دايما بنلقى اللوم على اولادنا انهم مش بيسمعوا...وانهم لو بس سمعوا كلامنا مش هايقعوا في الغلط ده.
كلنا بنقول كده على فكرة...كلنا بننصح لاننا خايفين عليهم...لكن في الحقيقة لو بصينا بشوية تدقيق..هانكتشف ان الولاد بيتعلموا فقط من الاخطاء...مش من النصيحة.
واحنا بنلوم على الاطفال ليه؟ ما احنا كده برضه لحد دلوقتى!
بصى لحالك...لو مكنش البنك زنقك في اقساط كروت الائتمان...كنتى هاتتعلمى تبطلى صرف في الفاضية والمليانة؟ الاجابة: لا
لو كنتى من زمان حطيتي حدود للناس في حياتك...كانت هاتبقى حياتك مرتع للقيل والقال؟ طبعا لا
لو كنتى سكتى وقت الغضب...كنتى هاتندمى على كلام سخيف قلتيه لحد عزيز عليكي وعلاقتكم اتأثرت فعلا بسبب كلامك؟ برضه لا
لو كنتى اتجرأتى شوية ورديتي على كلام جارح ومستفز اتوجه لك قبل كده...كان الشخص ده اتجرأ عليكي تانى وتالت ورابع؟ لا خالص
محدش فينا اتعلم من النصيحة...يمكن سمعنا نصايح اهالينا ولكن الدرس الحقيقي خدناه من قلم علم علينا...من درس قاسى اضطرينا نعيشه ونعيش توابعه.
كل ما اسمع مشاكل الزوجات مع ازواجهم او اهل الزوج او الجيران...لازم بنسمع جمل متكررة زي "ما انا اصلي كنت هبلة وطيبة"...."زمان بقى لما كنت لسه بصدق"..."الكلام ده وانا صغيرة ومش فاهمة الدنيا صح"
هيا لا كانت هبلة ولا قليلة الخبرة ولا ساذجة...وكان في شبهها كتير في محيط معارفها ولكنها مكنتش مصدقة...متعلمتش من تجارب الغير لانها مش تجاربها الشخصية.
الشخص الطيب مش بيتغير...بيفضل طيب برضه...ولكنه بيتعلم يبقى طيب مع مين...وخبيث مع مين...وصامت مع مين.
الشخص المعطاء...مش هايبطل عطاء..عمره ما هايعرف يعمل ده لان ده طبعه....ولكنه بيكون ابخل من كلبة يزيد مع الناس اللى مايستهالوش.
ياما ناس اجتماعية جدا ورغاية اوي..وتلاقيهم صنم مع اشخاص محددة. لانه اتعلم يسكت...اتعلم يخرس خالص في وجود الانسان ده! لانه اتقرص اكيد!
انصحوا اولادكم طبعا...ولكن مفيش داعى للعقاب الشديد لو غلط ومسمعش كلامك. نصاحينا بالنسبة لهم احيانا بتكون غير مجدية...هما شايفينا عواجيز وعفى علينا الزمن وعلى افكارنا وخوفنا...اقفوا جنبهم لما يغلطوا...مفيش داعى للتقريع والعقاب...وطبعا الاذلال بتاع "مش انا قلت لك؟" والكلام ده.
لانه هايغلط ومش هايقولك بعد كده انه غلط...لحد ما يحصل حاجة كبيرة وتعرفها انت لوحدك وساعتها مش هاتلومه...هاتلوم نفسك علشان كان لازم تسانده في اخطاءه الصغيرة...قبل ما تكبر.
اولادنا هايقابلوا ناس تستغلهم...تضحك عليهم...تكدب عليهم...يتسببوا لهم في مشاكل...يضحكوا عليهم في فلوس...وطول الرحلة دي اولادنا هايتعلموا ينتقوا اصدقائهم...يختاروا الصحبة الصح اللى تناسب شخصيتهم وتفكيرهم...هايعرفوا معنى الراحة النفسية او التكلف والتصنع. كل دي خبرات اوعى تفوتك مع ابنك او بنتك. لما يقعوا لازم تكون ايدنا اول ايد تتمد لهم وتهون عليهم الصدمة الاولى.
ربنا يستر على اولادنا كلهم بجد
ريم اسامة
لينك المدونة على الفيسبوك:
https://www.facebook.com/groups/329904227056535
