القرار التقيل

حاجة صعبة الواحد ياخد قرار...الموضوع ده محتاج تدريب واتخاذ قرارات غلط كتير...علشان الواحد يتعلم ياخد القرار امتى ويكون صح...من غير توريط! 

القرارات درجات....في واحد صعب...واحد محير...مصيري...قرار من فرط سهولته يصعب اتخاذه...في النهاية احنا قدام فعل مهم...وحياتنا كلها بتعتمد عليه وهو "اتخاذ" القرار.

وزي كل حاجة بنواجها في اليوم..بنواجه الناس الجميلة اللى بتكرهك في عيشتك...وكل ما تاخد قرار لازم يحبطوك...يزرعوا الشك في قلبك انه غلط وغير مسئول وغبي...فتتراجع...فتحس بتفاهتك...وقد ايه انت اعمى ومنقاد وغير سوى!!

عادي! 

ممكن يكون اللى قدامك فعلا مش قصده يحبطك...ممكن من وجهة نظره الشخصية انت فعلا غلط وبينصحك...بس قليل اوي بيقدًر ان كان اصلا عندك شجاعة التغيير!! 
مش هاتكلم عن امثلة القرارات اللى بنقولها لاقرب الناس للاستشارة او للدعم..هانتكلم عن حاجة تانية خالص.
ازاي تبني شخصية طفل قادر على اتخاذ القرار...وده شيء صعب على فكرة مش سهل.
ازاي تجنبه الحيرة والتردد والاهتزاز.
اسهل طريقة هي اتاحة الاختيار لابنك او بنتك من صغرهم...مفيش حاجة اسمها "هوا كده علشان انا قلت"...الجملة دي تتمسح من قواميس البيوت. 
لو خارجين سيبي لاطفالك فرصة اختيار هدومهم...طبيعي طبعا يختاروا حاجات مش لايقة على بعض (طبيعي جدا) لانهم هايختاروا الحاجة اللى بيحبوها وبديهي انها تكون مش لايقة على بعض...بلاش الزعيق ولا الانهيار اللى بيجيلك لما تلاقيهم مصممين على رأيهم وبلاش برضه كلمة "لا يعنى لا"....وفري الجملة لحاجة مهمة. بس علشان تتجنبي الابهار ده حددي للطفل مجال الاختيار...يعنى حطي قدام بنتك مثلا 3 فساتين (وانتى موافقة على التلاته) وهي تختار....في نظرها "هي" اللى بتقرر تلبس ايه وده بيبني شخصيتهم جدا....لو مع الولد هوا بنطلون جينز وحطي قدامه كام تيشيرت وقميص وهو يختار واحد اي كان لونه او شكله (ما انتى اللى محددة له المجموعة). لانك لو سبتي لهم مطلق الرأي هايلبسوا بنلطون بيجامة على بلوزة سواريه! 
هدية عيد ميلادهم....مفيش داعي تاخديهم محل اللعب علشان هاتحبطي جدا من الاسعار والاطفال هاتروح على احلى حاجة في المحل وطبعا بتكون اغلى حاجة (بديهي برضه من حيث الحجم)...لوحدك الاول ادخلي كام محل وشوفي ميزانيتك تسمح بايه...حددي مجموعة تقدري تشتري منها...وهاتي الصور على النت وفرجيهم لاولادك وكل واحد يختار لعبة...واشتريها لوحدك! هم بكده اختاروا هديتهم...من غير بهدلة وفرهدة...لان في نفس الوقت لو خدتيهم يختاروا من مجموعة محددة هايخرجوا من المحل زعلانين لانهم كانوا عايزين الاكبر والاغلى....ويبقى دفعتي فلوس وهما مش مبسوطين وكمان مش هايلعبوا باللعب بنفس!! اختصري كل ده يا ستي...كده كده اللعب مش بتقعد...ولكنك بتغرسي فيهم قيمة كبيرة.
لو خارجين تتغدوا بره...من حقهم يختاروا الاكل...اصل كله الا الاكل بقى...لو مش عاجبهم الاكل والله لو عملتي قرد مش هاياكلوا برضه...قبل ما تخرجوا افتحي منيو المطعم (وده متاح حاليا لجميع المطاعم) من النت وخليهم يختاروا الاكل...فرجيهم على شكل الطبق هايكون ايه...حددي الاطباق قبل الخروج...هما يختاروا ياكلوا ايه...بشرط اللى يختاروه ياكلوه ومحدش يمد ايده على طبقك او طبق جوزك....طبعا مافيهاش اي حاجة لو خدوا منك حتة ولكنك هنا بتثبتي مبدا المسئولية...مسئولية اتخاذ القرار وتبعاته...مش مجرد انه بيختار طبق وياكل! خالص! توابع القرار مهمة جدا لان في الحياة العملية الواحد بيكون قدامه مغريات كتير ولازم يختار!
قبل ما تدخلي سوبر ماركت وهم معاكي ويعملوا الشو اياه...حددي ياخد كام حاجة...مسموح لهم مثلا يشتروا حاجتين بس...وحددي برضه مجموعة كده ممنوعة (لو غالية زيادة او مضرة) وهايكون قدامهم اختيارات كتير اوي...كطفل صعب ياخد قرار "اتنين" وسط كل الاغراءات دي...سيبيه ياخد وقته...لانه بيحاور نفسه...ان كان عايز دي فعلا ولا لا...وساعات هاتلاقي اولادك بيتفقوا هايجيبوا ايه وممكن تلاقيهم جايبين زي بعض...او حاجات مختلفة عن بعض ويقسموا...سيبيهم ياخدوا وقتهم...انتى في قمة نجاحك على فكرة...اصبري شوية معلش.
 لما تروحوا النادي ادي لكل طفل مبلغ ومفيش غيره...هما يتصرفوا في حدوده...ممكن تقولي ليهم في وسط الكلام ان ممكن يجيبوا بنصه حاجة ويحوشوا النص التانى...او ممكن يحطوه على بعض ويجيبوا حاجة كبيرة يقسموها...طبعا مش هاتلزميهم برايك...انتى بس بتعرضي عليهم افكار بعيد عن تفكيرهم وهم يقرروا يعملوا ايه.
لو وراه كذا التزام...الواجب لكذا مادة...وفي نفس الوقت عايز يتفرج على كارتون معين في التليفزيون...سيبيه يظبط وقته...اسئليه عايز تعمل ايه الاول؟ بس وضحي له انه حاليا عنده تركيز...يبقى نركز في الواجب ولا نعمله واحنا تعبانين...لو لامض معاكي سيبيه برضه...هو اللى هايتحمل التهزيق تانى يوم في المدرسة وهايرجع يعمله لوحده من غير زق وزعيق ومن غير ما تقفي على راسه.
  انا عارفة ان الكلام ده صعب...وعارفة ازاي العيال بتجيب اعراض ذبحة صدرية من كتر العصبية اللى بنكون فيها...ولكن لازم يكبر ويكون شخص سوي...ما احنا الزوجات بنعانى من جيل الامهات اللى قبلنا اللى طلع معظمه "حبيب ماما" وبنشكتي انه لازم ياخد رايها حتى في ابسط الامور....ولا ايه؟ فمش هانظلم الجيل اللى جاي كمان اننا نمشي جنبه خطوة بخطوة...لو ابنك في ابتدائي خلاص بقى...يتفلق...يعمل الهوم ورك ويذاكر...لو معملش وجاب نتيجة وحشة اكيد في اجراءات انتى كأم تقدري تتخذيها في عقابه (بعيد عن الضرب)....مفيش خروج مفيش فسح مفيش لعب مفيش مصيف مفيش اصحابك مفيش مفيش مفيش...ماهو برضه لازم يفهم ان في حد لحريته...وحريته لو جت على درجاته ومستقبله هايتسحب منه مميزات كتير...ومنها رفاهية "الاختيار".
كلامي مش نظري...هو كلام عملي...وبينفع...بس محتاج مجهود
"قرار" تربية طفل مش سهلة...."مسئولية" توابع التربية برضه مش سهلة
ولكن تستاهل!

ريم اسامة


 

يكفرن العشير

احنا الستات طلع علينا جمل وامثال كتير اوي...زي المثل بتاع القدرة ده!! واننا فنانين في النكد...وكشريين... ورفقا بالقلل (القوارير سابقا)...الى اخره 

واننا برضه "نكفر العشير"...مهما عملوا لنا الرجالة من حاجات كويسة في الاخر بننكر كل ده ونقول انهم مش بيعملوا لنا حاجة. 
مترفعيش حواجبك انتى وهيا...ايوة بنعمل كده!
الكدب خيبة
احنا من كتر الاحباط من الرجالة بننكر كل حاجة كويسة عملوها...ووبرضه يا زينب احنا نشل بلد...ده احنا علينا قلبة خلقة تقطع مياة ونور! 
تعالوا النهاردة في محاولة غير معتادة نكون عادلين شوية..
الراجل بيطلع عينه بالمعنى الحرفي من اجل استقرار البيت...الشغل وقرفه ومديره وسخافته والملل والساعات الطويلة الغير ادميه احيانا اللى بيقضيها في شغله...ماهو لو مكنش له بيت واسرة وجمعيات ودروس ومدارس وقروض وفيزا وديون، مكنش قعد كل ده في شغله ولا اتمرمط بزيادة كده. فاحنا بقى (قطع لساننا) نيجي تقول "ما كل الرجالة بتشتغل...يعنى انت بس؟؟"...ونرجع نقول برضه "انت بتكتفى انك تدينا فلوس وخلاص ومفيش اي مجهود تانى بتعمله"
يا ولية منك ليها....اتقي الله!
مين بيستحمل منظرك وانتى منكوشة وبتزعقي في العيال ويعمل نفسه مش سامع اتقاء شر المارد اللى جواه لو طلع؟ ماهو لو اطلق المارد عليكي هاتتفرمي! 
مين بيسمع الشكوى الدائمة ويحاول يهديكي (وبرضه مش بتهدى طبعا) بس بعد يوم زي يوم الراجل في شغله اكيد مش عايز يسمع مين ضرب مين ومين دلق ايه على الكنبة من العيال...هوا لو عليه نفسه يقعد في البيت وحد غيره يشتغل ويصرف...بس علشان هو راجل متحمل المسئولية لازم يستحمل غباوة شغله علشان البيت يفضل قائم ومستقر.
مين اللى علشان ينزل يقعد مع اصحابه يفرج عن نفسه شوية لازم يقدم لك حاجة في المقابل؟ وانتى طبعا مش هاتسيبيه ينزل غير لما تسممي بدنه...ممكن مش كل يوم ولكن مش بتفوتي له فرصه غير لما ترشقي له كلمتين في جنابه! (ايوة ايوة انتى...متعمليش بريئة انا حفظاكي!)
مين اللى شايل الهم ليل نهار تفكير في تفكير؟ انتى برضه بتفكري ولكن الرجالة عندهم زن في مخهم..."بكرة" ده كابوس بالنسبة لهم...تفكير في مستقبل الاولاد من منطلق مادي بيتعبهم جامد...احنا بنفكر في المستقبل بطريقة مختلفة عنهم...يعنى كليات الاولاد...مستقبلهم الرياضي...الاماكن اللى عايزين نقضي فيها الاجازات بعد كام سنة...ولكن الراجل بيحسب الزيادة السنوية (ان وجدت يعنى) وترقياته ويا ترى هايقدر يحارب كل دول علشان يوصل لها ولا لا...وزي ما بنقول ان الرجالة محبطة للخطط...فاحنا محبطين برضه ولكن في اتجاه اخر....يعنى لو اتكلم معاكى عن مخاوفه هاتقولي له المستقبل بايد ربنا انت ليه بتعمل كده ومش بعيد تتهميه بالتشاؤم! فبالتالي الراجل مش بيتكلم عن مخاوفه الحقيقية مع مراته...واي مشاكل انتى بتواجهيها في البيت مقارنه باللى هو بيفكر فيه تعتبر تفاهة! هوا شايف كده....وانتى اخر ما تزهقي من الصمت بتتهميه بقلة الايمان وانه نكدي وبيحوش الضحك للقهوة! 
عرفتي ليه احنا مشهورين بالنكد؟!
وفي سبب تانى بيخوف الرجالة من الفضفضة مع الستات...وهي الاطراف الاخرى! 
الست كائن "اخطابوتي"...احنا صعب نعيش من غير دائرة...امك...اختك...بنت خالتك...شوية اصحاب...وبطبيعه الست الثرثارة بنتكلم معاهم وممكن يجي في النص الكلام اللى هو قاله....وبما ان الدائرة كلها ستات....فهو في نظرهم كلهم "متشائم وسخيف"...فهمتى؟
علشان الراجل يرجع يتكلم معاكي تانى محتاجة تظبطي كام نقطة كده....اول حاجة الثقة...جوزك ضروري يثقك فيكي...يثق ان الكلام اللى بيتقالك بيدفن! انتى وبس! ثقافة القطيع ضد طبيعته الى حد كبير...لا بيحب حد يعرف هوا بيفكر في ايه ولا بيحب حد يتريق او يسفه من اراءه وخططه او مخاوفه! فمن فضلك حاولي ان جوزك يثق فيكي ثقة مطلقة..ومتكونش ثقة اي كلام...لا...فعلا اسمعى وادفني...اسمعى وشجعي واديله دفعة قوية انك جنبه مهما كانت الظروف وان ربنا لا يضيع اجر من احسن عملا...بدل ما تتهميه بقلة الايمان...كرري على مسامعه جمل تطمئنه وتريح باله وتقتل مخاوفه!
الرجالة بتتهمنا دايما اننا مش زي الاول...ودي حقيقية مش اتهام ولا حاجة...بس احنا بقى بنكيل لهم الطاق طاقين...ونعايره بالكرش والصلعة والشعر الابيض وممكن التجاعيد....بلاش سخافة!! حاولي تأكدي له انه لسه زي الاول...وانه احلى من الاول كمان...أكدي له انك بتحبيه زي الاول...وهي بس المسئولية اللى شغلاكى عنه. لو عملتي كده وبطلتي تشتكي شوية من البيت وقرفه وانه لولا شغل البيت كان هايكون شكلك مختلف...هوا هايساعدك من نفسه..او على الاقل هايقلل من "رخامة الرجالة" شويتين.
بلاش برضه تدوسي على نقطة انه اب وحش...امال هو مسحول ليه؟؟ ماهو علشان العيال! حسسيه انك مقدرة اللى بيعمله للعيال ولمستقبلهم ومدرستهم...فكرة "الاب" من وجة نظرك مختلفة عنه....انتى عايزة اب من بتوع التليفزيون...اللى بيشيل عياله على كتفه ويضحك وفي ايده بالونه ولابس شورت ابيض وتيشيرت حمرا!! الاب ده في اعلان المنتجعات مش من ارض الواقع...جوزك لو سمع طموحاتك عن "ابوته" هايطلقك! مش هاقولك اكتر من كده!! سيبيه في حاله مش هاتبقي انتى وقسط المدرسة ومديره ابو شنب مقصًف! 
احنا لازم نغير طريقة تعاملنا شوية...بجد الستات غلسة...وفي كل مناسبة لازم نقطم فيهم ونديهم كلام سم وبرضه السنة اللى بعدها بيكرروا نفس المعاملة اللى مش عجبانا!! يبقى نغير طريقة التفكير! او نرضى بقليلنا مثلا...
بصى اعملي اي حاجة....بس بلاش تقولي له انه مالوش لازمة او اللى بيقدمه غير كافي
علشان انتى وحدك اللى هاتزعلي في النهاية!!
ومن ناحية تانية قارني نفسك بالست اللى اتجوزها من سنين...انتى كمان اتغيرتي...انتى كمان ام مش على مزاجه...هوا عايز ام لا تزعق ولا ضرب ولا تشتكي...ام تبني وتربي كويس
واخر كلمة...مفيش داعي تعايريه انك بتشتغلي....هو لو يقدر يقعدك في البيت هانم مش هايتأخر.
ربنا يسعد الجميع 

ريم اسامة

تاتش الرجالة

الجزء الاكبر من احباط الستات في عيشتهم كلها...هم الرجالة!

الراجل لازم يحط التاتش بتاعه على اي حاجة في البيت والحياة اليومية...هو يحط التاتش من هنا والست تفقد بريق الحياة!!

تقترحي اي خروجة (نوع من انواع التغيير البريء) تلاقي الاسئلة الوجودية زي "في شيشة؟" "في minimum charge؟" ... او يقولك مش هاينفع علشان هو مرتبط بميعاد تانى (حاجة تافهة طبعا وغالبا دور بلايستيشن على القهوة على اصحابه اللطاف يا رخمة يا ام دم تقيل يا نكدية) او عايز يوصل اخته الدكتور (اخته المتجوزة علشان مش عايزة تتعب جوزها يا حرام!)...او بعد ما تخططي للخروجة يطلع زي الصاروخ "انا مبحبش المفاجات! كنتى تاخدي رأيي الاول قبل ما تقرري كل حاجة كده" (هنيئا لك خناقة عنب).
لو خططتي للمصيف...لازم يفرقع لك كل الخطط...يعنى مثلا محضرة حاجات معينة للاكل هناك لازم يسفه منها ويقولك "ناقص برطمان التوم المفروم"...لو خدتي كيس مكرونة "ما في هناك انا مش هاشيل كل ده"...لو خدتي كيس لحمة "هايضرب في السكة نجيب من هناك"....ولازم يبهرك بخططه هوا بقى للمصيف واولها "ماما جايه معاينا علشان لما العيال تنام نقدر ننزل"...في النهاية انتى بتقعدي بالعيال علشان يفسح ست الحبايب يا حبيبية! او انه بعد ما يعمل كل اللى العيال بتطلبه (خدي بالك من يطلبوا دي..هوا مش بيتبرع باي فكرة) هايخرج مع فلان وفلان اللى سبحان الله نازلين في الساحل في نفس وقت اجازتكم برضه!! وبالتالي ده معناه سهر للصبح بالمعنى الحرفي ويصحى قبل المغرب
لو جبتي كتبك القديمة من بيتك اهلك...لازم البصة الغبية بتاعة "ايه اللى جاب الزبالة دي هنا؟" ويبدا في "مفيش مكان"..."شيلي الكراكيب اللى هنا الاول وبعد كده هاتي كركايب من بيوت تانية"...كتبك كراكيب بس المجلات اللى فيها اخبار المنتخب من ساعة ما بلغ..مش كراكيب...دى ذكريات!!
لو سمعتي اغنية اجنبي...يالهووووي على التريقة...ولازم يفتكر اسماء كل العرر اللى غنوا من بداية التمانينات لحد ما بطل هو يسمع اجنبي ...مع سطر ولا اتنين بالانجليزي علشان يثبت لك الثقافة الواسعة...ومفيش مانع يقلد لك حركة من بتوع مايكل جاكسون في اداء مثير للشفقة...ولو ميزتي الاغنية فانتى كنتى بتسمعى للعرر دول!!
مش هاننسى تاتش اعياد الميلاد والفالانتاين...اول حاجة هايفكر فيها الراجل هيا "هاناكل فين؟"...المناسبة هي اكل بره...او نروح لماما!!! او يكرمش لك مبلغ تجيبي اللى انتى عايزاه...ومش بعيد لو ربنا كرمه وفتح عليه وفكر يجيب هديه...هايجيب لك هدية لاستخدام البيت...كبة جديدة....سخان...طقم حلل سيراميك بينك (اهو بينك اهه....انطقي بقى)...في النهاية الهدية بتصب في مصلحته برضه!! او يجيب لك برفان من حد عنده في الشغل! الهدايا دي في عيد الميلاد...وشيكولاته من الكشك في الفالانتيان مع كيس لب سوبر (فالانتاين بقى هيصي)!
الرجالة محتاجة تفهم ان الست كائن مختلف عنهم...الست (واللى عايز يتريق يتفضل عادي...الساحة مفتوحة للجميع) بيفرق معاها جدا التفاصيل...الراجل كل تركيزه بيكون على الاطار الكبير فقط...البيت...جواه عيال وامهم...نقطة نهاية السطر!
المشكلة كلها تختصر في ان مراته بقت ام العيال...مبقاش يحس انها عايزة حاجة مختلفة عن امه هوا!! ما كله امهات بقى مع بعض! يعنى حماتك ممكن تنبسط جدا بجلابيه قطيفة...روب كاستور...او ماكينة فيشار!! بس لو انتى جالك الحاجات دي هاتحبطي بشدة...هوا بقى مش فاهم ده...اهم كلهم ستات وكلهم امهات فنضرب طقم جلاليب هدايا ونقفل الخانة دي!! 
انت ممل على فكرة جدا...ماهي لو جابت لك طقم شرابات للاسف مش هاتضايق!! هاتنبسط!!! فانت مختلف عنها...لما تجيب هدية ومخك مش قادر يستوعب الاختيارات اسئل واحدة ست! بدل الهزل اللى احنا عايشين فيه ده!
احنا الستات بنقول بينا وبين بعض مقولة شهيرة جدا "لو جالك فكرة وكنتى متحمسة ونفسك تروح من تفكيرك...قوليها لراجل...هايجيب ضرفها"
انتوا كده
مسلسل احباط متكرر...لو مراتك بدات تعمل رجيم...هيا بتبدا كل اسبوع تعمل رجيم ايوة احنا عارفين ومش بتكمل اول يوم حتى...اسمع واسكت...اسمع وشجعها...بلاش تكسر فيها...ومش لازم تفكرها بشكلها قبل ما تتجوز جنابك...انت كمان كرشك كبر على فكرة!
لو حطت مكياج من نفسها برضه مفيش اي هدف من انك تقولها "ايوة كده...مش المنظر اللى قاعدة لنا بيه"...انت مش بتشوف نفسك اخر الاسبوع قاعد بالفانلة ودقنك زي العنكبوت في وشك؟؟ تتمكيج ليه هيا؟؟ لذكر العنكبوت ابو فانلة؟؟؟؟ اهتم بنفسك "علشانها" وهي هاتعمل كده اوتوماتيك!
اي خطط ضروري بتفشل...اي فكرة حلوة لازم تحشر فيها انك محتاج تنام في اليوم ده (مش بقولك انت ممل!) او يكون عندك مشوار الاسبوع اللى جاي ومش عارف انهي يوم فاصرفي نظر عن الاسبوع كله.
المقال مش هجوم على الرجالة...ده انذار...الست لما بتقع في بير الاحباط غالبا بتقعد فيه كتير...ومن غير مفهومية كله هاينعكس على البيت...وترجع تسئلها بتزعقي ليه ومكشرة ليه ومتعصبة ليه والاكل من غير طعم ليه وسايبه المواعين متكومة ليه...واسئله كتير مش هاتفهم لها اجابة...بس اختصارها "مراتك محبطة اوي منك"

مراتك هي نصك الحلو...مش ام احفاد مامتك!!! 
فكر شوية...ارتقى شوية

ريم اسامة

جروب المدونة على الفيسبوك: https://www.facebook.com/groups/329904227056535/

دليلك لمعرض الكتاب

بالنسبة لي معرض الكتاب من العلامات المميزة في السنة...بابا كان بياخدني المعرض من وقت ما كان عندي اربع سنين...يعنى اكتر من تلاتين سنة باروح المعرض بانتظام....ده انا كنت لسه مخلفة ابني ورحت وكان عنده تلات اسابيع! مقدرش ماروحش!

وفي وسط اصحابي معروف انى "دليل" المعرض...خصوصا الازبكية.

فقلت انقل الخبرة لكم برضه :) 

مش هاتكلم عن افضل مكان تشتري منه او ارخص مكتبة...لان كل واحد له اتجاه مختلف عن الاخر في مجال القراءة.

كلامى النهاردة ازاي اليوم يعدى بسلام خصوصا لو معاكم اطفال.

اول حاجة...قبل ما تنزلوا من البيت ادخلوا الحمام!! الحمام هناك جحيم! مفيش اي داعي خالص لانك هاتدخل انسان سليم...هاتخرج بذكريات مقرفة واليمة ويمكن بعد الشر شوية امراض!

لو معاكم اطفال فهموهم ان برضه مفيش حمام خالص!!!

في حل تانى للاطفال.... ممكن لو معاكم عربية تدخلوها المعرض (سعر تذكرة الجراج عشرين جنيه بس) ويكون معاكم بوتي!! مفيش حل تانى!!

الهدوم، لبس رياضي...جزمة كوتشي..جينز او بنطلون مريح او بنطلون رياضة...خامة مريحة كمان. ومعاكم شنطة تروللي بعجل...علشان تتفرج براحتك ومن غير ما تشيل وتتعب...فشنطة بعجل احسن حل (شنطة سفر صغيرة او شنطة مدرسة تروللي) وكمان شنطة ضهر...احتياطي!

مفيش اي داعي تحط فلوس او موبايل في جيبك...وللبنات بلاش الشنط اللى بتتعلق على الكتف...الجميع ياخد معاه شنطة كروس (cross)...وده لكذا سبب...اول حاجة مفيش لخمة...الشنطة على كتفتك مربكة شوية...والشنطة الكروس صعب سرقتها (طبعا كلنا عارفين التجمعات الكبيرة بيكون فيها نشالين)...ونفس الكلام للشباب او الرجال...نشل الجيوب سهل...ولكن الشنطة الصغيرة الكروس صعبة السرقة.

يكون معاك ازازة مياة وازازة عصير او اي حاجة مسكرة...ممكن تدوخ من اللف شوية او تجوع...ومنطقة الكافتريات والمطاعم زحمة جدااااا...والوقت مش هانضيعه في انتظار وجبة خفيفة...الحل المثالي تاخد معاك مياة وحاجة بسيطة للاكل اختصارا للوقت (واحيانا المال).

نركز بنشتري ايه...مش اي كتاب نشده من على الرف...في كتب موجودة طول السنة ومش فرصة اوي نجيبها من المعرض...والروايات كتيييير وكلها حلوة...الافضل انك تتفق مع اصحابك كل واحد يجيب عدد من الروايات وتبدلوا سوا...وقبل ما تشتري ادخل بسرعة على موبايلك دور على اراء القراء...احيانا بيكون كتاب غلافه بيشد جامد ويكون محتواه ضعيف او ممل...استفسر قبل ما تشتري.

اشتري لاطفالك كتب التلوين (مميزة فعلا في كذا مكتبة وسعرها افضل كتير من المكتبات العادية) ونصيحة بجد..خدوا اطفالكم معاكم ولو مرة كل سنة..اسمحوا لهم يختاروا كراسات للتلوين او قصص...الطفل هايكبر متعلق بالحدث ده...ومتعلق بالكتب والقراءة...علموا اولادكم الحفاظ على الكتب وقيمتها...اشتري قصص ملونة وصغيرة واقرأى لاطفالك قبل النوم وخصصي مكان محدد لكتب اولادك.

لمحبي الروايات الاجنبي (تعالوا جنبي يا اولاد)...مفيش اي داعي خاااااااااااااالص تشتروا روايات من المكتبات الكبيرة المشهورة...سور الازبكية وعبي وشيل! بربع التمن حرفيا..بس قبل ما تشتري "فرً" الكتاب لان احيانا بيكون في صفحات مقطعوعة او مبقعة! (عادي يا جماعة). لو انت غاوي الازبكية اتاكد دايما ان فلوسك فكة مش مجمدة...اختصارا للوقت والمناهدة او انك تدبس تجيب بالباقي مجلة قديمة!

اهم من كل اللى فات يكون معاك وايبس (مناديل مبللة).

في الشنطة الترولي ارمي فيها شوية اكياس بلاستيك تقيلة (في حالة لو الشنطة اتملت على اخرها ومحتاج اكياس تستحمل الكتب) وكاب (كاسكيته) وكوفية ...تقلبات الجو في يناير محدش يقدر يتوقعها.

انت كده جاهز للمعرض...يا رب تنبسطوا :)

ريم اسامة

جروب المدونة على الفيسبوك: https://www.facebook.com/groups/329904227056535/?ref=bookmarks

 

اشيائي!

كل واحد فينا له مقتنيات واشياء خاصة...مش حاجة سر...ولكن الحاجات اللى بنستخدمها بشكل شخصي زي النضارة والجزم والهدوم والليفة...الى اخره.

الناس عامة بتسيب وصية لاموالهم وممتلكاتهم ومجوهراتهم...انا فكرت لو حصل وانتقلت للرفيق الاعلى....كل حاجاتي دي هاتروح فين؟ وانا عندي بلاوي بقى D:

فقلت اكتب اتمنى حاجاتي تروح لمين ويتصرفوا فيها ازاي...ما انا عشت عمري اجمع في الهبل ده ومش مقنع ان الهبل بتاعي يترمي او يتشحت.

اول حاجة الكتب...عندي كتب كتير جدا....ومجلات (كل الاعداد اللى نشرت فيها عندي في البيت)...ومجلات اكل ومجلات ومجلدات ميكي...وكتب دراستي. احب ان كل واحد اعرفه وعزيز عليا وبيحبني ياخد كتاب...يفتكرونى بيه...كل واحد يختار اللى يعجبه علشان يقراه ويفتكرنى...ومجلدات ميكي لاولادي...ومجلات الطبيخ لاصحابي الستات كل واحدة تاخد مجلة. وباقي الكتب تتشال لاولادي برضه...وكتب الدراسة تروح سور الازبكية يمكن تنفع حد. والمجلات اللى اتنشر لي فيها مقالات تتشال في مكتبة البيت (يعملوا مكتبة للبيت بقى ساعتها).

هدومى...هدوم البيت تتوزع كلها...بس الا الروب الطوبي...ده غالي اوي  اوي عندي...ده يتشال لبنتى...وابني يختار بلوفر او تيشيرت او جاكيت يحتفظ بيه...وبنتى كمان تختار اللى يعجبها تحتفظ بيه...والباقي لاي قرية فقيرة...والجزم والشنط  تتوزع برضه.

برفاناتي خليها...يمكن اوحش حد ويحب يفتكرنى ويفتح ازازة منهم ويلاقيني...الريحة تحسسه انى موجودة بشكل ما.

كل الخيوط وابر الكروشيه والتريكو والكنافا وادوات صناعة الاكسسوار والخرز...الخ...الادوات تتشال للعيال لو حد حب يستخدمها بس الخيوط والمواد نفسها تروح لماما واختى (او لاي حد عنده الهوايات دي)

 الالوان...عندي علب الوان خاصة بيا بعيد عن العيال وفرم العيال...مش عارفة اعملوا بيهم اي حاجة بقى هههههههههه

عندي برضه محافظ ومكياج وتوك كتير - محفظة لكل طفل منهم والباقي يتوزع.

الاجهزة الكهربائية بره المطبخ (زي السيشوار...الخ) برضه تتشال للبنت.

موبايلي...يتمسح اللى عليه...بدون التفتيش في الرسائل او الفيسبوك...ويكون بتاع ابني.

مقالاتى والقصص اللى كتبتها...ممكن جوزي يطبعها ويجلدها وتكون في مكتبة البيت (اللى هاتتعمل مخصوص دي)...الصور (وما اكثرها...تقريبا مش بيفوت يوم بلا تصوير)...يا ريت صور المناسبات يتم طباعتها والاحتفاظ بها في البومات انيقة في المكتبة مع البومات صور الفرح والخطوبة .

المصحف الخاص بى يتشال في المكتبة برضه...ويا ريت الاولاد يقرأوا منه.

الحاجات الخفيفة..زي النضارات...الفلاشات (فلاش ميموري)...ماديلية المفاتيح...السبحة...المج الفخار...محفظتي بكل ما فيها من كارنيهات واوراق وكروت...السماعات...التاج اللى لبسته في فرحى...في شوية حاجات في علبة من وانا صغيرة شايلاهم..اكسسوارات...كل الحاجات دي تتجمع في صندوق وتتشال خالص - تختفى..لحد ما اولادي يكبروا ويفتحوها بنفسهم.

باقي الكراكيب (ومش عارفة احصرها) تترمي او تتوزع مفيش مشكلة..انا عارفة كراكيبي كتير.

محدش يشيل حاجة تفكره بيا ويزعل...لو اي حاجة هايحتفظوا بيها هاتجيب لهم حزن يبقى تترمى 

اهم حاجة تتشال لي هي الذكرى الحلوة...نكته ضحكنا عليها سوا..موقف محرج يضحك مرينا بيه مع بعض..خروجة انبسطنا فيها...صورة مشتركة كلنا بنضحك فيها...محدش يفتكر لي اي حاجة تزعل او وحشة...افتكروا دايما انى كنت بحب الهزار والضحك والقعدة الحلوة.

ربنا يديني طولة العمر طبعا D:

ريم اسامة

مركز قبل الاخير

معلش كلام النهاردة حمضان شوية بس معصبني وقلت اشارككم الرأي وتشاركونى برضه.

بوستات كتير اوي الفترة الاخيرة (بما انه موسم التقدم في المدارس) عن ان التعليم عندنا فاشل وواخد المركز قبل الاخير في التصنيف العالمي وبلاش تحبط ابنك وبنتك بالتعليم ده علشان مافيش منه فايدة وخليهم يعيشوا حياتهم.

ولقيت ناس بتقول كلام عن المدارس وتصنيفها والوهم اللى احنا عايشين فيه والغباء اللى بنحشيه في دماغ اولادنا. والنهاردة قرأت مقال لواحد (بيقول ان معاه دكتوراه) بيشجع فيه الاباء والامهات انهم يوفروا فلوسهم وبلا تعليم بلا $%& احنا اصلا بلد مش نافع فيها تعليم وان المنظومة كلها بايظة وبلاش نحرم اولادنا حقهم في طفولة سعيدة بالكتب دي كلها وحرام الواجبات دي كلها وعيب علينا نمشى ورا الاوهام بتاعة التعليم وان اغبى حاجة في الكون هي الثانوية العامة.

وفضل يقارن مقارنة تافهة بين المدارس الحكومة وبين المدارس الخاصة وان المدارس الانترناشيونال هي اكبر اكذوبة في البلد...حصر الفرق في الحمام!! ايوة حضرتك قرات صح "الحمام"...يعنى بدل ما العيال تقول عايزة ادخل الحمام فيقولوا toilet please. وان اللى بيدخل عياله مدارس خاصة بيدخلهم علشان يدخلوا حمام نضيف!!

مش عارفة ايه موضوعه مع الحمام حقيقي!

وبينادى الاباء والامهات انهم ينموا مهارات عيالهم بدل التعليم...وان اكتر ناس ناجحة في الدنيا كان مجموعهم صغير ومكانوش اساسا فالحين في المدارس.

ايه ده؟؟؟؟ لا بجد! يعنى اخرج ابني من المدرسة علشان احنا في المركز قبل الاخير في التصنيف العالمي واشترك له في دورة تدريبية عند اي ميكانيكي علشان يبقى عنده ورشة لما يكبر شوية ويبقى معلم قد الدنيا! او اهتم ببنتى واخليها ترسم وتلون اكتر علشان لما تكبر تمسك قسم الالوان في مكتبة من المكتبات الكبرى! 

ايه ده؟ ايه القرف اللى بتحبطوا بيه الناس ده؟؟؟ والفرق بين المدارس الحكومى والتجريبي والخاص والانترناشيونال هو فرق في التواليت حضرتك؟ انت متعلم اصلا؟؟ دكتوراه ايه اللى خدتها؟؟؟ ولازم الكابتن يقول انه واخدها من بره ويقارن بين مصر وبين بلاد الفرنجة المتحضرين. 

انا  مش هاتكلم عن الفرق بين المدارس لان دي واضحة للاعمى...اللى مدخل تجريبي عايز يدخل خاص...واللى مدخل خاص نفسه يدخل عياله انترناشيونال...واللى في انترناشيونال عايز يكمل بره....طبيعي اي انسان بيدور على الافضل لاولاده قدر استطاعته...وقدر امكانياته. وطبيعي برضه ان اي بيت بيحاول يزود مهارات اولاده رياضيا او في اي اتجاه اخر.... انما اخرجهم من المدرسة اصلا!!!! نكتة صح؟!

ما التعليم والمنهاج متغيرتش كتير ان ايام ما كنت انا في المدرسة...واللى عايز احسن وافضل...يدفع اكتر...ده النظام عندنا وهو من الثوابت اللى مش هانعرف نغيرها مهما احبطنا في نفسنا واحبطنا في العيال ودمرنا معنوياتنا ومعنوياتهم.

والله انا اعرف ان اللى يعرض مشكلة يحط اقتراح للحل...مش يضرب الناس في وشهم كده سخافة وخلاص!! ما تقول الحل ايه؟ الحل اللى في مقدرتنا مش في مقدرة الادارة التعليمية علشان مايبقاش كلام اونطة وخلاص...الدراسة مالهاش لازمة...بس انت وصلت للدكتوراه ومتهيالي اكيد خدت قسط من التعليم في مصر واظن انه مكنش فشنك...محدش فينا تعليمه فشنك حتى لو كان اقل مستوى من التعليم في البلد....مفيش تعليم اونطة ولا تعليم اهبل....احنا اللى بنسفه من كل حاجة في حياتنا عامة.

من الطبيعي مثلا نقول التعليم مش عاجبنا فبلاش نكهرب العيال علشان المجموع...بس في نفس الوقت مش هاينفع نربيهم على السقوط والاستهتار والتسيب والاهمال في اهم شيء في حياتهم...ما دول اطفال في ايه في عيشتهم اهم من التعليم؟ ايه اللى هاينفعهم بجد غير دراستهم؟ لو عايزين نزود على الدراسة "الفاشلة" دي حاجة...اه ماشي كويس جدا...بس نرمي الدراسة برمتها كده علشان احنا خارج التصنيف؟!! 

طيب سؤال على هامش الموضوع....احنا مصنفين كاباء وامهات؟ انت كأب محترم بتعمل ايه لعيالك غير انك بتصرف عليهم (وكثير من الاحيان بتذلهم باللقمة دي وقت النرفزة!)؟...انتى كأم وعلى كتافك مسئولية العيال من الالف للياء...بتعملي ايه ينمى مهاراتهم وشخصياتهم وذكاءهم وتفكيرهم؟ معظم الامهات بتكتفي انها "توصل" ابنها للدرس او التمرين وتطبخ وتغسل ..وتذلهم برضه بالحاجات دي وقت اللزوم.

قبل ما نرمي التهمة على المدارس والمدرسين والدولة...كل واحد يبص في المراية بصدق...من غير نفاق للذات...انت متقدرش غير على التعليم التجريبي او الحكومى...يبقى تشجع ابنك على الدراسة (بما ان مفيش عندك اي اختيارات اخرى) وتكمل له بره اي كورسات مهارية ان تدريبات رياضية.

بلاش من فضلكم الجرعات المكثفة من الاحباط دي...مش هاتعمل حاجة غير انها هاتزود همومنا وكوابيسنا!

فتكم بعافية 

ريم اسامة

جروب المدونة على الفيسبوك:

https://www.facebook.com/groups/329904227056535/

الى اجل غير مسمى!

ناس كتير اوي اوي بتأجل كل حاجة حلوة للاخر او للابد! 

وقت الغدا...لو مثلا نقول عاملين رز وخضار وفراخ بانيه...فتلاقي الشخص ياكل من كله ويسيب حتة فراخ بانيه للاخر...تشتري هدوم...وفيه بلوزة تحفة...فتسيبيها للخروجات الحلوة...لا تروحي بيها  زيارات ولا تروحي بيها الشغل...هيا متعلقة مستنية خروجة حلوة! 

عندك رصيد اجازات كتير...تحوشيه علشان يكتر اكتر...علشان تسافري مثلا عشر ايام مصيف او مشتى...الشبكة المقدسة...تفضل مركونة في العلبة القطيفة للافراح والمناسبات التقيلة فقط...ماتخرجش ولا تشوف الضوء الا للعزيز الغالي...والنيش "صاحب المقام الرفيع"..يطير فيها رقاب لو اتفتح واتاخد منه حاجة بدون مبرر قوي ومقنع! باشوف ناس بعيني بتاكل طرف البيتزا الحاف ده الاول...ويسيبوا الوسط للاخر!...ست البيت تأجل مج النسكافيه لحد ما تخلص تنضيف علشان تشربه "على نضافة"!
ماتعمليش شعرك غير للافراح...ولما تعمليه تلفيه "رولو" علشان يفضل نفس الشكل لحد ما تغسليه (!)...مكان جديد فتح ونفسك تروحيه...تأجلي لحد ما تلاقي الصحبة الصح للمكان (لحد ما تنسي الموضوع). اللى بيجيبوا موبايلات جديدة بيختاروا لها جراب تخين وتقيل علشان يحافظ عليه...علشان لما يتباع يجيب فلوس!!!!
احنا على طول بنشتكى من الملل والاكتئاب والاحباط...مش هاظلم الناس واقول كله في ايدهم...لا مش كله....ما اللى دخله قليل وعليه التزامات تقيلة اكيد مهموم ومحبط...واللى فقد انسان عزيز عليه (كان الله في عونه حقيقي)...واللى متجوزة انسان سخيف ومطلع روحها (غلبانة جدا والله)...ونماذج كتير جدا...ولكن جزء لا يستهان به في ايدنا...يعنى حتى ابسط الحاجات اللى هاتبسطنا مش هانعملها ونأجلها؟! هوا مش كفاية كل حاجة كبيرة عايزينها متأجلة كده كده؟
واحدة اعرفها كانت بتشتري كل حاجة جميلة وحلوة وشيك وغالية وتخزنها! علشان لما تتجوز...ولما اتجوزت تخنت...وخلفت بسرعة...وشكلها اصلا اختلف والهدوم نفسها بقت موضتها قديمة اووووي....وفي الاخر كل ما تفتح دولابها تحبط بشدة...محشور هدوم وشيك وغالية..ومفيش غير جلاليب البيت والبيجامات اللى جاية مقاسها...وبسبب اطفالها بقت فكرة الكعب العالي فكرة مضحكة جدا...وبالتالي عندها كوم جزم غير مستخدم و"مقشر" من الركنة!! حرمت نفسها من زهوة الهدوم الجديدة....وحرمت نفسها بعد الجواز انها تلبس اصلا علشان مستحرمة تشتري وهيا عندها!! وفي الاخر بتلوم نفسها اكتر واكتر واكتر انها لازم تخس وتحترم نفسها علشان الهدوم دي كلها حرام تترمي! شوفوا حطت نفسها تحت كام ضغط نفسي؟ الفلوس اللى كانت معاها راحت في حاجة مش هاتستخدمها علشان لما جه وقت استخدامها....معرفتش تستخدمها وبرضه بتلوم نفسها وبتكتئب!!! ليه؟؟
وفي كتير اوي ستات مستحيل تاخد اجازة غير لما تكون مريضة او عندها مشوار مهم جدا...مفيش حاجة اسمها اجازة للراحة خالص. وفي اخواننا البخلاء اللى بيحوشوا الاجازات ويحرموا نفسهم الراحة علشان لما يطلعوا معاش يستبدلوا الايام دي بفلوس (حسب القانون القديم). ايه ده؟؟؟ الواحد بيحرم نفسه عشان ملاليم الله اعلم هايعيش يصرفها ولا لا!!
واللى بيشيل احلى حتة من الطبق للاخر...غالبا هايكون شبع على ما يوصل للحتة دي وياكلها لانه بيحبها مش لانه نفسه فيها! 
نماذج لا حصر لها...ليه بتعملوا كده؟؟
النيش المقدس مش هايدخلك الجنة...افتحيه واستخدمي حاجتك...اهلك جابوا لك الحاجات دي علشان "انتى" تنبسطي بيها...كل فترة افتحي النيش واختاري كاس ولا كوباية مقدس اشربي فيه وابسطي نفسك....انتى اهم واحدة في الدنيا على فكرة...مفيش حد اهم منك! 
اللى بتجيب هدوم وجزم....البسي يا امى! البسي وانبسطي بيها....حافظي على حالتك النفسية وافرحي بنفسك وانتى شيك وجميلة...الجمال ده هايروح منك قريب حاولي تنبسطي بيه قدر الامكان.
اخرجي لوحدك...ايه المشكلة؟؟ خدي حد من اهلك معاكي...اكيد هاتلاقي حد يخرج معاكي لو مش بتحبي الخروج لوحدك...مش ضروري ابدا يكون الشخص اللى في بالك يخرج معاكي او صاحبة معينة تخرجي معاها...انبسطي اي كان الشخص...متأجليش اي فرصة ممكن تخرجي فيها وتأجليها ابدا.
واللى بتعمل شعرها...سيبيه...بصى لنفسك كل شوية وافرحي ان شكلك مختلف...بلاش تدفنيه تحت طاقية البنس ولا الرولو...انتى اهم من الناس.
وبلاش تاجلي اي مكالمات...لو حد واحشك اتصلي فورا...مفيش حاجة اسمها الوقت المناسب...لو حد عزيز عليكي لدرجة انه يوحشك يبقى مفيش حاجة بينكم اسمها "الوقت المناسب". نفس الفكرة لو في خلاف بينك وبين حد كان عزيز عليكي...مفيش حاجة تستاهل على فكرة...خليكي انتى احسن واتصلي. كل ما الصلح بيتأجل...كل ما بيكون اصعب!
نفسك في مج شاي ولا شوية عصير...صبي واشربي...بلاش تنتظري "الوقت المناسب"...اصل الوقت المناسب ده مش هاييجي غير متاخر وهايكون ساعتها مش مناسب لحالتك المزاجية.
مفيش حد هايحاسبك عملتي ايه امتى! 
 لو جالك فكرة مطرقعة او تغيير نفسك فيه...نفذي على طول...لو نفسك هفتك على طبق معين اشتري وكلي...لو عايزة تخرجي في المطر...البسي بالطو واخرجى على طول....متأجليش حاجة...احنا الستات بنتأثر زيادة عن الرجالة بموضوع الحالة المزاجية والموود والحاجات دي...فانبسطي قدر المستطاع...لانك لو دخلتي في دائرة الاكتئاب والاحباط....الدائرة هايبقى لها سقف....وتتحبسي في الغرفة المغلقة!!!!
وهاقولها لاخر مرة....انتى اهم واحدة في الدنيا!! 
عيشي بقى!

ريم اسامة

جروب المدونة على الفيسبوك: 
https://www.facebook.com/groups/329904227056535/