ناس كتير اوي اولوياتها في الحياة اقل ما يقال عنها انها "غبية"!!
يعنى تلاقي الواحد من دول مش لاقي ياكل واهم حاجة عنده يلبس هدوم ماركات عالمية...طيب يا عين مامي ما تشيل الفلوس دي تجهز بيها نفسك ولا تسد الفيزا اللى هاتتسجن بيها قريب دي ولا حتى تساعد اهلك التعبانين في حياتهم معاك دول!
اهم حاجة عنده يلبس حلو وغالي ومختلف! بس النوع ده بيكون فاقد الثقة في نفسه وبيستمد قيمته من قيمة هدومه...ربنا يعينهم!
نلاقي ناس برضه اهم حاجة عندهم الاكل! احسن اكل واغلى اصناف وكل يوم لحوم كتير وكل يوم جبن غالية وكل يوم مخبوزات من اماكن معروفة وجاتوه ولا يخلو البيت من السلامون والصوصات المختلفة للسلاطة واربع انواع عيش وزبدة مستوردة ويستكبروا جدا يجيبوا جبن او مربات او كورن فليكس صناعة محلية..."بلاش قرف!"... انا مش ضد ان الانسان ياكل كويس واصناف حلوة ...اطلاقا...بس مايبقاش ابنها ماشي ببنطلون "مأزعر" وتديه في المدرسة ساندوتش سلامون مدخن! طبيعي جدا ان اول الشهر (في كل البيوت) بيكون مختلف عن نصف الشهر...ومختلف اوي عن اخره! مش بعترض ان كل يوم يكون في بروتين ونشويات وخضار وفاكهة....بس ماينفعش كل دخل البيت يكون موجه للاكل ومراعاة وجود جميع الاصناف بكميات وافرة طوال ايام الشهر بلا اي اعتبار للمظهر العام للاطفال مثلا...او يجيبوا delivery بدل ما يفسحوا اولادهم يغيروا جو! الاعتدال مطلوب علشان الحياة تمشي طبيعي!
وطبعا زي ما احنا شايفين حوالينا في كل مكان...اهم حاجة الموبايل والتاب! كل ما الحجم كبر يبقى البنى ادم ده برستيجه عالي و"ابن ناس"! يبقى الواحد من دول عليه ديون تفلس شركة وجايب موبايل بخمسة الاف جنيه....مش علشان حاجة بس علشان المنظرة!
او واحدة كل اهتماماتها في حياتها هو ديكورات البيت....بالرغم من ان محدش بيزور حد دلوقتي خلاص!! اهم حاجة احدث المرايات واحلى الكريستالات واشيك تابلوهات واجدد اضاءة..مش بعيد تهد البيت كله وتعيد ديكوراته علشان النجف بقى موضة قديمة...الجديد دلوقتي هو الاضاءة الغير مباشرة و"بيوت النور"....والستاير بقى حدث ولا حرج...كرانيش مرة...درابيهات مرة...سجف مرة....وكله بتمنه طبعا. ولازم كل سنة تجيب بطاطين!! ربنا يزيدهم...بس مايبقاش عليها اقساط تهد بلد وبرضه بتجدد في البيت...يا ستي سدي اللى عليكي...هاتورثي الاجيال اللى بعديكي ديون وشوية بطاطين!! مش ممكن حاجة تعصب!
في ناس مجانين اقساط....تلاجة بابين مستوردة ب20 الف جنيه مع اربع شاشات LCD وبوتجاز built in وميكروويف المقاس الجامبو وديب فريزر ست ادراج (مع انها جابت تلاجة شبح بس برضه لازم ييجي يمكن حد يعدى) - طيب كان مالها الحاجة القديمة اللى عندك؟ لا ازااااااااااااااي؟؟ لازم احدث حاجة واجددها.
في رجالة اهم حاجة في الكون هي العربية...في العيد لازم ياخد العربية تستحمى في اي مركز تنظيف سيارات اللى طالع موضة ده ابو مية جنيه! وفي نفس الوقت تلاقيه مش مخطط اصلا يفسح عياله بخمسين جنيه في العيد! العربية تعيًد بس العيال مش مهم! في رجالة اول ما العربية تتخدش يجري بيها عند اول سمكري يشوف له حل...اووووف!!!
وفي مجتمع النادي...تولع الدنيا باللي فيها بس تروح النادي تقابل اصحابها وعيالهم...عيل عيان او سخن او السباكة ضربت في بيتها او مفيش غدا لجوزها او امها عيانة ومحتاجة حد جنبها...يكش يولعوا كلهم...هيا تروح النادي وتاخد لفتين دلع كده في التراك علشان تحافظ على الرشاقة واللياقة وتقعد بعد كده مع حلقة الستات اصحابها يجيبوا في سيرة امة لا اله الا الله ويشربوا فنطاسين قهوة وصاج ساندوتشات...وغالبا القعدة بتكون مرتين في الاسبوع او تلاته...واللى مش عاجبه يلاعب حواجبه! نفس المنطق ينطبق على الراجل اللى ممكن يبيع امه علشان ينزل القهوة في الميعاد المحدد يوميا...ولا بيفرق معاه مراته قاعدة بالقرود هاتفرقع من جنابها منهم ولا انها تعبانة وعيانة ولا ان حد من العيال عيان...خالص...والجملة المشهورة بتاعة جنابهم "والله انا مخبتش عليكي حاجة قبل الجواز انا كده وهافضل كده"...او "انا بشتغل ومن حقي ارفه عن نفسي"...واللى في البيت دول عفش مش مهم يرفهوا هما كمان!!
وفي رجالة بتتعب لو مجابتش كل يوم قهوة من كافيه مشهور متعودين عليه...لازم الصبح يدخل ستاربكس ولا سيلانترو ولا اي حاجة من دول يديها قهوة وياخدها ويروح بيها الشغل...مفيش مشاكل الناس اذواق وربنا يقدر الناس كلها ترفه عن نفسها بشكل مستمر...بس مايبقاش مدي مراته 500 جنيه يقولها اتصرفي الشهر ده في حدود الفلوس دي علشان مزنوق ويروح يصرف قدهم على كوباية القهوة والسجاير اللى بتعدله نافوخه "جاك خابط في نافوخك...جبر يلم العفش" (صعيدي ستايل)
خلاصة الكلام...لو الواحد فينا رتب اولوياته...هايرتاح جدا وكل اللى عايشين معاه هايرتاحوا برضه....الاكل المبالغ فيه واللبس الغالي اوي والديكورات بتاعة المسلسلات والحسوكة في العربيات والشقق...والمشاوير المختلقة اللى ملهاش اي لازمة...او عادة سيئة بتستنزف دخل الاسرة...كل دي ممكن تكون مهمة ولكن صعب جدا تبقى اولويات حياتنا!! اللى اعرفه ان من اولويات الانسان التالي:
- اكل صحي وكويس واصناف مختلفة وعدم الحرمان
- مظهر لائق غير مبالغ فيه
- التعليم الكويس في حدود المعقول (مش هانعيش حياتنا كلها علشان الاولاد يدخلوا مدرسة وبس!)
- ادخال السعادة على اهل البيت
- توفير وقت لاهل البيت والاطفال (وعدم اهمال الوالدين)
- مراعاة احتياج الاضعف او المريض او مساندة الطرف الاخر
- توفير الفرصة للاطفال لممارسة الرياضة
استقيموا يرحمكم الله!
ريم اسامة
https://www.facebook.com/groups/329904227056535/
No comments:
Post a Comment