بواب الشقة

الست تعتبر بواب الشقة في نظر الراجل!

الست بيتوجه لها مجموعة من الاسئلة هي فقط اللى لازم تعرف اجابتها

من ابرز الاسئلة او الاكثر شيوعا

- فين الريموت؟ 

- مين ساب النور مفتوح؟

- مين ساب الحنفية مفتوحة؟؟

- مين ساب غطا المعجون مفتوح؟

بصى هوا اي حاجة مفتوحة انتى لازم تعرفي اتفحت امتى  ولية ومين فتحها وليه مقفلهاش تانى!! لازم تعرفي لازم!!

- مين خد المقص من هنا؟

- مين ساب باب التلاجة موارب؟

- جزمة مين اللي في الصالون دي؟

- فين معجون الحلاقة؟ (سبحان الله في اسئلة الرجالة بجد)

- الشقة كلها دبان ليه كده؟

- بتصل بالولد الكبير ومش بيرد على الموبايل! هوا فين؟

- فين الجينز الغامق اللى "انا" كنت لابسه امبارح (انا اعرف بنطلونك فين ليه؟؟؟)

- فين نضارتي؟ (بتاعته برضه!)

- فين الملح (على الغدا...هوا عارف الملح فين كويس اوي...بس انتى اللى هاتقومي تجيبيه علشان انتى اللى كان لازم تفتكري تجيبي ملح من الاول!!!!!)

في نوع اخر بقى من التعليقات واللى طبعا بيكون المغزى منها التنفيذ زي مثلا

- في حاجة مدلوقة في المطبخ (ماهو مطبخك انتى بقى...لوحدك....مكتوب بأسمك ولو حد قرب من اي حاجة هاتزعلي!!! والله دماغهم فيها افكار غريبة جدا!! متخيل ان المطبخ ممتلكات شخصية عيب حد يمد ايده...الا اذا كان داخل يرمي لك حاجة فيه!!)

- في مواعين كتير في الحوض! (اجري بقى واتكفى على وشك علشان تفضي الحوض!! هوا هايبات فيه الظاهر الليلة دي ولازم يفضى دلوقتي!!)

- ايه القرف ده؟؟ - دي جملة بتتقال بصوت عالي في اي حتة في الشقة - اتلهى على عينك واجري شوفي ايه عامل له الاذى النفسي الشديد ده! غالبا بتكون اوضة العيال...بتدخل اوضتهم ليه؟؟ ما تخليك في حالك! 

- ايه الريحة دي؟؟ - تفضلي انتى تشمي في الشقة وفي هدومك لحد ما تدوخى...في الاخر يطلع عود بخور من الجيران...هوا قال ايه الريحة دي بس محددش هيا حلوة ولا وحشة...لو كان مثلا قال ايه الريحة الحلوة دي مكنش هايقرف حد معاه وكنتى يا مسكينة مثلا افتكرتى حلة البامية قالبة العمارة من حلاوتها...بس ازاي؟؟؟ ازاي يكون عنده ملاحظة ومتحتاريش!! لازم تحتاري طبعا!! انتى هنا بواب!! لازم تعرفي كل حاجة بالسنتى!

مش مهمة الست ابدا تعرف كل همسة ولمسة وهفوة في البيت...هي عايشة هنا معاك...انت مش ساكن "عندها"...انت شريك في الكيان ده...شيل حاجتك بنفسك علشان متسئلش وترجع تزعل....وشوف حد غيرها اسأله الحاجات المملة دي...او حاول مثلا لو في حاجة مضايقك انك تغيرها بنفسك...عادى بجد مش ضد الرجولة...الست بتدور في خلاط ما يعلم بيه الا ربنا (على راي اختنا سوزي)...حقيقي مش ناقصاك!!

فين الموبايل عايزة اعمل شير؟

ريم اسامة

لينك المدونة على الفيسبوك

https://www.facebook.com/groups/329904227056535

جوا كل راجل عصفورة صغيرة!

الرجالة ببتعاطى حرية!!!

اه والله...لو عنده اي فرصة يفك من اي التزام لا يتردد...بسرعة الضوء بيكون فاكك!

وفي نفس الوقت بيرفض ويقاوم حرية مراته!! سبحان الله يا اخي في طبعك الغريب!! حلال ليك وحرام ليها؟!

ده لو نزل يشتري علبة سجاير يبات بره....ده لو كان رايح يجيبها من المصنع طازة من على سير الانتاج كان رجع بدري عن كده!!!

طيب بتتجوزوا ليه؟؟ تاخد واحدة وردة مفتحة بتخرج وتتفسح وترغي في تليفونها براحتها وبتلاقي امها بتخدمها (بطبيعة الحال)...تاخدها انت تسففها التراب خدمة والتزامات...وانت تخلع تدور على حريتك المفقودة!!!

بتتجوزوا ليه؟؟

جوا كل راجل عصفورة صغيرة عمالة تصوصو في مخه علشان تخرج...تصوصو علشان مكانها في الهواء الطلق مش في البيوت!! فهوا يا حرام بيخرجها بقى بدل ما يجي لها اكتئاب!!!!!!!

علشان كده الافران بالليل كلها رجالة...بيفسحوا العصفورة!

الفينو والزبادى وطلبات السوبر ماركت بتاعة اخر الليل هي الحجة اللى بيعدى بيها على القهوة ويعدى على اي كائن حي يعرفه في قطر عشرين كيلو متر من بيته....وبعد ما يخلص لف وفسحة العصفورة يرجع يجيب العيش او الزبادى...ويجيب حاجة حلوة لمراته علشان متزعلش!! طيب ما انت عارف انك بتزعلها كل ليلة....بتصمم ليه على زعلها!!

حرية صوصوصوصو حرييييية حرية!! نداء عقله الباطن وغير الباطن!!

في الحظر الرجالة كانت بتموت حرفيا من الحبسة...مفيش حاجة يروح لها...لا قهوة ولا اصحاب ولا حتى يمشى العصفورة بعربيته...في حظر يا بيه! احسن!!

ستات كتير اوي كانت في قمة السعادة والانتصار وهيا شايفة الراجل بيدبل في البيت زي الزرع اللى اصحابه سافروا ونسيوه في بلكونة شمس! 

بس الرجالة تحايلت على الحظر طبعا...وبقى في كل منطقة نقطة التقاء...كل واحد يجيب مشروب او علبة سجايره ويقفوا في حلقة واسعة (تباعد اجتماعى بقى وكده) وحد ساكن جنبه جنيه فالرجالة بتنزل بكراسي البحر يقعدوا عند سور الجنينة مع المحافظة على التباعد الاجتماعى برضه...لا العصفورة كانت عاملة شغل بصراحة!!! 

مهما كانت الظروف...برضه الراجل هايخرج ويسهر حتى لو وقف على الرصيف!!

وفي خلال الشهور دي..مخرجش مراته ولا مرة!! يقولها الكورونا!! الحظر...المرض...خايف عليكي...مناعتك قليلة واخاف تتعدى!! وبعدين ما كل الاماكن مقفولة ولا عايزانا نقف على الرصيف؟! ولو اقترحت انها تنزل...مرفوض طبعا...المرض!!!

طيب يعنى هوا المرض نازل على مقاس الستات بس؟؟ الرجالة لا؟!!

معظم الستات ماشافوش حد من شهور بجد مش مبالغة فعلا

على فكرة...الكلام ده مش من محض خيالي...الكلام ده حقيقي جدا!!

الحظر اتعمل علشان الستات تتحبس اكتر ماهى محبوسة.

الراجل جواه عصفورة...والست جواها شجرة...لا بتتحرك ولا بتروح في حتة...تطرح في مكانها وتحمى العصافير وتضلل على البيت وهيا ساكته وخلاص!!

حرييية بقى حرية!!

ريم اسامة 

لينك جروب المدونة على الفيسبوك

https://www.facebook.com/groups/329904227056535

الرد الالى!

كان زمان عند الناس كلها تقريبا انسر ماشين answer machine لما نكون بره البيت وحد يتصل يقدر يسيب رسالة...فلما اي شخص يتصل يسمع رسالة من صاحب البيت (احنا مش في البيت سيب رسالة) - او (ناسف لعدم الرد رجاء ترك رسالة)...اي حاجة بقى من هذا القبيل

رجالة كتير اوي بقت انسر ماشين ودى حاجة مستفزة الى حد كبير!!

مثلا الست تسال جوزها سؤالها اليومي الابدي "بتحبنى؟" يقولها "ماليش غيرك" - هوا بيجاوب من غير ما يفكر...ممكن يكون بيخونها اصلا بس هوا خلاص ارتاح للاجابة اللى بتسكت الست...سؤال يومي واجابة نموذجية! هيا بتفرح بالاجابة دي ولو مكانتش بتعجبها وتريحها نفسيا مكنتش سألت!

او مثلا سؤال "عجباك؟" على واحدة معدية تعجب اي حد اصلا...يقولها الاجابة النموذجية الالية "هوا حد يعجبني غيرك؟" او مثلا يقولها "ماليش في المسلوق"...اخر اجابة دي بقى بيضرب عصفورين بحجر...يعنى الصاروخ مش عجباه ..وكمااان عاجبه غصن سيد قشطة بتاع مراته...راجل لعيب فعلا!

سؤال "عجبك الاكل؟" - ممكن يكون مش اوي او ناقص ملح او اي حاجة (وارد يعنى عادي) فيقولها "جميل" فتزيد في الرخامة وتساله "امال مقلتش حاجة يعنى"...يجاوب "ماهو من حلاوته فضلت اكل ونسيت اقولك...بس كنت هاقولك طبعا لما اخلص"

الرجالة مش خايفة مننا....الرجالة مش عايزة وجع دماغ...لان اي اجابة غير نموذجية هايعقبها اسألة...وتفكير في اجابات ترضى قنبلة الهرمونات اللى قدامه...فهوا بيريح دماغه...ويبسط المدام...ويا دار ما دخلك شر!

في طلبات برضه بيكون الرد عليها توماتيكي

عايزين نغير ستارة الحمام: اول الشهر

عايزين نجيب لبس صيفي للاولاد القديم صغر عليهم: اول الشهر

عايزة ابعت السجاد يتغسل بره: اول الشهر 

السباك محتاجينه علشان السيفون باظ:اخر الاسبوع 

المروحة باظت عايزين نوديها تتصلح: اخر الاسبوع

الفرامل بتصفر محتاجة تروح الميكانيكي: اخر الاسبوع 

عايزين نودي العربية تتنضف في الكار كير: اخر الاسبوع 

في خصومات حلوة اوي على الشتوى ما تيجي ننزل نتفرج: لما اقبض

شفاط المطبخ اتحرق عايزة اجيب غيره ضروري: لما اقبض

عايزة اروح الكوافير: لما اقبض

ما تيجي نتفرج على فيلم: بكرة

عايزة اجيب حاجات من الخضري: بكرة

العيال عايزين ايسكريم: بكرة

هما كده...هوا بيأجل علشان لو عمل الحاجة من اول مرة ممكن يتقال عليه (بيمشي ورا مراته) ولا حاجة...هوا لازم يأجل...لازم!

لازم ريقك ينشف علشان الحاجة تتعمل او تيجي...هوا بيتبع سياسة شوَق ولا تدوَق! تتعشمي اه...الحاجة تيجي لااا دي مسألة تانية خالص!!

هيا هاتيجي...بس لما يجي لك زهد في الدنيا وفي الحياة وتكونى دورتي على بديل رخيص غير عملي وغير مريح بس اهو بديل وخلاص!!

ولما تتكلمى يديكي رد "آلي" في عينك "هوا انا قلت لك لا؟؟؟" - وتردي تقولي ماهى الحاجة مجتش فيرد عليكي "قلت لك اول الشهر!! هوا لسه اول الشهر جه؟" - غالبا بتزهقي من المناقشة الخامسة من نفس النوع في خامس شهر على التوالي (اول انهى شهر يا جدع طيب؟؟) وتستمري في استخدام البديل القمئ اهو بدل الفرهدة من المناقشة اللى مالهاش نهاية ولا طائل ولا حل!

الغريب بقى اننا لما نرد عليهم بشكل الي (من باب لفت النظر) هما مش بيتضايقوا!!!!! وبقى كل ما ينزل يقولك "عايزة حاجة غير الفينو وعصير للمدرسة والحاجة الحلوة بتاعتهم؟" - لا ماهو مفيش...فتقولي لا

يعنى حتى لما يسألك مش بيدي مساحة تتكلمى وتطلبي...هوا بيقفل عليكي مجال الكلام....سبحان الله في طبعهم! 

ريم اسامة

لينك المدونة على الفيسبوك

https://www.facebook.com/groups/329904227056535

نشاطات الكورونا

الاعداد المصابة في تزايد بفايروس كورونا

وبالتالي القعدة في البيت بتطول وبقى معانا عدد ساعات طويلة بلا اي هدف

فقلت اشارككم بعض النشاطات اللى ممكن نستغل بها الوقت بدل القعدة على الفيسبوك واللذي منه

معظم الستات عندهم فرصة ذهبية لترويق الادراج المهملة ويطلعوا المستخبي...او اللى احنا بنطلق عليه "يمكن ينفع"..."يمكن ينفع" ده شوية حاجات سليمة لكن مالهاش لازمة ولا لها استخدام وخسارة نرميهم....فبالتالي بنحشرهم في اي درج او ضلفة مهملة...جنبا الى جنب "نصلحه بعدين"...بنطلون الاستيك بتاعه باظ فنشيله لحد ما نركب له استيك...بلوزة ناقص لها زراير...جوب محتاجة سرفلة الديل..وهكذا...جه الوقت انك تتخلصي من اللى مش بتستعمليه (ومش هاتستعمليه) وكمان يا تصلحى الهدوم دي يا ترميها او تشحتيها...اصل كده كتير!!!

ثانيا النيش...ستات كتير مش بتهتم اوي انها تفضيه وتلمعه...ده الوقت تطلعي التراث ده وتلمعيه وتنضفيه برضه

هانلاقى ان التنضيف كتير جدا....تلميع النجف - نفضي ضلف المطبخ ونروقها من الاول ونعيد الترتيب...فرز لعب الاطفال...وتحت السراير وحاجات كتير اووووي بتحتاج وقت ومجهود...والوقت متوفر...يبقى نقسم المجهود ونخلص الكلام ده! 

دي المهام السخيفة بس بنحس بارتياح لما نخلصها.

ممكن نبدأ نقرأ...القراية دي حاجة حلوة جدا...الكتاب يقدر يخرجك من اي حالة انت فيها...بتنتقل بكل تركيزك ومشاعرك لحياة ناس تانية وتدخل في تفاصيل عيشتهم وكمان تبدا تفكر في حلول لمشاكل تواجه الشخصيات في الرواية. 

وممكن الفرجة على الافلام والمسلسلات الاجنبي تنمى اللغة جدا...لما كنت في الكلية كانت الدكاترة بتقول لنا لو عايزين تتكلموا لغة كويس اسمعوها.

طبعا متابعة المسلسلات والافلام بتخلي الواحد يفصل تماما عن الواقع...انتقاء المحتوى مهم علشان الفرجة تبقى مفيدة برضه في نفس الوقت.

ممكن نشتري اي اجهزة رياضية (حتى بالتقسيط) ونمارس رياضة ولو جزء قليل من الوقت في البيت .

ولو حد عايز يتعلم اي شغل إبرة فهو ده الوقت المناسب...ادخلوا على النت واتعلموا بهدوء وطول بال. او تعلم اي هواية يدوية تانية...انا حاليا بحاول اتعلم لوحات الخيوط...دى بتكون رسمة...بتتثبت على خشب...وحدود الرسمة ندقها بمسامير...يعنى حدود الرسمة بتكون مسامير...نشيل الورقة...ونمشي بالخيط بين رؤوس المسامير دي....لوحات جميلة وشيك.

ممكن كمان تجربة اكلات جديدة...اصحابي خبزوا عيش في البيت من باب التجربة :)
وفي كمان البازل...كل ما البازل كانت عدد قطع اكبر كل ما كان التحدى اعلى اننا نخلصها... واجمل حاجه فيها انها جماعية...افراد الاسره كله بيشارك يخلصها

وانتوا عملوا ايه في الحظر؟ شاركونى نشاطاتكم وازاي قضيتوا الوقت ده كله :)

ريم اسامة

لينك المدونة على الفيسبوك: 

https://www.facebook.com/groups/329904227056535/

بوز الحظر

كل الرجالة قعدت في البيت خلاص....مفيش قهوة ولا جيم...مفيش اصحاب...مفيش تجمعات من اي نوع...مفيش سفر...مفيش غير البيت!!

حتى لو مفيش قهاوى كان ممكن الرجالة تقف سوا في اي شارع عند اي كشك مثلا...او يتجمعوا في اي بيت...لكن جه الحظر وقتل اي امل عندهم! لا مفر من البيت والست والعيال!!! 

يوميا تقريبا بسمع خناقات من العمارات المجاورة...هيا مش خناقات بين طرفين...هيا اصوات رجالة بتزعق!!! 

بعد ما كنا بنسمع صوت الستات بتزعق في العيال من قهرة قلبهم في المذاكرة معاهم...بقينا نسمع صوت الرجالة وهيا بتعافر للبقاء في وجود كائنات مزعجة مايعرفش عنهم حاجة غير اسمائهم تقريبا!

الحقيقة ستات كتير اوي شمتانة...حقنا بصراحة...ما احنا برضه ريقنا نشف من طلب المساعدة واننا نقعد سوا وان الراجل يقعد في البيت مع اولاده علشان يلحق بس اي حاجة من طفولتهم اللى بتخلص وهوا على القهوة!

الرجالة يا عيني صدمتهم كبيرة...اكتشفوا ان في عالم كامل جوا بيته وهوا ولا داري...اكتشف ان البيت له نظام مختلف جدا عن اللى كان متخيله!! لاول مرة بيكتشف ليه مراته كانت بتزعق! وليه كانت بتشتكى (وكان بيتهمها بالتقصير وقلة الحيلة مع شوية اطفال!) اكتشف ان صعب السيطرة على طفل...صعب التكيف مع الدوشة وصوت الكارتون العالي وصوت العابهم وخناقهم ونقارهم طول اليوم...الاكل بالعافية وغالبا مش بيعجبهم اي اكل....فهم ليه مراته كانت بتعمل صنفين خضار...او ليه بتعمل حلة مكرونة صغيرة جنب الرز....عرف انه ظلمها جدا لما اتهمها بالاهمال ودلعها الزيادة لهم وبطل يقول "الاكل اللى موجود يتاكل واللى مش عاجبه يتفلق"....فهم ان احنا اللى بنتفلق والعيال برضه مش هاتاكل غصب عنهم!! وان مراته فعلا جربت كل الحيل والطرق انها تعمل صنف او صنفين بس ويتاكلوا....وقررت تعمل اصناف متضاربة بعد ما كل الحيل فشلت واكتشفت انها معركة خاسرة وفعلا مالهاش لازمة !!! (ما انت مش بتاكل الكوسة لما مراتك بتعملها على الغدا...وكمان بتتقمص منها)

الراجل بقى مركز اوي مع التنضيف والطبيخ وعدم سماع الكلام (من جانب العيال) وكمية الحلويات المستهلكة في البيت...وشفط باقات الانترنت بشكل هستيري!! الراجل بقى عنده الف سبب يتعصب علشانه...والوباء قلل من النزول ومنع الزيارات وقفل اي منفذ للترفيه خارج البيت!! معلش سيبي الراجل يتعصب شوية من حقه برضه...ما انتى قرفاه من ساعة الجواز بالعصبية والنرفزة..حقه يا فوزية يعبر عن نفسه!! معلش!!

بوز الراجل بقى المنظر العادى بتاع كل يوم...خصوصا بالليل...هايروح فين؟؟ يقف على السلم؟ ولا قدام العمارة؟؟ حتى لو عمل كده...هايقف كام ساعة؟ هايرجع برضه! لا مفر

بقى يعبر عن حاله وعن يأسه وزهقه بالبوز...البوز حق لكل راجل محظور في البيت!!!

الكورونا جمعت شمل العائلات...وزهقت الرجالة!!

نصيحه...اشغلي نفسك باي نشاط منزلي بعيد عنه....علشان لو مسك في خناقك انتى...ياللا السلامة!!!

بوز سعيد!!

ريم اسامة

لينك المدونة على الفيسبوك:

https://www.facebook.com/groups/329904227056535/

الكومودينو

مقال النهاردة في حب قطعة اثاث!! 

بالنسبة لي من اهم قطع الاثاث في البيت هو الكومودينو بتاعى!

واعتقد هو مهم لمعظم الناس...ده قطعة اثاث شخصية ولها خصوصيتها

الموقف بيختلف حسب العمر والنوع والمرحلة كمان.

يعنى لما كنت صغيرة كان برضه جنبي واحد وكان عليه حاجات مهمة بالنسبة لى وقتها...ولما كبرت المحتويات اختلفت...لما اتجوزت....ولما بقيت ام...كل مرحلة واختلافها ....ويبقى للكومودينو اهميته!

طرحت سؤال "بتحطوا ايه فوق وجوا الكومودينو" على صفحة المدونة على الفيسبوك...وجالي اجابات كتير.

نقدر نقول ان الاغلبية لازم بيحطوا اباجورة عليه....لازم الاباجورة بجد مهمة...ومعظمهم قال زجاجة مياه وجزء لا بأس به قال ان جواه بيتحط اي حاجة مالهاش مكان....او منتظرة قرار التخلى او الابقاء...وادوية واوراق شخصية

الكومودينو مساحة خاصة...ده اللى بتشوفه اول ما تقوم من النوم....وتغمض عينك وهو اخر حاجة برضه...بالنسبة لي يمثل اهمية في حياتى...لما بسافر اي مكان لو مفيش كومودينو ادور على اي حاجة اعملها كومودينو...وانقل اي اباجورة من المكان وتتحط جنبي!

انا شخصيا جنبي في اباجورة طبعا...وعلبة مناديل ورصتين كتب وروايات (منتظرة دورها في القراءة) ومجلات ميكي ومجلات عادية ومصحف...واحنا بنوضب الشقة صممت يكون جنبي فيشتين (جمع فيشة) وانا افتكر انها كانت خناقة لان الكهربائي كان خلص شغله وكان في فيشة واحدة فقط....لا معلش انا مش هادخل الشقة دي الا لو كان جنبي اتنين :) ودخلنا في نقاش وجدال وتصميم من الطرفين - وانا كنت فعلا منفعلة على حاجة ممكن تتغير عادي...ابدا....تتعمل قبل ما نعيش هنا...الحمد لله قرر يكبر دماغه ويغير الفيشة....ماهو واحدة للاباجورة وواحدة للشاحن!! افرض محتاجة الشاحن والاباجورة في نفس الوقت...او شاحن اللاب توب والاباجورة....انا مش عايزة عكننة...لازم اتنين ماليش دعوة!!!

وجنبي كريم يد وكريم تجاعيد العين...سماعة صغيرة...نظارة القراءة احيانا...مفكرة السنة الميلادية اللى احنا فيها...ووعاء صغير جميل زجاج...بحط فيه الدبلة قبل ما انام...ولو باخد اي ادوية في اي فترة بتكون جنبي طبعا.

الادراج بقى...عندي اتنين...البعيد عن ايدي فيه محافظ كتير ونوت جديدة...والدرج الاقرب لى فيه اي حاجة بحتاج استخدمها وخايفة تضيع...اوراق...مبارد الضوافر والحاجات اللى زي دي...ولازم يكون فيه توك شعر واقلام وبعض الاسطوانات اللى خايفة عليها من ايد العيال! معظم الدرج حاجات صغيرة بخاف تتوه فى البيت.

الستات اللى عندهم اطفال جنبهم مرهم التسلخات وببرونة وواحدة او اتنين بامبرز علشان الطوارئ وسط الليل...مناديل...مناديل مبللة (وايبس) وممكن سالوبيت او اي قطعة ملابس احتياطى بدل ما تقوم تدور في الدولاب.

البنات بيكون جنبها اكيد الموبايل بالشاحن اساسي...ممكن مجلة او رواية لو بتحب القراءة...ادوات تجميل...برواز (لاحظت بنات كتير بيكون جنبهم صور لممثلين او لافراد من العائلة او الاصدقاء)

الرجالة تفاصيلهم اقل بكتير مننا...بكتير اوي....الاباجورة (اللى غالبا ست اللى حطاها) ومحفظة ومفاتيح ونضارة الشمس واي ورق...ولو هو بيحب القراءة هانلاقي كتاب واحد او اتنين بالكتير جنبه...وطبعاااا لازم الريموت يكون معاه مش مع الست...ريموت التكيف او التليفزيون!  والادراج غالبا واحد بيكون شرابات والتانى كراكيب وورق مستنى حد ينظمه او يصنفه...وساعات الست بتاخد جزء من الدرج او الضلفة الخاصة بالراجل كمان (افتراء)

يظل الكومودينو قريبا لقلبي...وقطعة اثاث لا غنى عنها.

ريم اسامة

الوقت

مع الازمة الحالية (فايروس كورونا) وكلنا في البيت وكل اللى بيشتغلوا قعدوا برضه في البيت (او على اسوأ تقدير بيشتغلوا جزء من الاسبوع)..اكتشفت ان عندي مشكلة كبيرة...مكنتش ملاحظاها قبل كده!

دايما كل يوم (الايام العادية قبل الفايروس) بيكون في خطة للوقت...علشان اليوم يكفي اعمل كل اللى انا عايزاه...اروح الشغل وانجز شغلي وارجع البيت وانجز شغل البيت ومذاكرة الاولاد والتمارين ومشاوير البيت ومشاويري الخاصة وفي نفس الوقت كنت دايما (ومازلت) احرص على ممارسة هواياتي الكتير - لان الهوايات هى الحاجة الوحيدة اللى بتخليني في حالة من التوازن.

حاليا...مع وجود الوفرة من الوقت...برضه ملازمنى احساس "مفيش وقت...لازم الحق"...الحق ايه انا مش عارفة...بس هوا لازم الحق!!

لاول مرة اكتشف ان فعلا عندي مشكلة كبيرة مع فكرة الوقت! ملازمنى التوتر...والارق كمان لانى ضيعت وقت النهاردة ومخلصتش كل اللى كان المفروض اخلصه!

اكتشفت ان احنا اقسى عدو لينا....الواحد بيجلد نفسه حرفيا علشان مخلصش اللى كان مخطط له...نسينا اننا بنحط اصلا خطة صعبة....هيا مش مستحيلة ولكن صعبة...الراحة مش جزء منها.

هاتكلم عن نفسي....مع الاجازة الممتدة دي بقى نظام النوم مختلف تماما....سهر للفجر وصحيان على الضهر...ده في حد ذاته مسبب توتر شديد...بقيت اظبط المنبه...اقفله واكمل نوم...ما انا محتاجة النوم...اصحى متضايقة من نفسي ان كان زمانى خلصت كذا وكذا وكذا بدل ما انا نايمة كده...وكان زمانى خدت وقت الصبح من غير الاولاد كنت خلصت اسرع في وقت اقل ومن غير زن وصداع.

واكمل اليوم كده على وعد لنفسي ان بكرة اصحى بدري...لازم اصحى بدري.

وبما ان البيت كله صاحى - بفضل صاحية اعمل حاجات علشان اعوض..انا في حالة تعويض دائمة!!

لازم اعمل حاجات كتير في نفس ذات الوقت...لو عملت حاجة واحدة بس بيجي لي شعور بالخسارة!! يعنى لازم يكون في غسيل في الغسالة وفي نفس الوقت حاجة بتستوى على النار او في الفرن وفي الوقت اللى يستوى فيه الاكل اكون خلصت مواعين او طبقت غسيل او روقت درج من الادراج...وفي سيناريو تانى لو الاولاد بيعملوا الواجب اكون خلصت كام سطر كروشيه او رديت على رسائل او برضه اطبق غسيل او اعمل شوية مواعين او انشر...لازم كذا نشاط في نفس الوقت علشان احس بالانتصار (!!!) ولو انا في مشوار بره لازم اعمل كذا مشوار في بعض...هوا لازم كده...مثلا اشتري حاجة نازلة لها مخصوص وبالمرة ادفع فاتورة او ادفع فيزا او اشتري طلبات لماما او وانا بره اخلص مكالمات متأجلة...ولو انا في الشغل دايما في كتاب مفتوح على الكمبيوتر اقرا منه شوية وقت ما افضى من الشغل!! ولو الاولاد في التمرين لازم اكون بعمل اي نشاط على ما يخلصوا...لازم احس بالانجاز في اي حاجة! 

دلوقتي...بعد ما خلصت كل الادراج...والدواليب...والضلف...ايه بقى؟!! 

قلت اغسل سجاجيد....المشايات الصغيرة لانى مش هاقدر على السجاد...غسلتهم...رحت على الشنط...غسلت شنط المدرسة والشنط القماش....ها؟؟؟ انزل الصيفي واطلع الشتوى....وانضف تحت السراير....وايه تانى؟؟  قلت اغسل فرش المكياج...فرش الشعر...المع النجف...المع الشبابيك...وبعدين؟؟؟

لازم اخلص!!! لازم استغل الوقت....لازم اخلص اللى ورايا كله لازم لازم!!!

عيشت نفسي في حالة توتر رهيبة....بجد....حاسة بالخسارة وانى ضيعت وقتي على الفاضي...مخلصتش قائمة الحاجات اللى مطلوبة كلها....لسه منضفتش النيش..ولا ذاكرت للاولاد (رغم ده كان اولى من الترويق اللى مالوش معنى)  ولا كتبت (مقال واحد بس اتكتب مع انى كنت مخططة ارجع للكتابة تانى)...مقرتش غير كتابين وفي التالت (كان لازم اقرا اكتر)...اشتغلت كانافا وكان لازم اشتغل كروشية شوية...(انا بحب التلوين جدا) كان لازم الون اكتر....وكان لازم اقرا انجليزي كمان مش عربي بس!! ومقرتش قران (وكان الاولى اقرا قران) - كان لازم اصوم كمان..صمت يومين بس وده قليل...ركبت بازل 500 قطعة وكان المفروض اعمل الالف قطعة كمان او اركب واحدة 500 كمان!! 

اكتشفت انى بعذب نفسي باتقان! 

اتكلمت مع صاحبتي وقالت لي لازم اعكس...بدل قائمة "اللى مخلصش" اعمل قائمة انجازات

لقيتها مش وحشة...معقولة الى حد ما! ودورت على الراحة...رغم الاجازة...فين الراحة؟ انا لو قعدت شوية واتفسح على النت كده من غير هدف بحس بالذنب!! حتى القعدة على النت بقيت اشوف هاستفيد من الوقت ازاي!! حولت الهوايات الى الزام يومي!! حولت القراءة الحرة الى واجب...بقيت اقيس اليوم بعدد انجازاتى (الوهمية) فيه!!

وبالتالي شعور الراحة مش بييجي...ولا حتى شعور الرضا عن النفس!!

قررت ابطل اللى بعمله ده...قررت اريح دماغى شوية من التفكير ومن رص المهام اللى مالهاش لازمة!! في شوية شغل كل يوم يتعملوا و خلاص...اقرا للمتعة مش للواجب...اقعد على النت العب للترفيه...هاتفرج على افلام اكتر...هاسمع موسيقى في البلكونة والدنيا ضلمة شوية من غير ما اعمل حاجة جنبها...مش هاخلي الموسيقى خلفية لشغل بعمله!

قررت ارحم نفسي المسكينة شوية...هاعجز بدري كده!!

ده انا كان بيجي لي افكار انا يا ترى هاقدر اعمل كده لما اكبر في السن ولا لا!! وكنت بفكر في بدائل للانشطة دي بانشطة اقل اجهادا علشان لما اكبر اقدر اعملها (!!!)

لازم "اعيش" كل الحالات...الراحة والانشغال والالتزام والاختيار (!) اختيار اعمل ايه في وقت فاضي تماما واللى يتعمل في الوقت ده محاسبش نفسي عليه كمان...حتى لو قعدت كده معملش حاجة...لازم اغير العادات السيئة دي!! 

وجعت دماغكم وضيعت "وقتكم" :)

ريم اسامة 

لينك المدونة على الفيسبوك:

https://www.facebook.com/groups/329904227056535/?ref=bookmarks