رجل الكنبة

 "مش هيا رجل كنبة؟ بس انا عايزاها ماليش دعوة"

"رجل الكنبة" ده لقب واحدة من اقرب اصحابى لقلبي...واختها اللى قالت لى الجملة دي لما كانت صاحبتى مسافرة فترة طويلة بره مصر...

الحقيقة هى مش رجل كنبة خالص...بس لما اتقال اللفظ ده عليها مرة ضحكت عليه وبقت هي شخصيا تستخدمه لوصف نفسها...هي روحها حلوة...روحها شباب وبتحب الهزار والضحك والاوقات الحلوة...وبتوافق يتقال عليها "مالهاش لازمة" من باب الهزل.

هي شخص عارف حدوده كويس اوى...عارفة امتى ترفض...وامتى توافق...ومن مين تزعل ومين اللى مش ممكن تزعل منه وتديلهم دايما اعذار حتى لو هيا فاهمة كويس انها مش اعذار حقيقية ولكن العشرة مش سهلة برضه تتساب ببساطة كده

وبرضه عارفة كويس اوى مين يتفصل تماما من حياتها بدون رجعة...

رجل كنبة يعنى مالهاش لازمة او مالهاش بصمة او وجودها زي عدمه

احب اقولك لا خالص...بالعكس...انتى فارقة مع كل شخص يعرفك ومع كل حد قريب منك

لانك اولا مش بتوافقى مع اي رأي مش واقعى... مش شرط تكونى موافقة عليه...دايما مش مقتنعة ان في حد طيب للاخر...بترفضى المثالية...رأيك دايما ان مفيش حد مثالى...مفيش حد طيب للاخر...مفيش حد غلبان وساذج...واي حد بيظهر ده بيكون جواه العكس تماما...وياماااا قلنا لك لا طبعا...انتى اللى بتتجنى على الناس...وتدور الايام ويطلع كلامك انتى اللى صح

احنا كتير اوى اللى اتأثرنا بيكي وبرأيك (رغم عدم اقتناعك بده)...هاتكلم عنى انا شخصيا...بقيت ارفض باريحيه اكتر من الاول بكتير...بقيت ماحسش بالذنب لما ارفض طلب فوق طاقتى...بقيت اسأل نفسي الاول هل الحاجة دي هاتيجي عليا ولا لا....ولو هاتيجي عليا ...يا ترى الشخص يستاهل ده؟؟

الاول بجد مكنتش ابدا برفض طلب لحد تقريبا غير قليل اوى (يكون فعلا فعلا بره مقدرتى)...حاليا...لو حاجة هاتيجي عليا وتعملي توتر برفضها واقفل الباب بلا ندم.

بقيت استمتع بالحاجات الصغيرة اكتر من الاول...يعنى ممكن نخرج نقف في اي بنزينه نشرب حاجة ونمشي...ممكن نعمل مشوار تافه جدا (ننقل حاجة مثلا) وبعد كده نشرب حاجة من الكشك ويبقى وقت جميل....

احسن حاجة انك مش من النوع اللى بيستمتع بعيوب الناس...بتقبلي الناس بعيوبها وبمميزاتها...بتتعاملى بدون اي محاولة في تغييرهم وده بجد مهم...لانك برضه مش هاتسمحى ان حد يغيرك! 

دايما بتلاقى مدخل هزلى في اي موضوع جد...نضحك في اشد المواقف احباطا...نضحك على بوست ونسف عليه يومين...بقى في لغه خاصة كده بنفهم بعض منها ونضحك بهستريا...ضحك بنات ثانوى مش ستات كبيرة

روحك هى السر...شعورك ان مفيش حاجة ممكن توقف الانسان عن الاستمتاع بحياته....الشباب بيكمن فعلا في القلب مش في المظهر...استعدادك الدائم للخروجات الصغيرة التافهة المسلية...مش لازم مكان غالى ولا مكان رخيص...مكان مريح مع صحبة حلوة وبس...

مع الجانب السهل الخفيف ده...يكمن جانب يحلل الشخصيات بدقة...واعتقاد دائم ان كل اخفاق اخلاقى لازم وراه مأساه في الطفولة والتربية...

بتهتمى بالسياسة...الادب...الفن...الموضة...اخر صيحات الاكل...المحلات...السفر لبلاد مختلفة والاهتمام بالثقافات واللغات...

احنا بنفتقدك جدا لما تكونى مش معانا...مش ممكن نخرج وانتى مش معانا....اي مكان انتى فيه لازم يكون فيه ضحك وروح حلوة...وكمان مواضيع عميقة ولازم يكون في باب للمناقشة وكل واحد يشارك في الحوار...مش ممكن تتكلمى انتى بس...لازم كل واحد ياخد دور...بدون اى شعور مننا انك بتديري الخروجة والقعدة بالاسلوب الراقى ده

شكرا انك صاحبتي...انك بتسمعينى باهتمام...ومش بتخليني انجرف ورا الاحزان والاكتئاب...

thanks for being you...thanks for being that close 

you mean a lot

ريم اسامة