القهوجي...زمان كانت وظيفة...حاليا بقت صفة! القهوجي هو البيه اللاجئ في القهوة على طول.
وبالتالي مراته ممكن تحمل لقب "مرات القهوجي"!!
القهوة هي الملاذ والملجئ...فاكرين لعبة الاستغماية؟ نجري ونلمس الامة ونقول "امَمممة!" (بضم الالف)...اهي القهوة تعتبر "امة" الراجل! اي وقت فاضي تلاقيه هناك...ولو مش في القهوة فهو بيخطط لنزول القهوة...اليوم كله بيدور حول الوصول للامه!
احنا (الستات) نتمنى يكون لنا قهوة...اقسم بالله ما هاتشوفوا وشنا في البيت ابدا!!! يا بختكوا...يا بخت كل القهوجية...فيها الاصحاب.....قعدة في الشارع بلا حيطان...ناس ماشية وحركة لا نهائية...تليفزيون...ينده يجي له المشروب او الاكل لحد عنده...ويتأمر براحته...بفلوسه بقى! مش بينكد على الراجل حاجة غير التليفون بتاع "انت فين؟ جاي امتى؟" بتاع المدام الكئيبة (من وجه نظره)
هانتبنى جانب الافندي بتاع القهوة وبعد كده المدام بتاعته.
اولا الراجل....هو متخيل ان القهوة دي اصلا مش خروجة (زي ما قلت في مقال سابق بعنوان "هيا القهوة دي خروجة؟؟)...طيب احب اوجه سؤالي للرجال...لو هيا مش خروجة...بتخرجها ليه؟!! وعند مواجهة الراجل بالسؤال ده قالي "علشان نفصل!" وقالي مكتوب في كتاب عنوانه "ابيض واسود" ان الراجل مابيحسش برجولته غير على القهوة....يقزقز لب ويتف في الارض براحته محدش يقوله "ايه القرف ده انا لسه منضفة" وينده ويتأمر "شااااي" يجي الشاي سخن وجنبه ورق النعناع...ولو كان شاي فتلة يطوح الفتلة في اي مصيبة...بفلوسه....هوا حر! انما في البيت الهانم مراته مش بتسمح له يمارس عشوائيته براحته! ست خنقة!
بينفخ مع دخان الشيشة همه..اللى الست غالبا بتكون جزء اساسي منه. على القهوة بيكون النقاش السياسي...النقاش الكروي...النقاش الاجتماعي...الاقتصادي...وسيرة الناس!
الست بقى: الست بتوصل لمرحلة ان كلمة "انا نازل شوية" بتركبها الف عفريت...وكل الجمل المحفوظة المقترنة بالقهوة بتجيب لها حموضة مع ارتجاع خفيف...زي الجمل بتاعة "نص وراجع"...."مش هاتاخر"...."العيال شكلهم هايناموا خلاص...انتى لو حطتيهم في السرير هايناموا في ثانية" (طبعا بقايا الضمير اللى جواه بيقنعه بالكدبة دي)....او يقولها "ده انا رايح هاقعد لوحدي!!" ... يابختك!
في جملة بقى مستفزززززززة لازم ولابد تتقال...وهي : عايزة حاجة من تحت؟....الراجل متخيل ان عرض خدمات جلالته انه يشتري لها باتنين جنيه فينو يساوي نزولة القهوة وكده واحدة قصاد واحدة. يجيب لها العيش وهوا يروح المخروبة...هيا كده خدت حقها!
على فكرة....الست احيان كتير بتطلب منك تجيب اي حاجة معاك مش علشان هيا فعلا محتاجاها...لا...بس علشان تقرفك...تلطعك في اي محل او فرن....او زي ما بيقولوا "هيا بتاخد بالباقي لبان"...زي ما بتسيبها تتفلق في البيت...هيا هاتقرفك في المحلات كل ليلة.
بس يا ريت بفايدة....لازم الراجل بيجيب حاجة غلط...او بينسى من اساسه....او يقولها "ملقتش ركنة"..."مكنش عنده فكة فقلت اجيب بعدين"....الفاكهة سيئة جدا عنده"....او "العيش مكنش لسه طلع من الفرن!" اي كلام اهبل وخلاص يبرر به التقصير...اصله لو قال انه نسي الست كفيلة انها ترص له نسي ايه طول فترة جوازهم (والخطوبة لو جالها مزاج)
مرات القهوجي دايما عصبية...تمتاز بالتقرب الى الله لانها على طول بتقول جملتين: حسبي الله ونعم الوكيل....صبرني يا رب!!!...ست مؤمنة حقيقي!
مدام القهوجي على قناعة تامة ان جوزها عايش في مياة الجبنة! لا حاسس بيها ولا حاسس بالعيال ولا شايف انهم محتاجين لوجوده في حاجة. واسهل جملة تتقال عند اعتراضها انه بينزل كتير هي: وانتوا عايزين تعملوا بيا ايه؟ ... او يقولها "اه..انتى عايزاني اقعد بالعيال وانتى تعملي اللى على مزاجك"...على فكرة مش عيب! العيال مش جايين هدية على طقم الصيني اللى امها اشترته في الجهاز..دول عيالك!!!!!!!!!!!!!!!!!!!!
الراجل مقتنع انه بيقعد ساعة فقط في اليوم على القهوة....على فكرة الراجل بيحسب الساعة دي من اول ما يجي له المشروب او الشيشة لحد ما يخلصهم...انما الطريق رايح وجاي والركنة والرغي مع اصحابه والحساب...كل ده بره المعادلة...هوا بيشرب الشيشة او المشروب في ساعة....دي حساباته بقى! اعترضي لو عايزة...اتفلقي...هيا دي الساعة ولو مش عاجبك....هاتلاقي حيطة تخينة كده في الصالة...ارزعي دماغك فيها!
يا مدام القهوجي....معلش....لما عيالك يكبروا هايكون لك مساحة تعملي فيها اللى انتى عايزاه...بس يبقى يعترض البيه....انا متاكدة ان افكارك شريرة اكتر منى وهاتعرفي تنتقمي لنفسك!
ربنا يقدرنا على فعل الخير
ريم اسامة
No comments:
Post a Comment