عارفين زرار ال undo؟ اللى تدوس عليه يلغي اللى اتكتب مثلا...حاجة ترجع شكل الصفحة زي الاول
متخيلين لو الزرار ده في حياتنا هاندوس عليه كام مرة؟؟
اللى مذاكرش ونجح على الحركرك وعانى علشان يلاقي شغلانة (لو معندوش واسطة يعنى) ولما يلاقي زملاء الدراسة بيرتقوا ويعلوا في اعمالهم ومناصبهم واللى خلاص استقر في شغله وبدأ يدور على استقرار حياته الشخصية ويتجوز ويخلف ...يا ترى اخينا الفاشل ده لو عنده اختيار الرجوع لاول يوم دراسة في اول سنة...هايعمل حاجة غير اللى عملها؟ هايحاول ينجح؟ هايحاول يفهم وياخد كورسات في اجازة الصيف الطويلة (بدل السرمحة على القهاوي والنواصي والتعارف على بنات لامؤاخذة على النت)؟ هايحاول يدخل في اي شركة او بنك او مؤسسة يتدرب في فترة الصيف كل سنة علشان لما يتخرج يكون له الاولوية في التعيين؟
لما واحدة تصمم على واحد بتحبه اوي وبتموت فيه ومش شايفة الدنيا غير بوجوده...عارضت اهلها واصحابها وصوت العقل علشان تتجوزه...وبما انه اكيد "سنكوح" وضاربة السلك مرتين تلاته وشخصيته فيها خلل هايبان لها حقيقته بسرعة (امال يعنى كل الناس معارضة ليه؟!!) وبعد الجواز وبعد ما شعلة الحب تنطفي ومايتبقاش معاها في البيت غير عيوبه اللى مكانتش عايزة تشوفها...لما تواجه كدبه اللى بيجرى مع الدم او بخله ولا قلة ادبه ولا طول لسانه وايده او نتانة في المعاملة او غباء في اسلوب الحياة او عدم رغبة في الرقي بمستواهم او معايرتها باي نقص في الشكل او ايذائها نفسيا او انه يحرمها من اهلها ومن حقوقها في العمل عند اي مشكلة ياخد منها عيالها (لو لحقت تخلف يعنى) ويفرج عليها الجيران واللى ما يشتري يتفرج!! ....لو لقت انه بيستلذ بمضايقتها واذلالها انه بيصرف على البيت (ده انا متفائلة وبقول انه بيشتغل وبيصرف!!) - او يكون مثلا نطع ومستحل فلوسها ومش بيصرف غير على نفسه واهوائه....لما متعرفش هوا فين ولا جاي امتى ولما يجي وتواجهه باللي مضايقها ويكون اسهل حاجة عنده انه يضربها! لما تخلف وتلاقي ان عيالها بدا يظهر عليهم مشاكل نفسية عميقة اثر معاملته الوحشة ليها وليهم!! يا ترى لو اتيح ليها اختيار الرجوع للمربع الاول...هاتختاره ولا هاتضرب نفسها بالجزمة مية مرة قبل ما تبص في خلقته؟؟ هاترضى بالراجل اللى مش بيعرف يتكلم كلام حلو بس بيعبر عن اللى جواه بالسلوك الطيب ولا هاتختار ابو كلام معسول ومن جواه فاضي؟؟
لو واحدة هجرت بيتها وسابت جوزها علشان تحقق ذاتها وطموحها في انها تكون في منصب مهم وشأن في اي مجال...سابت جوزها الراجل المحترم اللى عمره ما احرجها قدام حد ولا طلب منها حاجة فوق طاقتها ...جوزها اللى بيقدر دور المرأة في المجتمع وفي حياة الراجل ومقتنع ان "البيت ست"....الرجل اللى اختارها دون عن كل السيدات لتشاركه الحياة ويخلف منها ....اختراها ليرجع اليها بعد عناء العمل والحياة ويرمي همومه على عتبه بابها....تخلت هي عنه لطموحها اللى بيخلص عند سن الستين!!! طيب وبعد كده؟ هاتدور على شغل خاص مش مشروط بسن؟ لما الراجل ده اللى كان يتمنى لها كل الخير ويرضى باقل مشاركة منها في المنزل ومتفهم طبيعة عملها (ليس لايمانة الكامل باي من دورها ولا عملها...ولكنه بيساندها علشان بيحبها!!)...تلاقيه مع واحدة غيرها وسعيد....ومراته الجديدة كمان سعيدة ومخلياه في مكانة عالية وتلبي له كل طلباته من غير ما يطلبها حتى....هاتحس بايه؟ هاتفرح ان معاها شهادة فخرية وشهادة شكر واعزاز وتكريم واسمها مكتوب وسط لوحة كبيرة على الحيطة؟... هاتحس ان المكانة الادارية او العلمية اوالبتنجان اللى هيا حققته بعيد عن دفء البيت اهم من حياتها الشخصية؟ انا مش بقلل من دور الست في المجتمع او في العمل...ولكن بذمتكوا كام مثال شفتوه من الستات دول؟ تفتكروا الغرور والكبر هايخليها تندم؟ ولو قدامها اختيار انها تدوس على زرار الundo هاتدوس عليه؟ هاتحاول تجمع بين العمل والبيت في تناغم؟ في اوقاف فراغها هاتسعد جوزها و لا برضه كانت تتفرغ للمزيد والمزيد من العمل؟!!!
اللى بيخون مراته او اللى بيخون الامانة او اللى بيتخلى عن بعض المبادئ مقابل بعض المتعة...زي مثلا المخدرات او واحدة غير مراته ...وعجبه شعور المغامرة...شعور انه بيعمل حاجة غلط في الخفاء او انه مع واحدة تانية غير اللى ملزم يرجع لها كل ليلة....الملزم يصرف عليها ويوفر لها مستوى معين من الحياة والمتطلبات...غير اللى بتحاسبه وتوجع دماغه بخطط المستقبل و"ازاي هاندخل العيال المدرسة السنة دي بعد ما غليت المصاريف"....واحدة غريبة وجديدة وشعوره وهوا معها انه صغير وشاب طايش....مفيش راجل مش عايز يحس انه صغر تانى ....بس يا ترى لما ضميرة يوجعه هايقدر يبطل الخيانة دي..ولا هايقدر ينيم ضميره؟ لما مراته تعرف (ومفيش ست مش بتحس ان جوزها بيخونها على فكرة سبحان الله ) هيابرر لنفسه ازاي؟ هايحترم نفسه ازاي؟ طيب لما المشكلة تعدي على خير (لانه اقنعها انه الشيطان - بجد اكتر حجة ساذجة سمعتها في حياتي) ورجعت حياته مستقرة...لما يزهق تانى بقى.. هايدور على واحدة من اياهم تانى بس المرة دي هايبقى اكثر حرصا؟!!! اصل الموضوع ده ساعات بيكون زي الادمان صعب الواحد يبطله مهما حس بالندم!! لو الراجل ده اتاحت له الفرصة انه يدوس على الزرار ويرجع لقبل الخيانة خالص...هايرجع ؟ ولا هايرفض يدوس عليه علشان بقى مبسوط مع ستات غير مراته؟!!!! بقى عاجبه شعور "مغامرات ايام ثانوي"؟
اللي بيعامل اولاده بقسوة اعتقادا منه انه بيربيهم علشان مايطلعوش "خرعين"...يضربهم على اهيف الاخطاء لو تكررت...مفيش اي غضاضة انه يهزأهم ويجردهم من كرامتهم قدام اي شخص...مفيش مشكلة لو زعق له في الشارع وابنه شحط طويل كده ويحرجه..عادي...ماهو لازم يبقى راجل مع ابنه علشان ابنه يطلع هوا كمان راجل مع عياله!!! سلسلة من التصرفات الغبية! ولو اكتشف ان ابنه مخبي عليه حاجة (علشان خايف ) يبهدله ويطلع فيه القديم والجديد من اساليب الضرب المختلفة والاهانات!! وغالبا بيكون في المقابل ام ضعيفة الشخصية مع ابنها ومدلعاه اوي...الابن بيطلع انسان متلخبط....قاسي جدا...او ضعيف...وغير متزن ولازم بيكون غير واثق في قدراته وخايف من الصراحة! انسان جبان ومش بعيد ابدا يغلط ويخاف يقول...ويحاول يداري على الغلط ده بغلط اكبر....وهكذا لحد ما يلاقي نفسه في مصيبة سودا مش عارف يلمها....واكيد هايروح في داهية! كل ده علشان اب غبي وام ضعيفة بتعوض غباء الاب بالاستهتار مع الولد!!! لو الاب والام بقى عندهم الاختيار للرجوع للمربع الاول في التربية هايرجعوا؟ هايتصرفوا ازاي طيب؟ الاب هايحاول يبقى صاحب الولد؟ الام هاتحاول تبقى اشد واكثر صرامة ولكن مع بعض اللين؟ ولا الاتنين هايختارو انهم مايخلفوش اصلا!!!!!
يا ترى لو فعلا بجد عندنا الاختيار ده هانستخدمه؟ متهيالي في ناس هاتفضل تدوس عليه لحد ما يبوظ ...هاتادوس عليه لحد ما ترجع قبل ما تتولد...وتختار انها متجيش اصلا!!!
اللى شايف ان في لسه مجال في الرجوع عن الغلط....اللى متاكد انه غلط بس بيقاوح....واللى عارفة ان جوزها كويس بس بتعاند معاه....واللى لسه قدامه طريق للنجاح ومكسل....ارجوكم فكروا كويس....الزرار ده مش موجود...المربع الاول انت واقف عليه دلوقتي....دلوقتي بس!!! بكره مش هايبقى موجود!!
ريم اسامة
No comments:
Post a Comment