مقال المرة دي شخصي اوي.
بيتنا (بيت بابا وماما) فيه اوضة مكتب ومكتبة كبيرة...بتاعة بابا...او ممكن نقول ده مقره الدائم...فوق المكتب في اباجورة سبوت spot...ليها نور مميز كده...مش اضاءة عالية تغرق الاوضة كلها ولا منخفضة تجيب اكتئاب...اضاءة كويسة مسلطة على مكتبه الخشب.
للنور ده اهمية في بيتنا.
من زمان وانا صغيرة ولحد دلوقتي لما اكون بايتة عندهم اول حاجة بعملها اول ما اصحى من النوم هي الخروج من حجرتي وابص على المكتب...اشوف النور مضاء ولا مطفي...وبيجي لي "غصًة" بسيطة في حلقي لما الاقيه مطفي! بتضايق اوي...وبحس بانشراح وبداية يوم جميل لما اصحى والاقي نور المكتب منوًَر. "بابا صاحي" بقولها لنفسي واكمل طريقي اغسل وشي وكل الطقوس البسيطة بتاعة اول اليوم واروح على المكتب على طول :) بابا حبيبي دايما بيستقبلني بابتسامته المميزة ويقولي "صباح الخير يا هندسة" لما هو يبدا الكلام...او يرد عليا "صباح الفل" :)
اول حاجة ماما بتعملها هي الخروج لاوضة المكتب تصبَح على بابا وتسئله لو كان عايز شاي...اختى كذلك...كلنا اول ما نصحى نبص على المكتب. نور المكتب بداية مشرقة ليومنا كلنا. حتى اولادنا اول ما يصحوا مش بيصحونا...بيخرجوا بره على المكتب يدوروا على جدو :)
اوضة مكتب بابا فيها كل حاجة هو محتاجها وبالتالي مش محتاج من باقي الشقة حاجة تقريبا...فيها كل كتبه طبعا...متقسمة كتب تاريخ وكتب دين وسياسة وهندسة ومكان مخصص للموسوعات والروايات والقواميس...ومكان للطوابع ومكان للعملات القديمة والنادرة...وعلى المكتب في كمبيوتر وطابعة وسكانر والتليفون والراوتر وطفاية وكل حاجة بيستخدمها...يتميز مكتبه بالورق الصغير...تحت الكي بورد في ورق صغير مكتوب فيه ارقام او ملحوظة او تليفون حد...في ادراجه في ورق صغير مدون فيه حاجات غالبا مش بنفهمها برضه بتاعة ايه...بس لو ورقة من دول ضاعت بتكون مشكلة...كل فترة الورق ده بيتفرز...ادراج المكتب كلها اظرف...كل ظرف فيه حاجة مختلفة ومهمة طبعا...وبعد ولادة الاحفاد بقت الادراج بمفاتيح :)))
طبعا يوجد ادراج لعشق بابا الاول...العدة..بابا بيحب العدة اوي مفاتيح ومفكات كل الاحجام والشكال..وفي دولاب كامل متروس عدة يدوية وكهربائية! وبرضه اللى عايز يصلح اي حاجة يروح على المكتب عدل...الاوضة دي قبلة البيت كله.
في رمضان بنتجمع في الاوضة دي ونصلي جماعة...نصلي التروايح ونقرا قران فيها...ونصلي التهجد ونتناقش بعد الوجبات فيها برضه في الايام العادية. كل مناقشاتنا الخاصة بحياتنا كانت فيها....كل القرارات الحاسمة والمهمة تمت في المكتب.
اخر اليوم الاوضة بتكون مليانة لعب ومجات شاي وشنط العيال...اخر المطاف كلنا بنقعد فيها برضه ونسيب الشقة كلها.
ربي لا تطفئ نور المكتب ابدا...فهو هداية لنا على طريق حياتنا....هو طمأنينة قلوبنا ونفوسنا...طالما نور المكتب مضاء فالدنيا بخير وسعيدة.
ربنا يخليكم لنا ويديم عليكم الصحة (باباوماما) :)
ريم اسامة
جروب المدونة على الفيسبك: https://www.facebook.com/groups/329904227056535/
No comments:
Post a Comment