مصروف الاولاد بيمثل عبئ على الاسرة في وجه العموم
خاصة اخر الشهر...لما يكون كل اللى في جيبك خمسين جنيه مثلا ومطلوب منك
مصروف الاولاد علشان يروحوا المدرسة...حاجة بايخة طبعا اوي.
لكن للمصروف وجه مشرق
انا شخصيا مع فكرة المصروف دي...امهات كتير بترفض من منطلق ان المدرسة
غالية عن بره وهي هي المنتجات...وليه ادفع اكتر في نفس الحاجة يعنى؟ ما يقول عايز
ايه واجيبهوله!! هوا بعزقة وخلاص؟؟ مش خسارة؟ الحقيقة ان عملية الشراء نفسها بتشبع
حاجة جوانا...احنا اللى نقرر نشتري ايه...الاطفال بيروحوا الكانتين في
مجموعات...يشتروا سوا...يقرروا يشتروا انواع مختلفة ويتقاسموا في حلقة وقت الفسحة...او
يشتروا زي بعض ويحسوا ان في بينهم شئ مشترك...الكلام ده للاطفال الصغيرين مش بتوع
ثانوي!
وفي مدرسة تانية وهي مدرسة "الاكل البيتي الصحي"...اكيد مدرسة
تحترم جدا وكلها نوايا طيبة وصادقة...لكن يا ترى ابنك او بنتك هاتفضل تاكل الاكل
الصحى فقط في حين كل زملائهم خاربين الدنيا؟ ولو فعلا التزموا
بالتعليمات...هايحسوا انهم طبيعيين؟ وهايسمعوا كلامك ان كل الناس دي مش بتفهم؟؟
ماعتقدش!
المصروف في سن صغيراحسن كتير جدا عن ما تبدأ تدي ابنك وهو كبير...اول حاجة
قبل ما تحدد قيمة المصروف..لازم تعرف الاسعار! ماهو مش هاياخد اتنين جنيه وارخص
حاجة في الكانتين بخمسة مثلا! انت كده بتضايقه...مش بتديله مصروف...انت بتحنسه.
وفي نفس الوقت فكرة الفلوس الكتير للاطفال خطر جدا جدا...شعور القوة
المادية في الاطفال مستقبله يا مخدرات يا سجاير يا قرف! ولو مش اي حاجة من دول
فاصحابه هايستغلوه بشكل او باخر...وفي منهم اللى هايعرفه لفلوسه او للحلويات اللى
ممكن يوزعها....او ابنك ممكن يستشعر القوة والاختلاف...ويبدأ بدون وعي يشتري
اصحابه بالحلويات...خاصة ابو من غير مصروف ده!
الاطفال عالمهم صعب لو حاولنا ندرك كل تفاصيله!
لكن..خلينا متفائلين
اولا المصروف ضروري يكون مبلغ يقدر يشتري بيه حاجة او اتنين بس...فلازم تحط
مبلغ يتيح له الاختيار....يا يشتري حاجة واحدة كويسة...او يشتري حاجتين نص
نص...بمعنى...ممكن يشتري قطعة بيتزا مثلا او يشتري بسكوت وكيك...مبلغ لا يمكنه من
شراء بيتزا وحلوى! يا بيتزا...يا حلوى!
المغزى من الموضوع ده تربوى...انت بتعوده يختار...مصادر قليلة...اغراءات
كتير...قرار واحد بس! لو بصيت للموضوع برؤية اوسع...ما هي دي حياتنا احنا كلنا!
مرتبك يا دوب...نفسك في حاجات كتير...بتقرر تشتري حاجة واحدة بس في الشهر...او
ماتشتريش خالص!!
وفي نفس الوقت لو هو جعان هايختار يجيب ساندوتش...لكن لو نفسه
يحلى...هايجيب حلويات...زينا..لو داخلين على عيد بنشتري لبس للاطفال (واحنا لا)
ولو رمضان بنشتري اكل (ومفيش مثلا لبس الصيف)...كل شهر عندنا مناسبة شكل نصرف
عليها ونختار...نصرف على المناسبة ولا ندلع نفسنا!...فاحنا مواردنا
محدودة...امنياتنا كتيرة...وبناخد قرار واحد! المهم يكون القرار صح وفي محله!
من الوارد جدااااااااااا فلوس ابنك تقع منه...او تتسرق...او ينساها في
العربية...المهم انها هاتتبخر بشكل او باخر من غير ما يصرفها. بلاش يصعبوا عليكم!
لانك لو اديت له مصروف بداله...هايتعود الاهمال...وقيمة الفلوس هاتتضائل في نظره! هايبقى عادي بقى ما انت هاتعوضه!
لو مصروفه ضاع...مفيش داعي للانفعال...ولا الزعيق...كلمه بالراحة
و"ابقى خد بالك المرة اللى جاية" ولما يطلب فلوس (وطبيعي جدا يطلب
بدالهم) ببساطة ارفض من غير ما تجرحه!
هايتعلم من نفسه يحافظ على فلوسه..على مورده الوحيد!
من الافضل الاطفال ياخدوا مصروف اسبوعي (مش يومي)..لو خد بالاسبوع هايبقى
عنده كذا اختيار...يا يصرف كله في اول يوم....يا يقسم الفلوس على ايام. اللى
هايصرف الفلوس كلها في اول يوم...هايحس بالضيق باقي الاسبوع...انه مش بيروح يشتري
مع اصحابه...خصوصا لو الشلة كلها اتفقت يشتروا حاجة سوا...وهوا مش هايكون جزء من
الاتفاق! وده يعلمه برضه يحط خطة مستقبلية للاسبوع...يعنى يتفقوا من الاسبوع اللى
قبله ان في يوم ياكلوا سوا فيه...النظام مهم...وكل ده هاينعكس على حياته
المستقبلية...لما يبقى رب اسرة وراجل بيصرف على بيت!
لو ابنك نفسه في لعبة او اي حاجة من هذا القبيل...شجعه يحوش نص تمنها من
مصروفه...وانت تدفع له النص التانى...وعلشان مايحرمش نفسه من الكانتين وانه يشارك
اصحابه...شجعه ماديا..بمعنى...لو عنده امتحان شهر او كويز مثلا وجاب تقدير كويس
اوي..اديله فلوس...مبلغ صغير كده...وتلقائيا هايحوشه مع مبلغ اللعبة اللى نفسه
فيها...انت بتختصر عليه الوقت والطريق انه يشتري اللعبة...انت مش بتخلق منه انسان
مادى...انا شايفة انك بتشجعه على الطموح. هو اشتغل كويس...جاوب
صح...كافأته...فاشترى اللعبة (وعلشان لو المدة طوَلت ممكن يزهق وبالتالي فكرة التحويش هاترتبط عنده بالضغط النفسي والاطفال صبرها قليل)!
زي حياتنا احنا...بنشتغل كتير...ممكن الشغل ده ينتج عنه مكافأة...وبتترجم
لفلوس (او احنا بنتمنى تترجم لفلوس)
مش ضروري كل مرة تكون هدية مادية...ممكن خروج او غداء في مطعم...بس ضروري
يكون جزء من مكافأتك مادى علشان تتيح له الاختيار والتصرف والقرار.
بس كده!
طولت عليكم :D
ريم اسامة
No comments:
Post a Comment