ملاقيش عندك هدمة قديمة؟

في مشكلة كبيرة في بيوت كتير في مصر وهي: الشغالة!

كل واحدة نفسها في شغالة ملتزمة في المواعيد - نضيفة - امينة - مش رغاية - مش حرامية!

ستات كتير جدا بتتنازل علشان خاطر الهانم الشغالة تفضل معاها وماتطفش منها...لو واحدة عندها شغالة كويسة مش بتقول لحد ومش بترضى تديها لحد لحسن تفضل عند صاحبتها ومتروحلهاش تانى!! في جملة شهيرة جدا بتتقال وهي "انا مديش شغالتي لحد" !!

وفين دي اللى بتروح البيوت ومش بتسرق يا جماعة؟ حقيقي مفيش! انا سمعت قصص وروايات وحواديت كتييييير عن السرقة دي! اللى سرقت علبة الدهب كلها من الدولاب واللى سرقت حلل صغيرة واللى سرسبت طقم المعالق والشوك واحدة واحدة لحد ما البيت كله بقى في معلقتين شاي! واللى تقلب رزقها من التلاجة ومن دواليب المطبخ والدولاب الشخصي لحضرتك او التسريحة او الادراج او من الحمام!

المشكلة ان في ستات كتير اوي بتتكسف تقف على راس الهانم اللى بتنضف....بتديها حريتها علشان متحسش انها متراقبة!! وبعدين تدور على المعلقة ام ايد على شكل تفاحة متلاقيهاش..طيب فين كيس البندق اللى كان في الفريزر من رمضان اللى فات؟ وفين الشامبو اللى جبته من السوق الحرة؟ في كوبايتين ناقصين من طقم الكريستال! فين الحلق الاحمر؟ فين الشبشب ابو صباع الفوشيا؟ انا متاكدة انى جبت تلات اكياس مكرونة مقصوصة مش كيسين بس! كان في صابونة في دولاب الحمام انا عداهم! وبعدين تلاقي مثلا عشرين جنيه ناقصة من الشنطة! هيا مش هاتاخد كتير علشان ماتشكيش فيها...ولما تجيلك البيت لازم الاول تفطر وتشرب الشاي....وبعد شوية تعمل دايخة وتديها عصير...وحبة كمان تلاقيها بتقول مثلا "اةة يانا!" وتكلم بنتها في التليفون وتسمعك ان ضهرها مقطوم والمسكن معملش حاجة ولما تسئليها تعمل مكسوفة انك سمعتي وتقولك قصة مفبركة كده علشان متطلبيش منها تشيل الشيش وتغسله! وعادي جدا انك لو مش واقفة تغسل الحمام بالمياة بس من غير صابون ولا غيره! عادي برضه انك لما تطلبي منها المرة اللى بعدها انها تستعمل ديتول او اي منظف تانى تروح دالقة لك الازازة كلها في الحمام!! 

مفيش اي غضاضة انك تساعديها علشان تنجزوا في الوقت وعادي برضه انها تقولك جاية وتفضلي ملطوعة انتى وماتجيش وماتردش على الموبايل! عندها خمسة وتلاتين عم وخال بيموت واحد كل اسبوعين...ابوها راح المستشفى اربعين مرة وابنها بيعمل خمستاشر عملية في السنة! وموبايلها بيتسرق كل ما تنزل بيه الشارع وبتغير الشريحة كل مرة طبعا علشان كده مردتش عليكي او الخط مغلق علشان مكانتش لسه استلفت "عدة" من ابن اختها!! وضروري ولابد يكون بيجيلها مغص كلوي! معرفش اشمعنى الكلوي بس كلهم كده!
 لازم تلاقيها موجودة في المناسبات علشان "كل سنة وانتوا طيبين ويعود عليكوا الايام بخير"..ولازم طبعا بنتها تكون متخانقة مع جوزها  وجوزها ده اصله مدمن وابن (تييييت) وبيضربها وقامت سايبه له الشقة وخدت معاها قرطة العيال وراحوا عندها البيت...وطبعا لازم دمعتين تماسيحي كده علشان تسبك الدور...وتلاقيها اصلا معندهاش بنات!! بس اهو اي كلام فاضي علشان تديها زيادة وخلاص...او لو ادتيها الفلوس اللى متعودة تديهالها تبص لهم كده وتلبس الوش المكسوف...وتروح عاملة ايدها بحزن كده (زي حركة ياللا ما علينا) وتقول في سرها الحمد لله (سرها اللى انت هاتسمعيه) علشان تحسسك انك ظلماها وان يا حرام مجهودها ملوش قيمة وانها ضيعت اليوم على ملاليم وحيائها يمنعها انها تتناقش في الفلوس! وتلاقيها نازلة عاملة الست الحزينة  بتجرجر في رجليها ن مش عارفة هاتروح من غير فلوس عدلة ازاي!
وعادي لما تيجي عندك وتقولك "ملاقيش عندك هدمة قديمة علشان نسيت اجيب معايا الجلبية!" وتاخد الجلبية ومش بتشوفيها تانى عليها! وعادي لو تنبهك ان في جزمة كعبها مقشر ولو هاترميها قولي لي يا مدام الاول معلش! وبعدين هاتجيب سيرة ابنها اللى خاطب ومش عارفة يشتري بوتاجاز تلاته شعله ....وتقولك على كمية الجمعيات الخرافية اللى هيا وبناتها داخلينها مع الجيران علشان الواد يتجوز بدل ماهو صايع كده...وضروري تجيب سيرة الربو اللى عند البت الصغيرة اللى بتجري بيها في انصاص الليالي علشان تاخد جلسة "اكشوشين" قبل ما تفطس...وابن اختها اللى وقع من البلكونة...والتوكتوك اللى اتقلب باختها  الصغيرة اللى هيا بتربيها مع عيالها وجالها ارتجاج!
وماننساش ان كل الشغالات اجوازهم على كرسي بعجل ومش لاقيين شغل بعد الحادثة!

https://www.facebook.com/groups/329904227056535/
 ريم اسامة  

انا الجارية اللى اشتريتها من السوق!!

مفيش بيت مابيعديش عليه خناقات وكلنا بيعدي علينا ايام نندم فيها اننا اصلا اتولدنا (مش بس اتجوزنا)

وطبعا لما بنتخانق بنفتكر كل المواقف الوحشة والايام السودا اللى عدت علينا في الجواز - ومتهيألي ان الراجل كل ما يتخانق مع مراته بيفكتر "ميرفت" جارته و"نهى" زميلة الثانوي و"داليا" زميلة الجامعة و"منى" زميلة الشغل و"رشا" صاحبة اخته....ساب كل دوووووووول واتجوز "اعتدال" مراته! اعتدال ده مش اسمها بس هوا ده الاسم الكودى اللى بيقوله لنفسه لما بيفتكرها....زي ما اسمه عند مراته "قلب امه"
المهم ان كل خناقة بيتقال فيها جمل او "كليشيهات" كده محفوظة في كل بيت - زي ما يكون الخناقة في كل البيوت واحدة ومن الجمل دي:
  الرجل:
- انتى اتغيرتي
- انتى مش مهتمة بنفسك
- انتى مش مهتمة بيا 
- انتى على طول بتشتكي؟
- هوا انتى على طول تعبانة كده؟
- انا مش هاشحت منك على فكرة
- هوا التعب بيطلع عليكي لما اكون انا محتاج حاجة؟ بس لما تروحي لامك مش بتحسي انك تعبانة مش كده؟
- هوا انا ليا طلبات؟؟ انا مبطلبش اصلا !! (فيلم الخيال العلمي اللى الرجالة كلها مصدقاه)
- اه صحيح ما انتى بقالك اسبوع متخانقتيش! 
- هوا انتى مش بتشبعي طلبات؟
- هوا انا اجيب زي ما بجيبش؟
- هوا في راجل بيدخل العيال الحمام؟؟ هوا في راجل بيعمل المواعين؟؟ (الاتنين دول لما تكونى انتى عيانة ومتوقعة منه يساعدك)
 - وانا هاهتم بفلانة ليه؟ خلي عندك ثقة في نفسك! الذوق واللياقة مش اهمام بحد!
- وهوا انتى فاضية غير للتركي بتاعك ده؟ ده لو مهند شافك هايرمي نفسه في بركان نشط!
- انتى حاطة امى فوق راسك ليه؟؟ هيا عملت لك ايه؟
- اختى برضه؟ هوا كل مصيبة يا امى يا اختى؟ انتى بقى الملاك اللى مش بيضايق حد؟؟
- انا مش بجيب لنفسي حاجة (ارجوكي لما يقولك لك الجملة دي بلاش تشتمي)
- نعم!!! (دي لما تتكلمي كتير وهوا عامل فيها مقموص او اطرش - ولما تندهي له بالاسم يقولك نعم بكل زهق ونفاد صبر)
- انتى فاكرة نفسك بتكلمي واحدة صاحبتك؟؟ (لما تتكلمى بطريقة مش عاجبه جنابه)

الست:
-  انت بقيت صعب اوي
- والله ربنا هايحاسبك على اللى بتعمله معايا ده 
- اتقى الله 
- بقولك اييييييييه.....(وتكمل الجملة )
- اله يا رب تولع القهوة باللي فيها (لما يتاخر هناك) 
- انا مش الخدامة على فكرة !!! 
- هوا انت كل يوم كده؟؟؟ مابتزهقش؟
- يا ترى ابو الهول هاينطق امتى؟! 
- نفسي اعرف ايه الجميل اوي في الموبايل كده ماسكه ليل نهار!!
- لو راجل طلقني!! (دي لو استفزتيه شوية هايطلق على فكرة - احترمي نفسك يا فوزية وبلاش تقوليها تانى)
- انا عايشة بين اربع حيطان - وجودك زي عدمه! (هوا هايعرفك قيمة وجوده اللى مش عاجبك ده - فبلاش برضه)
-  هما عيالي انا لوحدي؟؟؟
- انت مش حاسس بيا!
- هوا لو انا معملتش بنفسي كل حاجة في البيت ده، ماتتعملش؟
- هوا في حاجة بهدلتنى وجابت لي اكتئاب غير الجواز؟؟
- هوا حد بيعمل معايا حاجة؟؟؟ ما انا الجارية اللى جبتوها من السوق!!
- هوا مفيش حاجة بتعجبك؟؟؟؟؟؟
- براحتك!!
- احسن برضه!!!
- اللى خدته القرعة !!
- انت هاتذلني علشان بتشتغل وانا لا؟؟ ما انت اللى مش عايزنى اشتغل!!
- ده واجبك على فكرة انك تصرف علينا انت مش بتعمل حاجة زيادة يعنى!!!
- لو مش عاجبك ابقى اطبخ انت!!! 






طبعا مش عايزين ننسى دور "البرطمة" في الخناقات ومدلولها!
محدش فينا بيحاول يلطف الجو لما بنتخانق - كل واحد ماسك في موقفه ومش بيسمع للتانى غير لما يخلص صفيحة الزبالة كلها وبعدين نتصالح او نصالح! مش هاقول انى مختلفة او افتي لكم ان الشيطان فرحان بينا ومش عارفة ايه ...ولكن احنا كده وهانفضل كده والنصيحة الوحيدة اللى هاقولها "ارجوكوا بلاش عيالكوا يشوفوكوا بتعملوا كده في بعض ... ولا تنقلي كلام لاهلك هوا قاله في ساعة غضب"
ربنا يهدي النفوس :)


https://www.facebook.com/groups/329904227056535/
ريم اسامة

مايغلاش عليك

"كل سنة وانت طيب يا حبيبي" تديله الهدية وكلك ترقب لرد فعله لهديتك اللى فكرتي فيها كتير وحوشتي علشان تجيبيها ولفتيها وكمان كارت واخترتي الكلام بعناية وشياكة ... وبكل بساطة يقولك:

"مكنش ليه لازمة ... انا لسه جايب بلوفرين الشهر اللى فات -  ليه كلفتي نفسك"

رد فعلك الوحيد بيكون (!!!!!!!) ده لو مجالكيش جلطة من كتر الفرسة!

هوا انا محوشة وجايبة لون مش عندك ومكلفة نفسي فوق طاقتي علشان اجيب لك هدية غالية وشيك وتعجبك وعلى مقاسك ومن المحل اللى كان نفسك تجيب منه بس علشان غالي حبتين فمش بتجيب منه كتير....علشان تقولي "مكنش ليه لازمة" !! 

بجد الرجالة لازم تاخد كورس في شوية حاجات ومنها "كيفية استقبال الهدية"

ايه الاحباط ده؟ وليه الرخامة؟ وتلاقي ممكن برضه جملة تجيب لك كهربا زيادة في مخك وهو "مش كنا دفعنا فواتير الكهربا المتاخرة احسن من البلوفر ده؟!"

حسبي الله ونعم الوكيل - انتى نفسك تقوليها فى وشه بس لو نطقتي ضغطك هايخبط في السقف وتموتى وقتي في ساعتها وانتى واقفة...فحفاظا على شوية الصحة اللى العيال هاتخلص عليها قريب بتسكتي وبتحاول تبتسمي بس مش بتعرفي...عضلات وشك كلها متشنجة من الغيظ والصدمة!!

وبعدين تلاقيه ممكن جدا جدا مايلبسوش...يشيله يديه هدية لابوه الشهر اللى بعده بدل ما يشتري هدية!! 

"حبيبي انتى هاتديه لعمو؟" وتدعي يا رب يا رب يا رب مايقولش اه!

"اه في حاجة؟"

"بس مش انا اللى جايباهولك؟"

"ايوة ماهو بتاعي انا حر اعمل فيه اللى انا عايزه"

"بس انا اللى جايباه"

"ماشي جايباه علشان تذليني بيه يعنى؟ مش اديتهولي وانا حر اعمل فيه اللى انا عايزه؟ انا مش هاقدر اجيب لابويا هدية فهاديله البلوفر ده..على الله بس يعجبه!"

على الله؟؟ كمان على الله؟؟ نهار اسود!!

تروحي لبيت اهله يوم عيد ميلاد ابوه وانتى هاتفرقعي من الغيظ - انتى اللى محوشة وبدل ما تجيبي بيهم حاجة لنفسك ولا للعيال ولا حتى تجيبي حاجة لاختك ولا لمامتك بدل ماهم هاريينك انتى والعيال هدايا ... يروح المحروس جوزك مدي الهدية الغالية لابوه!

وجوزك بكل فشخرة يدي ابوه البلوفر "بتاعك اللى من فلوسك" ويقوله "كل سنة وانت طيب ... ربنا يخليك لينا " يقوم ابوه فاتح الهدية ويقوله "اييييه ده؟ ليه يابنى كل ده؟ ده شكله غالي اوي"

جوزك بكل فخر واعتزاز "مفيش حاجة تغلي عليك يا بابا" 

اااااااااااااااةةةةةةةةةةةة يا ضغطي العالي يانا!

ويدخل حماكي - اكراما لابنه وهدية ابنه الغالية انه يقيس البلوفر واللى قرر يجيبه لابوه بدل ما يصرفهم على بيته - ويقوله "والله يا بنى ماكان ليه لازمة المصاريف دي"

ويجي رد ابنه اللى متعلمش من ابوه ازاي يستقبل هدية "يا بابا عيد ميلادك بيجي مرة في السنة - هاستخسر فيك يعنى مرة في السنة؟ ربنا يديك طولة العمر"

وتردي في سرك ويديني الصحة وماتشلش صغيرة! 

http://www.facebook.com/groups/329904227056535/

ريم اسامة

فين الحب فين؟

تكونى سرحانة شوية كده في العربية وانتى مرزوعة في اشارة ولا في التاكسي وتشتغل اغنية قديمة بتحبيها اوي وطبعا بتكون اغنية "عاطشفية" - تحسي بقى بالكلام الجميل وتسرحي معاه تدوري على اي حاجة في تاريخك يحسسك ان الاغنية دي ليكي انتى وبعدين تلاقي واحد واقف على جنب الطريق ومسهوك في نفس كده ماسك الموبايل ومميل راسه على جنب وبيتكلم وابتسامة على وشه (طبعا بيكلم المزة) - كل ده والاغنية لسه شغالة - وتحسدي البني ادمة اللى على التليفون الناحية التانية وتقولي في سرك "يابختك عندك اللى يحبك ويقولك كلام حلو وبكره تتخطبوا لو مش مخطوبين فعلا دلوقتي وتتجوزوا ويكون عندكوا بيت وعيال وتفرحوا"...هنا تنزل عليكي الفاجعة وهوا انك متجوزة!! وانك عديتي بكل المراحل دي...مرحلة التليفونات والخطوبة وتجهيز شقتك الجديدة والفرح والجواز والعيال....طيب انتى ليه حسدتيها...وليه مش حاسة انك بتحبي وبتتحبي؟ ازاي اصلا نسيتي انك في علاقة ومعاكي عيال؟!! ازاي مش حاسة باللي هيا حاسة بيه؟ ازاي مش شايفة انك انجزتي كل احلام البنت والولد دول ودلوقتي عايشة حاجة هما بيحلموا بيها وحاسين انها بعيد اوي عنهم وان ده اقصى امانيهم؟ وازاي انتى مش مبسوطة كده؟؟؟

ليه الاغنية حسستك بحاجة مش معاكي؟ ليه حسيتي انك مش في علاقة اصلا ومحتاجة حب؟ طيب ما انتى معاكي راجل بتاعك فعلا وبيت بتاعكوا لوحدكوا وعيال اشتركتوا في تربيتهم...ازاي بينكوا كل ده ومش حاسة انه شريكك الوجداني؟!

عارفين ليه؟ علشان احنا دخلنا دوامة الحياة وخليناها تدوسنا !

فاكرة ايام الخطوبة؟ والتليفونات؟ فاكرة لما كان بيجيلك البيت وكنتى بتلبس احلى حاجة عندك وكل مرة بتحاولي يشوفك بحاجة جديدة حتى لو صغيرة؟ فاكرة المناسبات العبيطة اللى كنتوا بتستغلوها علشان تجيبوا لبعض ورد وهدايا؟ فاكرة الخروجات اللى كانت بتفرحك حتى لو نزلتوا تتمشوا في الشوارع؟ فاكرة لما كنتى بتفوتي له ؟ لما كنتوا تتخانقوا وانتى تكبري دماغك ولما يجي يكلمك تعتبري انه كده بيصالحك؟ فاكرة لما كنتى بتعتذري لما بتغلطي؟ لما مكانتش لسه حماتك حاطت التاتش بتاعها في عيشتك وكنتى بتعامليها كويس؟ وفي اول جوازكوا لما تعملي الاكلات اللى بيحبها وتتجنبي الاكل اللى بيقرف منه - وكنتى بتلبسي كويس حتى في البيت.

اول جوازك كنتى بتجيبي حاجات صغيرة تغيري بيها شكل الشقة شوية - كنتى بتحطي برفان وكنتى بتعملي شعرك وكنتى بتهتمي بيه ...وهوا كمان كان غير دلوقتي!

لو ترجعي شوية بشوية لورا وتشوفي ايه اللى وقع منكوا هاتلاقي ان المشاكل اللى حصلت اصلها من كتر الشكوى! او كتر الاتهام لبعض!

تتهميه انه مش فارق معاه العيال والبيت وانتى ومش بيقدر مجهودك ومش بيقدر تضحياتك ومش بيقدر مشاركتك في البيت بكل اللى تقدري عليه 

وهوا يتهمك انك مش مقدرة تعبه في الشغل ومش مستحملة امه ومش طايقه انه ينام له ساعتين الضهر

فانتى تبادريه بالقاضية ان طلباته بقت بايخه وكتير ومش بيخرج غير عند امه وليل نهار على القهوة وانه مش بيحافظ على نضافة البيت اللى بيطلع عينك علشان تنضفيه

فهوا يديكي الكارت الكسبان وهوا "وانا فين من كل ده؟ انتى ليه مبقتيش مهتمة بنفسك؟ وانا ليه هاقعد في بيت مش حاسس ان فيه ست؟"

تروحي انتى اول ما ينزل من البيت على التليفون اول حاجة تليفون لامك تانى مكالمة لاختك تالت مكالمة لصاحبتك الانتيم - تحسي انك بقيتي احسن لما الناس دي تستنكر اللى هوا عمله فانتى تبقى على يقين انك صح وهوا مفتري!

وهوا لما ينزل القهوة يفضل يشرب في دخان ويلعب في طاولة ولا يرغي في السياسة ويفضل بره كتير علشان تكونى نمتي لما يرجع البيت علشان مش طايق يشوف شكلك!

تانى يوم لا انتى بتكلميه ولا هوا بيكلمك وفي ناس غبية جدا بتخلي العيال هيا اللى تتكلم نيابة عنهم!! يعنى "روح قول لامك فين البنطلون الكحلي" وهكذا

وانتى بالتالي تسيبي البنطلون الكحلي في الغسيل "اللى عايز حاجة يعملها انا مش خدامة ابوه" وهوا برضه مش هايطفح في البيت علشان "مش هاتذل انا باللقمة اللى بتعملها" والفجوة تكبر وتوسع وفي الاخر بتتصالحوا علشان بس الاولاد بدأت تكتئب من الجو المشحون...وخناقة ورا خناقة ورا نقاش ورا شكوى ورا اتهام ورا مكالمة من بتوعك....ضاعت ملامح العلاقة الاولى اللى كانت بينكوا واللى اتعاهدتوا انها مش هاتتغير وانكوا هاتفضلوا تحبوا بعض طول العمر!

مساء الفل! 

http://www.facebook.com/groups/329904227056535/
ريم اسامة

معادلة حزينة

في حاجة كده بتزعلني اوي - او بتخليني حزينة شوية وهي البنت اللى بتتجوز وتعيش مع جوزها بره البلد

انا شخصيا شايفة ان ده ظلم جامد للام - هوا طبعا ظروف الزوج كده والبنت راضية وفرحانة وربنا يسعدها - بس الام بتحس ان قلبها بيتخلع من مكانه - انا شخصيا مش قادرة اتخيل انى اسيب اهلي واسافر او لما عيالي يكبروا يسيبوني وحيدة ويسافروا

انا كنت برفض اي عريس جاي وبيشتغل بره واسافر معاه واجي اجازات لاهلي! يعنى ايه اجي اجازات بس؟ هما متعبوش عمرهم كله علشان في الاخر اقولهم "هاتوحشوني جدا" و"لا اله الا الله مع السلامة"!!

ازاي الام تعيش من غير عيالها؟ ازاي يبقى كل ارتباطها بيهم صوت في التليفون؟ 

يعنى بعد ما الام تربي وتستحمل وتضحى وشبابها كله يروح عليهم وعلى طلباتهم وسهر وتعب وقلق وتوتر وتفكير مش بيخلص لغاية مايكبروا ولما شعرها يبيض وصحتها تبقى على قدها يقولوها مع السلامة نشوفك كمان ست شهور! يا ترى الجواز يستاهل التضحية بالام؟ ايوة انا بسميها تضحية بالام طبعا...هيا ذنبها ايه تفضل وحيدة؟ من حقها تشوف عيالها انشالله كل اسبوع مرة - من حقها كل جمعة يتجمعوا عندها - من حقها تشوف احفادها بيكبروا - من حقها حد يطبطب عليها ويقولها "كتر خيرك" - من حقها تحس ان في حد معاها فعلا مش مجرد اصوات وصور بتتبعت لها كل فترة - من حقها تستريح وهما يخدموها شوية - من حقها تسافر فسحة مع عيالها واحفادها - من حقها تقضى الاعياد والمناسبات والافراح والولائم معاهم- من حقها تحس انها تعبت وبقى ليها امتداد تانى في عيالها واحفادها تشوفهم بعينها !! الام من حقها تحس بكل ده لكن في الاخر يجي راجل ياخد بنتها ويطير! علشان مفيش جواز غير كده!!! يا ترى الجواز في حد ذاته يستاهل التضحية دي؟

طبعا الحياة برة الطف واحلى وانضف وارقى واشيك وارخص ومرتبات اعلى ولبس احلى وتعليم احسن ورعاية صحية تحفة...طيب والام؟! هاتتساب لوحدها في الزحمة والتلوث والرعاية الصحية المقرفة والغلاء والنكد ده لوحدها؟ مش عيالها هما اللى كانوا مهونين عليها الحياة؟ 

مش هاتكلم عن المشاكل والازمات والصعوبات اللى بيقابلها الاولاد دول لما بيسافروا او انهم لو كانوا لقوا حياة تليق بيهم وبادميتهم في بلدهم مكانوش سابوها اصلا ! ولكنى بحاول اعكس احساس الام!

الموضوع مختلف طبعا مع الولد علشان لو ملقاش شغل في بلده مفيش باليد حيلة غير انه يدور بره والام قلبها برضه بيتحرق عليه وبيصعب عليها جدا بهدلته بره وطبعا لا بيعرف يطبخ ولا ياخد باله من نفسه زي ما هيا كانت واخدة بالها منه وكفاية انه مستحمل قرف اصحاب العمل علشان مايبقاش "عاطل" وعمره يجري من غير ما يلاقي شغل ورجولته مش بتسمح له ياخد مصروف من ابوه او امه وبيصعب عليها اوي تفوقه في الدراسة في بلده وعلى فص عينها (زي ما بيقولوا) انه يتشحطط ويتسحل لوحده ومش بتنام لما تسمع انه تعبان ولازم برضه يروح الشغل واكيد بيحوش اجازاته كلها علشان يقضيها معاهم وبيصعب عليها تنام او يغيب عن عينها علشان بيوحشها وهوا معاها !! وطبعا من حقه يتجوز وياخد بنت ناس يتحرموا منها ومنه لما يسافروا بره مكان شغله! هيا معادلة صعبة وحزينة بجميع المقاييس

http://www.facebook.com/groups/329904227056535/

ريم اسامة

فلانة ام عين صفرا

في ناس كده كل ما تشوفي وشها تقولك "معيييش فلوس وعندي ظروف رهيبة ومش عارفة اعمل ايه"

هيا مش بتطلب فلوس - خالص - هيا بتخزي العين!!

في ناس بتعتقد في الحسد بشدة...بعنف...بطريقة مريضة! يعنى كل ما مثلا حد يسئلها عن سعر حاجة جديدة هيا لبساها لازم تقول رقم فيه خمسة "75...55...35" كده! لا وتتك اوي على "خمسة"

وفي ناس كل ما تسئلي عن عيالها (سؤال عادي بحكم العادة) لازم تقولك عيانين...بيرجعوا...الواد سخن...اتصفى من الاسهال...ده مجنني...ربنا يهديه...الخ الخ

وبرضه لما تشوفي واحدة وتقوليها "ازيك عاملة ايه؟ واخبار العيال وجوزك ايه" لازم تقولك انهم متخانقين خناقة لرب السما! هيا مش متخانقة ولا حاجة بس لحسن يتخانقوا! ولو حصل واتخانقوا تبقى "فلانة ام عين صفرا!"

احلى حاجة ان الناس دي مشهورة جدا...مشهورين انهم خايفين! خايفين النعمة تزول...خايفين يتخانقوا في بيوتهم...خايفين العيال تعيا...خايفين حماتها تقلب عليها....خايفين الهدوم الجديدة تتبهدل او تتحرق من المكوى....خايفين يجيلها حب الشباب! الناس دي كل ما يقابلها سوء حظ او مرض او خناقة او حتى اتكعبلك في طوبة على طول تنسب اللى حصل انها "عين ...انا محسودة"

والناس دي مفيش في بؤهم غير كلمة "الحسد مذكور في الكتب السماوية" .... انا شخصيا شايفة ان لما القران اتقال فيه "من شر حاسد اذا حسد"....فده شر الحاسد..يعنى حقده..السواد اللى جواه ان حد يكون عنده حاجة حلوة....انه بيتمنى الزوال...الحاسد انسان مريض بيكره الناس وبيكره الخير لغيره...بيحب الخير لنفسه وبس...دون عن باقي الناس!
واحدة صاحبتي قالت لي عن قريبتها انها بتعتقد في الحسد لدرجة ان  ممنوع الاخوات يقولوا لبعض عن اي حاجة جديدة يجيبوها - بين الاخوات واخدين بالكوا ؟! - ممنوع يعملوا حفلة يجمعوا فيها الناس لحسن حد يحسدهم - ممنوع يقولوا انهم ساكنين في ايجار جديد لحسن الناس تقول ان معاهم فلوس يدفعوا الايجار الغالي - ممنوع حد يحكى عن شقاوة وعفرتة حفيدتها لحسن البنت تتحسد - ممنوع عزومات رمضان...ممنوووووووووووووع كل حاجة!!

والله انا قابلت ناس كتير جدا مقتنعة ان كل ما حد يشوف العيال لازم يمرضوا وتسمعونا بقى " فلانة حطاني في دماغها معرفش ليه...اصل انا جوزي محترم والناس مستكترة عليا النعمة....اصل احنا الحمد لله ربنا ساترها معانا فالناس مش عاجبها...انا بجد لاحظت ان كل ما البس حاجة جديدة لازم يحصلي مصيبة....هيا الكحكة في ايد اليتيم عجبة؟...احنا بجد مش بنخلص من العين وعلى طول عند الدكاترة...العيال بيسلموا بعض العيا ... انا كل اسبوع عند الدكتور...الشهر ده جبت دوا بخممممسمية جنيه (خدوا بالكوا من الخمسة)...الشهر اللى فات حماتي بهدلتنى (مش بعيد تكون حماتها متوفية اصلا)...بعد ما فلانة جت بقي قلبي مقبوض واتخانقت حتة دين خناقة ملهاش اي لازمة متفهميش ايه اللى ولع البيت كده مرة واحدة....شفتي لما جت مسابتش حاجة مسئلتش عنها منين وبكام! ايه الناس دي مش ممكن!!...فلانة كل ما تشوفني عايزة تشوف صور عيالي على الموبايل - والله لما تموت مش هاوريهالها - هوا احنا ناقصين؟....امبارح البلوزة الجديدة اتنتشت - اصل فلانة شافتني وقالت لي انها حلوة اوي - بجد مش مصدقة انها بتكره الخير لغيرها كده".......ومازال الهزل مستمر 

http://www.facebook.com/groups/329904227056535/

ريم اسامة

ديتول حياتي

المقال النهاردة طويل شوية - فاللي بيزهق ينزل يبص على اخر فقرة وخلاص ماتقرفوش نفسكوا :)
ناس كتير بتعانى من "الوسواس" - مش بالضرورة يكون المرض النفسي اللى هوا الوسواس القهري ... لا خالص...بس في حاجات كده او عادات او مخاوف بتسيطر على الانسان وتبوظ له حياته وطبعا بما ان الستات اسهل فريسة للموضوع ده فحياة كتير اوي من الستات متدمرة نفسيا بسبب الوسوسة والهسهس اللى عندهم.

في ستات مهووسة بفكرة انها لما تنزل الشارع هاتتسرق..ممكن يكون ده نتيجة حادثة سابقة فعلا او انها عامة عندها عدم ثقة في المجتمع والناس....في ستات مجانين بموضوع المرض وان اي حد يمرض يبقى هايموت اكيد...ممكن برضه يكون نتيجة وفاة حد عزيز عليها في سن صغيرة بالشكل ده! وفي ستات تعبانة جدا من احساسها بالذنب اللانهائي والغير مبرر اتجاه عيلتها فبالتالي بتحاول تعوض الاحساس ده انها على طول الخط بتدي مش بتاخد. وفي ستات بتخاف من اكل بره علشان اللحوم الفاسدة - واللى بتخاف من المصايف علشان العيال ممكن تغرق. وفي هسهس الراجل السهران بره البيت هيا بتخاف لايكون بيخونها (ودي ليها مقالة لوحدها خاااالص ان شاء الله)...وفي اللى مش بتشرب بره البيت علشان ماتدخلش حمام غير حمام بيتها! وفي ستات بتخاف لا تكون سابت البوتاجاز مفتوح او الغاز مفتوح وقبل ما تنام بتروح تبص على البوتاجاز مرتين تلاته وتشوف كل المفاتيح!! وفي اللى قبل ما تنزل من البيت تطلع تانى علشان تشوف النور مقفول ولا مفتوح والحنفيات كذلك! وفي اللى بتدوس على مثلا زرار الاسانسير مرتين (مش مرة) علشان بتكره الارقام الفردية - ولو باست صاحبتها لازم يا اتنين يا اربع بوسات - انما تلاته لا متقدرش - ودي لو باست حد مع عيالها وهوا نايم فمش طايلة الخد التانى فتبوس الخد اللى قدامها مرتين!! نفس الموضوع مع الاعداد الفردية طبعا! (على فكرة انا كنت كده مع الاعداد الزوجية بس فعلا قاومت لغاية ما خلاص مبقتش فارقة اي اعداد) وفي اللى بتغسل اسنانها بعدد معين من الحركات - يعنى مثلا فوق وتحت مرتين ويمين وشمال مرتين ...وهكذا - لو اتلخبطت بتبدا من الاول! على فكرة بجد انا مش ببالغ! وفي اللى بتخاف من الحسد (ودي ليها برضه مقال لوحدها)...وفي الوسواس الشائع اوي وهوا وسواس النضافة!! 

والله العظيم انا شفت بعيني واحدة زميلتي في الشغل بتدي الولد بتاع البوفيه المج ملفوف بكيس بلاستيك والايد ملفوفة بكيس بلاستيك علشان الجراثيم!!! ولما بصيت لها اوي قالت لي "والله انا عارفة انى غريبة بس مش قادرة اتخلص من العادة دي!" 

بجد والله العظيم صعبت عليا - حياتها كلها مطهرة! كل حاجة عندها بتتغسل مرات عديدة ومرة بالصابون ومرة بالمياة المغلية ومرة بالديتول! على فكرة انا مش ببالغ بس هيا فعلا كده! ويوم اسود ومنيل و"مأندلة" لو جالهم ضيوف ودخلوا بالجزم - عارفين بتعمل ايه؟ بتغسل السجادة!! بس انا عارفة انها حالة شاذة شوية وخارج الطبيعي

انا اعرف واحدة مثلا بتغسل البوتاجاز كل يوم قبل ما تنام! انا شايفة ان ده كتير اوي...فعلا...ليه اغسل البوتاجاز كل يوم؟ وبتخلغ الشيش كل اسبوع يتغسل....والسجاد بتاع الشقة كله بيتغسل كل اسبوعين تقريبا او تلاته....نهار ابوه اسود اللي يدخل الشقة بالجزمة...يتهزأ في مكانه - ماشاء الله عليها مش بتتكسف!

وفعلا بجد مفيش شغالة بتفضل معاها - كل واحدة بتطفش من شغل العبيد اللى بتشتغله - لا وكمان بتهزأهم :)

وطبعا العيال وجوزها من الباب على الحمام على طول علشان عملية التطهير من الشارع ! كل يوم حموم وجيل الديتول عندها بصفة مستمرة والوايبس ديتول برضه - العيال هاتقشف من كتر الديتول!

والتلاجة حدث ولا حرج - والحلل كذلك بتفضل تدعك فيهم لغاية ما ايدها تدوب! ولو معملتش كده متعرفش تستخدمهم!!

مرة واحدة سمعتها بتحكي عن عشقها للنظافة والمنظفات زي ما يكون بتتكلم عن خطيبها!

وفي كوابيس مشتركة بين الستات دول ومنها مثلا :

- العيش البلدي علشان الردة بتقع في الارض او على الترابيزة ولكن في ستات منهم بتوفر الزعيق وبتأكل جوزها على ورق جرايد علشان لو وقع منه شوية ردة!! 

- اللب والمسليات بانواعها - وياسلام لو الراجل خد شوية لب السرير - بيطلع على جتته لباية لباية! ونهاره كوبيا لو جاب البيت سوداني بقشره بتفضل مراقبة كل واحدة سوداني من ايد للطبق لبؤه علشان لو في فتفوتة قشر نزل على الارض او على الكنبة او السجادة - ولو حصل بيسمع قصيدة هجاء في رجولته!

- اليوستفندي - بتفضل برضه تبص على كل فص يوسفندي وطلع منه كام واحدة بذر علشان لو في واحدة حد تفها في الخباثة ولا حاجة ! 

- هدايا عيالها ام جليتر - الجيلتر ده بيجنن كل ست موسوسة لانه مش بيطلع بسهولة خالص - وهيا تفضل تتشنج وتتكهرب وتزعق لغاية ما تنهار من التعب! وبرضه الجليتر مش بيطلع :)

- الاقلام الخشب علشان بتتبري والبري بيتهرس في السجادة

- جوزها لما يحلق راسه في الحمام علشان مستحيل طبعا هايشيل كل الشعر مكانه - ولو بيحلق دقنه هيا بتتجنن برضه علشان الشعر المفتفت في الحوض

- بنتها ام شعر طويل لما تسرح شعرها وتسيبه في الفرشاة!

- لو جوزها اتجرأ وعلق اي حاجة على الحيطة بس قبل ما يعلقها استخدم الشنيور!

- لو حد غيرها فضى المكنسة! (هنا هيا ممكن تدخل المستشفى اثر جلطة في المخ)

- لما حد من عيالها او جوزها يدلق اي حاجة على البوتاجاز حب حياتها وترمومتر نضافتها!

- لو حد قرقض ضوافره قدامها (مش ضروري في بيتها ومش ضروري تكون عارفة الشخص ده) ويتف بعدها اللى قرقضه ده - بتبقى هاتجنن كده وتلاقي هوا تف ايه فين! ولو في ايدها اي حاجة بتشربها هاتسيبها ومش هاتكملها طول ماهي مش لاقية اللى بتدور عليه!

- لو في حفر في الشارع اللى وراهم تلاقيها كل شوية تمسح البلكونة علشان اكيد هايجي تراب من الشارع اللى ورا لبلكونتها العزيزة

في برضه حاجة الستات دول بيتعرفوا منهم وهيا الرسومات اللى على البوتاجاز - اللى بتبين انهي مفتاح بتاع انهي عين - الرسومات دي غالبا بتكون راحت من كتر التنضيف فيه والدعك بالسلك!

رسالة بسيطة لكل ست مهووسة بالنضافة: ارحمى نفسك! انتى بجد كده هاتمرضي - مش ممكن تكونى مكرسة كل وقتك في بيتك انك تنضفي حاجة نضيفة! طيب هاتستفيدي ايه؟ قاومي النمل اللى بيمشي في مخك ويخليكي تقومي جري تنضفي تاني...قاومي نقطة الزيت اللى على البوتاجاز ...قاومي شوية الردة اللى على السجادة...حاولي متبصيش على حد بياكل يوستفندي وسوداني ...مش كل ما جوزك يدخل يعمل كوباية شاي تدخلي وراه شوفي في فتافيت سكر على الترابيزة ولا لا ومش لازم تغسلي المعلقة في ساعتها حرام عليكي نفسك! مش لازم تمشي بالشراب الابيض في بيتك فيفضل ابيض زي الفل زي ما هوا ...مش مهم لو لونه اتغير شوية مفيهاش حاجة...مش ممكن السجاد يتغسل كل شوية كده السجاد اصلا هايبوظ ومش معمول علشان يتغسل كتير للدرجة دي...حرام عليكي الحيطان تتغسل من اولها لاخرها انتى مش في محل جزارة ده بيتك!! مش ممكن كل يوم تمسحي البلكونة وبرضه حرام عليكي العيال على طول في جو المستشفيات ده!! ده انتى ست مملة!

http://www.facebook.com/groups/329904227056535/

ريم اسامة