زمًار الحي

مثل شعبي عظيم: زمَار الحي مايطربش! فعلا...لو جنبك مدرسة مش هاتعجبك...هاتروحي البعيدة 

لو جنبك سوبر ماركت....لا مش حلو...انتى هاتتكيفي بالبعيد اللى تضربي له مشوار علشان تقتنعى انك وفرتي وانجزتي وجبتي الديب من ديله!

كذلك الازواج!! 

حصل موقف اثر في معنوياتي وقررت اشارككم الفقع!

زميلنا في الشغل بيحكي عن واحدة يا حراااااااااام تعبانة خالص خالص في حياتها..جوزها مزنوق في شغل الفترة دي بيرجع بالليل...وهما عندهم اولاد في المدرسة ...يا عيني بتنزل تجيبهم من الباص (تحت العمارة) ويا حرام بتذاكر لهم...ويا كبدي بتقعد معاهم وهما بيعملوا الهوم ورك...وبتعمل اكل وتنضف الشقة...جوزها بيقول خايف يكون ظلمها معاه!!

ترانى تأُثرت!!

هيا بتشتغل؟ - لا

العيال في مدرسة دلوقتي؟ - اه

يعنى يا حرام كل يوم بتشرب النسكافيه في هدوء وتعمل الاكل براحتها وقاعدة في البيت بكرامتها مش بتنزل الشغل تشوف اشكال تسد النفس ولا مدير يقرف فيها ولا داخلة بمرتبها جمعيات تساعده ولا بتنزل في المطر والحر والبرد والتراب؟؟ لا غلبانة جدا!!

فرقت ايه حضرتك عن باقي سيدات مصر؟؟؟

وهوا فرق ايه عن باقي الرجالة يعنى؟؟؟ ماهم في الشغل وبعد كده يا نايمين يا في القهوة...يعنى برضه "خارج نطاق الخدمة وربما يكون مغلقا"!

وليه الاعجاب المبالغ فيه بست بتعمل نص اللى مراتك بتعمله؟؟ هوا علشان جوزها مقدر اللى هيا بتعمله فده معناه انها خرافية؟

هيا ست عظيمة محدش قال حاجة...بس ليه الانبهار ده؟ ما كلنا بنعمل اضعاف اللى بتعمله...كلنا كان عندنا اطفال رضَع لا بننام ولا بنسرح شعرنا وبننسى ناكل ولا بندخل الحمام براحتنا حتى...بس علشان كل راجل شايف ان مراته "عادي" تعمل كل ده...بس "السوبر ومان" مرات صاحبه ست اصيلة بتتعب!!

معنديش اي اعتراض عن شغل الست او اختيارها انها تقعد في البيت...شغل البيت يهد..يتواجد من العدم...مفيش حاجة اسمها شغل بيت بيخلص...وست البيت مجهودها مش قليل...لكن على الاقل بتحفظ كرامتها...بتختار الناس اللى بتتعامل معاهم...عندها رفاهية "القيلولة"...تطبخ وقت ما تحب...تنضف البيت بهدوء طوال الاسبوع وبالتالي بيكون فرصتها في الخروج افضل كتير عن السيدة العاملة (لان الست اللى بتشتغل اخر الاسبوع عندها عبارة عن مواعين غسيل تنضيف تنفيض طبيخ للاسبوع كله....الخ) وده مش موضوعنا...

موضوعي بقى الراجل اللى مراته طفحانة الدم وهوا شايف ان "عادي" تشتغل بجانب شغل البيت ومجهودها كأم! 

نفس الشيء بينطبق برضه على والدته..هوا شايف انها ست خرافيه وفوق مستوى اي ست تانية وان طبيخها عالمي واسلوب ادارتها اللبيت نموذج يحتذى به...الخ...يعنى ست عظيمه زي كده وخلفتك انت؟؟ طيب قول حاجة تتصدق!!

وفي نفس الوقت مراته بتعمل اكل حلو ويمكن احلى من والدته..مش بتخليه يعمل معاها اي حاجة في البيت (على عكس امه طبعا اللى كانت بتخليه ينضف اوضته غصب عنه وينزل يجيب لها طلبات وعيش) ولما يكون في اكل اي كلام مايقدرش يعترض ولا ينطق (لانه لو نطق هايسمع ما لا يسر..وكمان ميقدرش ينطق)..بس لو مراته عملت الحركة دي من غير سابق انذار...فيها خناقة لرب السما...في عيد الام صعب يفتكر "ام" اولاده...ولكن لازم يفتكر والدته وخالته (اللى في مقام والدته) وام صاحبه (اللى جوزها اتوفى علشان البر بها صدقة)...عيد ميلاد والده ووالدته  واخواته "بر" وواجب انه يحتفل به ويجيب تورته وهدية وياخد العيال وام العيال ويروحوا يحتفلوا...جميل جدا...مفيش اي اعتراض حقيقي...بس في نفس الوقت بينسى او "بيتناسى" عيد ميلاد مراته...لانهم كبروا على اعياد الميلاد!!!!
الرجاله ليهم حركات كتير تسد النفس وتشل...بس لو في شوية اهتمام او شوية تقدير هاننسى لكم كل الحركات دي ونحاول نصفَي النيًة ونقول مش قصدهم التجاهل!
الرجالة دايما يشتكوا من نكد الستات...حضرتك زرعت بذرة النكد...احصد يا جميل!!


ريم اسامة 

جروب المدونة على الفيسبوك
https://www.facebook.com/groups/329904227056535/?ref=bookmarks