الطاقة السلبية

المقال النهاردة للسيدات فقط...وطويل اوي...انا بس قلت انوه علشان تريقة الرجالة اللى بتحبطني :)

"انا زهقانة جدا مش طايقة نفسي"

بذمتك بتقولي الجملة دي كام مرة في الاسبوع ...لا اسفة...كام مرة في اليوم؟!!! 

حتى لو مش بتقوليها جهارا...بتفكري فيها كام مرة...حاسة انك محبوسة في قمقم ومش طايقاه! 

بتكلمي اصحابك تشتكي من نفس شكواهم...كلكوا زهقانين...كلكوا حاسين بملل رهيب...ومفيش اي ايجابيه في حياتكوا خلاص!

وكل ما تتكلموا لازم تفكروا بعض "انا زمان كنت...." - "فاكرين زمان لما كنا بنعمل كذا كذا كذا بس خلاص بقى!" - "فاكرة لما كنا بننزل كل شهر نشتري هدوم جديدة انشالله حتى بلوزة يتيمة؟ بذمتك بقالك قد ايه ماجبتيش شراب جديد؟"  - "العيال خلاص مش ممكن!! لا بيسمعوا الكلام ولا بيبطلوا زن ولا بيبطلوا طلبات انا كرهت كلمة ماما" - "الرجالة عندهم كمية لا مبالاه يتحسدوا عليها، نفسي اعرف بيجيبوا البرود ده منين!!"

تفضلوا كده تقطموا في بعض وتشدوا بعض لتحت اكتر واكتر واكتر...بعد كل تليفون ولا قعدة من دول تقفلي وكلك يأس واحباط وملل اكتر من الاول!! ولما يجي جوزك من الشغل تعبان ومرهق تفتكري على طول "برود الرجالة واللامبالاه" فتكرهي نفسك اكتر وتكرهي عيشتك زيادة!!

متخيلين كمية الطاقة السلبية اللى بنشحن بعض بيها؟! متخيلين كمية اليأس اللى بنزرعه جوا بعض؟ والاحباط بنضاعفه لبعض!!

صح ولا ايه؟

النهاردة هاقترح عليكوا شوية حاجات نطلع بيها الطاقة السلبية دي (وبكتب المقال ده عن تجربة  وقلت اشارك معاكوا شوية ايجابيات :) )

- على رأي "مامة فريدة" صديقتي (وهي بجد من الشخصيات الاكثر ايجابية في الكون وبتشد من ازر اي واحدة تشتكي لها) لازم كل واحدة تعرف تبسط نفسها ازاي. بلاش نستنى الرجالة يخرجونا ويفسحونا ويقوموا من نفسهم يساعدونا ولا انهم يفضلوا قعدة البيت عن قعدة القهوة (معلش بس شوية صدق...احنا لو عندنا قهوة نروح لها كل ليلة مع اصحابنا مش هانقعد في البيت اصلا) فاحنا من النهاردة "هانطلب" اللى يريحنا...اطلبي من جوزك يساعدك ... بس بلاش يبقى طلب عام ..لا... حددي انتى عايزة منه ايه بالظبط وفعلا هايعمله...بس كلمة "انت مش بتساعدني في اي حاجة" الرد الجاهز عند الرجالة "يعنى عايزانى ارضع العيال ولا اوطي امسح الارض؟"..حددي....مثلا خليه يشيل اي حاجة تقيلة انتى هاتتعبي لو شلتيها (زي الكراسي او زق الكنب او طبق الغسيل)...اكتبي ورقة بشوية طلبات وحددي الكميات والنوع وخليه يجيبها...زقيه يشارك في البيت! بلاش تتوقعي انه هايعمل حاجة من نفسه! 
ولازم على راي صاحبتي الست تبسط نفسها...تخرج من غيره ... خدي عيالك معاكي وخلاص وانتى نازلة اهو احسن من الحبسة في البيت معاهم !! 

- غيري شوية في البيت ...لو دخلتي بيتك وحسيتي ان فيه حاجة جديدة هاتنبسطي تلقائي...حطي زرع في البيت (سيبك من الناس اللى بتفضل تقولك ده هايلم النمل...هوا انتى هاتهتمي بالعيال ولها بالزرع...الخ)...النباتات بتدي حياة للمكان...اللون الاخضر بيريح العين ويهدي الاعصاب...مش لازم تقلبيها المزرعة السعيدة...هاتي يا ستي واحدة كبيرة كده تتصدر الريسبشن او في مكان قريب من باب البيت...تدخلي تلاقيها ...في شجرة ضل اسمها "قشطة" ورقها كبييييير اوي مش بتحتاج رعاية كتير وشكلها حلو. معلوماتي في هذا الاتجاه محدودة بس اسئلي اللى في المشتل. واختاري قصيص شيك تحطي فيه الشجرة او النبات...هاتفرق جدا والله معاكي لو عملتي كده! 
غيري مكان التابلوهات والمرايات...اي تجديد هايفرق معاكي نفسيا. لو بيتك صغير هاتي مرايات في براويز شيك وعلقيها...لو بيتك واسع ممكن تعملي فيه سيرك بقى براحتك....زرع....مرايات ...تابلوهات...ساعة حائط جديدة...حددي حيطة واحدة وجدديها بورق حائط مطرقع...لو معاكي فلوس زيادة ممكن جدا تغيري الستاير! اعملي اي حاجة تقلب البيت شوية علشان متحسيش انك عايشة في قفص!

- غيري ادوات المطبخ....غيري الاطباق (في اطباق جميلة ومودرن جدا ورخيصة في كل حتة دلوقتي) ...غيري الاكواب (بلاش الزجاج الابيض السادة...هاتي حاجة ملونة)....اشتري زجاجات مياه جديدة....وكمان مج جديد "لنفسك" ....اشتري ملاعق خشب وادوات غرف جديدة...طاسة للبيض جديدة...اي حاجة في المطبخ هاتحسي بالفرق بما انك بتقضي ساعات كتير في المكان ده.
حاولي تخلي البوتاجاز نضيف ...لما تطبخي على حاجة نضيفة مش هاتحسي انك متوترة...هاتي مشاية للمطبخ بس بلاش تختاريها قاتمة وكئيبة...اشتري حاجة مفرحة...اشتري كل حاجة المطبخ زاهية ومفرحة علشان ينعكس ده عليكي!! بلاش تستخفي بالكلام جربي وهاتدعيلي!

- في المناسبات زيني البيت...في رمضان حطي حبال النور "جوا" البيت (لو عندك زيادة حطي بره لو مفيش يبقى كله جوا انتى مش هاتسلي الناس في الشارع...انتوا اهم) وهاتي فانوس وكل يوم قبل المغرب نوري كل الحاجات دي ...انا شخصيا جبت قماش الخيامية وعملت منه مفرش للسفرة ومفرش للبوفيه بيتحطوا طول رمضان...مع الانوار طبعا والفوانيس اللى بتدي جو مختلف....في راس السنة هاتي شجرة كريسماس وزينيها (انا عارفة كويس الاعتراضات من بعض الناس دلوقتي بس كل قصدي هنا انك بتغيري لنفسك بيتك!!)....في شم النسيم اسلقي بيض ولونيه وحطيه على السفرة واشتري ورد ورصيه في الفازات في انحاء الشقة....في العيد رصى الكحك والبسكوت في الطبق ابو كام دور ده وحطيه في مكان واضح تحسي ان العيد موجود....في العيد الكبير اشتري بلالين واملي بيها البيت....في اعياد الميلاد زينة وبلالين وخلافه....افرحي...كفاية ملل!! 

- غيري المنظفات اللى متعودة علي ريحتها...او هاتي حاجة جديدة تمسحي بيها الشقة بعد التنضيف...الريحة الفريش الجديدة على مناخيرك هاتخليكي في موود حلو...هاتي معطرات الحمامات...او اضعف الايمان في اقراص معطرة كده بتتباع في حافظة بلاستيك علقيها في الحمام هاتدي ريحة حلوة ...كل ما تدخلي الحمام وتلاقي الريحة الحلوة هاتفتح نفسك تخلي حمامك على طول نضيف.

- لازم وضروري وحتما ولا نقاش فيه انك تروحي للكوافير تقصي شعرك...جوزك بيحب الشعر الطويل؟ غيري الفورمة وخليه على طوله...غيري لونه...اعملي "قُصة"...اعمليه كفتة في الفرن...المهم لازم ضروري تغيري شكله...لنفسك مش لجوزك...لنفسك!!
الشعر ده بالزات بيعمل فرق رهييييب ....مفيش مانع انك تعملي ماسك كده ولا حاجة

- اشتري لنفسك حاجة شخصية جديدة...انشالله حتى ازازة مانيكير ولا روج....هاتي عدسات ملونة تجربي شكلك فيها...هاتي اي حاجة "انتى" تستعمليها لوحدك...بيجامة حتى ...اي حاجة...الجديد بيغير منا اوي وبيشيل كتير من السلبية جوانا!

- بلاش رمرمة عمال على بطَال! استنى ميعاد الوجبة...لو استنيني من الافطار للغدا..هاتحسي بسعادة انتى بتاكلي...انا مش بقول رجيم...ولا نظام اكل صحي...انا بتكلم عن نظام حياة مختلف....كلي كل اللى انتى عايزاه...بس استنى الوجبة اللى بعدها علشان تستمتعى بالاكل....هاتنبسطي والله وانتى بتاكلي...بس لو طول النهار بتحشري مش هاتحسي باي حاجة غير "بالذنب" 

- استعملي البخور في البيت بعد ما تكونى عاملة اكل ريحته جامدة (فتة - سمك - اي مأكولات بحرية - اي اكلات مقلية) - لو البخور بيضايقك اغلى قشر ليمون مع عود قرفة...الريحة هاتروح ...مش محتاجة طبعا اقولك ارجوووكي غيري الهدوم اللى بتقفي تطبخي وانتى لابساها...ريحة التوم والبصل وهيا ماشية معاكي ليل نهار تجيب اكتئاب للبلياتشو!! 

-اشترى شاور جيل غير اللى متعودة عليه....وشامبو مختلف...الروائح الجديدة ليها مفعول السحر

وماتسمحيش لحد يشدك لتحت!! لو حد عايز يشارك معاكي تجربة سيئة او تشتكي ...اسمعيها...لكن ماتسمحيش لحد يقولك "انتى اتغيرتي اوي عن زمان...فين البنت اللى كانت اشيك واحدة فينا ؟" .... ماتسمحيش لحد يحدد انتى فاشلة ولا مكتئبة ولا ضعيفة ولا مستهترة ...محدش يحكم عليكي في حاجة ... لو بتحسي انك متضايقة ومحبطة ومكتئبة فدي "حالة"عرضية وهاترجعي مشرقة زي الاول....متخليش حد يقنعك ان العيال كابوس حياتك ومش هاتخرجي منه غير لما هما يكبروا...ما هم لما يكبروا هايكون شبابك انتى خلص!! اطفالك طبيعتهم كده استحمليهم...زي ما هم مستحملين ام عصبية زي حضرتك!!! وزي ما جوزك مستحملك ومستحمل الشكوى اللانهائية...استحمليه انتى شوية وراعي طبيعته كرجل!!

لو حد نفع معاه حاجة من اللى قلته فوق يقولي يا ريت :) 

ريم اسامة
https://www.facebook.com/groups/329904227056535/