الى اجل غير مسمى!

ناس كتير اوي اوي بتأجل كل حاجة حلوة للاخر او للابد! 

وقت الغدا...لو مثلا نقول عاملين رز وخضار وفراخ بانيه...فتلاقي الشخص ياكل من كله ويسيب حتة فراخ بانيه للاخر...تشتري هدوم...وفيه بلوزة تحفة...فتسيبيها للخروجات الحلوة...لا تروحي بيها  زيارات ولا تروحي بيها الشغل...هيا متعلقة مستنية خروجة حلوة! 

عندك رصيد اجازات كتير...تحوشيه علشان يكتر اكتر...علشان تسافري مثلا عشر ايام مصيف او مشتى...الشبكة المقدسة...تفضل مركونة في العلبة القطيفة للافراح والمناسبات التقيلة فقط...ماتخرجش ولا تشوف الضوء الا للعزيز الغالي...والنيش "صاحب المقام الرفيع"..يطير فيها رقاب لو اتفتح واتاخد منه حاجة بدون مبرر قوي ومقنع! باشوف ناس بعيني بتاكل طرف البيتزا الحاف ده الاول...ويسيبوا الوسط للاخر!...ست البيت تأجل مج النسكافيه لحد ما تخلص تنضيف علشان تشربه "على نضافة"!
ماتعمليش شعرك غير للافراح...ولما تعمليه تلفيه "رولو" علشان يفضل نفس الشكل لحد ما تغسليه (!)...مكان جديد فتح ونفسك تروحيه...تأجلي لحد ما تلاقي الصحبة الصح للمكان (لحد ما تنسي الموضوع). اللى بيجيبوا موبايلات جديدة بيختاروا لها جراب تخين وتقيل علشان يحافظ عليه...علشان لما يتباع يجيب فلوس!!!!
احنا على طول بنشتكى من الملل والاكتئاب والاحباط...مش هاظلم الناس واقول كله في ايدهم...لا مش كله....ما اللى دخله قليل وعليه التزامات تقيلة اكيد مهموم ومحبط...واللى فقد انسان عزيز عليه (كان الله في عونه حقيقي)...واللى متجوزة انسان سخيف ومطلع روحها (غلبانة جدا والله)...ونماذج كتير جدا...ولكن جزء لا يستهان به في ايدنا...يعنى حتى ابسط الحاجات اللى هاتبسطنا مش هانعملها ونأجلها؟! هوا مش كفاية كل حاجة كبيرة عايزينها متأجلة كده كده؟
واحدة اعرفها كانت بتشتري كل حاجة جميلة وحلوة وشيك وغالية وتخزنها! علشان لما تتجوز...ولما اتجوزت تخنت...وخلفت بسرعة...وشكلها اصلا اختلف والهدوم نفسها بقت موضتها قديمة اووووي....وفي الاخر كل ما تفتح دولابها تحبط بشدة...محشور هدوم وشيك وغالية..ومفيش غير جلاليب البيت والبيجامات اللى جاية مقاسها...وبسبب اطفالها بقت فكرة الكعب العالي فكرة مضحكة جدا...وبالتالي عندها كوم جزم غير مستخدم و"مقشر" من الركنة!! حرمت نفسها من زهوة الهدوم الجديدة....وحرمت نفسها بعد الجواز انها تلبس اصلا علشان مستحرمة تشتري وهيا عندها!! وفي الاخر بتلوم نفسها اكتر واكتر واكتر انها لازم تخس وتحترم نفسها علشان الهدوم دي كلها حرام تترمي! شوفوا حطت نفسها تحت كام ضغط نفسي؟ الفلوس اللى كانت معاها راحت في حاجة مش هاتستخدمها علشان لما جه وقت استخدامها....معرفتش تستخدمها وبرضه بتلوم نفسها وبتكتئب!!! ليه؟؟
وفي كتير اوي ستات مستحيل تاخد اجازة غير لما تكون مريضة او عندها مشوار مهم جدا...مفيش حاجة اسمها اجازة للراحة خالص. وفي اخواننا البخلاء اللى بيحوشوا الاجازات ويحرموا نفسهم الراحة علشان لما يطلعوا معاش يستبدلوا الايام دي بفلوس (حسب القانون القديم). ايه ده؟؟؟ الواحد بيحرم نفسه عشان ملاليم الله اعلم هايعيش يصرفها ولا لا!!
واللى بيشيل احلى حتة من الطبق للاخر...غالبا هايكون شبع على ما يوصل للحتة دي وياكلها لانه بيحبها مش لانه نفسه فيها! 
نماذج لا حصر لها...ليه بتعملوا كده؟؟
النيش المقدس مش هايدخلك الجنة...افتحيه واستخدمي حاجتك...اهلك جابوا لك الحاجات دي علشان "انتى" تنبسطي بيها...كل فترة افتحي النيش واختاري كاس ولا كوباية مقدس اشربي فيه وابسطي نفسك....انتى اهم واحدة في الدنيا على فكرة...مفيش حد اهم منك! 
اللى بتجيب هدوم وجزم....البسي يا امى! البسي وانبسطي بيها....حافظي على حالتك النفسية وافرحي بنفسك وانتى شيك وجميلة...الجمال ده هايروح منك قريب حاولي تنبسطي بيه قدر الامكان.
اخرجي لوحدك...ايه المشكلة؟؟ خدي حد من اهلك معاكي...اكيد هاتلاقي حد يخرج معاكي لو مش بتحبي الخروج لوحدك...مش ضروري ابدا يكون الشخص اللى في بالك يخرج معاكي او صاحبة معينة تخرجي معاها...انبسطي اي كان الشخص...متأجليش اي فرصة ممكن تخرجي فيها وتأجليها ابدا.
واللى بتعمل شعرها...سيبيه...بصى لنفسك كل شوية وافرحي ان شكلك مختلف...بلاش تدفنيه تحت طاقية البنس ولا الرولو...انتى اهم من الناس.
وبلاش تاجلي اي مكالمات...لو حد واحشك اتصلي فورا...مفيش حاجة اسمها الوقت المناسب...لو حد عزيز عليكي لدرجة انه يوحشك يبقى مفيش حاجة بينكم اسمها "الوقت المناسب". نفس الفكرة لو في خلاف بينك وبين حد كان عزيز عليكي...مفيش حاجة تستاهل على فكرة...خليكي انتى احسن واتصلي. كل ما الصلح بيتأجل...كل ما بيكون اصعب!
نفسك في مج شاي ولا شوية عصير...صبي واشربي...بلاش تنتظري "الوقت المناسب"...اصل الوقت المناسب ده مش هاييجي غير متاخر وهايكون ساعتها مش مناسب لحالتك المزاجية.
مفيش حد هايحاسبك عملتي ايه امتى! 
 لو جالك فكرة مطرقعة او تغيير نفسك فيه...نفذي على طول...لو نفسك هفتك على طبق معين اشتري وكلي...لو عايزة تخرجي في المطر...البسي بالطو واخرجى على طول....متأجليش حاجة...احنا الستات بنتأثر زيادة عن الرجالة بموضوع الحالة المزاجية والموود والحاجات دي...فانبسطي قدر المستطاع...لانك لو دخلتي في دائرة الاكتئاب والاحباط....الدائرة هايبقى لها سقف....وتتحبسي في الغرفة المغلقة!!!!
وهاقولها لاخر مرة....انتى اهم واحدة في الدنيا!! 
عيشي بقى!

ريم اسامة

جروب المدونة على الفيسبوك: 
https://www.facebook.com/groups/329904227056535/

شاطرة اوي

كل الستات بتحاول تبقى "شاطرة اوي"....لقب شاطرة ده واخد من حياتنا كتير جدا علشان نحققه...بنت شاطرة...ست شاطرة....ام شاطرة....بس في مقابل اللقب ده...البنت او الست او الام بتفقد كتير من بهجة حياتها.

البنت تحارب للحفاظ على شكلها ووزنها ومستواها الدراسي ومستواها الثقافي وكمان يكون لديها اللياقة الاجتماعية وبعض المهارات"اللائقة" علشان ترضى اصحاب امها وعماتها وخالاتها (!!)

ايوة...هم دول اللي بينكدوا على الواحد عيشته...الستات الاكبر سنا! 

الست بطبيعتها مش عايزة حد احسن منها...والست كل ما بتكبر في السن الشعور ده بيتحول الى شيئ من التسلط! ولو مش عارفة تتسلط عليكي فهي هاتنكد عليكي بالمقارنة مع غيرك! 

ودايما الستات تقارن البنات ببعض...اصل فلانة عندها اصحاب كتير....فلانة دخلت كلية قمة....جابت مجموع كذا....طلعت الكذا على الدفعة...اتخطبت لواحد بيشتغل كذا وعنده شقة في الحتة الفلانية وعنده عربية موديل السنة....اصلها هاتسافر شهر عسل في المكان العلانى....خلفت ولد (ونقعد ربع ساعة ما شاء الله والله اكبر واللهم لا حسد).

عندنا في مجتمعنا اقنعوا الستات (متعرفش ازاي يا جدع) انها لازم تحترف الاتي بعد الجواز:

التنضف (وده يتضمن غسيل حيطان الشقة كلها كل شهر مرة وتغسل السجاجيد كل موسم وتغسل البطاطين بنفسها في البانيو بداية كل شتاء وتتشعلق تنضف النجف وفوق الدواليب والنيش وتحت السراير وتخلع الشيش وتغسله وتنزل الستاير وتتشعبط تركبها بس بعد ما تكويها طبعا!....وتشيل عفش البيت بالكامل والسجاجيد اسبوعيا وتمسح بالفنيك والجاز والديتول....وكل شهرين تخلع الشفاط وتغسله وتركبه...وطبعا تغسل البوتجاز مرتين في الاسبوع رغم انى اعرف ستات بتغسله كل طبخه!..غير دعك التواليتات والاحواض وسور البلكونة!! وكل يوم تمسح "حوالين داير" )

والغسيل وده فرز الغسيل حسب اللون والنوع....ويكون عندها اكتر من نوع مسحوق وبعض الخدع للملابس البيضاء والسودا (علشان لا الابيض يروح نصعانه ولا الغامق يكلًح) ولا الهدوم تكش ولا تهرول !! وبعد الغسيل يتنشر فورا "الا يكمم!" وبعد ما ينشف على طول تلميه "الا يترب"...وطبقي ورصى!! 

والطبيخ...لازم تكونى ست مدبرة وشاطرة...يعنى مش كل يوم لحوم ومش كل يوم اكل "ارديحي"! لازم اكل متوازن يعنى بروتين ونشويات وخضار...وسمك...وتتصرفي وتخلي عيالك يبلعوا السبانخ غصب عن عينهم....مفيدة بقى وكده...والسلاطة...ولازم تعملي الاكل اللى يعجب جوزك وبعد الضهر يلاقي حاجة يحلى بيها....وضروري يكون في البيت فاكهة....وحاجة تتشرب (كله ده بمصروف البيت طبعا....انتى حاوى اصلك!)...وفي نهاية الاسبوع اكلة حلوة كده دلع...وتجيبي فاكهة وخضار الموسم وتحضري اكياس في الفريزر...وتعملي حلل صلصة وتشيلي في الفريزر...وتحشي سبموسك وتتجمد جنب اخواته...وملوخية من السوق وتقطفي وتغسلي وتخرطى وتشيلي (هايقولوا لك الكيس ابو خمسة جنيه ده كله قرف وزبالة مفيش احلى من البيتي)...ويكون عندك كذا نوع عيش للفطار والعشا وانواع جبن علشان العيال بتزهق....والعصير بانواعه بيتي...الحلويات بانواعها شرحه....ده في ستات بتعمل عجينة المكرونة!!!!! كل ده علشان تثبت انها "اشطر" من اقرانها. ولازم طبعا الستات اللى مش بتقبل المنافسة يعملوا اي طبخه باصعب طريقة ممكنة...ما في طريقة سهلة يا اعتماد..ليه تصعبيها على نفسك؟؟...تقولك لا دي الطريقة الاصلية!! (عليها ختم الست ام مديحة)!

مش هاتكلم عن المذاكرة بقى علشان المرارة واحنا في موسم امتحانات...بس الامهات اللى بتجيب اربع كتب خارجية لنفس المادة دول ايه؟؟ بتجيبي اعصاب منين يا شيخة حرام عليكي...ولازم تقولك طبعا انها جابت كذا كتاب وبتذاكر لهم من الكتب دي كلها بعد ما خلصت كتب الوزارة وكتب المدرسة...وبعد ما جابت تمارين من على النت وخلت العيال تتمرن على الانجليزي والفرنساوى بالصوت من اسطوانات....يا فاشلة يا ام العيال الفاشلة!!!!

والرياضة! مفيش ست من دول بتقتنع ان ابنها او بنتها ممكن يتمرن رياضة واحدة بس او اتنين...او مايتمرنش خالص! لو عيالك مش بتتمرن حاجة...اول حاجة تسمعيها هي شهقة محترمة كده تملى وجدانك كله مع جملة من بتوع "غلط جدا على فكرة" والخ من النصائح لتجنب الخطر اللى انتى داخلة عليه. الرياضة مهمة جدا...بس مش بالضرورة ابدا العب ابني او بنتى تلات او اربع رياضات علشان املى اليوم كله بالكامل ويرجع البيت ميت وينام بلا اي احساس!! الطفل مش محتاج مجهود بدني وبس...محتاج يكتشف هو بيحب ايه...يكتشف الهوايات المختلفة...يجرب...يغلط...ضروري يفهم ان في حاجة اسمها "بيت"....الستات بتستبدل البيت بالنادى اليومين دول! ولما العيال تكبر... الامهات تزعل اوووي ان الولد على طول طاير بره. ما انتى اللى عودتيه ان البيت للنوم وبس....موضة غريبة جدا!

فحاليا الست علشان تثبت انها شاطرة بتعمل كل ما سبق! وترجع تشتكى من "الملل" وانها مطحونة وانها مش قادرة وانها مش طايقة الحياة وانها ثور في ساقية...ما انتى ربطي نفسك على فكرة...الحياة الدنيا شقاء فعلا...ده حقيقي...بس مش ضروري يكون عذاب! 

لو بتعملي كل اللى فات ده...فوقي لنفسك...مفيش راجل هايقدر ست بتتشعلق علشان تنضف مروحة السقف او علشان بتدعك النجف..غالبا مش هاياخد باله! مفيش راجل هايقدر انتى جايبة كام كتاب خارجي..هوا ليه النتيجة ...والنتيجة هيا هيا ممكن تيجي بمجهود اقل من كده ومع قليل جدا من التوتر! مفيش عيل هايفتكر انتى ازاي كنتى بتتعبي في تحضير الاكل علشان ياكلوه في النادي بين التمارين....انتى ممكن تكونى شاطرة اوي في النضافة والغسيل ومذاكرة الاولاد واختيار رياضاتهم ونظام الاكل والصحيان وخلافه...بس فين حياتك انتى؟ فين هواياتك؟ فين وقتك لوحدك؟ فين وقتك لوحدك مع جوزك؟؟ 

الشطارة مش انك تخلي البيت يلمع ويبرق من النضافة والتلميع والترويق...ولا انك تنوعى في الاكل بالشكل الزيادة ده...ولا انك تفضلي متوترة على طول بسبب جدول حاطاه لليوم وعايزة تلتزمى بيه...الشطارة انك تكونى سعيدة....ويكون اولادك وجوزك سعداء...الشطارة انك تساعدى اولادك يتعرفوا على نفسهم وعلى هواياتهم وعلى قدراتهم...انك تسمحى لهم بالغلط وتقوميه بهدوء...انك تخرجي مع اسرتك كلها من غير اي سبب غير انكم تنبسطوا مع بعض....الشطارة ان اولادك يكبروا وعندهم انتماء للبيت (مش للنادي)....عندهم شعور بالترابط مع اخواتهم ومعاكى ومع ابوهم (مش مع اصحابهم)...البيت اساس بناء الشخصية (مش عدد الرياضات ولا التنوع الاستثنائي في الاكل ولا بعدد ساعات المذاكرة).

التوازن هو مفتاح الشطارة....في مذاكرة بس برضه في لعب....في رياضة وفي هوايات بره النادي...في مشاركة في المطبخ اعملوا مع بعض كيك او اي حاجة سهلة....يوم في الاسبوع يبقى يوم الاسرة ويكون مقدس لكم كلكم تتعشوا سوا وتتفرجوا على فيلم او مسرحية او حتى تخرجوا مع بعض كأسرة....والتوازن بين انك ام وزوجة وانسانة...مفيش ست هاتفضل ام طول الوقت ولا زوجة طول الوقت...ولكن هي انسانة في النهاية ومحتاجة ترتاح وتقضى وقت لوحدها وراحة واسترخاء وممارسة هوايات وخروج مع اصحابك.

الشطارة شيء نسبي...مالكيش دعوة بحد!!

ريم اسامة.

عنوان المدونة على الفيسبوك: https://www.facebook.com/groups/329904227056535/

دهاليز مطبخ امهاتنا

المرة دي المقال انتاج مشترك بيني وبين صديقتي المقربة "مامة ايدا (فريدة)" وكنا بنرغي واحنا عاملين دماغ شاي وبقسماط والفكرة الالماظ دي ظهرت لنا من افق المج والسمسم بيعوم فوق وش الشاي :))) فقلت ضروري انقل لكم افكارنا اللى كتبناها في ورقة لحسن فكرة منهم تطير ولا حاجة :)

مطبخ امهاتنا....عرايس الستينات والسبعينات....ايام الحوض الصيني والبوتجاز اتنين شعلة ونص (عين صغيرة)...وارضيات قنالتكس...والتلاجات لما كان اسمها "فريجيدير". 

ادخلي مطبخ مامتك ودوري فيه شوية...في اعماقه...هاتلاقي العجب...هاوفر لك رحلة في مطبخهم ولو لقيتي حاجة شبهها في مطبخ الوالدة...اعرفي ان بيتكم شاف خير كتير اوي.

امهاتنا كانوا بيعملوا اعياد ميلادنا في البيت...بمعنى ان كل الاكل بيتي حتى التورتة...والفن والشطارة في تزويق التورتة واختراع شكل جديد مبهر ويعجب الطفل....حاليا عيالنا عايزين تورتة على شكل اي شخصية كارتون او اضعف الايمان عليها صورة الشخصية المفضلة...مكنش عندنا احنا بقى الكلام ده...هيا تورتة شيكولاته او كريمة....النص ونص ده تروح تاكله في الجنة مفيش عندنا الكلام ده!! التورتة تكون شيكولاته او "بيضا" على حسب ذوق صاحب الحفل...مامتى كانت متخصصة التورتة البرنيطة (اه والله برنيطة) وكنا مبهورين بيها جدا فعلا...هي عبارة عن اتنين كيك مدور...واحدة كبيرة وواحدة صغيرة وفوق بعض بيكون شكلهم برنيطة...وتزوقهم واحدة كريمة ليا وواحدة شيكولاته لاختى وبانصاف كاملة من الخوخ (كمبوت) وشريطة وشيكولاته فرماسيل وكان في حاجة زي الخرز لونه فضي ودهبي بس بيتاكل عادي! وكل واحدة تنفخ شمع التورتة بتاعتها (بما اننا كنا بنعمل عيد ميلاد مشترك احيانا). البيتزا بيتي...الساندوتشات بيتي...ولازم يكون في جلاش بالمكسرات...هوا كده! انا فاكرة كويس مراحل صنع التورتة...الكريم شانتي كان بيتضرب بمضرب يدوي...اختراع كده "بمنافيلة" يدوي....ولما ماما تخلص تسيب لنا شوية في المضرب نلحسهم!! ولما طلع المضرب الكهربا كانت تفكهم وكل واحدة فينا انا واختى تاخد فردة. ولما ماما تكون مش شايفانا ندب صوابعنا في الكريم شانتي...طبعا بتعرف وينتهى الامر بتهديدنا انها مش هتعمل حاجة! 

وفي حلة راس العجل!! دي حلة كبيرة جدا ممكن تبلع عيل يتراوح عمره من سنة لخمس سنين....هيا ماما مسمياها كده...معرفش ليه! عامة الحلة دي مدفونة في البلكونة لاستخدامات نادرة (مش فاكرة منهم حاجة) بس حالتها جديدة لانج من قلة الاستخدام..بس وجودها في بيت عرايس السبعينات مهم واساسي.

وكتير منهم عندهم طاسة الخضة.....طاسة تحمير البطاطس....وغالبا اصلا كانت صينية للفرن وانصلح حالها وبقت طاسة تحمير..وتمتاز بالوانها المتباينة...بيضا من جوا....وسودا فحم من بره...واحيانا بيتكون عليها شعب مرجانيه بدرجات الاسود...ما تفهمش ليه الكلاكيع دي مش بتطلع...بس الست اصلا مش بتحاول تطلعها...الكلاكيع دي شافت حفلات كتير على البوتجاز...عشرة عمر يعنى!!
وتلاقي عندهم اطقم حلل بحالة ممتازة..ابدا....هيا الحلة المعووجة ام ايد مكسورة اللى بتظبط الاكل...هيا بتحب الحلة يا جماعة...الورق العنب مش بيتظبط غير فيها..جن الحلة هو اللى بيسوى الورق عنب على مزاجها...جن الحلل الجديدة غبي مش بيفهم وبيحرق الاكل!

والست الوالدة مش ممكن تتكيف بنفجان القهوة غير من الكنكة ام ايد سايحة!! لازم وهي بتحضر كنكة القهوة تحضر جنبها حتة قماش او فوطة مطبخ علشان تشيلها قبل ما تفور...رغم ان في جيش كنك احجام وانواع مختلفة وكله سليم..لاااااا...الكنكة "بتاعتي"!! وطبعا مش محتاجة اقول انها لازم تشرب في كوباية مخصوص.

وتلاقي عندهم اللبانة (اللى بيتغلي فيها لبن)...رغم ان ممكن يتغلي في حلة...بس لاااازم اللبانة ولازم القرص الزجاجي اللى بيترمي جوا اللبن ده...حتى لو بطلت تشتري لبن سايب...ماينفعش مطبخ من غير لبَانة!

زمان كانت ستات العمارة الواحدة...يتشاركوا ادوات المطبخ الغالية سوا...كانت صداقتهم تتعدى حدود المطبخ وكانوا بيستلفوا من بعض هدوم...بس ده مش موضوعنا. في العمارة كفاية جداااا يكون في ماكينة بيتي فور او بسكوت واحدة بس...ويتشاركوا في استخدامها بيت بيت...الست اللى تمتلك ماكينة البسكوت هي ست ذات سلطة...ليها وضعها الاجتماعي...وغالبا بتصاحب الست صاحبة ماكينة البتيفور وبيبدلوا مع بعض قبل ما يسلفوهم لاي حد تانى. ده قانون غير مكتوب! وبيجي بعديهم في المرتبة صاحبة مكبس الكريم شانتى ابو اشكال.

واحنا صغيرين اتربينا على الطقم العسلي (قطع وطقعت سيرته) اطباق كبيرة وصغيرة واطباق شوربة وفناجين شاي وقهوة...وطواجن وسرفيسات...ناقص يعملوا منه مروحة سقف!!!! هوا والطقم الصيني ابو وردة حمرا/بينك وطرف دهبي!!!!  وفي بيوت كان فيها الطقم الميلامين اللبنى او البيج! وكان في طقم المعالق ابو سنبلة !! (ذكريات بائسة)
وامهاتنا كانوا بيفضلوا الشقى والتعب عن الراحة (متفهموش ليه!!)...يعنى مثلا تلاقيها ماشية بالمقشة...ما المكنسة سهلة شغليها اسهل واسرع وبتنجز..."المقشة بتسعفنى"....وكذلك المبشرة...تلاقي بصلة كبيرة وهيا هاتتعمى خلاص من كتر الدموع...وتبشرها على المبشرة...يا حبيبتي ما الكبة موجودة..."لا بتسعفنى!" كلهم بيحبوا المبشرة الحزينة اللى اتجوزت بيها (رغم ان ممكن يكون عندها جديد).
وتبع برضه منهج "اليدوى" ده عصارة البرتقال...لو هاتعصر برتقالة او اتنين بس بتعصرها على العصارة اليدوى! لسه هاتغسل العصارة الكهربا علشان "برتقالتين"؟...وكذلك لو عايزة تعمل بسرعة كوباية واحدة بس عصير ليمون...تقلب سكر في مياة وتعصر ليمونه بايدها!! طعمه مرض...ما تضربيه في الخلاط!! "لسه هاغسل الشفشق؟!"
من حفريات المطبخ برضه ماكينة يدوى كده معرفش اسمها ايه...هي نادرة الوجود بس لقيتها عند امى....ماكينة فرم الجبنة الرومي(!!) هيا شكلها زي المساكة بس بايد طويلة وعلى طرفها ماكينة صغيرة ودراع يلف كده....اللى عنده زيها يقولي علشان ماحسش بالغربة ارجوكم! 
وكذلك المصفاة ام رجلين...براد الشاي...اطقم التوابل ولازم يكون مكتوب عليها محتوى البرطمان ايه (ال يعنى مش عارفة) وحتى لو غيرت محتوى البرطمان متفهموش ليه بتسيب الاسم القديم "حطي كمون من البرطمان اللى مكتوب عليه قرنفل"!
الام لما تعمل كوباية شاي بيكون لها نظام تمشي عليه...سيستم....مش كوباية شاي عشوائية كده وخلاص!! على حسب الست...تحط الشاي الاول ولا السكر الاول....في ستات شاطرة اوي لدرجة انها بتعمل شاي على مياة بيضا في البيت (وغالبا اصحابي مش هايفهموا ايه المصطلح ده...وعندهم حق لانه مصطلح خاص بالقهاوى)..الشاي ده هو طبقة الشاي...طبقة كثيفة من السكر....والمياة بتتحط باسلوب معين ماهر بحيث لا يختلط مع الشاي خالص..تفضل الكوباية مياة صافية...حرفنة واحتراف!  وفي جيل السبعينات اللى ملتزم بالشاي الكشري...واللى ساب نفسه للتمدن بقى يشرب (استغفر الله العظيم) شاي فتلة!! بس عامة لازم نسمع نغمة انتهاء صنع المشروب...تريك تريك تريك...ثلاث خبطات من المعلقة على طرف الكوباية!
واخر حاجة فكراها...وهي موجودة في بيوت ستات كتير من عائلتى وعائلة جوزى...عربية الشاي!! العربية دي دليل الشياكة والالاجة والرفاهية والرقي!! العربية دي تطلع للعزيز الغالي...الست تمشي تتمخطر بيها من المطبخ للصالون مع اوركيسترا الكوبايات والاطباق اللى بتشخلل وتخبط في بعضها من مطبات السكة...واحتمال تلاقي رجل منهم معلقة ومش بتتحرك فالست ترفع الركن الساكن ده وتمشي على التلاته التانيين بأداء عالى. وغالبات دلوقتي في كل البيوت هي ترابيزة في الصالون (شوفوا بيوتكم هاتلاقوها بجد)
 انا مش بتريق على امهاتنا...ده مجرد حصر للمطبخ اللى اتربينا وكبرنا من اكله وتذوقنا منه احلى اكلات...البيت اللى شفنا فيه العز والراحة والدلع كله...الام اللى بنصحى نلاقيها محضرة لكل واحد فينا الشاي او النسكافيه اللى بيحبه والفطار اللى بيعجبنا والطبيعي بيكون مختلف عن بعضه...ونرجع من المدرسة نلاقيها محضرة الغدا متكامل العناصر وسخن ومستنية نتغدى سوا...السفرة اللى شافت كل حفلات اعياد ميلادنا والعزومات والمجهود المضنى اللى امهاتنا عملوه علشان بس ننبسط ونفرح...باقل الامكانيات...باختراعات مضحكة...بساعات عمل طويلة اوي....بتعب كتير جدا...شكرا يا ماما...وشكرا لكل عرائس السبعينات....انتوا الجيل الذهبي ربنا ما يحرمنا منكم ابدا ولا من الخير اللى في بيوتكم.

ريم اسامة 

كتلة سودا ملزقة

نفس النقوش...نفس الظلال...تقريبا نفس الاصوات...نفس الشعور...مفيش تغيير...مربع داخله دائرة كبيرة وداخلها ثمان دوائر صغيرة...وفي منتصفها....   

"انا بقيت اكلم نفسي بالفصحى كمان!!"

في حاجة بتغيظني في الشكل ده...كل ليلة ابص له وابقى متضايقة برضه... ست سنين!! ست سنين محاولتش اغير اللى بيغيظني في صمت!!!!! كل ليلة بفكر في نفس الافكار السخيفة وابص للشكل ده واتغاظ!!!

هما العمال كده....مفيش ضمير...مكلفش خاطره يظبط الشكل قبل ما يلزقه نهائي على سقف الاوضة..هوا يعنى علشان في السقف مش هانشوفه!!!!

لمبة حقيرة مدلدلة من سلك مبروم في وسط "سرَة" معووجة!!! حاجة تعصب!!!

كل ما افكر في مشاكل او هموم...افكر وانا نايمة على ضهري وعيني تيجي في البتاعة دي!!! حتى يا ربي الهم مش عارفة افكر فيه من غير تشتيت! استفزاز جامد.

انام على الشكل ده...اصحى على الحنفية اللى بتنقط مياة...ادخل المطبخ على التلاجة اللى صوتها عالي...اقفل باب الشقة ورايا اللى المقبض بتاعه اتقطم...وانزل على سلم ضلمة على كشاف الموبايل واروح شغل مقرف!!!!!

ارجع البيت انشر على المنشر اللى ناقصه حبل...واطبخ في الحلة اللى ايدها محروقة....والبوتجاز اللى مفتاح من بتوعه اتكسر....واغسل مواعين في الحوض اللى بيتسد! علشان بعد ما اخلص كل ده اشرب شاي في مج مش بحبه علشان المج المفضل اتكسر ومفيش مج مالي عيني من ساعتها!! 

سمعت كتير عن الطاقة الايجابية والسلبية والحاجات دي...وعمري ما كنت مقتنعة بيها زمان...الناس مش عارفة الطاقة السلبية بتيجي منين...بس انا عارفة...جوزي مقاول الطاقة السلبية في البلد!! كنت الاول مش متضايقة من اي حاجة ناقصة ولا اي حاجة مكسورة ولا اي حاجة فيها عيب...كنت دايما ببص للجانب الايجابي من الحياة...الحمد لله شفط كل الايجابية اللى جوايا وساب لي كتلة غامقة ملزقة وريحتها وحشة!!! هي دي عصارة جوازي منه!!!!

كل ما ادخل البيت اكره الحياة...احس انى عايشة في تربة في عمارة!!!! ليه الرجالة بيعملوا فينا كده؟؟؟

في بيت اهلى عندهم حاجات ناقصة كتير برضه او حاجات قدمت وعفى عنها الزمن ومتغيرتش وعمري ما فكرت انها تتغير او تتجدد...الكرسي المكسور بتاع السفرة بحس انه من روح البيت...الكرسي ده شاف حفلات وعزومات واعياد ميلاد كتير...الكرسي ده مش عايزة اغيره...بحبه....قابله عيبه انه مكسور...ماهو احنا اكيد اللى كسرناه...عندهم برضه سلك بلمبة في الحمام علشان الطبق اتكسر ومركبش غيره ومش حاسة باي حاجة ناقصة....النيش وقع منه اخر رف واتكسر...ومتغيرش...عادي جدا...مش حاسة ان في اي حاجة عيب في الاوضة...وكتير اوي من النماذج دي في بيت اهلي...ما بقاله كتير...بس روحه حلوة وبنقبل النقصان بطيب خاطر.

بيتي انا الجديد...يخنق...يزهق اوي اوي...وبيت اهل جوزي برضه كده....بيتي امتداد لبيتهم...نفس الشعور ان حد قاعد على رقبتي...نفس احساس الزهق والملل وعدم الراحة...رغم انه بيتي انا...وانا اللى اخترت كل حاجة فيه.... سبحان الله! 

في رجالة كده....تختصر عمرك...مفيش حاجة عجباه...ولو عملتي قرد برضه مش هايرضى ومش هايعجبه...لبسي وحش....شعري "بهتان" (عمري ما شفت شعر بهتان يا جدعان!!)....اكلي يسد الجوع بس مش حلو!! ولما يكون الطعم مظبوط يقول انه في موود وحش علشان الشغل وهنا بقى نبدا في سرد تفاصيل مملة جدا عن فلان في الشغل قال كذا وانا حسيت انه قصده كذا...ويشتكى من اي الم وهمي في جسمه (غالبا صداع) ويفضل باقي اليوم مركز في شعوره بالصداع بمنتهى التفانى! وانا ضروري اسمع الشكوى بانصات تام...بقلبي..اسمع قد ايه كان يومه مقرف وفاشل وناس حيوانات حواليه...وازاي مديره غتت وزمايله بيحسدوا بعض...الى اخره من تخيلاته!! وبعد الجرعة المكثفة دي المفروض اضحك واطلعه من الموود...انا ببقى عايزة حد ياخدنى على السطح ويحدفني علشان ارتاح!!! كل الايام شغل وتعب وصداع...واخر الاسبوع تليفونات كتير في اوضة لوحده او نايم علشان يرتاح من تعب الاسبوع فيجيله صداع من كتر النوم ويشتكى برضه!!!!!!
فلوس البيت...الفلوس عامة...خرًاج و "بينقح" عليه طول الوقت زي الصداع كده...كل ليلة نقعد ويحسب صرفت كام جنيه من فلوس البيت...لو جبت ربطة بقدونس بكتبها في ورقة علشان بالليل ينقلها في كشكول المصاريف!! ويحسب صرفنا كام (كل يوم) ومتبقى كام ويعد المتبقى وينام مرتاح الضمير والبال!!! ولازم اسمع طبعا المقولة المأثورة "من حسب الحسابات في الهنا يبات" (باتت عليك حيطة)
اي حاجة بتتخرب في البيت بتتأجل...علشان الفلوس وعلشان نكمل الشهر...اي مجاملات اجتماعية بيحاول يفلفص منها وبالتالي بتصرف انا من فلوسي.
اةةة...نيجي لفلوسي....البتاعة المعووجة دي مضايقاني برضه!!!!! المهم....فلوسي مطمع! هوا مش عايز مليم في ايدي علشان انا مسرفة وايدي مضروبة بالنار وده دخل البيت مش دخلي انا الخاص...بس بعد مناقشات ومجادلات انتهينا ان فلوسي تفضل في ايدي ولكنه قيدني ببعض الالتزامات اللى ادفعها انا وبيتبقى لي مبلغ مضحك!! 
طبعا مفيش عيدية ولا هدايا ولا خروجات (غير مرة في اول الشهر بس وتكون من اختياره وضروري يكون فيها توفير من اي نوع) ومفيش عندنا حاجة اسمها ترفيه غير المرة اليتيمة اللى كل شهر دي.
والنهاردة فتحت درجه السري...درج ممنوع افتحه ومقفول بمفتاح...والمفتاح مدفون معرفش فين...تشاء الصدف انى الاقي المفتاح ملزوق بسوليتيب في ضهر الكومودينو (!!!!) يعنى لو مكنش وقع منى المشط وراه وزقيته...ماكنتش هاشوفه.
فتحت الدرج...وجريت على باب الشقة قفلته بالترباس...رجعت وبصيت جواه تانى....اوراق كتير...كلها منظمة وكل مجموعة ورق في ظرف...فواتير....اوراق اثبات دفع الاقساط....عقد الشقة..عقد العربية...عقد شاليه (!!!!)...شاليه؟!!!!!!!!! بعد ما دفعة الادرينالين هديت بصيت في الورق تانى بتأنى..البيه عنده شاليه في العين السخنة...وشقة في العريش....وعربية نص نقل (!!!)...ودفتر توفير بمبلغ 320 الف جنيه...وكشوفات حساب من بنوك تثبت امتلاكه مبالغ رهيبة...كل ده وسايبني في شقة عين شمس!!  وسايب لي 300 جنيه بحالهم من مرتبي افرتك فيهم براحتي!!!! بعد ما دورت شوية كمان لقيت ظرف فيه فلوس...فلوس كتير...وعلبة متوسطة فيها سلاسل وجنيهات دهب...بلا فتكير...خدت نص الدهب ونص الفلوس...وقفلت الدرج ورجعت المفتاح مكانه بالظبط وفتحت الترباس....واديني قاعدة ببحلق في السرَة المعووجة...مستنياه ييجي ويشرب الشاي ابو مهديء....وهاخد عربيته وهدومى وحاجتي واختفي...وبعد كده هاسافر و.......
"منى عبد السلام!!" صرخ صوت في العنبر....."زيارة!"
صحيت منى من احلام اليقظة اللى بتطاردها ليل نهار عن اخر يوم حرية عاشته.... وبحلقت ثواني في اللمبة النيون...وحطت الطارحة على راسها وخرجت تشوف مين افتكرها بعد اخر زيارة من شهرين!

ريم اسامة 
جروب المدونة على الفيسبوك: 
https://www.facebook.com/groups/329904227056535/?fref=nf

بيت الضابط

لي كل الفخر انى ابنة ضابط مهندس بالقوات المسلحة...كتير جدا من الناس اول ما تسمع ان رب الاسرة فرد من الجيش بيفترضوا ان  البيت عبارة عن وحدة عسكرية...ظبط...ربط...شخط...خشونة...مواعيد صارمة...عقاب لا تنازل عنه...لا تهاون عن الخطأ!

الحقيقة مش كده خالص...الاعلام والسينما دمروا صورة بيوت الظباط (وخلوني اكتبها بالظاء مش بالضاض لسهولة الكتابة)

الظابط في بيته زوج واب...مفيش شك ان الجيش بيغير الانسان كثيرا وبيعيد تشكيله وتربيته واولوياته وطريقة تناوله للمشاكل وضبط انفعالاته...وفي معظم الاحيان اخفاء مشاعره. وده بيترجم انه شخص صعب وناشف!

بيت الظابط بعيد عن الخشونة والتزمت...اكيد في فروق شخصية بين البشر كلهم...ولكن من الظلم اننا نحكم على فئة كبيرة حكم مطلق كده.

تعالوا جولة صغيرة في بيوت الظباط 

مبدئيا الظابط شخص ملتزم (بطبيعة الحال) وبيعصبه اوي الهرجلة والاهمال...اتربى في الجيش على الوفاء والتفانى...كله ايد  واحدة..الهدف واحد..كل الطاقة والقدرات الفردية موجهة للهدف ده...وفي حياته الشخصيه الهدف بيكون: امن البيت وتربية الاولاد باسلوب سليم وفي نفس الوقت يجنبهم احباطات الحياة العملية. الظابط بيكون على ايمان كامل ان كل شخص له دور...صغير او كبير... وكله بيصب في مصلحة البيت...بالنسبة له البيت زي البلد! كلها نماذج لنفس المعنى وهو: الوطن! فبالتالي مفيش ظابط جيش بيخون وطنه (وطبعا في فروق فردية ولكن بمقارنة النسبة فهي تعتبر نادرة) وبالتالي مش بيخون بيته. الظابط بيربى اولاده على الامانة وعدم الخوف...لانه لو خاف هايعمل حاجات كتير ضد ضميره لتجنب العقاب اللى بيخاف منه! فبالتالي اولاد الظباط غالبا بيكون قلبهم ميت :) مش فارق معاهم حاجة....وعلى فكرة  صورة الاعلام ان لما الظابط بيدخل البيت اولاده بيستخبوا تحت السراير دي صورة ظالمة وحقيرة وغير حقيقية بالمرة!! وانا مش بتكلم عن حياتي الشخصية...انا بتكلم عن بيوت كتيييير جداااااااااااا اعرفهم. بيربى اولاده اولا ان لهم دور في البيت...لو ولد يبقى يقضى مشاوير خارج البيت...يشيل معاهم حاجات تقيلة....يروح يدفع اشتراك النادي او يوصل اخواته او امه (كل مرحلة لها التزاماتها) ولو بنت فهي من صغرها تتعود تساعد في البيت...تساعد الام...وتحافظ على حاجاتها وتنضف اوضتها او تروق مع الام الشقة....تساعد لما يكون في ضيوف في البيت...وبعد الزيارات تنضف ....حتى لو اطفال صغيرين فهم مسئولين عن لعبهم وعن نضافة المكان بعد ما يخلصوا لعب. هو بيربى اولاده على عدم الكذب وتحمل عواقب الصدق مهما كانت. الظابط فعلا لا يتهوان في العقاب...ولكن لهدف تربية اولاده ان لكل فعل رد فعل...مش بيتراجع لما بياخد قرار العقاب...طالما وصل لمرحلة "القرار" فهو بينفذه...عقاب...ثواب...تصحيح مسار...مهما كان القرار صعب فهو يتخذه....هو اتربى على كده...وبيربى اولاده على كده...التردد قاتل...في لحظة هاتحتاج تاخد قرار...لازم تاخده...وبمرور الزمن ابنه او بنته هاتتعود تاخد القرار الصح..بس لازم ياخدوه ويتحملوا نتائجه!

بيت الظابط بيكون هو محورها...هو الشخص الاهم فيها...اقسى لحظة على الاسرة هي لحظة سفره لموقع عمله خارج محافظة السكن .... الظباط دايما على سفر...دايما يتم تكليفهم للخدمة في محافظة اخرى....اماكن بعيدة غير مأهولة....اماكن قاحلة صعبة المعيشة فيها....الاولاد بيكونوا على علم بمشقة عمله ويشفقون عليه...وبمشقة فراقه اسابيع طويلة...زمان مكنش في وسائل اتصال...الزوجة في انتظار دائم....وخوف لا نهاية له ومخاوف ووساوس شيطان...هايرجع سليم...ولا هايرجع في صندوق؟! ايام الحرب كانت ايام صعبة...الكل في انتظار...يا نفرح بوصوله الاجازة دي ونبدا الترقب مع انتهاءها....يا يُتم وسواد ملوش نهاية! الزوجة بيستلزم تكون راجل في غيابه...متخبيش عنه حاجة لما يرجع وتقوله كل التفاصيل وتعيشه في مشاكل الاولاد وفي تفاصيل حياتهم ويكون دايما على علم بتفاصيل اولاده اللى مش بيلحق يعيشها كلها...بيوجهها احيانا....بيلومها احيان اخرى لما تتساهل معاهم...بيتكلم مع اولاده كتير جدا...بيحاول تكون دايما دائرة الود متصلة بينه وبينهم....مش معنى انه بيسافر معظم الوقت ان وجوده زي عدمه...لا هو موجود في كل تفاصيل حياتهم...بيدي لهم مساحة للمناقشة للتقرب منهم. بيت الظابط لا يقام عليه هو فقط ولكنه محتاج زوجة مرنة تقدر تشيل مسئولية وتمشى على الخط المتفق عليه سويا.
وبعد التقاعد الظابط بيفضل فترة كده زي شهر العسل...مش عارف يعمل ايه ولا ايه ولا اييييه بكل الوقت الفاضي ده!! مش بيحاول ابدا يصحى متأخر...بالعكس...برضه يصحى 6 الصبح كالمعتاد...ويصحى البيت كمان يشاركوه اليوم من اوله! وبعد فترة قصيرة اوي بيزهق! لانه مش متعود ابدا يكون بلا عمل وبلا هدف وبلا مهام...وغالبا بيشتغل تانى في جو ملتزم برضه...الظابط يعنى التزام في كل جوانب حياته.
يا بخت اللى ابوه ظابط جيش...عرف يعنى ايه اهتمام...وفسح (لانه بيرجع من الاجازة عايز يفسح عياله قد ما يقدر يعوضهم غيابه)...ومعنى المسئولية الكاملة...وفي نفس الوقت يا بخت مراته...لانه بيرجع مفتقد جدا البيت ودفء الاسرة...ولانه نشأ في ترابط فصعب يخرب حياته لاسباب تافهة.
يا ريتنى كنت راجل ودخلت الجيش :)

ريم اسامة 
جروب المدونة على الفيسبوك: 
https://www.facebook.com/groups/329904227056535/

نداء الحجر

نداء الحجر...نداء النداهة...نداء الدخان!! نداء حجر الشيشة!!

لو جوزك "قهوجي" هاتفهمي...واحنا متفقين من قبل كده ان قهوجي دي يعنى بيروح القهوة اكتر ما بيروح البيت...في علاقة غير مفهومة بين الرجالة وبين المكان ده...واتكلمت في النقطة دي لحد ما ايدي اتشنجت...واي محاولة من اي ست لفهم العلاقة دي كانت نهايتها الفشل والنرفزة والعصبية.

للحجر سلطة على الراجل...الست حاولت كتير تسيطر على الراجل ومعرفتش...ومن هنا الغيرة نشأت بين شوية الدخان التافه ده وبين الستات. ولان للحجر الكلمة القاطعة في اي قرار!!

لو جوزك عايز (بعد الشر) يخرجك علشان قرف من الزن بتاع "انت مش بتخرجني خااااااااااااالص وانت كل يوم بتخرج القهوة"...فيخرجها بس يختار مكان فيه شيشة...لو حاولت تروح اي كافيه بيقدم مشروبات بس..يطلع فيه العبر...او يمشي بعد اخر شفطة من المشروب بتاعه. بس لو المكان فيه شيشة...يقعد...ويعدل الكرسي على  ناحية التليفزيون...ويطلب شاي بالنعناع...ويفرد رجليه على اخرها ويحضن "لاي" الشيشة بايد وايده التانية فيها التليفون...ولما يحب يشرب شوية شاي..يحط الخرطوم على صدره وياخد شفطة ويحبسه بنفس شيشة!!!!! هوا واخدك علشان تتفرجي على اللوحة دي...نموذج لل multi funtion! افرحي...جوزك كله اوبشنز! بيشرب ويلعب ويتشات ويتفرج على التليفزيون وبيدخن وبيتجاهلك كله في نفس الوقت! يا فرحتك! ويخلص الحجر..ويطلب تانى...ويكمل ايا كان بيعمله على التليفون...ويطلب حاجة ساقعة او قهوة يعدل بيها المزاج اكتر واكتر...وانتى عماله تشفطي في المانجة علشان تهدي اعصابك...وتحاولي تتفرجي على التليفزيون السخيف...وبتكملي اليوم بتتفرجي على الناس علشان تخلصي الوقت وخلاص...او تتمشي للحمام (اهو تغيير برضه).

في اي مناسبة هاتروحوا سوا مع العيال...طبيعي اي ام قبل ميعاد النزول بحوالي ساعة ونص بتبدا تجهز اولادها...يستحموا...تسرح شعرهم...تلبسهم ويطلعوا عينها على ما يرضوا بالهدوم اللى هيا اختارتها...وبعدين مع شوية تهديد ان لو في دوشة مفيش خروج تدخل هيا كمان تاخد دش وتبدا تلبس وتحط مكياج وتعدل الطارحة او تظبط شعرها وتحط مانيكير مثلا او كده...والوقت محسوب بالدقيقة عند الست علشان تنزل في ميعادها...قبل ميعاد النزول بساعة و35 دقيقة يقولها جوزها انه نازل شوية القهوة!!! هوا بيختار الوقت ده مخصوص علشان يجيب لها جلطة مضمونة! وعلشان مش عايز دوشة بقى من العيال وقرفهم وقرف امهم الزنانة اللى بتصرخ كتير دي...هوا يختفي في وقت محسوب استراتيجيا بالثانية ويرجع قبل ميعاد النزول بحوالي تلت ساعة...يادوب "هو" يستحمى ويلبس! اللى عايز ينتحر يتفضل ينتحر...اللى عايز يلغي الخروجة ماشي مفيش مانع...بس هو مش هايزَفر ايده في التربية وتجهيز العيال ولا هايديها فرصة تجهز بهدوء اعصاب....اصلها عادة فرعونية...الست لو اعصابها هادية يبقى فأل وحش!

لما تطلعوا مصيف (ساحل بقى او اسكندرية او مطروح...اي مكان) اول حاجة بيدور عليها القهوجي هي "النداء جاي منين؟"...يكلموا اصحابهم واصحاب اصحابهم ويدخلوا يدوروا في جوجل على اقرب قهوة! الرجالة مش بتحب جو الكافيهات على فكرة...لا....القهوة!! القهوجي في المصيف يصحى يلبس ويصطبح بحجر....يرجع يشوف بقى العيال هاتنزل المياة ولا هاياكلوا ولا ايه وبعد الضهر على القهوة تاني...حجر اخر النهار...ويروح يشوف لو هاينزلوا ولا حاجة....وبعد ما يخلصوا خروج بالليل...يدخل العيال تنام ويروح للنداء الكبير لليوم...شيشة حتى الثمالة!

لو قعد في البلكونة شوية يفتكر نداء الغالية...ويتململ في القعدة كده....هوا متعود على مكانها في حضنه..والمكان فاضي...بيحس بفراغ!! لو مراته عملت شوية شاي مظبوط بورقتين نعناع...يفتكر "اللاي" بين ايديه ويتحسر. لو صحي من قيلولة الضهر (4 ساعات) بيحس بوحشة في قلبه كده ليها....نداء الحجر...نداء ابليس!

في رجالة بتزوغ من اي مناسبة ال يعنى هايعملوا تليفون مهم وينزلوا في الخباثة يشدوا نفسين ويرجعوا...اعرف واحد مراته كانت بتولد يوم بحاله...ولما اطمن على صحتها وصحة ابنه راح القهوة يختم اليوم بانفاس مضاعفة!  يعني هوا ده وقته؟!!!!!

كل القهوجية تقريبا ليهم تجربة مع الشيشة البيتي...بيجيبوا شيشة في البيت بس مش بيطولوا في الموضوع ده...الست بتعترض على القيام بدور صبي القهوة...بعد فترة مش بترضى تولع على الفحم ولا اصلا بتعرف ترص وبتخاف على السجاد من الولعة لحس يطير ويحرقه او يحرق العفش او يخرمه...وبينتهى بالشيشة الحال ورا السفرة جنب البوفيه او جنب النيش او فوق الدولاب.
 في القهوة الراجل سلطان...يجي له شاي فتلة ويطوح الفتلة في الارض...يجيب لب ويتفتف براحته...يسقف يجي الولد بالولعة ويغير الحجر...يجي له كوباية مياة بتلج..مفيش اي اعتراض من اي شخص...قاعد في الهوا في الشارع....قمة العشوائية! 

لو جوزك قهوجي...سيبيه يلبي النداء...اصل هانعمل ايه غير كده؟؟ مفيش في ايدك غير حل واحد بس...واعتقد انك already بتعمليه...نكدي عليه :) خليه يروح يشد انفاس نكد...نرفزة...عصبية...خليه قاعد مش طايق الهوا الساقع اللى بيعدي على مناخيره..ولا صوت الدومانو جنبه...ولا السما الواسعة...ضيقي خلقه وخليه يكره  عيشته حتى لو منطلق في جوالحرية.

تليفون في النص كده نكد وصاية "خد كلم الولد عايزك"..."مامتك اتصلت"...بتاع الكهربا جه وتعالى بسرعة قبل ما ينزل من الادوار اللى فوق"..."الانبوبة خلصت"...."البنت بتكح"..."وقعت ومش عارفة اقوم"....اي بتنجان...وانا مش هاوصيكي....ده انتى مدرسة :D

ريم اسامة 

شاليه الراجل

ماليش نفس اكتب مقدمة النهاردة...هادخل في الموضوع على طول 
لقيت انى بقيت اقدر افرًق بين بيت الراجل وبيت الست...بمعنى...لما بنروح مصايف او رحلات خارج القاهرة ونستاجر شقة او شاليه يملكه شخص مش شركة ...بيبان جدااا الشخص ده راجل ولا ست.

لو المالك رجل ...مهما كانت القرية شيك وجميلة...هاتلاحظ الاتي:

ادوات النضافة هي مقشة ومساحة..فقط!! مستحيل تلاقي جاروف...هوا فكرته عن النضافة مقشة فقط لا غير! انتى بقى اكنسي ولمي التراب ولا بواقي الاكل بايدك او بورقة او ضهر نتيجة...انتى وخيالك...الشاطرة تغزل برجل اسمه ايه ده....(المثل ده كريه جدا!). ولو حصلت المعجزة ولقيتي جاروف فمش ممكن ابدا يكون بايد.لازم جاروف يدوي ابو من غير ايد توطي ويجي لك "اتب" تلمي بيه.

باسكيت الزبالة بيكون باسكيت صغير اوي...باسكيت مكتب...هوا حطه علشان كل فكرته عن الزبالة هي ورق البسكوت وعلب العصير والحاجة الساقعة. معندوش اي فكرة عن البلاوي اللى بتترمي كل يوم (ازايز مياة...ازايز حاجة ساقعة...علب البيتزا والفطير...عضم الفراخ وبواقي السمك...بامبرز لو معاك اطفال...ورق بسكوت وشيكولاته وحلويات...واكياس كتير جدااااااااااااااااااااااا) كل ده هايستوعبه باسكيت صغير؟؟؟؟ حاجة تنقط!

التلاجة...بتكون اصغر حجم ممكن واضعف امكانيات ممكن تلاقيها....لو يطول يحط ميني بار هايحطه. 

ادوات المطبخ قمة الخزى والعار...كنكة كبيرة (مش مشكلته ان مزاجك تشرب قهوة! هات الكنكة معاك!) حلة راس العجل (ده مسمى امى عن الحلل الكبيرة اوي الغير عملية) وحلة اصغر شوية (كبيرة جدا برضه)...لو نفسك تعملي كوباية زر ابقى اعمليها في الكنكة الكبيرة (انظر المثل السابق بتاع الشاطرة اللى بتغزل دي) مفيش مجات..هما ست كوبايات من غير ايد لكل حاجة...للشاي والقهوة والمياة والعصير...ومعرفش ايه الفكرة ان الملاعق الصغيرة بتكون اتنين او تلاته بس! افرض يا اخي عايزين ناكل ايس كريم كلنا في نفس الوقت! 

غير طبعا السكاكين التلمة بتاعة طقم الضيوف (اللى لا تقطع بصل ولا طماطم ولا لحوم...اخرك تفردي بيها جبنة).
مش محتاجة اقول ان مفيش طاسة للبيض - مش لازم تقلي بيض...ابقى اسلقه في الكنكة الكبيرة! ومفيش برضه مصفاة كبيرة (مش لازم تعملي مكرونة يا ستي..كفاية رز). وصعب تلاقي صينية تقديم (ما انتوا في مصيف سوا يعنى عيلة...يبقى مفيش تكليف. هاتقدموا في صينية ليه؟!)

السراير عبارة عن تابوت...هم اربع جوانب خشب لا ضهر ولا غيره...والمرتبة حزينة خمسة  سنتى اسفنج وتحسي "بالملل" (بضم الميم) في ضهرك وضلوعك. ومخدة كبيرة بس على كل سرير مفيش مخدات صغيرة.

مفيش سجاد! او ان وجد سجاد فهو يا كبير اوي...او مشايات حمام وحطها في الانتريه. 
الدولاب من غير شماعات...ومفيش "فوَاطة" في الحمام (اللى بيتعلق عليها فوطة) ولا اللى بيتعلق عليها بكر التواليت.

صعب اوي تلاقي جردل وشرشوبة...ازاي متخيل انك هاتقعدي في مكان اسبوع من غير ما تمسحي؟خصوصا لو مفيش سجاد! ده سر من اسرار الكون.
الحمام!!! استغفر الله العظيم على الحمام (اطلقوا لخيالكم العنان)
والمنشر!!! حسبنا الله ونعم الوكيل في شكل المنشر (ان وجد)...يا اطار خشب وبينهم حبال (وهوا سطرين بس اللى موجودين والباقي مقطوع)...او معدن ومصدى! وطبعا مفيش مشابك!
ومفتاح الوحدة مشبوك في حلقة فاضية (مش ماديلية).
الكلام ده كله زمان في التسعينيات...ايام مراقية واسكندرية...لما بدا الساحل يشتغل والقرى الجديدة والتنافس بينهم وخلافه...قلنا فرجت...بينا على الساحل (بس بلاش مراقية)...الحقيقة مكنش في فرق اوي...بس الحمامات كانت ادمية الى حد بعيد بصراحة بس برضه ظل خيال الرجل في فرش الوحدات يضايق! 
السنة قبل اللى فاتت رحنا مكان...هوا جديد ومعروف ان بيكون ليهم معايير معينة للوحدة التى يتم استأجارها...فعلا كانت جميلة اوي وكانت ملك لست...غلاية...كوبايات مياة وعصير ومجات...اطباق كل الاحجام...طقم كامل معالق وشوك...كنكة قهوة...سيرفيسات وصواني تقديم...كان في مخدات صغيرة (سبحان الله) وبرضه اشتراك في الخدمة الفندقية للمكان (بيجوا ينضفوا كل يوم ويغيروا الملايات والفوط والبشاكير)...غير المنشر النضيف والمشابك...وتلاجة كويسة...وتليفزيون كبير...وكانت رحلة مريحة وخيالية...السنة اللى بعدها قلنا نروح تانى بقى بما اننا جربنا الخدمة المميزة....كان صاحب الوحدة راجل (!!) كان نكد!! تلات كوبايات مياة...مج واحد فقط...سكينة كبيرة ممكن ندبح بيها ثور...حوالي تلات معالق كبيرة...وطبق واحد بس!!!! نزلنا اشترينا اطباق وملاعق وشوك ومجات علشان نعرف نعيش!! وطبعا الباسكيت الصغيرة المستفز والدولاب ابو من غير شماعات. والراجل العسل مكنش مشترك في الخدمة الفندقية ولا في اي خدمة تانية اصلا. 
اهم الاتنين وحدات في نفس المكان....ولكن اختلاف المالك كان عامل في نكد الاسرة او في انشكاحها...ارجوكم لو في راجل يملك وحدة للايجار...خلي مراتك تروح تحط التاتش بتاعها...بيفرق معانا احنا...شبعنا نكد وعندنا كمية اطباق غريبة اشتريناها من المصايف!!!

ريم اسامة