كبسولة زمنية

 عمركم فكرتم في ترك كبسولة زمنية للجيل التالي؟؟

فكرة عجبتنى الحقيقة...هي نوع من العجرفة طبعا ان ذكرانا تفضل موجودة غصب عن الكل :) 

صندوق او علبة او شنطة...اي حاجة....تحتوى على اثارنا ودليل على وجودنا في حياة سابقة.

يا ترى لو اتاحت لكم الفرصة لحاجة زي كده....هاتحطوا ايه في الصندوق؟!

الحقيقة الصندوق ده هايختلف محتواه على حسب العمر والمرحلة...طول عمرى بحب التوثيق...توثيق المناسبات او المواقف المهمة...وعندى صندوق قديم مليان حاجات من طفولتى وبداية المراهقة....فعندى مثلا (زي معظم جيلي) اتنين اوتوجراف...كان موضة جدا على ايامنا في التسعينيات....كل العيلة كاتبة لي فيه...وفي منهم طبعا اللى توفاه الله...لما افتحه واشوف خطهم وكلماتهم...بتأثر جدا...وكلام من اصحابي مبقناش نتكلم مع بعض او الدنيا فرقتنا...وانا كنت كاتبة عند ناس كتير برضه...باقلام جاف ملونة وكنت بلزق ستيكرات رخيصة دهبي وفضي والواااان وارسم قلوب واسهم وبتاع...الاوتوجرافات دي كبسولة زمن في حد ذاتها! ولقيت عندى برضه جوابات من بابا لما كان مسافر وانا طفلة (وهو محتفظ بالجوابات بتاعتنا برضه)....وصور كتير (بطبيعة الحال كانت الصورة مطبوعة على كروت) وعندى هدايا اصحابي من ايام اعدادى.

لو فكرنا نعمل صندوق (كبسولة زمنية) لنفسنا كل عشر سنين...يا ترى هايحتوى على ايه؟!

هاتكلم عن نفسي....لو هاحتفظ بحاجات من اخر عشر سنين في حياتى ...انا شخصيا هاحط فلاشة عليها صور خروجات مميزة...واعياد ميلاد اولادى...وصور رحلات طلعتها...صور لها معنى في حياتى بشكل عام.

هاحط فيه اساور المستشفى (اسورة على معصم الطفل حديث الولادة مكتوب عليها اسم الام والغرفة واسم الطبيب - عندي بتوع اولادى)...واول لبس لبسوه اول ما اتولدوا...مع بطاقات التعارف الخاصة بالمدرسة في مرحلة كي جي...وكمان بعض رسوماتهم ولعبهم الصغيرة اللى بيحبوها.

هايحتوى برضه على يومياتى (انا بكتب يومياتى من كذا سنة - اليوميات متدبس جواها تذاكر سينما او اماكن رحتها...المقالات اللى بكتبها بطبع نسخها وادبسها في اليوم اللى اتكتبت فيه...رسومات اولادى بيرسموها...كروت معايدة...فواتير حاجات مهمة اشتريتها بعد عناء...كروت اشخاص او محلات ذات معنى...حاجات كتير اوي مرفقة جوا اليوميات دي)

اكيد هايكون فيه ابرة كروشيه مقاس 5.5 لان ده المقاس المفضل عندى للشغل....وبكرة خيط من النوع المفضل برضه...مع اول رسمة مرقًمة اشتغلتها (تعبت اوي فيها بصراحة وفيها غلطة بس محتفظة بيها كالنوع من الانجازات العبيطة :) )

هاحط برضه بازل...انا عاشقة للبازل...خصوصا الاعداد الكبيرة (فوق الالف قطعة).

وهاحط كمامة وجه....لان الوباء علامة كبيرة في حياتنا وهانفضل فاكرين الفترة دي طول عمرنا....احنا مرينا بوباء عالمى حصد اعمار كتير...وكان ابتلاء كبير علينا جميعا (ربنا يخلصنا منه باذن الله)

واكيد عدد نصف الدنيا اللى نشرت فيه اول مقال لي على الاطلاق....انا فاكرة يومها اشتريت حوالي خمس نسخ من المجلة ومكنتش مصدقة نفسي من الفرحة...كنت فخورة بنفسي اوي (معرفش على ايه) بس اهو اللى حصل :)

وقرار ترقيتي الى الدرجة الثانية ثم الاولى ثم الاولى أ....وقرار انتدابي بمكان اخر داخل مكان عملي...قرارات مهمة على السلم الوظيفي.

هاحط شوية كتب بحبها....روايات عربي وانجليزي...وكتب اثرت فيَ خلال العقد الماضى...مع مجلد ميكي ومجلات الطبخ (اللى عمري ما بنفذ منها اي حاجة على الاطلاق)

هاحط زجاجة صغيرة للغاية بها رمال من الساحل الشمالى...مع اول مايوهات لاولادى (مقاسات عرايس لعبة)

هانسخ اسطوانة CD او فلاشة باحلى اغانى وموسيقى...عربى واجنبي...في اغانى للرياضة واغانى للكتابة واغانى للمطبخ (ايوة امال هاستحمل ازاي وقفة المواعين القاتلة!)

هاحط فيه فانوس رمضان وزينة رمضان اللى صنعتها بايدي للبيت...مع زينة الكريسماس واعياد ميلاد الاولاد.

واكيد طبعا هايكون في مقلمة كبيرة فيها نماذج من الالوان المفضلة عندى مع كتاب تلوين (متلون طبعا مش فاضي) مكتوب في ضهر كل رسمة تاريخ الانتهاء منها...مع مجموعة من الادوات المكتبية اللى بشتريها بداعى وبدون داعى!!

هاحط دعوة فرح اختى وصور اولادها كمان....اولاد اختى من غلاوة اولادى...ربنا يحفظهم جميعا يا رب.

مش هاحط اي حاجة محزنة...هابقى عايزة احط حاجات مفرحة وبسيطة فرقت معايا في حياتى.

اعذرونى الافكار غير مرتبة زمنيا...والكلام نصه عامى ونصه شبه فصحى..معلش...اللى جه في بالي كتبته :)

اكتبوا لي...هاتحطوا ايه في صندوقكم؟

ريم اسامة

لينك المدونة على الفيسبوك:

https://www.facebook.com/groups/329904227056535