سياسة حاضر!

سياسة "حاضر"! 

الرجالة بتقول الستات هم من اخترعوها..."كلمة حاضر بتريح"...والستات بتقسم ان الرجالة هم من يتبعوها !

بذمتكوا يا ستات بنطلب الحاجة من الرجالة كااااااااااااام مليون مرة علشان تتعمل؟

ساعات بحس ان الرجالة مش بتعملنا اللى بنطلبه علشان نزهق ونعملها بنفسنا ونحرم نطلب تانى! او يزهقونا يا نتخلى عن الطلب او نيجي على حد تانى نطلب منه.

كام مرة طلبتي من ابوكي او اخوكي بدل من جوزك علشان اهما هايعملوا  اللى انتى عايزاه من غير تضرر؟؟

كام يوم صبرتي علشان لمبة حقيرة تتغير؟

كام يوم علشان يطلع لك حاجة فوق الدولاب او يشيل لك المرتبة؟

كام يوم علشان يشيل السجادة؟

او علشان يشيل معاكي حاجة في العفش لان ضهرك ممكن يتفتق لو عملتيها لوحدك؟

مشوار طلبتيه اتأجل كام مرررة علشان يتعمل وياريته بيتعمل بصفاء نيه...لا..بيتعمل ووشه زي الفانلة العرقانة!

كام مرة طلبتي منه يجيب السباك او النجار او الكهربائي ولسه مجاش حتى هذه اللحظة او جبتيه انتى وخلاص وغامرتي انه يكون متحرش مثلا؟

في كام مراية مكسورة او لوح زجاج محتاج يتغير وانتى خلاص اتعودتي اصلا على منظرهم ومش فارق معاكي يتغير ولا يترموا في الزبالة؟

كام مرة طلبتي منه ينزلك مكان بعيد علشان عايزة تشتري حاجة للبيت (نجفة او تابلوه او مراية - حاجات من هذا القبيل) وبقالك سنين مستنية؟

مين جوزها وعدها بخروجة معينة في موسم معين وكل سنة بتستني وبرضه مش بتروحي...زي مثلا رمضان او شم النسيم او العيد...في اماكن تبقى هاتفطسي وتروحيها  وكل سنة يوعدك بيها وكل سنة بيطلع بحجة شكل...خيالهم واسع اوي الرجالة بيجيبوا الحجة من فوق الرف..مش بيتعبوا حتى في التفكير....الحجج متغلفة جاهزة! الغريب في الموضوع ده ان الست بتفضل هبلة ومصدقة ان السنة اللى بعدها هاتروح! سذاجة!!

الستات فعلا برضه بتقولها بس الرجالة حريفة ! 

يا رجالة..من فضلكم لو فعلا مش ناوي تعمل حاجة بلاش تسكت الست وتصبرها على الفاضي...مش ناوي تروح السينما بلاش تقولها الاسبوع اللى جاي..لان ممكن يبقى نفسها في فيلم معين وهايتشال وانت اساسا مش في نيتك توديها...بلاش انانية...قولها انك مش عايز تروح سينما وهيا بكده تروح مع اي حد غيرك...على فكرة من كتر ما بتصبرها علشان مش عايز توجع دماغك وتقرف نفسك بطلباتها هي بالتدريج بتفقد الثقة فيك...ومش هاتعتمد عليك في حاجة (يا فرحتك طبعا) بس انت كده بتسلب من نفسك احد مقومات الرجولة!! 

والله انت عايز تبقى خيال مآتة محدش يعتمد عليك في حاجة وتبقى كلمتك مطاطة زي اللبانة محدش بياخد بيها...براحتك!!
واحب اوجه نصيحة للسيدات: بلاش خيبة يا حبيبتي انتى وهيا...اتعلمي ازاي تغيري اللبمة...وجلدة الحنفية....وتغيري الانبوبة...ازاي تدقي مسمار...ازاي تروحي وتيجي من غيره...اعتمدي على نفسك دايما وربي عيالك على كده كمان!

ربنا يهدي ويصبرنا!

ريم اسامة

https://www.facebook.com/groups/329904227056535/