الشماعة

 طبيعة بشرية في ناس كتير جدا انها تعلق اخطائها على ناس تانية ...على اي شماعة حواليه...بس هوا يطلع جميل وسليم ومعملش حاجة غلط.

هاتلاقي النوع ده منتشر في علاقتين...الجواز...والشغل! في البيت هاتلاقي الراجل مش بيغلط تقريبا!! هوا كائن مميز قليل الخطأ..ولو هوا غلط فده رد فعل لافعال مراته طبعا...اللى عايزة قطم رقبتها!!!

ازاى يعنى الراجل يبقى غلطان لو نسى عيد ميلادك ولا عيد جوازكم؟ هوا بيشتغل!! اهو الموضوع ده اصلا اكبر شماعة اخطاء في الجواز...اي تقصير من الراجل في البيت على طووول يجرى على شماعة الشغل...انه مشغول جدا في مشاكله هناك وان الشغل واخد كل تفكيره...ماهو بيشتغل علشانكم....علشان البيت والاولاد وطلباتكم يا جاحدة!! انما هوا مش بيغلط طبعا...ده بيتعب يا حرام!!

ولو مثلا تعامل بطريقة غير لائقة مع مراته...ماهو من عمايلها! ماهو من مشاكلها وطلباتها وعدم تقديرها لمجهوده طول اليوم (بيهد الجبل ويبنيه تانى زي ما كلنا عارفين طبعا طبعا)...ماهيا لو كانت مهتمه بيه اكتر من كده كان افتكرها...ماهيا لو كانت واخدة بالها من نضافة البيت والاكل والغسيل والنضافة ومذاكرة الولاد ومشاوير التمارين ومحافظة على هدوء البيت ومرفعتش صوتها في وش العيال...كان باله بقى رايق وافتكر عيد ميلادها....بس طبعا الست غلطانة...اخص عليها اخص!!!

في الشغل الموظف الصغير هوا السبب ايا كان الخطأ! معروفة...المديرين مش بيغلطوا طبعا. ولو غلطوا فهما غلطوا بسبب سوء تصرف الموظف التافه الصغير ابو من غير لقب ده! انما المدير يغلط؟؟ نو نو طبعا..والف نو كمان! 

لو المدير عامل الموظف الصغير وحش ...ده مش بسبب انه شخص متسلط مثلا؟ لا...هوا ده مقام الموظف...هوا بيحطه في مكانه...لو هوا عاملك وحش لازم تحس بالذنب على الخطا اللى انت معملتوش...لازم تعتذر عن حاجة انت متعرفهاش اصلا...لازم تتجاوز عن سوء المعاملة علشان انت حقير وهوا مدير...علشان انت اكيد مقصر في حاجة بس مش واخد بالك منها...المدير رد فعل...معروفة!

يا جماعه احنا مش شماعات....احنا بنى ادمين...كلنا مفيش حد احسن من التانى...لو كان الراجل بيشتغل فالست بتشتغل اكتر منه خمس مرات على الاقل...لو الراجل عامل مراته وحش فده معناه انه متسلط! مش انها غلطانة!! ولو الست قبلت بالمعاملة السيئة ده معناه تقصير في حق نفسها وتقصير في احترامها لذاتها...محدش يرضى بأقل من اللى يستحقه...مهما كان...اتخانقى...ارفضى...ازعلى وخدى موقف...كفاية بقى "انا مش عايزة نكد في البيت"...ماهو برضه في نكد على فكرة بس في دماغك انتى لوحدك...الدنيا جميلة وانتى بس اللى بتعانى! ويوم ما تنفجرى وتيجي تتكلمى ...يتم اتهامك ان حد سخنك على جوزك. اتعودى كده من الاول تقفى وترفضى اي معاملة غير لائقة.

وفي شغلك برضه اعترض على المعاملة اللى مضايقاك دى...حتى لو اضطريت انك تسيب مكانك وتروح مكان تانى تبدأ من الاول...هاتبقى نفسيا افضل كتير...كله شغل...الاقدمية لو مش هاتضيف لك في حياتك يبقى مالهاش لازمة. الاستقرار النفسي اهم بكتير جدا من حاجات كتير فالصو احنا ماسكين فيها...لو مكانك مش بيقدم لك الاحترام اللازم يبقى تسيبه...ربنا هايحاسبك على روحك اللى انت سايبها تتهان دي وتعانى علشان ماسك في شوية معتقدات سخيفة مالهاش قيمة.

ربوا اولادكم على كده...محدش يهين ابنه او بنته بدعوى "انا مضغوط وانت مضايقنى"...اللى بيتربى من غير كرامه بيفضل طول عمره شماعه!

واحنا مش شماعات!!

ريم اسامة

لينك المدونة على الفيسبوك:

https://www.facebook.com/groups/329904227056535

الحوجة

 "ربنا ما يحوجك لحد" دي من اجمل الجمل اللى احب اسمعها...واحب ان حد يدعي لي بيها.

فعلا ربنا ما يحوجنا...ماديا او صحيا او نفسيا او اي ناحية اخرى من نواحى الحياة.

الحوجة بتخليك تحس انك عبئ ومكسور ومطاطى راسك...الحوجة بتحسسك بالغدر.

الوجه الاخر للعملة هو "كن للناس عونا"...الحوجة والعون وجهان لعملة واحدة...النهاردة انت عون...بكرة انت محووج!!

للاسف هى دي الحقيقة...وعلشان لما الدور ييجي علينا نتحوج...لازم نعمل حساب اليوم ده. 

اولا لازم ناخد بالنا من صحتنا...وزي ما بيقولوا كده..."البنى ادم تقيل"...فعلا...الواحد بيحس انه تقيل لما يمرض ويحتاج رعاية واهتمام حتى لو لفترة قصيرة...الشعور ده بيسيب وراه اثر في النفس..اثر مر! 

فلازم نهتم بصحتنا....مش هاقول بقى وزن مثالي ورياضة يومية وخلافه...لكن...على الاقل اتأكد انك تقدر تستغنى عن العربية وتعمل مشاويرك من غيرها...او انك تقدر تستغنى عن الاسانسير...او اي من وسائل الراحة المتوفرة لنا بكثرة. كل فترة كده استخدم السلالم بدل من الاسانسير...امشي بدل ما تركب...الحركة بركة...وفعلا مش بتكلم عن وزن او شكل مثالى...ولكن بتكلم عن حالة الجسم واستعداده. لو مشوار قصير امشى...كرر الموضوع ده قدر الامكان...بلاش جسمك يتعود على الرحرحة والاعتمادية. والاستمرارية دي هاتحسن من صحتك العامة ومن مقاومتك لاعراض كبر السن المبكر. 

مش عايزة اقول كلام رخم بتاع نظام الاكل والوجبات المتكاملة...لكن على الاقل اتأكد انك كل يوم بتشرب مياة كفاية...وبتاكل خضار او فاكهة...حتى لو قليل...لكن لو بشكل يومى...هايفرق جدا في الصحة على المدى الطويل.

كلكم عارفين التعليمات العامة...انا مش عايزة اكررها...ولا اكون مملة...ولكن...الحوجة وحشة يا جماعة اوي.

اكيد هاتحس بالمعنى الحرفى للحوجة لو اتوفى لك حد...لما تلاقي الكل اختفى!! كده مرة واحدة بدون سابق انذار...يا سلام بقى لو انت اساسا كنت متعشم في حد!! شعور مؤلم جدا جدا لاقصى حد...شعور انك منبوذ...ومغدور...وكمان وحيد! اللى مات له حد (بعد الشر عنكم جميعا) بيبقى عايز اي حد ياخد بحسه...اي حد يسأل عنه...بيكون مستنى السؤال...اللى بيكون زي الطبطبة كده على النفس. بنكون محتاجين الللى يسمع...يستحمل الشكوى غير المنطقية...يسمع شعورنا بالذنب غير المبرر...يسمع السخافات دي كلها بدون صد او زهق...الحزين عايز يتكلم ...مين قال ان الحزن صمت وعزلة؟ الحزن فضفضة مكررة...الصدمة بتسيب الواحد بدون جزء من عقله وتركيزه...بدون جزء من المنطق السليم! استحملوا اصحابكم...اسمعوا من غير ملل ومن غير اصدار احكام! المحووج ده شخص ضعيف جدا....وضعفه يكمن في احتياجه للاخرين! 

وفي طبعا...خيبتنا كلنا...اللى مش عارفين لها حل نهائي...الحوجة المادية...ولكن احنا لازم برضه نتحايل على الموضوع او بدل ما نتزنق من نص الشهر...نتزنق اخر اسبوع...الحلول كتير...والافكار اكتر...ولكن اكتر فكرة حسيت ممكن تطبيقها هو اننا لما نقبض نطلع كل الالتزامات الاساسية الثابتة...زي الجمعية والاقساط وخلافه...وبعد كده نشترى التزامات البيت الشهرية الثابته...وبعد كده الفلوس تتقسم اربعه على الاربع اسابيع...كل اسبوع نستخدم الجزء الخاص به...وحتى لو خلص...مش ازمه...في فلوس الاسبوع اللى بعده...الفكرة احلى كتير من انتظار قبض الشهر الجديد. وبرضه الستات عندهم افكار مبدعة في تدبير اكل كل يوم وتوفير جزء من وجبة النهاردة يتعمل بيها وجبة جديدة تانى يوم وهكذا.

طولت عليكم معلش :)

ريم اسامة 

لينك المدونة على الفيسبوك:

https://www.facebook.com/groups/329904227056535/member-requests

الحب المهلك

 مفيش ام مش بتحب اولادها...اى ام على استعداد تام تاخد اي خطر بدلا عن ابنها او بنتها

ولكن في ظاهرة شديدة الخطورة ممكن تسبب المرض النفسي للاطفال بسبب الامهات اللى بيحبوا اولادهم اوى اوى دول

الام اللى بتخاف على ابنها من اي نسمة هوا...او انه يشيل حاجة تقيلة او انه يرهق او انه يفكر في مشكلة او انه يصاب حتى بنزلة برد...او انه يواجه مشكلة من اى نوع...الام اللى معيشة اولادها في فقاعة وهمية معقمة عن باقى المجتمع ومشاكله وقسوته...الحقيقة هي مش بتحمى اولادها...هى بتحطهم في الفرن!!

الطفل اللى مش بيتعامل بنفسه مع مشاكله الصغيرة اليومية بشكل دورى...هايكبر يبقى انسان مصاب بالقلق المرضى...هايكبر ويبقى انسان متوتر اوى اوى...بدون سبب بديهى او اسباب منطقية.

الطفل المدلل ده لما يواجه الحياة بطوله...لوحده بدون سلاح الثقة بالنفس...هايتعب جدا...مفيش اى داعى نعقم اولادنا...بالعكس...احنا لازم نكون متواجدين دايما ولكن في الضل! مش لازم يعرف اننا هانتدخل غير في اخر لحظة لما فعلا نلاحظ ان الطفل مش عارف يتصرف...او انه حاول يتصرف كتير ومش عارف يحل الموضوع...هنا فقط نتدخل!

يعنى مثلا...مفيش اي داعى تحضرى له شنطة المدرسة...سيبيه ينسى كتب في البيت...سيبيه يتهزق مرة واتنين....هايتعلم من نفسه ياخد باله من حاجته وجدوله.

بلاش تشيلي عنهم شنطة المدرسة...الشنطة ومحتوياتها دي مسئولية الطفل...يقدر يقرر يسيب كتب ايه في المدرسة ويرجع بانهى كتب...يركز في الجدول وياخد الكتب المحتاج لها فقط علشان الشنطة تخف شوية عن كتفه...او انه يختار من الاساس شنطة بعجلات او خفيفة...احيانا فعلا بيكون مش بمزاج الطفل ان الشنطة تكون تقيلة...بس سيبوا الاولاد تتصرف.

لو تعرض لمشكلة مع زميلة في المدرسة....ليه تتصلى بام الطفل التانى وتمسحى بكرامتها الارض وتشككى في قدرتها على تربية ابنها؟ احنا كلنا بنشوف النموذج ده كتير جدااااااااا في جروبات الواتساب بتاعة الفصول...الام المفروض تدخل لو في مشكلة مع مدرسة الفصل...او حد كبير او مشكلة كبيرة....لازم الام والاب يبقوا كروت ارهاب مش اي وقت تطلع وتتحرق. تدخل الام والاب بيكون لسبب كبير اكبر من تصرفات الطفل.

لو ابنك في الحضانة ووقع واتجرح...ليه تروحى الحضانة وتهدى الدنيا؟ ما يقع!! ما صعب برضه انهم يكتفوا 

لما ابنك يلعب ويتشاقى شوية...حذريه مرة...واتنين...وبس! سيبي ابنك يواجه مصيره لو اتخبط او وقع...وحتى لو وقع واتجرح...نقلل من حدة التأنيب...هو كده اتعلم الدرس من نفسه بدون توجيه اي لوم منك....كل ما عليكي هو تطهير جرحه ونصيحة بسيطة "ابقى خد بالك من نفسك" وفقط! 

الطفل اللى بيواجه اللوم الكتير مع الكثير جدااا من الحماية المفرطة بيكبر وبيعانى بشدة.

لانه ببساطة اتعود من الصغر والنشأة الاولى ان في حد اكبر واقوى منه بيحميه ويبعد عنه الخطر.

الطفل ده لما بيكبر بيتعب نفسيا لما يتجرح بجد نفسيا وجسديا ويكتشف انه لازم يواجه العالم لوحده...من غير حماية ماما او بابا...من غير حتى ما حد يحذره من الخطر القادم.

ربوا اولادكم يواجهوا مشاكلهم الصغيرة من دلوقتى...علشان يبقى اتعود يواجه الحياة الصعبة لما يكبر...التعقيم ده هايجيب لهم امراض نفسية...ده مش حب...ولا حماية...ده هلاك!

ريم اسامة 

جروب المدونة على الفيسبوك:

https://www.facebook.com/groups/329904227056535