لو معاك مليون جنيه!

لو معاك مليون جنيه فجأة هاتعمل بيهم ايه؟؟؟
طرحت السؤال على جروب المدونة وعلى اصدقائي وكانت الاجابات مثيرة للاهتمام :)
مبدئيا احب بس اقول ان الاجابات كانت مؤشر لحاجات كتير اوي في الشريحة المتوسطة من مجتمعنا...تراوح اعمار الناس اللى جاوبوا على السؤال بين العشرين والسبعين...رجالة وستات وطلاب جامعة...ابهات وامهات وابناء...حاولت اجيب من كل الفئات في الشريحة دي. وكان الاتي:
اولا ناس كتير اوي بمختلف الاعمار قرروا انهم هايطلعوا الحج...ويكفلوا ايتام...ويطلعوا اجزاء لا يستهان بها من الثروة في سبيل الله.
صديق والدي قال انه هايديهم لي :)) يا رب يديلك اتنين مليون...حضرتك مليون وانا التانى :) حضرتك اكتر واحد كريم في الناس كلها :)
الرجال والسيدات في سن ابي وامى معظمهم كانت اجابته جزء للحج ونصف الثروة لاولادهم بالتساوى والباقي:
- فسحة حول العالم.
- عربية جديدة.
- التكفل بايتام.
- يترك جزء من المبلغ في البنك والعائد الدوري يكون للفقراء.
الرجالة كلهم تمنوا العربية الفخمة ومعظمهم هايعملوا مشاريع..كل حسب خبرته (دواجن...ملابس...ادوات رياضية...جيم gym...صيدلية....عيادة) وفي رجالة اختارت انها تستثمر الفلوس في مشروع تاكسيات...او تكاتيك...او العقارات....وزميلي في الشغل قال انه هايفتح بيهم مشروع ويشغل شباب معاه علشان لما يفتح باب رزق لناس تانية ربنا هايفتح عليه ويرزقه اكتر واكتر.
في جزء تانى من الرجالة قالوا انهم هايغيروا الشقة الخاصة بهم...وجزء قال هايخليهم شهادات في البنك بأسم اولاده للمستقبل وجزء هايسيبه للتعليم...وفي جزء قال هايسافر بيهم بره!
الستات بقى...الستات خيالها اوسع شوية :) كل الامهات فكروا في تعليم عيالهم وشقق للذكور ومبلغ في البنك يكبر على ما بناتهم يكبروا علشان الجواز....وقالوا انهم هايسيبوا الشغل ويقعدوا في البيت يربوا العيال لحد ما يكبروا.
تقريبا الستات كلهم قالوا هانجيب عربية جديدة او عربية للزوج...وانهم هايروحوا الحج او العمرة بس الفرق بينهم وبين الرجال انهم هاياخدوا اهاليهم معاهم.
الستات الغير متزوجات كانت امانيهم مختلفة طبعا...منهم اللى هاتكمل دراسة برة بالفلوس...وفي اللى هاتجيب عربية....او شقة خاصة بيها...وفي هاتعمل مشروع لاختها اللى نفسها فيه او مشروع ليها شخصيا على حسب خبرتها برضه او حسب حلمها القديم....وكل البنات فكروا في اهاليهم (هدايا او عمرة او حج او عربية او مشروع صغير او مساعدة اخواتهم في الزواج)
في اقلية اختارت حاجات مختلفة:
- عملية تجميل لخسارة الوزن
- شاليه في الساحل الشمالي
- تعيين مدرب خاص لخسارة الوزن بشكل صحي
-  مساعدة الشباب الغير قادر على تكاليف الزواج وتجهيز شقة والمساهمة في تكاليف زواجهم
- مساعدة الشباب الغير قادر بافتتاح مشروعات صغيرة لهم
معظم الناس المغتربين بره البلد هايرجعوا مصر فورا! "يلعن ابو الغربة".
اختصارا: احنا شعب لسه الخير جواه....ومؤمنين بمبدأ "ساعة لربك وساعة لقلبك" يعنى نلف الدنيا ونشتري ونفرح وفي نفس الوقت نحج ونعمل مشروعات خيرية....وبنفكر لقدام ان كل الناس فكرت انها تشيل لعيالها حاجة تنفعهم في تعليهم او جوازهم.
الغريب في الموضوع بقى ان كان في شوية تعليقات (من جانبي انا ) على اجابات الناس.
مفيش ولا راجل (ولا واحد) قال انه هايجيب بيجامة كاستور حتى لمراته!! ولا واحد فكر في الست اللى طافحة الدم معاه دي!!! لا بخاتم الماظ ولا بعربية ولا حتى بطقم توابل!!! ولا حتى فكر في والدته ولا والده...ولا اخواته! معظم الرجالة اتكلمت عن انفسهم هما فقط لا غير وده يعكس مدى انانية الراجل بشكل عام (ومطلعتش اشاعة ولا حاجة) - بس علشان مابقاش ظالمة الاجيال الجديدة من الذكور هم اكثر انانية بجد!! انما الجيل السبعيناتي الجميل...زي الفل بس برضه محدش فيهم قال اعمل حاجة لمراتي!
ومفيش حد برضه فكر في اخواته....راجل او ست...قليل اوي اللى فكروا في اخواتهم....ومحدش اقترح انه يسدد ديون حد من قرايبه او ديونه هو شخصيا!!
وفي فئة تانية خالص مكلفتش خاطرها تحلم واكتفت بكلمة "مليون جنيه متعملش حاجة...مليون قليل اوي"!!!
ربنا يدينا كلنا...ربنا يحقق احلامنا كلنا:)
وشكرا لكل الناس اللى استجابت وجاوبت :)

ريم اسامة
https://www.facebook.com/groups/329904227056535/