الست مكانها بيتها

واحدة صاحبتي طلبت ضروري اكتب الموضوع ده...غالي والطلب رخيص يا حبيبتي :)

الجملة اللى كل الرجالة مقتنعة بيها مهما كان سنهم او مركزهم الاجتماعي او التعليمي...الست مكانها بيتها!! قصرية الزرع وشوال المكرونة وقفص القلقاس مكانه البيت!!! الست دي حرام تشم نفسها زي الراجل...حرام تتفسح على كيفها...حرام تعيش حياتها زي ما الراجل بيعيش حياته.

طبعا الرجالة كلهم دلوقتي شدوا ضهرهم كده ورفعوا حاجب ونزلوا التانى ومش عاجبهم الدخلة دي...مش مشكلة... مجتش على الكلمتين اللى بنفك بيهم عن نفسنا!

الراجل في عصرنا الحالي حصر مسئولياته في نقطة يتيمة وهي : احط فلوس في البيت...فقط!! اللى جوزها بيعمل غير كده تعمله مقام ويبقى له اتباع زي الاولياء الصالحين! الراجل في اي مشاداه مع مراته او في اي خناقة يقول نفس الجملة اللى بتتقال في كل بيوت مصر "انا طالع عيني في الشغل وبطفح الدم علشان اجيب لكوا الفلوس"...لا والنبي؟ وهيا الفلوس دي بتتصرف على مين؟ ولو كنت مش متجوز كنت هاتقعد في البيت يعنى؟ وعيالك دول مش تبعك ولا ايه؟ ومراتك مش المفروض هاتاكل وتشرب في البيت ولا جايبها متخيط بؤها؟ والكهربا والمياة والغاز والتليفون مش انت برضه بتستعملهم؟ انت متجوز ومخلف مش بتكفل ايتام! دول مفروضين عليك ولو قصرت معاهم يبقى حسابك مع ربنا عسير..فبلاش نظام الذل بتاع "انا بصرف عليكوا" ده....هيا الرجولة بالفلوس؟؟؟ مكنش حد غلب..كان زمان كل ستات مصر بشنبات.

 ولو الست اشتغلت زيها زي الراجل فهو مش بيقدر ده برضه...يقدر ليه لا سمح الله!!! لا ده بيحسب عليها الشغل خروجة!!!!! هيا كده بتتفسح وبترفه عن نفسها....وبتاخد من وقت البيت علشان تروح الشغل!! (حد هايقول حسبي الله ونعم الوكيل ولا اكتبها انا؟؟)....والست بتحط مرتبها في البيت برضه يعنى مش بتروح تجيب بيه مكياج وشباشب بيت...لا هيا بتشتغل وبتحط كل مرتبها في البيت علشان تساعد او علشان تحط شوية رفاهية في حياة الاسرة. 

في رجالة بيخلوا ستاتهم يدفعوا الحضانة هوا ملوش دعوة بما انها بتشتغل وبتاخد من وقت البيت وهيا اصلا المفروض اللى تقعد بالعيال....وهيا عايزة تتخلى عن دور البيت فهيا اللى تتحمل تمن ده! وفي نوع تانى من الرجالة بيخلي الست تدفع تدريبات النادي..هيا عايزة ابنها رياضي...يبقى هيا تدفع! ولو حبت تجيب اكل من بره هيا برضه اللى تدفع بما ان من واجباتها انها تعمل اكل كل يوم وهيا بقى عايزة تريح نفسها...يبقى تدفع من جيبها مش من مصروف البيت! 

معظم الستات شكوتهم واحدة "زهقانين" والرجالة اجابتهم واحدة لما الست تقوله كده "زهقانة من ايه؟؟"...هوا شايفها في نعمة ورخاء واخر منجهة...ستات نكديين صحيح! حد طايل جواز وعيال في الزمن ده؟ ده عندها التليفزيون 24 ساعة والنت والتليفون ما تسلي نفسها! والعيال طول اليوم عاملين لها جو في البيت...ايه مش مكفيها؟ بكره ربنا يشيل من  وشها النعمة علشان تحس! 

ولو الست اشتكت انها مش بتشوف الشارع ونفسها تخرج وقرفت ومفيش خروجة العيال بيهنوها عليها (ده لو خرجت يعنى)...فيجي الراجل يقولها بالفم المليان "ياللا نروح لماما" !!!!

ولو الست فضلت زهقانة بيبان عليها جدا في كل تصرفاتها...اولا بتكون عصبية مش طايقة كلمة ولا قرف من العيال...بتتجنب جوزها جدا (ماهو اصلا سبب الزهق بقلة وجودة في البيت وعدم مشاركته اي مسئوليات على الاطلاق) وهنا يبدا الخطا التالي للراجل ويبدا في معاقبته مراته! اه بيعاقبها علشان زهقانة من العيشة المملة اللى فارضها عليها. فيكتر من خروجه (مع انه كل ليلة في القهوة...لا هوا بقى يروح مرتين مش مرة ويخترع مشاوير زيادة كمان)...كل ما يكون في البيت يتجنب العيال (اكتر ماهو متجنبهم) علشان يبقى الحمل زيادة اوي اوي على الست...هوا متخيل انه كده بيربيها....على فكره ابدا...انت بتخليها تكرهك اكتر وتكره عيشتها اكتر وتدعي عليك بقلب اوي واكتر.

يا شيخ ده انت بتحسب عليها مشوار السوبر ماركت فسحة!!!

الست مكانها مش البيت...الست مكانها في حياتك! فرق كبير اوي يا بشمهندس! انك تشاركها حياتك من خروج وفسح واراء وتاخد بحسها كده...غير انك تشاركها الهواء اللى معاليك بتتنفسه!

لو انت شايف ان الحياة اليومية المكررة لسنين مش مملة...يبقى انت مريض! مفيش حد في الكون بيحب يصحى من النوم يجهز العيال والشنط علشان تجري تلحق الشغل وتتفرم في شغلها وترجع ميتة علشان تجهز الغدا وتستقبل او تجيب العيال وتبدا الجحيم اليومي بتاع الاطفال ده (وده عايز له مجلد مش مقال) وتحضر اكل وتشيل في اطباق وتغسل مواعين...غير الغسيل والنشير والتطبيق والتنضيف والترويق وتربية العيال بقى حاجة مقرفة بجد وكل ليلة تحسب متبقى كام من فلوس الشهر وتظبط لسيادتك هدوم تانى يوم علشان الشكوى والقرف...كل يوم كل يوم كل يوم...وكمان تيجي انت تقولها ان القهوة مش خروجة (ناقصة هيا ارتفاع ضغط)!...علشان بعد كل ده في اخر الاسبوع تاخدها لفة في المول تراقب العيال لحس حد فيهم يتوه ولو بصت على جزمة في اي فاترينا تعاتب فيها انها مسطولة وكده العيال هاتروح منكوا...وفي الاخر تاخدها عند امك تكمل الفسحة! 

يا محلاها العيشة بصراحة!! 
 

ريم اسامة

التراس نحت المانجة

بابا دايما يقول "اكيد الجنة فيها مانجة"

احنا عيلة بتموووت في المانجة...بنحب المانجة اكتر ما بنحب عيالنا 

يا سلام لما تبقى المانجاية ساقعة كده ومش ناشفة ولا طرية...بين البينين...وريحتها باينة من قبل ما تتفتح...ولك الاختيارات في طريقة اكلها...يا تقطعها من وسطها ويبقى جزء زي الكوباية كده والنص التانى لازق فيه البذرة...وتقور بالمعلقة وبعدين تشد البذرة وتقور النص التاني وبعدين فاصل اللغوصة مع البواقي والبذرة العظيمة. 

وفي طريقة اكثر عشوائية وهمجية وهي تجيب الثمرة وتقطم البوز بتاعها وتشد العصارة  - شئ مقرف لما تقراه انا عارفة بس الفعل ذات نفسه رائع...وبعدين تفتح الثمرة ويبدا النحت...لحد ما القشر يبقى زي ورقة السيجارة...بس الفعل ده يستلزم طشط وتلبس خيشة او فوطة تنضيف او فانلة قديمة علشان هاتنقط من كل حتة...من دقنك وكوعك وتهطل على نفسك وصدرك ورجليك كمان!! المانجة دي مزاج...ومن غير جو العشوائيات ده الواحد مش بينبسط! 

في طريقة جربتها مع عيالي علشان معنديش اي استعداد للتضحية بالسجادة والكنبة...بقشر المانجة بقشارة البطاطس واقطعها بالسكينة مكعبات...وبالمعلقة او بالشوكة تتاكل بقى...هيا طريقة حلوة برضه لتقديم المانجة للضيوف حفاظا على هدوم الخروج بتاعتهم وعلى البرستيج كمان.

 انواع المانجة كتير وكلها احلى من بعض حقيقي...في الفص والهندي ملوكي وعويسي وسكري والفونس وصدَيقة وزبدية...زبدية وصديقة يتشالوا في الفريزر يا مدام...تقطعيها حتت كبيرة كده وتتشال علشان تتعمل عصير...الهندي ملوكي كبيرة وممكن برضه تتشال...ده لو ضميرك سمحلك ماتكليهاش.

افضل مكان تخبي فيه المانجة من باقي العيلة (حركة حقيرة طبعا...لكن لما نيجي للمانجة انسوا خالص المبادئ والاخلاق) هو درج التلاجة تحت حاجة السلاطة...او ورا اي كيس او حلة كبيرة. 

لما بتقدمي لعيالك مانجة بتفتكري انها بتحبس المياة في الجسم ونظام الاملاح بقى وكده...وانتى طبعا بتنسي خالص الحقائق الطبية دي وانتى جايبة حلة المانجة ونازلة هرس فيها...بتفتكري تانى يوم وانتى قايمة من النوم ومش عارفة تنزلي من السرير بسبب رجلك الوارمة وكعبك اللى بينبض. وطبعا برضه بتنسي تشربي مياة كتير بعد المانجة علشان الاملاح وبتتحملي الم الكلى! 

مش هانتكلم عن مرضى الكلى اللى بيقنعوا نفسهم بالباطل ان الفوار بعد المانجة بيظبط الدنيا! 

مشكلة كبيرة الدايت وقت موسم المانجة...عذاب اوي فعلا...مفيش مانجة دايت؟ - انا شخصيا هاستنى الفاكهة الدايت...ولحين زراعتها هاغطس في ام من غير دايت دي :D

المانجة ملهاش كبير...محدش يقدر يقاومها!

ريم اسامة

 

ميتم اول الشهر

اول الشهر يعنى فرحة - انشكاح - شرحة قلب....الكلام ده زمان لما كانت البطيخة بنص جنيه...قبل ما الدنيا تولع نار وتغلى ويخترعوا الفيزا والتقسيط...دلوقتي اول الشهر بقى جنازة في كل بيت.
ييجي يوم القبض...بيجي للواحد برضه انشراح بسيط كده وبعدين يبدا العقل في استيعاب الامر الواقع...تيجي الفلوس وتحس انها مبلغ كويس والحمد لله....نشيل فلوس الفيزا على جنب بقى قبل ما نصرف براحتنا...فلوس الجمعية بالمرة...فلوس القسط...فلوس التليفون (موبايل وارضي)...الكهربا...الغاز...الايجار طبعا لو فيه...اشتراك التدريب في النادي للاطفال....شهرية البواب وصيانة العمارة....اشتراك النت...اشتراك الحضانة لو يوجد...وبعد كده يبدا الحزن!!
والست بقى تبدا في حرق الاعصاب..."هانكمل الشهر ازاي؟"..."كان نفسي اروح الكوافير الشهر ده اصبغ شعري"..."كنت عايزة اجيب هدية لصاحبتي"..."يعنى مش هانجيب للولد اللعبة اللى وعدناه بيها؟"..."يعنى بالشكل ده الشهر ده كمان مش هانصلح التكييف؟!"..."الشهر ده مفيش فلوس نرد عزومة عمتك؟" ..."ينفع تأجل تغيير زيت العربية للشهر اللى جاي؟"...الخ الخ من الاحباط!
في مثل شعبي بيقول " على قد لحافك مدرجليك"...ومثل اخر بيقول "القرش الابيض ينفع في اليوم الاسود"...وفي حكمة عظيمة بتقول "اصرف ما في الجيب، يأتيك ما في الغيب"...وكلنا طبعا مع اخر حكمة دي:)
المشكلة اننا بنقبض الفلوس من هنا ونلاقي كل اللاحاليح اتبخرت من هنا...زي ما يكون سبرتو مش فلوس! اكتر حاجة مؤلمة في يوم القبض ده هو اول ليلة بعد ما الفلوس تيجي...الست بتفضل تفكر كتير اوي قبل ما تنام...وبعدين بعد ما تعيط لها شوية من اليأس يبدا فاصل احلام اليقظة بتاعة "انا زهقت من باريس ياللا نروح روما بقى".
احنا فعلا بندبس نفسنا في اقساط وديون كتير جدا...واهالينا مكانوش كده ولكن احتمال علشان مكنش عندهم اصلا الاختيارات اللى عندنا...اشتري اي حاجة وادفع اي مبلغ اهبل واقسط الباقي على اطول مدة ممكنة...ممكن في الاخر تكتشف انك بتدفع ضعف التمن الاصلي ولكنه على فترة طويلة هايقلل القسط الشهري...زمان كانوا بيحوشوا 15 سنة ويجيبوا تلاجة...او بيستلفوا من الاهل والاقارب وكان فيه شئ من الاحراج والمشاكل...فموضوع التعامل مع البنوك اسهل...هما حرامية والفوايد عليها اقاويل كتير ولكنه بيحفظ ماء الوجه....بس برضه في ناس كتير بتستعمل الفيزا في هبل - بس مش موضوعنا يعنى.
وحاليا الاطفال بقى لهم تطلعات...الجيل بتاعنا كان اقصى احلامه الاتاري...او بيت باربي ولبس لباربي...او طقم شاي بلاستيك جديد ومعاه طقم معالق وشوك! مكانتش اللعب غالية اوي كده ولا كانت الاطفال واعية ومدقدقة ومكنش على ايامنا ال i pad وال x-box وال wii وخلافه...المشكلة برضه ان الاطفال في المدارس بتعاير بعض بالحاجات دي وكل ام مش عايزة ابنها يبقى اقل من باقي العيال...وفي بند تانى خالص في مصاريف البيت وهي الهدايا...كل الاطفال بيعملوا اعياد ميلاد ولازم تردي زي ما بيجي لعيالك...اشربي يا حبيبتي بالهنا والشفا. 
وغير طبعا الثوابت: عيد الام - عيد ميلاد حماتك ومامتك - عيد ميلاد اولاد اخواتك واخواته - هدايا الجواز والنجاح - لبس العيد - لبس المصيف (ما كل سنة مقاس العيال بيتخلف) - ولو موسم المدرسة يبقى ربنا معاكوا في لبس المدارس والشنط والجزم ومستلزمات الدراسة من كتب وكراريس والوان واقلام (مش هاجيب سيرة مصاريف المدرسة اصلا علشان هانفترض انها ضمن بند الجمعيات) في الاخر بتلاقي ان كل شهر تقريبا في مقلب بتقعي فيه! 
بعد كل الحاجات دي المفروض يكون في فلوس للاكل والشرب والخروج (كفا الله الشر) والعلاج (ما اكيد حد هايحتاج دوا كل شهر) وبنزين ومصروف شخصي للام والاب (غالبا المصروف الشخصي ده بيكون فطار وشاي في الشغل وفلوس المواصلات). بالتالي البنود اللى بتختصر غالبا بيكون بند الشغالة (والست تشيل  البيت كله لوحدها وتنفض سجاجيد وتلمع شبابيك وتغسل الشيش وتدعك البوتاجاز ولا عزاء لضهرها المسكين)..بند المنظفات بما انها فعلا بقت مكلفة فالست كثير من الاحيان بتكتفي بصابون يدوي تدعك بيه التواليت والسيراميك والاحواض وازازة فنيك او اي حاجة مش غالية تمسح بيها الارض، وبند الاكل...البيت بيجي فيه بيض وجبنة وزبادي (وغالبا بيخلوا البيض والزبادي للاطفال فقط علشان في سن النمو) وبيجي لحمة مفرومة لانها ممكن تتحط مع اي خضار ويبقى خضار باللحمة! وممكن فراخ (بما انها ارخص من اللحمة) والست بتبدر حالها وبتجيب خضار ومكرونة كتير علشان اوفر وبيشبع. 
الجيل الاكبر شايفين اننا عايشين في بذخ واننا فاشلين في ادارة امورنا المادية...واننا بندلع عايشين في التكييف ومعانا عربية وتليفزيون LCD وتليفونات حديثة واجهزة البيت موجودة كلها...فبالتالي احنا مبذرين...مش بنعرف نحوش...شايفين ان الفيزا والاقساط تدبيس بمزاجنا... وان الخروج المكلف شئ من الرفاهية الزيادة عن اللزوم...(الحقيقة مش كل الناس كده - للانصاف يعنى في شريحة من الجيل الاكبر شايفين اننا جيل مظلوم ومن حقنا شوية ترفيه على نضافة:) ).

بصوا انا فكرت في حل لمشكلة حزن اول الشهر ده...هاتي الفلوس كلها وقسمي الالتزامات الثابته..هايتبقى شوية فلوس (قليل او كتير بقى مش مهم ) وقسميهم على اربع اجزاء...كل اسبوع جزء..وهاتي طلبات البيت بالاسبوع مش بالشهر...لو فلوس الاسبوع خلصت...ماتاخديش من فلوس الاسبوع اللى بعده...معلش تعالي على نفسك اووووي...اهو تتزنقي اخر يومين في الاسبوع افضل من زنقة اخر اسبوعين في الشهر :)  (في ناس هاتقولي والنبي انصحي نفسك يا خايبة...ما علينا ناس سلبية مش هانبص لهم :)  )
ربنا يسد عن الناس جميعا كل التزاماتهم وديونهم....ويجعله عامر :)

ريم اسامة

البنت حبيبة ابوها - الواد ابن امه!

الرجالة (بلا استثناء) بيفضلوا خلفة الذكور...كلهم عايزين يخلفوا اولاد ...ولكن لما بيخلفوا البنت (بعد ما يكون عندهم ولد خلاص) بيعاملوها احسن بكتير من الولد...ايه السر طيب؟ وليه كنتوا هاتفطسوا على الواد الدكر العترة؟؟؟

والعكس مع الامهات...الستات بتعامل اولادها افضل ما بتعامل بناتها في كثير من الاحيان! محدش يعرف ايه السبب ولكن في شوية موروثات بتتقال بمناسبة ومن غير...زي البنت حبيبة ابوها...الواد ابن امه!! 

حاجة سخيفة اوي بجد....التفرقة بين الابناء مؤلمة في كثير من الاحيان....وبتكون مؤلمة للام كمان. الامهات "الطبيعيات" بيحبوا ابنائهم زي بعض...بلا تفرقة...ولا تحيز...ولكن بتختلف معاملة البنت عن معاملة الولد وبرضه بتختلف اساليب التربية. اقناع البنت ممكن يكون مختلف عن طريقة اقناع الولد...الولد عايز دايما يكون اقوى من اقرانة في حين ان البنت بتحب تكون اجمل واشيك ومميزة اكتر في النواحي الشخصية عن باقي اصحابها.

المهم ده مش موضوعنا.

التفريق بين الاطفال بيخلق عيال مشوهة نفسيا...الاحساس الدائم بالظلم وقلة التقدير والفشل والنبذ الاجتماعى. انا عارفة انها مصطلحات تقيلة شوية ولكنها للاسف حقيقة في حياتنا. 
ومش شرط التفرقة تكون بالنوع...ممكن يكون الاهل بيفضلوا الطفل الاصغر او الاكبر. الاب او الام يدخلوا البيت والاطفال يجروا عليهم كعادة معظم الاطفال...فنلاقي الاب مثلا يشيل حد منهم ويسيب التانى يحضن في رجليه! ويبوس اللى شايله ويكتفي بطبطبة هبلة من غير حتى ما يبص للطفل اللى حاضن رجله ده! غباء حقيقي...الصح بقى ان الاب يدخل ولما يلاقي العيال جايين عليه ينزل يقعد ولا يقرفص في الارض يحضنهم كلهم زي بعض...مايجيبش لعبة لحد والتانى لا...او لو مفيش فلوس زيادة يجيب لعبة مشتركة بينهم. الاجداد برضه بيفرقوا بين الاحفاد...يزعقوا للكبير لو الصغير اتخبط...او لو الكبير شبط في لعبة في ايد الصغير (مع ان الكبير ده ممكن يكون تلات سنين بس)...قليل اوي اللى بيتعامل انهم كلهم اطفال صغيرين.
الاب اللى عنده ولد وبنت بيتعامل ان البنت دي باكو بسكوت هايتفتفت لو الولد ضربها او حد زعق لها...مع انها قادرة ومفترية...ويتعامل مع الولد انه في تانية ثانوي وعيب يعيط او يشبط في لعبة او يزن في اي محل او يزعق في اخته او يختار كارتون مش على مزاج الهانم اخته! والاب اللى بالعقلية دي بيحب يغيظ مراته بحبه لبنته!! خيال علمي بجد....الست هاتغير من بنتها ازاي؟ الست عايزة بنتها قوية ومتعلمة وشخصية مستقلة وتزرع فيها ان حياتها مش متوقفة على الجواز والراجل! الست عايزة بنتها ناجحة واجتماعية ولبقة وذكية...فيجي ابو البنت يقول "بتموت فيا... بتعيط كل ما اخرج من الشقة" ويكون فخور اوي...مفكرش هيا بتعيط عليه ليه...هيا طبعا بتحب ابوها بس ممكن برضه تكون بتعيط علشان هوا اللى بيسمح بكل الغلط اللى في نفسها....بيحبها بقى فمش بيقولها شيلي الورق من الارض او لمي اللعب بعد ما لعبتي...ولا بيزعق لها لما تدلق عصير او مياة...كل ما تعمل مصيبة يقولها "معلش يا حبيبة بابا"...الطفل ذكي...بيحب العشوائية والتشرد...وبيعرف كويس اووووي يتعامل مع كل فرد في العيلة ازاي. 
الراجل بيكون عايز يخلف ولد علشان هايشيل اسمه المجيد وهوا اللى هايخدمه لما يكبر...والبنت بقى هيا اللى هاتدلعه. مع ان البنت ممكن تجيب له العار مثلا!
بالتالي هانلاقي جمل بتتقال..بس لو فعلا حد من اولادك بدأ يكررها خدي بالك لانه بيكون ناقوس خطر! (والله مش بهزر)
- كلكوا بتحبوا (اسم حد من اخواته) وانا لا
- مش بحب اروح عند جدو وتيتة! (لازم لازم لازم تعرفي السبب باي طريقة...ممكن يكون في تفرقة في المعاملة بتضايقه)
- لو بدا حد من اولادك يكرر كلمة "اشمعنى فلان؟

- لو فضل يسئلك "بتحبيني يا ماما؟" - وجود شك في حبك ليه دليل اضطراب عنده 

- لو عمل اي حاجة هايفة زي دخوله الحمام ويقولك بمنتهى الفرح وعايزك تعملي له مهرجان! عايز يشد منك اي تشجيع

- رفضه للعب المشترك مع اخوته وحبه لايذاء الغير برضه اوعي تطنشيه!

 عامة كلهم بكره يكبروا ويسيبونا...فالافضل اننا نعدل بينهم علشان يعبرونا واحنا كبار! 

ريم اسامة