكون كل التركيز ده طول ساعات اليوم مع طفل واحد قالها "اولوياتك دي هوا ملهوش دعوة بيها وانتى وجوزك بتستثمروا في ابنكوا ده ولازم يكون هوا اهم حاجة في حياتكوا

- مفيش حاجة اسمها naughty chair ولا حاجة اسمها naughty corner علشان هوا صغير على كده (!!) امال في سن كام انا مش فاهمة 

- لو انتى متضايقة متتعامليش معاه خالص الا بعد ما تهدي

- وطلعها انها مقصرة في حقه وانه محتاج حنان واهتمام اكتر من اللى هوا فيه وان كل اللى هيا بتعمله غلط في غلط وانها تحاول بقى تدارك الغلط ده علشان الولد مايطلعش معقد وعنيف وعدواني!

باختصار كده احنا فاشلين ومتخلفين وجهلة وعايزين الحرق ! في رأيي الشخصي مفيش حد يقدر يعمل كل ده ... بجد...طيب انا اعرف واحدة كويس اوي وتقريبا بتنفذ كل الكلام ده خصوصوا بقى ان مفيش عقاب ...ابنها قمة قلة الادب والسفالة....مش متربي من الاخر خاااااااااالص....مفيش حاجة عندها اسمها الكبير والصغير ولا خصوصية حد. 

اصل مش لازم العقاب يبقى عجن العيال ولا ننفضهم بايد المقشة! هوا عايزها تفضل "تتكلم" معاه بهدوء وبس! 

في مواقف بجد ماينفعش الواحد يسيطر على اعصابه والعيال بتكون فاهمة كويس جدااااااااا انها بتضايقك قصد وعند فيكي خصوصا لو في اخ او اخت اصغر منه! 

انا قلت لها كلمة واحدة بس: اموت واقابل مراته !!!

http://www.facebook.com/groups/329904227056535/

ريم اسامة

يا ترى هاتفتكرني؟

اول حاجة احب اقولها قبل ما اكتب انى مخدتش بالي خالص انى قافلة الكومنتات - بجد اتضايقت جدا - لو حد كان قرا اي حاجة وعجباه والنبي سيبوا لي كومنت ولااتنين كده جنب الحيطة افرح بيهم :) 

انا بكتب عن الجواز عامة او العيال او الحموات في العموم المطلق - النهاردة هاتكلم عن حاجة شخصية جدا

النهاردة الجمعة - جوزي للاسف عنده شغل وانا للاسفين تعبانة جدااااا - فقلت ابعت ابني عند ماما علشان ارتاح شوية ...حسيت بكمية وحدة فظيعة اول ما بقيت لوحدي في البيت...فعلا.

وجت لي افكار غريبة اوي - فقلت هاشاركها معاكوا بدل ما اتجنن لوحدي وان بين اربع حيطان كده

وابني نازل وهوا بيقولي "مش هاتيجي معايا ...انا وحدي؟" - اتضايقت اوي وبعدين جت لي فكرة انى اكيد هاسيبه لوحده يوم من الايام ... اكيد هاموت واسيبه !!

وفضلت اسئل نفسي ...لو جه اجلي وانا بولد كمان شهرين ....ابني هايبقى ايه وضعه؟ هايعيش مع مين؟  هايبات في حضن مين؟ مين هايستحمل الزن ده كله؟ مين هايفهم الكلام الغامض ده يعنى ايه غيري؟

يا ترى فقدانه لامه في سن تلات سنين هايفرق في تكونيه النفسي؟ هايفتكرني اصلا لما يكبر؟ ولا هايفضل فاكرني شوية وينسى بحكم سنه الصغير اوي؟ هايفتقدني؟ هايحس ان حاجة كبيرة راحت منه؟ هايحس بفراغ في حياته؟ ولا هايلاقي غيري يملأ الفراغ ده؟

هايفرق معاه انى مكونش موجودة اول يوم مدرسة؟ اول يوم جامعة؟ يوم تخرجه؟ يوم فرحه؟؟؟

يا ترى هاشوفه لما يكبر؟ هايفتقدنى جنبه ؟ ولا هايكون نسي خلاص؟ اكيد هايكون نسي طبعا!! لما يعيط ومايلاقيش حد يطبطب عليه زي امه - هايحس بالفرق؟ ولا هايرضى باي ايد تتمد ناحيته وخلاص؟ لما يكسر حاجة حد هايقوله فداك ولا هايزعق له؟ لما يبقى عنده فضول يلعب في كل درج الشخص اللى هايرعاه هاسيبه يلعب بعد ما يشيل اي حاجة ممكن تعوره ولا هاينهره و"لا يعنى لا"؟ لما يرفض ياكل حد هايفضل يحايل فيه ويلعب معاه علشان ياكل ولا خلاص انت حر؟ هايحس انه يتيم؟ هايفرق معاه ولا هايتعود؟ 

هايفتكر انى كنت بلعب معاه في المياه؟ نجيب رشاش مياه ونرش على بعض؟ هايفتكر لما كنت بجري وراه علشان اكل بطنه وهوا مش عايز يديني حته؟؟ هايفتكر انه كان مصمم يسمي اخته احمد وانا اقول له دي بنت يقولي بنت احمد؟! هافضل صورة حيًة في ذاكرته ولا يوم بعد يوم خط ورا التانى هايروح منه...ومش هايبقى منى غير صورة في البوم العيلة؟؟ هايفتكر صوتي؟ 

هايفهم لما يكبر انى كنت بفضله عن نفسي وعن الدنيا؟ هايفتكر انى كنت بفضل صاحية الليل كله لغاية ما الشمس تطلع علشان عيان؟ هايفتكر لما كنا بنغنى مع بعض او كل ما تيجي موسيقى يقولي ياللا نرقص بقى؟ هايفتكر لما كنا بنقف نعمل عصير مع بعض ويصمم انه يحط الحاجة بنفسه في الخلاط ومحدش يدوس على الزراير غيره؟ هايفتكر انى كنت بزعل من باباه اوي لما يزعق له وان محدش يقرب منه غيري لو استلزم الامر ان حد يكون شديد شوية معاه؟ هايفهم انى كنت بزعق لمصلحته؟ هايفتكر لما كان يسيبني اسرح شعره واول ما اخلص ينعكشه تانى علشان اضحك؟ لما كان يحط رموشه على خدي ويقولي اضحكي ياللا ؟ لما يوشوشني اي حاجة ملهاش معنى في ودني ويقولي "متقوليش لحد بقى"؟ هايفتكر لما يعمل انه بيديني صباع رجله الصغير ويحط عليه ملح وفلفل ويقولي "خدي بالك سخن" علشان اكله؟ هايفكر لما شفتني مرة بعيط وقال لى "انا معاكى؟" ومرضيش ابدا سيبني زي ما انا دايما بقول لما بيعيط هوا؟ 

يا ترى اخر صورة ليه في حياتي هاتبقى ايه؟ وهوا نايم جنبي ومايطمنش غير لما يحط ايده الصغيرة اوي دي على وشي ويطبطب عليا؟ واخر كلمة اسمعها "احكي حدودة"؟ ولا لما يقولي "انتى بتحبيني"؟ اخر حاجة هاتبقى ايه؟ 

هايحتفظ باي حاجة اشتريتهاله؟ هايفهم انى كنت بفضله عن نفسي ومجبش لنفسي هدوم علشان اجيب له لعب اكتر؟ هايفهم انى كنت بديله احسن حاجة عندي؟ واغلى حاجة عندي علشان هو ينبسط ؟

لما يكبر ويتجوز ويحب مراته - يا ترى حبها هايعوضه عن حبي اللى مش هايبقى موجود ساعتها؟ هايحس ان ربنا عوضه ولا برضه هايحس ان في حاجة ناقصة؟ هايدعي لي ولا مش هايفتكر؟ ولو دعى لي هايبقى من منطلق انه كان بيحبني اوي ولا من منطلق ديني بحت ؟ ماهو مش هايبقى فاكرني....يدعي لي ليه؟؟

لما يخلف هايحس بكمية الحب اللى كنت بحبها له - ولا مش هايجي في باله انه يقارن؟ في فرحه هايحط في عرض الصور صورة ليا معاه وهوا صغير - ولا مش هاتفرق؟

لو كبر وقرا المقال ده - احب اقوله:

انا بحبك اوي اكتر من اي حاجة .... بتوحشني جدا وانت نايم...وبتصعب عليا اوي لما يكون نفسك في حاجة مش موجودة ومش عارفة اجيبها... بزعل اوى لما بتمشي تروح في اي حته مع باباك وافضل لوحدي...مبقدرش انام في حته بعيد عنك...بتضايق لما حد ينتقد اي حاجة تعملها....انا شايفاك كامل من كله ...مش شايفة حاجة وحشة فيك ولا حاجة ناقصة ولا شايفة حد احلى منك...بحب صوتك والحروف اللى بايظة عندك لغاية دلوقتي ... بحب فضولك...بحبك وانت نايم ورموشك على بعض وشكلك احلى من الملايكة كمان...وكف ايدك لازم يكون مفرود على الاخر وانت نايم وافضل ابوس في ايدك لغاية ما تضايق وتتقلب الناحية التانية....بحب انك اول ما بتصحى اول حاجة بتقولها "ماما فين" حتى لو انا جنبك ومش واخد بالك....واول ما تلاقيني تفضل في حضني شوية متتحركش ...بحبك لما بتيجي تبوسني من غير مناسبة ومن غير ما اطلب وتقولي لوحدك "بحبك اوي - بتحبيني؟"....ولما بتجري ضامم دراعك الشمال على صدرك وبتجدف بدرعك اليمين بس ...بيبقى شكلك جميل اوي:) .... لما نجري ورا بعض وامسكك تفضلت تضحك وتقولي كفاية علشان بتكون تعبت من كتر الضحك...لما بجيب لك لعبة نفسك فيها ومن كتر الفرحة مش عارف تعبر عن نفسك غير انك تنط وتصوت :) 

بدعي لك كل يوم كتير - وبتمنى اشوفك احسن الناس...

واخر حاجة بتمنى ان لو ربنا اختار انى اسيبك...متزعلش على فراقي...بس افتكر تدعي لي...واكيد هاتلاقي ناس تانية تحبك برضه......امين!

http://www.facebook.com/groups/329904227056535/ 

ريم اسامة

ابو عيالك ولازم تستحملي

ازاي تعرفي ان جوزك راجل عربي شرقي اصيل؟؟

لو فيه خمس حاجات من دول يبقى مبروك عليكي عظمة الشرق!!!

- يتقطع لسانه ولا يقولك شكرا !!

- تتقطع ايده ولا يطبطب عليكي ويقولك معلش انا عارف انك تعبانة 

- تتخلع عينه ولا يبص لك جوا عينك اوي كده ويقولك انتى احلى ست في الدنيا

- يموووووت ولا يشكر فيكي بجد قدام الناس وخصوصا امه!

- البيت لا يساع لكراكيبك - كفاية كراكيبه هوا - يعنى اي مجلات عندك قديمة  عايزة تحتفظي بيها تصنف "زبالة" انما مجلات الكورة الاعداد بتاعة الفريق بتاعه لما كسب تصنف " ذكريات"

- يستحق الحرق لو عدى لك خطأ يتيم او هفوة او سهو - لازم يأنبك ويغلًطك اكتر ويحكي لاهلك ويذل انفاسك بالغلط ده كل ما تعملي غلط تانى 

- اي حاجة تطلبيها يحولها "لاول الشهر" بس للاسف اول الشهر لما بيجي مش بيفتكر ولو فكرتيه يقولك "اول الشهر اللى جاي"

- طلبك ان السباك ييجي علشان السيفون بينقط فدي حاجة ممكن تتأجل - انما الماتش فده شئ اساسي وحيوى وموضوع حياة او موت - مش مهم الحمام يغرق بس المهم يتفرج على الماتش

- تتشل ايده ولا يملى ازازة مياه بعد ما يشربها - لا يسيبها في التلاجة وهيا فاضية!!!!!!

- نهارك طين لو عديتي قدام التليفزيون والماتش شغال - يزعق ويتعصب ويرزع اي حاجة في ايده مع انه لو استنى تعدي وخلاص  كان وفر وقت النرفزة !! اصلك مش هاتسحفي علشان تعدي من تحت الشاشة !!!

- الشاي لو جه وعليه  الرغاوي العبيطة مطرح التقليب يقولك "جايبة لي شاي بتفافة؟" تبقى بجد نفسك تكون تفافة حقيقية!!

- الشراب اللى يتقلع يتغسل في ساعتها ولو فضل في الغسيل يومين مثلا تبقى ست مهملة ومش عارفة تنظمي البيت ولا تشوفي طلبات جوزك (بغض النظر ان عنده درج هايفرقع من كتر الشرابات)

- ولو فردة شراب ضايعة يبقى انتى رمتيها ولو شلتي الفردة اليتيمة دي لغاية ما تلاقي اختها يعتبر انك رميتي الفردة التانية علشان تكبيري دماغك بس هوا صاحي لك اوووي !!!

- لو لميتي الغسيل وسبتيه مثلا يوم ولا حاجة على كرسي لانك مش فاضية تطبقي او مش قادرة حتى يرجع ويقولك والغسيل بقى هايطبق نفسه؟؟ على اساس انك سايبة الغسيل على حجره!

- لو حطيتي ملح زيادة في الاكل الدنيا كلها لازم تعرف انك طابخة له مخلل ولو عملتي اكل كويس ماينطقش!!
- زيارة اهلك مرة في الاسبوع - زيارة اهله مرة في اليوم!!!!
- لو زيدتي اتنين كيلو تسمعي ما لذ وطاب من "تلئيح" الكلام وغالبا بيكون كلام ليه علاقة بالجاموسة - مع انها والله كائن طيب جدا
- ولو خسيتي ماينطقش ولو سئلتيه مش انا خسيت يقولك "مش واخد بالي - وحتى لو خسيتي ما انتى خسيتي كام كيلو من المية كيلو اللى المفروض تخسيهم - هالاحظ ازاي؟؟" - اسكتي احسن خلي موضوع الوزن ده في سرك
-  نفس حوار الازايز الفاضية ينطبق على قوالب التلج في الفريزر - برضه بتتساب فاضية في الفريزر!!
- اي طبق او مج او علبة بيبسي او ورقة بسكوت بيكون مكانها الطبيعي جدا مكان ما شربها !! مفيش حاجة اسمها يدخلها المطبخ!!
- وقت ما يحب ينام طبعا بينام - وقت ما تحبي تنامي لازم تشوفي في ايه الاول وراكي وتخلصيه علشان يتنازل ويسيبك تنامي في امان- لان لو احتاج اي حاجة بلا تردد بصحيكي ولا اكنك اباجورة يولع ويطفي فيها اي وقت براحته !
- طبعا زي ما قلت ميلون مرة قبل كده العيال دول بتوعك انتى بس وانتى الوحيدة المسئولة عنهم طول ماهم صاحيين!!

هوا انا مفترية يا جماعة ؟ :))

http://www.facebook.com/groups/329904227056535/

ريم اسامة

يا سودا يا كودا يا حق الهباب

"لالالا معلش - ده بوبو كان قمررر وهوا صغير - يا نهاري - هوا كان في حد في جماله ولا ضحكته الحلوة؟"
دي حماتشيك بتتكلم عن "ابو السباع" ابنها - او يعنى جوزك! 
وبعدين ايه بوبو ده؟! ده انا يوم ما قلت له يا بيسو كان هايرمي عليا اليمين!!
وتبص هيا لابنك وتقول "لا معلش - بوبو كان احلى كتير اوي من ابنك (دلوقتي ابنك لوحدك يا جزمة) حتى شعره كان ناعم وفاتح وعينيه كانت جميلة"
وتبقى هاتموتى وهايطلع لك خرَاج في بؤك علشان تقولي لها "ده قبل ما تحطيه غلط في الغسالة مع الهدوم الغامقة؟؟ ولا قبل ما حمصتيه وانتى مش واخدة بالك مع فول السوداني؟!"
وطبعا انتى تحطي قبقاب خشب في بؤك - بوبو جوزك ده فلقة قمر وانتى ياهناكي يا سعدك انه بص في خلقتك!
"بوبو كان وهوا صغير عليه خدوود جميلة - بفضل ابوس فيه لغاية ما يزهق"
وانتى في سرك "الله يكون في عونه - علشان كده طلع خلقه ضيق!"
وييجي بوبو وتتجعص هيا في الفوتيه اكتر وتقولك 
"بس الولد هايطلع قصير - ياللا معلش - اصل مش كل حاجة بتتاخد من الاب - هوا مش واخد منه غير صباع رجله الصغير بس!"
وهاتموووووووووتي وتفرقعي وتقولي لها ان صباعه الصغير ده اصلا احلى حاجة في جوزك!! 
وتقولك "بس قوليلي يا حبيبتي - هوا اسمر كده ليه؟"
وانتى بكل ادب واخلاق "من الشمس"
"هوا بيتكوا بقى بيطلع فيه الشمس؟؟؟ هوا ابنك اصلا ده بيخرج ولا بيشوف شمس؟ وبعدين هوا كده من صغره - مش فاهمة ليه مطلعش لبوبو ابيضاني وشعره فاتح" - معلش اصل اوبشن اللون كان زراره معلق وانا بولد!
وهنا تشيل الولد وتهشكه (جدته برضه يا جدعان والدم بيحن) وتغني له "يا سودا يا كودا يا حق الهباب"
بما انك مصدر الهباب والسواد بتخرسي خالص وانتى بتبرقي "لبوبو" وهوا بيضحك وفرحان ان مامته بتدلع ابنه!
لما تروحي البيت وبوزك شبرين مأموصة من حماتك - ييجي بوبو ويضحك لك ضحكة ليها معنى (بيضحك ليه ده دلوقتي؟؟ خير اللهم يجعله خير)
"بقولك ايه يا حبيبتي"
(حبيبتك؟؟؟) "نعم يا حبيبي؟"
"ممكن؟" وبيضحك اكتر - يا ترى عايز ايه ده؟
"ممكن ايه بس؟" - انا مش عايزة بصراحة افكر في اي طلب دلوقتي انا لسه عايزة افضل افتكر كلام الست واضايق نفسي اكتر
وبعدين ييجي في بالك انه مثلا يعنى بيفكر في يتعشى مكرونة وكبدة وانتى مش طايقة تعملي له حاجة 
"بص حبيبي انا تعبانة دلوقتي"
"وايه علاقة ده بالتعب؟"
"ملعش حبيبي - طيب مرة تانية" 
"بس هوا مستنيني"
"هوا ايه ده؟؟؟"
"ابراهيم!"
(مصدومة) "ابراهيم مين؟؟"
"بصى حبيبتي معلش هانزل اقعد على القهوة شوية مع ابراهيم - اصله عايزني ضروري في مشكلة خاصة بيه"
طبعا بيضحك علشان عارف ان الساعة عدت واحدة بالليل وانه لو نزل دلوقتي هايرجع على اذان الفجر!!

يفضل اشيطان يوزَ في  دماغك تنتقمى منه ازاي لغاية ما تنامي وتحلمي انك كنتى نايمة في الشمس واتحرقتي!

http://www.facebook.com/groups/329904227056535/

ريم اسامة

دي ماما بتحبك زي بنتها

جيراني في العمارة اللى جنبي ماشاء الله عليهم - مش اقل من خناقتين في اليوم في الشباك - وفعلا في الشباك بمعنى الكلمة لاننا بنسمع كل حاجة حتى لما الست تسقف له بايدها قبل ما تردح وتقوله"جرى ايه يا عمـــــــــــــــــر". 

واكتشفت ان في شوية كلاشيهات كده الرجالة بتصمم عليها ومش بتغيرها مهما اتغير الجيل زي جملة "ماهو انتى اصلك كده - غاوية نكد"

وفي المستوى الاجتماعي المتدنى شوية تلاقوا ان الرجالة ليهم شوية جمل كده بتتقال باستمرار - والغريب ان كلهم بيقولوا نفس الكلام بنفس ترتيب الكلمات ونفس السكنات في الجملة! تقولوش لما الواحد منهم بيتجوز بيتوزع عليه كتالوج "كيف تتعامل مع المرأة - علشان تموتها ناقصة عمر!"

ومن الجمل اياها 

- "ناقصات عقل ودين" وبيكون الرد المثالي "ماهي امك ست " بس بتكون النتيجة "روحي وانتى طالق"!! فالست بتقصر على نفسها وجع القلب وبتسكت - وطبعا في تحليل ديني للجملة دي غير اللى يقصده الرجل خالص

- "لاوية بوزك ليه" والرد المثالي "هوا اللى يشوف خلقتك يتفرد له بوز؟" وبرضه بتكون العواقب وخيمة والست مؤدبة وبتسكت

- "غريبة مبتسمة يعنى على غير العادة - حد مات ولا ايه"

- "هوا انتى مش بتشبعي فلوس ابدا"

- "هيا طلباتك مابتخلصش؟"

- "جاتك داهية انتى واللى مخلفينك"

-"كان يوم اسود يوم ما عرفتك ولا شفت خلقتك"

- "غوري من هنا لحسن البسك كشاف في وشك" ويقصد بكشاف يعنى قلم على وشها!!

مرة كنت في الشغل والنور قطع فمفيش شغل - جه راجل كبير (اوفيس بوي) وكان بيتكلم مع الرجالة وبطبيعة الحال سمعت الحوار - الراقي جدا!!

كانوا بيتباروا برجولتهم في بيوتهم! وطبعا رجولة هنا يعنى قهر المرأة!! والراجل الكبير ده حكى حكاية. قال انه من كام يوم روح البيت وكان عايز يتغدى ومراته مقامتش تسخن له الاكل وقالت له الاكل عندك جوا وكانت عاملة ملوخية ورز - دخل جاب الحلل وبعد ما خلص اكل دلقلها الملوخية كلها على الارض!!

"ليه يا عم فلان كده؟" محستش بنفسي والله وانا بسئله - قالي "علشان ولية قليلة الادب مشافتش رباية" !!!! (مش دي المدام برضه ولا ايه؟)

في المستوى الارقى من الرجالة وهنا اعنى اجوازنا احنا مثلا بنسمع جمل زي 

- "انتى مش هاتنيمي الولد ده بقى؟ انا مش قادر اسمع زن اكتر من كده" وبتكون الاجابة "زرار التشغيل بتاعه باظ ومش عارفة اطفيه"!!

- "ليه النكد ده؟" والاجابة النموذجية من كراسة الاول بتكون "اسئل نفسك"

- "هوا ده استقبال تستقبلي بيه جوزك بعد يوم شغل وجاي متاخر؟" 

- "مفيش سلاطة؟ انا بحب السلاطة مع الاكل انتى ليه مش بتعمليها؟"

- "امال لو كنت بطلب زي باقي الرجالة طلبات كتير كنتى عملتي ايه؟"

-"هما الولاد لسه صاحيين؟؟؟؟؟" بيسئل بكل استنكار!

-"انا مش قادر افهم انتى شايلة ماما فوق دماغك ليه مع انها بتحبك زي بنتها بالظبط"

-"هوا انتى مش بتتصلي بماما ليه تطمنى عليها؟"

- "انتى من ساعة ما جيتي من برة وانتى مقلوبة "

- "خدي بالك من اكلك شوية - علشان وزنك زاد!"

- "الاكل ناقص ملح!!!"

-"هوا مفيش غيري في البيت اللى بيملى الازايز مياه؟؟"
- "بذمتك في واحدة ست تكلم جوزها بالاسلوب ده؟ حد من اصحابك بتكلم جوزها كده؟"
- "مش وقته خالص الكلام في الموضوع ده - اختاري الوقت اللى تفتحي فيه معايا مناقشة"
- "انتى شايفة ان ده وقته علشان تنكدى عليا فيه؟"
- "مش انتى اللى انا اتجوزتها - انتى اتغيرتي جدا"
- "اللى اعرفه ان شغل الست ميأثرش على بيتها"
- "ايه لازمته الخناق دلوقتي" وبتكون مش خناقة ولا حاجة دي بتكون مناقشة ولما الست تقوله كده يقولها "ده اسلوب مناقشة؟"

-"التي شيرت الجانجا راحت فين (في الغسيل) بقالها اسبوع في الغسيل؟؟؟ مفيش وقت اوي كده تحطيها في الغسالة؟ امال لو كنتى بتغسلي على ايدك بقى!"

المرة اللى جاية اقولكوا احنا بقى بنرد عليهم بنقول ايه (بس غالبا مش محتاجة كل واحدة فينا عارفة درجة زفارة لسانها كويس اوي)

http://www.facebook.com/groups/329904227056535/

ريم اسامة