للجدات فضل كبير ودور عظيم في حياتنا (نحن معشر امهات اليومين دول)
زمان مكنش في الدور ده تقريبا...الا نادرا...لكن الجيل الحالى يعتمد على الجدات بشدة ...يمكن لان معظمنا بيشتغل والحضانات غالية اوي على دخلنا الشهرى...وبرضه ممكن بسبب ان الجيل السابق (امهاتنا - الجدات حاليا) مكنش في حد بيساعدهم تقريبا في امور اللبيت والاولاد وعانوا كتير بسبب قلة المساندة...فبيعوضوا بناتهم - بيعملوا اللى كان نفسهم حد يعمله معاهم.
وجود الجدات في حياتنا سهل شوية التحديات اللى بنواجهها...زي التأخير في الشغل فالجدة بتاخد الاحفاد وتعتنى بيهم...قلة امكانية عمل المحشى مثلا والاكلات الحلوة دي الا في اجازات اخر الاسبوع...فامهاتنا بتعمل لنا الاكل الجميل ده وناخده على الجاهز نأكل اولادنا واجوازنا...الجدات نبع الحنان حرفيا...الدلع والحب كله.
اولادى بيدلعوا على ماما جامد...يطلبوا حاجات خيالية شوية او متاكدين انى هارفضها...يروحوا يطلبوا منها من ورايا...وهيا تجيب لهم طبعا من ورايا برضه...طول ما امى موجودة فانا مطمنة ان الاولاد بخير وافضل من وجودى انا شخصيا معاهم حتى.
الجدات مدلعوش بناتهم زي ما بيدلعوا احفادهم...وده سر محدش فاهمه...ولا حتى هما....زمان كانت الجدات بيدلعوا اولاد اخواتهم...ولما كبروا بيدلعوا احفادهم....طيب هوا محدش هايدلعنا ولا ايه؟ :D
حبهم للاطفال حب خالى من اي مسئولية...هيا تحبهم وتدلعهم وتأكلهم وتلعب معاهم....بس! انما نفس الجدة لما كانت ام كانت بتربى وتخاف تدلع لايطلع اولادها مش قد المسئولية...وكانت توبخ وتزعق في بناتها....ومتستحملش حرف على احفادها. الام بطبيعه الحال بتخاف تدلع اوي وتخاف تشد اوي وبتخاف تسيب الحبل وتخاف تشده برضه! الام بتخاف!! لكن الجدة قلبها جامد وبتبوظ العيال :)
انا من غير امى غالبا كنت هابقى في حتة تانية خالص....مكان مظلم وكئيب....من غير وقت لنفسى او اى فرصة انى اروح اشتغل او اخرج مع اصحابى او اخلص مشاوير او حتى اشترى اي حاجة من غير الاولاد...ولو قدرت اشتغل فكنت هاعذب اولادى من غير مكان مريح يروحوا عليه بعد المدرسة على ما ارجع من شغلي....او كان هايكون عندي مشاكل كتير اوي في شغلي في اجازة الصيف...واختى كذلك...احنا كبرنا وعندنا بيوتنا...ولكن نعتمد على امى زي ما يكون لسه صغيرين في حضنها وهي مسئولة عننا...في وجهة نظر بعض الناس احنا ستات محتاسة...وقليلة الحيلة....وبنفترى على امنا...ولكن...الحب دايرة....محدش فينا يستحمل التانى يتعب او يعانى....هيا بتساعدنا في حياتنا لان سعادتها في راحتنا....واحنا سعادتنا في وجودها معانا وحب اولادنا المطلق لها...اولادنا فعلا بيحبوها جدا وبيطلبوا منها اي حاجة بلا تردد....في عشم كده بينها وبينهم :D وهي عارفة برضه ان راحة بالنا في راحتها واستقرارها النفسى وفي تجمعنا معاها
لكل الجدات....شكرا على وجودكم في حياتنا...على حبكم وعلى مساندتكم لبيوت بناتكم...على وقتكم ومجهودكم وسعة صدركم
ربنا يبارك لنا في عمركم وصحتكم ويخليكم دايما منبع الحب والسعادة والحنان
ريم اسامة
لينك المدونة على الفيسبوك
https://www.facebook.com/groups/329904227056535
No comments:
Post a Comment