احيانا الواحد بيحس انه غير مرئي! بمعنى انه غير مفهوم لدرجة ان اللى قدامك ده اكنه من شايفك! مش مجرد مش فاهمك بس...لا...مش شايفك اصلا!!!
تلاقي نفسك بتتكلم في مشاعر عميقة وافكار مضطربة وانت حالتك مش مستحملة زقة...وييجي الشخص اللى انت اخترته من الكوكب كله علشان تبوح له بمشاعرك وافكارك الشخصية من دون البشر...وتلاقي رد فعل "لا بس انت اللى مش فاهم على فكرة ومش مقدر الموقف صح"
موقف؟! موقف ايه!! انا بنهار من اللى حصلي وانت بتقولي موقف؟ او يقولك "تعالى نشوف الموضوع من وجهة نظر اللى قدامك"...انا مش عايزة اعرف وجهة نظر اللى قدامى ولا اللى ورايا....انا عايزة اتكلم في وجهة نظري انا!!! في مشاعري وافكارى والاذى اللى وصلت له انا!! او الجملة الاشهر: "من وجهة نظر حيادية" يا جماعة اسمعوا الاول واللى بيشتكى ده يهدى ويبطل انفعال وبعد كده انصحوه!!!! ايه الظلم ده؟
وفي حالة اليأس اللى بنكون فيها عند الفضفضة...يأس ان اي حد يفهمك بس مش اكتر...تبدأ تتكلم تانى ...تشرح نفس الموقف تانى ...تكرر نفسك مرة كمان....لا طالب نصيحة ولا طالب حلول...انت بتطلب فقط حد يسمع بربع مخ وشوية تعاطف ولو مبتذل وغير حقيقي...تلاقي نفسك بتندم! في لحظة فاصلة كده...تسمع الصفارة...صفارة بجد مش بهزر...صفارة جوا ودك ومخك...بتفصلك عن التهزيق ده! ما انت بتهزق نفسك صدقنى...لما تختار حد غلط وتكشف ستر مشاعرك وافكارك تبقى كده بتهزق نفسك وتستهين باتزانك العاطفي!
وغالبا على فكرة هايقطع كلامك ويستغل القعدة الحلوة دي ويبدأ يعبر عن مشاعره هوا!!
والكلمة اللي فعلا من قلبي نفسي تتلغى من حياتنا...كلمة "امال انا اعمل ايه"...اعمل كيك! انت تروح تعمل كيك فانيليا حلو زيك كده!
ودى البوابة اللى هايدخل منها بدماغه ويحكى عن مأساته وحياته ومشاعره وافكاره ومشاغله وشكواه...يحكى يحكى ولما يخلص...يقوم سعيد ومرتاح نفسيا لانه الحمد لله تخلص من عبئ على صدره وكان شاغل باله!
وانت؟؟ انت فين؟؟
انا عارفة ان كلنا تعرضنا للمواقف دي كتير اوي...وهانتعرض لها كتير تانى طبعا اكيد. انا شخصيا قطعت مع ناس تماما بسبب عدم التعاطف وعدم رؤيتى! ما انا مش مجرد ودن واهتمام بالغير. انا كمان عندى مشاكل وهموم وافكار واضطرابات ومحتاجة اللى يسمع بدون اصدار احكام...او يجرب نصايحه هاتنفع ولا لا!
اكيد مش بسمع لكل الناس (انا مش اذاعة) بس على الاقل لما حد بيختارنى يتكلم معايا بياخد كل اهتمامى وتعاطفى الصادق وصمتى!! ايوة بجد ارجوكم اسكتوا وانتوا بتسمعوا. اللى بيشتكى مش محتاج مشورة ولا نصيحة..هو محتاج صمت وتعاطف فقط!
لو مش هاتعرف تعمل ده ...حاول تمثل انك بتعرف! مثل في اداء رخيص انك بتسمع وانك فاهم وانك حاسس بيه!
محدش مستحمل بجد!
ريم اسامة
لينك المدونة على الفيسبوك:
https://www.facebook.com/groups/329904227056535
