التقعر في مجتمع الكوافير

"لما تخلصي اعملي لي ايدي - اصلي لما كنت في تركيا ضفري اتكسر"

الجملة دي قالتها واحدة ست صابغة شعرها لون فظيع جدا وحواجب تاتووو - كانت بتكلم البنت الكوافيرة اللى كانت معايا!

طيب لازمتها ايه "تركيا؟" - وغير كده ايه علاقة تركيا بضوافر المدام؟ وبعدين ما البنت الكوافيرة دي غلبانة و لو راحت محافظة تانية يبقى كويس اوى وخير وبركة...ليه تتمنظر عليها كده؟ ولا هيا المنظرة كانت عليا انا؟!

الكوافير عالم السيدات...مجتمع الكوافير يتكون من الست او المدام او الهانم (الزبونة يعنى) ومتخصصات بمستويات مختلفة - في  متخصصة الشعر (قص وصبغ وهايلايت ومنتجات بتفرد واخيرا اقلهم كفاءة بتاعة السيشوار او المكواه...بابي لييس baby leesحاليا) والاظافر ( تركيب ومانيكير اشكال وتظبيط الشكل على حسب ذوق صاحبة الاظافر الطويلة) ومتخصصة الكعوب المقشفة وماسكات لتنقية البشرة وتنظيفها من الرؤوس السوداء وحاجات كتير تانية.
المهم
في جمل محفوظة دايما بتتقال في محلات تصفيف الشعر او مراكز التجميل لو انتى مش زبونة دائمة
"شكلك بقالك كتير معملتيش شعرك! اصله مقصف اوي!!"
"شعرك لازم يتعمله كيرياتين! كده مش نافع خالص!!
"اخر مرة رحتي للكوافير كانت امتى؟" ودي بتتقال بمنتهى الاستنكار والقرف
"تحبي احط لك سيرام؟ Serum" 
"عندك شعر ابيض كتير اوي!!!!!"
"اركب لك ضوافر اكريليك احسن؟ اصل ضوافرك حجمها مش مساعدني!"
"رموشك قصيرة هاركب لك رموش!"

في مجتمع الكوافير كل ست من دول عايزة تعمل "هانم" على الست اللى جنبها - لازم تلاقي واحدة بتتكلم في التليفون وتقول بحس يكسر حاجز الصوت انها عاملة عزومة مع ضرورة رص المنيو كاملا او تقول انها معزومة / مسافرة اي حتة شيك / هاتحضر فرح في اوتيل رهيب / هاتحضر حفلة تخرج حد من عيالها / خارجة في مكان غالي / هاتغير عربيتها!!
وطبعا في حلقة السيدات المشغولات جدا ب"ولا" حاجة! ومش فاضيين غير للتليفون ومقابلة الاصدقاء وcommunity  الكوافير 
طبيعي بنسمع "ازيك يا فااافي" - "اهلا يا ديدي اخبارك ايه حبيبتي؟" "fine الحمد لله" - "عملتي ايه في الموضوع اللى كنا اتكلمنا فيه؟! طمنيني!"
الموضوع اللى اتكلموا فيه هوا يا ترى لو صبغت شعرها "هايطقطق" ابيض بسرعة ولا لا!!!
ولو في عروسة في السنتر وفي مدامات قاعدين- العروسة دي هاتبقى تسلية اليوم...كل واحدة من دول تقولها نصيحة وحكمة و"خدي باااالك..." ويقيموا حلقة توعية من حركات ممكن تتعمل فيها اول الجواز من اهل جوزها وهيا متاخدش بالها علشان طيبة ونيتها سليمة (دي اول مرة يقابلوا العروسة على فكرة) وانها ماتبوسش حد في الفرح علشان الميك اب هايبوظ وبلاش تمسح بالمنديل علشان هاتلغوص الدنيا - ولما تروح تشيله بالمنظف مش بالصابون علشان بشرتها تفضل نضرة!! وضروري كريم كل ليلة علشان الستات شكلها بيعجز اكتر من الرجالة فلازم تحافظ على نفسها. نصايح غالية وتوجيهات عميقة المعنى والاعتبار! ولازم تقولها فلانة بنت فلان حصلها كذا علشان مخدتش بالها وفي الاخر ندمت على انها تساهلت مع حماتها وحماها. وعلانة بنت علان اللى جوزها اتعود كل ما يتخانق يسيب لها البيت او يتطاول عليها...من اولها كده يا حبيبتي ادبحي له القطة....ومن غير ما انوه لازم يقولوا كلام ابيح وقليل الادب ... كده بقى ستات خبرة وواعيين وكبار مش مراهقين!!!!
ومفيش مانع طبعا خالص خالص ان الكوافيرة شخصيا تدخل بقى بالكلام بما انها صاحبة "القعدة" وبيكون لها نصيب الاسد في قصص الجوازات الفاشلة (بحكم انها ست خبرة ومسكت دماغ ستات المنطقة كلهم وسمعت منهم!) ولازم الكوافيرة تقول قبل اي قصة "بس معلش يا جماعة دون ذكر اسماء!!" - مفيش داعي اقول ان نص القصص بتكون من محض خيالها الواسع - والنص التانى متزوق ومرشوش عليه سكر وزبيب!
وطبعا لازم ذكر الرجالة بالسوء...كلهم بخلاء...كلهم لسانهم طويل...كلهم بيسمعوا كلام امهم - كلهم اغبياء!! ولو ضحكتي او ابتسمتى او هزيتي راسك يبقى موافقة وجوزك كده!!! ادخلي الكوافير وانتى شايلة ودانك في الشنطة ماتسمعيش لحد!!
الكوافيرة بتمسك شعر الست وودانها! تصب حكاوى وقصص ونصايح وشكاوى ورأيها الشخصي في كل القضايا الساخنة وغير الساخنة في المجتمع! هاتفلفصي منها فين؟؟ شعرك في ايدها!!

لما تروحي الكوافير المرة اللى جاية حطي لسانك في بؤك وخليكي ساكتة - اسمعى وانتى ساكتة - اسمعى منظرة غيرك وانتى ساكتة...اسمعى شكوة الكوافيرة وانتى ساكتة ومفيش داعي تنجرفي ورا مشاركة الغير قصص من حياتك الواقعية علشان هاتلاقي الشارع كله عارف....ولا ورا اغراءات الضوافر والرموش وقص الشعر وخلافه علشان هاتخرجي جيوبك منفضة!!

ريم اسامة
https://www.facebook.com/groups/329904227056535/

السعادة هي...

السعادة ايه يا ترى؟

السعادة هي مج نسكافيه مظبوط على الصبح 

هي طفل صغير يجري عليك لما يشوفك

هي الفستان الابيض والطارحة يوم فرحك

هي اول مرة نلبس الدبلة

السعادة في عين طفل محتاج وانت بتديله شيكولاته كبيرة 

الشعور بالرضا بعد صلاة الفجر

هي اطراء الغرباء على سلوك اطفالك 

هي رضا اهلي عنى وعن تصرفاتي

السعادة في سعادة اطفالي بلعبة جديدة او فسحة 

هي النجاح انك تفاصلي مع بياع في سعر حاجة غالية وتاخديها ارخص كتير عن توقاعتك

وانك تلاقي حاجة ضايعة منك بعد مجهود جبار

هي اذان المغرب في رمضان
والعيال تنام بدري من غير ما تصحى تانى (قمة السعادة حقيقي)
والسعادة شيكولاته مستوردة بالمكسرات والزبيب بعد يوم طويل 
هي النجاح في الامتحان بتقدير كويس 
هي عقد عمل بوظيفة بتتمناها (باي مرتب مش مهم - هوا حد لاقي شغل؟)
السعادة للستات هي الاوكازيون + فلوس لزوم الشراء
هي كلمة حلوة بدون مناسبة
قمة السعادة هي حضن بلا مبرر من ابنك او بنتك ويفضل في حضنك شوية - لمجرد انه عايز كده
هي موبايل مشحون وانت نازل مستعجل
للراجل السعادة احيانا تكمن في سيجارة وكوباية شاي مظبوط في بلكونة بتبص على البحر
انك تلاقي فلوس في جيب الهدوم
تخس فعلا بعد ما تعمل رجيم!
ازازة حاجة ساقعة مشبرة في نهار اغسطس
تكبسي حد غايظك برد مفحم قدام الناس - والناس تضحك عليه كمان !
تلاقي غطا ازازة الحاجة الساقعة او عصاية الايس كريم مكتوب عليا "مبروك كسبت واحدة مجانا"
السعادة ان المرتب يكفي لاخر الشهر!!!
وانك تاخدي عيدية محترمة في الاعياد
جزمة شيك ماتكسرش صوابعك 
هي ان جوزك يقولك "ماتطبخيش النهاردة هانتغدى برة"
هي انك تتفرجي على فيلم على بعضه من غير فواصل اعلانية!!
تروحي لدكتور الاسنان وخايفة تعملي حاجة كبيرة وفي الاخر يطلع التهاب بسيط 
طبعا ومن غير تفكير قمة قمة قمة السعادة انك تلاقي مبلغ محترم في الشارع
في ناس بتفرح ببوفيه الفرح والاعياد الميلاد!! 
السعادة هدية مفيدة ومحتاجينها
هي ان جوزك يكون صديقك المقرب
محلات الادوات المنزلية!
اغنية تفكرك بذكريات حلوة او بنفسك زمان
كتاب تسرحي فيه ويفوت الوقت وماتحسيش
دردشة وفضفضة مع اقرب الناس 
قعدة اخر الاسبوع مع العيلة قدام فيلم مع اللب والسودانى والفيشار
ريحة الشقة وهيا نضيفة 
هدية بسيطة تفرح ابنك اوي
تمشي حافي على الرمل
تلعب باللعبة ام صابون دي وتنفخ فقاقيع كتير
سعادة الستات كتير جدا بتكون في انها تمخمخ هاتنتقم ازاي - ويعجبها الخطة!
يجيلك رسالة "كسبت 60 دقيقة مجانا"
الكحك والبيتيفور بعد صلاة العيد
يكون لك صاحبة دمها خفيف ومتفائلة ومش هايفة!
اتقان لغة تانية 
السعادة في مولود يقفش في صباعك :)
تنط في حمام السباحة في يوم حر نار
هي السفر بره البلد للفسحة
يوم مطر وانتى اجازة من الشغل
صميم السعادة هي حلة محشي ورق عنب
يتقال عليكي "قردة بتفهم كل حاجة"
مشاركة اولادك لعبة وحكاية خيالية
السعادة هي صبح مشمس في النادي في الشتا القارص
عزومة في بيتك والناس يعجبها الاكل
خروجة مع اصحابك وتكمل من غير ما حد يتصل يقولك : هاتيجي امتى؟ العيال بتعيط
السعادة تكمن في لبس جديد يتلبس لاول مرة في مناسبة فيها ناس كتير والكل يعجب الهدوم

السعادة بالنسبة لي اقرا كومنت منكم :)

ريم اسامة 
https://www.facebook.com/groups/329904227056535/

مش طريقي

"امال معالي المهراجا طريقه منين؟" - دي الجملة اللى ببقى نفسي اقولها لكل سواق تاكسي مايعجبوش المكان اللى انا رايحاه ويقولي "مش طريقي" ويسيبني ويمشي!!

مفيش تاكساجي مقالهاش...خصوصا في الزحمة...تلاقي الناس واقفة طابور وكله يشاور وهوا زي البنت اللى عندها 16 سنة تتأمر وتتلكك على كل عريس...البيه ابو عداد بيتامر على الزباين....لو في نفس المنطقة "مش طريقي"...لو اخر الشارع "مش طريقي" لو الدائري "مش طريقي" لو الكورنيش "مش طريقي" .... امال انت طريقك ايه؟؟؟ الزراعي؟
وبعدين اول كام زبون يقول مش طريقي ..اللى بعدهم يشاور براسه "لا"...وبعدين يشوح بايده ....بعد كده مش بيبص اصلا على اللى واقف ولما يسمع مكان مش عاجب جنابه يمشي من غير ولا حرف ولا اشارة! خلاص بقى انتوا هاتزهقوا الراجل؟ مش كفاية بيسوق!! خلي عندكوا دم!
التاكسي لازم يكون عربية "مدندشة" وكلها شخلعة...من كام سنة كانت موضة الكلب ابو راس بسوسته...طول ما العربية ماشية الكلب بيهز دماغه...والبرابريز كله مرايات صغيرة...ومفيش مانع من قلب وسهم ونور بيرعش....ولو السواق ده برنس في نفسه كده وروش بيخلي نور الصالون احمر او ازرق!! وطبعا الكنبة اللى ورا هوا مش مهتم بيها لانه مش هايقعد عليها! مفيش مانع سوسته تخرم البنطلون او بقعة اي حاجة تقفش في الهدوم ماتطلعش...او تكون الكنبة هابطة ونقعد ماسكين ركبنا...وطبعااااا على طول السواق مرجع كرسيه لورا خالص لدرجة ان ضهر الكرسي لازق في الكنبة...فلو ركبتوا اكتر من واحد على الكنبة المظلوم اللى هايجي حظه ورا السواق ده مكتوب له الجنة....مفيش مكان يحط رجليه فبيقرفص او يقعد ورجليه مع رجلين زميله على الكنبة...او يمدد نص تمديده كده على الكنبة....ومفيش داعي اذكر ان لازم بيكون السائق المبجل شايل يد ازاز الشباك اللى ورا علشان محدش يلعب فيها وعلشان تفطسوا بالمرة ويخلص من قرفكوا!
التاكسي عايز يمشي مترين وياخد فلوس مشوار لمحافظة تانية...مفيش تاكسي عجبه الفلوس اللى خدها..ايام التاكسي ابو من غير عداد اتبهدلنا جدا...لازم ندي له فلوس تملى عينه علشان مايشتمش في وسط الشارع ...او اللى عنده نفس يتخانق بقى يتفضل يتخانق!
وانا شخصيا ليا مواقف كتييييييير مع التاكسات!
مرة كنت عايزة اروح مشوار واول ما ركبت ولسه ماوصلش الناصية اللى بعدها افتكرت انى نسينت حاجة في البيت فقلت له معلش اقف انا هانزل مش هاكمل....واديت له فلوس (قليلة طبعا علشان هوا مامشيش اساسا) فقالي بكل جوارحه "بدل انتوا كحيانين كده بتراكبوا تاكس لييييييييييييييييييييييييه؟؟؟" فرج عليا خلق الله جميعا علشان نص جنيه كان طمعان فيه زيادة!! نص جنيه!!!!!
مرة تانية كنت متخانقة جامد اوي في الشغل وطالع عيني وفعلا مش طايقة دبانة تعدي من قدامى...ركبت تاكسي ودفعت اللى بدفعه كل يوم في نفس المشوار...مكنش عاجب الافندي....بس بقى...وعليها! ماصدقت مبرر اطلع قرف اليوم في شئ حي قدامي! بس اللي فكراه ان اخر جمله قلتها  "هوا ده اللى معايا ولا مش عاجبك؟؟؟؟؟؟؟؟؟؟؟؟" بص قدامه وسكت :)))) وكان رد فعل غريب من سواق تاكسي...خسارة كان نفسي اكمل خناق! ياللا نصيب!
مرة برضه ركبت وسواق التاكسي ركب الوش الوقور وطبعا كان في مقدمة دينيه مختصرة وقالي "تحبي تعملي خير"....مردتش عليه بس هوا مكنش مستنى ردي...عرض عليا مشكلة مش عارفة مين كده زميلهم بيشتغل على عربية برضه وهايعمل عملية مش عارفة ايه وهاتتكلم كذا الف جنيه وهما معاهم كذا الف وناقص اربع الاف ولو تحبي تشاركي وتعتبر ذكاة عن صحتك وصحة عيالك وفضل يرغي كتير...انا مدتوش حاجة (الواحد بيسمع عن النصب اكتر ما بيسمع الاذان دلوقتي) وقلت له ربنا يشفيه ولما جيت انزل قلت "سلام عليكم"...مردش السلام!! سلم لي على التدين
مرة برضه كنت راكبة تاكسي الصبح بدري وكان راجل كبير في السن وقالي "افردي وشك شوية...كده العرسان هاتطفش ويقولوا عليكي وش نكد" :)))
وفي سواقين ناصحين...يلفوا في جميع الشوارع الداخلية بحجة تفادي الزحمة في الشوارع الرئيسية واساسي كل ده علشان يزود العداد...والسادة الافاضل وهما بيسئلوا فين بالظبط هاتنزل...فانت تقول اكتر علامة مميزة في المنطقة...هوا بيمسك في الكلمة وينزلك في المكان ده ولما تعترض وتقوله مثلا قدام شوية او اول يمين...بتلاقي المزدوج بتاع مازنجر طلع في وشك...مش انت اللى قلت هنا؟؟؟؟؟؟؟؟ وبيكون قدامك اختيارين...يا تنزل وتتمشى (واهو رياضة) وخلاص....او تصمم وتستحمل انه ممكن جدا يسمعك سيرة الست الوالدة او الوالد بعد ما ياخد منك الفلوس! وهنا في اختيارات كتير...مش هاعرضها مراعاة لمشاعركم وتجنبا لقسوة المشهد!
البنات والستات خبرة في ركوب التاكسي...البنت تتصل باي حد (او ممكن تمثل انها اتصلت بحد) وتقول بصوت واضح وعالي ومسموع "ايوة يا فلان...انا جاية في الطريق اهه اديني ربع ساعة بس...اه في تاكسي....رقمه كذا كذا كذا...هابعتهولك في رسالة حاضر"...وهنا بترهب السواق وتخليه يفكر مليون مرة قبل ما يتهور ويعمل اي حركة كده ولا كده...وبرضه بيختاروا راجل كبير في السن...بيتفادوا الشباب قدر الامكان (ساعات طبعا بيكون مفيش اختيارات ولو عربية حنطور وافقت على المشوار هاتنط عليها)...وساعات الست او البنت تقفل الباب نص نص...الي يعنى قفلته علشان لو السواق قفل السنترلوك تقدر تفتح الباب وتنفد بجلدها...بس للاسف نور الصالون بيفضح الباب المفتوح "الباب من فضلك!"...ستات كتير وانا منهم بنمسك شنطة ايدها طويلة علشان لو عمل اي حركة غدر اخنق السواق من ورا بايد الشنطة (الافلام الاجنبي بتدي ثقافة برضه للانسان والله) او بتشيل سلاح صغير (سكينة مطبخ صغيرة او self defence...او صاعق كهربا)...والمرأة بترفض اي حد يركب تانى معاها...او انه يرغي معاها في السياسة او حال البلد او الحالة الاقتصادية....الست بتعمل ودن من طين والتانية من المهلبية! 
سائق التاكسي بيحب يرغى مع الزبون..ماهو من حقه يتكلم ويرغي ويشتكى او يناقش مش ممكن اليوم كله هايفضل اخرس!...بصراحة السواق غلبان برضه....طول النهار على الاسفلت ورجليه متشعلقة على الدواسات...بيلف المحافظة ليل نهار...بيته وحياته جوا العربية بكرسيها الممل والقعدة الرخمة والزباين اللزجة اللى بتفصال في الجنيه ومش هاننسى صاحب العربية اللى بيتهمه دايما انه "بيحمرأ" في اليومية...واي حادثة بتكون علي حسابه او يتهزأ بتمنها! وغير انه متهم دايما باهدار الوقود (اي كان نوعه) او انه بيلعب في العداد او مش بيشغله مثلا!! اكيد سواق التاكسي مجبر على الشغلانة دي علشان ملقاش غيرها...وشباب كتير متعلم وفي وظائف ثابته بيشتغل بعد الضهر على عربية لزيادة الدخل ولتسهيل الحياة على اسرته او عائلته...احنا مش هانظلم السواقين (وهم اكثر احتراما وتمدنا وادبا مثلا من سائقي الميكروباص)...بس بمرور الوقت بيتصرف السائق بمبدأ "اخطف واجري"....او "الجنيه احسن من عينك"...احتمال الاعباء الكتيرة اللى اضطرته للوظيفة دي بتملى عليه جزء من اخلاقه وشخصيته....او ممكن بمرور الزمن وكتر المواقف الصعبة والناس الشنيعة اللى بتمر بيه بتخليه شخص عنيف حاد الطباع....ياخد حقه بايده! 
ربنا يرزق التاكسجيه ويبعد عنا لسانهم :)

ريم اسامة
https://www.facebook.com/groups/329904227056535/

بتدورى على حاجة معينة؟؟

معظم الستات بتنبسط  اوي او بتغير الموود الوحش بالshopping! مفيش ست مش بتحب تشتري! سبحان الله ! هي حاجة كده في التكوين...عايز تبسط ست اديها شوية فلوس وقولها "فرتكي ابوهم" هاتنبسط هيا اوي.

بس اللى بيعكنن على الست فرحة الشوبنج هي البائعين والبائعات! تلاقي الواحدة من دول لازقة في قفاكي وانتى بتتفرجي على اي حاجة في اي محل حتى لو محل شباشب بيت بلاستيك! اصلي مش هاخد فردة واجري! والله حصلت مرة الراجل وقفني بصوت عالي "يامداااااااااااااام انتى رايحة فييييين؟" - كنت واخدة فردة جزمة لابني علشان اجيب مقاسها وخدت الفردة (بتاعتي) ومشيت...افتكرني مقلبة منهم فردة وبسرقها!

طيب بمخك الزفر ده...هاعمل ايه بفردة جزمة واحدة؟ هاعلقها في العربية علشان تمنع الحسد زي اخواتنا سائقين التاكسي؟ ولا هاخليها تجيب لي الحظ؟ عالم غريبة!

مرة دخلت محل هدوم وكانت معايا اختى وكنت انا ساعتها حامل في الاواخر كده ومبقللة ومبعجرة وكلي انبعاجات وهضاب وتلال...المهم اختى كانت في البروفة وانا بختار لها بلوزة عجبتني...شديت البلوزة من العرض من هنا لقيت بنت في لمح البصر جنبى وبتسئل بمنتهى منتهى منتهى الانزعاج "حضرتك هاتقيسي دي؟؟؟؟؟؟" - البلوزة اصلا لو كنت حاولت البسها كانت هاتدخل في دماغي ومش هاتعدي مناخيري .... فهيا خافت البلوزة تنفجر واسيبها وامشي! لما فهمتها ان في واحدة معايا بتقيس جوا تنفست الصعدااااء وابتسمت من غير ما تعتذر ومشيت سعيدة انها مش هاتدبس في تمنها!

ولما تدخلي محل تلاقي واحد مجند نفسه يبص انتى نظرك رايح في انهي ناحية وعينك وقعت على ايه ويقولك الوانها واشكالها واسعارها او يلاحقك "بتدوري على حاجة معينة؟" وحتى لما تقولي له انا بتفرج بس برضه بيجي وراكي "يفرجك" على المحل! حاجة مملة والله اوي.

ولا لما تدخلي محل وتسئلي عن اي حاجة تلاقي الانسة من دول تبص لك اوي كده في اتخن حتة عندك وتقولك بكل تعالي "مفيش مقاسك اصلا عندنا!!" بكرة تتخني يا بعيدة وماتلاقيش شوال مقاسك!

برضه محلات الاكل تلاقي الباشمهندس الجارسون واقف انتباه مستني جنابك تختاري هاتطفحوا ايه! انتى تتلخطبي وبتحسي انك متراقبة فبتطلبي اي حاجة في السريع على ما تدرسي المنيو كويس...او تقولي "معلش شوية كده" او "معلش مستنيين ناس" او "شوربة على ما اختار الطبق الرئيسي" وبعدين لما تختاري الطبق الرئيسي بيسئلك حاجات على شاكلة "اكسترا تشيز extra cheese و عايزة الصوص ايه؟" ويرص لك اسماء الصوصات المسخرة اللى عندهم وانتى طبعا ابتسامة عبييييطة وتقولي له يجيب اللى فهمتيه...مش اللى انتى عايزاه لانك اصلا مش فاهمة! ولازم طبعا بيتكلم بصوت واطي...مفيش اي مراعاة للطرش اللى عندنا!!
انا عارفة انه متنبه عليهم يتكلموا بصوت واطي علشان محدش على table تانية (زي ما بيقولوا - بيرفضوا يقولوا ترابيزة معرفش ليه) يسمع الorder (الطلب زي ما احنا بنقول يعنى) بتاعنا!! مع ان مفيهاش حاجة ... انا اخترت اكل في مكان عام يبقى طبيعي جدا يكون في ناس غيري!! وطبيعي يشوفوا احنا هاناكل ايه!! شئ بديهي جدا!
النهاردة دخلت محل ادوات منزلية وكان اللى واقف في المحل راجل كبير شويتين....لقيت بتاعه كده عجباني بس مفصولة عن ورقتها...الورقة كان مكتوب عليها عشرة جنيه...فمش متاكدة هيا بعشرة ولا دي ورقة منتج مختلف....فسئلته "هيا دي بعشرة جنيه؟"...الرد الطبيعي يكون ايه؟ ممكن مثلا يقول "ايوة بعشرة"...او يهز دماغه...مش هاعترض والله لو بص الناحية التانية حتى...عارفين قالي ايه؟ قالي "هوا مش مكتوب عليها برضه؟؟؟ بتسئلي ليه بقى؟؟؟؟" !! يا نهار احرااااااااج!! انا كنت عايزة اشتكي لادارة المكان بس قلت في سري...ايه اللى هايخلي راجل في السن ده يقف في محل حلل وعلب تلاجة؟ فقصرت الشر وخدتها وانا حاسة بناااااااااااار في دماغي من رخامته وقلة ذوقه!
ولما تدخلي محل تشتري بلوزة ولا بيجامة ولا اي حاجة وتقولي للي واقف انك عايزة مقاس كذا من الموديل الفلاني ويقولك "بس ده غالي شوية" ... بيكون على طرف لسانى اسئله "هوا انا شكلي معفن لدرجة انى مش هاقدر اشتريها؟؟"...في الموقف ده بتنح بقى وبدي وش الغباوة! - الحركة دي بتنفع على فكرة...جربوها
وكلنا عارفين ان المحلات كلها بقت تفتح على الضهر كده...فلما تنزلي وتدخلي اي محل بتلاقيهم يا بيمسحوا او بيفطروا...وفي الحالتين بتخرجي من المحل تانى وتستنى لحد ما بسلامتهم يخلصوا اللى بيعملوه ويتنازلوا ويستقبلوكي
في نوع بقى لما تسئليهم عن اي حاجة يردوا بأقل القليل من الكلمات بصوت واطي قرفان وهما باصين الناحية التانية! تقولوش بنشتري من دولابهم الشخصي!
اخر مرة جربت اشتري صندل قلت للى واقف لو سمحت عايزة مقاس كذا...جاب لي فعلا بس كان صغير جدا لدرجة ان نص كعبي بره...قلت له مفيش اكبر شوية؟ قالي حضرتك بقى لازم تدوري في القسم الرجالي ها ها ها ها....اقول ايه بس وانت فيك كل العبر!!!!
قدام الشغل كان في واحد بيجي من مخبز قريب وبيبيع منتجات المخبز...وكنت اتعودت اجيب منه فطار...فمرة كنت رايحة الشغل في اتوبيس الشغل والاتوبيس وقف علشان ننزل...وقدام كل الناس لقيت الشخص ده بيشاور لي اوي كده وبصوت ولا صوت مدفع رمضان "ازيك يا استااااااااااااااااااذة كنتى فين امبارح؟؟"
مش عارفة هوا انا حظي وحش ولا فعلا كل السادة البائعين كده!

ريم اسامة 
https://www.facebook.com/groups/329904227056535/

على قد لحافك مد رجليك

"على قد لحافك مد رجليك"

مقولة قديمة محدش بيعمل بيها دلوقتي

مبقاش خلاص ينفع تعيش على قد اللحاف!! متطلبات الحياة بقت مختلفة جدا عن زمان 

المدارس مبقتش باتنين جنيه ونص زي ايامنا احنا

ولا المصيف بقى بلطيم والعصافرة وراس البر ومصطفى كامل 

ولا الفسحة بقت جنينة الحيوانات والاسماء وحديقة الاورمان او النوادي

اللعب كانت رخيصة وفي متناول الجميع كان على ايامنا احنا (جيل السبعينات والتمانينات) مرفوع عنها الضرائب والجمارك
الطبيعي ان كل الناس تاكل في البيوت مفيش اكل بره
مكنش في اختراع اسمه "المول"
وكان الناس كلها بتلبس من وسط البلد من المحلات العادية 
ارخص هدوم كانت هدوم الاطفال
كان عادي جدا الناس تتقبل ان الست تلبس من صنع ايدها (خياطة او تريكو او كروشيه) ومايتقالش عليها كلمة نص نص - مكنش في ماركات وحركات 
الكتب كانت ارخص حاجة 
المجلات كانت بحاجة هايفة لا تذكر والستات كانت بتجيب كل المجلات اللى بتنشر كل اسبوع
السينما كانت في متناول الجميع وكل اسبوع كمان 
الشوارع كانت امان وكان الطبيعي الناس تنزل تتمشى تتفرج على المحلات وتاكل ايس كريم وتروح
دلوقتي بقى!!!: 
اغلى حاجة في حياتنا هي المدارس! لان المدارس الحكومي والتجريبي ماتعتبرش تعليم اصلا ! انا كنت مدرسة تجريبي ويا سلااام على الفخر انى مدارس لغات!! 
المصيف يعنى الساحل (ده الشائع) بمختلف مستوى القرى اللى فيه ومهما كانت القرية على قد الحال فالايجار غالي برضه وسعر الاكل مش رخيص اطلاقا...وايجار العجل....القعدة على الكافيه على البحر...نزول البحر نفسه بقى مكلف (ايجار كراسي وشمسة والحركة الحقيرة بتاعه الشمسية معاها كرسيين بس فالواحد بيأجر اكتر من شمسية!) 
الفسحة  التقليدية بقت نروح المول وناكل في اي مكان ونشتري من المحلات اللى هناك ونجيب لعب للعيال او بلالين هيليام  ونأجر عربية للاطفال (بالساعة طبعا) غير بقى بتوع الحلويات الملزقة اللى في كل ركن وناصية...في امهات دلوقتي احتراف هروب من الطرقات الداخلية للمول علشان مايقابلهاش ولا واحد من دول لحد ما توصل للاسانسير!

دلوقتي بقى صعب على اي اب او ام يلاقوا اطفالهم اقل من باقي الاطفال في العيلة او من اقل من عيال اصحابهم او زمايلهم في المدرسة والحضانة!
المدارس دلوقتي بقى فيها تنافس غريب اوي على احلى شنطة واغلى كووتشي واحسن lunch box وكل حاجة من دول طبعا طبعاا طبعااااااااااااااا عليها الشخصية المفضلة للطفل - ولازم يكون الlunch box والزمزمية والشنطة  والمقلمة نفس الشكل واللون والزفت الطين الشخصية!!!!!
غير بقى الرحلات اللى كل شوية والحفلات التنكرية ولازم وضروري كل مرة يطلع الافندي او الهانم بشخصية مختلفة عن المرة اللى فاتت ومختلفة ومميزة عن باقي الاطفال!!
طيب مش كل دي مصاريف؟ طيب يعني المفروض نجيب منين؟ نضرب الارض تطلع بطيخ؟
ودلوقتي الهداية خدت منعطف خطير وغير قابل للنقاش! هديتك للمدرسات في الحضانة والمدرسة بتدل وبشدة على احترامك وتقديرك للمدرسات ولا هاتجيبي حاجات رخيصة وتفضحي نفسك وسط المدرسات كلهم انك ام "إيحة ومعفنة" ؟
اكيد هاتجيبي علشان حتى شكل ابنك يبقى شيك وسط باقي المزاغيد!
وحفلات الاعياد ميلاد برضه خدت شكل مبالغ فيه...لازم التورتة عليها الشخصية المفضلة للطفل او صورته هوا شخصيا ومش هاقول باقي الحركات من بالالين وشخصيات وعفاريت زرق علشان المساخيط ينبسطوا!! 
وبعدين لازم في الجو الولعة ده ضروري وحتما تكييف في العربية واوضة النوم والليفينج ! التكييف فعلا مبقاش رفاهية والله 
والتكنولوجيا بقت مكلفة اوي كمان - ودي مبقتش كماليات برضه ... يعنى الموبايل والكمبيوتر والتليفزيون الLCD علشان الاشعة الضارة اللى بتطلع  على الاطفال!! وغير طبعا اللى بيفضل انه يجيب tab  او ipad
حتى يا ربي الهوايات اللى بتنمى الشخصية بقت غالية اوووي - خدتوا بالكوا كتب الاطفال بكام؟ طيب بلاش الاطفال...شفتوا الكتب العادية بكام؟؟ شفتوا المجلات بكام!! فبند القراءة ده بقى ملغي في معظم الاسر المصرية ماعدا الناس المواظبة على معرض الكتاب.
وحاليا المواصلات ابشع وسيلة لتعذيب المواطنين...خاصة السيدات والانسات! فبناخد تاكسي....التاكسي بيتكلف كام بقى في المشوار؟؟ "كتير!" - الحل البديل هو عربية بالتقسيط على سنوااااااااااات كتير....وكده دخلنا بند تانى خالص في مصاريف البيت من بنزين وصيانة وكاوتش وترخيص وتغيير زيت ...الخ الخ الخ
مفيش اي حاجة في حياتنا بقت "على قد الايد"...كل حاجة بره اللحاف اللى المفروض نمد على مقاسه رجلينا!!!
السؤال بقى: نجيب فلوس منين؟ ويا ترى احنا فعلا جيل متدلع زي ما الاكبر مننا شايف؟ ولا احنا جيل بنشتري بالدين (فيزا واقساط وقروض؟)  علشان نعيش حياة كريمة وطبيعية؟
طيب لو استغنينا عن الرفاهية زي اعياد الميلاد المكلفة والموبايلات الغالية والتكييفيات في كل الاوض واكتفينا بتكييف واحد في الشقة ...هاينفع نستهون بمدارس الاطفال ومستوى تعليمهم؟ طيب هما ذنبهم ايه يحسوا انهم اقل من زمايلهم؟ حتى لو حاولتي تعوديه مايبصش على حاجة حد...مش هاتعرفي تسيطري على كل حاجة مايبصش عليها...لازم تملي عينه بحاجات تعجبه زي اللى بتزغلل عينه في المحلات وفي ايد زمايله!
احنا جيل مظلوم ولا مفتري؟
ربنا يسد الديون من على الناس كلها ان شاء الله 

ريم اسامة 
https://www.facebook.com/groups/329904227056535/