الستات اكتر الكائنات تحت طائلة العبودية!
احنا دايما في حاجة مستنيانا....دايما ماشيين تبع خطة...بجدول زمنى افتراضي...وفي سباق مع الزمن لتحقيق هدف احنا مش عارفينه اصلا!!!
انا شخصيا بعانى جداااااااا من النهج ده...انا من العبيد...لو مالتزمتش بالجدول الافتراضي ينزل على ضهري الكرابيج!
دلوقتي الست العاملة دي والله اكتر واحدة في المفرمة...مفيش رحمة ولا تعاطف ولا راحة! لو تتأمل يومها مش هاتقول غير "سبحان الله"
المقال ده بمناسبة دخول المدارس...موسم السباق والمهدئات!
الست بتصحى بدرى جدااااااا وغالبا بتكون الدنيا لسه ضلمة...قبل شروق الشمس...قبل الديك ما يدن حتى!! نصحى ونمشي زي الزومبى في الشقة اول خمس دقايق احنا مش عارفين نبدأ منين...غالبا فنجان قهوة او مج شاي علشان نفتكر احنا مين وبنعمل ايه هنا!!! بعد القهوة يبدا المخ يسخن ويشتغل...في ناس بتدخل المطبخ تبدأ تحضر الغدا (علشان هاترجع من الشغل مكسحة مش هاتقدر تقف) وفي ستات تبدا تراجع شنط الاولاد..الجدول متحضر صح ولا لا..تتأكده ان فعلا عملوا الواجب...تتاكد المقلمة فيها اقلام ولا كالعادة فاضية...تحضر زمزميات او زجاجات المياة وتحضر ساندوتشات المدرسة...لو هاتعملهم كاكاو او عصير قبل ما ينزلوا...تنشر غسيل...تلم غسيل...لو في اطباق العشا في الحوض تغسلهم...بتكوى قميص او بلوزة او لبس المدرسة...الست الصبح بجد بتشتغل آلي...من غير تفكير...احنا بنحط المهام قبل ما ننام ونصحى نعملها اوتوماتيك...مش بقولكم زومبي!!
المشكلة الوحييييدة اللى ممكن تقابل الست الصبح ويبقى فعلا حظها اسود...لو حد من البيت صحى! هيا متعودة تعمل حاجات معينة بنظام معينة بسرعة معينة في وقت محدود للغاية...لو حد صحى بقى من الاطفال وزن او رغى او طلب اي حاجة...بصوا بلاش والله! مفيش داعي تطلعوا الوحش اللى جواها...مفيش داعي برضه باقي البيت يصحى من صوتها!! هيا في الوقت ده بتكون غير ادمية...ومش بتفكر اساسا...مخها صحى بس اعصابها نايمة...بلاش استفزاز!
وتبدأ في مأساة صحيان العيال..تصحى ده علشان يدخل الحمام...والتانى علشان يلبس وبعدين يبقى يدخل...لما الاول يخلص تلاقي التانى نام...ولما التانى يخلص تلاقي الاول نام ولسه ملبسش (ده لو كبروا وبيلبسوا نفسهم يعنى)...لو الموضوع فيه بنات بقى فحوار الشعر ده مؤلم مؤلم مؤلم...تصحى طفل تسرح شعره الصبح يقابله خلع الضرس!! قرف بجد يا جماعة مش هزار! انا فكرت كذا مرة اسرح لها شعرها قبل ما تنام بس طبعا ده خيال مش فكرة عملية حتى!
وبعد ما ربنا يكرمنا ويلبسوا ويتسرحوا ويلبسوا الجزم (ملل جدا موضوع الجزم ده برضه لو هيا برباط!) ...غالبا هايكون الاكل استوى في الجزء ده من اليوم...في نموذجين بقى...الاول انهم ينزلوا قبلها....ياااااااااااااه اللحظة دي هي تنفس الصعداء حقيقي. النموذج التانى الاقسى انها اللى توصلهم المدرسة او تنزل معاهم في نفس الوقت! اللقطة دي بتستهلك كثير جدا من طاقتنا! اه والله...بنتعب فعلا.
الروتين اليومي بقى انها تنزل الشغل وتركب اي حاجة توصلها او باص شغل او بعربيتها...اي كان...في جميع الحالات في شارع وطريق وزحمة وكلاكسات وناس مستعجلة وغرز بتتاخد قدام عربيتك وحاجة نكد! ما علينا من الطريق لان غالبا بيكون في حاجة تشغلها عنه (راديو او موسيقى او مكالمة لاختها مثلا) ويبدا يوم العمل بقرفه وسخافته وتسلط مديرينه وتنمر ناسه...بس اليوم بيخلص وترجع في الطريق الزحمة والحر وكل اللى انتوا عارفينه ده.
ترجع البيت لمتلازمة "ياللا"...ياللا غيروا هدومكم....تدخل تفرد ضهرها شوية (معلش هي انسانة برضه علشان بس تقدر تفتح عينها...اسفين يا جماعة!) وطبعا هيا بتنام زي الزومبى برضه كل شوية حد يدخل يقولها حاجة...ماما ده شد شعري...ماما دى تفت عليا....ماما مفيش حاجة حلوة...ماما تواليت!...ماما ماما ماما ماما...الست بتنام والنور منور والباب مفتوح علشان يفتكروا انها صاحية (الاطفال بيرن عندهم انذار في مخهم لو امهم في مكان مقفول او ضلمة...لازم يتفتح وينوَر علشان يسكتوا)...فهو مش نوم ولا راحة...هو حالة كده من اللا وعي بس سامعة اللى حواليها بس مش قادرة تتفاعل ولسانها تقيل!!
تمر الفترة الغريبة دي اللى غالبا بتكون نص ساعة...تقوم ياللا تمارين ياللا البس ياللا انزل ياللا روح للكابتن وانت اقعد خلص واجبك وفترة بين التمارين هي فترة الواجبات او التسميع او خلافه...خلصت؟ ياللا على البيت ياللا كمل الواجب ياللا اتعشى..ياللا حضر الجدول...ابوس رجل ابوكم ناموا...غسلت اسنانك؟ دخلت الحمام؟ اطفى النور يا زفت...بطل رغي يا حيوان...متضربش اخوك وروح على سريرك!! واول ما يناموا تبدا هي في الروتين المسائي...مواعين الغدا والعشا او تغسل اللى ممكن يطلع ريحة وتكمل الباقي الصبح...تحضر نص تحضير طبيخ بكرة (اللى هاتسويه الصبح) تشيل مكان العشا وتروق الدنيا وترجع الكتب الزيادة على مكاتبهم بعد ما حضروا الجدول المفترض (اللى هاتراجعه الصبح) تشوف هاتلبس ايه بكرة...تتاكد ان الشرابات مغسولة وعلى الحبل...
على فكرة الروتين مش بيختلف كتير في اخر الاسبوع...بس كله بيكون ياللا لنفسها كنوع من التحفيز!!...قومي ياللا علشان تلحقى تحضري الفطار...ياللا انشري الغسيل...ياللا بالمكنسة في الشقة كلها وامسحى الريسيبشن...طبقي الغسيل اللى متكوم بقاله اسبوع على الكنبة ده ورصي في الدواليب...ياللا استحموا...ياللا ادعكى الحمام والبوتجاز وامسحي المطبخ من فوق الوش كده...ياللا على ماما..ياللا على طنط...ياللا اشترى طلبات الاسبوع وخلصي مشاويرك المتأجلة للويك اند...ياللا على التمرين...يا ابني الدرس هايفوتك ياللا اخلص...ياللا هاتوا الواجب (الاسبوعي بيكون كتير للاسف اوي)...ياللا ياللا ياللا
هوا احنا هانرتاح امتى؟ وهانرتاح اصلا؟؟ طيب ليه الراجل بيسأل "انتى بتعملي ايه يعنى؟" طيب احنا ليه بطلنا نرد عليهم؟؟ اعتقد من سفاهة السؤال!! لانه سؤال لا يرتقى لمستوى اننا نرد عليه!!
متهيالي لو حد فينا ارتاح يوم مش هاتعرف تنام لان جسمها اتعود على مستوى معين من المجهود...لو اتقلل عن كده هايجي لها ارق!!!
الحمد لله على نعمة البيت وعلى نعمة القدرة على توظيف نفسنا...وعلى كل النعم...بس شوية رحمة...ويرجع الراجل يقولك "انتى اتغيرتي عن زمان"...امشي يا حبيبي الله يكرمك!!..ياللا علشان ورايا غسيل!
ياللا كفاية عليكم كده
ريم اسامة
لينك المدونة على الفيسبوك:
