مشكلة جامدة لما يكون الزوج طبيعه شغله مقرفة..لانه ببساطة بيطلع كل ده على دماغ مراته في البيت!!
حتى لو الست بتشتغل فهيا مش ممكن هاتقعد مثلا لحد عشرة بالليل في الشغل (الا نادرا) بس الراجل ممكن طبعا
ويا سلام بقى لو الست بتشتغل نص وقت او مش بتشتغل اصلا (دي ربنا معاها فعلا)...الراجل متخيل ان الست اللى في البيت دي قاعدة بالبيجامة مريحة دماغها وماسكة الريموت بتتفسح بين الافلام والمسلسلات والبرامج وبتقزقز لب وبتعملها حلة فيشار كل ساعتين مع مج الشاي او النسكافيه او البيبسي...ولو عايزة تدخل تريح شوية بتديها ساعتين تلاته العصاري...ولو عايزة ترغي في التليفون بترغي...عايزة تقعد على النت مفيش مانع....تعمل الاكل اللى على كيفها...تطلب اكل من بره .... تنزل تتمشى شوية في الشارع....الراجل في مخيلته ان الست اللى قاعدة في البيت "يا سعدها يا هناها وستات مصر كلهم بيحقدوا عليها من قلبهم"
تعالوا بقى للواقع شوية من فضلكم
الست اللى قاعدة في البيت دي بتتذل ذل الابل علشان هيا قاعدة وجوزها بيشتغل وهوا بيجيب فلوس وهيا تفرتك فيها! ولو الفلوس خلصت بيتعلق لها المشانق! (على فكرة ده مش من خيالي الجامح...ده من ارض الواقع واللى مش مصدق يدخل اي جروب مشاكل على الفيسبوك ويقرا ويملَي عينه وقلبه من العينة دي)
الراجل اللى بيشتغل طول الاسبوع بيبقى عايز يريح نفسه في الويك اند وبالتالي الايام كلها شبه بعض عندها ومفيش خروج ولا ترفيه اصلا!!! (الله؟ مش جوزها بيشتغل كتير؟ كمان هاتخرجه في الويك اند؟ ايه الكفر ده؟)
الست اللى في البيت يعنى مفيش حضانة للاطفال اقل من سنتين ونص!! في حد على بيَنة يعنى ايه طفل رضيع او اصغر من سنتين ونص في البيت؟ جحيم!! الطلبات والزن والست عينها وسط راسها 24 ساعة لحسن يعمل مصيبة ويا سلام بقى لو في رضاعة طبيعي (دي كافية لدخولها الجنة) وغيار بامبرز وترجيع وكركبة وجري وراه وصريخ بلا سبب...الخ
لو اكتر من طفل....دي عايزة لها مقالين تلاته!!
الست اللى قاعدة في البيت ملهاش حجة ان العيال يطلعوا وقحين! او حد يكون قليل الادب او مش بيصلي او مابيتبعش الاداب العامة للمائدة / استقبال الضيوف / دخول الحمام / معاملة الاكبر سنا...الخ!
ولا ليها حجة انها مثلا تجيب اكل من برة...ما هي قاعدة بقى هاتكلف الراجل ليه فوق طاقته؟ ولا هيا عايزة تريح نفسها وخلاص؟
اللى قاعدة في البيت اكتر من الراجل بيدي جوزها الحق انه يحاسبها على اي هفوة مش عاجباه...يعنى لو في قميص مش نضيف...ايه الحجة انه مش نضيف؟ ماهي قاعدة في البيت وهو طالع عينه في الشغل...فين الشرابات؟ التيشيرتات؟..الخ!
ملهاش اي مبرر انها تحرق الاكل او تسيب الشقة مكركبة او حتى يكون لها طفل مش شاطر في المدرسة وطالع الاول!
ومش هاننسى طبعا ان تعترض في وجودة على اي قناة شغالة على التليفزيون لانه هايقولك يعنى جت على الساعة اللى بقعدها قدامه؟
مش بنكر ان الرجالة فعلا بيتعبوا في شغلهم...وان البيت قائم بسببهم....ان شبابهم بيهدر في المكاتب علشان يعلموا عيالهم....ولا ان اعصابهم محروقة على طول في سبيل لقمة العيش....ولكن في المقابل الست كمان كده....الست بتدبل بين الاربع حيطان...بتنطفئ تدريجيا بعدم المبالاه او الاهتمام وعدم المشاركة او التشجيع
مش هاينفع هوا بس اللى يشتغل ويتعب...ومش هاينفع هي بس اللى تربي وتعلم...مش ممكن هي بس اللى تاخد بالها من كل حاجة خاصة بالعيال والبيت بجد كده الحمل تقيل جدا على الست!
الحياة زي التانجو...لازم اتنين سوا زي ما المثل الاجنبي بيقول
it takes two to tango
ورفقا بالقوارير يا عم الحاج
No comments:
Post a Comment