احنا شعب حبوب كده وقلبه كبير - وفضولي اخر حاجة :)
في حاجة "نظريا" اسمها المساحة الشخصية ....space زي ما بيقولوا الخواجات...المفروض دي مساحتك الشخصية وهي حاجة ملهاش علاقة بالحرية....هي مساحتك الشخصية اووووى اللى مش من حق حد خالص مهما كان انه يقتحمها (حتى الاهل والازواج والزوجات)...معظم الناس بتتعامل مع المساحة دي انها مكان انتظار سيارات! مش موجودة والفكرة نفسها بالنسبة لهم مضحكة وكوميدية وبايخة.
تقف على مايكنة فلوس - ATM يعنى - تلاقي دماغ جنبك ... باصص على الشاشة يبص على المبلغ اللى هاتكتبه او على كشف الحساب...فضول...حقد....رزالة...ماتفهمش اللى بينقر الشاشة بعينه ده هايستفيد ايه...واحساسه ايه واللى واقف يسحب فلوس عمال ينفخ ويبص له في عينه يمكن يحس على دم اهله..ابدا...مايهمدش غير لما يطلع بمعلومة لنفسه...مش هايعمل بيها حاجة...ولا هاتفيده ولا هاتضره...ولكن لازم يعرف...امال يعنى واقف كده قفة بودان؟ لازم يطلع بمعلومة تبرد نار الانتظار.
او لو في الشغل او المواصلات وتليفونك يرن...تلاقي اللى جنبك يبص على الشاشة ويشوف مين بيتصل!! مع انه مايعرفش الشخص ده مين...بس لازم يعرف مين بيتصل...ولو كان صاحب التليفون راجل واسم المتصل مؤنث...يوم كحلي...مع انها ممكن تكون خالته...بس لازم يعمل نفيعسه "بنط" وصايع!
او انك تدخلي الاسانسير وتلاقي واحدة - بلا اي غضاضة - راكنة عليكي ومريحة...او واقفة وشنطتها على كتفها بس الشنطة حرفيا في حضنك! الله؟ ما المكان ضيق!! تعمل ايه الست في نفسها مثلا؟؟
مرة كنت في الاسانسير وكان في واحد واقف قدامى بالظبط....بلا اي مقدمات قال "هوووووووووووووف الدنيا حر!" - الهوف دي كان ريحتها بصل شنيع واكله على الصبح مع الفطار...جالي اسفكسيا فورية! بتنفخ ليه؟ اشم نفسك ليه؟ ما انا اكيد عارفة ان الدنيا حر وريحة الاسانسير باط كبير! مش ناقصة كمان اشم انفاس الناس!!
الموبايل شخصي للغاية ... حتى الازواج والزوجات مش من حقهم يفتحوا مثلا الرسايل (العادية وال whatsapp وكل حاجة خاصة). بس ازاي ؟؟ تلاقي الست من دول ماسكة تليفون جوزها في حملة تفتيش دورية....ولو لقت عليه مثلا باسورد تفتح محضر: باسورد ليه؟ مخبي ايه؟ مش قايلي عليها ليه؟ انت بتعمل ايه من ورايا؟؟ ولو اكتشفت ان سجل المكالمات او الرسائل ( log) ممسوح:...محضر شبه اللى فات...بتتصل بمين من ورايا وخايف اعرف؟؟ ولما يقولها علشان مساحة التليفون تقوله يعنى السجل هايملي لك الذاكرة؟؟؟ انا مش في ابتدائي علشان يتضحك عليا! ... ولو لقت ان في اتصالات كتير بينه وبين امه تقلق...هيا طنط كويسة؟ اصلي بالصدفة ببص في الساعة على الموبايل كان مفتوح على السجل ولقيتكوا بتكلموا بعض كتير...انا بس عايزة اطمن اصلي قلقت!! (قلقت امعائك يا شيخة!)
من اوجه الاعتداء السافر على المساحة الشخصية هي ان حد يدخل عليك الاوضة من غير ما يخبط! ولو كان جوزك اللى بيعترض تسئليه بنبرة اتهام "ليه كنت بتعمل ايه؟؟؟" وتجري تخطفي تليفونه تشوفي كان بيعمل ايه ولا بيتفرج على ايه! (الست المصرية شكاكة بطبعها ومعندها ثقة في نفسها بعد السنة الرابعة من الزواج)... لو الست اللى بتعترض ممكن جوزها يقولها "يعنى هاتكونى بعملي ايه!". ماينفعش تهجم على حد في اوضة كده...لو احنا عملنا كده هانسيب ايه للبهايم ؟
مش هاتكلم عن اللى بيخبطوا على باب الحمام كل دقيقة ونص...وكمان بكل بجاحة "بتعمل ايه كل ده جوا؟"...مين بيحب يقعد في الحمام يعنى؟ طيب والاجابة هاتكون ايه على السؤال ده؟ هما اجابتين بس: واحدة منهم مش هاقدر اكتبها وكلنا فاهمينها...والتانية "بصيف"!
او تكون بتطلع سيجارة او بتاكل كيس شيبسي او اي حاجة وتلاقي بكل برود ومن غير استئذان حد بيحط ايده ياخد واحدة! ما تشتري...او حاجة اريح...استأذن! ... ويستأذن ليه وانت هاتقوله اتفضل؟ الشخص ده بيرفع التكلفة بينكوا وبيتعامل "حبي" (بكسر الحاء)
وممكن جدا بتاع الدليفري ييجي وحد من البيت عايز فكة....ومن غير ربع ثانية تفكير يفتحوا الشنطة يدوروا على فكة فيها! ولما تعترضي تسمعى "انتى بتشربي سجاير من ورانا ولا ايه؟؟؟" (بيكون سؤال اتهام بجد مش هزار على فكرة)...او "هايكون فيها ايه يعنى؟" فانتى تردي ممكن يكون فيها حاجة شخصية مش عايزة حد يشوفها...ويجيلك الرد المبهر "اكيد حاجة هايفة زيك"
الام اللى بتحط ديب فريزر في اوضة عيالها علشان مفيش مكان في المطبخ والشقة بره هايبقى شكلها وحش لو اتحط فيها....الاوضة دي هي عالمهم الخاص...كلمة "شقتي وانا حرة فيها" خطر....لان ممكن يجي في يوم ويقرروا يسيبوا لك الشقة بالديب فريزر تتحرري فيها براحتك!
الام اللى بتحط ديب فريزر في اوضة عيالها علشان مفيش مكان في المطبخ والشقة بره هايبقى شكلها وحش لو اتحط فيها....الاوضة دي هي عالمهم الخاص...كلمة "شقتي وانا حرة فيها" خطر....لان ممكن يجي في يوم ويقرروا يسيبوا لك الشقة بالديب فريزر تتحرري فيها براحتك!
الامثلة لا نهاية لها...المساحة الشخصية دي زي الهدوم كده...ينفع حد يدخل جوا هدومك معاك في نفس الوقت؟!! اكيد لا!!
المساحة دي هي: الموبايل - الشنطة - محدش يهجم على اوضة مقفولة من غير استاذان...ولا حد يخبط على الحمام طبعا...ولا حد يمد ايده في اكل التانى...ولا حد يلمس التانى اصلا بلا اي سبب ولا مقدمات (زي التمليس على الشعر كده! او تعدلي لحد الهدوم من غير ما تنبهه!)
للاسف الاغفال والتباسط في حقوق المساحة الشخصية....ادى في النهاية الى التحرش!!!
رجاء من كل ام واب...خبط قبل ما تدخل على ابنك الاوضة او الحمام (حتى لو كان سنتين)...استاذن قبل ما تدفس حاجة في بؤه..او على الاقل مهد له...كلمي ابنك فهميه انك هاتقلعي له الهدوم...مش هوب تسلتي البنطلون وتغيريه وهوا مش فاهم ليه قلع وليه لبس!....قبل ما تجريه وراكي بره الشقة قولي له انكوا هاتخرجوا...ولو اعترض على اي فعل برجاااااااااااء المناقشة...مفيش حاجة اسمها "هوا كده"...او على الاقل ابدأي بالمناقشة وانتهى ب"هوا كده" لو الموضوع فعلا عويص!...اوعى تغصبي عليه يبوس حد غصب عنه...او حد يحضنه وهواة مش راضي...اديله مساحة وحرية وابسط حقوقه الانسانية: ان محدش يلمسه بالعافية...احنا كده هاننشئ جيل مشوه قابل للتحرش ومتقبل انه جزء من الحياة!
ربنا معانا ويهدى الناس الملزقة
ريم اسامة
جروب الفيسبوك: https://www.facebook.com/groups/329904227056535/
المساحة دي هي: الموبايل - الشنطة - محدش يهجم على اوضة مقفولة من غير استاذان...ولا حد يخبط على الحمام طبعا...ولا حد يمد ايده في اكل التانى...ولا حد يلمس التانى اصلا بلا اي سبب ولا مقدمات (زي التمليس على الشعر كده! او تعدلي لحد الهدوم من غير ما تنبهه!)
للاسف الاغفال والتباسط في حقوق المساحة الشخصية....ادى في النهاية الى التحرش!!!
رجاء من كل ام واب...خبط قبل ما تدخل على ابنك الاوضة او الحمام (حتى لو كان سنتين)...استاذن قبل ما تدفس حاجة في بؤه..او على الاقل مهد له...كلمي ابنك فهميه انك هاتقلعي له الهدوم...مش هوب تسلتي البنطلون وتغيريه وهوا مش فاهم ليه قلع وليه لبس!....قبل ما تجريه وراكي بره الشقة قولي له انكوا هاتخرجوا...ولو اعترض على اي فعل برجاااااااااااء المناقشة...مفيش حاجة اسمها "هوا كده"...او على الاقل ابدأي بالمناقشة وانتهى ب"هوا كده" لو الموضوع فعلا عويص!...اوعى تغصبي عليه يبوس حد غصب عنه...او حد يحضنه وهواة مش راضي...اديله مساحة وحرية وابسط حقوقه الانسانية: ان محدش يلمسه بالعافية...احنا كده هاننشئ جيل مشوه قابل للتحرش ومتقبل انه جزء من الحياة!
ربنا معانا ويهدى الناس الملزقة
ريم اسامة
جروب الفيسبوك: https://www.facebook.com/groups/329904227056535/
