مقال النهاردة عن الطلاق والمطلقات!
ناس كتير هايجي في بالها ان للاسف الطلاق انتشر جدا وده بسبب ان مفيش اخلاق ولا قيم ولا مبادئ خلاص.
ده حقيقي ولكن في نفس الوقت نقدر نقول "الحمد لله" ان الست بقت تقدر تتحمل لقب مطلقة بلا خجل ومن غير ما يكون وصمة عار على جبينها. فى العصر الحالي الست بقت مستقلة ماديا الى حد كبير ولو مش مستقلة ماديا...فهي تقدر يكون لها دخل شهري حتى لو قليل من اي مشروع بسيط في البيت وتسوق لنفسها عن طريق النت (اكسسوارات - حلويات - كروشية - اشغال يدوية...الخ) وده بيخلي عندها عامل من الامان لو انفصلت عن الراجل اللى معتبر نفسه الامر الناهي في حياتها بحكم انه بيصرف على البيت من الالف للياء!
وفي العصر الحالي برضه تقريبا كل البنات والسيدات متعلمات ... التعليم بيدي الانسان قوة للشخصية واستنارة في الرؤية وافق واسع...حتى لو قدر التعليم قليل...برضه بيفرق جدا في تكوين الشخصية....لو حطينا كل العوامل دي مع بعض يدينا ست مش مضطرة انها تعيش مع راجل مش طايقة العيشة معاه!
بس في عوامل انسانية بقى بتخلي الست تيجي على نفسها ومنها الاطفال واهلها. الست بتكره تحبط اهلها بطلاقها...صعب بعد ما استقلت بحياتها في بيت مختلف ليه نظام خاص انها ترجع تانى تعيش مع اهلها ومعاها اطفال! لو بطولها مفيش مشاكل لكن بتخاف انها تعيش اطفالها في بيئة جديدة حتى لو البيت اللى هيا شخصيا اتربت فيه!! مبترضاش تلجأ للطلاق غير لما تكون فعلا استحالت العيشة تماما...بعد ما تجرب الكلام والخناق والخصام والهدوء والتهديد واللجوء لاشخاص من خارج البيت مايجيبش نتيجة...في الحالة دي بتضطر انها فعلا تطلق منه.
ضميرها بيوجعها جدا علشان هاتحرم اطفالها من ابوهم. علشان لما البنت تكبر ممكن جدا مايرضاش حد يتجوزها بسهولة علشان والديها منفصلين....او ابوها مايحضرش الجواز...او يرفض تجهيز البنت...او يرفض اصلا انه يكون وكيلها! في تفاصيل صغيرة بتفرق جدا مع الست في طلب الطلاق!! ولو كان عندها ولد فاكيد ابوه مش بالسهل يجيب له شقة او يساعده في الزواج وخلافه. ده من الناحية المادية...طيب والناحية النفسية؟ الاطفال هايكونوا اسوياء؟ هايكونوا طبيعيين زي باقي اقرانهم اللى هايتربوا بين اب وام؟
وهنا مربط الفرس!
المقالة النهاردة عن النقطة دي خصوصا!!
اسباب الطلاق عديدة ومختلفة وصعبة وخيالية في بعض الاحيان....صعب نلاقي طلاق سهل...فميش طلاق سهل...حتى لو الست مش طايقة الحياة والعيشة والراجل والرجالة كلهم...لما يحصل فعلا الطلاق بيكون واقعه عليها صعب وشديد. ولازم طبعا الخلافات المادية وبعد كده القضايا القانونية (النفقة والشقة من حق مين ومين هايدفع المدارس والراجل يتحايل على القانون ويزور مستندات تفيد انه بيقبض عشرين جنيه في الشهر علشان مراته متاخدش منه حاجة...وممكن يخلي امه ترفع عليه قضية انها هيا كمان تاخد منه نفقة علشان نفقة مراته وعيالة تقل...وكله بالاتفاق مع ابنها)....وفي النص المحاميين بياكلوا جاتوه على قفا البيوت الخربانة!!
بعيد عن اسباب الطلاق (الاهانة والضرب والخيانة والبخل وقلة القيمة وقلة الادب وانعدام الضمير) بعد ما يحصل فعلا الست بتبدأ في التحول اللا ارادي!! اول حاجة بتكون حاسة انها ضحية ومظلومة جدا ومنهارة الى حد بعيد...بعد شوية تبدأ تفوق من اللى هيا فيه ويتركز كل تفكيرها في حاجة واحدة بس وهي: الانتقام!! للاسف كتير جدا التعليم والثقافة بيكون ملهمش لازمة جنب الغبااااء الحاد!!
اول حاجة كل الستات بتعملها هي انها (بلا وعي) تكره العيال في ابوهم ...هما بيكونوا شايفين طبعا الاهانة والضرب وقلة الادب بين الطرفين وبيكونوا نفسيا مدمرين...فبتيجي الام تدمر فيهم اكتر واكتر من غير ما تكون حاسة بنفسها....كل ما تيجي سيرة الاب معاهم او مع اي حد قدامهم او في التليفون ...سيل من الشتيمة والحسبنة والدعاء عليه وعلى اليوم الطين اللى عرفته فيه وانها مشافتش معاه يوم كويس وانها اتجننت في عقلها لما قبلت تتجوز حلوف زيه!
عارفين الاطفال هايفكروا في ايه؟ اول حاجة هايفكروا فيها انها مش بتحبهم! لانهم نتيجة الجواز "الفاشل" ده وانهم كانوا سبب انها تحملت المزيد من الاهانة والعناء! العيال هاتكره نفسها هايكرهوا ابوهم وفي الاخر هايكرهوا امهم لانها مش بتسكت ولا بتكتفي من الشتيمة في ابوهم!!!!!
الانتقام بيكون سيد الموقف...الانتقام من الاب بكل طريقة ممكنة....القضايا...حرمانه من عياله (طبعا هيا مش بتفكر انها بتحرم الاولاد من حياة طبيعية ومن ابوهم اللى هما بيحبوه بغض النظر علاقته ايه بامهم)...الافتراء عليه بقضايا نصب وسرقة وتبديد مفروشات وقائمة!!....تروح المدرسة وتنبه عليهم ان لو الاب راح ياخد العيال يمنعوه وتشرح لهم انهم اطلقوا خلاص (طيب ليه بتفضحي عيالك؟؟) ...في النهاية بعد شهور او سنين الاب بيشوف عياله طبعا ...مش هاتقدرى تحرميه منهم العمر كله...ولما يشوفهم هايفسحهم طبعا...يجيب لهم هدايا...هايديهم فلوس (علشان عارف كويس انك شوهتي صورته بكل الصور الممكنة وهايحاول يجذبهم ليه)...الاطفال لما تكبر ويكونوا في فترة المراهقة هايفضلوا متعاطفين معاكي على فكرة...لكن لما يكبروا ويرشدوا ويوصلوا لدرجة من العقل تخليهم يحكموا على الامور بشكل صحيح الى حد ما...هايقلبوا عليكي!!!
عارفة ليه؟
علشان انتى معرفتيش تعامليهم بذكاء!! طول حياتهم شايفين ام بتلطم على حظها وعلى الظلم اللى شافته وعلى الحرمان من كل حاجة علشان تربيهم وعلى وعلى وعلى...وكله بيصب في اناء واحد: "اتحرمت علشانكوا"...هايزهقوا من النبرة دي خصوصا انهم طرف مظلوم برضه في علاقة فاشلة وكمان مش بيشوفوا اي حاجة وحشة من ابوهم!! بالرغم من ان الراجل ممكن جدا يكون انسان سيئ فعلا وهو السبب الحقيقي للانفصال وبهدلة مراته...بس الاولاد هايكون لهم نظرة مختلفة!
الام: لطم وندب سنين طويلة على حظها السئ مع راجل واطي
الاب: فسح وهدايا
الام: فاضحة اسرار البيت والراجل اللى هو ابوهم!
الاب: كلام هزار وضحك ووعود بهدايا في حالة النجاح
الام: مشاوير رايح جاي وفلوس كتير على محاميين علشان تجيب رجله في مصيبة وخلاص
الاب: بيوكل محامي "للدفاع" عن نفسه وليس الهجوم
ايتها الست "المنتقمة":
ابنك هايطلع نسخة من ابوه!! انتى محافظتيش على اسرار جوزك ولا على صورته ولا على "رمز" الاب!! بالرغم من ان ابوه فعلا راجل وحش لكن "بغباءك" هاتخليه مثل اعلى بلا وعي!! ابنك مع اول لمسة حنان من اي واحدة هايتشد لها....مع اول واحدة تحسسه ان الراجل له قيمة في حياتها هايروح وراها من غير تفكير!! مع اول واحدة تديه شعور بالامان والاستقرار النفسي هايجري عليها ويستقر معاها --- حتى لو كانت انسانة وحشة وقليلة الاصل!!! ومهما تحاولي معاه ومهما تشرحي له انها ماتنفعش ....انتى هاتبىق اخر واحدة في الكون يسمع كلامها!!!
بنتك مع اول واحد يحسسها بالابوة والدفء والاستقرار هاتروح له ومش هاتعرفي توقفيها عن قرارها!!
عارفة ليه؟
علشان انتى السبب!!!
لكل ست كل همها في الدنيا الانتقام من طليقها ابو عيالها..ارجوكي ارجوكي ارجوكي كفاية!! كفاية تشويه في الرمز وكفاية تشويه في نفسيه الاطفال البريئة .... حاولي قدر المستطاع عدم ذكر الاب بسوء....على الاقل مش على مسمع منهم!! لو جاب لهم اي هدية بلاش "ياما جاب الغراب لامه!!"...لا افرحي معاهم وحسسيهم ان ابوهم ده احسن راجل في الدنيا ولو كبروا شوية وسئلوكي ليه سبتوا بعض....يا ريت اجابة دبلوماسية شوية زي مثلا: اختلافنا وحبينا نفضل اصحاب ...او احنا حاسين اننا مرتاحين كده اكتر بس باباكوا فعلا انسان كويس ورائع....حاولي تمسحي من ذاكرتهم المعاملة الوحشة والمشاهد اللى شافوها في بيتكوا!!
بلاش مجهودك معاهم يروح ويضيع...مفيش داعي يحسوا انك اللى ظلمتيهم فعلا...مفيش داعي للكره اللى هاتزرعيه جواهم لانك الوحيدة اللى هاتحصده!!
بلاش تربي في بيتك كائنات مشوهة ....علشان ماتندميش!!!
ريم اسامة
https://www.facebook.com/groups/329904227056535/
ضميرها بيوجعها جدا علشان هاتحرم اطفالها من ابوهم. علشان لما البنت تكبر ممكن جدا مايرضاش حد يتجوزها بسهولة علشان والديها منفصلين....او ابوها مايحضرش الجواز...او يرفض تجهيز البنت...او يرفض اصلا انه يكون وكيلها! في تفاصيل صغيرة بتفرق جدا مع الست في طلب الطلاق!! ولو كان عندها ولد فاكيد ابوه مش بالسهل يجيب له شقة او يساعده في الزواج وخلافه. ده من الناحية المادية...طيب والناحية النفسية؟ الاطفال هايكونوا اسوياء؟ هايكونوا طبيعيين زي باقي اقرانهم اللى هايتربوا بين اب وام؟
وهنا مربط الفرس!
المقالة النهاردة عن النقطة دي خصوصا!!
اسباب الطلاق عديدة ومختلفة وصعبة وخيالية في بعض الاحيان....صعب نلاقي طلاق سهل...فميش طلاق سهل...حتى لو الست مش طايقة الحياة والعيشة والراجل والرجالة كلهم...لما يحصل فعلا الطلاق بيكون واقعه عليها صعب وشديد. ولازم طبعا الخلافات المادية وبعد كده القضايا القانونية (النفقة والشقة من حق مين ومين هايدفع المدارس والراجل يتحايل على القانون ويزور مستندات تفيد انه بيقبض عشرين جنيه في الشهر علشان مراته متاخدش منه حاجة...وممكن يخلي امه ترفع عليه قضية انها هيا كمان تاخد منه نفقة علشان نفقة مراته وعيالة تقل...وكله بالاتفاق مع ابنها)....وفي النص المحاميين بياكلوا جاتوه على قفا البيوت الخربانة!!
بعيد عن اسباب الطلاق (الاهانة والضرب والخيانة والبخل وقلة القيمة وقلة الادب وانعدام الضمير) بعد ما يحصل فعلا الست بتبدأ في التحول اللا ارادي!! اول حاجة بتكون حاسة انها ضحية ومظلومة جدا ومنهارة الى حد بعيد...بعد شوية تبدأ تفوق من اللى هيا فيه ويتركز كل تفكيرها في حاجة واحدة بس وهي: الانتقام!! للاسف كتير جدا التعليم والثقافة بيكون ملهمش لازمة جنب الغبااااء الحاد!!
اول حاجة كل الستات بتعملها هي انها (بلا وعي) تكره العيال في ابوهم ...هما بيكونوا شايفين طبعا الاهانة والضرب وقلة الادب بين الطرفين وبيكونوا نفسيا مدمرين...فبتيجي الام تدمر فيهم اكتر واكتر من غير ما تكون حاسة بنفسها....كل ما تيجي سيرة الاب معاهم او مع اي حد قدامهم او في التليفون ...سيل من الشتيمة والحسبنة والدعاء عليه وعلى اليوم الطين اللى عرفته فيه وانها مشافتش معاه يوم كويس وانها اتجننت في عقلها لما قبلت تتجوز حلوف زيه!
عارفين الاطفال هايفكروا في ايه؟ اول حاجة هايفكروا فيها انها مش بتحبهم! لانهم نتيجة الجواز "الفاشل" ده وانهم كانوا سبب انها تحملت المزيد من الاهانة والعناء! العيال هاتكره نفسها هايكرهوا ابوهم وفي الاخر هايكرهوا امهم لانها مش بتسكت ولا بتكتفي من الشتيمة في ابوهم!!!!!
الانتقام بيكون سيد الموقف...الانتقام من الاب بكل طريقة ممكنة....القضايا...حرمانه من عياله (طبعا هيا مش بتفكر انها بتحرم الاولاد من حياة طبيعية ومن ابوهم اللى هما بيحبوه بغض النظر علاقته ايه بامهم)...الافتراء عليه بقضايا نصب وسرقة وتبديد مفروشات وقائمة!!....تروح المدرسة وتنبه عليهم ان لو الاب راح ياخد العيال يمنعوه وتشرح لهم انهم اطلقوا خلاص (طيب ليه بتفضحي عيالك؟؟) ...في النهاية بعد شهور او سنين الاب بيشوف عياله طبعا ...مش هاتقدرى تحرميه منهم العمر كله...ولما يشوفهم هايفسحهم طبعا...يجيب لهم هدايا...هايديهم فلوس (علشان عارف كويس انك شوهتي صورته بكل الصور الممكنة وهايحاول يجذبهم ليه)...الاطفال لما تكبر ويكونوا في فترة المراهقة هايفضلوا متعاطفين معاكي على فكرة...لكن لما يكبروا ويرشدوا ويوصلوا لدرجة من العقل تخليهم يحكموا على الامور بشكل صحيح الى حد ما...هايقلبوا عليكي!!!
عارفة ليه؟
علشان انتى معرفتيش تعامليهم بذكاء!! طول حياتهم شايفين ام بتلطم على حظها وعلى الظلم اللى شافته وعلى الحرمان من كل حاجة علشان تربيهم وعلى وعلى وعلى...وكله بيصب في اناء واحد: "اتحرمت علشانكوا"...هايزهقوا من النبرة دي خصوصا انهم طرف مظلوم برضه في علاقة فاشلة وكمان مش بيشوفوا اي حاجة وحشة من ابوهم!! بالرغم من ان الراجل ممكن جدا يكون انسان سيئ فعلا وهو السبب الحقيقي للانفصال وبهدلة مراته...بس الاولاد هايكون لهم نظرة مختلفة!
الام: لطم وندب سنين طويلة على حظها السئ مع راجل واطي
الاب: فسح وهدايا
الام: فاضحة اسرار البيت والراجل اللى هو ابوهم!
الاب: كلام هزار وضحك ووعود بهدايا في حالة النجاح
الام: مشاوير رايح جاي وفلوس كتير على محاميين علشان تجيب رجله في مصيبة وخلاص
الاب: بيوكل محامي "للدفاع" عن نفسه وليس الهجوم
ايتها الست "المنتقمة":
ابنك هايطلع نسخة من ابوه!! انتى محافظتيش على اسرار جوزك ولا على صورته ولا على "رمز" الاب!! بالرغم من ان ابوه فعلا راجل وحش لكن "بغباءك" هاتخليه مثل اعلى بلا وعي!! ابنك مع اول لمسة حنان من اي واحدة هايتشد لها....مع اول واحدة تحسسه ان الراجل له قيمة في حياتها هايروح وراها من غير تفكير!! مع اول واحدة تديه شعور بالامان والاستقرار النفسي هايجري عليها ويستقر معاها --- حتى لو كانت انسانة وحشة وقليلة الاصل!!! ومهما تحاولي معاه ومهما تشرحي له انها ماتنفعش ....انتى هاتبىق اخر واحدة في الكون يسمع كلامها!!!
بنتك مع اول واحد يحسسها بالابوة والدفء والاستقرار هاتروح له ومش هاتعرفي توقفيها عن قرارها!!
عارفة ليه؟
علشان انتى السبب!!!
لكل ست كل همها في الدنيا الانتقام من طليقها ابو عيالها..ارجوكي ارجوكي ارجوكي كفاية!! كفاية تشويه في الرمز وكفاية تشويه في نفسيه الاطفال البريئة .... حاولي قدر المستطاع عدم ذكر الاب بسوء....على الاقل مش على مسمع منهم!! لو جاب لهم اي هدية بلاش "ياما جاب الغراب لامه!!"...لا افرحي معاهم وحسسيهم ان ابوهم ده احسن راجل في الدنيا ولو كبروا شوية وسئلوكي ليه سبتوا بعض....يا ريت اجابة دبلوماسية شوية زي مثلا: اختلافنا وحبينا نفضل اصحاب ...او احنا حاسين اننا مرتاحين كده اكتر بس باباكوا فعلا انسان كويس ورائع....حاولي تمسحي من ذاكرتهم المعاملة الوحشة والمشاهد اللى شافوها في بيتكوا!!
بلاش مجهودك معاهم يروح ويضيع...مفيش داعي يحسوا انك اللى ظلمتيهم فعلا...مفيش داعي للكره اللى هاتزرعيه جواهم لانك الوحيدة اللى هاتحصده!!
بلاش تربي في بيتك كائنات مشوهة ....علشان ماتندميش!!!
ريم اسامة
https://www.facebook.com/groups/329904227056535/
No comments:
Post a Comment