التننمر منتشر جدا بين الاطفال....التريقة على بعض على الشكل اساسا...اسلوب الكلام لو حد عنده صعوبة في الكلام او صعوبة في التعلم...لون الشعر وخامته...شكل الاسنان...لون البشرة...الخ.
الاعلام كله مركز مع الاطفال لان الكلام اسهل عن الاطفال...وان السن ده كله براءة وسهل اللعب بهم وبمشاعرهم وافكارهم ...الخ
الكلام ده كله حقيقي جدا فعلا...لكن التنمر على الكبار صعب ومرَ ومؤلم اكتر...ومحدش بيتكلم عنه!!
كام مرة مديرك استغل نفوذه في إضرارك نفسيا؟؟ كام مرة استغل سلطته في مضايقتك؟ كام مرة تهكم على شغلك رغم المجهود اللى بذلته؟ كام الف مرة حسسك ان الاجازة اللى من رصيدك دي كرم اخلاق منه وانه مجاملك جامد انه وافق عليها؟ كام مرة حسيت بالاهانة من معاملته السخيفة قليلة الذوق؟ كام مرة عرفت ترد؟ كام مرة عرفت تاخد حقك بجد؟؟
مرة؟ اتنين؟ عشرة؟,,,,قدام العشر مرات اللى عرفت تاخد فيها حقك...كام مرة تنمر عليك؟! مائة؟ اكتر؟؟
طيب ده الشغل...في البيت...جوزك حسسك كام مرة انك اقل من توقعاته؟ او ان المجهود اللى بتعمليه في البيت مش كافي؟ او انك لسه مقصرة برضه في حقه وفي حق البيت وفي حق اهله؟؟ كام مرة اتهمك بالتبذير؟ بالاهمال؟ بعدم النظام؟ بعدم اتخاذ القرار الصائب (لو سمح لك اصلا تاخدي قرار)؟؟
حد قبل كده علق على شكلك لدرجة انك تروحي البيت تعيطي؟؟ ده تنمر
حد علق على شكل اولادك وقررتي الزيارة اللى بعدها تروحي من غيرهم؟ ده تنمر
حصل وحد تهكم على احد اهتماماتك او هواياتك وبطلتي من بعدها؟ تنمر برضه
التنمر في كل حتة...في كل اتجاه...شغل وبيت وعائلة وشارع واونلاين!
ما اللى بيحدد شكل معين للست او الراجل او الطفل...بيخلينا نسكت على التهكم وعدم مراعاة شعورنا!
لو انتى صاحبة بشرة سمراء...رغم ان نص بلدنا سمر...بس ازاااااااااي تبقى ست مش بيضاء ناصعة البياض؟؟ لازم القرف والتريقة والوصم!!
لو وزنك زيادة...دي بقى هيصة ومدعكة كبيرة اوي حضرتك...وبما ان بقى في معايير معينة للجمال لا نقا ش فيها...فالست البدينة مش ست اصلا...سيبك بقى من حلوة ووحشة...هيا مش ست فمش هانكمل تصنيف!! التجريح في النقطة دي مؤلم جدا...ما التخين لو كان عارف يخس كان خس من زمان!! عنده مرايا وعنده هدوم مقاسها كبير وعنده نص الدولاب مستنيه يخس. مش لازم كل ما تشوفي صاحبتك تنبهيها ان وزنها زاد...او ترصي لها عيوب التخن ومميزات الرفع...مع رصة الامراض المنتظرة خصوصا بعد الاربعين خريفا!! مش لازم...احنا عارفين ان شكلنا مختلف عن المعايير العالمية للجمال...خلاص بقى!
الست اللى شعرها مش ناعم...ياختاااااااااااااااي...اولا بيتقال لها "يا كارته!!"...كنوع من الدعابة!!! ولو شعرها خفيف لازم قلة الادب بتاعة الصلع وبتاع...
مش بايدنا بجد يا جماعة...ما انتوا ربنا لم ينعم عليكم بالذكاء واحنا ساكتين!!
كل اللى فات ده تنمر على الشكل الخارجي... الازمة الاكبر لما يكون الكلام على سلوكك وقراراتك وحكمك على الامور والتصرفات العامة...التشكيك الدائم في قدراتك بتفقدك الثقة في النفس وبتكتسب الكثير جدا من الاهتزاز وانعدام الرؤية (رغم قدرتك عليها)
لو انت راجل وبتقرا المقال العبيط ده...معلش تعالى على نفسك وخد منى كلمتين كده يمكن يكون لهم تأثير مباشر في بيتك...بلاش تقلل من مجهود مراتك...مش معنى انها مش بتشتغل يبقى تتصنف بواب الشقة!! هى مش لازم تجري ورا كل ذرة تراب في البيت ولا تكون مسئولة عن كل فردة شراب ضايعة وكل استك مط!! لا مش مشكلتها والله صدقني...مش معنى انها قاعدة في البيت انها غير قادرة على العمل...بس هي اختارت دور اكبر واهم من دورك...البيت!! ماهو من غيرها انت هاتروح في داهية خالص...ومش موضوع اكل وشرب...لكن الحياة نفسها هاتفقد الكتير جدا من بريقها وراحتها. تخيل كده انت ترجع البيت بعد الشغل وتلاقي الشقة كلها ضلمة..ولا حس ولا نفس...بيت ساقع! الست هي روح البيت..فبلاش بكلامك الرخم بتاع التعليقات على نضافة البيت والترتيب واختيار اصناف الاكل يحطمها معنويا...ولو هى اعترضت من فضلك اسمعها...بلاش تقولها الكلمتين بتوع انها مش حاسة الفلوس بتيجي ازاي وانها قاعدة طول اليوم في البيت وجملة "وانتى بتعملي ايه يعنى؟"....كل ده تنمر والله وعيب عليك يعنى ده انت راجل كبير!! ويا ريت معلش يعنى لما تيجي والدتك توجه لها اي انتقاد تقف جنب مراتك...مش لازم تعمل نفسك اصم! وقًف المهزلة ونزيف الكرامة ده...انت الراجل هنا...كرامة مراتك من كرامتك...وقف والدتك بطريقة مؤدبة وفهمها على جنب بعد كده ان مالهاش علاقة ببيتك...ولا بمراتك (حتى لو الست الكبيرة عندها حق)...هاتزعل وتتقمص لها شوية وخلاص وتحل مشكلة ابدية بتسبب توتر علاقتك بمراتك من غير ماتحس!! اللى والدتك بتعمله ده بدعوى انها ست كبيرة في السن وخبرة عنكم يصنف تنمر ضد مراتك!! وسكوتك عليه بيقلل من رجولتك بالمناسبة!
المعايرة بالاطفال مؤلمة اوي...لو بنت صاحبتك شبه حماتها...خلاص اسكتي...ماهي عارفة!! مش كل ما تشوفي وشها تقولي لها انها شبه حماتها!! وبرضه مش لازم التعليق على شكل الاطفال اصلا من فضلكم...حتى لو كلمة عابرة في ثانية ونص...ممكن تأثيرها يستمر لايام من غير ما تحسي!! في مناطق مفيش داعي الكلام فيها ومنها انتقاد الاطفال (شبه مين ولونهم ووزنهم وخامة شعرهم...مستوى ذكائه ومستواه الدراسي وسلوكهم عامة) - اولادنا اكبر نقط ضعفنا...احنا عايشين علشانهم...واي فشل فيهم هو فشل حياتنا كلها!!
احنا ممكن نكون بنتنمر على غيرنا برضه على فكرة...هوا احنا اكيد بنعذب عيالنا :D بس بعيدنا عن الاطفال (اللى يستاهلوا بصراحة علشان ده جيل مرعب)...كفاية تعذيب في اصحابنا...والتعليق السلبي على تصرفاتهم...طريقتهم في الحياة...اهتماماتهم...شكلهم...لبسهم...لونهم...عيالهم...ازواجهم....
كفاية قلة قيمة بقى يا جماعة عيب كده!!!!!
ريم اسامة
لينك المدونة على الفيسبوك:
No comments:
Post a Comment