التفاؤل هو...

الشعور بالتفاؤل والتشاؤم احيانا بيكون لا ارادى او مثلا تشوف حاجة فتحس بالتفاؤل وان اليوم جميل...تسمع حاجة تانية تحس بالتشاؤم وان اليوم اتقفل من اوله!! الحواس هي مفتاح الشعور ده (ده في رأيي الشخصي المتواضع جدا)....الحواس خمسة والتفاؤل واحد :)
زي مثلا:
تشم ريحة الحشيش (النجيلة) وهو لسه مقصوص حالا! له ريحة مميزة كده بتخلي الواحد يفرح متفهمش ليه :)

ريحة الفراولة (انا شخصيا بتفائل اوي بيها مع انى مش باكلها! الريحة دي مقترنة في ذهني ببيت جدتي بالعباسية لما كنا اطفال! اكيد حصل حاجة فرحتني اوي وكان في موسم الفراولة...او كنت باكلها...معرفش! بس بحب اشمها جدا)

اول ما تنزل من بيتك المقفول شبابيكه الصبح بدري والناس نايمة لسه وتستقبلك نسمة باردة...فعلا شعور لا يوصف!

لمسة ايد مولود على ايدك وانت مش واخد بالك!

ملمس الرمل واحنا حافيين!

ريحة الفانيليا في اي مخبوزات وهي لسه في الفرن والريحة منتشرة في البيت تشع دفء وريحة فانيليا بالسكر :)

تدرج اللون الازرق السما فاتحة وبعدين اغمق واغمق لحد ما نوصل للخط الفاصل بينها وبين البحر.

ريحة الكتب في المكتبات اوفي معرض الكتاب! معرفش ليه الكتب ليها ريحة مميزة كده!

ترجعي من بره تعبااااانة وهلكانة وتدخلي تلاقي البيت كله منظم ونضيف!

ريحة العربية الجديدة!

ريحة العفش الجديد!!

شكل الطفل وهو نايم...ومرة واحدة يبتسم! 

ريحة البحر اول ما نوصل اي مدينة ساحلية!

منظر الخضار والفاكهة الملونة المرصوصة بعناية عند الخضري او الفكهانى!

ملمس الفرو الغالي!

ريحة القهوة!! يا سيييدي على الريحة دي!

ملمس وشكل الورد!

الورد الاحمر الصغير على الشجر في الربيع (مش كده برضه يا بابا؟ :) )

طفل يتدفى في حضنك ويغطس في النوم من كتر الراحة 

شكل البوتجاز وهو لسه متنضف (محدش فاهم الشعور ده زي الستات)

ريحة المانجة! (احبيبتي امانجا )

صوت الحمام واقف على الشبابيك المقفولة!

الشمس الباردة الصبح بدري في جو صافي!

في ناس بتتفائل بالمطر! 

وانتوا؟ بتتفائلوا بايه؟


ريم اسامة 

https://www.facebook.com/groups/329904227056535/

الجار قبل الدار

أذى الجار لنا من اكتر الحاجات اللى بنعانى منها خصوصا لو جارك ده انسان هايف وحاطك في نافوخه!!
صاحبتي كل يوم تصحى تلاقي جارهم العزيز منيم لهم الاربع عجلات على الارض!! الاربعة؟؟ طيب خليها واحدة! دي لو قتلت امك مش هاتعملها كده كل يوم!! ولو الشارع ورث جدك...اديها خبر انه ورث وممنوع تركن فيه! وماتبقاش جبان وتنيم العجل وكل الناس نايمة!! في رجالة مخها مفسفس جدا!!
موضوع مكان العربية شئ مقدس عند الناس خصوصا في القاهرة والجيزة بسبب الزحام الرهيب واصحاب العمارات بيأجروا الجراج للمحلات يعملوه مخازن!! وتولع العربيات في الشارع مش مهم! انشالله عن السكان ما لقوا مكان يركنوا فيه!! بقت موضة دلوقتي كل واحد يجيب جردل وعصاية مقشة او عمود معدن...يملى الجردل اسمنت ويرزع العامود في النص ويحجز بيه مكانه!! انا مش معترضة لما يكون فعلا المكان مخصص لعربية بعينها...بس ما يبقاش بلطجة!! يعنى لو البواب بيحجز الاماكن قدام  العماره للسكان علشان محدش يضايقهم...ماشي...مقبول...بس اللى بيحصل دلوقتي ان المعلم البواب بيعمل الجردل ده علشان يحجز مكان يسترزق منه!! العربية من دول تفضل تلف وتدور في الشارع مش لاقية خرم ابرة...فيطلع هوا يشاور لهم يركنوا وياخد اللى فيه القسمة! ولما يجي الساكن يركن مايلاقيش مكانه! 
في عمارتي مثلا العربيات اللى ملهاش مكان في الجراج بتركن عمودي على الرصيف وصف تانى موازي له (والعربيات تسيب فرامل اليد مش معشقة) قووووووم ايه بقى...يجي افندي مش عايز حد يقف ورا عربيته علشان لما يكون يفكر ينزل تانى مايزقش حاجة من قدامه ولا يتعب نفسه وينده البواب..فيقف عمودي على العمارة وسايب مترين قدامه...فكده يخرج على طول...بس مش مهم الباقي يركنوا ولا مهم الاماكن اللى بوظها بركنته الغبية دي!! اللى مش عاجبه يعمل عربيته ساندوتش وياكلها بالهنا والشفا!
وفي بقى فيلم الزبالة....كل واحد عايز يحدف زبالته قدام اي باب غير باب بيته! ولاصدقائي اراء في هذا الموضوع..ممكن تكلميهم وش على طول ان محدش يرمي الزبالة تانى عند الجار...او تلئحي بالكلام ان تقريبا الشغالة غلطت وسابت الكيس في المكان الغلط!!  او تسيبي ورقة على بابهم من برة...او اجيب لهم باسكيت يحطوا فيه...او احط زبالتهم عند بابهم تانى...او ابدأ في الاستفزاز وارمي انا كمان زبالتي عندهم!...رأيكوا ايه؟
وطبعا الاشهر على الاطلاق "التنفيض فوق الغسيل"!! ليه الناس بتنفض فوق بعض؟ يعنى حتى لو مفيش غسيل ما التراب واي حاجة على السجادة هاتنزل على اللى تحت...بالتالي اللى تحت هاينضف قذارة اللى فوق بلا اي ذنب! محدش يسئلني امال ننفض فين لانى معرفش...انا شفت معاناة الغسيل دي فقررت لما يكون لي بيت مش هانفض السجاد!! يا بعمله كويس بالمكنسة او بيتغسل...اوبشن التنفيض ده مش عندي الحمد لله!
ومش هاننسى المياة (غسيل الشيش - او مزراب محترم - او غسيل بينقط -  او سجادة غرقانة مياه (علشان بتوفر فلوس غسيل السجادة عند البواب) - او يحدف مياة من فوق بس ده شغل حواري!! فأريح حاجة هاتي منشر داخلي وربنا يعوض عليكي في تنضيف البلكونة لما جارتك تنضف وخلاص! هانعمل ايه!! 
وفي ستات غاوية تشتغل في المطبخ الفجر...براحتهم طبعا محدش هايحجر على حرية الجار...بس مفيش داعي تفرم التوم الفجر! الست من دول تشتري توم السنة كله وتخليه لحد ما العيال تنام او لما تصحى هي من النوم قبلهم وتعمله بمزاج...وافررررررم في الكبة والصوت يتضاعف ويدخل صرصور ودن اللى نايم يصحيه...ومن كتر العصبية مش بينام تانى!! قيسوا على كده بعض المهام اللى ستات كتير خصوصا الموظفات منهم بيعملوها الفجر: تنضيف الشقة!!! (اقسم بالله بتحصل) - تفرم بصل او توم او كفتة رز!!- تنفض الشيش او السجاجيد!! اللى يغيظ ان محدش من اهل بيتها بيصحى! الناس كلها تصحى الا عيالها! سبحان الله!!
في رجالة باردة برضه احنا مش هانيجي على الستات بس! اللى بيتفق مع صنايعية يوضبوا له حاجة في الشقة يوم اجازة الصبح بدري!! خلي عندك احساس!! واللى بيفضل يضرب كلاكسات كتير كتير كتير علشان بيستعجل مراته مثلا!! هما حضرتك اخترعوا الموبايل خلاص! اقرفها على تليفونها مش لازم الشارع كله يدعي عليكوا! والراجل اللى بيصمم يتخانق مع مراته على الحلة المحروقة او الغسيل الباهت او اي حاجة عبيطة...اول ما يصحى من النوم!! يا سيدي استنى تحضر لك الفطار اهو تنكد عليها وانت شبعان على الاقل!!
والجيران اللى غاوين يتخانقوا على السلم...والله يا جماعة مش عايزين نعرف اسم امه ايه...ولا انك يا ستي صرفتي عليه فلوسك كلها وانه كان صدمان وكحيان ومعفن ومقشف وهي انقذته من براثن الفقر!! مش عايزين نعرف!!! ولا يا سيدي عايزن نعرف انك جيت على نفسك واتجوزتها بعد ما اتطلقت ولا نسمع خططك في مرمطتتها ولا انك هاتسيبها زي البيت الوقف لا طايلة سما ولا ارض!! 
والامهات اللى بيصوتوا وصوتهم جايب اخر الشارع...مش هاتكلم عليهم دول غلابة :)
صدق من قال: الجار قبل الدار!

ريم اسامة
https://www.facebook.com/groups/329904227056535/

الحب هو

زي ما اتفقنا هانشر مقالات عن المشاعر المختلفة - بس اهمها الحب طبعا....كان في كتاب للعظيم احمد رجب اسمه "الحب هو" بس المقاله فعلا مش مقتبسة من الكتاب.

الحب هو...
تشوفي محفظة جوزك في الخباثة وتلاقيه منفض فتحطي له خمسين جنيه ولا من شاف ولا من درى.

تاكلي صدر الفرخة اللى تستحملي العما ولا تستحمليه علشان عيالك ياكلوا الورك الناعم!

تعملي نفسك مستمتعة بالفرجة على الماتش مع جوزك...مع انك مش بتفهمي اي حاجة فيها غير ان الكورة تبقى جون لو دخلت الشبكة!!

تطبخي كوسة مع انك بتقرفي منها جدا.

في الاجازة تصحي انتى مع العيال بدري وتخلي جوزك ينام له ساعتين زيادة.

تفتحي التليفزيون على الكارتون فقط لا غير ولما جوزك يرجع من الشغل تتفرجي على السياسة!! مع انك نفسك تفترجى على فيلم  او فتافيت مثلا!!

تغسلي تيشيرتات جوزك على ايدك!!

تسهري طول الليل جنب حد من اطفالك علشان حرارته عالية ومش مقتنعة ان الخافض كفاية...لازم كمادات!

تنزلي تجيبي لنفسك هدوم وفي اخر اليوم تلاقي انك جايبة للعيال حاجات كتير...وجبتي لنفسك شراب وتوكة وايشارب!

تبصى في وشك ابنك او بنتك ويضحك لما عينك تيجي في عينه.

تسحملي غباء عيالك في المذاكرة!!

حد من اولادك يجي نص الليل جنبك علشان يكمل نوم في حضنك.

جوزك يفتكر الفالانتاين ويجيب لك ورد (مع انه مش مقتنع بالعيد ده)

جوزك يشيل هدومه في الدولاب او في سبت الغسيل من نفسه!!

ولو شرب في مج او كوباية يحطها على ترابيزة المطبخ  مش على طرف الحوض في حضنك!!

الحب هو انك كل ما تشتري حاجة من مكان بعيد او مكان فيه تخفيضات جامدة تفتكري اختك او مامتك او صاحبتك وتتصلي بيهم وتشتري لهم معاكي!

جوزك يفتكر يجيب لك المجلة المفضلة كل اسبوع من نفسه بالرغم من كرهه للمجلة ومحتواها!

تباتي مع اهلك ويك اند وتحسي انك رجعتي ابنة تانى مش ام!

جوزك ياخد العيال على ما تتغدى وانتى قاعدة زي البني ادمين!!

يوم عيد الحب يفتكرك بوردة مش بنكته بايخه! 

توافقي انه يسهر بره مع اصحابه لوش الفجر في الاجازات وانتى متلئحه في البيت بتغنى "سابوني الحبايب"!

انك تنسي تلئيح الكلام والبرطمة وتتعاملي طبيعي علشان الدنيا تمشي!!!

ريم اسامة
https://www.facebook.com/groups/329904227056535/

كفاية اكل بقى!

"ما كفاية اكل بقى"!!!

"هابدأ دايت من بكره قلنا!!" ردت رشا بكل حزم وعصبية!!

"ما انتى كل يوم بتقولي بكرة!! ونهاية كل اسبوع بتقولي من اول الاسبوع اللى جاي!! ولا مرة كملتي يومين رجيم على بعضهم!"

"ما خلاص بقى!! هوا كل فتفوتة اكل هاتفضل تعملي الحركتين دول؟؟ خلاص خلصنا!! مين فينا عمل حاجة من اول مرة؟ وايه يعنى ناوية اعمل دايت؟! انا حرة!! جسمي وانا حرة فيه!!!!!"
"وجوزك ده ملوش حق يشوف واحدة شكلها كويس؟ يعنى المفروض يرضى باللى معاه وخلاص؟ وطبعا انتى مقتنعة ان الراجل مش هايبص بره مادام في ست في البيت!!! صح؟"
"خلصنا من الرجيم دخلنا في حوار وتبرير الخيانة!!"
"هوا لو الراجل بص بره وعجبه شكل ست يبقى بيخون مراته؟؟؟"
"اه طبعا...الخيانة اشكال وانواع كتير اوي"
"طيب ما انتى السبب لو خانك بنظره...ماهو لو كان في حاجة بتعجبه في البيت مكنش بص بره!!"
"اسكت بقى!! خليني اركز علشان هاننزل كمان ربع ساعة بس!!"
"تركزي في ايه؟ المكياج اللى بيكبرك عشر سنين؟"
"رايحة فرح!! هاروح وشي زي المرضى كده؟!!"
"براحتك!!!"
بعد ما رشا خلصت لبس ومكياج وبصت على نفسها بصة اخيرة في المراية 
"بذمتك هاتروحي الفرح كده؟؟ بنات خالته هايتريقوا عليكي"
"يتريقوا على ايه؟ ما انا لابسه كويس اهه!"
"هوا باللبس؟ وبعدين ايه الجزمة دي؟"
"مالها؟؟؟؟؟ لايقة على الهدوم!"
"كل ده كعب؟"
"ماله الكعب؟ وده فرح لازم البس كعب!!"
"البسي حاجة اقل شوية!"
"الكعب بيخلي الجسم شكله مشدود!"
"وبيخليكي مأمبرة!"
تسمع طرقات على الباب "خلصتي يا حبيبتي؟"
"ايوة خلاص - سخن العربية وهانزل وراك على طول يا حبيبي"
دخل الحجرة وبص لها وابتسم 
"شكلك حلو اوي! جديد الفستان ده...شيك اوي"
"مرسي يا حبيبي - انزل انت وانا وراك على طول"
بصت لنفسها بصة اخيرة
"جتك القرف...ضمير عرة!!"

ريم اسامة
https://www.facebook.com/groups/329904227056535/

رد عليا!

"يا حبيبي رد عليا مش كده!!"

"..."

"يابنى رد عليا ده انا امك!! يا حبيبي!!! يا عصام!!"

"..."

"طيب بص! خلاص انا موافقة...هابيع البيت! حاضر يا حبيبي اللى انت تؤمر بيه!"

"..."

"يعنى هوا انا هاشيل الفلوس لمين؟ ماهو ليك! هوا انا ليا مين غيرك؟"

"..."

"يابنى خلاص بقى! نشفت ريقي...رد عليا الله لا يسيئك!"

"..."

"اتجوز اللى انت عايز تتجوزها انا موافقة...والشبكة والفرح والعفش كمان هاساعدك فيه كله...هابيع البيت وخد الفلوس كلها...سيب بس حاجة على جنب نتسند عليها وقت زنقة وخد انت الباقي ابدأ بيه حياتك!!"

"..."

"اقولك حاجة؟ بص لي...خلاص ماتردش انت حر....بلاش ترد...بص لي بس...بص لي وخلاص مش عايزة حاجة تانى...بص لي وهافهم انك مش زعلان علشان مكنتش موافقة على الجوازة!"

"..."

"يا بني نظرة عين مش اكتر!! حتى دي مستخسرها في امك؟؟"

"..."

"يا حبيبي اسمعنى كويس...بص لي وقولي اي حاجة....علشان الناس دي كلها تصدق!!"

"...."

"يا بني بص لي علشان يصدقوني!!! بص لي يا عصام حرام عليك كده!!!!!!"

"....................."

"يا عصام رد بقى حرام عليييييك!!!!!"

"وسعوا يا جماعة....حرام كده!! اكرام الميت دفنه!!! محدش عرف يجيب ابن ال#%$ اللى ضربه بالعربية؟؟ يا جماعة غطوه بالجرايد لحد ما الاسعاف تيجي!! حاسبي يا ست حرام كده!!! متصوتيش انتى كده بتركبيه ذنوب! استغفر الله العظيم!"

ريم اسامة

https://www.facebook.com/groups/329904227056535/

الاحباط هو...

(من مجموعة مقالات المشاعر والاحساس)

الاحباط هو...

حوض مسدود!!

النور يتقطع في اخر جزء من فيلم احداثه بتدور حول جريمة قتل غامضة!

اول ما تغمضي عينك وخلاص في مرحلة الهذيان في عالم بين الحقيقة والحلم تسمعى "ماماااا...مياه!!"

تليفونك يقطع شحن بره البيت ولسه اليوم طويل.ا

شراب مخروم ومش لاقيه غيره.

تشتري قماش غالي وشيك جدا والترزي يبوظه!! او يعملك حاجة مشنكحة عليكي (مشنكحة يعنى زي الزفت) :)

اول ما تدخلي موول ابنك او بنتك "ماما عايز انااام...ععااااااا"...معلش يا حبيبتي حصلت لنا كلنا!

بعد ما تخلصي لبس ومكياج تلاقي ضيوف على الباب وتتلغي الخروجة.

تعملي الاكل وتكتشفي ان الملح خلص!!

كل ازايز المياه سخنة في التلاجة في يوم حار!

تكتشفي ان اللبن خلص وانتى بتعملي مج النسكافيه الصباحي اللى هاتفوقي بيه لتواجهي المجتمع!!

تكونى وسط مناقشة ساخنة على التشات او الفيسبوك ومتاكدة من رأيك والنت يستهبل والكلام مايوصلش!!

تعملي شعرك في البيت توفيرا للنفقات ويتحرق وتروحي تعالجيه باضعاف اللى وفرتيه!!

تنضفى الشقة كلها ومستنية جوزك يجي من الشغل ويقولك كلمتين حلوين...ولما تسئليه عن رأيه في الشقة يقولك "ولحقتي بقى تعملي لنا غدا ولا حجتك كانت الشقة؟" - حد يناولني سكينة ياللا!!!

تشربي شاي ساقع!

تعملي دايت جامد قبل مناسبة اجتماعية وكل اللى يشوفك يقولك "انتى مش ناوية تخسي شوية بقى؟"

تنوعي كل يوم لعيالك ساندوتشات اشكال والوان في المدرسة وترجع لك معجونة زي ما هيا في كيس مع جملة "اصلا مش بحبه!! اعملي لي فول!!"

تشتري لبس للعيد وعلى العيد مايدخلش فيكي!!

تحوشي فلوس تشتري جهاز في البيت وكل ما تقربي تخلصي المبلغ المطلوب الحاجة تغلى اكتر!

تروحي مقابلة في مدرسة علشان ابنك يتقبل والبيه يفضل ساكت او يزن بس! مايردش على اي سؤال ولا يعبرهم!

تشتري لبس المدرسة وفي اول اسبوع عيل منهم يضيع الجاكيت!! 

تخرجي مع اصحابك ولما توصلي المكان وتتلطعي قرب ساعة تلاقي انك رحتي في اليوم الغلط! حصلت صدقوني!

تنزلي تشتري حاجة محددة من مكان معين وتلاقي البضاعة خلصت!

تشتكى من العيال وقرفهم وتعبهم وتسمعى "وخلفتي ليه بدل مش عاجبك!!" - بجد بجد من كل قلبي "جتكم القرف في ردودكم البايخة"

تحطي ملح على الاكل من الملاحة يطلع الغطا مش متثبت كويس وتدلق كلها في طبقك!

تخططي وتحوشي لهدية مميزة لجوزك في عيد ميلاده و"تعبتي نفسك ليه؟ مش كنتى تحطي الفلوس في قسط الموبايل احسن؟"

تحرقي قلبك مع عيالك في المذاكرة وفي الامتحان يجيلهم مرض اللاوعي واللافهم واللا ذاكرة!!! 

جوزك يوضب الشقة!! طبعا مش هاعد الحاجات اللى مش هاتعرفي لها مكان ولا هاتلاقيها بعد اليوم ده!! اليوم ده فاصل في حياتك واغراضك على فكرة!!!


ريم اسامة 

https://www.facebook.com/groups/329904227056535/