معروف تماما ان "ما اخذ بسيف الحياء فهو حرام"
يعنى لو حد خد منك حاجة وعارف انك هاتتكسف ترفض ورغم كده خدها برضه...الحاجة دي حرام!
الكلمة تشمل كل المعانى
ان كانت الحاجة دي مجهود....مشاعر...فلوس...شغل...اي حاجة تخصك...اي حاجة!
ماينفعش تستغل ضعفى وتاخد رزقي...ماينفعش تستغل احراجى وتاخد مجهودى وينسب لك...ولا ينفع تستغلنى ماديا لانى هاتكسف ارفض!
كل ده حرام حرام حرام
للاسف الشخص اللى بيتم استغلاله بيتعذب بدل المرة كتير...مرة لانه حاجة تخصه اتاخدت منه غصب...وبيتعذب مرة تانية لشعوره بقلة الحيلة والضعف ويبدأ يكره شخصيته ونفسه وحياته....ومرة كمان لخوفه ان ده يتكرر تانى في حاجات اكبر واكتر...الشخص المقهور بيتعب اوى من شعوره بالظلم والضعف والاستغلال!!! والشخص ده ممكن يمرض بسبب الاستغلال وبسبب رفضه للى بيحصل ولشعوره بالغصب وضعف الشخصية!
للاسف الواحد بيتم استغلاله من اقرب الناس...لانهم اصلا اللى يعرفوا مفاتيحنا ويعرفوا ازاي يستخدموها ضدنا لمصلحتهم...الاصحاب...الاقارب...الاهل...زملاء العمل...كل الناس دي قريبة....كل دول يعرفوا ازاي كويس اوي يستغلونا وياخدوا حاجتنا غصب عننا.
محدش يقول "انا مش هفأ علشان ده يحصل"....لو اختك جت بيتك مثلا وخدت منك شنطة غالية (ده مثال هايف طبعا) وهي قررت ان الشنطة دي مش هاترجع...مع اعتراضك هي برضه خدتها وضمتها لدولابها...هاتحسي بايه؟ غضب...قلة حيلة...استغلال...كره للعلاقة دي...العلاقة اللى المفروض مايكونش فيها استغلال ولا غصب ولا تجبَر من ناحيتكم انتوا الاتنين.
زي برضه زميلك في الشغل اللى ياخد ترقيتك بموافقة المدير لان مراتك بتشتغل وعندكم دخل زيادة وهوا مراته ربة منزل(حصلت قدامى علشان بس محدش يقول خيال وبتاع)
لما العيلة كلها تقرر تساعد فلان لاي ظرف كان واجبار الكل يدفع مبلغ كذا...بغض النظر انت تقدر ولا لا.....ده استغلال انتماءك للعيلة....ده استغلال للاحراج اللى هاتكون فيه وهما بيبلغوا العيلة انك الوحيد اللى رافض تشارك وخوفا من "الفضيحة" فانت تدفع مجبر وكاره العيلة واللى جابوا العيلة...وكاره نفسك وضعفك ورضخك للضغوط
من اسوأ المواقف اللى بتبرر للشخص ده انه ياخد براحته من غير حساب لمشاعر اللى قدامه...هو المعايرة...او المنَ...يفكرك انه قبل كده ادالك كذا وكذا...او انه ساعدك في كذا وكذا...او انه وقف جنبك في الموقف الفلانى وازااااااى انت رافض دلوقتي تساعده!!
ده ابتزاز رخيص...اوعى تحس باي ذنب....صاحبك او قريبك ادالك او ساعدك من منطلق "واجبات العلاقة"...للصديق واجبات...للزوج والزوجة واجبات...للاهل والاقارب واجبات....وكان من واجبهم يقفوا جنبك....ولكن مش من حقهم يدخلوا يسرقوك عيني عينك!!
معلش...هونوا على نفسكم...مفيش داعى تنمر الاخرين او استغلالهم لك او عدم رؤيتهم لمشاعرك تخليك تكره نفسك او تجلد ذاتك لانها لم تتحمل الصمود...
لكن اعترض...قاوم...وارفض قدر استطاعتك....ارفض...حتى لو مجابش نتيجة...اضعف شئ تقدر تعمله هو اعلان رفضك...
الله المستعان
ريم اسامة
لينك المدونة على الفيسبوك
https://www.facebook.com/groups/329904227056535
