اختراعات صديقة لست البيت

في اختراعات غيرت وجه الحياة (بالنسبة للست) ومنها

اولا .العظيم...الفتَاك...الجامد اوي...البامبرز!! في ام متخيلة حياتها من غيره؟ ستات زمان بيتضايقوا اوي مننا علشان عندنا بامبرز وهما كان عندهم كافولة :D يا عيني الست من دول تمشي باكياس بلاستيك علشان لما ابنها يعمل الدنيئة تقدر تدفنها...ابنها ولا على باله حاجة...يعمل على كيفه وبراحته وفي اي مكان وفي اي وقت...وهيا تلحق تغير له علشان ده قماش...هاينشع في دقايق!! تغير له وتشيل الكافوله بالخير اللى فيها في شوية اكياس في شنطتها!! متخيلين يا امهات تمشي ومعاكي الجمرة الخبيثة في شنطة ايدك!! وكمان تروحي البيت تخرجيها وتنضفيها!!! لالا كتير اوي كده..على فكرة الجيل ده من الامهات اثبت انه اسوأ جيل من الحموات! ماهي عانت جامد اوي بصراحة علشان تدي ابنها بسهولة كده لواحدة بتغير لابنها "بامبرز"!

الغسالة الكهربا...مش قادرة استوعب ان الستات كانوا بيغسلوا الملايات والبنطلونات الجينز والفوط على ايدهم!! حتى الغسالة النص اوتوماتيك جنة بالنسبة باللى كان عليه الستات زمان. كان في يوم مخصوص اسمه يوم الغسيل! وكان يوم مميز جدا في ارض الحمام في حضن الطشت! الستات المقتدرات كانوا بيجيبوا الغسالة... (ست مش آلة) ست مهنتها الغسيل...تغسل وتشطف وتعصر وتنشر...يوم في الاسبوع او يومين لو افراد العيلة كتير! 

المكنسة الكهربا...بعد الردة والبسكوت واللب وقشر السودانى..او كيك في ايد العيال...كمية الفرافيت كتير اوي...او لو جالك ضيوف دايسين في الطين ويدخلوا الشقة ويفرشوهالك طين ورمل...الحل زمان كان المقشة والجاروف وتكنسي والفتافيت دي تتبعتر في كل حتة...تلمي شوية وتكنسي تانى...وتالت...ورابع....او الحل الامثل وهو تنفيض السجاد من البلكونة وتكنسي الارض وبعدين تفرشي. خلع كتف يعنى. دلوقتي المكنسة في خمس دقايق الدنيا كلها تبقى زي الفل. حقيقي اختراع يستاهل كل خير.
التكييف...اللى اخترع التكييف ده ربنا يستره دنيا واخره ان شاء الله!! وطبعا ده مش اختراع لست البيت وبس...ده للناس كلها واللى عنده تكييف يحافظ عليه اكتر ما بيحافظ على عياله! 
السخان...سخان المياة...زمان كانت الستات بتغلي المياة في حلل وبعدين تتدلق في طشت وعلى حسب موود اللى هايستحمى يزود مياة ساقعة....ومفيش اي مانع العملية يتم تكرارها على مدار اليوم في الشتاء. احنا اترحمنا كتير اوي بالسخانات فعلا! 
عصارة البرتقال ام فيشة...كان مرار طافح ...الست تجيب البرتقال...وتجيب الحتة البلاستيك اللى بيسموها عصارة...وتفضل تلف في البرتقال في العصارة لحد ما تملى الاكواب...ومفيش مانع ان حد يطلب تانى!! ايدها تورم...وتلسعها من الحامض...الحمد لله على نعمة العصارات الكهربا. وزي الخلاط الكهرباء...عصير الليمون اليدوي طعمه وحش اوي! تفضل الست تقلب تقلب تقلب في السكر وبعدين تعصر الليمون (وبرضه مش هايعجب على فكرة)
ومش هاننسى ست الكل...حبيبة الملايين...الكيتشن ماشين kitchen machine ... ادلقي اي حاجة جوا تطلع مفرومة...او مخلوطة...او معجونة...انى بس ادلقي فيها وخلاص...وشغلي وعيشي حياتك :) 
وطبعا الموبايل علشان بتقدر تجيب بيه عيالها وجوزها ولو كانوا في اخر الدنيا...مرة سمعت ام بتقول ان الموبايل بقى عامل زي سلسلة الكلب....لو عيل من دول غاب تشد له تليفون يرجع على طول...تشبيه سفيق انا عارفة بس عجبني :)
تحيا الاختراعات

ريم اسامة