انتى طالق!

بيتقال ان الطلاق ظاهرة...الطلاق انتشر....خرب البيوت....يتًم العيال مع ان ابوهم على وش الدنيا....كسر قلب الامهات والاباء.

الطلاق موجود من قدم التاريخ...وده طبيعي جدا....اتنين اتجوزوا...حصل تجاوزات او اهانة او غيره...بقت العيشة مستحيلة مع بعض...انفصلوا! عادي جدا!

نيجي للطلاق في بلدنا او في عصرنا الحالي. الاول الطلاق له اسباب كتير اوي اوي...مش هاينفع مثلا اقولك لو جوزك مش بخيل ماينفعش تسيبيه...ما يمكن مش بخيل بس بيضربها...او بيدخل امه في كل تفاصيل حياتهم لدرجة انه يمسكها مصروف البيت (حصلت لواحدة صاحبتي)...مش ممكن اطلب من واحدة جوزها بيخونها مع كل فستان معدي من قدامه واقولها استحملي. ما احنا برضه بشر...اللى ترضاه لغيرك حط نفسك مكانه الاول. ماينفعش اطلب من راجل يكمل مع واحدة بتسرقه  او بترفض تعمل اي حاجة في البيت بداية من الاكل نهاية بالاعمال الخفيفة اليومية اللى من غيرها البيت يبقى جحيم! للتحمل حدود.

بس برضه الجيل السابق (الاباء والامهات) ليهم يد في انتشار نسبة الطلاق الجامدة دي....دلعت الولد....البنت ملهاش غير شغلها....قرشك يا حبيبتي هوا دراعك....العيال مسئولية امهم انما الراجل عيبه جيبه بس...وانتى تنضفي له ليه؟ كنتى الشغالة بتاعه اللى خلفوه؟....وانتى مالك بامه؟ لما تكون امك ابقى استحمليها!....الخ من العبارات المشجعة لبناء بيوت خربانة! غير طبعا ان كل واحد عارف ابنه وبنته كويس...بيخبي عيوبهم الفادحة علشان يجوزهم احسن ناس (حتى لو مايستاهلوش ده)

المهم...ده مش موضوعنا....موضوعنا هو ما بعد الطلاق فعلا.

الست طبعا هاتاخد اولادها...حقها القانونى....وتحرم ابوهم منهم....وترفع عليه قضايا كتير اوي....تبديد قايمة...مؤخر...نفقة...سرقة. وبتخلي كارت الخلع للاخر علشان لو خلعته هاتخسر ماديا كتير اوي.

وهوا يرفع طاعة...رؤية...سرقة برضه ممكن. والراجل مش بيطلق بسهولة بيكون عايز مراته تخلعه لنفس السبب المادي! 

هيا تروح لاهله تفضحه بحاجات عيب جدا تتقال...وهوا يروح لاهلها يحكي فضايح ماينفعش تطلع بره البيت...قليل اوي متربي وبيحترم ان كان في بينهم رباط مقدس! كلنا بنحكي مشاكل او خناقات او حاجات مضايقانا في بيوتنا...بس مش بنفضح الطرف الاخر. في حدود للادب والاحترام...حتى لنفسنا. لما واحد يروح ويقول كلام هايجرح اهل الست نفسهم...بيرضى عن نفسه ازاي بعدها؟ بينام مرتاح انه انتقم؟ ولا بيحس انه حقير وواطي انه طلع سر "مراته"!! مش عارفة مش قادرة احكم عليهم! 

و يتحكم في اي قضية من دول...بيكون في استئناف او رفع قضية تاني في نفس الموضوع لو الحكم مش على مزاج الزوج او الزوجة...ويكون في طبعا شهود زور (ده شائع جدا بالمناسبة وبيتأجروا عادي من قدام المحاكم كمان)...الخ الخ الخ. بيكون عدى وقت طويل جدا - شهور او سنين.

فين الاطفال بقى من كل ده؟ الاطفال في الزبالة! لا هي بتقدر انهم طبعا هايسمعوا جمل عن ابوهم هاتتخزن في مخهم...ولا هي هاتقدر ان صورة الاب في نظرهم تفضل سليمة ووردية...تكره الاطفال في ابوهم...تنشر السم في مخهم انه بيكرههم...وكان بيضربهم (مع انه عمره ما مد ايده عليهم بس بتستغل قصر الذاكرة عندهم) وانه كان بخيل وكان بيضربها هيا كمان! ولو حصل والاب عرف يشوف اولاده هايكرههم في امهم...هايحاول يقولهم مايسمعوش كلام وحش عنه....هيا اللى خدتهم منه...هيا اللى هدت البيت....هيا اللى حرمتهم من ابوهم!

ينفع كده؟

بجد مفيش طلاق محترم حصل قدامي...يمكن حالة او اتنين بس....باقي الحالات كلها مهينة جدا...مفيش طرف بيفكر في الاطفال. لو مفيش اطفال قطعوا بعض براحتكم عادي وانتقموا من بعض وخدوا حقكم لاخر قطرة لان مفيش ضحايا هنا...كل واحد بيدافع عن نفسه وعن حياته وحقه! 

بس شئ من الانسانية لو في اطفال...ماهو مش ذنبهم انكوا اخترتوا بعض غلط...ولا ذنبهم انك خلفتيهم وانتى مش عايزة تجيبي عيال...اولادكم هايكبروا جواهم فراغ عاطفي...اي حد يديهم شوية من الامان والحنان هاينساقوا وراه مباشرة...حتى لو اولادك كبروا وشكلهم قدامك متماسك ومتزن...برضه هايكون جواهم مضطرب اتجاه الجواز.

ليه الراجل بيرفض يصرف على اولاده بعد ما يسيب امهم؟ ياخدهم يخرجهم ممكن...بس مش بيصرف عليهم جنيه....ليه؟؟ هوا انت بتعاقب امهم علشان مقدرتش تستحمل طبعك المقرف؟ ازاي ماتدفعش مصاريف المدرسة؟ طيب بتحرمهم ليه من تعليم محترم انت اختارته بناء على امكانياتك المادية؟ وطبعا الست غالبا بتنقل اولادها من المدرسة الشيك الغالية لمدرسة اقل او في حدود امكانياتها (ما الاول كان الاتنين بيحطوا فلوسهم مع بعض ويعلموا الاولاد - بس دلوقتي بقى في نص الدخل فقط...ده لو كانت الست اصلا ليها دخل).

طبيعي ان الراجل هايتجوز تانى ولما يخلف هاينسى ان عنده اولاد تانيين من ست تانية كانت في ماضيه! بس بيهددها لو اتجوزت هايسحب اولاده منها بالقانون! يا سلام؟!! يعنى انت ليك الحق تبدا بداية جديدة وتبنى بيت وكمان تخلف...وهيا لا؟ لمجرد انك عايز تغيظها؟؟؟ وفي نوع تاني بيتنازل عن حضانة اولادهم مقابل مبلغ مالي كبير (دول بقى احقر نوع) 

وهيا اول ما تعرف انه اتجوز ترفع عليه كوم قضايا تانى...ماهي مش هاتسيبه بقى يتهنى مع الهانم (حتى لو بيصرف عليهم بالمناسبة)...لازم تنكد عليه! طيب ما انتى سبتيه بمزاجك..زعلانة ليه عليه؟

ليه كل طرف بيرفض ان التاني يبدا من جديد؟ انا عارفة انه شعور طبيعي بالغيظ ان احلى سنين الشباب راحت في جوازة فاشلة...والتانى عنده استعداد يبدا من الاول مرة تانية. بس خلاص...ده كان قرار...وكان ليه توابع كتير جدا وقضايا ومحاكم ومستحيل الرجوع عنه. فلو الطرف التاني قرر يبدا من تانى...ملكش دعوة...مش لازم تفضل لعنة الجوازة الوحشة تطارد اصحابها لحد القبر.

لكل المنفصلين او المخلوعين او المطلقين...اخلص باقل خسائر انسانية...بلاش الاطفال في النص حرام عليكم...الست: من فضلك بلاش شوال الفحم اللى جواكي يطلع قدام اولادك او تفسدي صورة الاب في مخهم...الراجل: خليك محترم واتكلم عن امهم بالحسنى او متجيبش سيرتها خالص وبلاش تنتظر منهم يفرحوا لك بجوازتك الجديدة و"باخواتهم الجداد"  واصرف على اولادك حتى يكون لك عين تقابل ربنا! 

اختاروا صح...علشان محدش هايشيل ورث الفشل غير اطفال ملهمش ذنب! 

ريم اسامة

جروب المدونة على الفيسبوك: 

https://www.facebook.com/groups/329904227056535/