التحكم في النفس بيكون صعب قدام الناس الجلياطة!
الجليطة منهج حياة...ناس كتير جدا بتفسر الجليطة انها صراحة و"اللى في قلبى على لسانى" والحق مابيزعلش حد..و "انتيى حساسة اوي على فكرة" لو حد زعل من اسلوبهم.
الجليطة الوان ومناهج...ومنها
تتكلمي مع اي حد وتلاقي كلمة غريبة طلعت في النص ومش انجليزي (بما ان الانجليزي لغة متداولة عادي ممكن يتقال كلمة ولا اتنين في نص الكلام وبيكون مفيش مشكلة) وبعدين تتنحي وتقولي انك مش سامعة فتتكرر الكلمة الغريبة تانى..وتكتشفي انها من لغة تالته..فرنساوي ولا المانى...وانتى مش فاهمة وهيا مش عايزة تترجم! يا جاهلة يا بتاعة التعليم المجانى...عيب يا جماعة والله الكلام ده...ومرة شفت واحدة بتكلم البنت بتاعة النضافة وبتقولها كلمتين انجليزي في النص..طيب يعنى ما انتى عارفة ومتاكدة وعلى يقيم تام انها مش فاهمة وبرضه انتى عارفة انها شايفاكي احسن منها وانك حاجة هيا مستحيل توصل لها...مش لازم تحطي على العقدة اللى جواها فيونكة بالكلمتين دول! وكده يعنى انتى حسيتي انك احسن؟ اعلى؟ مختلفة في الثقافة والمستوى الاجتماعي والتعليمي؟ بتأكدي لنفسك ايه بالكلمتين دول؟؟ ... دى عقد نفسية متلحوسة جليطة مش اكتر! شكلك كان وحش اوي على فكرة!
ممكن جدا تقابلي واحدة وقدام الناس عاااااااااادي خالص: انتى تخينة اوي! مكنتيش كده !!
تبقى محتارة تجيبي الشبشب ولا تدلقي عليها الشاي المولع اللي في ايدك..وتلاقي الناس بدات تبص لك من كل الزوايا ويتأكدوا من ملاحظتها الكريمة! حسبي الله ونعم الوكيل يا رب تتخني ما تعرفي تدخلي من باب العربية !
ولما تجيبي هدية لحد ويعبر لك بكل صراحة انها وحشة او عنده شبهها او مكانتش عايزاها اصلا !! "ممكن تديني الايصال هابدلها انا مش عايزة اتعبك! او ممكن اكمل عليها واجيب حاجة تعجبني اكتر" (حصلت معايا على فكرة !!) وبعد الصدمة والاحراج تفتكري انك جايباها في التخفيضات ومش عايزة الست تعرف انك موفرة فلوس وان طبعا كان في حاجة احلى واغلى في المحل بس امكانياتك مسمحتش...وشكلك هايبقى وحش اوى..وتقولي ان الوصل ضاع منك..وهيا تصمم برضه انها تروح المحل تحاول معاهم بس اوصفي لي المكان.
وعادي خالص خالص بعد طول غياب واشواق تتفقي على خروجة انتى وواحدة صاحبتك وتلاقيها جايبة بنت خالتها معاها من غير ما تقولك من قبلها ! علشان بنت خالتها زهقانة ونفسها تخرج وقرفانة من البيت والعيال وصاحبتك قررت تعرفكوا ببعض علشان هيا "ظريفة خالص وقعدتها جميلة" وتكتشفي ان بنت خالتها دمها يلطش بس مضطرة تكملي القعدة علشان صاحبتك...وطبيعي صاحبتك هاتهتم اوي بقريبتها وكمان تسليها بالحكايات المحرجة القديمة بتاعتك انتى وهيا والذكريات المؤلمة اللى محدش عايز يفتكرها او اللى انتى مش عايزة تسمعيها تانى!
تاخدي حد من اولادك خروجة مع اصحابك او زمايلك في الشغل...ويكون التعليقات التشجيعية عن البقعة على التيشيرت و"شيل ايدك من مناخيرك يا حبيبي عيب لحسن ماما تاخدك وتمشي!".."ضوافرك طويلة ليه...الشيطان بيقف على الضوافر (!!!!!!)"..."بتقرقض في ايدك ليه كده يجيلك اسهال وتاخد حقنة!"...."يا حبيبتي هوا ماله ساكت كده..هوا بيتكلم اصلا؟"...."انت مكسوف ليه انت مش راجل على فكرة.. البنات بس اللى بتتكسف!"..."اسمك ايه؟ ايييه؟ يابني علًي صوتك في ايه احنا هاناكلك!!"...."ما تروح تلعب مع العيال ولا انت خايف؟ شكلك جبان وبتخاف!!"....ايها الاصدقاء...تبا لكم!!
وايه المشكلة لما تروحي في حتة وتلاقي حد بيقولك "بوز جزمتك مقشر!"...يا ستي اتخبطت في الرصيف وانا جاية فقشر البوز!! ويكون الرد "ممممم...ممكن برضه!"...يا ساقعة!
لو حصل ولقيتي نفسك ماسكة مشروع صغير...اكسسوارات او بيع اي حاجة او اشغال يدوية واتعاملتي مع الناس هاتقابلي نماذج عمرك ما كنتى تتخيلي انها اصلا موجودة ان ممكن حد بكل بساطة يقول كلام ناشف كده ولو بعتي حاجة لاي حد واتكسرت او اتقطعت..عيب استخدام عادي ممكن يعنى...ما انتى مش هاتمسكي كل حاجة وتشدي في اللى خلفوها من جميع الجهات علشان تتاكدي انها قوية وبتستحمل! وتسمعي عن غياب الضمير وانك نصابة وهاتي فلوس يا هافضحك (كل ده على انسيال ب 15 جنيه مثلا)...ولو بعتي لحد مكياج او كنتى بتتعاملي مع الشركات ام كتالوج بتجيبي منها حاجات للناس...وحد فيهم جاله حساسية من قلم الكحل الاخضر....دعاء من القلب ان ربنا ياخد نظرك علشان الحساسية اللى جت لها !
في النهاية احب اقول لكل شخص جلياط...لسانك مدهون سم بس في النهاية بتحط في بؤك انت....وهاتموت مسموم بقلة الذوق وهاتموت وحيد من غير اصدقاء....اتلم من دلوقتي احسن لك!!!
عالم سخيفة
ريم اسامة
جروب المدونة على الفيسبوك: https://www.facebook.com/groups/329904227056535/
