ربنا اختار يختبرنا في اعز حد عندنا...في بنتنا الصغيرة!
الحمد لله...فعلا احنا راضيين ومش ناقمين اطلاقا...كله بأمر الله في النهاية...وللي مايعرفش مالنا - البنت اجرت 3 عمليات في رجلها في فترة صغيرة ولسه قدامها رحلة علاج طويلة بس الحمد لله بجد ربنا كريم...لعله خير
وهو فعلا خير في نواحى كتير اوى...ثقة بنتنا فينا كبرت اوى الحمد لله...مكانتش قليلة اصلا...لكن هى اقتنعت اننا مش ممكن نزهق منها او من احتياجها لينا ولوقتنا الكامل ودعمنا المستمر...او دفع اي مبالغ علشان راحتها (مش بس علاجها)...اتعلمت المعنى الحقيقي للصلابة والصبر والنظر للجانب المشرق للامور...الخير جه في اننا عرفنا فعلا نعيد ترتيب الناس في حياتنا وحياتها...وهي ايقنت ان اهم حاجة هي العيلة...وان مجهود الاسرة كلها وقت الشدة لازم يكون موحد في اتجاه واحد بدون اعتبار لاى تفضيلات شخصية...العيلة كانت الثابت الوحيد في يومها...محدش فيهم نسيها..ولا اهملها...ولا زهق من كتر ما اعتذرنا عن حضور اى مناسبة او تجتمع...بالعكس...كانوا بيتجمعوا عندها...في اوضتها...اوضتها الصغيرة دي كانت بتستحمل 8 او 9 اشخاص كمان في نفس الوقت ...بس علشان يظهروا لها حبهم ودعمهم.
احيانا الاطفال بتكبر قبل اوانهم من الظروف اللى بيمروا بيها...القدر بيجبرهم على تقبل واقع صعب...مفيش في ايد اي حد انه يغيره...وهم في سن صغير دماغهم بتتفتح على معانى كبيرة...زي المعنى الحقيقي للصداقة...لتقدير قيمة الحضور في حياة انسان يمر بمحنة قاسية...للالتزام بتعليمات الاطباء مهما كانت مجحفة في نظرهم...لحب الغير وتقدير حب الناس لينا...للواجب اتجاه احبابنا...لتحدى الظروف المفروضة...لتقبل القدر...للتفاؤل بأن كل ده هايعدى باذن الله! وتقدير صغائر الامور...زي انك تقوم تجيب لنفسك مياه! دي حاجة تافهة ماتعديش على بال حد انها تحدى اصلا!! الاطفال اللى ربنا بيختارهم يمروا بظروف صعبة...بيكونوا مختلفين لما يكبروا...نظرتهم للحياه بتختلف...مش بدافع عن بنتى...انا بتكلم عن نماذج كتير قابلتها في رحلة علاجها...ولما اصحابي يتكلموا معايا عن حالات اولادهم مكنتش اعرف انهم في ابتلاء اكبر بكتير مننا...ربنا له حكمة في اختياره للاطفال دى اكيد.
المقال ده علشان اشكر كل اللى فعلا عرفوا يخففوا يوم بنتنا الطويل الممل المتكرر...اللى قدموا لها الخير بدون انتظار اي شئ من طفلة....اللى اعتبروها بنتهم...واللى حطوا نفسهم مكاننا...اللى كلفوا نفسهم وقت ومجهود وادخلوا عليها الفرح والسرور وحسسوها انها لسه متشافة...انها انسان له مكانة مش مجرد حالة علاج!!
شكرا بجد...شكرا انتوا فرقتوا معانا كتير ومعاها طبعا...جميلكم على راسنا...
ريم اسامة
No comments:
Post a Comment